1. Cintu nshi icisuma sana ico umuntu uuli onse engasalapo ukucita?

ILINGI line ifyo abafyashi basalapo ukucita filakuma abana babo pa nshita iitali. Abafyashi nga tabasalile bwino ifya kucita, kuti baletelela abana babo. Lelo nga basala bwino ifya kucita kuti balenga abana babo baba ne nsansa. Nomba na bana bene balingile ukusala bwino ifya kucita. Icintu icisuma sana ico umuntu onse engasalapo ukucita, kubombela Shifwe wa ku muulu uwatutemwa, Yehova.—Amalu. 73:28.

2. Fisuma nshi ifyo Yesu na bafyashi bakwe basalilepo ukucita?

² Abafyashi ba kwa Yesu balefwaisha ukwafwa abana babo ukulabombela Yehova. Kabili ifyo basalilepo ukucita fyalilangile ukuti ico bacindamike sana kubombela Yehova. (Luka 2:40, 41, 52) Yesu na o alisalile bwino ifya kucita ifyamwafwile ukucita ifyo Yehova alefwaya acite. (Mat. 4:1-10) Ilyo Yesu akulile ali uwa cikuuku, uwa cishinka, kabili uwashipa. Abafyashi bonse abatemwa Yehova kuti batemwa umwana wabo aba nge fyo Yesu ali.

3. Mepusho nshi twala-asuka muli cino cipande?

³ Muli cino cipande twala-asuka amepusho yakonkapo: Fisuma nshi ifyo Yehova asalile ifyakumine Yesu? Finshi abafyashi Abena Kristu bengasambililako ku fyo abafyashi ba kwa Yesu basalilepo ukucita? Kabili finshi Abena Kristu bacaice bengasambililako ku fyo Yesu asalilepo ukucita?

4. Finshi ifyacindama ifyo Yehova asalile ifyakumine Umwana wakwe?

⁴ Yehova alisalile bwino abafyashi abali no kukusha Yesu. (Mat. 1:18-23; Luka 1:26-38) Ifyo Maria alandile ukufuma pa  nshi ya mutima ifyalembwa mu Baibolo, filalanga ukuti alitemenwe sana Yehova ne Cebo cakwe. (Luka 1:46-55) Kabili filya Yosefe akonkele ifyo Yehova amwebele fyalangile ukuti alimutemenwe kabili alefwaya ukulacita ifyali no kulenga Yehova alasekelela.—Mat. 1:24.

5-6. Ni kuli finshi Yehova ashacingilile Umwana wakwe?

⁵ Yehova tasalile abafyashi abakankaala ukuti bakushe Yesu. Ifyo Yosefe na Maria batuulile ilyo Yesu afyelwe filanga ukuti bali bapiina. (Luka 2:24) Nalimo Yosefe alikwete umuputule uunono uwali mupepi ne ng’anda yakwe mu Nasarete, uo alebombelamo umulimo wa bukabasa. Bafwile tabakwete sana indalama nelyo ifikwatwa, maka maka lintu abana bafikile 7 nelyo ukucilapo.—Mat. 13:55, 56.

⁶ Yehova alecingilila Yesu ku fintu fimo ifyali no kulenga aba mu busanso, lelo talemucingilila ku mafya yonse. (Mat. 2:13-15) Ku ca kumwenako, Yesu alikwete balupwa abashasumine ukuti ali Mwana wa kwa Lesa. Elenganyeni ifyo Yesu aumfwile ububi ilyo pa kubala balupwa lwakwe bakeene ukusumina ukuti e wali Mesia. (Marko 3:21; Yoh. 7:5) Na kabili Yosefe nalimo afwile ninshi Yesu acili fye umwaice, kabili ici cifwile calilengele abe sana no bulanda. Apo Yesu e wali umwana umukalamba, afwile e watendeke ukubomba umulimo uo wishi alebomba. (Marko 6:3) Ilyo Yesu alekula alisambilile ifya kusakama ulupwa lwakwe. Kanshi afwile alebombesha sana pa kubasakamana. Alishibe ifyo cumfwika ukunaka pa numa ya kubomba akasuba konse.

7. (a) Mepusho nshi ayo abaupana balingile ukuyipusha nga balefwaya ukukusha bwino abana? (b) Bushe ifyaba pa Amapinda 2:1-6 kuti fya-afwa shani abafyashi ukusambilisha abana?

⁷ Nga ca kuti mwalyupa nelyo mwalyupwa kabili mulafwaya ukukwata abana, yipusheni amuti: ‘Bushe twali-icefya kabili twalitemwa Yehova ne Cebo cakwe? Bushe Yehova kuti atusala ukukusha umwana uwacindama uukafyalwa?’ (Amalu. 127:3, 4) Nga ca kuti mwalikwata kale abana, yipusheni amuti: ‘Bushe ndabasambilisha ukubombesha?’ (Luk. Mil. 3:12, 13) ‘Bushe ndesha apo ningapesha ukucingilila abana bandi ku fyabipa ifyaba mu calo ca kwa Satana?’ (Amapi. 22:3) Te kuti mucingilile abana benu ku mafya yonse ayo bengakwata. Lelo kuti mwabapekanishisha ku mafya ayo bengakwata ku ntanshi nga ca kuti cikuuku cikuuku kabili mu kutemwa mulebasambilisha ukulakonka ifyo Icebo  ca kwa Lesa cilanda. (Belengeni Amapinda 2:1-6.) Ku ca kumwenako, nga ca kuti lupwa aleka ukubombela Yehova, mulebomfya Icebo ca kwa Lesa pa kusambilisha abana benu ico cacindamina ukutwalilila ukuba aba cishinka kuli Yehova. (Amalu. 31:23) E lyo nga ca kuti lupwa nelyo cibusa wenu afwa, mulelanga abana benu Amalembo ayengalenga baleka ukuba sana no bulanda kabili baba no mutende.—2 Kor. 1:3, 4; 2 Tim. 3:16.

8. Ukulingana na Amalango 6:6, 7, finshi Yosefe na Maria balecita?

⁸ Abafyashi ba kwa Yesu balimukushishe bwino ica kutila Yehova alimutemenwe. Icalengele ni co balekonka ifyo Yehova alanda ukuti e fyo abafyashi balingile ukukonka. (Belengeni Amalango 6:6, 7.) Yosefe na Maria balitemenwe sana Yehova, kabili ico balefwaisha kukoselesha abana babo ukuti nabo bamutemwe.

9. Fintu nshi ifyacindama ifyo Yosefe na Maria basalilepo ukucita?

⁹ Yosefe na Maria balisalilepo ukulapepa Yehova lyonse pamo na bana babo. Ukwabula no kutwishika baleya mu kulongana mwi sunagoge lyali mu Nasarete cila mulungu, kabili cila mwaka baleya mu kusefya Ica Kucilila ku Yerusalemu. (Luka 2:41; 4:16) Bafwile ilyo baleya ku Yerusalemu balesambilisha Yesu na baice bakwe pa fyacitikile abantu ba kwa Yehova kale. Nalimo ilyo baleya mu nshila balepita na mu ncende shimo isho balandapo mu Malembo. Ilyo Yosefe na Maria bakwete abana abengi, nalimo calebakosela ukutwalilila ukupepa Yehova pamo na bana babo. Lelo Yehova alibapaalile nga nshi pa fyo batwalilile ukumupepa. Apo balemona ukuti ukupepa Yehova e kwacindeme sana, ulupwa lwabo lwalipaleme kuli Yehova.

10. Masambililo nshi abafyashi Abena Kristu bengasambilila kuli Yosefe na Maria?

¹⁰ Finshi abafyashi abatiina Lesa bengasambilila kuli Yosefe na Maria? Icacindamisha ico mwingacita, kulacita no kulanda ifingalenga abana benu bamona kuti mwalitemwa sana Yehova. Muleibukisha ukuti ubupe ubwacindamisha ubo mwingapeela abana benu, kubafwa ukutemwa Yehova. Cimo icacindamisha ico mwingasambilisha abana benu kulaisambilisha Baibolo lyonse, ukulapepa,  ukulaya mu kulongana, no kulabila imbila nsuma. (1 Tim. 6:6) Kwena mufwile ukulaifwaila abana benu ifyo bakabila (1 Tim. 5:8). Nomba muleibukisha ukuti icikafwa abana benu ukwisapusuka impela ya cino calo no kwingila mu calo cipya ica kwa Lesa, te ndalama nelyo ifyuma, lelo ni bucibusa bwabo na Yehova. *—Esek. 7:19; 1 Tim. 4:8.

11. (a) Bushe ukufunda ukwaba pali 1 Timote 6:17-19, kuti kwa-afwa shani abafyashi ukusala bwino ifya kucita ilyo balekusha abana babo? (b) Finshi ulupwa lwenu nalimo lwingasalapo ukucita, kabili Yehova kuti amupaala shani? (Moneni akabokoshi akaleti “ Finshi Mwingapanga Ukucita?”)

¹¹ Ala tulatemwa nga nshi ukumona ifyo abafyashi Abena Kristu abengi bafwa abana babo ukuba ifibusa fya kwa Yehova! Lyonse balapepa Yehova capamo na bana babo. Balaya mu kulongana kwa pa cilonganino e lyo na ku kulongana kwa citungu. Kabili balaya na mu kubila imbila nsuma. Indupwa shimo balaya mu kubila imbila nsuma mu ncende ishishibombelwamo sana. E lyo indupwa shimbi balaya mu kutandalako pa Bethel nelyo ukwafwilishako ukubomba mu mulimo wa makuule. Indupwa abasalapo ukucita ifi balaipeelesha ukubomfya indalama shabo, kabili limo balakwata na mafya. Lelo Yehova alabapaala nga nshi. (Belengeni 1 Timote 6:17-19.) Abana abakulile mu ndupwa sha musango uyu balatwalilila ukucita ifyo abafyashi babo balebasambilisha, kabili balatasha pa fyo abafyashi babo babakushishe bwino! *—Amapi. 10:22.

12. Cinshi Yesu alingile ukucita ilyo akulile?

¹² Wishi wa kwa Yesu uwa ku muulu lyonse alasala bwino ifya kucita, kabili na baishileba abafyashi bakwe pano isonde nabo balesala bwino ifya kucita. Na lyo line, ilyo Yesu akulile alingile ukulaisalila ifya kucita. (Gal. 6:5) Alikwete ubuntungwa bwa kuisalila ifya kucita nge fi fine na ifwe twakwata ubuntungwa bwa kuisalila ifya kucita. Afwaya nga asalilepo ukubika amano ku kucita ifya kuisekesha. Lelo abikile amano ku kucita ifyali no kulenga bucibusa bwakwe na Yehova bwakoselako. (Yoh. 8:29) Bushe abacaice muno nshiku kuti bapashanya shani Yesu?

13. Cinshi icacindama ico Yesu asalilepo ukucita ilyo ali umwaice?

¹³ Ilyo Yesu ali umwaice asalilepo ukulaumfwila abafyashi bakwe. Tatalile akanapo ukumfwila abafyashi bakwe pa mulandu wa kutila aletontonkanya ukuti alishibe ifingi ukubacila. Lelo lyonse “alebanakila.” (Luka 2:51) Apo Yesu e wali umwana umukalamba kwali fimo ifyo alingile ukulacita. Afwile alebombesha pa  kuti alecita ifi fintu. Kabili afwile alebombesha ukusambilila umulimo wa bukabasa kuli wishi Yosefe pa kuti aleafwilishako ukusakamana ulupwa.

14. Twaishiba shani ukuti Yesu aleisambilisha sana Icebo ca kwa Lesa?

¹⁴ Abafyashi ba kwa Yesu bafwile balimulondolwelele ifyo cali pa kuti afyalwe mu cipesha amano, kabili balimwebele na pa fyo bamalaika balandile pali ena. (Luka 2:8-19, 25-38) Yesu tapelelele fye pa kukutika ifyo abafyashi bakwe balemweba, lelo aleisambilisha na Malembo. Twaishiba shani ukuti Yesu aleisambilisha sana Icebo ca kwa Lesa? Pantu ilyo ali umwaice, bakasambilisha mu Yerusalemu “balipapile amano yakwe ne myasukile yakwe.” (Luka 2:46, 47) Kabili ilyo ali fye ne myaka 12, Yesu alishininkishe ukuti Yehova e Wishi.—Luka 2:42, 43, 49.

15. Bushe Yesu alangile shani ukuti alisalilepo ukulacita ukufwaya kwa kwa Yehova?

¹⁵ Ilyo Yesu aishibe ifyo Yehova alefwaya acite, asalilepo ukucita ifyo fine. (Yoh. 6:38) Alishibe ukuti abantu abengi bakamupata. Nangu ca kuti talefwaya ukuti abantu abengi bamupate, asalilepo ukumfwila Yehova. Ilyo Yesu abatishiwe mu 29 C.E, ico abikileko sana amano kucita ukufwaya kwa kwa Yehova. (Heb. 10:5-7) Na lintu Yesu alefwa pa cimuti ca kucushiwilwapo, talekele ukufwaya ukucita ukufwaya kwa kwa Wishi.—Yoh. 19:30.

16. Cinshi cimo ico abana bengasambilila kuli Yesu?

¹⁶ Muleumfwila abafyashi benu. Abafyashi benu tabapwililika nga filya fine Yosefe na Maria bashali abapwililika. Na lyo line, Yehova alipeela abafyashi benu umulimo wa kumucingilila, ukumusambilisha, no kulamutungulula. Nga muleumfwila abafyashi benu kabili nga mulebacindika, ‘ifintu fyakulamuwamina.’—Efes. 6:1-4.

17. Nga fintu Baibolo ilanda pali Yoshua 24:15, finshi abacaice balingile ukuisalilapo abene?

¹⁷ Mufwile ukusala uo mukalabombela. Mulingile ukwishiba bwino Yehova, ubufwayo bwakwe, ne fyo mwingalacita ukufwaya kwakwe. (Rom. 12:2) Nga mwacita ifi mukasalapo ukucita icintu icacindamisha mu bumi bwenu, e kutila ukusalapo ukulabombela Yehova. (Belengeni Yoshua 24:15; Luk. Mil. 12:1) Nga mulebelenga no kulaisambilisha Baibolo lyonse, mukalatemenwako Yehova kabili icitetekelo cenu cikalakoselako.

18. Cinshi ico abacaice balingile ukuisalilapo ukucita, kabili finshi fikafumamo?

 ¹⁸ Mufwile ukusalapo ukulacita ukufwaya kwa kwa Yehova Intanshi. Abantu ba muli cino calo ca kwa Satana balanda ukutila nga mwabomfya ifyo mwaishiba ku kucita ifya kuisekesha e lyo mukaba ne nsansa. Nomba abantu ababika sana amano ku kunonka ifyuma ‘balailasaula amacushi ayengi.’ (1 Tim. 6:9, 10) Lelo nga mwasalapo ukulaumfwila Yehova no kulacita ukufwaya kwakwe intanshi, mukaba ne nsansa kabili ‘mukaba aba mano.’—Yosh. 1:8.

19. Finshi abafyashi balingile ukulaibukisha?

¹⁹ Mwe bafyashi mule-esha apo mwingapesha ukwafwa abana benu ukulabombela Yehova. Mulemucetekela, kabili akamwafwa ukulasala bwino ifya kucita. (Amapi. 3:5, 6) Muleibukisha ukuti abana bakasambilila ifingi ku fyo mucita ukucila ku fyo mulanda. Kanshi mulesala bwino ifya kucita ifingalenga ca-angukila abana benu ukulabombela Yehova.

20. Mapaalo nshi abacaice bakaipakisha nga basalapo ukulabombela Yehova?

²⁰ Mwe bacaice, abafyashi benu kuti bamwafwa ukulasala bwino ifya kucita. Lelo ni mwe mufwile ukuisalilapo ukuba ifibusa fya kwa Lesa. Kanshi mulepashanya Yesu, kabili mulingile ukusalapo ukulabombela Shinwe wa ku muulu uwamutemwa. Nga mwacita ifi mukakwata ifya kucita ifingi, Lesa akamupaala, kabili mukaba ne nsansa pali ino nshita. (1 Tim. 4:16) Lyena ku ntanshi Yehova akamupaala ica kuti mukaba ne nsansa ishingi nga nshi ukucila isho mwingakwata pali ino nshita!