1. Nyan ḇepyum risaiso snonggaku oser-oser bisa skinfir ya?

ROSAI sinan sya skinfir faro roma inai sesya, naiso ḇeyap kenem sena napyum ke roḇa isof siba. Skinfir sasar ido, nari roma inai sesya sismai samswen. Imbape sinan sya skinfir pyum ido, nari roma inai sesya kenem sena napyum ma sismai marasrisen. Mboi romawa sya fandun fa manggunsi skinfir pyum. Nyan ḇepyum fa snonggaku oser-oser skinfir iso sifarmyan faro Mami ḇesawarwar koḇedi ro nanggi, Yahwe I kada.​—Mz. 73:28.

2. Nyan ḇepyum rosai Yesus ma sinan ḇyesuya skinfir na?

² Yusuf ma Maria sumarisen susaramper roma inai suḇesya fa sifarmyan faro Yahwe I. Sumam nanema roi ḇefandun kaku insama siba ido, kenem sena napyum. (Luk. 2:40, 41, 52) Yesus manggundi dakkinfir nyan ḇepyum fa ifrur roi Yahwe imarisen na. (Mat. 4:1-10) Rarirya, Yesus iba ḇe snonggaku ḇefrur pyum, isoasuser, ma imakakak ḇa. Sinan ḇemgak faro Allah, na simarisen faro romawa ḇena rari ḇeradine.

3. Fakfuken rosai monda nari kokarem ro farkarkor ine?

³ Ro farkarkor ine, nari kokarem fakfuken nane: Nyan ḇepyum risai Yahwe kyinfir faro Yesus i? Farkarkor rosai sinan Kristen sya sun ro Yusuf ma Maria moḇ sukinfir raya? Ma moḇsa roma inai babo Kristen sya skinfir pyum raris Yesus i?

4. Roi ḇefandun kaku rosai Yahwe kyinfir faro Roma Ḇyedi?

⁴ Yahwe kyinfir pyum kaku sna ma kma faro Yesus i. (Mat. 1:18-23; Luk. 1:26-38) Moḇ Maria kyarem malaikat  ani, kofawi ima iswar kaku Yahwe I ma wos Ḇyena Refo ya. (Luk. 1:46-55) Ma komam ro moḇ Yusuf iso pyum akurfasnai ro Yahwe I, kofawi iswar Allah ma imarisen ifrur roi Sinan imarisen na.​—Mat. 1:24.

5-6. Rosai Yahwe idwarek ḇa faro Yesus i?

⁵ Koswarepen, Yahwe kyinfir sinan ḇenana faro Yesus i ḇa. Kofawi rofyor Yusuf ma Maria sukapar Yesus i kwar, roi sufrur na nfasnai kaku sima senana ḇa. (Luk. 2:24) Imbude yusuf dakbabow ro rum andir ḇyeja kukro ima ifrur ai ḇe robebor ḇepyum. Inja, kokyar sima sikenem syadadi ḇa. Rya Yusuf ma Maria suna kumpan ḇaido robebor nasrow kuf ḇa faro roma inai suḇesya kukro rya sisyadi ro fik kwar.​—Mat. 13:55, 56.

⁶ Yahwe kyadaunwarek Yesus i ro roi ḇemun ono, mboi idwarek i ḇa ro fafrowes nakam. (Mat. 2:13-15) Rupa ra, nya fafrowes ro karyer ḇyesi kukro sikyar faro i ḇa. Kokarapan na fyafko kaku fafisu kina fanam kaku ḇyesi, randak ya sikyar i ḇe Mesias ḇa. (Mrk. 3:21; Yoh. 7:5) Rya ismai fafrowes ḇese wer, isoine kmari Yusuf i, imar ibur i. Oso wer ido, ima roma ḇepon dirya, inja imbude iso na ḇemam kmari fararur ḇyena wer ma robebor sena. (Mrk. 6:3) Rofyor Yesus iba muryas, fyarkor pyum moḇsa myamwarek kina ḇyesi. Fyararur marḇak kako fa myam fandun sena ro rasras na. Inja kokyar kaku Yesus dakfawi snonggaku ḇefararur ro ras ḇesiper na simbrus.

7. (a) Imbeswa ḇemamfaduru romawa, fakfuken risai ipyum fa sifuken na? (b) Moḇsa mnuk ro Amsal 2:1-6 nafnoḇek sinan sya fa sfarkor roma inai sesi?

⁷ Ausya farḇuk kwar ma kwara fa swambri muyakna romawa ido, ipyum fa wafuken radine: ’Nuna sne ḇerun ḇo nuswar Yahwe I ma wos Ḇyena Refo ya kwar ke? Nufawi pyum kwar Yahwe kyinfir nu fa numamwarek kapira babo iswar ya ke?’ (Mz. 127:3, 4) Insama wafawi fasos kwar fa wakḇe kma ḇaido sna ido, kwarapan: ’Na yafarkor romawa ayesi fa sifawi sakfararur marḇak ke?’ (Pkh. 3:12, 13) ’Roi ḇepyum risai na yafrur fa yakadaunwarek roma inai ayesi ro fafrowes ḇemnis ḇa ḇero Ibiris dunya ḇyedine nari ḇekur baken  ma kakara sena?’ (Ams. 22:3) Na wapok fa wadwarek roi ḇesamswen nakam ḇekur si na ḇa. Imboi, nyan ḇepyum wafrur fa fasos si ro samswen nari ḇekur si iso, farkor pyum si fa siswar Yahwe I kuker siso pyum wos Ḇyena ro Refo ya. (Wasya Amsal 2:1-6.) Imnis ra, roma inai Besya srower sia soḇe siḇe simnai sfarmyan ḇe Yahwe ido, wasaramper si kuker farkor si ro Refo fa sifawi roi ḇefnai fa kosouser pdef faro Yahwe I. (Mz. 31:23) Ḇaido snonggaku waswar oso imar ido, fasnai nyan faro roma inai Besi fa sisrow mnuk ro Refo ḇebuk sneprei ma payamyum.​—2 Kor. 1:3, 4; 2 Tim. 3:16.

8. Rosai Yusuf ma Maria suso kwar ro anun ḇero Ulangan 6:6, 7 ya?

⁸ Yusuf ma Maria sufaduru Yesus i fa iba raris Yahwe moḇ imarisen raya kukro suso farkankin ro wos Ḇyena faro sinan sya. (Wasya Ulangan 6:6, 7.) Yusuf ma Maria suswar kaku Yahwe I, inja sumam roi ḇefandun kako iso susaramper roma inai suḇesya fa sakswar kaku Yahwe I.

9. Roi ḇefandun kaku rosai Yusuf ma Maria sumam pyum na?

⁹ Yusuf ma Maria sumam pyum roma inai suḇesya ari sena ḇe Yahwe I fa nambran pdef. Kokyar roi ine kukro sra ker fa siso fananjur ari ro rum ari ḇero Nazaret, ma siso munara Paskah ro Yerusalem. (Luk. 2:41; 4:16) Ro marandan sena ḇe Yerusalem, imbude Yusuf ma Maria sufarkor Yesus ma kasun ḇyesi fa sifawi fawar ḇekur Yahwe kawasa Ḇyesi ro ḇepon siwara. Imbude na simnai fasaw ro moḇ Refo dap anya fa sakmam na. Kokyar Yusuf ma Maria sumam pyum ari sena ḇe Yahwe I fa nambran pdef nama napyan ḇa kukro roma inai suḇesya sibor syadi wer. Mboi komam kada, sismai payamyum ḇyena! Srir ḇepon samsyom faro Yahwe I ro kenem sena, inja kenem sena napyum ḇo sfanam pdef faro Yahwe I.

10. Rosai sinan sya sfarkor ro Yusuf ma Maria su?

¹⁰ Kma ma sna ḇeswar Yahwe mgoya, rosai imbe mgofarkor ro Yusuf ma Maria su? Roi ḇefandun syadi iso mgofasnai faro roma inai mgoḇesi fa smam snar mgoma mgoswar kaku Yahwe I. Sasuref  ḇekakur ḇesrow fa mgobuk yoḇ si iso mgosaramper si fa siswar Yahwe I. Ma roi ḇefandun kaku oso wer iso, mgomam pyum ari sena ḇe Yahwe I fa nambran pdef raris sfarkor mnis, senadi, ma siso ḇaḇebaryas ya pdef. (1 Tim. 6:6) Oso wer ido, na mgosewar fandun baken sena kako ḇae. (1 Tim. 5:8) Mboi mgoswarepen, roi mgofrur nane nafnoḇek romawa mgoḇesi fa sfanam syadi ḇe Yahwe I. Rarirya, na sisewar nana ḇaido nasan ḇero dunya ine ḇa. Nane naiso ḇeyun si fa siḇye ro papupes dunya ḇeḇarḇor ine ma sisun ḇe dunya babo Allah fyasos kwar na. *—Yeh. 7:19; 1 Tim. 4:8.

11. (a) Moḇsa sinan sya siso anun ro 1 Timotius 6:17-19 fa skinfir nyan ḇepyum rofyor sfaduru roma inai sesi? (b) Rosai kina Besi bisa mgokara fa mgakfrur na, ma barakas rosai na mgosmai ya? (Mam ”Rosai Imbe Swewar fa Wasmai ya?”)

¹¹ Komarisen kaku kukro komam sinan sibor sya sisaramper roma inai sesya fa sfanam syadi faro Yahwe I! Sifrur ari sena kayamyam ḇesya kwar. Simyaren sra siso fananjur ma munara sarawrow. Ḇepyum wer iso sra sikofenḇair kakaku ine faro snonggaku ḇesesya kako. Kina ono sisya sra sbaryas ro moḇ sfararur manggun ro na ḇa. Sia wer sra sakmam Betel ḇaido saksaramper ro fararur ḇaḇawes. Sifrur roi ine ido, na sisewar kumpan wer fa sikmbran na, ma imbude roi ono napyan faro si ḇa. Mboi nari Yahwe ḇyebarakas kaku si. (Wasya 1 Timotius 6:17-19.) Sinan ḇefaduru romawa sesya fa siba ro nyan ḇeradine, sefnder na ḇa fafisu siba muryas, ma sfafko ḇaḇeri! *—Ams. 10:22.

12. Fafisu Yesus iba muryas, rosai fandun fa ifrur ya?

¹² Kmari ro nanggi kyinfir nyan ḇepyum faro Yesus i ḇesya kwar, ma sinan ḇyesu ro supswan ine kako sukinfir pyum nyan ḇesrow faro i. Imbape, fafisu Yesus iba muryas, fandun fa dakkinfir ro manggundi. (Gal. 6:5) Yesus dakmnis ra ko, manggundi bisa kyinfir rosai imbe ifrur na. Imarisen ido, bisa kyinfir fa syewar fandun manggun ḇyena ḇardi. Imbape, kyinfir monda fa fyanam faro Yahwe I ḇesya kwar. (Yoh. 8:29) Moḇsa roma inai babo ḇero baboine sakfrur ra Yesus i?

13. Roi ḇefandun kaku rosai Yesus kyinfir fafisu byabo kaker?

¹³ Fafisu Yesus ḇye kabor anya, kyinfir fa ryawrower sinan ḇyansu. Ifawi syadi ro kmari ma snari, mboi ryower ker roi sukofen na. Yesus ”iso user fadaduru suḇena”. (Luk. 2:51) Kokara roi ine monda, kokyar Yesus myam farfnak ḇa  syowi ḇyena ḇe roma ḇepon. Fyarkor sambraḇ kaku ro kmari Yusuf i, inja nane nafnoḇek i fa syewar kumpan faro kina ḇyesi.

14. Moḇsa kofawi Yesus ima fyarkor pyum Wos Refo ya?

¹⁴ Rya Yusuf ma Maria sukofenḇair yoḇ Yesus i kwar ḇekur kaparpar ḇyeja ro mujisat ma sukofenḇair Yahwe angginem Ḇyena. (Luk. 2:8-19, 25-38) Yesus ryower fawar anna monda ḇa, syewar kaku fa fyarkor fasfas ḇesren ro manggundi wer fa ifawi kaku. Moḇsa kofawi Yesus ima fyarkor pyum Wos Refo ya? Kofawi na kukro fafisu ibaḇa mgun anya, guru-guru agama sya ’sikandor kaku snar fawawi ḇyena ma kankarem ḇyena’. (Luk. 2:46, 47) Ma fafisu umur ḇyeja taun ri 12 anya, manggundi fyasnai kaku Kmari iso Yahwe.​—Luk. 2:42, 43, 49.

15. Moḇsa Yesus fyasnai ima kyinfir fa ifrur Yahwe marisen Ḇyena?

¹⁵ Fafisu Yesus fyarkor ḇo fyawi rosai Yahwe imarisen fa ifrur na, kyinfir fa ifrur na ḇeri. (Yoh. 6:38) Fyawi nari snonggaku ḇebor simarisen i ḇa, inja kyain kyarauser pyum kaku roi ine. Imboi, imgak ḇa ḇo kyinfir fa isouser monda faro Yahwe I. Rofyor Yesus ḇyebaptis ro taun 29 Masehi posa, myam fararur ḇefandun kaku iso ifrur roi Yahwe imarisen na. (Ibr. 10:5-7) Isyadi wer, fanam Yesus imbe imar ro ai kandera anya, iso Kmari marisen Ḇyena pdef.​—Yoh. 19:30.

16. Farkarkor rosai romawa sya sfarkor ro Yesus i?

¹⁶ Wasouser faro sinan Bansu. Kmami ma snami, su kako sunapes ḇa raris Yusuf ma Maria su. Mboi waswarepen, Yahwe iwan su fa sumamwarek Au, sufarkor Au, ma sufarkin pyum Au. Rwower su ma ḇesyowi su ido, nari ’wasmai aski’.​—Ef. 6:1-4.

17. Raris wos ro Yosua 24:15, rosai fandun fa roma inai babo sya skinfir ya?

¹⁷ Kwinfir mansei imbe wafarmyan yoḇ i. Fandun fa mambir kaku Yahwe I, rosai imarisen na, ma moḇsa na wafrur marisen Ḇyena anya rai. (Rm. 12:2) Mura kwinfir ḇeri roi ḇefarfnak ḇa ro kenem Bena, isoine kwinfir fa wafarmyan faro Yahwe I. (Wasya Yosua 24:15;  Pkh. 12:1) Nwa jadwal ḇaḇewasya Refo ḇepyum ma farkor pyum Refo ya kada, nari waswar syadi Yahwe I ma kakyar Bena faro I syambraḇ syadi wer.

18. Rosai fandun fa roma inai babo sya skinfir ya, ma bon ḇepyum risai na sismai ro na?

¹⁸ Kwinfir fa fakapon Yahwe I ro kenem Bena. Ibiris dunya ḇyedine doḇe wafarfnak awer ḇaḇekir Bena, bukisewar roi wamarisen na kada nari wasmai marasrisen. Mboi, koma kofawi kwar roi nane kam nafnai kandera nabor monda. (1 Tim. 6:9, 10) Imbape, rwower Yahwe I ma kwinfir fa wafakapon I ro kenem Bena ido, nari wasmai marasrisen ma kenem Bena napyum.​—Yos. 1:8.

19. Rosai sinan sya siswarepen kaku na?

¹⁹ Sinan mgoya, mgosaramper pyum roma inai mgoḇesi fa sifarmyan faro Yahwe I. Mgokyar I, ma nari isaramper mgo fa mgokinfir nyan ḇepyum faro si. (Ams. 3:5, 6) Mgoswarepen snar roma inai mgoḇesi smam rosai mgomam ḇe roi ḇefandun syadi ro awawos mgoḇena ma rosai mgofrur ker ro ras ḇe ras na. Inja, mgokinfir pyum fa mgosaramper roma inai mgoḇesi insama sifrur roi Yahwe imarisen na.

20. Barakas rosai nari roma inai babo sya sismai kukro skinfir fa sifarmyan faro Yahwe I?

²⁰ Roma inai babo mgoya, sinan mgoḇesi na sisaramper mgo fa mgokinfir nyan ḇepyum. Mboi manggun mgo iso ḇekinfir fa imbe mgofrur Allah imarisen ke roḇa. Iḇye kada, mgofrur ra Yesus i ma mgokinfir fa mgofarmyan faro Mami ḇesawarwar mgoḇedi ro nanggi. Mgofrur roi nane kada, nari kenem mgoḇena nafo doryaḇ ma payamyum ro fafisu ine kako. (1 Tim. 4:16) Ma ro ras ḇarpon iyama, nari mgoryaḇ syadi kukro mgokenem fyoro kuker marasrisen!