1. ?Wanem beswan desisen we eniman i save mekem?

PLANTE taem, desisen we ol perens oli mekem, i save afektem pikinini blong olgeta blong longtaem. Sipos desisen blong olgeta i no stret, pikinini i save kasem problem from. Be sipos oli mekem waes desisen, oli givim janis long pikinini blong i glad mo gat wan gudfala laef. I tru tu se pikinini i mas mekem ol gudfala desisen. Beswan desisen we eniman i save mekem, hemia blong mekem wok blong gudfala Papa ya long heven, Jehova.—Sam 73:28.

2. ?Wanem gudfala desisen we Jisas mo ol perens blong hem oli mekem?

² Ol perens blong Jisas oli wantem halpem ol pikinini blong tufala blong oli mekem wok blong Jehova, mo ol desisen we tufala i mekem oli pruvum se hemia nao mak blong tufala. (Luk 2:40, 41, 52) Jisas tu i mekem ol gudfala desisen we i halpem hem, blong mekem samting we Jehova i wantem. (Mat. 4:1-10) Taem Jisas i gruap, hem i kam wan man we i kaen, i holemstrong, mo i gat strong tingting. Wan pikinini olsem i save mekem ol perens blong hem we oli lavem God, oli praod mo harem gud.

3. ?Wanem ol kwestin we bambae yumi tokbaot long stadi ya?

³ Long stadi ya, bambae yumi tokbaot ansa blong ol kwestin ya: ?Wanem ol gudfala desisen we Jehova i mekem long saed blong Jisas? ?Ol Kristin perens oli save lanem wanem long ol desisen we perens blong Jisas i mekem? ?Mo ol yangfala Kristin oli save lanem wanem long ol desisen we Jisas i mekem?

4. ?Wanem impoten desisen we Jehova i mekem long saed blong Pikinini blong hem?

⁴ Jehova i jusum ol nambawan perens blong Jisas. (Mat. 1:18-23; Luk 1:26-38) Ol gudfala tok blong Meri long Baebol, oli soemaot bigfala lav we hem i gat long Jehova mo long Tok blong hem. (Luk 1:46-55) Mo aksen blong Josef blong obei long Jehova, i soem se hem i fraet long God mo i wantem mekem hem i glad.—Mat. 1:24.

5-6. ?Jehova i letem Pikinini blong hem i fesem wanem?

⁵ Makem se Jehova i no jusum ol rij perens blong oli lukaot long Jisas. Sakrefaes we Josef mo Meri i givim afta we Jisas i bon, i soem se tufala i pua. (Luk 2:24) Josef i wan kapenta, mo ating hem i gat wan smol woksop klosap long haos blong hem, long Nasaret. Fasin blong laef blong olgeta i simpol, antap moa taem famle blong tufala i kam bigwan, we insaed long hem i gat seven o moa pikinini.—Mat. 13:55, 56.

⁶ Jehova i protektem Jisas long sam denja, be Hem i no protektem Pikinini blong Hem long olgeta hadtaem. (Mat. 2:13-15) Eksampol, Jisas i mas dil wetem ol famle we oli no bilif. Traem tingbaot, ating Jisas i mas harem nogud, taem long stat, sam famle blong hem oli no akseptem se hem i Mesaea. (Mak 3:21; Jon 7:5) Mo tu, i sua se Jisas i harem nogud taem papa blong hem Josef, i ded. Samting ya i minim se Jisas we i fasbon, i mas tekova long bisnes blong famle. (Mak 6:3) Taem hem i stap gruap, hem i lanem blong lukaot long famle blong hem. Ating hem i mas wok had blong lukaot long nid blong olgeta. So hem i save filing ya we man i taed long en blong dei afta we i wok had.

7. (1) ?Wanem ol kwestin we i save halpem ol mared kapol taem oli tijim pikinini blong olgeta? (2) ?Olsem wanem Ol Proveb 2:1-6 i save halpem yu blong trenem pikinini blong yu?

⁷ Sipos yu wan mared kapol mo yu wantem gat pikinini, askem yu wan se: ‘?Mitufala i gat tingting daon, mo mitufala i lavem Jehova mo Tok blong hem? ?Jehova bambae i jusum mitufala blong lukaot long wan bebi?’ (Sam 127:3, 4) Sipos yu gat pikinini finis, askem yu wan se: ‘?Mi mi stap tijim pikinini blong mi blong i tinghae long fasin ya blong wok had?’  (Pri. 3:12, 13) ‘?Mi mi mekem bes blong mi blong protektem pikinini? ?Mi tijim hem long ol denja we hem i save fesem long wol blong Setan, we i save spolem bodi mo fasin blong hem?’ (Prov. 22:3) Yu no save protektem pikinini blong yu long evri traem we bambae hem i kasem. Hemia i no posibol. Be wetem lav, yu gohed blong tijim hem blong i lukluk i go long Baebol, blong hem i rere blong yusum taem i fesem ol jalens blong laef. (Ridim Ol Proveb 2:1-6.) Eksampol, sipos wan famle i jusum blong lego tru wosip, halpem pikinini blong yu blong i lanem long Baebol se from wanem i impoten blong holemstrong long Jehova. (Sam 31:23) O sipos wan famle o fren i ded, soem long pikinini olsem wanem blong yusum Baebol blong i harem gud bakegen mo i gat pis.—2 Kor. 1:3, 4; 2 Tim. 3:16.

8. Folem Dutronome 6:6, 7, ?Josef mo Meri i mas mekem wanem?

⁸ Josef mo Meri i halpem Jisas blong i kam wan bigman we God i glad long hem, from we tufala i folem ol advaes blong Jehova long ol papa mama. (Ridim Dutronome 6:6, 7.) Tufala i gat bigfala lav long Jehova, mo mak blong tufala i blong halpem ol pikinini blong oli gat semfala lav ya.

9. ?Wanem ol impoten desisen we Josef mo Meri i mekem?

⁹ Josef mo Meri i jusum se famle blong tufala bambae i joen oltaem blong wosip tugeta. I klia se evri wik oli go long sinagog long Nasaret, mo evri yia oli go long Jerusalem blong mekem lafet blong Pasova. (Luk 2:41; 4:16) Taem oli stap travel i go long Jerusalem, ating tufala i tekem janis ya blong tijim Jisas mo ol brata sista blong hem, long histri blong ol man blong Jehova, mo maet oli go luk ol ples we Baebol i tokbaot. Taem famle blong Josef mo Meri i stap kam bigwan moa, maet i no isi blong tufala i holemtaet fasin ya blong wosip tugeta. !Be traem luk blesing we oli kasem! From we oli putum wosip blong Jehova long fasples, famle blong tufala i stap klosap long Jehova.

10. ?Ol Kristin perens oli save lanem wanem long Josef mo Meri?

 ¹⁰ ?Ol Kristin perens oli save lanem wanem long Josef mo Meri? Samting we i impoten se, ol pikinini oli mas luk long ol tok mo aksen blong yu se yu lavem Jehova. Yu mas luksave se beswan presen we yu save givim long olgeta, hemia blong halpem olgeta blong oli lavem Jehova. Mo wan long ol impoten lesen we yu save tijim long olgeta, hemia blong folem wan program blong stadi, prea, go long ol miting, mo joen long wok blong prij. (1 Tim. 6:6) I tru, yu mas givim samting we pikinini blong yu i nidim long bodi. (1 Tim. 5:8) Be yu mas tingbaot se i no ol samting blong bodi, we bambae i halpem ol pikinini blong laef tru long en blong olfala sistem ya, mo go long niufala wol, be hemia fasin fren blong olgeta wetem Jehova. *—Esik. 7:19; 1 Tim. 4:8.

11. (1) ?Olsem wanem advaes long 1 Timoti 6:17-19 i halpem ol perens blong oli mekem ol gudfala desisen? (2) ?Wanem sam mak we famle blong yu i save tingbaot mo wanem ol blesing we i save kamaot from? (Luk bokis ya “ ?Wanem Ol Mak Blong Yu?”)

¹¹ !I gud tumas blong luk se plante Kristin perens oli mekem ol gudfala desisen long famle blong olgeta! Oltaem oli gohed blong wosip tugeta. Oli go long ol miting mo ol asembli tugeta. Mo oli joen long wok blong prij. Mo tu, sam famle oli go prij long ol teritori we yumi no stap prij long olgeta oltaem. Sam narafala oli go visitim wan Betel o sapotem ol konstraksen projek. Ol famle we oli jusum blong mekem ol samting ya, oli spenem mane blong olgeta, mo maet oli save fesem sam hadtaem. Be bambae Jehova i blesem olgeta bigwan. (Ridim 1 Timoti 6:17-19.) !Plante taem ol pikinini we oli gruap long ol famle olsem, oli gohed blong folem ol gudfala fasin ya, mo oli no rigret! *—Prov. 10:22.

12. ?Jisas i mas mekem wanem taem hem i stap gruap?

¹² Oltaem Papa blong Jisas long heven i mekem ol gudfala desisen, mo ol perens blong hem long wol ya tu oli mekem ol waes desisen. Be taem Jisas i stap gruap, hem tu i mas mekem ol prapa desisen blong hem. (Gal. 6:5) Olsem yumi evriwan, hem tu i gat presen ya blong jusum samting we hem i wantem. Sipos hem i wantem, hem i save jusum blong mekem samting we hem nomo i wantem. Be nogat, hem i jusum blong holemtaet frensip blong hem wetem Jehova. (Jon 8:29) ?Olsem wanem eksampol blong Jisas i save halpem ol yangfala tede?

13. ?Wanem impoten desisen we Jisas i mekem taem hem i yang?

 ¹³ Taem Jisas i yang, hem i jusum blong obei long perens blong hem. Hem i neva sakemaot ol advaes blong tufala, mo i neva gat tingting ya se hem i save moa long tufala. Be “hem i gohed blong obei long tufala.” (Luk 2:51) I sua se Jisas i tinghae long wok blong hem olsem fasbon. Hem i wok had blong lanem wok blong papa blong hem, blong hem i save givhan blong givim samting we famle i nidim.

14. ?Olsem wanem yumi save se Jisas i stadi plante?

¹⁴ I klia se perens blong Jisas i tokbaot merikel we i mekem se hem i bon i kam long wol, mo ol tok blong ol mesenja blong God long saed blong hem. (Luk 2:8-19, 25-38) Be Jisas i no ting se hemia i naf. Hem i stadi tu long Baebol. ?Olsem wanem yumi save se Jisas i stadi plante long Tok blong God? From we nating se hem i smol yet, be ol tija long Jerusalem “oli sapraes tumas long save blong hem mo long ol ansa blong hem.” (Luk 2:46, 47) Mo taem hem i gat 12 yia nomo, hem wan i kasemsave finis se Jehova i Papa blong hem.—Luk 2:42, 43, 49.

15. ?Olsem wanem Jisas i soem se hem i jusum blong mekem wil blong Jehova?

¹⁵ Taem Jisas i save wok blong hem long plan blong Jehova, hem i jusum blong akseptem wok ya. (Jon 6:38) Hem i save se plante man bambae oli no laekem hem, mo hemia i mas mekem hem i tingting plante. Be yet, hem i jusum blong obei long Jehova. Taem Jisas i baptaes long 29 K.T., impoten samting long tingting blong hem, hemia blong mekem samting we Jehova i wantem. (Hib. 10:5-7) Mo nating we hem i hang long pos blong ded, hem i no stop blong mekem wil blong Papa blong hem.—Jon 19:30.

16. ?Wanem lesen we ol pikinini oli save lanem long Jisas?

¹⁶ Obei long ol perens blong yu. Olsem Josef mo Meri, ol perens blong yu oli sinman. Nating se i olsem, Jehova i givim wok ya blong protektem, trenem, mo lidim yu, long tufala. Sipos yu tinghae long advaes blong tufala mo yu respektem otoriti blong tufala, bambae yu “gat gudfala laef.”—Efes. 6:1-4.

17. Folem Josua 24:15, ?ol yangfala oli mas jusum wanem?

 ¹⁷ Jusum se bambae yu mekem wok blong hu. Yu mas pruvum long yu wan se Jehova hem i hu, wanem wil blong hem, mo olsem wanem yu save mekem wil blong God long laef blong yu. (Rom 12:2) Nao bambae yu naf blong mekem desisen ya we impoten moa long laef blong yu, hemia blong mekem wok blong Jehova. (Ridim Josua 24:15; Pri. 12:1) Sipos yu folem wan gudfala program blong ridim Baebol mo stadi, bambae lav blong yu long Jehova i gohed blong gru, mo bilif blong yu long hem bambae i kam strong moa.

18. ?Wanem wan samting we ol yangfala oli mas jusum, mo wanem bambae i kamaot from?

¹⁸ Jusum blong putum wil blong Jehova fasples long laef blong yu. Wol blong Setan i promes se sipos yu yusum gudhan we yu gat blong kasem samting we yu nomo yu wantem, bambae yu hapi. Be trutok se, olgeta we oli wantem kam rij, oli “stap harem nogud long plante samting.” (1 Tim. 6:9, 10) Be sipos yu jusum blong lesin long Jehova mo yu putum wil blong hem fasples long laef blong yu, bambae yu gat wan gudfala laef mo “yu mekem fasin we i waes.”—Jos. 1:8.

19. ?Ol perens oli mas tingbaot wanem?

¹⁹ Ol perens, mekem bes blong yufala blong halpem pikinini blong yufala, blong i mekem wok blong Jehova. Yufala i dipen long Jehova, nao hem bambae i halpem yufala blong mekem ol waes desisen. (Prov. 3:5, 6) Tingbaot se samting we yufala i mekem, i gat moa paoa long pikinini, i bitim samting we yufala i talem. Taswe yufala i mas mekem ol desisen we i givim gudfala janis long hem, blong i mekem Jehova i glad long hem.

20. ?Wanem ol blesing we ol yangfala oli save kasem sipos oli jusum blong mekem wok blong Jehova?

²⁰ Yangfala, ol perens blong yu oli save halpem yu blong mekem ol waes desisen long laef. Be yu nao yu mas jusum blong mekem God i glad long yu. So yu folem fasin blong Jisas, mo yu jusum blong mekem wok blong gudfala Papa ya blong yu long heven. Sipos yu mekem olsem, bambae yu stap bisi mo yu gat gudfala laef naoia. (1 Tim. 4:16) !Mo long fiuja, bambae yu gat beswan laef mo bambae yu glad bigwan!