1. Aha do haputusan na sidearan na boi ibahen hita?

DONG do pengaruhni haputusan na ibahen namatoras hubani niombahni. Anggo lepak haputusan na ibahen, gabe dihut ma marsitaronon niombahni. Anggo dear haputusan na ibahen, tontu gabe martuah ma niombahni. Tapi, niombah pe maningon mambahen haputusan na dear ase boi sidea marmalas ni uhur. Haputusan na sidearan na boi ibahen hita ai ma mangidangi Jahowa.​—Ps. 73:28.

2. Haputusan aha do na ibahen si Josep, si Maria, pakon Jesus?

² Sihol do si Josep pakon si Maria ase ganup niombahni mangidangi Jahowa. Humbani haputusan ni sidea taridah ma mangidangi Jahowa do na sipontingan. (Luk. 2:40, 41, 52) Jesus pe, ibahen do haputusan na madear. Ai do na mangurupi ia boi mangkorjahon tugas na ibere Jahowa hu bani. (Mat. 4:1-10) Halani ai, dob magodang Jesus, gabe halak na bujur, setia, janah barani do ia. Tontu marosuh do ganup namatoras anggo niombahni marparlahou songon Jesus.

3. Sungkun-sungkun aha ma na laho iulas hita bani artikel on?

³ Bani artikel on, holi iulas hita ma haputusan aha do na dob ibahen Jahowa? Sonaha namatoras maniru si Josep pakon si Maria sanggah laho mambahen haputusan? Sonaha na maposo boi maniru Jesus?

4. Haputusan aha ma na dob ibahen Jahowa?

⁴ Ipilih Jahowa do halak na gabe siusihan laho pagodangkon Jesus. (Mat. 1:18-23; Luk. 1:26-38) Humbani  na ihatahon si Maria ibagas Bibel, taridah ma anggo ia mangkaholongi Jahowa, janah marosuh bani Hata-Ni. (Luk. 1:46-55) Si Josep pe, tongtong do manangihon Jahowa. Hunjai taridah ma anggo ia mangkaholongi Jahowa janah sihol pamalaskon uhur-Ni.​—Mat. 1:24.

5-6. Hasunsahan aha ma na iahapkon Jesus?

⁵ Lang halak na bayak na ipilih Jahowa gabe namatoras ni Jesus. Humbani galangan na ibere si Josep pakon si Maria, taridah ma halak na miskin do sidea. (Luk. 2:24) Tukang kayu do si Josep, anjaha ra do etek usahani na ibahen ia i dohor ni rumahni i Nasaret. Ra, pas-pasan do duit ni sidea halani siotikanni dong pitu niombah na laho ipagodang sidea.​—Mat. 13:55, 56.

⁶ Tontu ilinggomi Jahowa do Jesus humbani bahaya. Tapi lang ipadaoh Ia ganup hasunsahanni. (Mat. 2:13-15) Umpamani, borit do uhur ni Jesus halani lang dong saninani na porsaya anggo ia do Mesias na ijanjihon ai. (Mrk. 3:21; Joh. 7:5) Leganni ai, ra do podas matei si Josep. Tontu pusok tumang ma uhur ni Jesus halani ai. Anjaha maningon ia do na manggantihon si Josep marhorja laho mansarihon inangni ampa anggini. (Mrk. 6:3) Tontu iahapkon Jesus ma sonaha lojani marhorja laho mansari duit.

7. (a) Sungkun-sungkun aha ma na porlu irimangi sidea na domma marniombah? (b) Sonaha Podah 2:1-6 mangurupi namatoras mangajari niombahni?

⁷ Anggo domma marhajabuan nasiam janah sihol marniombah, rimangi ma sungkun-sungkun on: ‘Ai halak na toruh maruhur do ahu?’ ‘Ai holong do uhurhu bani Jahowa janah rosuh ahu mambasa Bibel?’ ‘Ai boi do ahu gabe namatoras na bujur hubani niombahku?’ (Ps. 127:3, 4) Anggo domma dong niombahmu, rimangi ma sungkun-sungkun on: ‘Ai huajari do niombahku ase pongkut marhorja?’ (Par. 3:12, 13) ‘Ai huurupi do sidea ase ulang marparlahou songon i dunia on?’ (Pod. 22:3) Tontu lang boi ipadaoh nasiam niombahmu humbani haganup hasunsahan na dong i dunia on. Tapi boi do iurupi ham sidea sonaha mangindahi podah hun Bibel sanggah dong parsoalan. (Basa Podah 2:1-6.) Umpamani,  anggo dong kaluarga na mamilih lang be manombah Jahowa, urupi ma sidea ase mangarusi mase ponting tumang totap setia hubani Jahowa. (Ps. 31:24) Atap, anggo dong kaluargamu na marujung goluh, patuduh ma hubani sidea ayat-ayat ni Bibel na boi mangapoh nasiam ase totap mangahapkon hadameion.​—2 Kor. 1:3, 4; 2 Tim. 3:16.

8. Parentah aha do na maningon idalankon si Josep pakon si Maria bani 5 Musa 6:6, 7?

⁸ Iparentahkon Jahowa do ase iajari namatoras niombahni mangkaholongi Jahowa. Ai do na idalankon si Josep pakon si Maria. Halani ai, gabe orot ma Jesus hubani Jahowa. (Basa 5 Musa 6:6, 7.) Holong tumang do si Josep pakon si Maria hubani Jahowa. Jadi marusaha ma sidea ase niombahni pe mangkaholongi Jahowa.

9. Aha ma na ibahen si Josep pakon si Maria laho mangurupi niombahni dohor hubani Jahowa?

⁹ Tongtong do iboan si Josep pakon si Maria niombahni hu partumpuan. Umpamani, tiap minggu laho do sidea hu sinagoga i Nasaret. Anjaha tiap tahun laho do sidea hu Jerusalem laho marpesta Paskah. (Luk. 2:41; 4:16) Sanggah i pardalanan hu Jerusalem, ra do ibontas sidea ianan na dong kaitanni pakon halak Israel hinan. Anjaha ra do isaritahon sidea sejarah ni Israel. Tapi dob martambah niombahni, tontu lang urah mangkorjahon ai. Hassi pe sonai, marusaha do sidea mambahen panombahan hubani Jahowa na sipontingan. Halani ai, gabe ipasu-pasu Jahowa ma sidea, janah lambin orot ma parhasomanan ni sidea pakon-Si.

10. Sonaha namatoras boi mangusihi si Josep pakon si Maria?

¹⁰ Sonaha namatoras boi mangusihi si Josep pakon si Maria? Humbani parsahap ampa parlahoumu, patuduh ma anggo nasiam mangkaholongi Jahowa. Janah ajari ma homa niombahmu ase sidea pe mangkaholongi Jahowa. Ai do na sipontingan na maningon iajarhon nasiam hubani sidea. Urupi ma sidea ase paorotkon parhasomananni hubani Jahowa marhitei marlajar Bibel, martonggo, martumpu, ampa  marbarita. (1 Tim. 6:6) Tongon, porlu do homa isarihon nasiam haporluan ni sidea ganup ari. (1 Tim. 5:8) Tapi dingat ma, sanggah iripaskon holi dunia na jahat on, sedo arta ampa habayakon na boi paluahkon sidea, tapi parhasomananni pakon Jahowa do. *​—Hes. 7:19; 1 Tim. 4:8.

11. (a) Sonaha 1 Timoteus 6:17-19 mangurupi namatoras sanggah sidea pagodangkon niombahni? (b) Aha ma na boi ibahen nasiam sakaluarga, janah aha ma hasilni? (Tonggor ma kotak “ Rencana na Boi Ibahen ibagas Pangidangion”.)

¹¹ Malas tumang uhurta halani bahat do sanina botou na mangurupi niombahni dohor hubani Jahowa. Tongtong do iboan sidea niombahni hu partumpuan, kebaktian, ampa marbarita. Dong do na mamboan niombahni hu ianan na jarang ihorjahon. Dong do homa na mamboan niombahni tur hu Betel atap mangurupi pajongjongkon Balei Harajaon ampa ianan na leganni. Ra, bahat do bois duit ni sidea halani ai. Anjaha dong homa tantangan na legan. Hassi pe sonai, ipasu-pasu Jahowa do sidea. (Basa 1 Timoteus 6:17-19.) Umpamani, gabe dear ma parlahou ni niombahni ronsi magodang. Anjaha iihutkon sidea do sitiruon na ibahen namatorasni, anjaha gabe martuah ma sidea. *​—Pod. 10:22.

12. Aha do na maningon ibahen Jesus dob magodang ia?

¹² Domma ibere Jahowa na sidearan hubani Jesus, sonai homa si Josep pakon si Maria. Hassi pe sonai, maningon Jesus sandiri do na mamilih dalan na laho sidalanonni. (Gal. 6:5) Ibere do hu bani habebason laho mamilih, songon na ibere Jahowa hubani ganup jolma. Sasintongni, boi do ipilih Jesus laho mangkorjahon harosuhni sandiri. Tapi tongtong do ihorjahon ia harosuh ni Jahowa ase boi totap dohor hu Bani. (Joh. 8:29) Sonaha hanima na maposo boi maniru Jesus?

13. Sanggah poso ope Jesus, aha ma na ibahen ia?

¹³ Humbani dakdanak Jesus, lang ongga ilawan ia namatorasni. Tapi tongtong do itangihon ia sidea. (Luk. 2:51) Lang ongga iahap ia pandeinan do ia marimbangkon namatorasni. Ibotoh ia do tanggung jawabni halani anak sikahanan ai ia. Jadi marusaha do ia maniru si Josep na ringgas marhorja ase boi ia mangurupi laho mansari duit.

14. Hunja ibotoh hita ringgas do Jesus mamparlajari Hata ni Naibata?

¹⁴ Ra, isaritahon si Josep pakon si  Maria do halongangan na masa sanggah tubuh Jesus. Anjaha isaritahon sidea do homa aha na ihatahon Naibata pasalsi. (Luk. 2:8-19, 25-38) Tapi sobali manangar sarita humbani namatorasni, ringgas do homa ia mamparlajari Hata ni Naibata. Hunja ibotoh hita ai? Sanggah i Jerusalem ia, “longang do” guru-guru ijai manangar balosni halani dakdanak ai ope ia. (Luk. 2:46, 47) Anjaha sanggah marumur 12 tahun ia, pos do uhurni Jahowa do Bapani.​—Luk. 2:42, 43, 49.

15. Hunja ibotoh hita tongtong do Jesus mangkorjahon harosuh ni Bapani?

¹⁵ Dobkonsi ibotoh Jesus aha do harosuh ni Bapani, idalankon ia do ai. (Joh. 6:38) Ibotoh ia do bahat do holi halak na masogam hu bani. Hassi pe lang marosuh ia ibahen sonai hu bani, tapi totap do ia unduk hubani Bapani. Sanggah ididi ia bani tahun 29 M, mangkorjahon harosuh ni Bapani do na gabe sipontingan ibagas goluhni. (Heb. 10:5-7) Anjaha, hassi pe maningon matei ia bani sada hayu, totap do ihorjahon ia parentah ni Bapani.​—Joh. 19:30.

16. Aha do na boi iparlajari niombah humbani Jesus?

¹⁶ Tangihon ma namatorasmu. Songon si Josep pakon si Maria, halak na lang sempurna do homa namatorasmu. Tapi ibere Jahowa do tanggung jawab hubani sidea laho mangajari ampa manlinggomi hanima. Anggo itangihon hanima namatorasmu, gabe “martuah” ma hanima.​—Ep. 6:1-4.

17. Domu bani Josua 24:15, haputusan aha do na maningon ibahen na maposo?

¹⁷ Pilih ma ise na laho sibalosanmu. Maningon ibotoh hanima do ise Jahowa ai, aha harosuh-Ni, ampa sonaha hanima boi mandalankon parentah-Ni ibagas goluhmu. (Rom 12:2) Anggo ibahen hanima sonai, gabe boi ma hanima mambahen haputusan na dear, ai ma manombah Jahowa. (Basa Josua 24:15; Par. 12:1) Anggo ibasa hanima Bibel bai ganup ari, anjaha irimangi hanima isini, lambin toguh ma holong ampa haporsayaonmu hubani Jahowa.

18. Aha ope na porlu ibahen na maposo, janah aha ma hasilni?

¹⁸ Bahen ma harosuh ni Jahowa na sipontingan  ibagas goluhmu. Bahat do halak i dunia on na mangkatahon anggo igunahon hanima hapandeianmu laho mangindahi habayakon, gabe martuah ma goluhnima. Hape lang tongon ai. Sasintongni, parohkon “buei sitaronon bani dirini” do halak sisonai. (1 Tim. 6:9, 10) Tapi anggo itangihon hanima Jahowa janah mangkorjahon harosuh-Ni do na sipontingan ibahen hanima, gabe ‘marulih ma hanima bani sagala dalanmu’ anjaha gabe martuah ma hanima.​—Jos. 1:8.

19. Aha do na porlu idingat namatoras?

¹⁹ Nasiam namatoras, marusaha ma nasiam mangurupi kaluargamu ase tongtong manombah Jahowa. Pindo ma pangurupion-Ni, ase boi nasiam mamilih na sidearan bani kaluarga. (Pod. 3:5, 6) Dingat ma, na ihorjahon nasiam do na gatinan ipardiateihon niombahmu marimbangkon na ihatahon nasiam. Halani ai, marusaha ma mambere siusihan na dear, na mangurupi niombahmu ase totap dohor hu bani Jahowa.

20. Pasu-pasu aha do na boi idapot na maposo anggo ipilih sidea mangidangi Jahowa?

²⁰ Na maposo, boi do namatorasmu mangurupi hanima mambahen haputusan na dear. Tapi hanima sandiri do na maningon mamutuskon laho mangidangi Jahowa do atap lang. Halani ai, tiru ma Jesus anjaha tongtong ma mambalosi Jahowa. Anggo ibahen hanima sonai, tontu bahat do na boi ihorjahon hanima ibagas pangidangion, janah gabe martuah ma goluhnima. (1 Tim. 4:16) Anjaha bani ari simagira, dapotnima ma hagoluhan na parohkon malas ni uhur.