1. Kai keputusen si mehulina si banci siban?

BIASANA, keputusen-keputusen si iban orang tua terus lit pengaruhna man anakna seh ngayak anak e galang. Adi iban orang tua keputusen si la mehuli, anakna banci kena masalah. Tapi adi ibanna keputusen si mehuli, isampatina anakna gelah ndatken kegeluhen si ermeriah ukur. Aminna pe bage, anak-anak pe arus erban keputusen si mehuli. Keputusen si mehulina si banci siban eme ngelayani Jahwe, Bapakta si perkeleng si i surga.​—Msm. 73:28.

2. Keputusen-keputusen si mehuli kai si iban Jesus ras orang tuana?

² Ersura-sura kel orang tua Jesus gelah kerina anak-anakna ngelayani Jahwe. Janah arah keputusen-keputusen si ibanna teridah maka si pentingna i bas geluhna eme ngelayani Jahwe. (Luk. 2:40, 41, 52) Jesus pe erban keputusen si mehuli si banci nampati ia ngelakoken kai si ipindo Jahwe man bana. (Mat. 4:1-10) Jesus dilaki si mehuli, setia, janah perpang. Pasti megah janah meriah kel iakap orang tua si keleng atena Jahwe adi bage anak-anakna.

3. Penungkunen kai saja kari sibahas bas artikel enda?

³ Bas artikel enda, sibahas kari piga-piga penungkunen enda: Keputusen-keputusen si mehuli kai si iban Jahwe man Jesus? Kai si banci ipelajari orang tua Kristen arah keputusen-keputusen si iban Jusup ras Maria? Janah kai si banci ipelajari anak muda Kristen arah keputusen si iban Jesus?

4. Keputusen penting kai si iban Jahwe man anakNa?

⁴ Ipilih Jahwe orang tua si seh kel ulina man Jesus. (Mat. 1:18-23; Luk. 1:26-38) Keleng kel ate Maria Jahwe bage pe KataNa, enda teridah arah kata-kata si ibelaskenna alu  bulat ukur si icatat bas Pustaka. (Luk. 1:46-55) Janah arah cara Jusup ngelakoken kai si isuruh Jahwe, teridah maka keleng kel atena Dibata janah meriah atena ibanna ukur Dibata.​—Mat. 1:24.

5-6. Tentangen kai saja si ipediat Jahwe iadapi Jesus?

⁵ Cuba ukurindu, la ipilih Jahwe orang tua si bayak man Jesus. Arah korban si ipersembahken Jusup ras Maria kenca Jesus lahir, teridah maka mesera pergeluh kalak e. (Luk. 2:24) Perban Jusup sekalak tukang kayu, banci saja i samping rumahna i Nasaret ibanna sada ingan si kitik guna ertukang. Pasti sederhana kel kegeluhen kalak e, perban silang-langna lit pitu anak Jusup ras Maria.​—Mat. 13:55, 56.

⁶ Ilindungi Jahwe Jesus arah piga-piga bahaya. Tapi, labo lalap ilindungiNa ia arah tentangen si iadapina. (Mat. 2:13-15) Contohna, lit anggota keluargana si la tek man bana. Bayangken uga kecewana ia perban la mis kalak e tek adi ia sekalak Mesias. (Mrk. 3:21; Joh. 7:5) Banci saja Jusup mate sanga Jesus nguda denga, pasti ceda kel akapna paksa si e. Selaku anak sintua arus igantiken Jesus bapakna guna ngurus usaha keluargana. (Mrk. 6:3) Sanga ia enggo mulai galang, arus ipelajarina uga carana ngurus keperlun keluargana. Arus ia kerja keras gelah banci icukupina keperlun keluargana. Emaka pasti itehna uga latihna kenca erdahin sada warin.

7. (a) Penungkunen kai si banci iukuri kalak si enggo erjabu si enggo lit anakna? (b) Menurut Kuan-kuanen 2:1-6, uga orang tua banci mereken pelatihen man anak-anakna?

⁷ Adi kam enggo erjabu janah lit atendu anakndu, sungkunilah bandu, ‘Bagi Maria ras Jusup, meteruk ukur nge kami janah keleng nge ate kami Jahwe ras KataNa? Ibereken Jahwe nge kami kesempaten ngurus anak si meherga kel iakapNa?’ (Msm. 127:3, 4) Adi kam enggo jadi orang tua, sungkuni bandu, ‘Kuajari nge anakku maka penting kerja keras?’ (Peng. 3:12, 13) ‘Kulakoken nge asa ngasupku ngelindungi anakku arah bahaya si banci saja iadapina i bas doni Setan enda?’ (Kua. 22:3) La banci ilindungindu  anakndu arah kerina tentangen si banci saja iadapina. La mungkin ilakokenndu kerinana e. Amin gia bage, banci isampatindu anakndu alu cara si perkeleng gelah ngasup ia ngadapi tentangen. Uga carana? Ajari kalak e gelah lalap idaramina nasehat arah Kata Dibata sanga ngadapi tentangen. (Baca Kuan-kuanen 2:1-6.) Contohna, adi lit anggota keluarga si lanai ngelayani Jahwe, sampatilah ia arah Pustaka gelah iangkaina engkai maka penting kel tetap setia man Jahwe. (Msm. 31:24) Ntah, adi lit kalak si ikelengindu mate, sampatilah anakndu gelah lanai erceda ate alu nggunaken ayat-ayat Pustaka.​—2 Kor. 1:3, 4; 2 Tim. 3:16.

8. Menurut Ulangen 6:6, 7, kai si perlu ilakoken Jusup ras Maria?

⁸ Iikutken Jusup ras Maria petunjuk si ibereken Jahwe kerna uga arusna jadi orang tua. Alu bage, banci isampati kalak e Jesus jadi kalak si ngena ate Dibata. (Baca Ulangen 6:6, 7.) Keleng kel ate Maria ras Jusup nandangi Jahwe, emaka iusahaken kalak e kel gelah anak-anakna pe engkelengi Jahwe.

9. Keputusen penting kai si iban Jusup ras Maria?

⁹ Iusahaken Jusup ras Maria gelah teratur keluargana ngelakoken kegiaten-kegiaten rohani. Pasti pulung kalak e tiap minggu bas ingan pulung kalak Jahudi i Nasaret, bage pe ngerayaken Paskah tahunen si ilakoken i Jerusalem. (Luk. 2:41; 4:16) Banci saja sanga bas perdalanen ku Jerusalem, iajari kalak e Jesus ras agi-agina kerna kai si ilakoken Jahwe man umatNa mbarenda. Janah, banci saja idahi kalak e ingan-ingan si iceritaken bas Kitap si Badia. Perban reh teremna anak kalak e, pasti la menukah iakap kalak e ngelakoken kegiaten rohani. Amin gia bage, tetap denga ilakoken kalak e kegiaten rohani alu ratur. Emaka, mbelin kel pasu-pasu si idatna! Perban lalap iutamaken kalak e Jahwe bas geluhna, tetap keluarga e rembak ras Jahwe.

10. Kai si banci ipelajari orang tua Kristen arah Jusup ras Maria?

¹⁰ Kai si banci ipelajari orang tua si keleng atena Dibata arah Jusup ras Maria?  Si pentingna, arah ranan ras perbahanenndu buktikenlah man anakndu maka keleng kel atendu Jahwe. Situhuna, pemere si mehergana si banci iberekenndu man anakndu eme nampati ia gelah engkelengi Jahwe. Salah sada pelajaren si mehergana si banci iajarkenndu man anakndu eme uga carana gelah tetap ratur ngelakoken kegiaten rohani bagi erlajar Pustaka, ertoto, reh ku perpulungen, bage pe erberita. (1 Tim. 6:6) Memang, arus icukupindu kerina keperlun anakndu. (1 Tim. 5:8) Tapi ingetlah, labo erta ntah pe sen si banci erban kalak e selamat sanga ikernepken pagi doni Setan enda. Tapi, si banci erbanca kalak e selamat janah nggeluh bas doni si mbaru eme adi rembak ia ras Dibata Jahwe. *—Esek. 7:19; 1 Tim. 4:8.

11. (a) Menurut 1 Timotius 6:17-19, kai si banci nampati orang tua guna erban keputusen si mehuli sanga mpebelin anakna? (b) Keputusen kai si perlu iukuri keluargandu janah kai pasu-pasuna? (Nen kotak “ Tujun Kai si Atendu Iayakindu?”)

¹¹ Pasti meriah kel ukurta ngidah melala orang tua Kristen si erban keputusen guna nampati anakna rembak ras Jahwe! Ratur kalak e ras-ras ngelayani Jahwe. Ras-ras kalak e ku perpulungen, kebaktin, bage pe erberita. Piga-piga keluarga erberita bas daerah si jarang ikerjaken. Si debanna ka, reh ku Betel ntah pe ndukung pembangunen si iban organisasi. Pasti melala sen si ikorbanken kalak e janah banci saja iadapina piga-piga tentangen. Tapi, melala kel pasu-pasu si pasti ialoken kalak e bas Jahwe nari. (Baca 1 Timotius 6:17-19.) Anak-anak si ipebelin bas keluarga si bage, biasana terus ngelakoken kai si ipelajarina arah orang tuana nari janah pasti meriah iakap kalak e banci ipebelin bas keluarga si bage! *​—Kua. 10:22.

12. Kai si perlu ilakoken Jesus sanga ia enggo galang?

¹² Bapak Jesus si i surga lalap erban keputusen si mehuli, janah orang tuana si lit bas doni pe erban keputusen si mehuli ka. Tapi, sanga Jesus enggo galang ia sendiri si arus erban keputusen. (Gal. 6:5) Bagi kita, Jesus pe bebas erban keputusen sendiri. Banci saja ibanna keputusen si mentingken bana labo guna ngelakoken peraten Jahwe. Tapi, ibanna keputusen si erban rembak hubungenna ras Jahwe. (Joh. 8:29) Uga usihen Jesus enda banci nampati anak muda gundari?

13. Keputusen kai si iban Jesus sanga ia nguda denga?

¹³ Bas doni, lalap ikutkenna kata orang  tuana. La pernah ilawanna kalak e, ntah pe ikatakenna maka beluhen ia asangken kalak e. Bagi si ikataken Pustaka, “terus ia patuh man kalak e.” (Luk. 2:51) Selaku anak sintua pasti ertanggung jawap kel Jesus. Pasti kerja keras kel ia mpelajari uga carana jadi tukang kayu arah bapakna, alu bage banci dungna icukupina keperlun keluargana.

14. Kai buktina Jesus rajin mpelajari Kata Dibata?

¹⁴ Banci saja iceritaken Jusup ras Maria man Jesus maka Jesus e lahir alu mukjizat. Selain si e, banci saja iceritaken kalak e ka kai si ikataken malekat kerna ia. (Luk. 2:8-19, 25-38) Tapi, labo ngenca arah cerita orang tuana saja Jesus erlajar. Pasti ipelajarina ka Kata Dibata. Kai buktina Jesus rajin erlajar? Sanga ia kitik denga, guru-guru agama i Jerusalem “kemamangen erkiteken pengangkanna ras jawapen-jawapenna.” (Luk. 2:46, 47) Janah amin gia umurna 12 tahun denga, tutus kel atena mpelajari Kitap-Kitap si Badia. Alu bage, tek ia maka Jahwe e Bapakna.​—Luk. 2:42, 43, 49.

15. Kai buktina maka iban Jesus keputusen guna ngelakoken peraten Bapakna?

¹⁵ Sanga iteh Jesus tugas si ibereken Bapakna, ibanna keputusen guna ngaloken tugas e. (Joh. 6:38) Itehna maka pasti segat ate kalak kari ia janah sadar ia maka latih kari iakapna. Aminna pe bage, tetap iban Jesus keputusen guna ngelayani Jahwe. Kenca Jesus iperidiken bas tahun 29 Masehi, ngelakoken peraten Jahwe jadi si pentingna man bana. (Heb. 10:5-7) Janah sanga Jesus nandangi mate bas tiang siksan pe, terus atena ngelakoken peraten Bapakna.​—Joh. 19:30.

16. Kai si banci ipelajari anak-anak arah Jesus?

¹⁶ Patuhilah orang tuandu. Bagi Jusup ras Maria, orang tuandu pe la sempurna. Tapi, enggo ibereken Jahwe tugas man kalak e guna ngelindungi ras ngajari kam. Adi ihormatindu kalak e janah ibegikenndu nasehatna, pasti ‘berhasil geluhndu.’​—Ep. 6:1-4.

17. Menurut Josua 24:15, keputusen kai si perlu iban anak muda?

¹⁷ Banlah keputusen kerna ise si atendu ilayanindu. Arus tuhu-tuhu itandaindu  Jahwe, kai peratenNa janah uga kam banci ngelakoken peratenNa e. (Rom. 12:2) Kerinana e banci nampati kam erban keputusen si pentingna bas geluhndu eme keputusen guna ngelayani Jahwe. (Baca Josua 24:15; Peng. 12:1) Emaka teruslah baca ras pelajari Pustaka tiap wari. Alu bage, banci reh kelengna atendu Jahwe janah reh paguhna kinitekenndu man baNa.

18. Keputusen kai si arus iban anak muda janah kai asilna?

¹⁸ Ngelakoken peraten Jahwe lah ban si pentingna bas geluhndu. Ikataken doni Setan enda pasti kam ermeriah ukur adi igunakenndu kengasupenndu guna kepentingenndu sendiri. Tapi kalak si ngayaki kebayaken, situhuna “isusahina bana alu erbage-bage kiniseran.” (1 Tim. 6:9, 10) Sebalikna, adi ibegikenndu Jahwe janah ngelakoken peratenNa iakapndu si pentingna, “la banci la kam sangap janah seh sura-surandu.”​—Jos. 1:8.

19. Kai si perlu iinget orang tua?

¹⁹ Kam orang tua, usahakenlah asa ngasupndu nampati anakndu ngelayani Jahwe. Teruslah andalken Jahwe, pasti kam isampatiNa erban keputusen-keputusen si mehuli. (Kua. 3:5, 6) Ingetlah, belinen pengaruh perbahanenndu asangken kata-katandu man anak-anakndu. Emaka, banlah keputusen si banci nampati kalak e erban meriah ukur Jahwe.

20. Pasu-pasu kai si banci inanami anak muda adi iban kalak e keputusen guna ngelayani Jahwe?

²⁰ Kam anak muda, banci isampati orang tuandu kam erban keputusen si mehuli. Tapi, kam sendiri nge si arus erban keputusen guna erban meriah ukur Jahwe. Emaka, usihlah Jesus janah banlah keputusen guna ngelayani Bapakndu si perkeleng. Alu bage, banci meriah ukurndu, puas iakapndu, janah melala kegiaten si erguna si banci ilakokenndu. (1 Tim. 4:16) Janah bas wari si pepagi, banci kam tuhu-tuhu ermeriah ukur!