1. Unsa ang pinakamaayong desisyon nga mahimo sa usa?

SAGAD, ang desisyon sa ginikanan makaapektar sa mga anak sa taas nga panahon. Kon dili maayo ang desisyon sa ginikanan, mahimong moresulta nig mga problema ngadto sa mga anak. Pero kon maayo ang ilang desisyon, matabangan nila ang ilang mga anak nga magmalipayon. Siyempre, ang mga anak kinahanglan pong mohimog maayong mga desisyon. Ang pinakamaayong desisyon nga mahimo sa usa mao ang pag-alagad sa atong mahigugmaon nga langitnong Amahan, si Jehova.​—Sal. 73:28.

2. Unsang maayong mga desisyon ang gihimo ni Jesus ug sa iyang ginikanan?

² Ang ginikanan ni Jesus gustong motabang sa ilang mga anak sa pag-alagad kang Jehova, ug ang ilang mga desisyon nagpamatuod nga mao nay ilang pangunang tumong. (Luc. 2:40, 41, 52) Si Jesus pod mihimog maayong mga desisyon nga nakatabang niya sa pagtuman kon unsay gipabuhat ni Jehova kaniya. (Mat. 4:1-10) Si Jesus midako nga buotan, maunongon, ug maisogon nga tawo​—ang klase sa anak nga ikapasigarbo ug makapalipay ni bisan kinsang mahinadlokon sa Diyos nga ginikanan.

3. Unsang mga pangutana ang atong tubagon niining artikuloha?

³ Niining artikuloha, atong tubagon kining mga pangutanaha: Unsang maayong mga desisyon ang gihimo ni Jehova maylabot kang Jesus? Unsay makat-onan sa Kristohanong mga ginikanan sa mga desisyon sa ginikanan ni Jesus? Ug unsay makat-onan sa Kristohanong mga batan-on sa mga desisyon ni Jesus?

4. Unsang importanteng desisyon ang gihimo ni Jehova maylabot sa iyang Anak?

⁴ Si Jehova mipilig maayo kaayong ginikanan para kang Jesus. (Mat. 1:18-23; Luc. 1:26-38) Ang kinasingkasing nga mga pulong  ni Maria nga narekord sa Bibliya nagpakita sa iyang dakong gugma kang Jehova ug sa Iyang Pulong. (Luc. 1:46-55) Ug ang pagsunod ni Jose sa instruksiyon ni Jehova nagpakita nga siya nahigugma sa Diyos ug gusto niya nga malipay ang Diyos.​—Mat. 1:24.

5-6. Unsay gitugot ni Jehova nga maeksperyensiyahan sa iyang Anak?

⁵ Matikdi nga si Jehova wala magpilig dato nga ginikanan para kang Jesus. Ang halad nga gitanyag ni Jose ug Maria human matawo si Jesus nagpakita nga pobre sila. (Luc. 2:24) Posible nga si Jose may gamayng shop tupad sa iyang balay sa Nasaret, diin nagtrabaho siya ingong panday. Tingali ang ilang kinabuhi simple lang, ilabina dihang midako na ang pamilya ug nahimo nang pito o kapin pa ang mga anak.​—Mat. 13:55, 56.

⁶ Gipanalipdan ni Jehova si Jesus sa pipila ka kapeligrohan, pero wala niya protektahi ang iyang Anak sa tanang problema. (Mat. 2:13-15) Pananglitan, may mga paryente si Jesus nga wala motuo kaniya. Imadyina kon unsay gibati ni Jesus dihang sa sinugdan may mga membro sa pamilya nga wala motuo nga siya ang Mesiyas. (Mar. 3:21; Juan 7:5) Tingali nasakitan kaayo si Jesus dihang namatay ang iyang amaama nga si Jose. Ingong kamagulangang anak, posibleng si Jesus ang mipuli sa trabaho sa iyang amaama. (Mar. 6:3) Samtang nagdako si Jesus, nakakat-on siya kon unsaon pag-atiman ang iyang pamilya. Tingali kinahanglan siyang maghago pag-ayo aron masuportahan sila. Busa nahibalo siya kon unsa ka kapoy ang tibuok adlaw nga pagtrabaho.

7. (a) Unsang mga pangutana ang makatabang sa mga magtiayon sa pagpadako sa ilang mga anak? (b) Sa unsang paagi ang Proverbio 2:1-6 makatabang sa mga ginikanan sa pagbansay sa ilang mga anak?

⁷ Kon magtiayon mo ug gusto ninyong manganak, pangutan-a ang kaugalingon: ‘Kami ba mapainubsanon ug nahigugma kang Jehova ug sa iyang Pulong? Pilion kaha mi ni Jehova sa pag-atiman ug bag-ong natawo nga bata?’ (Sal. 127:3, 4) Kon ginikanan ka na, pangutan-a ang kaugalingon: ‘Ako bang ginatudloan ang akong mga anak nga importanteng maghago?’ (Eccl. 3:12, 13) ‘Gihimo ba nako ang akong maarangan sa pagpanalipod sa akong mga anak batok sa pisikal ug moral nga mga kapeligrohan sa kalibotan ni Satanas?’ (Prov. 22:3) Dili ninyo maprotektahan ang inyong mga anak sa tanang problema nga ilang maatubang. Imposible gyod kana. Pero anam-anam  ninyo silang maandam sa pag-atubang sa mga problema sa kinabuhi pinaagi sa mahigugmaong pagtudlo kanila nga mosalig sa Pulong sa Diyos alang sa giya. (Basaha ang Proverbio 2:1-6.) Pananglitan, kon dunay paryente nga mohunong sa pag-alagad, tabangi ang inyong mga anak nga makakat-on gikan sa Pulong sa Diyos kon nganong importante kaayo nga magmaunongon kang Jehova. (Sal. 31:23) O kon dunay minahal nga mamatay, ipakita sa inyong mga anak kon unsaon paggamit ang Pulong sa Diyos aron mahupayan sila ug magmalinawon.​—2 Cor. 1:3, 4; 2 Tim. 3:16.

8. Sumala sa Deuteronomio 6:6, 7, unsay kinahanglang buhaton ni Jose ug Maria?

⁸ Ang ginikanan ni Jesus nagtabang niya nga modako ingong inuyonan sa Diyos; ilang gisunod ang mga instruksiyon ni Jehova sa mga ginikanan. (Basaha ang Deuteronomio 6:6, 7.) Si Jose ug Maria nahigugma pag-ayo kang Jehova, ug prayoridad nila nga dasigon ang ilang mga anak nga ugmaron sab kana nga gugma.

9. Unsang importanteng mga desisyon ang gihimo ni Jose ug Maria?

⁹ Si Jose ug Maria midesisyon nga regular nga mosimba kang Jehova uban ang ilang mga anak. Segurado nga tigtambongan sila sa senemanang mga tigom sa sinagoga sa Nasaret ug sa tinuig nga Paskuwa sa Jerusalem. (Luc. 2:41; 4:16) Posibleng gigamit nila ang maong mga biyahe paingon sa Jerusalem sa pagtudlo kang Jesus ug sa mga igsoon niini bahin sa kasaysayan sa katawhan ni Jehova. Samtang nagpaingon didto, tingali giadto nila ang mga lugar nga gihisgotan sa Kasulatan. Dihang nadugangan ang mga anak, tingali dili gyod sayon para kang Jose ug Maria ang pagmentinar ug maayong espirituwal nga rutina. Pero, gipanalanginan gyod sila! Ang ilang pamilya himsog kaayo sa espirituwal kay giuna nila ang pagsimba kang Jehova.

10. Unsang mga leksiyon ang makat-onan sa Kristohanong mga ginikanan kang Jose ug Maria?

¹⁰ Unsay makat-onan sa mahinadlokon sa Diyos nga mga ginikanan kang Jose ug Maria? Importante kaayo nga tudloan ninyo ang inyong mga anak sa pulong ug buhat nga gihigugma ninyo pag-ayo si Jehova. Hinumdomi nga ang kinalabwang regalo nga mahatag ninyo mao ang pagtabang kanila nga mahigugma kang Jehova. Tudloi sila kon sa unsang paagi mahimong regular ang ilang pagtuon, pag-ampo,  pagtambong sa tigom, ug pagsangyaw. Usa kana sa labing importanteng mga leksiyon nga ikatudlo ninyo kanila. (1 Tim. 6:6) Siyempre, kinahanglang tagan-an ninyo ang inyong mga anak sa ilang materyal nga panginahanglan. (1 Tim. 5:8) Pero hinumdomi nga ang suod nga relasyon sa inyong mga anak kang Jehova, dili ang ilang materyal nga mga butang, ang makatabang nila nga maluwas sa kataposan niining daang sistema ug makaabot sa bag-ong kalibotan sa Diyos. *​—Ezeq. 7:19; 1 Tim. 4:8.

11. (a) Unsang tambag sa 1 Timoteo 6:17-19 ang makatabang sa mga ginikanan sa paghimog maayong mga desisyon maylabot sa pagpadako sa ilang mga anak? (b) Unsang mga tumong ang mahimong kab-oton sa pamilya, ug unsang mga panalangin ang ilang madawat? (Tan-awa ang kahong “ Unsang mga Tumong ang Inyong Kab-oton?”)

¹¹ Makapalipay gyong makita nga daghan kaayong Kristohanong ginikanan ang naghimog maayong mga desisyon nga nakatabang sa ilang mga anak nga masuod kang Jehova! Regular silang magkauban sa pagsimba. Motambong silag mga tigom ug kombensiyon. Ug makigbahin sila sa ministeryo. Ang pipila ka pamilya mosangyaw pa gani sa mga teritoryo nga panagsa rang masangyawan. Ang uban moduaw sa Bethel o motabang sa mga proyekto sa pagpanukod. Ang mga pamilya nga mipili niini nga mga kalihokan kinahanglang mogasto ug kuwarta, ug posibleng makaatubang silag mga kalisdanan. Pero ang mga panalangin nga ilang madawat makapadato gyod nila sa espirituwal. (Basaha ang 1 Timoteo 6:17-19.) Ang mga anak nga nagdako sa maong mga pamilya sagad magpadayon nianang maayo nga rutina hangtod managko sila, ug mapasalamaton sila sa ilang mga ginikanan! *​—Prov. 10:22.

12. Unsay kinahanglang himoon ni Jesus samtang nagdako siya?

¹² Ang langitnong Amahan ni Jesus kanunayng naghimog maayong mga desisyon, ug ang iyang yutan-ong ginikanan naghimo sab ug maayong mga desisyon. Pero, samtang nagdako si Jesus, kinahanglan siyang mohimog kaugalingong mga desisyon. (Gal. 6:5) Sama kanatong tanan, siya may kagawasan sa pagpili. Puwede unta niyang unahon ang kaugalingong interes. Pero, gipili niya nga mamentinar ang maayong relasyon kang Jehova. (Juan 8:29) Sa unsang paagi ang iyang ehemplo makatabang sa mga batan-on karon?

13. Unsang importanteng desisyon ang gihimo ni Jesus sa bata pa siya?

¹³ Sa bata pa si Jesus, midesisyon siya nga magpasakop sa iyang ginikanan. Wala gyod siya mosupak nila, nga mangatarongan nga mas labaw siyag kahibalo kay kanila. Hinunoa, siya “padayong nagpasakop kanila.” (Luc. 2:51) Sa walay duhaduha, gituman niya ang iyang  responsibilidad ingong kamagulangang anak. Seguradong naningkamot siya nga makakat-on sa pagpamanday gikan sa iyang amaama aron makatabang siya sa ilang pamilya.

14. Giunsa nato pagkahibalo nga gitun-an pag-ayo ni Jesus ang Pulong sa Diyos?

¹⁴ Posibleng gisultihan si Jesus sa iyang ginikanan bahin sa iyang milagrosong pagkatawo ug sa gisulti sa mga mensahero sa Diyos bahin kaniya. (Luc. 2:8-19, 25-38) Pero wala maghunahuna si Jesus nga igo na kana; iya pong gitun-an ang Kasulatan. Giunsa nato pagkahibalo nga gitun-an pag-ayo ni Jesus ang Pulong sa Diyos? Tungod kay sa bata pa siya, ang mga magtutudlo sa Jerusalem “nahingangha sa iyang mga tubag ug pagsabot.” (Luc. 2:46, 47) Ug sa edad nga 12, napamatud-an na ni Jesus sa iyang kaugalingon nga si Jehova iyang Amahan.​—Luc. 2:42, 43, 49.

15. Giunsa pagpakita ni Jesus nga gusto niyang tumanon ang kabubut-on ni Jehova?

¹⁵ Dihang nahibaloan ni Jesus kon unsay gusto ni Jehova nga ipahimo kaniya, siya midesisyon nga tumanon kana. (Juan 6:38) Nahibalo siya nga dumtan siya sa daghan. Bisag makapaguol kana, misunod gihapon siya kang Jehova. Sa dihang nabawtismohan si Jesus niadtong 29 C.E., ang pinakaimportante niya mao ang pagbuhat kon unsay gusto ni Jehova. (Heb. 10:5-7) Bisan dihang hapit na siyang mamatay sa estaka sa pagsakit, determinado gihapon siya nga tumanon ang kabubut-on sa iyang Amahan.​—Juan 19:30.

16. Unsang leksiyon ang makat-onan sa mga anak kang Jesus?

¹⁶ Sunda ang inyong ginikanan. Sama kang Jose ug Maria, ang inyong ginikanan dili hingpit. Pero sila ang gihatagan ni Jehova ug responsibilidad sa pagpanalipod, pagbansay, ug paggiya kaninyo. Kon inyong paminawon ang ilang tambag ug tahoron ang ilang awtoridad, maayo ang inyong dangatan.​—Efe. 6:1-4.

17. Sumala sa Josue 24:15, unsang desisyon ang angayng himoon sa mga batan-on?

¹⁷ Magdesisyon kon kinsay inyong alagaran. Kinahanglan ninyong pamatud-an sa inyong kaugalingon kon kinsa si Jehova, kon unsay iyang katuyoan, ug kon unsaon ninyo kini paghimo. (Roma 12:2) Pinaagi niana, makahimo mo sa pinakaimportanteng desisyon, ang pag-alagad kang Jehova. (Basaha ang Josue 24:15; Eccl. 12:1) Kon regular mong magbasa ug magtuon sa Bibliya, mas modako ang inyong gugma kang Jehova ug mas molig-on ang inyong pagtuo kaniya.

18. Unsa nga desisyon ang angayng himoon sa mga batan-on, ug unsay resulta niana?

 ¹⁸ Magdesisyon nga unahon ang kabubut-on ni Jehova. Ang kalibotan ni Satanas nagsaad nga kon inyong gamiton ang inyong mga katakos para sa inyong kaugalingong interes, magmalipayon mo. Ang tinuod, kadtong nagpokus sa materyal nga mga tumong nagtusaktusak sa ilang kaugalingon “sa daghang kasakitan.” (1 Tim. 6:9, 10) Pero, kon maminaw mo kang Jehova ug modesisyon nga unahon ang iyang kabubut-on, kamo magmalamposon ug “molihok nga maalamon.”​—Jos. 1:8.

19. Unsay kinahanglang hinumdoman sa mga ginikanan?

¹⁹ Mga ginikanan, himoa ang inyong maarangan sa pagtabang sa inyong mga anak sa pag-alagad kang Jehova. Salig kaniya, ug siya motabang ninyo sa paghimog maayong mga desisyon. (Prov. 3:5, 6) Hinumdomi nga mas dakog epekto sa inyong mga anak ang inyong ginahimo kay sa inyong ginasulti. Busa paghimog mga desisyon nga makatabang sa inyong mga anak nga makabaton sa pag-uyon ni Jehova.

20. Unsang mga panalangin ang madawat sa mga batan-on kon modesisyon sila sa pag-alagad kang Jehova?

²⁰ Mga batan-on, ang inyong mga ginikanan makatabang ninyo sa paghimog maayong mga desisyon. Pero kinahanglan nga duna moy himoon aron inyong mabatonan ang pag-uyon sa Diyos. Busa sundoga si Jesus ug magdesisyon nga alagaron ang inyong mahigugmaon nga langitnong Amahan. Kon inyo nang buhaton, mahimo mong busy sa pag-alagad, nga makahatag ninyog katagbawan ug kalipay karon. (1 Tim. 4:16) Ug sa umaabot, matagamtam ninyo ang kinalabwang kalipay!