1. San na a moo bun sani di wan sama sa du anga en libi?

GAANSE leisi, den sani di dda anga mma e du e kengi a libi fu den pikin fu den. Neen meke efu den á du sani anga koni, den o meke a libi moo taanga gi den pikin fu den. Ma te den du sani anga koni, da a libi fu den pikin o moo waka bun. Den pikin seefi mu du sani anga koni. A moo bun sani di wan sama sa du anga en libi, a fu dini Yehofa, u Dda di de a hemel.​—Ps. 73:28.

2. Fa Yesesi anga en dda anga mma du sani anga koni?

² Yowsefu anga Maliya be wani ala den pikin fu den dini Yehofa. A fasi fa den be e libi be e soi taki a dini di den be e dini Yehofa a be a moo pelensipali sani gi den. A so den kiya den pikin fu den tu (Luk. 2:40, 41, 52). Di Yesesi kon bigi enseefi be e du sani anga koni fu di a be wani dini Yehofa anga en hii ati (Mat. 4:1-10). Yesesi be abi switifasi, a be lobi sama, a be abi deki-ati. Ala sama di e dini Yehofa be o poolo efu den pikin fu den be de enke Yesesi.

3. Sowtu akisi wi o luku aini a artikel ya?

³ Wi o luku den akisi ya, aini a artikel ya: Fa Yehofa du sani anga koni di a seeka sani fu sende Yesesi kon a goontapu? San dda anga mma di e dini Yehofa sa leli fu a fasi fa Yowsefu anga Maliya be e du sani? San yonkuuwan sa leli fu a fasi fa Yesesi be e du sani?

4. Fa Yehofa du sani anga koni di a be e luku sama a be o meke kiya en Manpikin?

⁴ Yehofa teke sama di be lobi en, fu kiya Yesesi (Mat. 1:18-23; Luk. 1:26-38). Den sani di Maliya taki aini Beibel e soi taki a be lobi Yehofa. Den e soi tu taki a be lobi a Wowtu fu Gadu (Luk. 1:46-55). Di Yehofa soi Yowsefu san pasa, Yowsefu á daaidaai fu du sani enke fa Yehofa taki. A sani ya e soi taki enseefi be lobi Yehofa.​—Mat. 1:24.

5-6. San a wantu sani di Yehofa á kibii Yesesi gi?

⁵ Yehofa á teke wan gudu famii fu kiya Yesesi. A ofaandi di Yowsefu anga Maliya tyai gi Yehofa baka di Yesesi meke, e soi taki den a be pootiman (Luk. 2:24). Kande Yowsefu be abi wan pikin langa neen sikin osu pe a be e du en tembeewooko. A gei enke Yowsefu anga Maliya be kon abi 7 pikin, efuso moo seefi. Den á be e libi bigi, bika anga a pikin wooko di Yowsefu be e du a be mu solugu a gaan osufamii fi en.​—Mat. 13:55, 56.

⁶ Yehofa be e kibii Yesesi fu son sani á be miti en, ma a ná ala sani a be e kibii en gi (Mat. 2:13-15). Son famii fu Yesesi á be e biibi taki neen a be a Mesiyas. A sani ya be musu hati Yesesi (Malik. 3:21; Yoh. 7:5). A gei enke Yesesi kweki dda, Yowsefu be dede fosi Yesesi bigin anga en wooko a goontapu ya. A dede fu Yowsefu be musu hati en. A Yesesi a be a moo gaanwan, neen meke kande neen be mu du a tembeewooko di en dda be e du (Malik. 6:3). Yesesi be abi fu wooko taanga fu solugu en mma anga den moo pikinwan. Neen meke a be sabi fa a tan fu wooko taanga hii dei. A be e weli tu.

7. (a) Sowtu akisi o yeepi toowpaa fu kiya den pikin fu den? (b) Fa a tekisi fu Odo 2:1-6 sa yeepi dda anga mma fu leli den pikin fu den?

⁷ Efi yu anga i toowpaa wani pikin, a bun fu wi akisi useefi taki: ‘U lobi Yehofa anga den sani di sikiifi aini Beibel? Yehofa be o teke u fu kiya wan pikin di a lobi?’ (Ps. 127:3, 4) Efi yu abi pikin kaba, akisi iseefi taki: ‘Mi e leli den pikin fu mi taki den mu e wooko taanga?’ (Peleik. 3:12, 13) ‘Mi e du ala san mi poi  fu kibii den pikin fu mi gi den ogii di sa miti den aini a ogii goontapu fu Saatan?’ (Odo 22:3) A tuu taki i ná o poi kibii den gi ala sani, ma i sa leli den fa fu wooko anga a Wowtu fu Gadu te den abi polobelema. (Leisi Odo 2:1-6.) I sa soi den pikin fi i saide a pelensipali fu du sani enke fa Yehofa wani te wan famii fu den komoto a waaleiti (Ps. 31:23). Efu wan sama di den lobi dede, i sa soi den wantu tekisi aini Beibel di o toosutu den.​—2 Kor. 1:3, 4; 2 Tim. 3:16.

8. Enke fa Deitolonomi 6:6, 7 e soi, da san Yowsefu anga Maliya du?

⁸ Yowsefu anga Maliya be poi yeepi Yesesi fu du sani enke fa Yehofa wani fu di den be e wooko anga den leli di Yehofa e gi dda anga mma. (Leisi Deitolonomi 6:6, 7.) Yowsefu anga Maliya be lobi Yehofa, neen meke den du ala san den be poi fu yeepi den pikin fu lobi Yehofa tu.

9. San Yowsefu anga Maliya du?

⁹ Yowsefu anga Maliya be e dini Yehofa makandaa anga den pikin fu den. Den be e tyai den pikin fu den go na a snoga ala wiki. Ala yali den be e go a Yelusalem fu holi a Paskafesa (Luk. 2:41; 4:16). Kande te den be de a pasi e go a Yelusalem den be e taigi den ala den sani di Yehofa du gi a foluku fi en. Kande den be e tyai den go a son wan fu den peesi di den be leisi fu den aini a Wowtu fu Gadu. Di den pikin be kon moo ipi, a be musu taanga gi Yowsefu anga Maliya fu tan du ala den sani ya. Ma Yehofa belesi a moiti di den meke anga den pikin fu den. Di den kon bigi denseefi be lobi Yehofa.

10. San dda anga mma di e dini Yehofa sa leli fu Yowsefu anga Maliya?

¹⁰ San dda anga mma di e dini Yehofa sa leli fu Yowsefu anga Maliya? Den sani di wi e taki, anga a fasi fa wi e du sani mu e soi kiin taki u lobi Yehofa. Holi a pakisei taki a moo bun sani di i sa du gi den pikin fi i, a fu yeepi den fu lobi Yehofa.  Neen meke i mu leli den taki begi, komakandaa, peleikiwooko, anga a sutudeli di den e sutudeli anga denseefi pelensipali (1 Tim. 6:6). I mu e solugu den pikin fi i tu, gi den san den abi fanowdu (1 Tim. 5:8). Ma ná feegete taki a ná gudu o meke den pasa go aini a nyun goontapu, ma na a de di den anga Yehofa o de mati. *​—Eseik. 7:19; 1 Tim. 4:8.

11. (a) Fa den sani di sikiifi a 1 Timotiyesi 6:17-19 sa yeepi dda anga mma fu du sani anga koni te den e kiya den pikin fu den? (b) Sowtu sani yu osufamii sa du makandaa? Sowtu wini wi o fende te u du den sani ya? (Luku a faki ‘ Sowtu wan fu den sani ya i wani du?’)

¹¹ A omen dda anga mma di e dini Yehofa e du sani di e soi taki den lobi en tuutuu. Den e du sani makandaa anga den osufamii. Den e go a den komakandaa anga den gaan komakandaa. Den e peleiki makandaa tu. Son osufamii e go peleiki a peesi pe u nai peleiki makiliki. Taawan e go luku a beikantoo makandaa, efuso den e yeepi anga a bow wooko. Anga den eigi moni den e du den sani ya, neen meke a ná ala yuu a sani ya e makiliki gi den. Ma Yehofa e belesi den osufamii ya fu a moiti di den e meke. (Leisi 1 Timotiyesi 6:17-19.) Gaanse fu den pikin di kiya aini den sowtu osufamii ya e dini Yehofa anga den hii ati te den kon bigi. Ai bigi gi den taki den dda anga mma kiya den na a fasi ya.​—Odo 10:22.

12. San Yesesi be mu du di a kon bigi?

¹² Yehofa, a Dda fu Yesesi e du sani anga koni ala yuu. Yowsefu anga Maliya seefi be e du sani anga koni. Ma di Yesesi be e kon moo bigi, enseefi be mu luku efu a be o wooko anga san den be leli en (Gal. 6:5). Leti enke u, Yesesi be sa luku gi enseefi san a wani du anga en libi. Efu a be wani, a be sa du sani di be o meke en libi waka moo bun a goontapu ya. Ma Yesesi á du nawan sani di be sa poli en anga Yehofa (Yoh. 8:29). Fa yonkuuwan aini a ten ya sa waka a Yesesi baka?

13. San Yesesi be du di a be yonkuu?

¹³ Yesesi be e aliki Yowsefu anga Maliya. A á be abi sondu, ma toku a á be e luku taki a sabi sani moo den. A be e ‘saka enseefi a den ondoo ala yuu’ (Luk. 2:51). A Yesesi a be fosi pikin fi en dda anga en mma, neen meke a be mu e yeepi anga son sani. A be musu e wooko taanga fu leli a tembeewooko di Yowsefu be e du fu solugu en osufamii.

14. Fa u du sabi taki Yesesi be lobi a Wowtu fu Gadu?

 ¹⁴ Yesesi dda anga en mma be musu taigi en sowtu wonduu Gadu du fu meke en, anga san a engel fu Yehofa be taigi den (Luk. 2:8-19, 25-38). Winsi fa den be taigi Yesesi den sani ya, toku enseefi be go ondoosuku a Wowtu fu Gadu. Fa u du sabi taki Yesesi be lobi sutudeli a Wowtu fu Gadu? Beibel taki den leliman fu Yelusalem ‘be e foondoo di den be si fa a be koni anga a fasi fa a be e piki den akisi fu den’ (Luk. 2:46, 47). Di a be abi 12 yali a be sabi kaba taki Yehofa neen Dda, bika a be sutudeli a sani ya aini a Wowtu fu Gadu.​—Luk. 2:42, 43, 49.

15. Fa Yesesi soi taki a be wani du san en Dda taki?

¹⁵ Di Yesesi fusutan san Yehofa be wani a du, a be de kabakaba fu du sani enke fa en Dda wani (Yoh. 6:38). A be sabi taki a omen sama be o buuse en, toku a saka enseefi a Yehofa ondoo. Di Yesesi dopu aini a yali 29, a soi taki a moo pelensipali sani gi en, a be fu du a wooko di Yehofa be gi en (Heb. 10:5-7). Di den sipikii en a wan ponsu seefi, a á daai baka gi Yehofa.​—Yoh. 19:30.

16. Fa pikin sa waka a Yesesi baka?

¹⁶ Aliki i dda anga i mma. I dda anga i mma a sondu libisama leti enke Yowsefu anga Maliya. Ma a den Yehofa gi a wooko fu kiya i. Efi yu e teke den taki, ‘sani o go bun anga i’.​—Efe. 6:1-4.

17. Enke fa Yowsuwa 24:15 e soi, da sowtu bosoloiti yonkuuwan abi fu teke?

¹⁷ Luku sama i wani dini. Iseefi abi fu ondoosuku sani fu sabi sama a Yehofa tuutuu, san a abi a pakisei gi libisama, anga fa i sa du sani di e meke a piisii (Rom. 12:2). Te i fusutan den sani ya, da yu o wani dini Yehofa. A dati na a moo bun sani di i sa du anga i libi. (Leisi Yowsuwa 24:15; Peleik. 12:1). Efi yu e sutudeli Beibel ala yuu, yu o moo lobi Yehofa. Yu o biibi anga i hii ati tu taki a o holibaka gi i.

18. San yonkuuwan mu du? Sowtu bakapisi a sani ya o abi?

¹⁸ Poti a dini di yu e dini Yehofa a fesi aini i libi. A goontapu fu Saatan e leli  sama taki den o piisii te den e suku wini fu den wawan. Ma u sabi taki a omen sani e miti den sama di e feti a gudu baka. A de enke a ‘sutu den e sutu denseefi’ (1 Tim. 6:9, 10). Ma te yu e aliki Yehofa, da i poti den sani di a wani u du a fesi, da sani o waka i bun, bika yu o sabi fa fu ‘du sani anga koni’.​—Yow. 1:8.

19. San dda anga mma á mu feegete?

¹⁹ Dda anga mma, u yeepi den pikin fu u fu dini Yehofa. Efi yu e fitoow Yehofa a o yeepi i fu du sani anga koni (Odo 3:5, 6). Ná feegete taki a ná taki namo i mu e taki anga den pikin fi i, bika den e moo poti pakisei a den sani di yu e du. Neen meke i mu e du sani anga koni, da kande denseefi o wani dini Yehofa anga den hii ati leti enke i.

20. Sowtu belesi yonkuuwan o fende efu den e dini Yehofa?

²⁰ Yonkuuwan, i dda anga i mma sa yeepi i fu du sani anga koni, ma iseefi mu wani dini Yehofa tu. Meke moiti fu waka a Yesesi baka, da i dini Yehofa anga i hii ati fu di i lobi en. Efi i du a sani ya, i libi o waka bun nownow (1 Tim. 4:16). Ma aini a ten di e kon yu o abi a moo bun libi di wan sama sa abi.