ARTIK POU ÉTIDYÉ 44
Ès zòt timoun ké adoré Bondjé lò yé ké gran ?
« Jézi té ka kontinyé gen plizanpli sajès é i té ka kontinyé grandi, é pi i té ka grandi pi i té gen favèr Bondjé ké favèr wonm-yan » (LUC 2:52).
KANTIK 134 Les enfants sont un don sacré
KOUTWÉY ASOU SA NOU KÉ WÈ *
1. Ki pi bon désizyon nou pouvé pran ?
SOUVAN, désizyon paran-yan ka pran, ka gen konsékans asou lavi yé pitit pannan lontan. Si yé pa ka pran bon désizyon, sa pouvé mennen problèm pou yé timoun. Mé si yé ka pran bon désizyon, yé ka idé yé timoun gen roun bèl lavi. Mé timoun-yan osi divèt pran bon désizyon. Pi bon désizyon nou pouvé pran, a sèrvi Jéova nou Papa ki kontan nou (Ps. 73:28).
2. Ki bon désizyon Jézi ké so papa ké so manman pran ?
2 Papa ké manman Jézi té byen désidé idé yé timoun sèrvi Jéova. É chak désizyon yé pran montré ki sèrvi Bondjé, a té sa ki té pi enpòrtan pou yé (Luc 2:40, 41, 52). Jézi osi pran bon désizyon ki idé l’ fè sa Jéova té lé i fè (Mat. 4:1-10). I divini roun wonm ki té bon, fidèl douvan Bondjé é ki té gen kouraj. Tout paran-yan ki kontan Jéova té ké kontan ké fyèr ganyen roun timoun kou li.
3. Ki késyon sa artik-a ké réponn ?
3 Sa artik-a ké bay répons asou sa késyon-yan : Ki bon désizyon Jéova pran pou Jézi ? Kisa paran krétyen-yan pouvé anprann di désizyon Jozèf ké Mari pran ? É kisa jenn krétyen-yan pouvé anprann di désizyon Jézi pran ?
IMITÉ JÉOVA
4. Ki désizyon enpòrtan Jéova pran pou so Pitit ?
4 Jéova chwazi roun bon manman ké roun bon papa pou Jézi (Mat. 1:18-23 ; Luc 1:26-38). Annan Labib-a nou ka li plizyèr bagaj Mari di ki té ka soti di so tchò. Sa paròl-ya ka montré kouman i té kontan Jéova ké so Paròl (Luc 1:46-55). É fason Jozèf réyaji douvan sa Jéova té ka doumandé li, ka montré ki i té kontan li é ki i té lé fè l’ plézi (Mat. 1:24).
5-6. Ki problèm Jéova lésé so Pitit wè ?
5 Jéova pa chwazi roun papa ké roun manman ki té gen soumaké pou lévé Jézi. Sakrifis Jozèf ké Mari mennen apré nésans Jézi ka montré ki yé té maléré (Luc 2:24). Jozèf té ka travay bwa, é pitèt i té gen roun ti koté pou i travay òbò so kaz, Nazarèt. Li ké Mari, té dèt gen roun lavi senp, ankò plis lò yé vin gen sis timoun apré sa, si a pa plis (Mat. 13:55, 56).
6 Jéova protéjé Jézi di plizyèr bagaj, mé i pa protéjé li di tout bagaj (Mat. 2:13-15). Parèkzanp, sèrten annan so fanmi pa té ka krè annan li. Imajiné kouman i té divèt gen lanpenn lò roun ran annan yé pa asèpté l’ kou Mési-a lò i koumansé préché (Marc 3:21 ; Jean 7:5). Épi, Jozèf dèt mouri lò Jézi té jenn toujou, sa té divèt rèd pou li. Kou a li ki té pi gran-an, a dèt li ki ranplasé so papa annan antrépriz fanmi-a (Marc 6:3). I anprann pran swen di so fanmi, é i dèt travay rèd pou bay li manjé ké bwè. Atò, i té savé sa sa té lé di santi so kò las lò lajournen-an fini.
Papa ké manman, anprann zòt timoun chaché konsèy annan Paròl Bondjé-a pou préparé yé pou problèm yé ké jwenn annan yé lavi * (gadé paragraf 7).
7. a) Ki késyon roun mouché ké so madanm ki lé gen timoun ouben ki ja gen timoun divèt pozé yé kò ? b) Dapré Proverbes 2:1-6, kisa paran-yan divèt anprann yé timoun ?
7 Si to maryé, é to ké to madanm ouben to mari zòt lé gen timoun, doumandé zòt kò : « Ès nou gen imilité é ès nou kontan Jéova ké so Paròl ? Ès i té ké chwazi nou pou pran swen di roun ti bébé ki fin fèt, ki gen valò pou li ? » (Ps. 127:3, 4). Si to ja gen timoun, doumandé to kò : « Ès mo ka anprann mo timoun ki sa enpòrtan pou yé travay rèd ? Ès mo ka fè tousa mo pouvé pou protéjé yé di problèm yé ké pouvé jwenn annan monn Satan-an ? » (Eccl. 3:12, 13 ; Prov. 22:3). To pa pouvé anpéché to timoun jwenn problèm. Sa enposib. Mé, to pouvé préparé yé ké lanmou pou problèm yé ké jwenn annan yé lavi, si to ka kontinyé anprann yé chaché konsèy annan Paròl Bondjé-a (li Proverbes 2:1-6). Parèkzanp, si roun moun annan zòt fanmi ka lésé lavérité-a, sèrvi Labib-a pou montré yé poukisa sa enpòrtan pou nou rété fidèl douvan Jéova (Ps. 31:23). Ouben si roun moun to kontan ka mouri, montré to timoun kouman Labib-a pouvé konsolé zòt (2 Cor. 1:3, 4 ; 2 Tim. 3:16).
IMITÉ JOZÈF KÉ MARI
8. Dapré Deutéronome 6:6, 7, kisa Jozèf ké Mari té divèt fè ?
8 Jozèf ké Mari idé Jézi divini roun moun Bondjé té kontan. Pou rivé fè sa yé swiv konsèy Jéova ka bay paran-yan (li Deutéronome 6:6, 7). Yé té kontan Jéova bokou é sa ki té pi enpòrtan pou yé, a té ankourajé yé timoun gen sa menm lanmou-a.
9. Ki désizyon enpòrtan Jozèf ké Mari pran pou yé fanmi ?
9 Jozèf ké Mari chwazi pran labitid adoré Jéova ansanm ké yé timoun. Asiré pa pitèt, yé té ka alé chak simenn annan réinyon yé té ka fè annan sinagòg Nazarèt. É chak lannen yé té ka alé Jérizalèm pou Lapak (Luc 2:41 ; 4:16). Pitèt yé té ka profité lò yé té ka fè larout pou anprann Jézi ké so frè ké sò-ya istwè pèp Jéova-a. Nou pouvé menm imajiné ki, asou chimen, yé té ka alé vizité sèrten koté Labib-a ka palé. Pi fanmi-a té ka vin gran, pi sa té divèt rèd pou Jozèf ké Mari kontinyé adoré Bondjé ansanm ké yé timoun. Mé, sonjé ki bénédiksyon yé dèt trapé ! Paské adoré Jéova, a té sa ki té pi enpòrtan pou yé, fanmi-a té ka rété pròch ké Jéova.
10. Kouman paran-yan pouvé imité Jozèf ké Mari ?
10 Si to sa roun manman ouben roun papa, kouman to pouvé imité Jozèf ké Mari ? Pou koumansé, annan sa to ka di é annan sa to ka fè montré to timoun ki to kontan Jéova ké tout to tchò. Pi bèl kado to pouvé bay yé, a anprann yé konnèt ké kontan Jéova. É roun annan sé bagaj pi enpòrtan to pouvé anprann yé, a fè yé pran labitid étidyé, priyè, alé annan réinyon-yan ké préché (1 Tim. 6:6). Nou pa menm bézwen di ki to divèt bay yé sa yé bézwen pou viv (1 Tim. 5:8). Mé a pou to sonjé ki a pa soumaké ki ké pèrmèt yé rété vivan é antré annan monn nouvo-a lò sa vyé monn-an ké fini, mé a yé lanmityé ké Jéova * (Ézéch. 7:19 ; 1 Tim. 4:8).
Sa ka ankourajé nou lò nou ka wè roun patché manman ké papa pran désizyon ki ka idé yé fanmi rété pròch ké Jéova * ! (gadé paragraf 11).
11. a) Kouman konsèy nou ka trouvé annan 1 Timothée 6:17-19 pouvé idé paran-yan pran bon désizyon ? b) Ki projè to fanmi pouvé gen é ki bénédiksyon i ké pouvé rousouvwè ? (gadé ankadré « Ki projè to fanmi pouvé gen ? »).
11 Sa ka ankourajé nou lò nou ka wè roun patché paran ka pran bon désizyon pou idé yé timoun rété pròch ké Jéova ! Sa paran-yan ké yé timoun ka adoré Jéova ansanm. Yé ka alé annan réinyon-yan, annan asanblé-ya. Yé ka préché. Roun ran fanmi ka jis ranjé yé kò pou alé préché koté nou pa ka préché souvan. Ròt fanmi ka alé wè Bétèl-ya ouben ka bay roun koudmen lò yé ka fè batiman òrganizasyon Jéova ka sèrvi. Fanmi-ya ki ka chwazi fè sa kalité bagaj-ya ka dépansé soumaké pou sa é détan, sa divèt rèd pou yé. Mé a pa ti rékonpans Jéova ka bay yé pou sa yé ka fè (li 1 Timothée 6:17-19). Souvan, timoun-yan ki lévé annan sa kalité fanmi-ya ka kontinyé fè sa bèl bagaj-ya lò yé vin gran, é yé kontan yé papa ké yé manman lévé yé konsa * ! (Prov. 10:22).
IMITÉ JÉZI
12. Kou i té ka vin gran, kisa Jézi té divèt fè ?
12 Papa Jézi ki annan syèl-a toujou ka pran bon désizyon. É so papa ké so manman ki té asou latè-a té ka pran bon désizyon osi. Mé lò Jézi vin gran, i té pou pran so pròp désizyon (Gal. 6:5). Kou nou chak, i té pouvé désidé sa i té ké fè annan so lavi. I té pouvé désidé gadé pou so douvan lèstomak. Mé a pa sa i fè. I toujou mété so lanmityé ké Jéova douvan (Jean 8:29). Kisa jennjan-yan pouvé anprann ké so èkzanp ?
Jennjan-yan, lésé zòt papa ké zòt manman ansényé zòt * (gadé paragraf 13).
13. Ki désizyon enpòrtan Jézi pran lò i té timoun toujou ?
13 Lò Jézi té timoun toujou, i chwazi obéyi so papa ké so manman. I pa janmen dézobéyi é i pa janmen di i té konnèt plis pasé yé. ‘I té ka kontinyé kouté yé’ (Luc 2:51). A Jézi ki té pi gran-an, sa lé di ki i té gen rèsponsabilité. Atò, i divèt fè tousa i té pouvé, pou fè sa i té divèt fè. I dèt travay rèd pou anprann travay bwa ké Jozèf pou i té pouvé idé l’ ganyen soumaké pou fanmi-a.
14. Kouman nou savé ki Jézi té ka pran tan byen étidyé Paròl Bondjé-a ?
14 Asiré pa pitèt, papa ké manman Jézi di li ki so nésans a té roun mirak. Yé dèt palé li osi di sa zanj-ya té di asou li (Luc 2:8-19, 25-38). Mé Jézi té lé konnèt plis bagaj ankò. I étidyé Labib-a osi li rounso. Kouman nou savé ki i té ka pran tan byen étidyé Paròl Bondjé-a ? Paské, lò i té timoun toujou, ansényan-yan ki té Jérizalèm « té ka rété èstébékwé afòrs i té entélijan é afòrs so répons-ya té vayan » (Luc 2:46, 47). Lò i té gen 12 an rounso, Jézi té ja sir ki Jéova té sa so Papa (Luc 2:42, 43, 49).
15. Kisa ka montré ki Jézi té chwazi fè volonté Jéova ?
15 Lò Jézi anprann kisa Jéova té lé i fè, i chwazi fè sa Jéova té lé (Jean 6:38). I té savé ki roun patché moun té ké rayi l’, é i dèt réfléchi asou sa sa té lé di. Mé i chwazi obéyi Jéova kanmenm. Lò i batizé annan lannen 29 di nou lépòk, sa ki té pi enpòrtan pou li a té fè sa Jéova té lé i fè (Héb. 10:5-7). É menm lò i té ka mouri asou poto soufrans-a i rété byen désidé fè volonté so Papa (Jean 19:30).
16. Ki léson jennjan-yan pouvé anprann ké èkzanp Jézi ?
16 Kouté to papa ké to manman. Kou Jozèf ké Mari, to papa ké to manman pa parfè. Mé Jéova ka doumandé yé protéjé to, fòrmé to ké gidé to. Si to ka kouté konsèy yé ka bay to é si to ka rèspèkté yé otorité, ‘tout bagaj ké alé byen pou to’ (Éph. 6:1-4).
17. Dapré Josué 24:15, ki désizyon jennjan-yan divèt pran pou yé kò ?
17 Désidé ki moun to ké adoré. To divèt vérifyé to menm répons asou sa késyon-yan : Jéova a kimoun ? Kisa i lé ? É kouman to pouvé fè sa i lé annan to lavi ? (Rom. 12:2). Si to ka fè sa, to ké pouvé pran désizyon ki pi enpòrtan pou to pran annan to lavi : adoré Jéova (li Josué 24:15 ; Eccl. 12:1). Si to ka li é si to ka étidyé Labib-a souvan, to ké kontinyé kontan Bondjé plis é to lafwa annan li ké divini pi fò.
18. Ki désizyon jennjan-yan divèt pran, é ki bénédiksyon yé ké jwenn ?
18 Chwazi mété volonté Jéova an prémyé annan to lavi. Monn Satan-an ka di ki, si to ka sèrvi sa to konnèt fè pou to pròp kò rounso to ké kontan. Mé nou savé ki tousa ki ka kouri dèyè soumaké « ka krévé yé kò toupatou ké roun patché soufrans » (1 Tim. 6:9, 10). Si to ka kouté Jéova é si to ka chwazi mété so volonté an prémyé annan to lavi, « to ké rivé annan to lavi é a konsa to ké fè tout bagaj ké sajès » (Jos. 1:8).
KISA TO KÉ DÉSIDÉ FÈ ?
19. Kisa papa ké manman-yan divèt sonjé ?
19 Papa ké manman, fè tousa zòt pouvé pou idé zòt timoun-yan adoré Jéova. Konté asou li, é i ké gidé zòt pou zòt pran bon désizyon (Prov. 3:5, 6). Sonjé ki sa zòt ka fè ké fè plis travay asou zòt timoun pasé sa zòt ka di. Atò, pran désizyon ki ké idé yé gen favèr Jéova.
20. Ki bénédiksyon jennjan-yan ké gen si yé ka chwazi adoré Jéova ?
20 Jennjan, zòt papa ké zòt manman pouvé idé zòt pran bon désizyon. Mé a zòt ki divèt fè sa ki fo pou gen favèr Bondjé. Atò, imité Jézi é chwazi adoré zòt Papa ki annan syèl-a é ki plen ké lanmou. Konsa, zòt lavi ké gen roun sans, zòt ké toujou gen bagaj pou fè é zòt ké gen tchò kontan (1 Tim. 4:16). É dimen, zòt ké vréman gen pi bèl lavi i pouvé gen !
KANTIK 133 Adorons Jéhovah dès la jeunesse
^ § 5 Paran krétyen-yan lé yé timoun gen tchò kontan é yé lé yé adoré Jéova lò yé ké gran. Ki désizyon yé pouvé pran pou idé yé adoré Bondjé lò yé ké gran ? É ki désizyon jenn krétyen-yan divèt pran pou yé rivé annan yé lavi ? Nou ké wè répons asou sa késyon-yan annan sa artik-a.
^ § 11 Gadé ankadré « Je ne pouvais pas rêver meilleurs parents » annan Réveillez-vous ! òktòb 2011, paj 20, ké artik « Lettre spéciale à leurs parents » annan Réveillez-vous ! 8 mars 1999, paj 25.
^ § 66 MEN SA NOU KA WÈ ASOU ZIMAJ : Mari dèt ankourajé Jézi kontan Jéova bokou. Jòdla, manman-yan pouvé fè menm bagaj-a ké yé pitit.
^ § 68 MEN SA NOU KA WÈ ASOU ZIMAJ : Asiré pa pitèt, sa té trè enpòrtan pou Jozèf alé annan réinyon-yan ki té ka fèt annan sinagòg-a ké so fanmi. Jòdla, papa-ya pouvé montré osi ki réinyon-yan enpòrtan lò yé ka alé ké tout yé fanmi.
^ § 70 MEN SA NOU KA WÈ ASOU ZIMAJ : Jézi anprann travay bwa ké so papa. Jòdla, jennjan-yan pouvé anprann fè roun patché bagaj ké yé papa.
