1. ¿Mbaʼépa hína pe mbaʼe iporãvéva peteĩ persóna ikatúva odesidi?

PYʼỸINTE ningo umi mbaʼe tuakuéra odesidíva oafekta ifamiliakuérape heta tiémpore. Umi tuakuéra odesidi vaíramo ikatu omoprovléma hína ifamiliakuérape. Haʼekuéra odesidi porãramo katu oipytyvõta ifamíliape oiko hag̃ua vyʼápe. Péro umi ifamiliakuéra odesidi porã vaʼerã avei. Ha peteĩ persóna odesidíramo oservi ñande Ru yvagapegua Jehovápe, upéva hína pe mbaʼe iporãvéva ikatúva odesidi (Sal. 73:28).

2. ¿Mbaʼe iporãvapa odesidi vaʼekue Jesús ha ituakuéra?

² Jesús tuakuéra, José ha María oipytyvõse vaʼekue ifamiliakuérape oservi hag̃ua Jehovápe. Ha umi mbaʼe odesidíva ohechauka vaʼekue upéva iñimportanteterei hague chupekuéra g̃uarã (Luc. 2:40, 41, 52). Jesús odesidi porã vaʼekue avei, ha upéva oipytyvõ chupe ojapo hag̃ua Jehová ojeruréva chugui (Mat. 4:1-10). Jesús okakuaapávo oiko chugui peteĩ kuimbaʼe ivuéno, ifiél ha ipyʼaguasúva. Ha enterove tuakuéra ohayhúva Jehovápe ijorgullóso ha ovyʼáta orekóramo peichagua família.

3. ¿Mbaʼe porandúpa ñambohováita ko artíkulope?

³ Ko artíkulope ñambohováita koʼã porandu: ¿Mbaʼe mbaʼépa Jehová odesidi vaʼekue Jesús rehehápe? ¿Mbaʼépa ikatu oaprende umi tuakuéra umi mbaʼe José ha María odesidi vaʼekuégui? ¿Ha mbaʼépa ikatu oaprende mitãrusukuéra umi mbaʼe Jesús odesidi vaʼekuégui?

4. ¿Mbaʼe iñimportántevapa Jehová odesidi vaʼekue Jesús rehehápe?

⁴ Jehová oiporavo porãiterei vaʼekue Jesús tuakuerarã (Mat. 1:18-23; Luc. 1:26-38). Umi mbaʼe María heʼi vaʼekue ipyʼaite guive ha jatopáva la Bíbliape, ohechauka haʼe ohayhueterei  hague Jehovápe ha Iñeʼẽ (Luc. 1:46-55). José katu iñeʼẽrendu vaʼekue Jehovápe, ha upéicha ohechauka ohayhuha chupe ha oĩ porãseha hendive (Mat. 1:24).

5, 6. ¿Mbaʼe mbaʼépa Jehová opermiti vaʼekue ohasa Itaʼýra?

⁵ Jahecha Jehová ndoiporavói hague Jesús tuakuerarã iplátava. Pe sakrifísio José ha María ojapo vaʼekue Jesús onase rire ohechauka imboriahu hague hikuái (Luc. 2:24). José oiméne oreko rakaʼe hóga ykerete voi peteĩ karpintería michĩva Nazarétpe. Haʼekuéra oiméne oiko sensillomínte, koʼýte ifamília reta rupi, oiméne oreko rakaʼe hikuái 7 mitã térã hetave voi (Mat. 13:55, 56).

⁶ Jehová ningo oprotehe vaʼekue Jesúspe heta mbaʼe ipeligrósovagui, péro ndoprotehéi Itaʼýrape entéro mbaʼégui (Mat. 2:13-15). Por ehémplo, Jesús oreko vaʼekue ihentekuéra ndojeroviáiva hese. Ñapensamína mbaʼeichaitépa Jesús ombyasýne rakaʼe ñepyrũrã umi hogapegua voi ndogueroviái haguére haʼe haʼeha pe Mesías (Mar. 3:21; Juan 7:5). Avei oiméne José omano rakaʼe Jesús imitãitirõ guare, ha haʼe ombyasy asýne raʼe upéva. Upéicha rupi, Jesús oiméne oñenkarga rakaʼe itúa travahokuére, haʼe rupi pe taʼýra ypykue (Mar. 6:3). Okakuaávo ohóvo, Jesús oaprende vaʼekue avei oñangareko hag̃ua ifamíliare. Haʼe oiméne ombaʼapo jejopy rakaʼe omantene hag̃ua chupekuéra. Upévare haʼe oikuaa porã vaʼekue mbaʼépa heʼise ñanekaneʼõ ñambaʼapo rire un día pukukue.

7. a) ¿Mbaʼe mbaʼépa oñeporandu vaʼerã umi omendáva omongakuaa porãséramo ifamíliape? b) Heʼiháicha Proverbios 2:1-6, ¿mbaʼépa tuakuéra omboʼe vaʼerã ifamiliakuérape ojapo hag̃ua?

⁷ Oiméramo ñande ñamendáma ha jarekose hína mitã, ikatu ñañeporandu: “¿Orépa oreumílde ha rohayhu Jehovápe ha Iñeʼẽ? ¿Oreporavónepa Jehová roñangareko hag̃ua peteĩ mitãraʼýre?” (Sal. 127:3, 4). Ha oiméramo ñande ñanefamíliama, ikatu ñañeporandu: “¿Amboʼépa che famíliape iporãha ombaʼapo jejopy?” (Ecl. 3:12, 13). “¿Añehaʼãmbaitépa hína aprotehe hag̃ua che famíliape umi pelígro oĩvagui Satanás múndope?” (Prov. 22:3). Péro ñande ningo ndaikatúi japrotehe ñane famíliape entéro umi provléma haʼekuéra ikatúvagui oreko. Ndaikatumoʼãi voínte jajapo upéva. Upéicharõ jepe, ikatu japrepara chupekuéra ombohovaikuaa hag̃ua umi provléma, ñamboʼévo kontinuadoite ha mborayhúpe mbaʼéichapa ikatu ojerovia hikuái umi  konsého la Biblia omeʼẽvare (elee Proverbios 2:1-6). Por ehémplo, peteĩ ñane pariénte ohejáramo Jehovápe, jaipuru vaʼerã la Biblia ñamboʼe hag̃ua ñane famíliape mbaʼérepa iñimportánte jasegi ñandefiél Jehovápe (Sal. 31:23). Térã omanóramo peteĩ jahayhúva, jahechaukákena ñane famíliape mbaʼéichapa ikatu oipuru Ñandejára Ñeʼẽ otopa hag̃ua konsuélo ha ipyʼaguapy hag̃ua (2 Cor. 1:3, 4; 2 Tim. 3:16).

8. ¿Mbaʼéichapa José ha María ohechauka vaʼekue osegiha pe mandáto oĩva Deuteronomio 6:6, 7-pe?

⁸ José ha María ojapo vaʼekue umi mbaʼe Jehová ojeruréva umi tuakuéragui, upévare oipytyvõ vaʼekue Jesúspe oiko hag̃ua chugui peteĩ kuimbaʼe Ñandejára oguerohorýva (elee Deuteronomio 6:6, 7). José ha María ningo ohayhu vaʼekue Jehovápe ipyʼaite guive, ha haʼekuéra oipytyvõse kuri ifamíliape ohayhu hag̃ua avei Jehovápe, ha upéva la iñimportantevéva chupekuéra g̃uarã.

9. ¿Mbaʼe iñimportántevapa odesidi vaʼekue José ha María?

⁹ José ha María odesidi vaʼekue orekotaha pe kostúmbre oadorávo Jehovápe ifamíliandi. Haʼekuéra káda semána oho vaʼekue pe sinagógape Nazarétpe, ha káda áño oho Jerusalénpe pe Paskuarã (Luc. 2:41; 4:16). Oiméne oaprovecha rakaʼe oviaha aja Jerusalénpe, omombeʼu hag̃ua Jesús ha iñermanokuérape umi mbaʼe ohasa vaʼekue yma Jehová puévlo. Oiméne tapére ovisita raʼe avei ohóvo hikuái umi lugár oñemensionáva Ñandejára Ñeʼẽme. Ha ifamília retavévo ohóvo hikuái, oiméne ijetuʼuvéma raʼe José ha Maríape osegi hag̃ua pe kostúmbre orekóva oadorávo Jehovápe ifamíliandi. Péro ñapensamíntena umi mbaʼe porãite ohupytývare hikuái. Haʼekuéra omotenonde rupi pe adorasión oñemeʼẽva Ñandejárape, oipytyvõ vaʼekue ifamíliape oñemoag̃ui hag̃ua Jehováre.

10. ¿Mbaʼe mbaʼépa ikatu oaprende José ha Maríagui umi tuakuéra kristiáno?

¹⁰ ¿Mbaʼépa ikatu oaprende José ha Maríagui umi tuakuéra kristiáno? Pe iñimportantevéva hína: Jahechauka vaʼerã ñane familiakuérape jahayhuha Jehovápe ñande pyʼaite guive, umi mbaʼe jaʼe ha jajapóva rupive. Jahechakuaa vaʼerã ñaipytyvõramo ñane famíliape ohayhu hag̃ua Jehovápe, ñameʼẽha hína chupekuéra pe rregálo iporãvéva. Ha ñamboʼéramo  chupekuéra ojepokuaa hag̃ua ostudia, oñemboʼe ha opredika, umíva haʼéta hína umi kostúmbre iporãvéva ikatúva oreko hikuái (1 Tim. 6:6). Jaikuaa ningo avei ñamantene vaʼerãha ñane famíliape ha ñameʼẽ chupekuéra umi mbaʼe oikotevẽva (1 Tim. 5:8). Péro ñanemanduʼa vaʼerã ndahaʼeiha pe pláta térã umi mbaʼerepy la oipytyvõtava chupekuéra ojesalva hag̃ua, ág̃a Satanás múndo oñehundi vove ha oike hag̃ua Ñandejára múndo pyahúpe, síno pe amista iporãitéva orekóva Jehovándi (Ezeq. 7:19; 1 Tim. 4:8). *

11. a) ¿Mbaʼéichapa pe konsého oĩva 1 Timoteo 6:17-19-pe, oipytyvõ umi tuakuérape omongakuaa porã hag̃ua ifamíliape? b) ¿Mbaʼe mbaʼépa ikatu ñañehaʼã jajapo ñane famíliandi, ha mbaʼe iporãvapa jahupytýta upe haguére? (Ehecha pe rrekuádro “ ¿Mbaʼe mbaʼépa ikatu ñañehaʼã jajapo ñane famíliandi?”).

¹¹ ¡Ajépa javyʼaite jahechávo oĩha hetaite tuakuéra kristiáno oñehaʼãva hína oipytyvõ ifamiliakuérape oñemoag̃ui hag̃ua Jehováre! Haʼekuéra oadora meme Jehovápe oñondive, oho rreunionhápe ha asambleahápe, ha osẽ hikuái opredika. Oĩ voi ningo umi família ohóva opredika umi lugár ndojepredikaguasuihápe. Ótro katu ovisita Betel, térã oapoja umi konstruksión ojejapóva Jehová organisasiónpe. Umi família odesidíva ojapo koʼã mbaʼe, katuete ogastámante vaʼerã pláta ha ombohovái vaʼerã avei umi mbaʼe ijetuʼúva. Péro Jehová heta ovendesi chupekuéra ojapo haguére péicha (elee 1 Timoteo 6:17-19). Umi mitã okakuaáva peichagua famíliape, tuicha rire pyʼỹinte osegi ojapo umi mbaʼe porã oaprende vaʼekue, ha ni michĩmi nombyasýi ojapo haguére upéva (Prov. 10:22). *

12. ¿Mbaʼépa Jesús ojapo vaʼerã kuri okakuaávo ohóvo?

¹² Jesús Túa yvagapegua ningo siémpre odesidi porã, ha ituakuéra yvy arigua odesidi porã vaʼekue avei. Péro Jesús okakuaávo ohóvo, ijeheguietéma odesidi vaʼerã mbaʼépa ojapóta (Gál. 6:5). Ñandéicha avei, haʼe oreko vaʼekue pe liverta odesidi hag̃ua ijehegui umi mbaʼe ojapótava. Jesús ikatu vaʼekue odesidi ojapo umi mbaʼe chupe ogustávante, péro haʼe odesidi orekotaha peteĩ amista iporãva Jehovándi (Juan 8:29). ¿Mbaʼéichapa iñehémplo ikatu oipytyvõ umi imitãvape koʼág̃arupi?

13. ¿Mbaʼe iñimportántevapa Jesús odesidi vaʼekue imitãrõ guare?

¹³ Jesús imitãrõ guare odesidi vaʼekue iñeʼẽrendutaha ituakuérape. Haʼe núnka noñemoĩri ituakuéra omboʼévare chupe, openságui haʼe oikuaaveha chuguikuéra. Upéva rangue haʼe “osegi iñeʼẽrendu chupekuéra” (Luc. 2:51). Jesús ojagarra vaʼekue ensério pe rresponsavilida orekóva haʼe rupi pe taʼýra ypykue.  Haʼe oiméne ombaʼapo jejopy rakaʼe oaprende hag̃ua karpintería Joségui, péicha ikatúta oganaʼimi pláta oipytyvõ hag̃ua ifamíliape.

14. ¿Mbaʼéichapa jaikuaa Jesús ostudia porã hague Ñandejára Ñeʼẽ?

¹⁴ Jesús tuakuéra oiméne omombeʼu rakaʼe chupe haʼe onase hague peteĩ milágro rupive, ha avei mbaʼépa heʼi vaʼekue hese Ñandejára mensaherokuéra (Luc. 2:8-19, 25-38). Péro Jesús noñekontentái vaʼekue oikuaa haguérente upéva, haʼe ostudia porã vaʼekue avei Ñandejára Ñeʼẽ. ¿Mbaʼéichapa jaikuaa upéva? Pórke imitãme gueteri umi mboʼeharakuéra oĩva Jerusalénpe “tuicha oñesorprende ohechávo mbaʼeichaitépa ontende heta mbaʼe ha okontesta la oñeporandúva chupe” (Luc. 2:46, 47). Orekórõ guare 12 áñonte, Jesús oĩma vaʼekue segúro Jehová haʼeha Itúa ostudia porã rupi Ñandejára Ñeʼẽ (Luc. 2:42, 43, 49).

15. ¿Mbaʼéichapa Jesús ohechauka vaʼekue odesidi hague ojapo Jehová oipotáva?

¹⁵ Jesús oikuaárõ guare mbaʼépa Jehová oipota ojapo, odesidi oasepta pe asignasión haʼe omeʼẽva chupe (Juan 6:38). Jesús oikuaa vaʼekue oĩtaha heta ndaijaʼéiva hese, ha ijetuʼúramo jepe chupe upéva, lomímonte odesidi iñeʼẽrendutaha Jehovápe. Haʼe ojevautisárõ guare áño 29-pe, pe iñimportantevéva chupe g̃uarã haʼe vaʼekue ojapo Jehová ohaʼarõva chugui (Heb. 10:5-7). Ha omano mbotaitéramo jepe pe yvyráre, haʼe ndodudái vaʼekue ni michĩmi osegitaha ojapo Itúa oipotáva (Juan 19:30).

16. ¿Mbaʼépa ikatu oaprende umi imitãva Jesús ehémplogui?

¹⁶ Neñeʼẽrendúkena nde tuakuérape. José ha Maríaicha avei, nde tuakuéra ndahaʼéi perfékto. Péro Jehová omeʼẽ chupekuéra pe rresponsavilida ndeprotehe, nemboʼe ha ndegia hag̃ua. Nde rehendúramo umi konsého haʼekuéra omeʼẽva ndéve ha rerrespeta pe autorida orekóva hikuái, katuete ‘oho porãta ndéve’ (Efes. 6:1-4).

17. Heʼiháicha Josué 24:15, ¿mbaʼépa odesidi vaʼerã ijeheguiete umi imitãva?

¹⁷ Edesidi vaʼerã mávapepa reservíta. Nde reikuaa porã vaʼerã mávapa Jehová, mbaʼépa hína ivolunta ha mbaʼéichapa ikatu nde rekumpli upéva (Rom. 12:2). Upéi nde ikatútama redesidi pe mbaʼe iñimportantevéva nde rekovépe: Edesidi reservitaha Jehovápe (elee Josué 24:15; Ecl. 12:1). Nde rejepokuaáramo relee ha restudia meme la Biblia, resegíta rehayhuve  Jehovápe ha nde jerovia imbaretevéta.

18. ¿Mbaʼépa odesidi vaʼerã umi imitãva, ha mbaʼépa oikóta odesidi porãramo?

¹⁸ Edesidi vaʼerã remotenondetaha nde rekovépe Jehová volunta. Satanás múndo opromete javyʼataha jaipurúramo umi mbaʼe jajapokuaáva ñanevenefisiorãnte. Péro ñande jaikuaa porã umi oikóva pláta ha mbaʼerepy rapykuérinte, oikeha ‘opaichagua akã rasýpe ha heta ohasa asyha’ (1 Tim. 6:9, 10). Péro nde neñeʼẽrendúramo Jehovápe ha edesidi remotenondetaha nde rekovépe ivolunta, resẽ porãta umi mbaʼe rejapóvape ha “nearandúta” (Jos. 1:8).

19. ¿Mbaʼe rehepa imanduʼa vaʼerã umi tuakuéra?

¹⁹ Tuakuéra, peñehaʼãmbaitékena peipytyvõ pene famíliape oservi hag̃ua Jehovápe. Pejeroviákena Jehováre, ha haʼe penepytyvõta pedesidi porã hag̃ua (Prov. 3:5, 6). Penemanduʼákena pene familiakuérape oipytyvõtaha umi mbaʼe pejéva, péro tuichavéntema oipytyvõta chupekuéra umi mbaʼe pejapóva. Upévare, pedesidíkena umi mbaʼe oipytyvõ porãvétava pene famíliape Jehová oguerohory hag̃ua chupekuéra.

20. ¿Mbaʼe vendisiónpa ohupytýta umi imitãva odesidíramo oservi Jehovápe?

²⁰ Mitãrusu ha mitãkuñanguéra, pende tuakuéra ningo ikatu penepytyvõ pedesidi porã hag̃ua. Péro odependéma penderehe pejapo hag̃ua upéva Ñandejára pendeguerohory hag̃ua. Upévare pesegíkena Jesús ehémplo, ha pedesidi peservitaha pende Túa yvagapegua penderayhuetévape. Pejapóramo upéicha, koʼág̃ama voi pevyʼáta, pende rekove isentídota ha perekóta heta mbaʼe pejapo hag̃ua (1 Tim. 4:16). Ha amo gotyove katu koʼytevéntema peikóta vyʼápe.