1. Lub neej uas zoo tshaj plaws yog dabtsi?

NTAU ZAUS tej uas cov niam cov txiv ua yuav pab tau lawv cov menyuam lossis pab tsis tau. Yog lawv txiav txim siab tsis tau zoo ces yuav ua teeb meem rau cov menyuam. Tiamsis yog lawv ua zoo ces cov menyuam yuav tau lub neej zoo thiab muaj kev zoo siab. Cov menyuam yuav tau ua tib zoo xav seb lawv yuav ua lub neej zoo li cas. Lub neej uas zoo tshaj plaws yog qhov uas peb teev tiam peb Leej Txiv Yehauvas.​—Phau Ntawv Nkauj 73:28.

2. (1) Yauxej thiab Malis ua lub neej zoo li cas? (2) Yexus ua lub neej zoo li cas?

² Qhov uas teev tiam Yehauvas yog qhov uas tseem ceeb tshaj plaws rau Yauxej thiab Malis lub neej. Nkawd thiaj cob qhia nkawd cov menyuam kom teev tiam Yehauvas thiab. (Lukas 2:40, 41, 52) Thaum Yexus loj hlob nws yog ib tug neeg siab zoo, muab siab npuab Yehauvas, thiab muaj lub siab tawv. Tej Yexus ua hauv nws lub neej pab tau nws ua li Yehauvas lub siab nyiam. (Mathais 4:1-10) Cov niam cov txiv uas hlub Yehauvas yuav zoo siab heev yog lawv cov menyuam coj tau zoo ib yam li Yexus.

3. Zaj kawm no peb yuav teb cov lus nug twg?

³ Zaj kawm no peb yuav teb cov lus nug no: Yehauvas xaiv ob tug neeg zoo li cas los ua Yexus niam thiab txiv? Cov niam cov txiv Khixatia kawm tau li cas los ntawm Yauxej thiab Malis nkawd? Cov tub ntxhais hluas Khixatia kawm tau li cas los ntawm Yexus?

4. Yehauvas xaiv ob tug neeg zoo li cas los ua Yexus niam thiab txiv?

⁴ Yehauvas txawj xaiv niam thiab txiv rau Yexus. (Mathais 1:18-23; Lukas 1:26-38) Cov lus Malis hais hauv phau Vajlugkub qhia tias nws hlub Yehauvas thiab saib Vajtswv Txojlus muaj nqis. (Lukas 1:46-55) Thiab qhov uas Yauxej zoo siab hlo ua li Yehauvas hais qhia tias nws hwm Vajtswv thiab xav ua haum Vajtswv siab.​—Mathais 1:24.

5, 6. Yehauvas puas tiv thaiv Yexus ntawm txhua yam?

⁵ Yehauvas tsis xaiv ob niam txiv uas nplua nuj los ua Yexus niam thiab txiv. Qhov khoom uas Yauxej thiab Malis coj mus fij rau Yehauvas thaum yug tau Yexus qhia tias nkawd yog neeg txom nyem. (Lukas 2:24) Tej zaum nkawd kuj tsis muaj nyiaj txiag thiab cuab yeej cuab tam ntau rau qhov nkawd muaj menyuam tsawg kawg nkaus los 7 tus. (Mathais 13:55, 56) Yauxej yog ib tug kws ntoo ces tej zaum nws muaj ib lub tsev me me ua haujlwm nyob npuab nws lub tsev hauv Naxales.

⁶ Yehauvas yeej tiv thaiv nws tus Tub Yexus tiamsis Yehauvas tsis tiv thaiv txhua yam uas yuav los raug nws. (Mathais 2:13-15) Xws li Yexus tsev neeg los muaj ib txhia thaum xub thawj tsis ntseeg tias Yexus yog tus Mexiyas. Qhov no tej zaum ua rau Yexus tu siab kawg. (Malakaus 3:21; Yauhas 7:5) Thiab thaum Yauxej tuag tej zaum yuav nyuaj rau Yexus vim nws tseem hluas. Vim nws yog tus tub hlob, nws yuav tsum tau ua nws txiv lub luag haujlwm los yug nws tsev neeg. (Malakaus 6:3) Yexus yuav tsum khwv heev nws thiaj ua tau li ntawd. Ces nws yeej paub tias sab npaum li cas thaum mus ua haujlwm ib hnub los txog tsev.

7. (1) Cov niam txiv uas muaj menyuam yuav tau nug lawv tus kheej li cas? (2) Pajlug 2:1-6 yuav pab cov niam cov txiv cob qhia lawv cov menyuam li cas?

⁷ Yog koj muaj txij nkawm thiab xav muaj menyuam ces zoo rau koj nug koj tus kheej li no: ‘Wb ob niam txiv puas yog neeg txo hwjchim uas hlub Yehauvas thiab saib nws Txojlus muaj nqis? Yehauvas puas yuav tso siab rau wb yog wb muaj menyuam?’ (Phau Ntawv Nkauj 127:3, 4) Yog koj twb muaj metub menyuam lawm, nug koj tus kheej li no: ‘Kuv puas qhia kuv cov menyuam ua neeg nquag?’ (Tej Lus Qhia 3:12, 13) ‘Vim peb nyob rau  hauv Xatas lub qab ntuj, kuv puas ua li kuv ua tau los tiv thaiv kuv cov menyuam kom lawv tsis txhob raug mob thiab mus ua phem?’ (Pajlug 22:3) Peb yeej tiv thaiv tsis tau peb cov menyuam ntawm txhua yam. Tiamsis peb cob qhia tau lawv kom lawv paub muab Vajtswv Txojlus los pab lawv thaum lawv ntsib teeb meem. (Nyeem Pajlug 2:1-6.) Xws li yog muaj ib tug txheeb ze tsis teev tiam Yehauvas lawm, ua zoo muab Vajtswv Txojlus los pab cov menyuam to taub tias vim li cas lawv yuav tsum muab siab npuab rawv Yehauvas. (Phau Ntawv Nkauj 31:23) Lossis nyeem tej nqi Vajlugkub uas yuav nplij tau cov menyuam lub siab thaum muaj kev quaj ntsuag.​—2 Kauleethaus 1:3, 4; 2 Timautes 3:16.

8. Yauxej thiab Malis ua raws li 2 Kevcai 6:6, 7 li cas?

⁸ Yauxej thiab Malis hlub Yehauvas heev, nkawd xav kom nkawd cov menyuam hlub Yehauvas thiab. Nkawd ua li Yehauvas cov lus qhuab qhia rau cov niam cov txiv, nkawd thiaj li cob tau Yexus loj hlob thiab ua haum Vajtswv siab.​—Nyeem 2 Kevcai 6:6, 7.

9. Yauxej thiab Malis cob qhia nkawd cov menyuam li cas?

⁹ Yauxej thiab Malis coj nkawd cov menyuam nrog nkawd mus teev tiam Yehauvas. Lawv mus lub tsev sab laj hauv lub nroog Naxales txhua lub lim tiam thiab niaj xyoo mus ua kevcai Hla Dhau hauv lub nroog Yeluxalees. (Lukas 2:41; 4:16) Thaum Yauxej tsev neeg taug kev mus rau Yeluxalees los tej zaum Yauxej thiab Malis nkawd kuj qhia nkawd cov menyuam txog Yehauvas cov neeg thaum ub. Tej zaum lawv kuj mus xyuas tej qho chaw uas hais hauv Vajtswv Txojlus thiab. Thaum Yauxej thiab Malis muaj menyuam coob zuj zus tuaj yuav tsis yoojyim rau lawv niaj zaus mus pe hawm Vajtswv tiamsis vim nkawd saib kev pe hawm rau Yehauvas muaj nqis, nkawd tsev neeg thiaj muaj kev sib raug zoo nrog Yehauvas.

10. Cov niam cov txiv Khixatia kawm tau li cas los ntawm Yauxej thiab Malis nkawd?

¹⁰ Cov niam cov txiv Khixatia, nej kawm tau li cas los ntawm Yauxej thiab Malis nkawd? Tej nej hais thiab tej nej ua yuav tsum qhia tias nej hlub Yehauvas heev. Nco ntsoov tias yam uas zoo tshaj plaws uas nej muab tau rau nej cov menyuam yog pab kom lawv hlub Yehauvas.  Cov ua niam ua txiv, nej yeej tsis xav kom nej cov menyuam tu ncua ib yam dabtsi. (1 Timautes 5:8) Tiamsis qhov tseem ceeb tshaj rau nej cov menyuam yog qhia kom lawv rau siab ntso kawm Vajlugkub, thov Vajtswv, mus kev sib txoos, thiab mus tshaj tawm txoj xov zoo. Nco ntsoov tias tsis yog nyiaj txiag tiamsis yog lawv txojkev sib raug zoo nrog Yehauvas thiaj yuav pab lawv dim thaum Vajtswv rhuav tshem Xatas lub qab ntuj thiab coj lawv mus rau hauv Vajtswv lub qab ntuj tshiab.​—Exekees 7:19; 1 Timautes 4:8.

11. (1) Cov lus hauv 1 Timautes 6:17-19 yuav pab cov niam cov txiv Khixatia cob lawv cov menyuam li cas? (2) Tej tsev neeg Khixatia ua tau dabtsi ua ke, thiab yog tsev neeg ua li no ces lawv yuav tau nqi zog dabtsi ntawm Yehauvas? (Saib lub ntsiab me “ Koj Yuav Ua Dabtsi Nrog Koj Tsev Neeg?”)

¹¹ Peb zoo siab heev uas muaj cov niam cov txiv Khixatia coob tus niaj hnub teev tiam Yehauvas nrog lawv tsev neeg. Lawv coj lawv cov menyuam nrog lawv mus tej kev sib txoos thiab mus tej rooj sib txoos. Lawv kuj mus tshaj tawm txoj xov zoo ua ke thiab. Muaj tej tsev neeg tseem mus pab tshaj tawm rau tej thaj chaw uas tsis tshua muaj neeg mus tshaj tawm txog. Lawv ib txhia coj lawv cov menyuam mus xyuas Npe-ee lossis mus ua vaj ua tsev rau Yehauvas lub koom haum. Cov uas ua li no yuav tau siv nyiaj siv txiaj ntau thiab tsis yoojyim rau lawv. Tiamsis Yehauvas yuav muab nqi zog rau lawv. (Nyeem 1 Timautes 6:17-19.) Cov menyuam uas loj hlob hauv tej tsev neeg li no feem coob yuav tsis tso tseg tej uas lawv niam lawv txiv cob qhia lawv thiab yuav ris lawv niam lawv txiv txiaj ntsim.​—Pajlug 10:22.

12. Yexus yuav tau txiav txim siab li cas?

¹² Yehauvas yeej ib txwm ua qhov zoo xwb thiab Yauxej thiab Malis nkawd ua ib yam li ntawd rau nkawd cov menyuam. Tiamsis thaum Yexus tiav txiv lawm nws yuav tau txiav txim siab seb nws yuav ua nws lub neej li cas. (Kalatias 6:5) Yog nws xav ua li nws lub siab nyiam xwb los yeej tau. Tiamsis nws tsis ua li ntawd. Nws txiav txim siab ua txhua yam kom haum Yehauvas siab xwb. (Yauhas 8:29) Nws tus qauv pab tau cov tub ntxhais hluas li cas niaj hnub nimno?

13. Thaum Yexus tseem hluas nws ua li cas xwb?

¹³ Yexus yeej ib txwm mloog nws niam nws txiv lus puag thaum nws tseem me me los. Tsis muaj ib zaug uas nws yuav cam ncauj vim nws xav hais tias nws paub dua nkawd. (Lukas 2:51) Yexus yog tus tub hlob ces nws yeej muaj haujlwm ntau heev ua. Nws rau siab kawm kom nws txawj ua haujlwm ib yam li nws txiv Yauxej, nws thiaj khwv tau nyiaj los pab nws tsev neeg.

14. Ua cas peb thiaj paub tias Yexus nyiam kawm Vajtswv Txojlus?

¹⁴ Tej zaum Yauxej thiab Malis nkawd yeej  qhia Yexus tias thaum yug tau Yexus muaj li cas thiab Vajtswv cov tub qhe hais li cas txog nws. (Lukas 2:8-19, 25-38) Yexus tsis yog mloog tej uas nws niam nws txiv qhia rau nws xwb tiamsis nws kuj tshawb nrhiav Vajtswv Txojlus thiab. Ua cas peb thiaj paub tias Yexus nyiam kawm Vajtswv Txojlus? Thaum nws muaj 12 xyoos cov xibhwb hauv Yeluxalees uas hnov nws tej lus teb “xav tsis thoob rau nws tej kev txawj ntse” li. (Lukas 2:46, 47) Thaum ntawd Yexus twb paub hais tias Yehauvas yog nws Txiv lawm.​—Lukas 2:42, 43, 49.

15. Yexus ua li cas qhia tias nws xav ua raws li Yehauvas lub siab nyiam?

¹⁵ Thaum Yexus paub hais tias Yehauvas xav kom nws ua dabtsi, nws yeej zoo siab hlo ua. (Yauhas 6:38) Nws paub hais tias muaj coob tus yuav ntxub nws. Txawm nws tsis xav kom lawv xav phem txog nws los nws yeem mloog Yehauvas lus. Thaum Yexus ua kevcai raus dej xyoo 29, nws rau siab ntso ua nws lub neej kom haum Yehauvas siab. (Henplais 10:5-7) Thiab thaum luag muab nws ntsia rau saum tus ntoo, nws yeej tseem ua raws li nws Txiv lub siab nyiam.​—Yauhas 19:30.

16. Menyuam kawm tau li cas los ntawm Yexus?

¹⁶ Mloog niam txiv lus. Zoo ib yam li Yauxej thiab Malis, koj niam thiab koj txiv yog neeg zoo tsis tiav. Txawm li ntawd los koj niam koj txiv yog ob tug uas Yehauvas muab los tiv thaiv thiab cob qhia koj. Yog koj mloog nkawd lus thiab hwm nkawd ces koj “yuav noj qab nyob zoo.”​—Efexus 6:1-4.

17. Raws li Yausuas 24:15, cov hluas yuav tau txiav txim siab li cas?

¹⁷ Xav seb koj yuav teev tiam leejtwg. Koj yuav tsum kawm kom koj paub tias Yehauvas yog leejtwg, nws xav kom koj ua dabtsi, thiab koj yuav ua koj lub neej li cas thiaj haum Yehauvas siab. (Loos 12:2) Yog koj ua li no ces koj yuav txiav txim siab tau zoo thiab teev tiam Yehauvas. (Nyeem Yausuas 24:15; Tej Lus Qhia 12:1) Yog koj rau siab ntso nyeem thiab kawm Vajlugkub ces koj txojkev hlub thiab txojkev ntseeg rau Yehauvas yuav ruaj khov zuj zus.

18. Cov hluas yuav tau txiav txim siab li cas thiab yog vim li cas?

¹⁸ Ua li Yehauvas lub siab nyiam. Xatas lub qab ntuj haub ntxias tias yog koj siv koj lub  tswvyim thiab kev txawj ntse los ua raws li koj lub siab xav thiab lub siab ntshaw ces koj yuav muaj kev zoo siab tiamsis qhov tseeb tiag tsis muaj li ntawd. Cov uas siv tag nrho lawv lub dag lub zog mus khwv nyiaj khwv txiaj “raug ntau yam kev txomnyem.” (1 Timautes 6:9, 10) Tiamsis yog koj mloog Yehauvas lus thiab ua raws li nws lub siab nyiam ces ‘koj tes haujlwm yuav tiav thiab vammeej.’​—Yausuas 1:8.

19. Cov niam cov txiv yuav tsum nco ntsoov li cas?

¹⁹ Cov niam cov txiv, nej yuav tsum ua li nej ua tau los pab nej cov menyuam teev tiam Yehauvas. Yog nej tso siab rau Yehauvas ces nws yeej yuav pab kom nej paub txiav txim siab zoo. (Pajlug 3:5, 6) Nco ntsoov tias cov menyuam yuav ua li nej ua ntau dua li tej uas nej hais. Yog li ntawd rau siab ua tej yam uas yuav pab nej cov menyuam los teev tiam Yehauvas.

20. Yog cov tub ntxhais hluas teev tiam Yehauvas, lawv yuav tau lub neej zoo li cas?

²⁰ Cov tub ntxhais hluas, nej niam thiab nej txiv yuav pab tau nej txiav txim siab zoo. Tiamsis nej yuav tsum ua nej lub neej kom haum Vajtswv siab. Xyaum Yexus tus qauv thiab teev tiam Leej Txiv Yehauvas uas hlub nej kawg nkaus li. Yog nej ua li ntawd ces nej lub neej yuav muaj hauv paus hauv ntsis thiab muaj kev zoo siab. (1 Timautes 4:16) Thiab yav tom hauv ntej nej yuav tau lub neej zoo tshaj plaws li!