1. Was is te pest ëntxlus woo yemant mache khan?

EFTAS, ti ëntxlise woo ti eltere mache tuun sayn khiner fer een lang tsayt petrefe. Wën ti eltere tuun xlechte ëntxlise mache, tii khene propleeme fer sayn khiner pringe. Awer, wën se kluuche ëntxlise mache, tii khene sayn khiner helfe een frooe un tsufriitliche leepe hon. Sicher, ti khiner mise aach kuute ëntxlise mache. Te pest ëntxlus woo yemant mache khan is unser liipliche himlixe Fater, Yeehoowa, tiine. (Sal. 73:28)

2. Was fer kuute ëntxlise hon Yeesus un sayn eltere kemacht?

² Yeesus sayn eltere wolte sayn khiner helfe Yeehoowa tiine. Un ti ëntxlise woo se kemacht hon, hon pewayst tas Yeehoowa tiine waar tas wichtichste in sayn leepe. (Luc. 2:40, 41, 52) Yeesus hot aach kuute ëntxlise kemacht, woo hon tëm keholef sayn flicht in Yeehoowa sayn propoos erfiile. (Mat. 4:1-10) Yeesus is een kuut, leaal un koraajich man kep. Al ti eltere woo Yeehoowa liipe, teete sich tsufriite un froo xpiire mit soo een sort soon.

3. Was fer frooche tuun mer in tiise artikel antworte?

³ In tiise artikel, tuun mer tiise frooche antworte: Was fer kuute ëntxlise hot Yeehoowa iwer Yeesus kemacht? Was khene ti kristliche eltere lërne mit te ëntxlise woo Yoosef un Maria kemacht hon? Un was khene ti kristliche yunge lërne mit te ëntxlise woo Yeesus kemacht hot?

4. Was fer wichtich ëntxlus hot Yeehoowa iwer sayn Soon kemacht?

⁴ Yeehoowa hot mechtich kuute eltere fer Yeesus raus kesuucht. (Mat. 1:18-23; Luc. 1:26-38) Maria sayn hërtsliche  wërter, woo in te Piipel xteen, tsayche sayn tiif liip noo Yeehoowa un sayn Wort. (Luc. 1:46-55) Un ti aat wii Yoosef hot Yeehoowa sayn lënkung aan keheert, tsaycht tas eyer hot Yeehoowa keliipt un wolt tëm kefale. (Mat. 1:24)

5-6. Was fer tinge hot Yeehoowa sayn Soon erlaupt mit mache?

⁵ Mërk tas Yeehoowa hot net rayche eltere fer Yeesus raus kesuucht. Te opfer woo Yoosef un Maria kemacht hon, noo tas Yeesus uf te welt khom is, tsaycht tas se aarm waare. (Luc. 2:24) Fiilaycht, Yoosef hat, neewich sayn haus in Nasarë, een kleene xop woo eyer hot wii tsimerman kexaft. Tii hate woerxaynlich een keweenlich leepe, hauptseechlich wayl, mit te tsayt, hate se siwe orer mee khiner kehat. (Mat. 13:55, 56)

⁶ Yeehoowa hot Yeesus fon welche kefeerliche tinge kexitst; awer Yeehoowa hot tëm erlaupt etliche kefoere mit mache. (Mat. 2:13-15) Tsum payxpiil, Yeesus must um keen mit welche parente woo hon net aan tëm keklaapt. Iwerlee tich wii hot Yeesus sich traurich kexpiirt wayl etliche fon sayn aychne familye hon, am aanfang, net tëm aan kenom wii te Mesias. (Mar. 3:21; João 7:5) Un aach, tsiimlich sicher, Yoosef is kextorep wën Yeesus noch yung waar. Un sicher, tas waar aarich xlim tëm kewees. Yoosef sayn toot hot fiilaycht petayt tas Yeesus, te elste soon, praucht te familye sayn kexeft uf phase. (Mar. 6:3) Un wii Yeesus kewakst hot, hot eyer kelërnt wii sayn familye uf phase. Woerxaynlich, tee praucht xtram xafe fer tëne fersoriche. Tan, eyer wust kans kenau wii is es sich miit xpiire am ën fon een lang taach.

7. (a) Was fer frooche tuun ti pheyerche helfe sayn khiner uf phase? (b) Wii khan Provérbios 2:1-6 ti eltere helfe sayn khiner iipe?

⁷ Wën teyer een ferhayrat pheyerche sayt un teet kërn khiner kriin, froot aych: ‘Sin mer teemuutiche layt woo Yeehoowa un sayn Wort liipe? Teet Yeehoowa uns raus suuche fer eene nëneche — woo soo fiil weyert hot — uf phase?’ (Sal. 127:3, 4) Wëns tuu xon khiner host, froo tich: ‘Tuun ich mayn khiner lërne wii kuut es is xtram xafe?’ (Ecl. 3:12, 13) ‘Tuun ich mayn pestes mache fer mayn khiner xitse fon te xlechte tinge woo se khene in Satanaas sayn welt trefe?’ (Pro. 22:3) Tuu khanst net tayn khiner xitse fon al ti kefoere woo se khene mit leepe. Tas is unmeechlich.  Awer tuu khanst tëne perayte fer ti propleeme woo se noch mit leepe tuun. Tuu wayter tëne liiplich lërne aan te Piipel traue fer aanreete kriin. (Lees Provérbios 2:1-6.) * Tsum payxpiil, wën een parent suucht raus noo lose Yeehoowa tiine, helef tayn khiner fon Kot sayn Wort lërne warom es is soo wichtich leaal tsu Yeehoowa plaype. (Sal. 31:23) Orer wën eene keliipte xtërept, tsaych tayn khiner etliche tekste fon te Piipel woo khene tëne helfe te xmërts iwerkhome un friit fine. (2 Cor. 1:3, 4; 2 Tim. 3:16)

8. Tëm noo Deuteronômio 6:6, 7, was prauchte Yoosef un Maria mache?

⁸ Yoosef un Maria khonte Yeesus helfe een mënx wëre woo hot Yeehoowa kefalt, wayl se hon Yeehoowa sayn lënkung fer ti eltere aan kenom. (Lees Deuteronômio 6:6, 7.) * Yoosef un Maria hate een tiif liip tsu Yeehoowa un sayn wichtichste tsiil waar sayn khiner uf muute fer tas selwiche sort liip ëntwikele.

9. Was fer wichtiche ëntxlise hon Yoosef un Maria kemacht?

⁹ Yoosef un Maria hon raus kesuucht een kuut kaystlich rutiin wii familye hale. Oone tswayfel, sin se yeete woch in te fersamlunge in te sinakooke fon Nasarë kang un aach yeetes yoer in te Oostre in Yeruusalem. (Luc. 2:41; 4:16) Fiilaycht hon se tiise familye reese tsu Yeruusalem penutst fer Yeesus un tëne sayn anere khiner lërne iwer tas kexicht fon Yeehoowa sayn folek; im xtant, hon se aach ti pletse woo in te Xrifte xteen pesuucht. Wii se mee khiner kriit hon, tsiimlich sicher, es waar net laycht fer Yoosef un Maria een kuut kaystlich rutiin hale. Awer tii waare peloont weeche tas! Wayl se hon Yeehoowa sayn aanpeetung im eyerste plats ketuun, hot sayn familye sich tichter pay Yeehoowa kehal.

10. Was fer lisyoone khene ti eltere mit Yoosef un Maria lërne?

 ¹⁰ Was khene ti eltere, woo Yeehoowa liipe, mit Yoosef un Maria lërne? Tas wichtichste is: torich wërter un aktsyoone, lërn tayn khiner tas tuu Yeehoowa fiil liipst. Tas kreeste kexenk woos tuu tëne kepe khanst, is tëne helfe Yeehoowa liipe. Eene fon te wichtichste lisyoone woos tuu tëne in lërne khanst, is wii een kaystlich rutiin hale — imer ti Piipel xtutiire, peete, tsu te fersamlunge keen un in tëm preetich xafe. (1 Tim. 6:6) Sicher, must tuu tayn khiner ti materyaalixe tinge kepe woo se prauche. (1 Tim. 5:8) Awer ferkes tich net tas was tuut tëne helfe tas ën fon Satanaas sayn welt iwerleepe un rin in ti naye welt keen, is sayn ticht froyntxaft mit Yeehoowa, net ti tinge woo se hon. * (Eze. 7:19; 1 Tim. 4:8)

11. (a) Wii tuut te aanreet, woo in 1 Timóteo 6:17-19 xteet, ti eltere helfe kuut ëntxlise mache wën se sayn khiner am tsiie sin? (b) Iwer was fer tsiile khan tayn familye tenke, un was fer seechen khan tas pringe? (Kuk te khaste “ Was fer tsiile wolt teyer trefe?”)

¹¹ Fiile kristliche eltere tuun kuute ëntxlise mache fer sayn khiner helfe tichter tsu Yeehoowa plaype. Wii xeen is tas siin! Tii tuun reeklich paysamer Yeehoowa aan peete. Tii tuun in te fersamlunge un in te konkrëse keen un ti kuute oter preetiche. Welche familye tuun soo kaar preetiche in teritoryum woo selte kepreeticht sin. Anere tuun Petël pesuuche orer ti paueray projëkte fon unser orkanisatsyoon unerxtitse. * Ti familye woo raus suuche tas mache tuun kelt mit tas fertraype un es khan xweyer tëne sin. Awer Yeehoowa tuut tëne raychlich peloone weeche tas! (Lees 1 Timóteo 6:17-19.) * Khiner woo in soo sorte familye ketsoo sin, tuun eftas wayter ti kuute tinge woo se kelërnt hon mache un tuun se sich net peroye. * (Pro. 10:22)

12. Wii Yeesus am wakse waar, was praucht eyer mache?

¹² Yeesus sayn himlixe Fater tuut imer kuute ëntxlise mache, un Yeesus sayn eyertliche eltere hon aach kuute ëntxlise kemacht. Awer, wii Yeesus am wakse waar, praucht eyer sayn aychne ëntxlise mache. (Gál. 6:5) Soo wii  meyer al, khont eyer raus suuche was eyer mache teet. Tee khent raus kesuucht hon sayn aychne interese im eyerste plats suuche. Xtats tas, hot eyer raus kesuucht een kuut froyntxaft mit Yeehoowa hale. (João 8:29) Wii khan sayn payxpiil ti yunge hayt se taach helfe?

13. Was fer wichtich ëntxlus hot Yeesus kemacht wii eyer noch een puup waar?

¹³ Wii Yeesus noch een puup waar, hot eyer raus kesuucht sayn eltere aan heere. Tee waar nii unfolich noo sayn eltere, am tenke tas eyer wust mee wii tëne. Xtats tas, ‘hot eyer sich wayter unich tëne kextelt’. (Luc. 2:51) Wii elste soon, hat Yeesus etliche flichte kehat un, sicher, hot eyer sayn pestes kemacht fer tiise flichte uf phase. Tee hot xtram kexaft fer Yoosef sayn aarwayt lërne, soo tas eyer khent sayn familye helfe kelt kriin fer sich soriche.

14. Wii wise mer tas Yeesus eene kuute xtutënt fon Kot sayn Wort waar?

¹⁴ Tsiimlich sicher, Yeesus sayn eltere hon mit tëm fertseelt iwer ti wunerlich aat wii eyer uf te welt khom is, un was hon ti engele iwer tëm kesaat. (Luc. 2:8-19, 25-38) Awer es waar net kenuuch fer Yeesus kewees — tee hot aach ti Xrifte aleen xtutiirt. Wii wise mer tas Yeesus eene kuute xtutënt fon Kot sayn Wort waar? Wayl wii eyer noch eene puup waar, ti leerer in Yeruusalem “hon sich ferwunert mit sayn ferxtëntnis un sayn antworte”. (Luc. 2:46, 47) Un mit ploos 12 yoer, hat Yeesus xon fer sich selepst pewayst tas Yeehoowa tëm sayn Fater waar. (Luc. 2:42, 43, 49)

15. Wii hot Yeesus ketsaycht tas eyer hat raus kesuucht Yeehoowa sayn wile mache?

¹⁵ Wii Yeesus kelërnt hot was Yeehoowa wolt fon tëm hon, hot eyer raus kesuucht Yeehoowa sayn wile mache. (João 6:38) Eyer wust tas fiile layt teete tëm hase, un sicher, Yeesus teet tas net kërn mit mache. Soo wii soo, hot eyer raus kesuucht Yeehoowa aan heere. Wën Yeesus sich taafe kelos hot im yoerkang 29 N.K., tas haupste in sayn leepe waar Yeehoowa sayn wile mache. (Heb. 10:5-7) Un soo kaar wën tee waar aan tëm kweeleray phool am xtërpe kewees, waar Yeesus wayter pextimt fer te wile fon sayn Fater mache. (João 19:30)

16. Was fer lisyoon khene ti khiner mit Yeesus lërne?

¹⁶ Tuu tayn eltere aan heere. Soo wii Yoosef un Maria, tayn eltere sin net perfëkt. Awer, Yeehoowa hot tëne ti flicht kep fer tich xitse, iipe un lënke. Wëns tuu weyert xetst tsu tëne  sayn aanreete un respektiirst tëne sayn autoriteet, ‘tuut ales kuut mit tich keen’. (Efé. 6:1-4)

17. Tëm noo Josué 24:15, was fer ëntxlus mise ti yunge aleen mache?

¹⁷ Tuu raus suuche weer tuu tiine tuust. Tuu thërfst fer tich selepst pewayse weer Yeehoowa is, was aan sayn propoos tepay is, un was tëm sayn wile hot mit tayn leepe se tuun. (Rom. 12:2) Tan, wërst tuu fërtich fer ti wichtichste ëntxlus fon tayn leepe mache: Yeehoowa tiine. (Lees Josué 24:15; * Ecl. 12:1) Wëns tuu een rutiin halst fon te Piipel leese un xtutiire, tayn liip tsu Yeehoowa tuut sich wayter ferkreese un tayn klaape aan tëm tuut sich ferxtërke.

18. Was is een ëntxlus woo ti khiner mache mise, un was tuut te resultaat sin?

¹⁸ Tuu raus suuche Yeehoowa sayn wile im eyerste plats fon tayn leepe tuun. Satanaas sayn welt ferxprecht tas, wëns tuu tayn apiliteete penutst fer tich selepst nutse pringe, tuust tuu froo sin. Awer, meyer wise tas tii woo tuun noo materiaalixe tinge keen, tuun ‘sich selepst fiil wee mache’. (1 Tim. 6:9, 10) Uf te aner sayt, wëns tuu Yeehoowa aan heerst un suuchst raus sayn wile im eyerste plats fon tayn leepe tuun, tuust tuu eene frooes leepe hon un ‘tich kluuch aan xtele’. (Jos. 1:8)

19. Fon was mise ti eltere sich net ferkese?

¹⁹ Eltere, tuut ayre pestes mache fer ayre familye helfe Yeehoowa tiine. Traut uf tëm, un eyer tuut aych helfe kluuche ëntxlise mache. (Pro. 3:5, 6) Ferkest aych net: was tuut ayre khiner tiifer petrefe is was teyer macht, net was teyer saat. Tan, macht ëntxlise woo tuun ayre khiner helfe Yeehoowa kefale.

20. Was fer seechen tuun ti yunge kriin wën se raus suuche Yeehoowa tiine?

²⁰ Yunge, ayre eltere khene aych helfe kuute ëntxlise ins leepe mache. Awer es heng aan aych ap Yeehoowa kefale. Tan, tuut Yeesus noo mache un suucht raus ayre liipliche himlixe Fater tiine. Wën teyer es soo macht, tuut teyer xon yets een tsufriitlich, fol un xeene leepe hon. (1 Tim. 4:16) Un, in te futuer, tuut teyer tas frooeste leepe woos kept kriin!