1. Anni i kapianan nga desision nga makua na tadday?

MARUDDU nga daka-dakal i efekto na desision ira na magana ta ánada. Nu ari tu makasta i desisiodda ira, posible nga makeyawa yatun tu problema ta ánada. Ngem nu masirib i desisiodda ira, moffunadda i ánada nga magayayya noka ta pattolay. Siempre, kawagan lagapa na ána nga mangngua tu mapia ira nga desision. I passerbi ta minaggiddu nga nelangitan nga Yama tam nga si Jehova i kapianan nga desision nga makua na tadday.​—Sal. 73:28.

2. Anni ira nga makasta nga desision i kingngua ni Jesus anna na maganana?

² Determinadu i magana ni Jesus nga uffunan i ánada nga passerbian si Jehova. Pinakurug na desisiodda ira nga yatun i pinaka-importante ta pattoleda. (Luc. 2:40, 41, 52) Nakangngua gapa si Jesus tu makasta ira nga desision nga nakoffun tannisa tapenu ituppal i papelna ta gakkag ni Jehova. (Mat. 4:1-10) Ziminakal si Jesus nga masippo, matalo, anna magutu nga tolay. Kuruga magayayya i sinni laman nga magana nga mangaya kani Jehova nga mapeggan tu kunnatun nga ana.

3. Anni ira i pakkiavu nga tabbagattam taw nga artikulo?

³ Taw nga artikulo, tabbagattam i tumunug ira nga pakkiavu: Anni ira i makasta nga desision nga kingngua ni Jehova para kani Jesus? Anni i magigiammu na magana ira ta desision ira na magana ni Jesus nga da Jose anni Maria? Anni gapa i magigiammu na kabataan ira ta desision ira ni Jesus?

4. Anni nga importante nga desision i kingngua ni Jehova para ta Anana?

⁴ Pinili ni Jehova i kapianan nga magana para kani Jesus. (Mat. 1:18-23; Luc. 1:26-38) Ipasingan na napafutuan nga kinagi ira ni Maria nga nerekord ta Biblia i monag nga pangayana kani Jehova anna ta Uvovugna. (Luc. 1:46-55) Ipasingan gapa na pattuppal ni Jose ta bilin ni Jehova i pangayana tannisa anna kayàna nga mapagayayya yayya.​—Mat. 1:24.

5-6. Anni i nipamavulun ni Jehova nga maekspiriensa na Anana?

⁵ Ari nappili si Jehova tu mariku nga magana para kani Jesus. Ipasingan na sakrifisio nga nitavvung da Jose anna Maria kabalin nga neyana si Jesus nga mariga ira. (Luc. 2:24) Posible nga egga i baddi tu puestu ni Jose ta biko na balena ta Nazaret nu sitaw yayya mattrabahu bilang karpinteru. Siguradu nga simple laman i pattoleda, netallugaring ta dumaka-dakal i familiada anna napeggan ira tu pitu onu maturu paga nga ána.​—Mat. 13:55, 56.

⁶ Pinrotektan ni Jehova si Jesus ta karuan ira nga peligro ngem arianna yayya nililli ta ngamin nga problema. (Mat. 2:13-15) Angngariganna, egga ira i parientes ni Jesus nga ari mangurug nisa. Nonopammu ngana laman i pakkadismaya ni Jesus nga egga ira i kafamiliana nga ta gafu, ariadda kinurug nga yayya i Mesias. (Mar. 3:21; Juan 7:5) Posible gapa nga natay si Jose ta kabbing pagalaman ni Jesus yatutta kitazziga yatun para nisa. Megafu ta si Jesus i kaka nga ana, yayya i manali ta kukukuan na yamana ta negosio na familia. (Mar. 6:3) Durante ta paddakal ni Jesus, nagigiammuna nu kunnasi mabbalin tu responsable para ta pammakapianan na familiana. Nallallappo yayya ta pattrabahu tapenu meyawa i pakawagadda. Yatutta naekspiriensa gafu ni Jesus i mabannag megafu ta pattrabahu ta interu nga aggaw.

7. (a) Anni ira nga pakkiavu i makoffun ta natawan ta pamadakal ta ánada? (b) Kunnasi makoffun i Proverbio 2:1-6 ta passanay na magana ta ánada?

⁷ Nu egga ngana i atawam anna kayànu i mapeggan tu ana, iyavu ta bagginu: ‘Minappakalinno kami kari nga totolay nga mangiddu kani Jehova anna ta Uvovugna? Sikami kari i pilian ni Jehova tapenu manangngal ta tadday nga nabalor nga bagu nga inango?’ (Sal. 127:3, 4) Nu tadday ka ngana gapa nga magana, iyavu mu ta baggim: ‘Tuttudduakku kari  i ána ku ta importansia na pabbalin tu malappo?’ (Ecl. 3:12, 13) ‘Kukukuakku kari i adde na mawayyà tapenu protektan i ána ku ta marake ira nga gannug nga arubangadda ta mundo ni Satanas?’ (Prov. 22:3) Imposible nga melisim i ána mu ta ngamin nga problema nga arubangadda. Ngem mepreparam ira para ta problema ira ta pattolay nu kanayummu ira nga meddu nga tudduan nu kunnasi nga mattalo ta Biblia para ta tabarang. (Bibbigan i Proverbio 2:1-6.) Angngariganna, nu egga i parientesnu nga nagimmang nga masserbi kani Jehova, uffunan i ánanu tapenu mammuadda ta Biblia nu ngatta importante nga mattalupaddian nga matalo kani Jehova. (Sal. 31:23) Nu natayakkamu gapa, ipabibbig ta ánanu i teksto ira ta Biblia nga makoffun tannira tapenu marubadda i paddaddam anna tapenu memammo lagapa i panagenoda.​—2 Cor. 1:3, 4; 2 Tim. 3:16.

8. Anni nga bilin ta Deuteronomio 6:6, 7 i sinuttul da Jose anni Maria?

⁸ Noffunan da Jose anni Maria si Jesus tapenu mabbalin tu adulto nga egga i fabor na Dios nisa megafu ta sinuttulda i bili-bilin ni Jehova ta mappagana. (Bibbigan i Deuteronomio 6:6, 7.) Kuruga iddeddukan da Jose anni Maria si Jehova. Pinaka-importante gafu nira nga tudduan i ánada nga ayatan gapa si Jehova.

9. Anni i desididu nga kuan da Jose anni Maria?

⁹ Desididu da Jose anni Maria nga pattalupaddianan i makasta nga espiritual nga rutina bilang familia. Siguradu nga nagatende ira ta linigguan nga paggarammammung ta sinagoga ta Nazaret kunne na gapa i zinagun nga Paskua ta Jerusalem. (Luc. 2:41; 4:16) Awayyana nga inapprobetsada yatun nga pabbiahe na familia mappange ta Jerusalem tapenu ituddu kani Jesus anna ta wawwaragina i nesimmu ta totolay ni Jehova ta nappasa. Posible gapa nga durante ta pabbiaheda, binisi-bisitada i lugar ira nga mabibbig ta Katurakan. Turi ta umara-aru ngana i ánada, awayyana nga mariga ngana para kada Jose anni Maria nga pattalupaddianan i makasta nga espiritual nga rutina. Ngem nabala-balakkan ira megafu ta pangnguada lagapa tatun! Gafu ta nipoppolluda i paddayaw kani Jehova, nemmuguran i relasion na familiada kani Jehova.

10. Anni ira i matudduan na Cristiano ira nga mappagana kada Jose anni Maria?

 ¹⁰ Anni i matudduan na mappagana ira nga mangiddu kani Jehova kada Jose anni Maria? Masingan nakuan na ánanu ta kakkagian anna kukukuannu nga dakal i pangiddunu kani Jehova. Yatun i pinaka-importante nga ituddunu nira. I kakastan nga meregalunu nira ay i panguffun nira nga ayatan si Jehova. Importante gapa nga metuddunu nira nu kunnasida nga mapattalupaddian i makasta nga espiritual nga rutina ta paggigiammu, pakimallo, pakistudy, anna pamministerio. (1 Tim. 6:6) Siempre, mawag tu iyawanu i material ira nga pakawagan na ánanu. (1 Tim. 5:8) Daddammannu nga ari tu i material nga pakkukua na ánanu i makepaliag nira sonu madaral yaw nga mundo. Mawag tu madukko i relasiodda kani Jehova. *​—Eze. 7:19; 1 Tim. 4:8.

11. (a) Kunnasi nga makoffun i 1 Timoteo 6:17-19 ta mappagana tapenu makakua tu makasta ira nga desision ta pamadakal ta ánada? (b) Anni ira nga addetan i awayya nga ikonsidera na familianu, anna anni nga bendision i parresultanna? (Innan i kahon nga “ Anni ira nga Addetan i Kayànu nga Kuan?”)

¹¹ Aru nga Cristiano nga mappagana i makasta ira i pinilida tapenu uffunan i ánada nga maddukko kani Jehova! Regular ira nga mavvurulu nga maddayaw. Magatende ira ta study anna kombension. Ilayyagayyada gapa i mapia nga dumug. Egga gapa i familia nga mabboluntariu ta teritoria ira nga aggi-mittan nga malayyagayyan. Nabbisita gapa ta Bethel i tanakuan onu nabboluntariu ta konstruksion. Danuri i familia nga kunnaw i kiningnguada ay mawag nga massakrifisio ta finansial, anna awayyana nga meparubang ira ta nadduruma nga problema. Ngem i benefisio nga nalawada i namabbalin nira tu mariku ta espiritual. (Bibbigan i 1 Timoteo 6:17-19.) I abbing nga napadakal ta kunnaw nga familia ay maruddu nga netulu-tuloyda i makasta nga annangngua nga nagigiammuda anna ari ira mabbabawi! *​—Prov. 10:22.

12. Anni i mawag nga kuan ni Jesus ta paddakalna?

¹² Kanayun nga magangngua tu makasta nga desision i nelangitan nga Yama ni Jesus. Kunnatun gapa i kiningngua na maganana taw ta davvun. Maski nu kunnari, durante nga dumakal si Jesus, kawaganna i maddesision ta sarilina. (Gal. 6:5) Gitta tam ngamin, egga i lallagurena nga mappili. Awayyana nakuan nga pinili i sarilina nga pammakapianan, ngem mas pinilina nga pattalupaddianan i makasta nga relasionna kani Jehova. (Juan 8:29) Kunnasi nga makoffun i ehemplona ta kabataan ira?

13. Anni i importante nga desision nga kiningngua ni Jesus ta kabbinna?

 ¹³ Ta kabbing ni Jesus, pinilina nga mamarulo ta maganana. Kanayunna nga sinuttul i maganana. Arianna vuluvuga ninono nga mas mapia yayya anne nira, nu ari, kanayun yayya nga “nakimoray nira.” (Luc. 2:51) Sinerioso ni Jesus i responsibilidadna bilang kaka nga ana. Tapenu makoffun ta passuporta ta familiana, nattrabahu yayya tu mapia tapenu gigiammuan i pakkarpinteru ta yamana nga si Jose.

14. Ngatta ammu tam nga mapia nga estudiante si Jesus na Uvovug na Dios?

¹⁴ Awayyana nga kinagi na magana ni Jesus nisa i meyannung ta kappabbaw nga keyanana anna nu anni i kinagi na mensaheru meyannung nisa. (Luc. 2:8-19, 25-38) Ari nga nakontentu si Jesus ta kinagida nisa, nu ari, naggigiammu lagapa yayya tu Katurakan. Ngatta makagi tam nga mapia nga estudiante si Jesus na Uvovug na Dios? Megafu ta turi ta mabbing paga yayya, i mestru ira ta Jerusalem ay ‘nappabbaw nga nakaginna sa megafu ta kalalaki na annabba-tabbagna.’ (Luc. 2:46, 47) Turi ta 12 anios pagalaman si Jesus, napakurugna ngana ta baggina nga si Jehova i Yamana.​—Luc. 2:42, 43, 49.

15. Kunnasi nga nipasingan ni Jesus nga pinilina nga kuan i uray ni Jehova?

¹⁵ Turi ta nannammuan ni Jesus i papelna ta gakkag ni Jehova, pinilina nga akseptan i asaymentna. (Juan 6:38) Ammuna nga aru sangaw i mangikalussaw nisa yari tu pinannonopanna yatun tu mapia. Maski nu arianna nga kayà nga mesimmu yatun, pinilina lagapa nga parulattan si Jehova. Turi ta nabawtisowan si Jesus ta 29 C.E., nifokusna i pattolena ta pagangngua ta uray ni Jehova. (Heb. 10:5-7) Turi ta aranni ngana yayya nga matay ta pakazigarigatan nga estaka, determinadu si Jesus nga kuan i uray na Yamana.​—Juan 19:30.

16. Anni i tadday nga leksion nga magigiammu na ána kani Jesus?

¹⁶ Tuttulammu i magana mu. Kagitta da Jose anni Maria, imperfekto gapa i magana mu. Maski paga kunnatun, nitalo ni Jehova tannira nga protektan, sanayan, anna igiya daka. Nu magginna ka ta tabaradda, anna irespetom i autoridadda, mabbalin tu “mapia i paddia-paddiam-mu.”​—Efe. 6:1-4.

17. Segun ta Josue 24:15, anni nga desision i mawag nga kuan lagapa na kabataan ira?

 ¹⁷ Maddesisiokka nu sinni i passerbiammu. Mawag tu pakurugammu ta baggim nu sinni si Jehova, anni i urena, anna nu kunnasim nga matuppal yatun ta pattolem. (Roma 12:2) Tapus makuam i pinaka-importante nga desision ta pattolem nga passerbian si Jehova. (Bibbigan i Josue 24:15; Ecl. 12:1) Nu egga i regular nga iskediul mu ta pabbibbig anna paggigiammu tu Biblia, mas nga dumakal i aya anna i pangurug mu kani Jehova.

18. Anni i mawag nga pilian na kabataan ira, anna anni i resulta natun?

¹⁸ Pilian nga pagolluan i uray ni Jehova ta pattolem. Ipromesa na mundo ni Satanas nga mabbalikka tu magayayya nu usammu i abilidad mu ira para ta pammakapianammu lagapa. Ngem kakuruganna, danuri maffokus ta material ira nga addetan ay “nepallo nga daddam i nattuppalad-da.” (1 Tim. 6:9, 10) Nu magginna ka kani Jehova anna piliammu nga pagolluan i urena ta pattolem, makasta i pattuppalammu anna “makapagguyu ka tu masirib.”​—Jos. 1:8.

19. Anni nakuan i daddamman na mappagana?

¹⁹ Mappagana, kuannu i adde na mawayyanu tapenu uffunan i ánanu nga passerbian si Jehova. Mattalo kamu nisa tapenu uffunan nakamu nga makangngua tu masirib ira nga desision. (Prov. 3:5, 6) Daddammannu nga mas dakal i efekto na kukukuannu anne ta kakkagiannu ta ánanu. Yatutta mangngua kamu tu desision ira nga makoffun ta ánanu tapenu malada i fabor ni Jehova.

20. Anni ira nga bendision i malawa na kabataan ira nu piliadda nga passerbian si Jehova?

²⁰ Kabataan ira, moffunakkamu na magananu ira tapenu makapaddesisiokkamu tu masirib ta pattolay. Ngem sikamu lagapa i maddesision tapenu mapagayayyanu i Dios. Yatutta parigannu si Jesus anna piliannu nga passerbian i minaggiddu nga nelangitan nga Yamanu. Nu kuannu yatun, mapeggakkamu tu okupadu anna makapagayayya nga pattolay sangawe. (1 Tim. 4:16) Anna ta mappange, mapeggakkamu tu pinakamagayayya nga pattolay!