1. Kaja htum dawdan lam gaw hpa rai kun?

KANU kawa ni a lata ai lam gaw ma ni hpe law malawng hku nna prat tup akyu shabyin ya lu ai. Hpaji n rawng ai hku lata yang, ma ni hpe manghkang byin shangun ai. Raitim, hpaji rawng ai hku lata yang, ma ni a prat gaw ngwi pyaw nna myit dik lam lu ai. Ma ni mung, kaja ai dawdan lam ni jahkrat ra ai. Kaja htum dawdan lam gaw, Yehowa hpe nawku daw jau na matu re.​—Shk 73:28.

2. Yesu hte shi a kanu kawa ni gaw hpa hpe lata wa ai kun?

² Yesu a kanu kawa ni gaw, ma ni Yehowa hpe nawku daw jau lu hkra, karum ya na matu dawdan da ai. Dai gaw shanhte a prat hta ahkyak htum lam re ai hpe shanhte a lata ai lam ni gaw sakse madun nga ai. (Luk 2:40, 41, 52) Yesu mung, Yehowa a yaw shada lam hpring tsup lu hkra, kaja ai dawdan lam ni jahkrat wa ai. (Mat 4:1-10) Shi gaw tsawra myit nga ai, sadi dung ai, nden marai nga ai wa hku nna kaba wa ai. Karai hpe tsawra ai kanu kawa yawng gaw dai zawn kasha lu yang, kabu nna arawng la nga na re.

3. Ndai sumhpa hta hpa hpe chye lu na kun?

³ Ndai sumhpa hta, ndai ga san ni a mahtai hpe chye lu na re: Yehowa gaw Yesu hte seng nna gara lam hpe lata ai kun? Hkristan kanu kawa ni gaw Yesu a kanu yan kawa lata wa ai lam kaw nna hpa sharin la lu na kun? Hkristan ramma ni mung Yesu lata wa ai lam kaw nna hpa sharin la lu na kun?

4. Yehowa gaw shi a Kasha hte seng nna gara ahkyak ai lam hpe lata wa ai kun?

⁴ Yehowa gaw Yesu a matu, grai kaja ai kanu kawa hpe lata wa ai. (Mat 1:18-23; Luk 1:26-38) Mari a myit kraw lawang kaw nna tsun ai ga ni hpe Chyum Laika hta ka da ai. Dai hpe yu yang, Yehowa hte Chyum Laika hpe shi grai tsawra ai lam chye lu ai. (Luk 1:46-55) Yosep gaw Karai Kasang hpe tsawra nna, myit shapyaw ya mayu ai lam Karai a lam matsun hpe hkan sa ai hku nna madun wa ai.​—Mat 1:24.

5-6. Yehowa gaw shi a Kasha hpe mahkrum madup lu na matu gara hku ahkang jaw wa ai kun?

⁵ Yehowa gaw Yesu a matu lusu ai kanu kawa hpe n lata wa ai hpe sadi yu u. Mari yan Yosep matsan ai hpe Yesu shangai ngut ai hpang, shagu hkungga nawng ai hpe yu yang chye lu ai. (Luk 2:24) Yosep gaw Nazaret mare na nta makau hta nga ai gawk kaji kaw, laksama bungli galaw ai. Yawm htum kasha marai sanit nga nna, lusu ai ni n rai ma ai.​—Mat 13:55, 56.

⁶ Yehowa gaw Yesu hpe shoihpa nga ai lam nkau kaw nna makawp maga ya ai. Raitim, masa lam yawng kaw nna gaw n makawp maga ya ai. (Mat 2:13-15) Ga shadawn, Yesu hta n kamsham ai jinghku ni nga ai. Shawng nnan hta, shi a nta masha ni gaw shi hpe Meshia hku nna n hkap la ai majaw, myit daw na re. (Mrk 3:21; Yhn 7:5) Shi asak naw kaji ai aten, kawa Yosep si mat wa ai shaloi hta mung yawn hkyen na re. Kawa n nga mat ai majaw, kasha alat hku nna kawa a bungli hpe matut nna galaw ra ai. (Mrk 6:3) Shi kaba wa ai shaloi, dinghku hpe gara hku bau maka ra na hpe sharin la ai. Shanhte hpe madi shadaw lu na matu, bungli grai shakut ra na masa nga ai. Dai majaw, shani tup bungli galaw ngut ai hpang kade daram pu ba na hpe shi chye ai.

7. (a) Ma ni hpe bau maka ai hte seng nna yan la hpe gara ga san ni gaw karum ya lu ai kun? (b) Ga Shagawp 2:1-6 gaw ma ni hpe shaman ya na matu kanu kawa ni hpe gara hku karum ya lu ai kun?

⁷ Nang gaw dinghku hte rai nna, ma la na matu myit ai nga yang, tinang hkum tinang ndai hku san u: ‘An gaw manu dan ai asak hpe lanu lahku na matu Yehowa lata mayu ai shagrit shanem ai ni, wenyi myit jasat nga ai ni rai kun?’ (Shk 127:3, 4) Nang gaw kanu kawa rai yang, tinang hkum tinang ndai hku san u: ‘Bungli shakut yang lu la na akyu hpe nye a ma ni hpe sharin ya nga ai kun?’ (Hpj 3:12, 13) Hkum hkrang hte akyang lailen hta shoihpa  hkrum chye ai Satan a mungkan kaw nna, tinang a ma ni hpe makawp maga ya ai kun? (Gsh 22:3) Ma ni hkrum chye ai masa lam yawng kaw nna gaw makawp maga ya lu na n re. Dai hku galaw na matu mung n mai byin ai. Raitim, Chyum Laika lam matsun ni hpe gara hku kamhpa mai ai lam, tsawra myit hte matut sharin ya u. Dai gaw prat hta hkrum wa na manghkang ni a matu hkyen lajang ya nga ai re. (Ga Shagawp 2:1-6 hpe hti u.) Ga shadawn, jinghku langai Yehowa hpe n nawku mat ai rai yang, Yehowa hpe matut nna sadi dung na matu hpa majaw ahkyak ai hpe Chyum Laika kaw nna sharin la na matu, ma ni hpe karum ya u. (Shk 31:23) Tsawra ai marai langai ngai si mat ai shaloi, yawn hkyen ai lam hpe tawt lai lu nna simsa lam jaw ya ai Chyum daw ni hpe madun ya u.​—2 Ko 1:3, 4; 2 Tm 3:17.

8. Tara Jahprang 6:6, 7 hta lawm ai lam matsun hpe Mari yan Yosep gara hku hkan sa wa ai kun?

⁸ Mari yan Yosep gaw, Yehowa lam matsun da ai hte maren hkan sa ai majaw, Yesu hpe Karai a man hta myi man pa hkra bau maka lu wa ai. (Tara Jahprang 6:6, 7 hpe hti u.) Shan gaw Yehowa hpe grai tsawra ai. Dai zawn tsawra myit ma ni hta mung nga na matu ahkyak shatai nna karum ya wa ai.

9. Mari yan Yosep gaw gara ahkyak ai lam hpe lata wa ai kun?

⁹ Mari yan Yosep gaw dinghku hte arau wenyi lam hpe ayan galaw wa ai. Nazaret mare na tara jawng hta bat shagu zuphpawng lung ai sha n-ga, Yerusalem hta galaw ai Shalai Wa Ai Poi de shaning shagu sa ai. (Luk 2:41; 4:16) Dai de sa ai shaloi, lam hta Yesu yan nau ni hpe Yehowa a amyu masha ni a labau hpe sharin ya na re. Chyum Laika hta lawm ai shara ni de mung, sa chyai na masa nga ai. Kasha law ai dinghku re ai majaw, Mari yan Yosep gaw wenyi lam hte seng ai lam ni hpe ayan galaw na matu, loi gaw n loi ai. Raitim, shanhte dai hku galaw ai majaw akyu lu la ai. Shan gaw Yehowa hpe nawku daw jau ai lam hpe shawng tawn ai majaw, dinghku gaw Yehowa hte hku hkau lam kaja ai.

10. Hkristan kanu kawa ni gaw Mari yan Yosep kaw nna hpa sharin la lu ai kun?

¹⁰ Karai Kasang hpe hkrit hkungga ai kanu kawa ni gaw, Mari yan Yosep kaw nna hpa sharin la lu ai kun? Yehowa hpe tsawra ai lam tsun ai, galaw ai lam ni hte ma ni hpe sharin ya na matu ahkyak ai. Yehowa hpe tsawra na matu  karum ya ai gaw, shanhte hpe jaw lu ai kaja htum kumhpa re. Chyum Laika ayan hkaja ai, akyu hpyi ai, zuphpawng ni lung ai, hkaw tsun bungli hta shang lawm ai zawn re ai wenyi lam ni hpe gara hku galaw mai ai lam sharin ya ra ai. (1 Tm 6:6) Arung arai ni hpe mung madi shadaw ya ra ai. (1 Tm 5:8) Ndai mungkan htum mat ai shaloi, asak hkrung lawt lu na matu hte mungkan nnan de shang lu na matu karum ya lu ai gaw arung arai madu ai hta n madung ai. Yehowa hte hku hkau lam kaja yang she lu la na re. *​—Eze 7:19; 1 Tm 4:8.

11. (a) 1 Timohti 6:17-19 hta lawm ai hpaji jaw ga ni gaw ma ni hpe bau maka ai shaloi kaja ai ni hpe lata lu hkra kanu kawa ni hpe gara hku karum ya lu ai kun? (b) Na a dinghku gaw gara bandung ni hpe jahkrat da ai kun? Hpa shaman chyeju ni lu la na kun? (“ Gara Bandung Ni Hpe Nang Jahkrat Mayu Ai Kun?” ngu ai lawk hpe yu u.)

¹¹ Hkristan kanu kawa law law gaw dinghku a matu, wenyi lam kaja hkra shakut ai hpe mu lu ai gaw kabu hpa re. Shanhte gaw rau sha ayan nawku daw jau nga ai. Nawku zuphpawng ni hte zuphpawng kaba ni hpe lung ai. Hkaw tsun bungli hta mung shang lawm ai. Dinghku nkau mi gaw, nau n hkaw tsun ga ai lawk hta pyi hkaw tsun lu ai. Nkau mi gaw, Behtela nta de sa chyai ai (sh) Yehowa a uhpung a gawgap bungli hta mung karum ya nga ai. Dai hku galaw ai majaw, shanhte gaw gumhpraw ma na, yakhkak ai lam nkau mi mung nga na re. Raitim, Yehowa gaw shanhte hpe shaman chyeju law law jaw na re. (1 Timohti 6:17-19 hpe hti u.) Dai zawn dinghku hta nga kaba wa ai ma ni gaw, shanhte sharin la wa ai kaja ai lam ni hpe matut hkan sa ai majaw, myit malai lu na lam n nga ai. *​—Gsh 10:22.

12. Yesu gaw kaba wa ai shaloi hpa hpe galaw wa ai kun?

¹² Sumsing kawa gaw, Yesu a matu kaja ai lam ni hpe galoi mung lata ya nna, ginding aga kanu kawa ni mung, hpaji rawng ai dawdan lam ni hpe jahkrat ya ai. Raitim, shi kaba wa ai shaloi, shi hkrai lata ra na re. (Gal 6:5) Anhte zawn sha, shi hta mung wanglu wanglang lata na ahkang nga ai. Tinang a akyu a matu sha shawng lata mai ai. Raitim, shi gaw Yehowa hte kaja ai hku hkau lam nga na matu lata wa ai. (Yhn 8:29) Shi a kasi ningli gaw, dai ni aten na ramma ni hpe gara hku karum ya lu ai kun?

13. Yesu gaw asak naw kaji yang gara ahkyak ai hpe lata wa ai kun?

¹³ Yesu asak naw kaji ai shaloi, kanu kawa ni hpe npu taw na matu lata ai. Shi gaw kanu kawa ni hta na grau chye tim, shanhte a lam matsun ni hpe madat wa ai. Matut nna npu taw ai. (Luk 2:51) Kasha alat a lit hpe atsawm gun hpai wa na hpe anhte kam ai. Kawa Yosep kaw nna lasama bungli hpe atsawm sharin la wa ai majaw, dinghku hpe madi shadaw ya lu ai.

14. Yesu gaw Karai a Mungga hpe atsawm hkaja wa ai lam anhte gara hku chye lu ai kun?

 ¹⁴ Yesu a kanu kawa ni gaw, shi hpe mauhpa lam hku nna shangai wa ai lam hte, shi hte seng nna lamu kasa ni tsun wa ai lam hpe bai tsun dan wa na re. (Luk 2:8-19, 25-38) Yesu gaw shanhte tsun dan ai hte sha myit n dik ai. Shi nan mung Chyum Laika hpe hkaja ai. Karai A Mungga hpe shakut shaja let hkaja wa ai lam, anhte gara hku chye lu ai kun? Shi asak naw kaji ai aten hta, Yerusalem na sara ni gaw, “shi a myit kung ai hpe mung, shi htan ai ga a majaw mung, mau nga” ai hpe yu yang chye lu ai. (Luk 2:46, 47) Asak 12 ning shaloi hta pyi, Yehowa gaw shi a Kawa re ai hpe shi nan sakse madun ngut sai.​—Luk 2:42, 43, 49.

15. Yesu gaw Yehowa myit ra ai lam hpe galaw na matu lata wa ai lam gara hku madun wa ai kun?

¹⁵ Yesu gaw Yehowa a yaw shada lam hta, shi a lit hte seng nna chye wa ai shaloi, dai lit hpe hkap la wa ai. (Yhn 6:38) Masha law law shi hpe n ju n dawng na hpe chye ai. Dai hpe n ra sharawng tim, Yehowa hpe madat mara na matu lata wa ai. A.D. 29 hkalup hkam ai shaloi kaw nna, Yehowa hpyi shawn da ai hpe sha galaw na matu myit maju jung wa ai. (Heb 10:5-7) Hpun shadaw hta si hkam ai shaloi hta pyi, Yehowa a myit ra ai lam hpe galaw na matu dawdan da ai.​—Yhn 19:30.

16. Yesu kaw nna ma ni sharin la lu ai lam langai gaw hpa rai kun?

¹⁶ Kanu Kawa ni a ga madat u. Na a kanu kawa ni mung Mari yan Yosep zawn sha n hkum tsup ma ai. Raitim, Yehowa gaw nang hpe makawp maga na matu, shaman ya na matu, lam matsun ya na matu kanu kawa ni hpe lit jaw da ai. Nang gaw shanhte a lam matsun ni hpe madat mara nna shanhte a ahkang aya hpe hkungga na nga yang, “ngamu ngamai” na re.​—Ehp 6:1-4.

17. Yawshu 24:15 hku nga yang ramma ni gaw tinang a matu gara dawdan lam jahkrat lu ai kun?

¹⁷ Kadai hpe nawku na hpe dawdan u. Yehowa gaw kadai re ai, shi a yaw shada lam hta hpa ni lawm ai, dai gaw na a prat hte gara hku seng ang ai ngu ai lam ni hpe nang nan sakse madun ra ai. (Rom 12:2) Rai yang, na a prat hta ahkyak htum ai dawdan lam re ai Yehowa hpe nawku na matu dawdan lu na re. (Yawshu 24:15 hpe hti u; Hpj 12:1-2) Chyum Laika hti nna hkaja ai lam hpe ayan galaw na nga yang, Yehowa hpe tsawra ai lam rawt jat wa nna, shi hpe kamsham ai lam ngang kang wa na re.

18. Ramma ni lata ra ai lam langai gaw hpa rai kun? Hpa akyu lu la na kun?

 ¹⁸ Yehowa a myit ra ai lam hpe na a prat hta shawng tawn na matu lata u. Nang akyu lu na matu, na a atsam ningja ni hpe akyu jashawn yang, ngwi pyaw na ngu Satan a mungkan gaw ga sadi jaw nga ai. Gaja nga yang, arung arai hpe madung tawn ai ni gaw ‘yawn hkyen ai lam amyu myu’ hkrum chye ai. (1 Tm 6:9, 10) Raitim, nang gaw Yehowa a ga madat nna shi a myit ra ai lam hpe prat hta shawng tawn na nga yang, prat hta awng dang lam lu la nna, “hpaji rawng ai hku galaw lu” na re.​—Ysh 1:8, NW.

19. Kanu kawa ni hpa hpe myit dum ra ai kun?

¹⁹ Kanu kawa ni e, Yehowa hpe nawku daw jau na matu ma ni lata lu hkra, kaja htum karum ya u. Shi hpe kamhpa yang, hpaji rawng ai lam ni lata lu hkra nang hpe karum ya na re. (Gsh 3:5, 6) Nang tsun ai hta grau nna galaw ai lam gaw, ma ni a ntsa shingkang ka-up lu ai hpe dum u. Dai majaw, ma ni Yehowa a myi man lu na matu karum ya lu ai dawdan lam ni jahkrat u.

20. Ramma ni gaw Yehowa hpe nawku na matu lata na nga yang hpa shaman chyeju ni lu la na kun?

²⁰ Ramma ni e, nu wa ni gaw nanhte a prat hta hpaji rawng ai lam ni lata lu hkra karum ya lu ai. Raitim, Karai a myi man lu na matu nang nan galaw ra ai. Dai majaw, Yesu hpe kasi la nna, nang tsawra ai sumsing Kawa hpe nawku daw jau na matu lata u. Rai yang, nang gaw ya mung lachyum rawng nna ngwi pyaw ai aprat lu la na re. (1 Tm 4:16) Htawm hpang hta mung, kaja htum asak aprat lu la na re.