1. Etokolo la denga mbada lilipi keshe umwe ta dulu okuninga?

LUHAPU omatokolo oo haa ningwa kovadali otaa dulu okukuma onghalamwenyo yokaana oule wefimbo. Ngeenge ovadali ova ningi omatokolo ehe li pandunge, otava dulu okweetela ounona omaupyakadi. Ashike ngeenge ova ningi omatokolo opandunge otava ka kwafela ovana vavo va kale va hafa nokukala nonghalamwenyo tai ti sha. Oshoshili kutya ounona navo ova pumbwa yo okuninga omatokolo e li pandunge. Ashike keshe umwe ota dulu okutokola okulongela Tate yetu womeulu omunahole, Jehova. — Eps. 73:28.

2. Omatokolo opandunge elipi a ningwa kuJesus nosho yo kovadali vaye?

² Ovadali vaJesus ova li va tokola toko okukwafela ounona vavo va longele Jehova, nomatokolo oo va ninga okwa ulika kutya okwa fimanenena monghalamwenyo yavo. (Luk. 2:40, 41, 52) Sha faafana, Jesus naye okwa li a ninga omatokolo opandunge oo e mu kwafela a wanife po onghandangala oyo ta dana melalakano laJehova. (Mat. 4:1-10) Jesus okwa kula e li omulumenhu omunanghenda, omudiinini nomuladi. Ovadali Ovakriste otava ka kala va hafa ngeenge ova kala ve na omonamati a fa Jesus.

3. Omapulo elipi hatu ka kundafana moshitukulwa eshi?

³ Moshitukulwa eshi ohatu ka kundafana omapulo taa shikula: Omatokolo opandunge elipi Jehova a ninga oo a kwafela Jesus? Oshike ovadali Ovakriste tave lihongo komatokolo oo a ningwa kovadali vaJesus vopanhu? Ovanyasha Ovakriste otave lihongo shike komatokolo aJesus?

4. Etokolo la fimana lilipi Jehova a ninga olo la kwafela Omona waye?

⁴ Jehova okwa hoololela Jesus ovadali va denga mbada. (Mat. 1:18-23; Luk. 1:26-38) Eendjovo daMaria odo tadi hangwa mOmbiibeli otadi ulike kutya okwa li e hole neenghono Jehova nosho yo Eendjovo daYe. (Luk. 1:46-55) Nonghedi omo Josef e linyenga kewiliko laJehova otai ulike kutya oha tila Kalunga nokwa li a hala oku mu hafifa. — Mat. 1:24.

5-6. Jehova okwa li a efa Omona waye a ende monghalo ilipi?

⁵ Jehova ka li a hoololela Jesus ovadali ovayamba. Eyambo olo la ningwa kuJosef naMaria eshi va dala Jesus otali ulike kutya ova li eehepele. (Luk. 2:24) Josef otashi dulika a li e na okangeshefa kanini, ka li popepi neumbo laye muNasaret, opo a li ha hongele oipilangi. Onghalamwenyo yavo oya li paunafangwa, naunene tuu eshi oukwaneumbo wa ka kula eshi va ka kala ve na ounona vaheyali. — Mat. 13:55, 56.

⁶ Jehova okwa li a amena Jesus koiponga yonhumba, ashike ka li e mu amena aha shakeneke omashongo. (Mat. 2:13-15) Pashihopaenenwa, Jesus okwa li e na okuungaunga novapambele ovo ihava longele Jehova. Diladila ashike nghee sha li shi nyemateka kuJesus okuungaunga novapambele ovo va li inava itavela kutya oye Messias. (Mark. 3:21; Joh. 7:5) Shikwao vali, Jesus okwa li e na okuungaunga noluhodi lefyo laxe omutekuli, Josef. Molwaashi Jesus oye a li a kula, osha yela kutya oye a li e na okukufa po oshinakuwanifwa shokufila oshisho oukwaneumbo wavo. (Mark. 6:3) Eshi a enda ta kulu, okwa ka kala e shii nghee e na okufila oshisho nawa oukwaneumbo. Otashi dulika a li e na okulonga noudiinini opo e va yambidide. Okwa li e shii nghee omunhu ha kala e udite ngeenge a loloka eshi a uhala ta longo.

7. (a) Omapulo elipi taa dulu okukwafela ovalihomboli va tekule ounona vavo? (b) Ongahelipi Omayeletumbulo 2:1-6 taa kwafele ovadali eshi tava tekula ounona vavo?

⁷ Ngeenge omu li ovalihomboli nomwa hala ounona, lipuleni kutya: ‘Mbela otu valininipiki novadiinini ovo Jehova a hoolola va file oshisho okaana?’ (Eps. 127:3, 4) Ngeenge ou li nale omudali, lipula kutya: ‘Mbela ohandi hongo ngoo ounona vange va kale va lenga oilonga youdiinini?’ (Omuud. 3:12, 13) ‘Mbela ohandi ningi ngoo ngaashi handi dulu opo  ndi amene ounona vange palutu nopaenghedi koiponga yomounyuni waSatana?’ (Omayel. 22:3) Oshoshili kutya ito dulu okwaamena ounona voye komashongo aeshe oo va taalela. Ashike oto dulu oku va kwafela komesho yefimbo moku va honga va kale hava kongo omayele mEendjovo daKalunga. (Lesha Omayeletumbulo 2:1-6.) Pashihopaenenwa, ngeenge omupambele weni umwe okwa efa po okulongela Jehova, va ulikila mOmbiibeli nghee sha fimana okukala omudiinini kuJehova. (Eps. 31:23) Ile ngeenge omuholike weni umwe okwa fi, ulikila ovana voye nghee ve na okulongifa Eendjovo daKalunga, opo va ungaunge noluhodi nova kale nombili yopamadiladilo. — 2 Kor. 1:3, 4; 2 Tim. 3:16.

8. Metwokumwe naDeuteronomion 6:6, 7, oshike Josef naMaria va li ve na okuninga?

⁸ Ovadali vaJesus vopanhu ova li ve mu kwafela a kule e hole Jehova; ova li va shikula ewiliko laJehova olo a yandja kovadali. (Lesha Deuteronomion 6:6, 7.) Josef naMaria ova li ve hole Jehova neenghono, naasho osha li elalakano lavo la fimana opo va kwafele ovana vavo va kale ve hole Jehova.

9. Omatokolo a fimana elipi Josef naMaria va li ve na okuninga?

⁹ Josef naMaria ova li ve na onghedindjikilile yokulongela Jehova pamwe noukwaneumbo wavo. Osha yela kutya ova li hava ongala oshivike keshe moshinagoga muNasaret, nova li yo hava ka dana Opaasa omudo keshe kuJerusalem. (Luk. 2:41; 4:16) Otashi dulika va li hava longifa eemhito da tya ngaho dokuya kuJerusalem, opo va honge Jesus novamwaina vaye kombinga yondjokonona yoshiwana shaJehova, notashi dulika va li hava talele po eenhele odo da tumbulwa mOmishangwa. Eshi oukwaneumbo wa enda tau kulu, otashi dulika sha li shidjuu kuJosef naMaria okutwikila okulongela Jehova pandjikilile. Kava li tuu va pewa ondjabi omolweenghendabala davo! Oukwaneumbo wavo owa li wa filwa oshisho pamhepo, molwaashi ova li va pitifa komesho okulongela Jehova.

10. Oilihongomwa ilipi ovadali Ovakriste tave lihongo kuJosef naMaria?

¹⁰ Oshike ovadali Ovakriste tave lihongo kuJosef naMaria? Osho sha fimanenena oshosho kutya ulikila ovana voye kutya ou hole Jehova neenghono okupitila meendjovo nomeenghatu doye. Oshali ya denga mbada oyo to dulu oku  va pa, oku va kwafela va kale ve hole Jehova. Oshilihongomwa shimwe vali sha fimana, oshosho kutya va kwafela va kale ve na onghedindjikilile yokukonakona, yokwiilikana, yokuya kokwoongala noyokukufa ombinga moukalele. (1 Tim. 6:6) Oshoshili kutya owa pumbwa okupa ovana voye oinima yopamaliko oyo va pumbwa. (1 Tim. 5:8) Ashike dimbuluka kutya osho sha fimanenena kovana voye okukala ve na ekwatafano liwa naJehova, molwaashi otali ke va kwafela va xupe pexulilo lounyuni, nokuya mounyuni mupe waKalunga, ndele kai fi oinima yopamaliko. — Hes. 7:19; 1 Tim. 4:8.

11. (a) Ongahelipi omayele oo taa hangwa mu 1 Timoteus 6:17-19 taa kwafele ovadali va ninge omatokolo e li pandunge eshi tava tekula ovana vavo? (b) Omalalakano elipi oukwaneumbo weni tau dulu okulitulila po, nomanangeko noupuna elipi tamu ka mona? (Tala oshimhungu “ Omalalakano elipi mwa hala okulitulila po?”)

¹¹ Kashi hafifa tuu okutala kovadali vahapu Ovakriste ovo va ninga omatokolo opandunge e na sha nomaukwaneumbo avo! Ohava longele Kalunga ve li oukwaneumbo. Ohava i kokwoongala nokoyoongalele. Ohava kufa ombinga moukalele. Omaukwaneumbo amwe ohaa ka udifila koitukulwa oko ihaku longwa naanaa. Amwe ohaa talele po oukwaneumbo waBetel ile haa yambidida moilonga yokutunga omatungo ehangano. Omaukwaneumbo oo haa kufa ombinga momalipyakidilo a tya ngaho ohaa longifa oiniwe yavo nohaa shakeneke omashongo onhumba. Ashike Jehova oha nangeke noupuna eenghendabala davo dehalo liwa. (Lesha 1 Timoteus 6:17-19.) Ounona ovo va kulila momaukwaneumbo a tya ngaho ohava kala ve na eenghedi diwa shimha va kulu noihave ke lipa oushima. * — Omayel. 10:22.

12. Jesus okwa li e na okuninga shike eshi a enda ta kulu?

¹² Xe yaJesus womeulu okwa li a ninga omatokolo e li pandunge, novadali vaye vopanhu ova li va ninga sha faafana. Kakele kaasho, eshi Jesus a enda ta kulu okwa li e na okuninga omatokolo kuye mwene. (Gal. 6:5) Ngaashi ashike ovanhu aveshe, naye okwa li e na okuninga omatokolo opandunge. Okwa li ta dulu okutokola a pitife komesho ouwa waye mwene. Ponhele yaasho, okwa li a tokola okukala e na ekwatafano liwa naJehova. (Joh. 8:29) Ongahelipi oshihopaenenwa shaye tashi dulu okukwafela ovanyasha kunena?

13. Etokolo lilipi Jesus a ninga ofimbo a li omunyasha?

¹³ Eshi Jesus a li okamatyona, okwa li a tokola okudulika kovadali vaye vopanhu. Ka li ha tukululile ovadali vaye ounashibofa, ta diladila kutya oku shii shihapu e va dule. Ponhele yaasho, ‘okwa kala ha dulika kuvo.’ (Luk. 2:51) Kape na omalimbililo kutya Jesus oye a li  a kufa po oshinakuwanifwa shokufila oshisho oukwaneumbo wavo, molwaashi oye a li a kula kuvakwao. Okwa li e lihonga noudiinini okuhonga oipilangi kuxe Josef opo a dule okukwafela oukwaneumbo wavo.

14. Otu shi shii ngahelipi kutya Jesus okwa li omukonakoni muwa wEendjovo daKalunga?

¹⁴ Ovadali vaJesus otashi dulika va li ve mu lombwela kombinga yokudalwa kwaye pashikumwifilonga nosho yo ovo va li va tumwa kuKalunga va popya kombinga yaye. (Luk. 2:8-19, 25-38) Jesus ka li ashike a wanenwa kwaasho a lombwelwa, ndele naye mwene okwa li ha konakona Omishangwa. Otu shi shii ngahelipi kutya Jesus okwa li omukonakoni muwa wEendjovo daKalunga? Molwaashi fimbo a li okamatyona, ovahongi vomuJerusalem ova li va “kuminwa neenghono eendunge nomanyamukulo aye.” (Luk. 2:46, 47) Jesus okwa li a ulika kutya Jehova oye Xe eshi a li e na omido 12. — Luk. 2:42, 43, 49.

15. Jesus okwa ulika ngahelipi kutya okwa tokola okulonga ehalo laJehova?

¹⁵ Eshi Jesus e lihonga onghandangala oyo ta dana melalakano laJehova, okwa tambula ko oshinakuwanifwa shaye. (Joh. 6:38) Okwa li e shii kutya ota ka tondwa kovanhu vahapu, naasho osha li hashi kala tashi ingaana momadiladilo aye. Ashike okwa li a tokola okudulika kuJehova. Eshi Jesus a ninginifwa mo 29 O.P., elalakano laye la fimanenena ola li okulonga ehalo laJehova. (Heb. 10:5-7) Nokuli naashi a li ta hepekwa komuti womahepeko, okwa li a tokola toko okulonga ehalo laXe. — Joh. 19:30.

16. Oshilihongomwa shimwe shilipi ounona tava dulu okulihonga kuJesus?

¹⁶ Dulika kovadali voye. Ovadali voye inava wanenena ngaashi ashike Josef naMaria. Ashike, Jehova okwe ku pa ovadali voye opo ve ku amena, ve ku deule noku ku wilika. Ngeenge owa kala wa lenga omayele avo nowa fimaneka eenghonopangelo davo, oto ka kala “nonghalamwenyo iwa.” — Ef. 6:1-4.

17. Metwokumwe naJosua 24:15, etokolo lilipi ovanyasha ve na okuninga kuvo vene?

¹⁷ Tokola kutya olyelye wa hala okulongela. Owa pumbwa okukala wa tomhwa kutya Jehova oye lyelye, osho sha kwatelwa melalakano laye, nanghee hatu dulu okulonga ehalo laye monghalamwenyo yetu. (Rom. 12:2) Nokungaho, oto ka ninga etokolo la fimanenena  monghalamwenyo yoye lokulongela Jehova. (Lesha Josua 24:15; Omuud. 12:1) Ngeenge owe litulile po efimbo lokulesha nokukonakona Ombiibeli pandjikilile, ohole yoye yokuhola Jehova otai ka enda tai kulu, neitavelo loye otali ka pamenena.

18. Etokolo lilipi ovanyasha ve na okuninga, notali ka eta oidjemo ilipi?

¹⁸ Tokola okulonga ehalo laJehova monghalamwenyo yoye. Ounyuni waSatana ohau ladipike ovanhu va longife owino oo ve na omolwouwa wavo opo va kale va hafa. Ndele oushili oyoo kutya ovo hava lalakanene oinima yopamaliko ohave ‘lietele omaudjuu mahapu.’ (1 Tim. 6:9, 10) Mepingafano naasho, ngeenge owa kala ho pwilikine kuJehova nokulonga ehalo laye, oto ka pondola monghalamwenyo yoye noto ka mona “ouwa” ile tu tye oto ka katuka pandunge. — Jos. 1:8.

19. Oshike ovadali ve na okudimbuluka?

¹⁹ Ovadali, ningeni ngaashi tamu dulu mu kwafele omaukwaneumbo eni a longele Jehova. Kaleni mwe mu lineekela, opo nee ote ke mu kwafela mu ninge omatokolo opandunge. (Omayel. 3:5, 6) Dimbulukweni kutya ounona veni ohava nwefwa mo unene kwaasho hamu ningi, ndele hakwaasho hamu popi. Onghee hano, kaleni hamu ningi omatokolo oo taa dulu okukwafela ovana veni va kale va hokiwa kuJehova.

20. Ovanyasha otava ka mona omanangeko noupuna elipi ngeenge ova tokola okulongela Jehova?

²⁰ Ovanyasha, ovadali veni otava dulu oku mu kwafela mu ninge omatokolo e li pandunge monghalamwenyo yeni. Ndele nande ongaho, omu na okuninga omatokolo e li pandunge opo mu hafife Kalunga. Onghee hano, hopaeneneni Jesus nokuhoolola okulongela Tate yetu womeulu omunahole. Ngeenge omwa ningi ngaho, otamu ka kala mwe lipyakidila, onghalamwenyo yeni otai ka kala i na eityo nokukala mwa hafa paife. (1 Tim. 4:16) Nomonakwiiwa, otamu ka kala mwa hafa fiyo alushe.