1. Etokoro musinke lyewa eli na vhura kutura po nkenye muntu?

RORUNZI, matokoro aga ava tura po vakurona, kukundama vana vawo. Nsene vakurona va tura po matokoro gepuko, ayo ngayi retera maudigu vana vawo, nye nsene va tura po matokoro gomawa, ngayi vatera vana vawo va gwane ruhafo meparu. Nye nampili ngoso vanona nawo va hepa kutura po matokoro gomawa. Etokoro lyewa eli na vhura kutura po nkenye gumwe kuna kara mokukarera Guhyetu gemeguru, Jehova.—Epis. 73:28.

2. Matokoro musinke gomawa ga tulire po Jesus novakurona vendi?

² Josefa naMariya kwa harerere vana vawo va karere Jehova, ano matokoro aga va tulire po kwa likidire asi kukarera Jehova kwa kere nomulyo meparu lyawo. (Ruk. 2:40, 41, 52) Jesus nage kwa tulire po matokoro gomawa aga ga ya mu vaterere a sikise mo sitambo esi ga mu harerere Jehova. (Mat. 4:1-10) Ngomu Jesus ga kulire, age kwa kere muntu gombili gomulimburukwi ntani gouradi. Vakurona navenye ava va hara Jehova, kwa harera vana vawo va kare noyikara ngwendi eyi ga kere nayo Jesus.

3. Mapuro musinke natu ka zogera mosirongwa esi?

³ Mosirongwa esi, tatu ka zogera mapuro aga gana kukwama ko. Matokoro musinke gomulyo ga tulire po Jehova kuhamena Jesus? Yisinke nava lirongera ko vakurona woVakriste komatokoro aga va tulire po oJosefa naMariya? Ntani yisinke nava lirongera ko vanona komatokoro aga ga tulire po Jesus?

4. Etokoro musinke lyomulyo ga tulire po Jehova kuhamena Munwendi?

⁴ Jehova kwa tulire po etokoro lyomulyo apa ga horowere  vakurona wovawa ava va ya kere vaJesus. (Mat. 1:18-23; Ruk. 1:26-38) Nonkango edi ga uyungire Mariya edi va tjenge moBibeli kulikida asi age kwa here unene Jehova ntani Nonkango dendi. (Ruk. 1:46-55) Ntani monkedi omu Josefa nga limburukwa komavyukiso gaJehova kulikida asi age kwa tjilire Karunga ntani ga here kumuhafesa.—Mat. 1:24.

5-6. Maudigu musinke ga ligwanekerere nago Jesus aga ga dilire kugusa po Jehova?

⁵ Koneka asi vakondi ava ga horowere Jehova va kare vaJesus, kapi va kere nongawo. Nzambo ezi va geve oJosefa naMariya konyima zapa va hampurukire Jesus kulikida asi awo kwa kere nohepwe. (Ruk. 2:24) Josefa nampo ga kere nositora sosinunu momukunda gwawo Nasareta omu nga ruganene ngesefa zendi ngomuhongi goyikungu. Mokumona asi awo kwa kere novanona wokusika pontambali ndi kupita opo, awo nampo kapi va kere noyimaliwa yoyinzi ndi yininke yoyinzi.—Mat. 13:55, 56.

⁶ Jehova kwa poperere Jesus koyiponga yimwe nye kapi ga mu poperere komaudigu nagenye. (Mat. 2:13-15) Pasihonena, Jesus ga hepere kulididimikira maudigu gokutundilira kovanekoro wovahapuli. Gazara tupu omu Jesus ga lizuvhire pokukara nekoro lyendi eli lya dilire kuyipura pomuhowo asi age Mesiyasa. (Mar. 3:21; Joh. 7:5) Ntani ayo kumoneka asi Jesus ga hepere hena kulididimikira nomfa doguhwe Josefa. Eyi kutanta asi apa va fire oguhwe, Jesus yige ga kere mukondi po povana vawo. Yipo nye, age ga hepere kupakera mbili epata lyawo. (Mar. 6:3). Ngomu Jesus ga ya kulire, age ga lirongere omu na rera epata lyawo. Age ga hepere kurugana unene yipo a rere epata lyawo. Yipo nye, age ga yi divire omu vantu ava lizuvhu nsene vana roroka.

7. (a) Mapuro musinke va hepa kulipura valikwali yipo va sikisemo situmbukira sokurera vana vawo? (b) Ngapi omu Yisewe 2:1-6 nazi vatera vakurona yipo va deure vana vawo?

⁷ Nsene asi one valikwali ntani muna hara ngomu kare novana, lipureni asi: ‘Ose twa linunupika ntani twa hara Nonkango daKarunga ndi? Jehova kuvhura nga tu horowore yipo tu rere munwetu ndi?’ (Epis. 127:3, 4) Nsene asi one mwa kara nare novanona, lipureni asi: ‘Ose kuna kurera vana vetu va dive mulyo gokurugana unene ndi?’ (Muud. 3:12, 13) ‘Ose kurugana paapa twa hulira yipo tu popere vana vetu koyininke  yoyidona eyi ava ligwanekere nayo mouzuni ou waSatana ndi?’ (Yis. 22:3) Yimo, kapi tomu vhuru kupopera vana veni komaudigu nagenye. Nye kuvhura mu twikire kuronga vana veni monkedi zongwa yipo va huguvare moBibeli, unene po nsene kuna kuligwanekera nomaudigu. (Resa Yisewe 2:1-6.) Pasihonena, nsene gumwe gekoro ana hageke kukarera Jehova, vatereni vana veni va twikire kulironga Nonkango daKarunga yipo va dimburure mulyo gokutwikira kulimburukwa Jehova. (Epis. 31:23) Ndi nsene gumwe gekoro ana dogoroka, likida vana woge omu nava ruganesa Nonkango daKarunga va lididimikire nokukara mombili.—2 Kol. 1:3, 4; 2 Tim. 3:16.

8. Kuliza naDeuteronomium 6:6, 7, yisinke va rugene oJosefa naMariya?

⁸ Josefa naMariya kwa vaterere Jesus yipo a ya hafese Karunga apa ga ya kulire morwa awo ngava kwama mavyukiso aga Jehova ga pere vakurona. (Resa Deuteronomium 6:6, 7.) Josefa naMariya kwa here unene Karunga ntani sitambo sawo sosinene po kwa here kuvatera vana vawo nawo va hare Jehova.

9. Matokoro musinke gomulyo va tulire po oJosefa naMariya?

⁹ Josefa naMariya kwa litulire mo unene nepata lyawo mokukarera Jehova. Tuna si huguvara asi awo ngava zi nkenye sivike komapongo mosinagoge zomoNasareta ntani kosipito soPaska esi ngasi kara moJerusarema rumwe momvhura. (Ruk. 2:41; 4:16) Apa ngava kara morugendo rokuza koJerusarema, awo ngava ruganesa mpito ozo va ronge Jesus novamumbya vendi kuhamena eyi ya horokerere vantu vaJehova mosiruwo sanare. Ntani ayo kumoneka asi ngava dingura mavango gamwe aga va tumbura moMatjangwa. Ngomu epata lyawo lya ligwederere, ayo nampo kapi ya kere ureru kwaJosefa naMariya va twikire kukarera Jehova. Nye va gwanenene mo mauwa kweyi va twikilire kukarera Jehova. Mokumona asi awo kwa tulire ukareli wawo muhowo meparu, eyi yiyo ya va vaterere va twikire kukarera Jehova.

10. Yisinke nava lirongera ko vakurona kwaJosefa naMariya?

¹⁰ Yisinke nava lirongera ko vakurona ava va tjira Karunga kwaJosefa naMariya? Somulyo po unene, yi likideni kovana veni asi  one mwa hara unene Karunga kupitira mononkango ndi mweyi omu rugana. Vakurona, mwa hepa kuyidimburura asi uhwi womulyo po ou nomu vhura kugava kovana veni kuna kara mokuvavatera va hare Jehova. Ntani sininke hena somulyo esi nomu rugana kuna kara pokuronga vana veni omu ya kara nomulyo kulironga nkenye ezuva Bibeli, kukanderera, kuwiza komapongo nokulihameka mokuzuvhisa. (1 Tim. 6:6) Nye nampili ngoso, mwa hepa hena kupa vana veni yihepwa yopanyama. (1 Tim. 5:8) Nye diworokeni asi elikwatakano eli ava tulisa po vana veni yilyo ngali ka va vatera va ka paruke uzuni ou woudona nokukahwilira mouzuni woupe waKarunga.—Hes. 7:19; 1 Tim. 4:8.

11. (a) Ngapi epukururo eli lya kara mwa-1 Timoteusa 6:17-19 nali vatera vakurona va ture po matokoro gomawa ngomu vana kurera vana vawo? (b) Yitambo musinke nomu litulira po nepata lyeni ntani mauwa musinke ngomu gwanena mo? (Tara kakende “ Yitambo musinke ngo litulira po?”)

¹¹ Ayo kuhafesa pokumona omu vakurona wovanzi vana kuvatera vana vawo va karere Jehova. Awo kukarera Jehova kumwe nokuwiza komapongo nokoyigongi. Ntani awo kuza hena mokuzuvhisa. Mapata gamwe kuzuvhisira monomukunda edi va dira kuzuvhisira unene. Ano mapata gamwe kuza va ka dingure koBeteli ndi kukakwatesa ko matungo aga ava ruganesa mombunga zaJehova. Vakurona ava ava rugana yirugana oyo, kuligwanekera nomaudigu. Nye nampili ngoso, Jehova kuvatungika morwa malizambero ogo. (Resa 1 Timoteusa 6:17-19.) Vanona ava va rerera momapata gokufana ngoso, apa ava ya kuru, awo narunye kuyakara noyikara yoyiwa ntani kapi ava livere.—Yis. 10:22.

12. Yisinke ga rugene Jesus ngomu ga kulire?

¹² Oguhwe vaJesus vemeguru nkenye apa kutura po matokoro gomawa, ano vakondi vendi vepevhu nawo kwa tulire po matokoro gomawa. (Gar. 6:5) Nage ga kere noumanguruki wokutokora eyi ga here kurugana. Age ngano ga tokwere kurugana eyi ga here. Nye mevango lyoyo, age kwa horowere po kukarera Jehova. (Joh. 8:29) Ngapi sihonena sendi nasi vatera vanona naina?  

13. Etokoro musinke lyomulyo ga tulire po Jesus apa ga kere munona?

¹³ Apa Jesus ga kere munona, age nga limburukwa vakondi vendi. Nampili ngomu ga divire yininke yoyinzi, age kwa twikilire kuvalimburukwa. Bibeli kuuyunga asi: “Age ngava zuvhu” ndi ngava limburukwa. (Ruk. 2:51) Jesus yige ga kere mukondi po kovambya vendi. Eyi kutanta asi ga kere noyitumbukira ntani ga yi sikire mo. Age ga lirongerere ko koguhwe omu ava hongo yikungu, ano eyi kwa mu vaterere a rerese ko vemepata lyawo.

14. Ngapi tuna yi diva asi Jesus ga here Nonkango daKarunga?

 ¹⁴ Ayo kumoneka asi vakondi vaJesus va tanterere munwawo kuhamena omu va mu hampurukire ntani neyi va uyungire vantu ava ga tumine Karunga kumuhamena. (Ruk. 2:8-19, 25-38) Nye Jesus nage ga lirongere Matjangwa pwamwene. Ngapi twa yi diva asi ga here Nonkango daKarunga? Morwa Bibeli kuuyunga asi apa ga kere simpe mumati, varongi womoJerusarema “kwa va tetwire nondunge dendi nomalimbururo gendi.” (Ruk. 2:46, 47) Apa Jesus ga kere nonomvhura 12, ga yi likidire nawa-nawa asi Jehova kwa kere oGuhwe.—Ruk. 2:42, 43, 49.

15. Ngapi ga yi likidire Jesus asi age kwa tokomenene kurugana mpango zoGuhwe?

¹⁵ Ngomu Jesus ga lirongere eyi ga mu harere Jehova a rugane, age kwa tokwere kurugana mpango zaJehova. (Joh. 6:38) Age ga yi divire asi vantu wovanzi ngava mu nyenga, ayo nampo ya mu guvise. Nye age kwa twikilire kulimburukwa Jehova. Apa Jesus ga gwene ekuho momvhura 29, sitambo sendi sosinene kwa kere sokurugana eyi ga mu harerere Jehova. (Heb. 10:5-7) Nampili apa va mu dipagere kositji, Jesus kwa tokomenene kurugana mpango zoGuhwe.—Joh. 19:30.

16. Sirongwa musinke nava lirongera ko vanona kwaJesus?

¹⁶ Limburukwa vakurona woge. Ngwendi Josefa naMariya, vakondi woge nawo kapi va sikilira mo. Nye nampili ngoso, Jehova kwa pa vakondi woge situmbukira sokukupopera nokukudeura. Nsene o tambura mapukururo gawo nokuvafumadeka, ayo nga yi ku tompoka meparu.—Efe. 6:1-4.

17. Kuliza naJosuwa 24:15, etokoro musinke va hepa kutura po vanona?

¹⁷ Tokora asi yilye ogu ngo karera. Wa hepa kudiva asi yilye Jehova nositambo sendi esi ga kara naso ntani nomu no sikisa mo mpango zendi. (Rom. 12:2) Nsene o yi diva ngoso, nga yi ku vatera o ture po etokoro lyomulyo meparu lyoge lyokukarera Jehova. (Resa Josuwa 24:15; Muud. 12:1) Nsene o resa Bibeli nkenye ezuva nokuzilironga, ove ngo hara unene Jehova ntani epuro lyoge ngali nkondopara.

18. Etokoro musinke lyomulyo nava tura po vanona ntani mauwa misinke ngava gwanena mo?

¹⁸ Tura mpango zaJehova muhowo meparu lyoge. Uzuni ou waSatana kukorangeda  asi nsene o ruganesa udivi woge yipo o gwanene mo uwa wanyamoge, ngo hafa. Nye usili wou asi vantu ava ava demenene koyitambo yopanyama kulizweka vene “momaruhodi gomanzi.” (1 Tim. 6:9, 10) Nye nsene o purakena kwaJehova no kutura mpango zendi muhowo meparu lyoge, ove ngo hafa ntani eparu lyoge nga li wapa.—Jos. 1:8.

19. Yisinke va hepa kudiworoka vakurona?

¹⁹ Vakurona, ruganeni paapa mwa hulira mu vatere vana veni va karere Jehova. Huguvareni mwendi ntani age nga mu vatera mu ture po matokoro gomawa. (Yis. 3:5, 6) Diworokeni asi vana veni kuvakundama unene eyi omu rugana kupitaka eyi omu uyunga. Yipo nye, tureni po matokoro aga ngaga vhura kuvatera vana veni va hafese Jehova.

20. Mauwa musinke ngava gwana vanona nsene va tura po etokoro lyokukarera Jehova ngesi?

²⁰ Vanona, vakurona veni kuvhura kumuvatera mu ture po matokoro gomawa meparu. Nye mwa hepa kutura po matokoro nyamweni nsene muna hara kuhafesa Jehova. Yipo nye, honeneni Jesus ntani tokoreni kukarera Guhyetu geharo. Nsene mu yi rugana, one ngomu hafera eparu ngesi. (1 Tim. 4:16) Ano komeho, one ngomu ka hafera mouzuni woupe eparu lyewa po unene!