1. Ntia nzengolo yiyôkele bubote tulendi bonga beto bansoni?

VULA-VULA, nsololo zi saka bibuti mbo zinataka nsobolo kwe bala bawu ha manima. Tala ti bibuti bisiri nsololo za zibi, bilendi nata misamu kwe bala bawu. Kâ, tala ti bibuti bisiri nsololo za mbote, mbo bihana bala bawu bweso bwa bunene bwa bâ na luzingu lwa nsayi. Kâ, bala mpe bafweti bonga nzengolo za mbote. Nzengolo yiyôkele bubote yi tulendi bonga beto bansoni, ni mu sarila Tata’eto dia luzolo die ku mazulu, Yehova.​—Mik. 73:28.

2. Ntia nsololo Yezu na bibuti biandi basa?

² Bibuti bia Yezu biatomo bonga nzengolo ya bakisa bala bawu mu sarila Yehova, mpe nsololo za sa bibuti zatomo songela kani diawu dia nguri mu luzingu. (Like 2:40, 41, 52) Yezu mpe wasa nsololo za mbote zamubakisa mu lungisa misamu miamutarila mu kani dia Nzambi. (Mat. 4:1-10) Yezu, nsayi yeri nandi, wa kwikama weri, mpe butindi bweri nandi bu keri kwe kuri. Bibuti biabiansoni bizoloko Yehova mbo biaketi bâ na nsayi mu bâ na mwana wa mpila yo.

3. Mu timoko ti, ntia biyuvu tuhanina mvutu?

³ Mu timoko ti, mbo tuhanina biyuvu ebi mvutu: Ntia nsololo za zibote Yehova kabonga mu bungu dia Yezu? Bibuti bie Bakristo, nti bilendi longoka mu nsololo za sa Yozefe na Mari? Mpe Bakristo bê ba ntwenia nti balendi longoka mu nsololo za sa Yezu?

4. Ntia nsololo ya mfunu Yehova kasa mu bungu dia Mwana’andi?

⁴ Yehova wasola bibuti bia nguria bia bibote mu bungu dia  Yezu. (Mat. 1:18-23; Like 1:26-38) Nzonzolo ya bunsungu ya Mari ye mu Bibila mbo yisongelaka luzolo lwa ngolo lweri nandi mu bungu dia Yehova na mu bungu dia Zu diandi. (Like 1:46-55) Mpe mpila ya tumamana Yozefe mu lutwalusu lwa Yehova mbo yisongelaka ti Nzambi keri tînaka mpe wazolo mu mu tâka nsayi.​—Mat. 1:24.

5-6. Mu ntia misamu Yehova kalembo kengerela Mwana’andi?

⁵ Yehova ka sola bibuti bieri na bimvwama biabingi ko mu bungu dia Yezu. Mukayulu wahana Mari na Yozefe mu mbutukulu ya Yezu mbo weri songelaka ti mputu zeri. (Like 2:24) Kampe Yozefe mu atelier ya fioti kwa keri sarilaka ya lembo bâ mala na nzo’andi. Buna, luzingu lwawu ka lwafweti’â bâ na nkalangani ko, nsungula bu bayizi bâ na bala kampe yôka nsambwari.​—Mat. 13:55, 56.

⁶ Yehova wakengerela Yezu mu misamu miakaka mia mpasi, kâ ka kengerela Mwana’andi ko mu misamu miamiansoni. (Mat. 2:13-15) Mu tifwani, bantu ba kanda diandi ka beri’â mu kwikilaka ko. Banza ka bwe Yezu kaketi bâ wa nionga mu bungu ti bantu ba kanda dia yandi beni ka beri’â tambulaka ko ti yandi ni Masiya. (Mak. 3:21; Za 7:5) Kampe, wafwanakana mpe Yezu kakorela lufwa lwa Yozefe, yandi weri tata dieri mu sansaka. Lufwa lwa Yozefe, lwasa ti Yezu, yandi weri mwana wa ntete, kabonga tibuka tia tata’andi mu twarisa tisalu tia kanda. (Mak. 6:3) Bu keri kwe kuri, Yezu walongoka mu kipa kanda diandi. Kampe wafweti sala bwabwingi mu ba kipa. Buna wazaba bwe muntu wubêlaka wa fwatika ku nsuka ya tilumbu.

7. (a) Ntia biyuvu bibakisa bantu ba kwelana mu sansa bala bawu? (b) Bwe Bingana 2:1-6 yilendi bakisila bibuti mu kubika bala bawu?

⁷ Tala ti ba kwelana lwena mpe luzololo lwabuta, yulasaneno: ‘Ngano bantu ba kuluka twena bazololo Yehova na Zu diandi? Ngano Yehova lendi tu sola mu kipa mwana wa ntalu wubutuka?’ (Mik. 127:3, 4) Tala ti, watibutila, tiyula: ‘Ngano mbo nilongesaka bala bani mfunu ya salaka bwabwingi?’ (Ekl. 3:12, 13) ‘Ngano mfweti sarilaka ngolo zani zazansoni mu kengerela bala bani mu misamu mia mbi milendi tula mu nza yi ya Satana?’ (Bin. 22:3) Ka lulendi’â lwakengerela bala beno ko mu misamu miamiansoni milendi ba turila. Kani kabwe ka bulendi’â bwa bâ ko. Kâ malembe-malembe,  mpe na luzolo lwalwansoni, lulendi ba kubika mu misamu milendi ba turila mu luzingu lwawu bu lukwe ba longese mu sikirila malongi ma Zu dia Nzambi. (Tanga Bingana 2:1-6.) Mu tifwani, tala ti muntu wumosi wa kanda wubikiri mu sarila Yehova, bakiseno bala beno mu longoka mu Bibila mfunu ya tatamana mu bâ wa kwikama kwe Yehova. (Mik. 31:23) Peleko, tala ti muntu wufwiri mu kanda, songeleno verse kwe bala beno mu Bibila zilendi ba bakisa mu telamana musamu wo na mu baka tidzunu.​—2 Kor. 1:3, 4; 2 Tim. 3:16.

8. Ntia lutwalusu lwe mu Lubambu 6:6, 7, Yozefe na Mari balanda?

⁸ Yozefe na Mari babakisa Yezu mu kwizi bâ muntu wa kula, mpe Nzambi wu katambulaka mu bungu ti balanda ntumunu za Yehova zitariri bibuti. (Tanga Lubambu 6:6, 7.) Yozefe na Mari batomo zolo Yehova, mpe kani diayôka mfunu dieri nawu, ni mu bakisa bala bawu mu zolo Yehova ntiana bawu.

9. Ntia nsololo za mfunu Yozefe na Mari basa?

⁹ Yozefe na Mari basola mu sambilaka Yehova ntangu zazansoni na bala bawu. Ntembe kâni, mbo beri kwendaka ku tukutakanu tumingu twatwansoni ku sinagoge ya Nazarete, mpe mbo beri diaka malaki ma Pake ku Yerusaleme. (Like 2:41; 4:16) Nzietolo zango za mu kanda mbo zeri ba hanaka bweso bwa longesa Yezu na mpangi zandi binsamu bia kanda dia Yehova. Kampe mu nzila, mbo beri kwe tari mbuka zi bazonzela mu matsonoko ma santu. Bu bayizi bâ na bala babingi, ka wabâ musamu wa fioti ko kwe Yozefe na Mari mu tatamana mu sa nsambululu ya Yehova tumingu twatwansoni. Kâ mbo beri bakaka ndandu bu beri silaka bo! Mu bungu ti mbo beri tûlaka nsambululu ya Yehova ha mbuka ya ntete, kanda diawu diatatamana mu bâ penepene na Yehova.

10. Ntia ndongosolo bibuti bie Bakristo bilendi baka mu tifwani tia Yozefe na Mari?

¹⁰ Ntia ndongosolo bibuti bitînaka Yehova bilendi baka mu tifwani tia Yozefe na Mari? Musamu wuyôkele mfunu, longeseno bala beno mu nzonzolo na mu ndiatulu ti Yehova Yandi lutomono zolo. Zabeno ti kabu dia dinene di lulendi ba hana ni mu ba longesa luzolo lwa Yehova. Mpe malongi ma mfunu ma lulendi ba longesa ni mu zaba bwe balendi tatamana mu  longokaka Bibila tumingu twatwansoni, mu sambilaka, mu kwendaka ku tukutakanu na mu samunaka. (1 Tim. 6:6) Wa matieleka, lufweti lungisa nsatu za tinsuni za bala beno. (1 Tim. 5:8) Kâ, bambukeno ti ka bimvwama biawu’â ko bibabakisa mu vuka mu nsuka ya nza ya Satana na mu kota mu nza ya môna, kâ ni tindiku tiawu na Yehova. *​—Ezk. 7:19; 1 Tim. 4:8.

11. (a) Bwe malongi me mu 1 Timote 6:17-19 mabakisilaka bibuti mu sa nsololo za mbote bu basansaka bala? (b) Ntia makani ma lendi bâ na kanda dieno, mpe ntia tusakumunu lulendi baka? (Tala kaku “ Ntia makani lulanda?”)

¹¹ Ntia mpila lutindusu bu tuta mona bibuti biabingi bie Bakristo bita sa nsololo za mbote mu bungu dia makanda mawu! Ntangu zazansoni mbo basaka nsambululu tintwari. Mbo bakwendaka ku tukutakanu twa tumingu na twa tunene. Mpe mbo basamunaka nsangu za mbote. Makanda makaka mbo makwe samunaka mu teritware zi balembo vulu samunaka. Bakaka mbo bakwe talaka Betele peleko mbo bakwe yikaka moko mu tisalu tia ntungulu ya Nzo za Nsambululu. Makanda masaka nsololo zo, mbo mahombesaka mbongo mpe musamu wa mpasi wubâka kwe bawu. Kâ Yehova mbo katomo ba sendaka mu misamu mio miamiansoni. (Tanga 1 Timote 6:17-19.) Bala bavulu kurilaka mu makanda ma mpila yo, mbo bavulu tatamanaka mu bâ na bifu bia mbote bi balongokaka, mpe ka bakwizi’â niongaka ko! *​—Bin. 10:22.

12. Nti Yezu kafweti sa bu kayizi kula?

¹² Tata die ku mazulu dia Yezu nsololo za mbote kwa kasaka, mpe bibuti biandi bia ha mutoto biabonga mpe nzengolo za ndwenga. Kâ, mu ntangu Yezu yi kakula wafweti bonga nzengolo yandi beni. (Nga. 6:5) Ntiana beto bansoni, timpwanza tia sola tieri nandi. Wabâ na lenda dia sola mu toko lungisa nsatu za yandi beni. Kâ, wasola mu simbirila tindiku tia mbote na Yehova. (Za 8:29) Bwe tifwani tia Yezu tilendi bakisila bantwenia ba lumbu ti?

13. Ntia nsololo ya mfunu Yezu kasa bu keri ntwenia?

¹³ Bu kabâ ntwenia, Yezu wasola mu tumamana bibuti biandi. Kani kabwe ka losa lutwalusu lwa bibuti biandi ko, ni bu sa ti misamu miamingi kazaba yôka bawu. Kâ, “watatamana mu ba tumamana.” (Like 2:51 NWT) Yezu mwana wa ntete weri, wuzololo tâ ti madema meri nandi mu kanda. Kampe mbo keri sarilaka ngolo zandi mu lungisa madema mandi. Wasarila mpe ngolo zazingi mu longoka tisalu tia tata’andi Yozefe ngatu kakipa kanda.

14. Bwe tuzabiri ti Yezu mulongoki wa mbote weri wa Zu dia Nzambi?

¹⁴ Kampe bibuti bia Yezu biamuzonzela  timangu tia mbutukulu’andi na misamu mia tâ mbazi mu bungu dia yandi. (Like 2:8-19, 25-38) Yezu ka sukisina mu mio mi bamutêla ko; yandi beni mpe walongoka matsonoko. Bwe tuzabiri ti Yezu mulongoki wa mbote weri wa Zu dia Nzambi? Mu bungu ti bu keri ntwenia, milongi mia ku Yerusaleme ‘miayituku mu bungu dia mayela mandi na mvutu zandi’ (Like 2:46, 47) Mpe bu keri kwa na mvula 12, Yezu watizabila ti Yehova ni Tata’andi.​—Like 2:42, 43, 49.

15. Bwe Yezu kasongela ti wasola mu sarila luzolo lwa Yehova?

¹⁵ Mu ntangu Yezu yi kalongoka mio mieri mu kekoloko Yehova, wasola mu sarila luzolo lwa Yehova. (Za 6:38) Wazaba ti bantu babingi baketi mu yina. Ni bu sa ti keri’â zolo ko ti misamu mia mpila yo miatula, wasola mu tumamana Yehova. Yezu bu kabatusu mu muvu wa 29 M.B., tima tieri tia mfunu kwe yandi ni mu sarila luzolo lwa Yehova. (Ebr. 10:5-7) Bu keri fwaka ha poto dia matimuna, watatamana mu nzengolo’andi ya sarila luzolo lwa Tata’andi.​—Za 19:30.

16. Bala ntia malongi balendi longoka mu tifwani tia Yezu?

¹⁶ Tumamana bibuti biaku. Ntiana Yozefe na Mari, bibuti biaku bantu ba masumu bena. Kâ, Yehova wabahana dema dia ku kengerela, dia ku kubika na dia ku twarisa. Tala ti wirikiri malongi mawu mpe zitisi lutumu lwawu, misamu miamiansoni mbo mibâ mia mbote mu bungu dia nge.​—Efz. 6:1-4.

17. Tintwari na Yoswa 24:15, ntia nzengolo bantwenia bafweti bonga?

¹⁷ Sola nani sarila. Fweti lenda mu bangula kwe nge beni ti Yehova ni nani, luzolo lwandi ni lwe mpe bwe lendi lwasarila mu luzingu lwaku. (Rom. 12:2) Buna mbo bâ na lenda dia bonga nzengolo yiyôkele mfunu mu luzingu lwaku, nzengolo ya sarila Yehova. (Tanga Yoswa 24:15; Ekl. 12:1) Tala ti tatamane mu landa programe ya ntangulu na ya ndongokolo ya Bibila, luzolo lwaku mu Yehova mbo lukula mpe timinu tiaku mbo tikwizi tomo bâ ngolo.

18. Ntia nsololo bantwenia bafweti sa, mpe ntia ndandu babaka?

¹⁸ Sola mu tûla luzolo lwa Yehova ha mbuka ya ntete mu luzingu lwaku. Nza ya Satana mbo yikanisinaka ti wamana sarila lenda diaku mu bungu dia bubote bwa nge beni, mbo kwizi bâ na nsayi. Kâ, tuzebi ti bô balandaka kwa makani ma tinsuni mbo ‘batitsokotaka mpasi zazingi.’ (1 Tim. 6:9, 10 NWT) Kâ, tala ti wirikiri  Yehova mpe solele mu tûla luzolo lwandi ha mbuka ya ntete mu luzingu lwaku, mbo bâ lenda mpe “mbo sarila na ndwenga.”​—Yos. 1:8.

19. Ngano bibuti nti bifweti bambukilaka moyo?

¹⁹ Bibuti, sarileno ngolo zeno zazansoni mu bakisa bala beno ngatu basarila Yehova. Sikirilakeno Yehova, mpe mbo kalubakisa mu sa nsololo za ndwenga. (Bin. 3:5, 6) Bambukakeno ti mbo lusobesa bala beno mu mio mi lutâka kâ nsungula mu mio mi lusaka. Buna, bongeno nzengolo zibakisa bala beno ngatu Yehova kabatambula.

20. Ngano bantwenia ntia tusakumunu babaka bamana sola mu sarila Yehova?

²⁰ Bantwenia, bibuti bieno bilendi lu bakisa mu sa nsololo za ndwenga mu luzingu lweno. Kâ, lufweti sa nsololo zo za mbote ngatu Yehova kalutambula. Buna landeno tifwani tia Yezu, mpe soleno mu sarila Tata’eno dia luzolo die ku mazulu. Lwamana sila bo, mbo lubâ na luzingu lwa nsayi bwawu bu. (1 Tim. 4:16) Mpe mu bilumbu bita kwiza, mbo lutomo bâ na luzingu lwa nsayi!