1. Ndipangadika kayi didi ditambe makuabu onso didi muntu yonso mua kuangata?

MISANGU ya bungi, mapangadika atu baledi bangata atu alenga nsombelu wa bana babu munkatshi mua matuku a bungi. Bobu bangate mapangadika mabi, badi mua kukebela bana babu ntatu. Kadi bobu bangate mapangadika mimpe, badi bambuluisha bana babu bua kupetabu nsombelu wa disanka. Kadi bana badi ne bua kuangata pabu mapangadika mimpe. Dipangadika didi ditambe makuabu onso didi muntu yonso mua kuangata ndia kuenzela Yehowa Tatu wetu wa mu diulu muena dinanga mudimu.​—Mis. 73:28.

2. Mmapangadika kayi mimpe avua Yezu ne baledi bende bangate?

² Baledi ba Yezu bavua badisuike bua kuambuluisha bana babu bua kuenzela Yehowa mudimu, ne mapangadika avuabu bangate avua aleja ne: kuenzela Nzambi mudimu ke tshipatshila tshinene tshivuabu natshi. (Luka 2:40, 41, 52) Yezu wakangata pende mapangadika mimpe avua mamuambuluishe bua kukumbaja mudimu uvuaye nawu mu malu avua Yehowa mulongolole. (Mat. 4:1-10) Pakakola Yezu, wakalua muntu muimpe, uvua ne lulamatu, ne uvua ne dikima. Muledi wetu yonso udi utshina Nzambi eu udi mua kudiumvua ne kuikala ne disanka yeye ne muana wa mushindu eu.

3. Nnkonko kayi ituandamuna mu tshiena-bualu etshi?

³ Mu tshiena-bualu etshi, netuandamune nkonko eyi: Mmapangadika kayi mimpe avua Yehowa muangate bua Yezu? Mapangadika avua baledi ba Yezu bangate adi mua kulongesha baledi bena Kristo tshinyi? Kadi mapangadika avua Yezu muangate adi mua kulongesha bansonga tshinyi?

4. Ndipangadika kayi dia mushinga divua Yehowa muangate bua Muanende?

⁴ Yehowa wakasunguila Yezu baledi bimpe ba dikema. (Mat. 1:18-23; Luka 1:26-38) Mêyi avua Mariya muambe ne muoyo mujima adi mu Bible adi aleja muvuaye munange Yehowa ne Dîyi diende bikole. (Luka 1:46-55) Nansha Jozefe pende, mushindu uvuaye mutumikile tshivua Yehowa mumuambile udi uleja ne: uvua mumunange ne uvua musue kumusankisha.​—Mat. 1:24.

5-6. Yehowa kavua mukube Muanende ku ntatu kayi?

⁵ Mona ne: Yehowa kavua musunguile Yezu baledi ba kantu ku bianza to. Mulambu uvua Jozefe ne Mariya bafile pakavuabu balele Yezu udi uleja ne: bavua bamutatshi wa yombo. (Luka 2:24) Jozefe uvua mua kuikala muase kazubu kavuaye wenzela mudimu wende wa mabaya lua kuende kumbelu mu Nazaleta. Bu muakaluabu kulela bana muanda mutekete anyi kupita apu, bavua mua kuikala kabayi ne makuta anyi bintu bia bungi to.​—Mat. 13:55, 56.

⁶ Yehowa wakakuba Yezu ku imue njiwu, kadi kakamukuba ku ntatu yonso to. (Mat. 2:13-15) Tshilejilu, Yezu uvua ne balela bende bavua kabayi bamuitabuja to. Elabi meji muvuabi mua kuikala bitonde Yezu bua muvua bamue bana babu ba tatuende ne mamuende kabayi kumpala bitaba ne: uvua Masiya. (Mâko 3:21; Yone 7:5) Pamuapa Yezu uvua kabidi mupete kanyinganyinga bua lufu lua tatuende mudishi Jozefe. Lufu lua Jozefe luvua mua kuikala luenze bua Yezu, bu muvuaye muanabute, angate muaba wa tatuende bua kudiisha dîku diabu. (Mâko 6:3) Pakakolaye, wakalonga mua kuambula bujitu bua dîku diabu. Pamuapa uvua wenza mudimu mukole bua kudiisha bena mu dîku diabu. Nunku yeye nkayende wakalabula ditshioka ditu muntu umvua yeye mumane kuenza mudimu dituku dijima.

7. a) Nnkonko kayi yambuluisha badi baselangane mua kukoleshabu bana bimpe? b) Mmunyi mudi Nsumuinu 2:1-6 mua kuambuluisha baledi bua kulongesha bana babu?

⁷ Nuenu baselangane ne nukeba kulela bana, diebejayi ne: ‘Bu mudi muoyo wa muana ne mushinga, tudi bantu badi ne budipuekeshi ne banange Yehowa badiye mua kusungula bua kutabalela muana waledibua anyi?’ (Mis. 127:3, 4) Biwikale ukadi mulele, diebeja ne: ‘Ntu ndongesha bana banyi bua kuangata dienza mudimu mukole ne mushinga anyi?’ (Muam. 3:12, 13) ‘Ntu ngenza muanyi muonso bua kukuba bana banyi ku njiwu idibu mua kutuilangana nayi mu  bulongolodi bua Satana ebu anyi?’ (Nsu. 22:3) Kuena mua kukuba bana bebe ku ntatu yonso idibu mua kutuilangana nayi to. Kuenza nanku nkutapa nsanga ne tshielele. Kadi wewe utungunuka ne kubalongesha ne dinanga dionso mudibu mua kueyemena mibelu idi mu Bible, neubalongolole bua bamanye tshia kuenza bua ntatu yabakuata mu nsombelu. (Bala Nsumuinu 2:1-6.) Tshilejilu, mulela wenu yeye mulekele kuenzela Yehowa mudimu, longesha bana bebe ne Bible bamone bua tshinyi bidi ne mushinga bua kushala balamate Yehowa. (Mis. 31:23) Nuenu bafuishe, leja bana bebe mvese ya mu Bible idi mua kubambuluisha bua kutantamena kanyinganyinga ka lufu ne kupeta ditalala.​—2 Kol. 1:3, 4; 2 Tim. 3:16.

8. Bilondeshile Dutelonome 6:6, 7, ntshinyi tshivua Jozefe ne Mariya ne bua kuenza?

⁸ Jozefe ne Mariya bakambuluisha Yezu pavuaye wenda ukola bua Nzambi amuanyishe bualu bavua balonda mibelu itu Yehowa upesha baledi. (Bala Dutelonome 6:6, 7.) Jozefe ne Mariya bavua banange Yehowa bikole, ne tshipatshila tshiabu tshinene tshivua tshia kukankamija bana babu bua bamunange pabu nanku.

9. Mmapangadika kayi a mushinga avua Jozefe ne Mariya bangate?

⁹ Jozefe ne Mariya bakangata dipangadika dia kuikala kutendelela Yehowa pamue ne bana babu. Kakuyi mpata, bavua baya mu bisangilu mu nsunagoga wa mu Nazaleta lumingu luonso, ne baya kabidi mu Pasaka wa ku tshidimu ku Yelushalema. (Luka 2:41; 4:16) Bavua mua kuikala balongesha Yezu ne bakunyi bende malu a bantu ba Yehowa ba kale pavuabu mu ngendu ya ku Yelushalema ayi ne pamuapa bapitshila miaba idibu batele mu Bible. Pavua dîku dienda divula, bivua mua kuikala bibange kutatshisha Jozefe ne Mariya bua kulama tshibidilu tshia kutendelela Yehowa. Kadi udi mumanye masanka akapetabu anyi? Bu muvuabu bateke ntendelelu wa Yehowa pa muaba wa kumpala, dîku diabu diakashala pabuipi ne Yehowa.

10. Tshilejilu tshia Jozefe ne Mariya tshidi mua kulongesha baledi tshinyi?

¹⁰ Tshilejilu tshia Jozefe ne Mariya tshidi mua kulongesha baledi badi batshina Nzambi tshinyi? Bualu bua mushinga budi ne: ikala uleja bana bebe mu mêyi ne mu bienzedi muudi munange Yehowa bikole. Ikala mumanye ne: tshintu tshitambe bunene tshiudi mua kubapesha nkubambuluisha  bua banange Yehowa. Bualu bukuabu bua mushinga buudi mua kuenza nkubalongesha mua kuikala ne tshibidilu tshia kudilongela Bible, kusambila, kuya mu bisangilu, ne kuya mu buambi. (1 Tim. 6:6) Mu bulelela, udi ne bua kupesha bana bebe bintu bia ku mubidi bidibu nabi dijinga. (1 Tim. 5:8) Kadi ikala mumanye ne: bulunda budi bana bebe badie ne Yehowa ke buabambuluisha bua kupanduka ku nshikidilu wa bulongolodi bua Satana ne kubuela mu bulongolodi bupiabupia bua Nzambi, ki mbintu bidibu nabi to *.​—Yeh. 7:19; 1 Tim. 4:8.

11. a) Mmunyi mudi mubelu udi mu 1 Timote 6:17-19 wambuluisha baledi bua kuangata mapangadika mimpe padibu bakolesha bana babu? b) Mbipatshila kayi bidi dîku diebe mua kudifundila? Mmasanka kayi adidi mua kupeta bua bipatshila abi? (Tangila kazubu ka “ Mbipatshila kayi biudi mua kudifundila?”)

¹¹ Ndisanka kayipu dia kumona baledi bena Kristo ba bungi bangatshila bana babu mapangadika mimpe adi abasemeja pabuipi ne Yehowa! Badi batungunuka ne kumutendelela pamue. Badi babuela nabu mu bisangilu ne mu mpungilu. Badi kabidi bayisha pamue. Mêku makuabu mmafike too ne ku diya kuyisha mu teritware mutubu bayisha ku mpukampuka. Makuabu owu atu aya kukumbula nzubu ya Betele anyi ambuluisha mu mudimu wa luibaku. Mêku atu angata mapangadika aa atu atula makuta ne kabitu anu bipepele misangu yonso bua kupeta makuta au to. Kadi Yehowa neabafute ne tshianza tshilekelela bua dienza diabu dia nanku. (Bala 1 Timote 6:17-19.) Bana badibu bakoleshe mu mêku a nunku batu batamba kutungunuka pabu ne kuenza malu aa padibu bakola ne kabatu balua kunyingalala to! *​—Nsu. 10:22.

12. Ntshinyi tshivua Yezu ne bua kuenza pavuaye wende ukola?

¹² Yehowa Tatuende wa Yezu wa mu diulu utu wangata anu mapangadika mimpe, ne baledi ba Yezu ba pa buloba bavua bangata pabu mapangadika mimpe. Kadi pavua Yezu wenda ukola, uvua pende ne bua kudiangatshila mapangadika. (Gal. 6:5) Uvua pende ne budikadidi bua kudisunguila malu anu mutudi petu nabu emu. Uvua mua kuikala musungule bua kuanji kukeba anu disanka diende kumpala. Kakenza nanku to, wakasungula bua kulama malanda mimpe ne Yehowa. (Yone 8:29) Nuenu bansonga, tshilejilu tshia Yezu etshi tshidi mua kunulongesha tshinyi lelu?

13. Patshivua Yezu muana, wakadisuika bua kuenza tshinyi?

¹³ Patshivua Yezu muana, wakadisuika bua kutumikila baledi bende. Pavua baledi bende bamuludika kavua utuuna, wela meji ne: yeye uvua mumanye malu a bungi mubapite to. Kadi “wakatungunuka ne kubakokela.” (Luka 2:51)  Kakuyi mpata, bu muvua Yezu muanabute, kavua uteka bilele mu midimu ivua pa makaya ende to. Wakenza muende muonso bua kulongela mudimu wa bianza kudi tatuende mudiishi bua kutua dîku diabu tshianza.

14. Ntshinyi tshidi tshituleja ne: Yezu uvua mulongi muimpe wa Dîyi dia Nzambi?

¹⁴ Baledi ba Yezu bavua pamuapa bamuambile bua diledibua diende dia mu tshishima ne tshivua batuadi ba mukenji ba Nzambi bambe bua bualu buende. (Luka 2:8-19, 25-38) Yezu kavua umona ne: bivuabu bamuambila abi bivua bikumbane to; yeye nkayende uvua kabidi udilongela Mifundu. Ntshinyi tshidi tshituleja ne: Yezu uvua mulongi muimpe wa Dîyi dia Nzambi? Patshivuaye muana, balongeshi ba mu Yelushalema “bavua anu bakema bikole bua lungenyi luende ne mandamuna ende.” (Luka 2:46, 47) Patshivuaye anu ne bidimu 12 tshianana, ukavua mudijadikile yeye nkayende ne: Yehowa uvua Tatuende.​—Luka 2:42, 43, 49.

15. Mmunyi muvua Yezu muleje ne: uvua mudisuike bua kuenza disua dia Yehowa?

¹⁵ Pakamanya Yezu mudimu uvuaye nawu mu malu adi Yehowa mulongolole, wakawitaba. (Yone 6:38) Uvua mumanye ne: bavua ne bua kumukina kudi bantu ba bungi, ne bualu abu buvua ne bua kuikala bumutonde bikole. Nansha nanku, wakadisuika bua kukokela Yehowa. Pakabatijibuaye mu 29, tshipatshila tshiende tshinene tshivua tshia kuenza disua dia Yehowa. (Eb. 10:5-7) Nansha pakavuaye ukuula muoyo pa mutshi wa makenga, kakateketa bua kuenza disua dia Tatuende to.​—Yone 19:30.

16. Leja dimue dia ku malongesha adi tshilejilu tshia Yezu mua kulongesha bana?

¹⁶ Ikala utumikila baledi bebe. Baledi bebe mbapange pabu bupuangane anu bu Jozefe ne Mariya. Kadi Yehowa mmubapeshe mudimu wa kukulama, kukulongesha, ne kukuludika. Wewe utumikila mibelu yabu ne witaba bukokeshi buabu, ‘malu ebe neende bimpe.’​—Ef. 6:1-4.

17. Bilondeshile Yoshua 24:15, ndipangadika kayi didi bansonga ne bua kudiangatshila?

¹⁷ Sungula uwenzele mudimu. Udi ne bua kudijadikila wewe nkayebe tshidi Yehowa, kumanya tshidi disua diende, ne muudi mua kuenza disua diende adi mu nsombelu webe. (Lomo 12:2) Nunku newikale mukumbane bua kuangata dipangadika ditambe bunene mu nsombelu webe, mmumue ne: dia kuenzela Yehowa mudimu. (Bala Yoshua 24:15; Muam. 12:1) Wewe mulame tshibidilu tshiebe tshia kubala ne kudilongela Bible, dinanga diudi munange nadi Yehowa  neditungunuke ne kuvula, ditabuja diebe kudiye nedikole padi bikole.

18. Ndipangadika kayi didi bansonga ne bua kuangata? Ntshinyi tshiapetabu?

¹⁸ Sungula bua kuteka disua dia Yehowa pa muaba wa kumpala mu nsombelu webe. Mu bulongolodi bua Satana mutu lungenyi lua ne: muntu yeye mukuate mudimu ne mamanya ende bua kukeba diakalenga diende yeye, neikale ne disanka. Kadi tudi bamanye ne: bantu badi baditue anu mu dikeba bintu bia ku mubidi badi badisunsula “mubidi mujima ne tunyinganyinga tua bungi.” (1 Tim. 6:9, 10) Kadi wewe uteleja Yehowa ne usungula bua kuteka disua diende pa muaba wa kumpala, neutute diakalenge ne “newenze malu ne meji.”​—Yosh. 1:8.

19. Ntshinyi tshidi baledi ne bua kumanya?

¹⁹ Baledi wa yaya, enzayi muenu muonso bua kuambuluisha bana benu bua benzele Yehowa mudimu. Mueyemenayi, yeye neanuambuluishe bua kuangata mapangadika mimpe. (Nsu. 3:5, 6) Ikalayi bamanye ne: tshitu bana benu batamba kulonda ntshinudi nuenza, ki ntshinudi nuamba to. Nanku ikalayi nuangata mapangadika adi ambuluisha bana benu bua Yehowa abanyishe.

20. Mmasanka kayi apeta bansonga bobu basungule bua kuenzela Yehowa mudimu?

²⁰ Bansonga wetu, baledi benu badi mua kunuambuluisha bua nuenu kuangata mapangadika mimpe mu nsombelu wenu. Kadi nuenu ke badi mua kuenza bua Nzambi anuanyishe. Nanku idikijayi Yezu ne sungulayi bua kuenzela Tatu wenu wa mu diulu muena dinanga mudimu. Nuenu benze nunku, nenuikale ne bia bungi bia kuenza, nenuikale ne nsombelu wa nsongo ne wa disanka ku mpindieu. (1 Tim. 4:16) Mu matuku atshilualua nenupete nsombelu muimpe wa katshia, unutu kanuyi banji kupeta to!