1. Chumanyi chabadika chatela kufuukulayi muntu?

KAKAVULU, yuma yafuukulañawu anvwali yinateli kuyikwasha anyanawu muchihandilu chawu hela nehi. Neyi anvwali afuukula mwaluwa, chinateli kuleta kukala muchihandilu chawanyanawu. Ilaña neyi afuukula mwamuwahi, chikaletesha anyanawu kwikala nachihandilu chachiwahi nawa chamuzañalu. Hela chochu, anyana niwena atela kufuukulahu chiwahi. Chuma chabadika chatela kufuukulahu muntu, hikumukalakela Tata yetu wamwiwulu wukweti kukeña, Yehova.—Mas. 73:28.

2. Chumanyi chachiwahi chafuukwiliyi Yesu nianvwali jindi?

² Anvwali jaYesu akeñeleña kukwasha anyanawu kulonda amukalakeleña Yehova, nawa chuma chafuukwiliwu chamwekesheli nawu kumukalakela dichuma chadiña chalema muchihandilu chawu. (Luka 2:40, 41, 52) Yesu niyena wafuukwilihu chuma chachiwahi chamukwashili kushikija nkeñelu yaYehova. (Mat. 4:1-10) Yesu chakulileñayi wekalili nachilwilu chaluwi, kashinshi nawa wahamuka nawa nvwali wamutiyaña Nzambi woma watiyaña kuwaha kwikala namwana wamuchidi iwu.

3. Malwihwinyi itukuhanjekahu muchinu chibaaba?

³ Muchinu chibaaba tukuhanjeka hanawa malwihu: Yumanyi yayiwahi yafuukwiliyi Yehova kutalisha hadi Yesu? Anvwali akwaKristu atela kudizilaku kwodi kuyuma yafuukwiliwu anvwali jaYesu? Nawa yumanyi yatela kudizilaku atwansi akwaKristu kuyuma yafuukwiliyi Yesu?

4. Yehova watondeli anvwali amuchidinyi mwavwalikilili Mwanindi?

⁴ Yehova wamutondeleli Yesu anvwali amawahi. (Mat. 1:18-23; Luka 1:26-38) Mazu aMariya ahosheliyi chakufuma hamuchima asonekawu muBayibolu amwekeshaña nawu wamukeñeli Yehova nankashi niIzu dindi. (Luka 1:46-55) Nawa Yosefu chovwahililiyi mwamulejeliwu kudi Yehova chamwekeshaña nawu wamukeñeli Nzambi nawa wakeñeleña kumutiyisha kuwaha.—Mat. 1:24.

5-6. Yehova wetejeli Mwanindi kumona yumanyi?

⁵ Ilaña Yehova hamutondeleli Yesu anvwali akweti mahetaku. Muloña mulambu walambwiliwu aYosefu naMariya mpinji yavwalikiliyi Yesu wamwekeshaña nawu adiña atuzweñi. (Luka 2:24) Hadaha Yosefu wadiña nakadiluña kwakwihi netala dindi muNazareta mwasoñeleleñayi. Chinamwekani neyi hiyadiña namali amavuluku chineli muchisaka mwadiña anyana kubadika 7.—Mat. 13:55, 56.

⁶ Yehova wamukiñili Yesu kukukala kumu, ilaña hamukiñili Mwanindi kukukala kukwawuku. (Mat. 2:13-15) Chakutalilahu, wadiña nawantaña jindi abulili kumukuhwelela. Chatela chamuneñesheli Yesu muloña antaña jindi hakusambila amukuhweleli wanyi nawu diyi Mesiya. (Maku 3:21; Yow. 7:5) Chinamwekani neyi Yesu waneñeli cheñi chelili tata yindi Yosefu yafwi. Chineli Yosefu wafwili, hadaha Yesu diyi wadiña nakwakamena chisaka chineli diyi wadiña mukulumpi hadi anyana ejima. (Maku 6:3) Yesu chakuliliyi, welukili chakwakamena chisaka. Hadaha wazatileña nañovu kulonda yakameni chisaka. Dichi welukili chichatiyakanaña neyi wunazeyi hanyima yakuzata ifuku damukuma.

7. (a) Malwihwinyi atela kudihulawu adisumbula hakukulisha anyanawu? (b) Yishimu 2:1-6 yinateli kuyikwasha ñahi anvwali kudizisha anyanawu?

⁷ Neyi mwadisumbula nawa munakufwila kwikala nanyana, dihulenu nenu: ‘Komana twadizoza nawa twamukeña Yehova niIzu dindi chakwila nateli kututonda nindi twakameni mwana wukuvwalika?’ (Mas. 127:3, 4) Neyi mudi dehi anvwali dihulenu nenu: ‘Komana nadizishaña anyanami chichalemena kuzata nañovu?’ (Mukwa. 3:12, 13) ‘Komana nazataña nañovu kukiña anyanami kuwubanji wakumujimba nikuyilwilu yatama yinateli kuyimwekena mukanu kaayi kaSatana?’  (Yish. 22:3) Himunateli kukiña anyanenu kuwubanji wejima wunateli kumonawuku. Hichuma chimukubula kutwesha kwila. Ilaña munateli kuyikwasha kudiloñeshela chadimu kukukala kunateli kuyimwekena muchihandilu chawu kuhitila mukuyidizisha chakuzatisha kufumba kudi Mwizu daNzambi. (Tañenu Yishimu 2:1-6.) Chakutalilahu, neyi ntaña yenu yaleka kumukalakela Yehova, kwashenu anyanenu kuzatisha Izu daNzambi kulonda eluki chichalemena kutwalekahu kwikala washinshika kudi Yehova. (Mas. 31:23) Hela neyi ntaña yenu nafwi, yikwashenu anyanenu chakuzatisha Izu daNzambi kulonda atweshi kuumika nachineñi nawa ekali nakuwunda.—2 Kor. 1:3, 4; 2 Tim. 3:16.

8. Kwesekeja naKuhituluka 6:6, 7, chumanyi cheliliwu aYosefu naMariya?

⁸ Anvwali jaYesu amukwashili kwikala iyala wakeñewa kudi Yehova muloña wakwila anvwali jindi adiña nakumwovwahila Yehova. (Tañenu Kuhituluka 6:6, 7.) Yosefu naMariya amukeñeli nankashi Yehova nawa chuma chalema chafwilileñawu hikukolesha anyanawu kumukeña Yehova.

9. Yumanyi yayiwahi yatondeliwu aYosefu naMariya?

⁹ Yosefu naMariya atondelihu kudifukula kudi Yehova hamu nichisaka chawu mpinji yejima. Chakadi nikujina, ayileña mulungu nimulungu nakupompa kusinagogi yamuNazareta, kushilahu nikuya kuChipandakenu muYerusalema chaaka nichaaka. (Luka 2:41; 4:16) Hadaha hampinji yayileñawu kuYerusalema neyi chisaka, diyi mpinji yamudizishileñawu Yesu nianyiki jindi nsañu yakunyaaka yahosha hadi antu jaYehova, hekwawu mpinji yayileñawu adiña ninakuhempula maluña atenawu muNsona. Chekaliliwu nanyana yayivulu, chinamwekani neyi chayipeleleli wanyi aYosefu naMariya kudifukula kudi Yehova mpinji yejima. Ilaña talenu yuma yayiwahi yafuminimu. Chineli atwamijiliku kudifukula kudi Yehova, chisaka chawu chadiña chakola kuspiritu.

10. Yumanyi yatela kudizilawu anvwali akwaKristu kudi Yosefu naMariya?

¹⁰ Anvwali amutiyaña Nzambi woma anateli kudizilaku kwodi kudi Yosefu naMariya? Chuma chasweja kulema, mwekeshenuña kudi anyanenu nenu mwamukeña Yehova kuhitila  munhoshelu nimuyilwilu yenu. Ilukenu nenu chawana chasweja kulema chimunateli kuyinka anyanenu hikuyikwasha kumukeña Yehova. Nawa chuma chimu chidi hakachi kayuma yasweja kulema yimunateli kuyidizisha anyanenu hikuyikwasha kwikala nampinji yakudiza Bayibolu, kulomba nikuya nakupompa mpinji yejima nikushimwina. (1 Tim. 6:6) Mwatela kuyikeñela anyanenu yuma yakumujimba. (1 Tim. 5:8) Ilaña anukenu nenu wubwambu wakola wukwetiwu anyanenu naYehova diwu wukayikwasha hakukuma kwakaayi kaSatana nikwiñila mwituña daNzambi dadiha, bayi neyi yuma yakumujimbaku. *—Ezek. 7:19; 1 Tim. 4:8.

11. (a) Kufumba kudi ha 1 Timotewu 6:17-19 kunateli kuyikwasha ñahi anvwali kufuukula chiwahi neyi anakukulisha anyanawu? (b) Chisaka chenu chinateli kufuukulahu kwiladi, nawa yumanyi yayiwahi yinateli kufumamu? (Talenu chikasha chinakwila nawu “ Yumanyi Yimunakufwila Kwila?”)

¹¹ Twazañalalaña hakumona anvwali akwaKristu amavulu anakukwasha anyanawu kuswina kwakwihi naYehova. Adifukulaña hamu nawanyanawu mpinji yejima. Ayaña kukupompa kwachipompelu nikukupompa kweneni. Nawa ashimwinaña nsañu yayiwahi. Yisaka yikwawu yayaña nakushimwina mumaluña abulawu dehi kuya nakushimwinawu. Amakwawu ayaña nakuhempula haBeteli hela kuya nakuzatila kunakutuñawu. Yisaka yafuukulaña kwila yumiyi hiyekalaña namali amavuluku nawa chayikalilaña mpinji yikwawu. Ilaña yuma yayiwahi yafumañamu yayizañaleshaña. (Tañenu 1 Timotewu 6:17-19.) Anyana akulilaña muyisaka yamuchidiwu atwalekañahu kwila yuma yayiwahi neyi anakuli nawa ekalaña namuzañalu hakuyikulisha muniyi njila. *—Yish. 10:22.

12. Yumanyi yelileñayi Yesu chakuliliyi?

¹² Tata yaYesu wamwiwulu wafuukulaña mwamuwahi mpinji yejima nawa anvwali jindi ahamaseki niwena afuukwili mwamuwahi. Hela chochu, Yesu chakuliliyi wafuukwilihu yomweni yuma yatela kwilayi. (Ñal. 6:5) Niyena wadiña nawuswa wakudifuukwila neyi wutukweti wejima wetu. Wadi kutondahu kwila yuma yakumutiyisha kuwaha bayi nkeñelu yaNzambiku. Ilaña wafuukwilihu kutwalekahu kwikala nawubwambu wawuwahi naYehova. (Yow. 8:29) Yuma yafuukwiliyi yinateli kuyikwasha ñahi atwansi makonu?

13. Yesu wafukwilihu ñahi henohu wuchidi kansi?

¹³ Yesu hadiñayi kansi wadiña nakuyovwahila anvwali jindi. Hadikañileña nanshimbi jawanvwali jindi muloña nindi welukili jajivulu kubadika wenaku. Ilaña “watwalekelihu kuyovwahila.” (Luka 2:51) Chineli Yesu diyi wadiña mukulumpi hadi anyana ejima, chakadi nikujina wazatili mudimu windi kwesekeja  nachakeñekaña. Wazatili nañovu hakwila nawu yadizi mudimu wakusoña kudi tata yindi Yosefu kulonda chimukwasheñaku kuhemba chisaka.

14. Tuneluki ñahi netu Yesu wadizileña Izu daNzambi?

¹⁴ Hadaha Yesu amulejeli kudi anvwali jindi kutalisha hansañu yakuvwalika kwindi nichahosheliwu antemesha jaNzambi kutalisha hadi yena. (Luka 2:8-19, 25-38) Yesu hakuminini dakwiluka nsañu yamulejeliwu hohuku, ilaña wadizili cheñi muNyikanda. Tuneluki ñahi netu Yesu wadizileña Izu daNzambi? Muloña hachidiñayi kansi, antañishi muYerusalema “ahayamini nankashi nañakwilu yindi nikashinshi kakutiyishisha yuma chiwahi.” (Luka 2:46, 47) Nawa hadiñayi nayaaka 12, Yesu wamwekesheli nindi Yehova diyi Tata yindi.—Luka 2:42, 43, 49.

15. Yesu wamwekesheli ñahi nindi wafuukwilihu kwila nkeñelu yaYehova?

¹⁵ Yesu chelukiliyi yuma yakeñeleñayi Yehova nindi yeli, wafuukwilihu kwila nkeñelu yaYehova. (Yow. 6:38) Welukili nindi akumuhela kudi antu amavulu. Hela chakwila hakeñeleña chuma chamuchidiwu kumumwekenaku, wafuukwilihu kumwovwahila Yehova. Chelili Yesu yapapatishewi mu 29 C.E.,washili muchima hakwila nkeñelu yaYehova muwumi windi. (Heb. 10:5-7) Nihampinji yafwileñayi hamutondu wakuyandishila, Yesu watwalekelihu kwila nkeñelu yaTata yindi.—Yow. 19:30.

16. Chumanyi chatela kudizilawu atwansi kudi Yesu?

¹⁶ Ovwahilenuña anvwali jenu. Kufwana Yosefu naMariya, anvwali jenu awanina wanyi. Hela chochu, Yehova wayinka anvwali jenu mudimu wakuyikiña, kuyidizisha nikuyilombola. Neyi mutiyilila munakuyilejawu nawa mulemesha wuswa wukwetiwu, yuma ‘yikuyiwahilaña.’—Efwe. 6:1-4.

17. Kwesekeja naYoshuwa 24:15, chumanyi chatela kufuukulawu atwansi?

¹⁷ Tondenu muntu imukukalakelaña. Mwatela kwiluka chekalayi Yehova, kwiluka nkeñelu yindi nichimunateli kuyila muchihandilu chenu. (Rom. 12:2) Kuhiñahu mukufuukulahu chuma chasweja kulema muwumi wenu, kumukalakela Yehova. (Tañenu Yoshuwa 24:15; Mukwa. 12:1) Neyi mutañaña Bayibolu mpinji yejima nawa mudizaña, mukusweja kumukeña Yehova nawa chikuhwelelu chenu chikukola.

18. Chumanyi chatela kufuukulawu atwansi, nawa yumanyi yinateli kufumamu?

 ¹⁸ Fuukulenuhu kwila nkeñelu yaYehova muchihandilu chenu. Antu amukaayi kaSatana ahoshaña nawu neyi wuzatisha chawana chiwukweti kwila jiwunakukeña, wukwikala namuzañalu. Ilaña tweluka netu antu ashaña maana hakwikala namaheta adipwikaña “nayihuñu yayivulu nzwa-a nikwishinadi.” (1 Tim. 6:9, 10) Hela chochu, neyi mumutiyilila Yehova nawa mufuukulahu kwila nkeñelu yindi, mukwikala nachihandilu chachiwahi nawa ‘mwakamona kuwaha.’—Yosh. 1:8.

19. Chumanyi chatela kwanukañawu anvwali?

¹⁹ Enu anvwali, zatenu nañovu kulonda mukwashi anyanenu amukalakeleña Yehova. Mushindamenenu nawa wukuyikwasha kufuukula chiwahi. (Yish. 3:5, 6) Ilukenu nenu anyana anateli kudizila yuma yayivulu kuyuma yimwelaña bayi yimwahoshañaku. Dichi ilenuña yuma yikayikwasha anyanenu kwikala amabwambu jaYehova.

20. Yumanyi yayiwahi yikufumamu neyi atwansi afuukulahu kumukalakela Yehova?

²⁰ Enu atwansi, anvwali jenu anateli kuyikwasha kufuukulahu chiwahi yuma yikayikwasha muchihandilu chenu. Ilaña chidi kudenu kufuukulahu chiwahi kulonda mumuzañalesheña Nzambi. Dichi mwimbujolenuña Yesu nawa fuukulenuhu kumukalakela Tata yenu wamwiwulu wukweti kukeña. Neyi mwila mwenimu, mukwikala nachihandilu chachiwahi nawa chamuzañalu. (1 Tim. 4:16) Nawa mukekala nachihandilu chamuzañalu kumbidi.