1. Miin thu tlûkna a siam theih azawnga ṭha ber chu eng nge ni?

NU LEH PATE duh thlanna siam chuan khua reiah an fate chungah nghawng a nei ṭhîn a. Duh thlanna ṭha lo an siam a nih chuan, chu chuan an fate chungah harsatnate a thlen thei a ni. Mahse, duh thlanna ṭha an siam erawh chuan, chu chuan nun hlimawm leh lungawithlâk tak nei tûrin hun remchâng ṭha ber a pe thei a ni. Ni e, naupangte pawhin thu tlûkna ṭha an siam a ngai a. Miin thu tlûkna a siam theih azawnga ṭha ber chu hmangaihna nei tak kan Pa vâna mi, Jehova rawngbâwl hi a ni.—Sâm 73:28.

2. Isua leh a nu leh pate chuan eng duh thlanna ṭha nge an siam?

² Isua nu leh pa chuan Jehova rawngbâwl tûra an fate ṭanpui chu an tum tlat a, an duh thlanna siam chuan, chu chu an nuna an thiltum ber a ni tih a târ lang. (Lk. 2:40, 41, 52) Isua pawhin Jehova thiltuma a chanvo hlen thei tûra ṭanpuitu duh thlanna ṭhate a siam a. (Mt. 4:1-10) Ani chu mi ngilnei tak, rinawm tak, leh huaisen tak nia lo ṭhang lianin, Pathian ṭihtu leh hmangaihtu nu leh pate tâna fapa chhuanawm tak leh hlimna thlentu a lo ni ta a ni.

3. He thuziakah hian eng zawhnate nge chhân a nih ang?

³ He thuziakah hian, hêng zawhnate hi chhân a ni ang: Jehova’n Isua tân eng duh thlanna ṭha nge a siam? Kristian nu leh pate’n Isua nu leh pate duh thlanna siam aṭangin eng nge an zir theih? Kristian ṭhalaite chuan Isua duh thlanna siam aṭangin eng nge an zir theih? tihte hi.

4. Jehova’n a Fapa tân eng duh thlanna pawimawh tak nge a siam?

⁴ Jehova chuan Isua tân nu leh pa ṭha ber a thlansak a. (Mt.  1:18-23; Lk. 1:26-38) Bible-a chhinchhiah thinlung taka Mari thusawite chuan Jehova leh a Thu, Bible a ngainatzia a târ lang a ni. (Lk. 1:46-55) Josefa’n Jehova kaihhruaina a chhân lêt dân chuan Pathian a ṭihin, tihlâwm a duh tih a târ lang bawk.—Mt. 1:24.

5-6. Jehova’n a Fapa chu eng thiltawn a neih nge a remtih?

⁵ Jehova’n Isua tân nu leh pa hausa tak a thlang lo hi chhinchhiah ang che. Isua pian hnua Josefa leh Mari thilhlan chuan an hausa lo tih a târ lang a. (Lk. 2:22-24) Josefa chuan Nazareth khuaa an in kiangah thingrem siamin ei a zawng niin a lang. A lo berah fa pasarih nei chhûngkaw hung tak an nih avângin samkhai takin an nung ngei ang.—Mt. 13:55, 56.

⁶ Jehova chuan Isua chu dinhmun hlauhawm ṭhenkhat lakah vênghim mah se, harsatna zawng zawng lakah erawh a vênghim lo. (Mt. 2:13-15) Entîr nân, Isua chuan amah ring lotu a chhûngte chu a hmachhawn a ngai a ni. A chhûngkaw zînga ṭhenkhatin Messia a ni tih a tîra an pawm duh loh avânga a lunghnual dân tûr chu han mitthla teh. (Mk. 3:21; Joh. 7:5) Chu bâkah, a pa hrawn Josefa chu thihnaah a chân a nih a rinawm bawk. Fa upa ber a nih angin, chutianga chânna avâng chuan an chhûngkaw eizawnna chu a kovah a tla ngei ang. (Mk. 6:3) A lo puitlin chhoh zêl chuan, an chhûngkaw tâna mawhphurhna lâk dân pawh a zir a ni. Chhûngkaw châwm tûrin a thawk rim hle ngei bawk ang. Chuvângin, a thiltawn aṭangin ni lênga hnathawh hahthlâk dân a hria a ni.

7. (a) Eng zawhnatein nge fate enkawl mêk nupate chu ṭanpui ang? (b) Thufingte 2:1-6-na chuan fate zirtîrnaah engtin nge min ṭanpui theih?

⁷ Nupui pasal nei a, fa neih i duh a nih chuan, heti hian inzâwt ang che: ‘Fate enkawl tûra Jehova mi thlan, inngaitlâwm tak leh thlarau lam thil ngai pawimawhtu Mari leh Josefa ang ka ni em?’ tiin. (Sâm 127:3, 4) Fa nei tawh i nih chuan, heti hian inzâwt ang che: ‘Ka fate chu taihmâkna hlutzia kan zirtîr em?’ (Thur. 3:12, 13) ‘Ka fate chu Setana khawvêla an hmachhawn mai theih tisa lam leh nungchang lama dinhmun hlauhawm lakah theih tâwp chhuahin ka vênghim em?’ tiin. (Thuf. 22:3) I fate chu an hmachawn mai theih dinhmun hlauhawm zawng zawng lakah i vênghim thei lo vang. Chu chu thil theih a ni lo. Mahse, anni chu Pathian  Thu, Bible-a thurâwn zawn chhuah dân zirtîrin, nuna an hmachhawn mai theihte atân zawi zawiin, hmangaihna nei takin i buaisaih thei a ni. (Thufingte 2:1-6 chhiar rawh.) Entîr nân, in chhûngte zînga tuemawin biakna dik a kalsan a nih chuan, i fate chu Pathian Thu, Bible aṭangin Jehova laka rinawm tlat a pawimawh chhan hre tûrin ṭanpui la. (Sâm 31:23) A nih loh leh, thihnaa hmangaih tak in chân a nih chuan, i fate chu tawrh dân thiam tûr leh rilrua thlamuanna nei tûrin Pathian Thu, Bible hmangin ṭanpui ang che.—2 Kor. 1:3, 4; 2 Tim. 3:16.

8. Josefa leh Mari’n Deuteronomy 6:6, 7-a eng kaihhruaina nge an zawm?

⁸ Isua nu leh pa chuan ani chu Pathian duhsakna dawnga seilian tûrin an ṭanpui a; nu leh pate tâna Jehova kaihhruainate chu an zâwm a ni. (Deuteronomy 6:6, 7 chhiar rawh.) Josefa leh Mari’n Jehova hmangaihna thûk tak an nei a, nuna an dah pawimawh ber chu chutiang hmangaihna nei tûra an fate ṭanpui hi a ni.

9. Josefa leh Mari’n eng duh thlanna pawimawh tak nge an siam?

⁹ Josefa leh Mari chuan chhûngkuaa thlarau lam thiltih nâna hun duan ṭha neih reng an tum a. Nazareth khuaa inkhâwmna inahte chuan chawlhkâr tin an inkhâwm ziah bâkah, kum tina Jerusalema neih Kalhlên Kût hmang tûrin kan kal ṭhîn tih a chiang a ni. (Lk. 2:41; 4:16) Anni chuan Isua leh a unaute chu Jehova mite chanchin zirtîr nân Jerusalema chhûngkuaa an zin hunte chu an hmang ṭangkai a, an zin kawngah chuan Bible-a târ lan hmun ṭhenkhat pawh an tlawh niin a lang. Fate an neih belh zêl chuan, Josefa leh Mari tân thlarau lam thiltih nâna hun duan ṭha neih reng chu a awlsam lo ngei ang. Mahse, malsâwmna an dawnte chu han ngaihtuah teh! An nunah Jehova biakna an dah pawimawh ber avângin, an chhûngkua chu thlarau lamah an chak a ni.

10. Kristian nu leh pate chuan Josefa leh Mari hnên aṭangin eng nge an zir theih?

¹⁰ Pathian ṭihtu nu leh pate’n Josefa leh Mari hnên aṭangin eng nge an zir theih? A pawimawh ber chu Jehova in hmangaih tak zet tih ṭawngkam leh thiltiha fate hriattîr hi a ni. I pêk theih azawnga thilpêk ṭha ber chu Jehova  hmangaih tûra ṭanpui hi a ni tih hre reng ang che. Chu bâkah, i zirtîr theih zir tûr pawimawh berte zînga pakhat chu inzirna te, ṭawngṭai te, inkhâwm te, leh rawngbâwlnaa tel tûra hun duan ṭha neih reng dân zirtîrte hi a ni bawk. (1 Tim. 6:6) Ni e, an tisa lam mamawhte chu i pêk a ngai ngei mai. (1 Tim. 5:8) Mahse, he khawvêl suaksual tak ata dam khaw chhuak a, Pathian khawvêl thara lût thei tûra ṭanpuitu tûr chu sum leh pai leh hausaknate ni lovin, Jehova nêna an inlaichhînna ṭha tak a ni tih hre reng ang che. *—Ezek. 7:19; 1 Tim. 4:8.

11. (a) Timothea thawn khat 6:17-19-a kan hmuh fuihna chuan engtin nge nu leh pate chu an fate enkawl seilennaah duh thlanna ṭha siam tûra a ṭanpui? (b) Chhûngkuate chuan eng thiltumte nge an neih mai theih a, chu chuan eng malsâwmnate nge a thlen theih? (“ Eng Thiltumte Nge I Neih Ang?” tih bâwm chu en rawh)

¹¹ Mahni chhûngkaw tâna thlarau lam dah pawimawh tûra duh thlanna ṭha siamtu Kristian nu leh pa tam tak hmuh chu a va thlamuanthlâk tak êm! Chhûngkuain Pathian an be tlâng ṭhîn a. Kohhran inkhâwmahte leh inkhâwmpuiahte pawh an tel tlâng bawk. Thlawhhma rawngbâwlnaah pawh an telho va. Chhûngkaw ṭhenkhat chuan thu hrilh ngai vak lohna hmunahte thu an hril thei hial a ni. Chhûngkaw dangte chuan Bethel-te tlawhin, Kingdam Hall saknaahte an ṭanpui a. Chutiang thiltihnaa inpe chhûngkuate chuan sum tam tak an sêngin, harsatna ṭhenkhat an hmachhawn pawh a ni thei. Mahse, malsâwmna an dawnte chuan thlarau lamah a tihausa hle a ni. (1 Timothea 6:17-19 chhiar rawh.) Chutiang chhûngkuaa seilian naupangte chuan zirtîrna ṭha an dawnte chu an nunpui chhunzawm tlângpui avângin inchhîrna an nei ngai lo! *—Thuf. 10:22.

12. A puitlin huna Isua tih ngai chu eng nge ni?

¹² Isua Pa, Pathian Jehova chuan duh thlanna ṭha a siam reng a, lei lama a nu leh pate pawhin thu tlûkna fingte an siam bawk. Mahse, a lo puitlin chhoh chuan, mahnia duh thlanna a siam a ngai a. (Gal. 6:5) Keimahni ang bawkin, ani pawhin zalên taka duh thlan theihna a nei a ni. A duh chuan, a mi mal duh zâwngte chu a nunah a dah hmasa ber thei a. Mahse, Jehova nêna inlaichînna ṭha neih reng chu a thlang zâwk a ni. (Joh. 8:29) Engtin nge a entawn tûr siam chuan tûn laia ṭhalaite chu a ṭanpui theih?

13. Isua chuan a naupan lai aṭangin eng duh thlanna pawimawh tak nge a siam?

¹³ A naupan lai aṭangin, Isua chuan lei lama a nu leh pate thu a âwih a. Anmahni aia hre zâwk nia inngaiin, an kaihhruaina chu a hnâwl ngai lo. Chu aiin, “an thu zâwmin a awm” reng zâwk a ni. (Lk. 2:51) Isua chuan fa upa ber a nihna chu a ngai pawimawh hle ngei ang.  Chhûngkaw châwmna kawnga a ṭanpui theih nân, a pa hrawn hnên aṭangin taima taka hnathawh dân a zir ngei bawk ang.

14. Isua chu Pathian Thu zirlai taima tak a ni tih engtin nge kan hriat theih?

¹⁴ Isua chu a nu leh pate’n mak danglam taka a lo pian dân leh Pathian vântirhkohte’n a chungchâng an sawite chu an hrilh ngei a rinawm. (Lk. 2:8-19, 25-38) Ani chu chûng a thu hriatahte chuan a lungawi mai lo va, amah ngeiin Pathian Thu, Bible a zir a ni. Isua chu Pathian Thu zirlai taima tak a ni tih engtin nge kan hriat theih? Naupang mai a nih lai aṭangin, Jerusalema zirtîrtute chuan “a hriatzia leh a chhânzia chu mak an ti hle a.” (Lk. 2:46, 47) Kum 12 chauh a nih laiin, Jehova chu a Pa a ni tih amah ngeiin a finfiah a ni.—Lk. 2:42, 43, 49.

15. Engtin nge Isua’n Jehova duh zâwng tih a thlang tih a târ lan?

¹⁵ Isua chuan Jehova thiltuma a chanvo a han hriat chuan, inhuam takin a pawm a ni. (Joh. 6:38) Mi tam takte huat a ni dâwn tih a hria a, chu chuan ngaihtuahna thui tak a neihtîr ngei ang. Chuti chung pawhin, Jehova hnêna intukluh chu a thlang a ni. C.E. 29-a baptisma a chan aṭang khân, a nuna a ngaih pawimawh ber chu Jehova duh zâwng tih a ni a. (Heb. 10:5-7) Nghaisakna bana a thih dâwn pawh khân, a Pa duh zâwng tih chu bânsan a tum lo.—Joh. 19:30.

16. Naupangte’n Isua hnên aṭanga an zir theih pakhat chu eng nge ni?

¹⁶ I nu leh pa thu zâwm rawh. Josefa leh Mari ang bawkin, i nu leh pate chu an ṭha famkim lo va. Mahse, Jehova chuan anni chu nangmah vênghim a, zirtîr a, kaihruai tûrin a ruat a ni. An fuihnate i ngaihhlut a, an thuneihnate i zahsak chuan, “i tân a ṭha ang.”—Eph. 6:1-4.

17. Josua 24:15-a sawi angin, ṭhalaite’n eng thu tlûkna nge mahnia an siam ang?

¹⁷ Tu rawng nge i bâwl dâwn thlang rawh. Jehova nihna leh a thiltuma telte bâkah, a duh zâwng leh i nunpui theih dânte chu i hriat chian a ngai a. (Rom 12:2) Chutianga i tih chauhvin, Jehova rawngbâwl tûrin i nuna thu tlûkna pawimawh ber chu i siam thei ang. (Josua 24:15 chhiar rawh; Thur. 12:1) Chu bâkah, Bible chhiarna leh zirna i neih ziah chuan, Jehova i hmangaihna chu a ṭhang chho telh telh ang a, i rinna pawh a nghet lehzual sauh vang.

18. Ṭhalaite’n eng duh thlanna nge an siam a ngaih a, chu chuan eng nge a rah chhuah ang?

 ¹⁸ I nunah Jehova duh zâwng dah hmasa ber rawh. Setana khawvêl chuan i theihnate chu mahni tâna i hman chuan hlimna i nei ang, tih a tiam che a. Dik tak chuan, sum leh pai lama hausakna ûmtute chu anmahni leh anmahni “lungngaihna tam takin” an inchhun tlang ṭhîn a ni. (1 Tim. 6:9, 10) Kawng leh lamah chuan, Jehova thusawi i ngaihthlâk a, i nunah a duh zâwng i dah hmasak ber chuan, nun hlimawm tak i nei ang a, “i lo hmuingîl zêl” bawk ang.—Jos. 1:8.

19. Nu leh pate’n eng nge an hriat reng ang?

¹⁹ Nu leh pate u, in fate chu Jehova rawngbâwl tûrin theih tâwp chhuahin ṭanpui rawh u. Jehova in rinchhan tlat chuan duh thlanna fing siam tûrin a ṭanpui ang che u. (Thuf. 3:5, 6) Thusawi mai aiin, in thiltihte chuan in fate chu a thunun nasa lehzual ang tih hre reng ang che u. Chuvângin, in thu tlûkna siam chuan Pathian duhsakna dawng tûrin anni chu a ṭanpui ang.

20. Ṭhalaite’n Jehova rawngbâwl an thlan chuan, eng malsâwmnate nge an dawn ang?

²⁰ Ṭhalaite u, in nu leh pate chuan nuna duh thlanna fing siam tûrin an ṭanpui thei che u a. Mahse, Pathian duhsakna in dawn leh dawn loh chu nangmahniah a innghat a ni. Chuvângin, Isua entawnin, hmangaihna nei tak in Pa vâna mi rawngbâwl chu thlang ang che u. Chutianga in tih chuan, tûnah ngei pawh Jehova rawngbâwlnaah in buai rengin, nun awmze nei tak leh hlimawm tak in nei ang a. (1 Tim. 4:16) Chu bâkah, nakin lawkah, nun azawnga nun lungawithlâk ber chu in chên ang!