LARTIK LETID 44
Eski To Bann Zanfan Pou Servi Bondie kan Zot Pou Vinn Bann Adilt?
“Zezi ti grandi dan sazes, ti grandi fizikman, e li ti trouv lagras devan Bondie e devan dimoun.”—LIK 2:52.
KANTIK 134 Bann Zanfan, enn Leritaz Bondie
REZIME *
1. Ki meyer desizion enn kikenn kapav pran?
SOUVAN, bann swa ki bann paran fer kapav ena enn lefe lor zot zanfan pandan lontan. Si bann paran fer bann move swa, sa kapav amenn bann problem pou zot zanfan. Me si zot fer bann bon swa, sa kapav ed zot zanfan pou ena enn lavi ere. Biensir, bann zanfan osi bizin pran bann bon desizion. Meyer desizion ki enn kikenn kapav pran, se servi Zeova, nou Papa ki dan lesiel.—Ps. 73:28.
2. Ki bann bon desizion Zezi ek so bann paran ti pran?
2 Zozef ek Mari ti anvi ed zot zanfan pou servi Zeova. Ek bann swa ki zot ti fer ti montre ki seki ti pli inportan pou zot, se servi Zeova. (Lik 2:40, 41, 52) Zezi osi ti fer bann bon swa ki ti ed li pou fer seki Zeova ti anvi li fer. (Mat. 4:1-10) Zezi ti vinn enn kikenn ki bon, ki fidel, ek ki ena kouraz. Tou bann paran ki kontan Zeova ti pou fier ek ere pou ena enn garson kouma Zezi.
3. Ki bann kestion nou pou examine dan sa lartik-la?
3 Dan sa lartik-la, nou pou examinn sa bann kestion-la: Ki bann bon swa Zeova ti fer konsernan Zezi? Ki bann paran Kretien kapav aprann ar bann swa ki bann paran Zezi ti fer? Ek ki bann zenn Kretien kapav aprann ar bann swa ki Zezi ti fer?
APRANN AR LEXANP ZEOVA
4. Ki desizion bien inportan Zeova ti pran konsernan so Garson?
4 Zeova ti swazir bann bon paran pou Zezi. (Mat. 1:18-23; Lik 1:26-38) Bann parol sinser ki Mari ti dir ek ki nou trouv dan Labib, montre lamour profon ki li ti ena pou Zeova ek pou So Parol. (Lik 1:46-55) Ek fason ki Zozef ti obeir Zeova montre ki li ti ena lakrint pou Bondie ek ki li ti anvi fer Li plezir.—Mat. 1:24.
5-6. Par ki sitiasion Zeova ti permet so Garson pase?
5 Kan Zeova ti swazir bann paran pou Zezi, Li pa ti swazir bann dimounn ki ti ris. Sakrifis ki Zozef ek Mari ti fer apre nesans Zezi montre ki zot ti pov. (Lik 2:24) Zozef ti enn sarpantie, ek kitfwa li ti ena enn ti biznes dan Nazaret akote so lakaz. Sirman zot pa ti ena boukou kas ek boukou kitsoz, kitfwa parski zot ti ena omwin set zanfan.—Mat. 13:55, 56.
6 Zeova ti protez Zezi kont sertin danze, me Li pa ti protez So Garson kont tou bann leprev ki li ti pou gagne. (Mat. 2:13-15) Par exanp, Zezi ti ena bann fami ki pa ti krwar dan li. Mazine ki kantite sa ti fer leker Zezi fermal kan sertin manb so fami o-koumansman pa ti aksepte li kouma Lemesi. (Mark 3:21; Zan 7:5) Anplis, kitfwa Zozef ti mor kan Zezi ti bien zenn. Alor, sirman sa ti bien difisil pou Zezi. Akoz lamor Zozef, Zezi ki ti pli gran garson, ti bizin repran biznes familial. (Mark 6:3) Kan li ti vinn gran, Zezi ti bizin aprann pou okip so fami, ek sirman li ti bizin travay bien dir pou soutenir zot. Alor, li ti kone seki savedir fatige apre enn long zourne travay.
Paran, prepar to zanfan pou bann difikilte ki li kapav gagne dan lavi, kan to ansegn li kouma pou rod bann konsey dan Labib (Get paragraf 7) *
7. (a) Ki kestion kapav ed enn koup marye pou elve zot zanfan? (b) Kouma Proverb 2:1-6 kapav ed bann paran pou form zot zanfan?
7 Si zot enn koup marye ek ki zot ti pou kontan gagn zanfan, demann zotmem: ‘Eski nou bann dimounn ki ena limilite, ek ki kontan Zeova ek so Parol? Eski Zeova ti pou swazir nou pou pran swin enn ti-baba?’ (Ps. 127:3, 4) Si to enn paran, demann tomem: ‘Eski mo pe montre mo zanfan linportans pou travay dir?’ (Ekle. 3:12, 13) ‘Eski mo pe fer mo maximum pou protez mo zanfan kont bann danze fizik ek moral ki li kapav gagne dan lemond Satan?’ (Prov. 22:3) To pa kapav protez to zanfan kont tou bann difikilte ki li kapav gagne. Se enn kitsoz ki inposib! Me to kapav prepar zot pou bann problem ki zot kapav gagne dan zot lavi. Kouma to kapav fer sa? Avek boukou lamour, kontign ansegn zot kouma pou rod bann konsey ki ena dan Labib. (Lir Proverb 2:1-6. *) Par exanp, si enn pros aret servi Zeova, servi Labib pou ed to zanfan konpran kifer li bien inportan ki li res fidel ar Zeova. (Ps. 31:23) Ouswa, si enn kikenn to kontan mor, montre to zanfan bann verse Labib ki pou ed li sirmont so sagrin.—2 Kor. 1:3, 4; 2 Tim. 3:16.
APRANN AR LEXANP ZOZEF EK MARI
8. Dapre Deteronom 6:6, 7, ki Zozef ek Mari ti bizin fer?
8 Zozef ek Mari ti swiv bann konsey ki Zeova ti donn bann paran. Gras-a sa, zot ti ed Zezi pou grandi ek gagn faver Zeova. (Lir Deteronom 6:6, 7. *) Zozef ek Mari ti bien kontan Zeova, ek seki ti pli inportan pou zot se ki zot zanfan devlop sa lamour-la zot osi.
9. Ki bann desizion bien inportan Zozef ek Mari ti pran?
9 Zozef ek Mari ti desid pou ador Zeova regilierman ansam avek zot bann zanfan. Pena dout ki zot ti asiste bann rasanbleman ki ti ena sak semenn dan sinagog dan Nazaret. Sak lane, zot ti osi al fet Pak dan Zerizalem. (Lik 2:41; 4:16) Pandan zot vwayaz pou al Zerizalem, kitfwa zot ti pe ansegn Zezi ek zot bann lezot zanfan seki Zeova ti fer pou So pep dan lepase. Li posib osi ki zot ti vizit bann landrwa ki mansione dan Lekritir pandan sa bann vwayaz-la. Amezir ki zot fami ti pe grandi, kitfwa li ti vinn pli difisil pou Zozef ek Mari pou gard bann bon labitid spiritiel. Me zot ti kontign fer sa ek zot ti gagn bann bienfe! Zot ti met zot ladorasion pou Zeova an premie dan zot lavi. Akoz sa, zot fami ti res pros ar Zeova.
10. Ki leson bann paran Kretien kapav aprann ar lexanp Zozef ek Mari?
10 Ki bann paran Kretien kapav aprann ar lexanp Zozef ek Mari? Seki pli inportan, se montre to zanfan par to bann parol ek to bann aksion ki to kontan Zeova. Meyer kado ki to kapav donn zot se ed zot pou kontan Zeova. Enn parmi bann kitsoz pli inportan ki to kapav ansegn zot se kouma zot kapav etidie Labib regilierman, priye, al renion, ek partisip dan predikasion. (1 Tim. 6:6) Biensir, to bizin donn to zanfan seki li bizin lor plan materyel. (1 Tim. 5:8) Me kanmem sa, seki pli inportan se pa bann kitsoz materyel, me se so lamitie avek Zeova, ki pou ed li rant dan lemond nouvo kan Zeova pou detrir sa vie lemond-la. *—Eze. 7:19; 1 Tim. 4:8.
Nou bien kontan pou trouv bann paran Kretien ki pran bann bon desizion pou zot fami! (Get paragraf 11) *
11. (a) Kouma konsey ki ena dan 1 Timote 6:17-19 kapav ed bann paran pou fer bann bon swa kan zot elve zot zanfan? (b) Ki bann lobzektif to fami kapav fixe, ek ki bann bienfe zot pou gagne? (Get lankadre “ Ki Bann Lobzektif To Kapav Fixe?”)
11 Nou bien kontan pou trouv bann paran Kretien fer bann bon swa pou ed zot zanfan pou vinn pros ar Zeova! Par exanp, zot ador Zeova ansam regilierman. Zot asiste bann renion ek bann lasanble. Ek zot partisip dan predikasion. Ena bann fami ki al pres dan bann teritwar ki pa fer souvan. Ena lezot ki vizit bann biro nasional ouswa ki partisip dan bann proze konstriksion. Bann fami ki swazir pou fer sa bann laktivite-la bizin fer bann sakrifis lor plan materyel, ek kitfwa zot pou gagn bann difikilte akoz sa. Me Zeova pou rekonpans zot pou sa bann sakrifis-la. (Lir 1 Timote 6:17-19.) Bann zanfan ki grandi dan sa bann fami-la, souvan gard sa bann bon labitid-la, ek zot pena okenn regre! *—Prov. 10:22.
APRANN AR LEXANP ZEZI
12. Ki Zezi ti bizin fer kan li ti vinn gran?
12 Zeova touletan fer bann bon swa, ek bann paran Zezi ti osi pran bann bon desizion. Selman, kan Zezi ti vinn gran, li ti bizin pran so bann prop desizion. (Gal. 6:5) Parey kouma nou tou, li ti ena liberte pou swazir. Li ti kapav fer so prop lintere pas an premie. Me li pa ti fer sa. Okontrer, li ti swazir pou ena enn bon relasion avek Zeova. (Zan 8:29) Kouma bann zenn azordi kapav imit so lexanp?
Zenn, zame pa rezet bann konsey ki to bann paran donn twa (Get paragraf 13) *
13. Ki desizion bien inportan Zezi ti pran kan li ti ankor zenn?
13 Kan Zezi ti enn zenn garson, li ti swazir pou obeir so bann paran. Zame li pa ti dezobeir zot parski li ti panse ki li konn plis ki zot. Okontrer, “li ti kontign obeir zot.” (Lik 2:51) Zezi ti pli gran garson, savedir ki li ti ena bann responsabilite ek li ti fer so maximum pou asim sa bann responsabilite-la. Li ti fer boukou zefor pou aprann metie sarpantie ar Zozef, pou ki li kapav ed so fami lor plan materyel.
14. Kouma nou kone ki Zezi ti kontan etidie Parol Bondie?
14 Bann paran Zezi kitfwa ti rakont li kouma li’nn ne par enn mirak ek seki bann mesaze Bondie ti dir lor li. (Lik 2:8-19, 25-38) Me Zezi pa ti kontant li ar seki bannla ti rakont li. Okontrer, li ti pran letan pou etidie bann Lekritir. Kouma nou kone ki Zezi ti kontan etidie Parol Bondie? Kan li ti ankor enn zenn garson, bann ansegnan dan Zerizalem “ti etone ar so lintelizans e so repons.” (Lik 2:46, 47) Laz 12 an, Zezi ti deza sir ki Zeova ti so Papa.—Lik 2:42, 43, 49.
15. Kouma Zezi ti montre ki li ti swazir pou fer volonte Zeova?
15 Kan Zezi ti aprann seki Zeova ti anvi li fer, li ti swazir pou fer volonte Zeova. (Zan 6:38) Li ti kone ki boukou ti pou ena laenn pou li. Mem si li pa ti anvi sa, li ti swazir pou obeir Zeova. Kan Zezi ti pran batem lane 29 Nou Lepok, seki ti pli inportan pou li, se fer seki Zeova ti anvi. (Ebre 10:5-7) Ek kan li ti pe soufer lor poto, li ti res determine pou fer volonte so Papa.—Zan 19:30.
16. Ki leson bann zanfan kapav aprann ar lexanp Zezi?
16 Obeir to bann paran. Parey kouma Zozef ek Mari, to bann paran pa parfe. Selman, Zeova finn donn to bann paran responsabilite pou protez twa, form twa, ek gid twa. Si to ekout zot bann konsey ek respekte zot lotorite, tou pou mars bien pou twa.—Efe. 6:1-4.
17. Dapre Zozwe 24:15, ki desizion bann zenn bizin pran?
17 Deside kisannla to pou servi. To bizin verifie par tomem kisannla Zeova ete, ki so volonte, ek kouma to kapav fer so volonte dan to lavi. (Rom. 12:2) Lerla, to pou kapav pran desizion pli inportan ki ena dan to lavi, setadir servi Zeova. (Lir Zozwe 24:15; * Ekle. 12:1) Si to lir ek etidie Labib regilierman, to lamour pou Zeova pou kontign grandi ek to pou plis ena lafwa dan Li.
18. Ki desizion bann zenn bizin pran, ek ki bienfe zot pou gagne?
18 Swazir pou fer volonte Zeova pas an premie dan to lavi. Lemond Satan promet twa ki, si to servi to bann kapasite pou to prop lintere, to pou ere. Me nou kone ki bann dimounn ki fixe zot bann lobzektif lor plan materyel pou gagn “boukou douler.” (1 Tim. 6:9, 10, NW) Alor, si to ekout Zeova ek to swazir pou fer so volonte pas an premie dan to lavi, to pou ere ek “to pou azir avek sazes.”—Zozwe 1:8.
KI TO POU SWAZIR POU FER?
19. Ki bann paran bizin rapel?
19 Paran, fer to maximum pou ed to fami servi Zeova. Kont lor Li, ek Li pou ed twa pou pran bann bon desizion. (Prov. 3:5, 6) Rapel ki to bann aksion pou ena enn pli gran lefe lor to bann zanfan ki to bann parol. Alor, pran bann desizion ki pou ed to bann zanfan pou gagn faver Zeova.
20. Ki bienfe bann zenn kapav gagne si zot swazir pou servi Zeova?
20 Zenn, to bann paran kapav ed twa pou pran bann bon desizion dan to lavi. Me se twa ki bizin pran bann bon desizion ki pou fer plezir Bondie. Alor, imit Zezi ek swazir pou servi to Papa ki dan lesiel. Si to fer sa, to lavi pou ena enn sans ek to pou ere. (1 Tim. 4:16) Ek dan lavenir, to pou profit pli zoli lavi ki kapav ena!
KANTIK 133 Ador Zeova Pandan Zot Zenes
^ par. 5 Bann paran Kretien anvi ki zot zanfan vinn bann serviter Zeova kan zot vinn gran. Ki bann swa bann paran kapav fer pou ed zot zanfan servi Zeova? Ki bann swa bann zenn Kretien kapav fer pou reisi dan zot lavi? Sa lartik-la pou reponn sa bann kestion-la.
^ par. 7 Proverb 2:1-6: “1 Mo garson, si to ekout mo bann parol, ek to gard bien dan to leker mo bann komannman, 2 pou ekout bien lasazes, pou ki to kapav ouver to leker pou gagn disernman; 3 si anplis to apel lintelizans, ek to kriye pou gagn disernman, 4 si to kontign rod sa koumadir to pe rod larzan ek si to kontign rod sa kouma bann trezor ki finn kasiet, 5 lerla, to pou konpran lakrint pou Zeova, ek to pou trouv konesans Bondie. 6 Parski Zeova Limem donn sazes; konesans ek bon zizman sorti dan so labous.”
^ par. 8 Deteronom 6:6, 7: “6 Sa bann komannman ki mo pe donn twa zordi la, bizin lor to leker, 7 Ek to bizin kontign repet sa ar to bann garson ek koz sa ar zot kan to asize dan to lakaz, kan to marse lor semin, kan to pe al dormi, ek kan to leve.”
^ par. 11 Get lankadre « Je ne pouvais pas rêver meilleurs parents » dan Leve! Oktob 2011, p. 20, an Franse, ek lartik « Lettre spéciale à leurs parents » dan Leve! 8 Mars 1999, p. 25, an Franse.
^ par. 17 Zozwe 24:15: “Me, si zot trouve ki li pa bon ki zot servi Zeova, swazir zotmem zordi kisannla zot pou servi, swa bann bondie ki zot bann anset ki ti res lot kote Larivier ti servi, swa bann bondie bann Amorit, dan pei kot zot pe reste. Me mwa ek mo fami, nou pou servi Zeova.”
^ par. 69 DESKRIPSION ZIMAZ: Mari ti ed Zezi pou devlop enn lamour profon pou Zeova. Azordi, parey kouma Mari, bann mama kapav ed zot zanfan pou devlop enn lamour profon pou Zeova.
^ par. 71 DESKRIPSION ZIMAZ: Zozef ti montre ki al sinagog ansam avek so fami ti bien inportan pou li. Azordi, bann papa montre ki asiste renion ansam avek zot fami bien inportan pou zot.
^ par. 73 DESKRIPSION ZIMAZ: Zezi ti aprann enn metie ar so papa. Azordi osi, bann zenn kapav aprann boukou kitsoz ar zot papa.
