MWAHA WOOSOMIYA 44
Asaaniinyu anaahala unswalela Nluku yoonuwaka?
“Ni Yesu aavira atepaka ukhala oocuwelaca ni wuunuwa irutthu, uhoolo wa Nluku ni waapinaatamu.”—LUKA 2:52.
NCIPO 134 Asaana ankhala iparakha inkhuma wa Nluku
NINHALA WIITTHUCANI? *
1. Itthuni yootepa ureera inlamuliyaawe uthanla upanka khula ntthu?
CITTHU ayari cinthanlaaya upanka pooti urukunusa venci makhalelo aasaanaaya. Ayari yathanlaka upanka citthu coohinamaana, pooti waawaanela masakha asaanaaya. Masi yathanlaka upanka citthu comaana, anaahala waakavihera asaanaaya ukhala ootteeliya muukumini waya. Unookhalaru commo, asaana ciicammo ahaana yathanlaka upanka citthu comaana. Itthu yootepa ureera inlamuliyaawe uthanla khula ntthu, ukhanle waaswalela Apaapeehu o wiirimu, Yehova.—Isaa. 73:28.
2. Citthuni comaana caathanlanlyaawe upanka Yesu, ni citthuni caathanlalyaaya upanka asithumwaane?
2 Asithumwaane Yesu yaholakela waakavihera asaanaaya unswalela Yehova, ni citthu caathanlaaya upanka caathoonyera wiira ayo yaahoolelihera unswalela Yehova muukumini waya. (Luka 2:40, 41, 52) Yesu ciicammo ahothanla upanka citthu comaana cankavihenre wiirannyeeha itthu yaapheelaawe Yehova. (Mat. 4:1-10) Yesu ahoonuwa ni ahokhala nlopwana namaana, ookhuluvelyaa ni oolipa nrima. Ayari otheene anonfenta Yehova wanhala waatteela nrima ukhalana mwaana toko uyo.
3. Makohoni anhaleehu waakhula nhina ula mwahoola?
3 Nhina ula mwahoola, ninaahala waakhula ala makohwaala: Itthuni yomaana Yehova yanthanlenlyaawe Yesu? Citthu caathanlalyaaya upanka asithumwaane Yesu cinwiitthuciha isiyani ayari makristau? Ni citthu caathanlalyaawe upanka Yesu cinwiitthuciha isiyani amirawo makristau?
ITTHU YAATHANLALYAAWE YEHOVA INWIITTHUCIHANI ISIYANI?
4. Itthuni yooreera Yehova yanthanlenlyaawe Mwanawe?
4 Yehova ahaathanla ratta ale yaahala ukhala asithumwaane Yesu. (Mat. 1:18-23; Luka 1:26-38) Moolumo a Mariya yantikhiye mbiiblyani anthoonyera wiira uyo aanonfenta venci Yehova ni naanancivela Nuulumo nawe. (Luka 1:46-55) Ni mananna Yusufu ceewelenlyaawe itthu yaarumiyaawe ni Yehova anthoonyera wiira uyo aananhisima Nluku ni aapheela untteeliha nrima.—Mat. 1:24.
5-6. Citthuni Yehova caahiilyaawe cinkhumelelaka Mwanawe?
5 Moone wiira Yehova khaathanlale mathaciri wiira akhale asithumwaane Yesu. Itthuvo Yusufu ni Mariya yaavaherenryaaya ukati wannyaralyaaya Yesu, inthoonyera wiira ayo yaari amasikhini. (Luka 2:24) Yusufu atthunaka ahaana niparantta nankaani waavaraawe nteko weekarpinteeru. Ayo atthunaka khayaari atthu ookhalana ni oopuha, venci-venci kontha watthokoni waya yahaavo asaana 7.—Mat. 13:55, 56.
6 Unookhalaru wiira Yehova ahonkhikicera Yesu wiira cihinkhumelele citthu cowoopiha, ahaavo masakha Yehova yaahiilyaawe yankhumelelaka Yesu. (Mat. 2:13-15) Wootakihera, Yesu ahaana aavilelaka amucyaawe yahankupali. Muupuwele mananna Yesu caakhalaawe ooriipiya nrima nlattu woowoona amucyaawe wiipaceroni yahankupanli wiira uyo khanle Mesiya. (Mark. 3:21; Joau 7:5) Ciicammo, Yusufu atthunaka aakhwile Yesu naryeene mmirawo, ni Yesu ahoriipiya nrima cinene nlattu wookhweliya. Ukhwa wawe Yusufu, Yesu phaahala unwacera nakoso owapuwani, kontha uyo phaari mwaana omuulupale. (Mark. 6:3) Ukati waaviraawe oonuwaka, Yesu aheetthuca waawacera saana amucyaawe. Uyo atthunaka ahaana eekurumicaka uvara nteko wiira aakavihere. Phimaana, Yesu khweeliini aakhala owoocya ucoocilo wo khula nihuku.
Ayari, mwaatthenkace asaaniinyu, nwiitthucihaka utotha ikano co mbiiblyani wiira arwee yacuwele waanana marikariko anhala waakhumelela muukumini waya (Nwehe iparaagarafu 7) *
7. a) Makohoni anhala waakavihera anamathelana uwuunuwiha ratta asaanaaya? b) Miruku 2:1-6 inhala wuukaviherani cani uwiitthuciha asaaniinyu?
7 Wakhala wiira nyuuva nhothela awula nhotheliya ni waanoocivelani ukhalana asaana, mwiikohe co: ‘Hiiva nikhanle atthu owiiyeviha ni ninanfenta Yehova? Niireke Yehova anhala univahacera unwacera mwaana ofayita cinene?’ (Isaa. 127:3, 4) Wakhala wiira nyuuva nhaana asaana, mwiikohe co: ‘Kinaawiitthuciha asaanaaka wiira wiikurumica uvara nteko inkhala itthu yomaana?’ (Ekles. 3:12, 13) ‘Kinneekurumica waakhikicera asaanaaka wiira cihaapanke pusya citthu coohinamaana ni cowoopiha co ntuninyani ya Sotwani?’ (Miru. 22:3) Nyuuva khannohala ukhitiri waakhikicera asaaniinyu wiira ahaakhumelele nanka masakha. Masi nyuuva pooti waafenta ni waatthenkaca vakaani-vakaani, nwiitthucihaka utotha ikano co mbiiblyani wiira arwee yacuwele waanana marikariko anhala waakhumelela muukumini waya. (Nsome Miruku 2:1-6. *) Wootakihera, wakhala wiira haavo ntthu hiyale unswalela Yehova wapuwani winyu, mwaathoonyere asaaniinyu mbiiblyani wiira unvaresesa Yehova ikhanle itthu yofayita. (Isaa. 31:23) Awula wakhala wiira haavo ntthu khwile wapuwani winyu, mwaathoonyere asaaniinyu manannani nuulumo na Nluku cinnikaviheraaya uvilela ni ukhalana nnema wanrimani wihu.—2 Akor. 1:3, 4; 2 Tim. 3:16.
CITTHU CAATHANLALYAAWE YUSUFU NI MARIYA CINWIITTHUCIHANI ISIYANI?
8. Toko cinthoonyeraaya Deuteronomiyu 6:6, 7, isiyani Yusufu ni Mariya yeekurumicalyaaya upanka?
8 Yusufu ni Mariya yahokhitiri unkavihera Yesu ukhala nlopwana oomaana uhoolo wa Yehova. Ayo yaakhitinri iyo kontha yahotthara malakihero Yehova yaavahalyaawe ayari. (Nsome Deuteronomiyu 6:6, 7. *) Yusufu ni Mariya yaananfenta Yehova venci, ni itthu yuulupale yeekurumicaaya upanka waari uwiitthuciha asaanaaya wiira naayo ciicammo anfente cinene Yehova.
9. Citthuni comaana Yusufu ni Mariya caathanlalyaaya upanka?
9 Yusufu ni Mariya yahothanla uhoolelihera uvara miteko coominepani. Unawoonannya wiira khula isumana, ayo khayaalova umikutthaanoni caapankiyaka wasinakoka u Nasaree, ni khula mwaakha, yanrwaa u Pasikuwani, u Yerusalemu. (Luka 2:41; 4:16) Ikwaha caarwaaya u Yerusalemu, Yusufu atthunaka anwiitthucihaka asaanaawe niiphiro. Uyo atthunaka aanaattonkela citthu caakhumelenle apoovu a Yehova khalayi ni atthunaka yanhapuwelaka mapuro makiina anromoliya mbiiblyani wiira yoone. Ukati Yusufu ni Mariya waaviraaya yaayaraka asaana akhwaawe, ayo atthunaka waanaarika uhihiyerera uvara miteko co wuuswalini. Masi yahocaalihiya venci kontha khayaahiile wiikurumica! Nlattu woohoolelihera unswalela Yehova, amucyaaya otheene yahaana upatthani woolipa ni Yehova.
10. Ayari makristau aneetthuca isiyani ni ntakihero na Yusufu ni Mariya?
10 Ayari anonswalela Nluku ilelo aneetthuca isiyani ni ntakihero na Yusufu ni Mariya? Itthu yuulupale cinene ukhanle wiikurumica wuuluma ni upanka citthu cinhala waathoonyera asaaniinyu wiira nyuuva nnanfenta venci Yehova. Nhiliyale wiira itthu yofayita cinene inhaleenyu waavaha asaaniinyu ukhanle waakavihera unfenta Yehova. Ni itthu yuulupale inlamuliyeenyu uwiitthuciha asaaniinyu ukhanle uhihiya usoma Ibiiblya, ulompa, urwaa umikutthaanoni ni wuulalyeerani. (1 Tim. 6:6) Khweeliini, nyuuva nhaana mwaavahaka asaaniinyu citthu cimpheelaaya cihikhanle coominepani, toko iyoolya, ikuwo awula citthu cikiina. (1 Tim. 5:8) Masi nhiliyale wiira itthu inhala waakavihera asaaniinyu woopwa ila ituninyeela ni ukela upeephoni, khacinakhala mihakhu awula maali, masi ukhanle upatthani woolipa ni Yehova. *—Ezek. 7:19; 1 Tim. 4:8.
Ikhanle itthu yootteeliha nrima uwoona ayari makristau yathanlaka upanka citthu cominepani wamoca naamucyaaya! (Nwehe iparaagarafu 11) *
11. a) Ikano iri nhina 1 Timotiyu 6:17-19 inaakavihera cani ayari uthanla upanka citthu comaana ukati unwuunuwihaaya asaanaaya? b) Citthuni cinlamuliyeenyu ulakela upanka naamuciinyu, ni iparakhani cinhaleenyu waakhela? (Nwehe ikwaaturu “ Citthu cinlamuliyeenyu ulakela upanka”)
11 Cinreeraaya uwoona ayari makristau enci anthanla upanka citthu cinhala waakavihera asaanaaya ukhalana upatthani woolipa ni Yehova! Ayo khanhiya uswali nkhayi. Anaarwaa nkhayi umikutthaanoni co wanlokoni ni mmakonkereesuni. Ni khanlova urwaa nkhayi wuulalyeerani. Amuci akiina anaakhitiri urwaa ulalyeera mapuro ahinlalyeeriya cinene. Akhwaawe anaarwaa wootola iPeteli awula ukavihera uteka mapuro anvariya miteko co Umwene. Ayo anawaamini urihakaca nsurukhwaaya wiira apanke nnyo citthunnyo, ni atthunaka pooti uhala waathwa nsurukhu nlattu wo iyo. Masi Yehova naahala waavaha iparakha cinci nlattu wo citthu comaana cinthanlaaya upanka. (Nsome 1 Timotiyu 6:17-19. *) Asaana anoonuwihiya mmatthokoni toko nnyo, khanhiya upanka nnyo citthunnyo yoonuwaka ni unawaatteela nrima nlattu wo mananna cuunuwihiyaaya naasithumwanaya! *—Miru. 10:22.
CITTHU CAATHANLALYAAWE YESU CINWIITTHUCIHANI ISIYANI?
12. Isiyani Yesu yaalamuliyaawe upanka ukati waahalaawe wuunuwa?
12 Athumwaane Yesu o wiirimu khula ukati anaathanla upanka citthu comaana, ni asithumwaane o watuninyani ciicammo yahothanla upanka citthu comaana. Masi Yesu ukati woonuwalyaawe, ahaana uthanla veekha citthu caahalaawe upanka. (Akalas. 6:5) Toko hiiva ciriihu ootaphuwa, Yesu ciicammo ahaana utaphuwa wiira athanle upanka khula itthu. Natthunale, uyo pooti waahooleliheraawe upanka citthu cancivela. Masi Yesu khaapankale commo. Uyo aathanlale uhihiya ukhalana upatthani ni Yehova. (Joau 8:29) Ntakihero na Yesu ninwiitthuciha isiyani amirawo ilelo?
Amirawo, nhihiye uwiiwelela asithumwaninyu (Nwehe iparaagarafu 13) *
13. Isiyani Yesu yaathanlalyaawe hinaaya wuunuwa?
13 Ukati Yesu waaryaawe hinoonuwa, ahothanla uwiiwelela asithumwaane. Uyo khaavaanyiha, awiirelaka wiira uyo phaacuwelaca cinene waapwaha ayova. Uhiya upanka commo, uyo “khaahiya uwiiwelela.” (Luka 2:51) Yesu ciicammo ancuwela itthu yaalamuliyaawe upanka khampa mwaana omuulupale. Uyo aheetthuca nteko weekarpinteeru nkhayi ni Yusufu wiira akavihere uphwanya nsurukhu woohala uthumeliya citthu caahalaaya upheela amucyaawe.
14. Nincuwela cani wiira Yesu ansoma Nuulumo na Nluku?
14 Asithumwaane Yesu atthunaka yahonhimyera mananna ootikhiniha uyova caayariyaawe ni pooti yahonhimyera citthu coolumalyaaya malayikha yaarumiye ni Nluku. (Luka 2:8-19, 25-38) Masi khacaatosa paasi citthu caahimyeriyaawe naasithumwanawe. Yesu ciicammo aaneekurumica usoma Cowantikhiya Cowaarya. Nincuwela cani wiira Yesu ansoma Nuulumo na Nluku? Kontha naryeene mmirawo, ale yeetthuciha u Yerusalemu “yahokhala ootikhinihiya nlattu wo citthu caacuwelaawe ni caakhulaawe.” (Luka 2:46, 47) Ni ukati waarinaawe myaakha 12 paahi, Yesu ahocuwela ni ahokupali wiira Yehova phaari Athumwaane.—Luka 2:42, 43, 49.
15. Manannani Yesu caathoonyenryaawe wiira ahothanla upanka itthu yaapheelaaya Athumwaane?
15 Ukati Yesu waacuwenlyaawe itthu Yehova yampheelelaawe, uyo ahothanla upanka iyo. (Joau 6:38) Uyo ancuwela wiira atthu enci yanhala unthanya, ni iyo itthwiiyo atthunaka yankhaliha niisukhuli wanrimani. Masi waanookhalaru commo, uyo ahothanla umwiiwelela Yehova. Upattisiya wawe, mwaakha wo 29, itthu yaahooleliheraawe muukumini wawe waari upanka yaapheelaawe Yehova. (Mabere. 10:5-7) Hataa ukati waakhwaawe nakhomeliye wanipottoni, Yesu khaahiile upanka itthu yaapheelaaya Athumwaane.—Joau 19:30.
16. Isiyani ineetthucaaya asaana ni ntakihero na Yesu?
16 Uwiiwelele asithumwana. Athumwana ni anumwana akhanle atthu oopahuwa khampa caaryaawe Yusufu ni Mariya. Masi hataa ukhalaka commo, Yehova nawaaruma asithumwana wiira yuukhikicere ni awiitthucihe weeva. Wathanlaka uwiiwelela athumwana ni anumwana, ‘citthu cotheene cinaahala uweettela saana.’—Efesu 6:1-4.
17. Toko cinthoonyeraaya Josuwe 24:15, isiyani amirawo inlamuliyaaya uthanla veekha caya?
17 Unthanle tipani nohalaa unswalela. Wiithoonyere mwaaneennya Yehova tipani, isiyani impheelaawe ni manannani cinhalaa upanka impheelaawe. (Aroo. 12:2) Wapankaka commo, weeva unaahala ukhitiri upanka itthu yuulupale cinene muukumini waa: unaahala uthanla unswalela Yehova. (Nsome Josuwe 24:15; * Ekles. 12:1) Waahihiyeke usoma Ibiiblya khula nihuku ni upanka usoma wo veekha, unaahala uvira utepaka unfenta Yehova ni waamini waa unaahala utepa ukhala woolipa.
18. Itthuni ikiina amirawo inlamuliyaaya uthanla, ni nlattuni?
18 Uthanle uhoolelihera muukumini waa upanka itthu impheelaawe Yehova. Sotwani neera wiira weeva unaahala utteeliya wavarelaka nteko citthu cincuwelaa wiira wiiphwanyihe mpuha. Masi khweeliini, ale anhoolelihera utotha ukhalana mihakhu ni maali anawiiphwanyiha “masakha menci.” (1 Tim. 6:9, 10) Masi weeva wamwiiwelelaka Yehova ni weekurumica uhoolelihera muukumini waa upanka itthu impheelaawe, unaahala ukhala oocuwelaca ni unaahala ukhala wuutteelaka nrima.—Jos. 1:8.
ISIYANI INLAMULIYEENYU UTHANLA UPANKA?
19. Isiyani ayari ihinlamuliyaaya uliyala?
19 Ayari, mwiikurumice waakavihera asaaniinyu unswalela Yehova. Munkhuluvele Yehova ni uyo naahala wuukaviherani uthanla upanka citthu comaana. (Miru. 3:5, 6) Nhiliyale wiira citthu cinoolumeenyu ni cimpankeenyu pooti urukunusa cinene makhalelo aasaaniinyu. Phimaana, nthanle upanka citthu cinhala waakavihera asaaniinyu untteeliha nrima Yehova.
20. Iparakhani nyuuva amirawo cinhaleenyu uphwanya mwathanlaka unswalela Yehova?
20 Amirawo, asithumwaninyu anaahala wuukaviherani uthanla upanka citthu comaana muukumini winyu. Masi wiira muntteelihe nrima Yehova, nyuuva asaana nhaana mwiikurumicaka veekha cinyu uthanla citthu comaana. Phimaana, muntakihe Yesu ni nthanle waaswalela Apaapeehu oofenta, ankhala wiirimu. Mwapankaka commo, nnaahala ukhala ootteeliya venci nenna co. (1 Tim. 4:16) Ni wahoolo, nnaahala uphwanya utteeliya woohimala!
NCIPO 133 Quero Ser Um Jovem Leal
^ par. 5 Ayari makristau ampheela wiira asaanaaya arwee yakhale ootteeliya ni yanswalele Yehova yoonuwaka. Isiyani ayari inlamuliyaaya upanka wiira yaakavihere asaanaaya ukhitiri iyo? Ni isiyani asaana inlamuliyaaya upanka wiira akhitiri ukhala ootteeliya muukumini waya? Ala akhanle makoho anhala waakhuliya nhina ula mwahoola.
^ par. 7 Miruku 2:1 Mwanaka, watthunaka moolumwaaka ni wasunkaka wanrimani malamulwaaka, 2 uviriyanaka sana-saana ucuwelaca ni watothaka wanrimani waa ukhalana ankhili; 3 uhiya commo, wakhuwelaka utothaka ukhalana ucuwelaca ni wakhuwaka venci ulepelaka ankhili; 4 weekurumicaka utotha nnya citthunnya khampa iparaata ni waahihiyeke utotha khampa mihakhu cofayita coovithya; 5 unaahala ucuwela isiyani ikhanle umoova Yehova ni unaahala ukhitiri ukhalana ucuwelaca wa Nluku. 6 Kontha Yehova phimphwanyiha ucuwelaca; wamalakuni wawe unankhumakhuma ucuwelaca ni ankhili.
^ par. 8 Deuteronomiyu 6:6 Moolumo anoohimeryaakani ilelo, nhaana nsunkaka wanrimani winyu, 7 ni nhaana nwiitthucihaka asaaniinyu ni waahimyera nnonkomale wapuwani winyu, mweettaka niiparapaara, ukati woorwaa urupa ni ukati unonweenyu.
^ par. 10 Nwehe ilivuru A Adoração Pura de Jeová É Restaurada! ipaag. 69-70, iparaag. 17-18.
^ par. 11 1 Timotiyu 6:17 Waahimyere ale akhanle mathaciri ntuninyani wiira ahikhale atthu owiicoona ni wiira ahikhuluvele mihakhu coohikhweeli, masi ankhuluvele Nluku, nonithaciriha anivahaka citthu cotheene cinnitteeliha nrima. 18 Waahimerye wiira apanke citthu cooloka, akhale oovara miteko comaana, akhale atthu oohithuwa, ookhitiri waameela akhwaaya, 19 yiikurumicaka wiisunkera nhakhu muulupale, nlipihero nookhuluvelya noohoolo. Yapankaka commo, anaahala uvaresesa cinene ukumi weekhweeli.
^ par. 11 Nwehe ikwaaturu “Eu não poderia ter pais melhores” nhina irevista Despertai! Outubro yo 2011 ipaagina 20, ni mwaha “Uma carta especial para os pais” nhina irevista Despertai! 8 yo Março yo 1999 ipaagina 25.
^ par. 17 Josuwe 24:15 Vano, wakhala wiira khannotthuna unswalela Yehova, munthanle ilelo nnohaleenyu unswalela, wakhala wiira anluku ohikweeli yaaswalenlyaaya asitateenyu yaakhala ukhopela Mooloko, awula anluku o maamorewu, ilapo inkhaleenyu. Masi, mi naamuciyaaka, ninonswalela Yehova.
^ par. 70 ILATARATO: Mariya aheekurumica cinene umwiitthuciha Yesu unfenta Yehova. Ilelo, mayamaama pooti ciicammo uwiitthuciha asaanaaya unfenta Yehova.
^ par. 72 ILATARATO: Yusufu oona ukhala itthu yofayita cinene urwaa usinakoka wamoca naamucyaawe. Ilelo, ayari ciicammo anawiikurumica urwaa umikutthaanoni nkhayi naamucyaaya.
^ par. 74 ILATARATO: Yesu aheetthuca uvara teko nkhayi naathumwaane. Ilelo, asaana ciicammo pooti wiitthuca nteko nkhayi naasithumwanaya.
