1. ¿Tlen okachi techpaleuis?

TLEN tetajmej kinnauatiaj inkoneuan uelis kinpaleuis noso kintlajyouiltis. Tlen kinmiluiaj uelis kichiuas ma moouijtilikan noso ma yolpakikan. Pero inkoneuan noijki moneki kuali kipejpenaskej tlen kichiuaskej. Tinochtin okachi techpaleuis tla tiktekichiuiliskej toTajtsin Jehová (Sal. 73:28).

2. ¿Ken kiteititia Biblia kuali tlen okichijkej José, María uan Jesús?

² José uan María okinpaleuijkej inkoneuan ma kitekichiuilikan Jehová. Nochipa okiteititijkej okipatioitayaj kitekichiuiliskej Jehová (Luc. 2:40, 41, 52). Jesús kuali okipejpenki tlen kichiuas uan ijkon okichi tlen Jehová kineki (Mat. 4:1-10). Jesús okatka yolkuali, yolchikauak uan otetlakamatiaya. Tetajmej tlen kitekichiuiliaj Jehová yolpakiskej tla ijkon kichiuaj inkoneuan.

3. ¿Tlen tikitaskej itech nin tlamachtil?

³ Itech nin tlamachtil tikitaskej: ¿Tlen okipejpenki Jehová para Jesús? ¿Ken uelis kichiuaskej tetajmej ijkon ken José uan María? ¿Ken uelis kichiuaskej ken Jesús telpokamej uan ichpokamej?

4. ¿Tlen okipejpenki Jehová para iKone?

⁴ Jehová kuali okinpejpenki akinmej yetoskiaj itatajuan Jesús (Mat. 1:18-23; Luc. 1:26-38). Tlen María okijto uan ijkuilitok itech Biblia, kiteititia okitlasojtlaya  Jehová uan okipatioitaya iTlajtol (Luc. 1:46-55). José okikauili Jehová ma kiyekana, ijkon okiteititi okitlasojtlaya uan okinekiaya kiyolpaktis (Mat. 1:24).

5, 6. ¿Tlen okitekauili Jehová ma kixnamiki Jesús?

⁵ Jehová amo okinpejpenki akinmej okipiayaj miak tomin para ma yetokan itatajuan Jesús. Tlen José uan María okitemakakej ijkuak oneski Jesús, okiteititi amo okipiayaj tomin (Luc. 2:24). Xamo ompa Nazaret José okipiaya kanin okuajximaya. Xamo ye uan María amo okipiayaj miak tomin nion okseki tlamantli porque okinpiayaj chikome inkoneuan (Mat. 13:55, 56).

⁶ Jehová okimalui iKone pero okitekauili ma kixnamiki seki ouijkayotl (Mat. 2:13-15). Sekimej ifamiliares amo okineltokayaj tlen okinmiluiaya. Xamo omoyolkoko ijkuak okitak sekimej amo okineltokayaj ye okatka Mesías (Mar. 3:21; Juan 7:5). Noijki xamo José oixpoliuik ijkuak Jesús okatka telpochtli, ik non, omoyolkoko. Uan ken ye okatka tlayekankonetl omonekiaya tekipanos ken itajtsin (Mar. 6:3). Ijkuak Jesús omoskalti okimatki ken kipaleuiskia ifamilia. Xamo sapanoua otekipanouaya para kipiaskiaj tlen ika mopanoltiskiaj. Ik non, okimatiaya ken sapanoua se sotlaua ijkuak se tekipanoua nochi se tonal.

7. (1) ¿Tlen moneki motlajtlaniskej tokniuan tlen kinpiaj inkoneuan? (2) ¿Tlen moneki kinmachtiskej tetajmej inkoneuan ijkon ken kijtoua Proverbios 2:1-6?

⁷ Tla tejuatsin uan monamik nankinekij nankipiaskej namokoneuan, ximotlajtlanikan: “¿Tiyolyamankej uan tiktlasojtlaj Jehová uan iTlajtol? ¿Techpejpenaskia Jehová para ma tikmaluikan se konetsintli?” (Sal. 127:3, 4). Tla yinankinpiaj namokoneuan, ximotlajtlanikan: “¿Nikinmachtia ma tekipanokan?” (Ecl. 3:12, 13). “¿Nikinmaluia para amitlaj ma kinpano uan amo ma kichiuakan ken akinmej kinyekana Satanás?” (Prov. 22:3). Amo uelis nochipa nankinmaluiskej para amo ma tlajyouikan. Pero uelis nankinmititiskej ken kixnamikiskej ouijkayotl. ¿Ken uelis  nankichiuaskej? Xikinmachtikan ma kichiuakan tlen kijtoua Biblia (xiktlajtolti Proverbios 2:1-6). Tla se familiar ayakmo kitekichiuilia Jehová, ma tikinmititikan tokoneuan ika Biblia amo keman ma kikauakan (Sal. 31:23). Tla oixpoliuik ikaj tlen tiktlasojtlaj, ma tikinmititikan textos tlen kinyolchikauas uan kinyolseuis (2 Cor. 1:3, 4; 2 Tim. 3:16).

8. ¿Ken okichijkej José uan María tlen kijtoua Deuteronomio 6:6 uan 7?

⁸ José uan María okichijkej tlen Jehová kinnauatia tetajmej, ik non, okipaleuijkej Jesús ma kiyolpakti Jehová (xiktlajtolti Deuteronomio 6:6, 7). Yejuan okitlasojtlayaj Jehová uan okinekiayaj inkoneuan noijki ijkon ma kitlasojtlakan.

9. ¿Tlen okichijkej José uan María?

⁹ José uan María nochipa okiueyichiuayaj Jehová. Sejse semana omonechikouayaj itech sinagoga ompa Nazaret uan sejse xiuitl oyayaj Jerusalén ijkuak okichiuayaj Pascua (Luc. 2:41; 4:16). Xamo ijkuak oyayaj itech ojtli, José uan María okintlapouijtiayaj inkoneuan ken omouikaya Jehová iuan itekipanojkauan. Xamo noijki oyayaj itech altepemej tlen moijtoua itech iTlajtol toTajtsin Dios. Ijkuak José uan María okinpixkej oksekimej inkoneuan, xamo okachi oui okitayaj kinmachtiskej iTlajtol toTajtsin Dios. Pero nochipa okipatioitakej kiueyichiuaskej Jehová, ik non, okipiayaj chikauak intlaneltokilis.

10. ¿Ken uelis kichiuaskej tetajmej ijkon ken José uan María?

¹⁰ ¿Ken uelis kichiuaskej tetajmej ijkon ken José uan María? Ika tlen nankijtouaj uan nankichiuaj, xikinmititikan namokoneuan nankitlasojtlaj Jehová ika nochi namoyolo. Okachi kinpaleuis namokoneuan tla nankinmachtiaj ma kitlasojtlakan Jehová. Ik non, miak ipati xikinmititikan moneki nochipa momachtiskej, motlatlaujtiskej, monechikoskej  uan tetlapouiskej (1 Tim. 6:6). Noijki moneki nankinmakaskej tlen ika mopanoltiskej (1 Tim. 5:8). Pero okachi miak ipati nankimachtiskej kuali ma mouikakan iuan Jehová porque non kinpaleuis ma yetokan itech xochitlali. Tomin noso okseki tlamantli amo kinpaleuis ma momakixtikan ijkuak tlamis nochi tlen kiyekana Satanás (Ezeq. 7:19; 1 Tim. 4:8). *

11. (1) ¿Ken kinpaleuis tetajmej tlen kijtoua 1 Timoteo 6:17-19? (2) ¿Tlen uelis tikchiuas iuan mofamilia uan ken namechteochiuas Jehová? (Xikita recuadro “ ¿Tlen uelis nankichiuaskej?”).

¹¹ Tiyolpakij porque tetajmej kinpaleuiaj infamilia kuali ma mouikakan iuan Jehová. Nochipa kiueyichiuaj, monechikouaj uan tetlapouiaj. Sekimej tlapaleuitiuij kanin okachi moneki motetlapouis. Oksekimej tlaixmatitiuij Betel noso tlapaleuitiuij kanin kinchijchiuaj kalmej kanin timonechikouaj. Para ijkon kichiuaskej xamo moneki tomin uan kichiuaskej okseki tlamantli pero Jehová kinteochiuas (xiktlajtolti 1 Timoteo 6:17-19). Konemej tlen ijkon kinmachtiaj, ijkon kichiuaj ijkuak moskaltiaj uan kintlasojkamatiliaj intatajuan tlen okinmachtijkej (Prov. 10:22). *

12. ¿Tlen omonekiaya kipejpenas Jesús ijkuak omoskaltijtiaya?

¹² Jehová iTajtsin Jesús nochipa kichiua tlen kuali. José uan María noijki ijkon okichijkej. Jesús omoskaltijtiaya uan noijki omonekiaya iselti kipejpenas tlen kichiuaskia (Rom. 14:12). Ye uelis kipejpenaskia tlen kichiuaskia ijkon ken tejuan. Uelis kichiuaskia san tlen ye kinekiskia pero okinek nochipa kuali mouikas iuan Jehová (Juan 8:29). Telpokamej uan ichpokamej noijki uelis kichiuaskej ken ye.

13. ¿Tlen okichi Jesús?

¹³ Maski Jesús okatka chokotsin, okintlakamatiaya itatajuan. Amo keman okinmixnamik nion omokuayejyeko okachi ixtlamatki ken yejuan. Biblia kijtoua Jesús “okintlakitaya itajwah” (Luc. 2:51). Jesús okatka tlayekankonetl, ik non, xamo omonekiaya okachi tlapaleuis uan ijkon okichi. Omomachti tlen itajtsin okichiuaya uan ijkon okipaleui ifamilia ma kipiakan tlen ika mopanoltiskia.

14. ¿Ken tikmatij Jesús omomachtiaya iTlajtol toTajtsin Dios?

 ¹⁴ Xamo José uan María okiluijkej Jesús oneski porque omochi se milagro uan noijki tlen okijtojkej ángeles ijkuak oneski (Luc. 2:8-19, 25-38). Pero Jesús amo san okipaktiaya kikakis tlen okitlapouiayaj, ye noijki omomachti iTlajtol toTajtsin Dios. ¿Ken tikmatij omomachtiaya? Porque ijkuak okatka chokotsin, akinmej otlamachtiayaj ompa Jerusalén “omotlajtlachialtiayah porke Ye satlawel oixtlamatia, iwa porke kuali okinnankiliaya” (Luc. 2:46, 47). Maski san okipiaya 12 xiuitl kuali okimatiaya iTajtsin okatka Jehová (Luc. 2:42, 43, 49).

15. ¿Ken okiteititi Jesús nochipa kichiua tlen kineki Jehová?

¹⁵ Ijkuak Jesús okajsikamatki tlen okinekiaya Jehová ma kichiua, ye ijkon okichi (Juan 6:38). Ye okimatiaya miakej kikokoliskiaj uan xamo non okiyolkoko. Pero ye okitlakamatki Jehová uan itech xiuitl 29 ijkuak omoapolakti, okachi opejki kitekichiuilia (Heb. 10:5-7). Nochipa ijkon okichi hasta okimiktijkej (Juan 19:30).

16. ¿Ken uelis kichiuaskej konemej ken Jesús?

¹⁶ Xikintlakamati motatajuan. Motatajuan noijki tlajtlakolejkej ijkon ken José uan María. Pero Jehová yokinkauili ma mitsmaluikan, ma mitsmachtikan uan ma mitsyekanakan. Tla tikintlakamati, “tikpias miak pakílistli” (Efes. 6:1-4).

17. ¿Tlen moneki kichiuaskej telpokamej uan ichpokamej ijkon ken kijtoua Josué 24:15?

¹⁷ Ximokuayejyeko akin tiktekichiuilis. Moneki te moselti timomachtis ken iyelis Jehová, tlen kineki xikchiua uan ken tikchiuas (Rom. 12:2). San ijkon uelis tikchiuas tlen okachi ipati: tiktekichiuilis Jehová (xiktlajtolti Josué 24:15; Ecl. 12:1). Tla mojmostla tiktlajtoltia uan timomachtia Biblia, okachi tiktlasojtlas Jehová uan okachi itech titlaneltokas.

18. ¿Tlen okse tlamantli moneki kichiuaskej telpokamej uan ichpokamej uan ken kinpaleuis?

¹⁸ Nochipa xikchiua tlen Jehová kineki. Nochtin tlen Satanás kinyekana kijtouaj  tiyolpakis tla tikchiuas tlen tikmati para timopaleuis. Akinmej san kimotemoliaj tomin uan okseki tlamantli “san innewiah kimotetemiliah intlaijyowilis” (1 Tim. 6:9, 10). Pero tla tikkakilis Jehová uan nochipa tikchiuas tlen ye kineki, nochipa tiyolpakis uan “timoyekanas ika ixtlamatilistli” (Jos. 1:8).

19. ¿Tlen moneki kilnamiktoskej tetajmej?

¹⁹ Tetajmej, xikinpaleuikan namokoneuan ma kitekichiuilikan Jehová. Xikchiuakan tlen ye kijtoua uan namechpaleuis (Prov. 3:5, 6). Xikilnamikikan okachi kinpaleuia namokoneuan tlen nankichiuaj uan amo tlen nankijtouaj. Ik non, xikchiuakan tlen kinpaleuis ma kiyolpaktikan Jehová.

20. Tla telpokamej uan ichpokamej kitekichiuiliaj Jehová, ¿ken kinteochiuas?

²⁰ Telpokamej uan ichpokamej, namotatajuan uelis namechpaleuiskej xikchiuakan tlen moneki. Pero namejuan moneki nankichiuaskej tlen kiyolpaktis Jehová. Ik non, xikchiuakan ken Jesús uan xiktekichiuilikan namoTajtsin Jehová. Tla ijkon nankichiuaskej, nanyolpakiskej (1 Tim. 4:16). Uan itech xochitlali okachi nanyolpakiskej.