1. Ngocapi civaringo cakanakisisa cingatemwa ngo ari wese?

KAZINJI, zvivaringo zvinotemwa ngo vabari zvinopsasa vana vavo ko mukuvo wakareba. Kudari vabari vakatema zvivaringo zvakashata, vangabarira vana vavo zvineso. Asi, pavanotema zvivaringo zvaushoni vanoita kuti vana vavo vave no upenyu unodakajisa kamare. Zvokadi kamare, vana vanodikanavo kutema zvivaringo zvaushoni. Civaringo cakanakisisa cingatemwa ngo mundhu ngo co kushandira Baba wedu vano rudo vo mugore, Jehovha.—Nduyo 73:28.

2. Ngocapi civaringo caushoni cakatemwa ndi Jesu no vabari vake?

² Josefa na Mariya vakatema civaringo co kubesera vana vavo kuti vashandire Jehovha, vabari povanotema civaringo ico, vanokhombija kuti kushandira Jehovha kunosisira maningi mu upenyu hwavo. (Luka 2:40, 41, 52) Jesu wakatemavo civaringo caushoni cakamubesera kuti akwanirise basa rake mu cidisiso ca Jehovha. (Mateu 4:1-10) Jesu wakakura, wova mundhu wakanaka mwoyo, wakagondeka zve ano cicunge. Vabari vese vanoda Jehovha, vaizodada no kudakara ngo kuva no mwana wakadari inga ndiyena.

3. Tinozodavira muvhunjo japi pa musoro uwu?

³ Pa musoro uwu, tinozodavira muvhunjo iji: Ngocapi civaringo caushoni cakatema Jehovha kuitira Jesu? Vabari co Cikristu vangajijenyi ngo civaringo cakatemwa ndi Josefa na Mariya, vabari va Jesu? Zve majaha o Cikristu angajijenyi ngo zvivaringo zvakatemwa ndi Jesu?

4. Ngocapi civaringo cinosisira cakaita Jehovha ngo pamusoro po Mwana wake?

⁴ Jehovha wakasana vabari vakanakisisa kuitira Jesu. (Mateu 1:18-23; Luka 1:26-38) Magama anovha pasi po mwoyo kamare  akatahwa mu Bhaibheri ngo pamusoro pa Maria anovonesa kamare kuti iyena waida Jehovha no Soko rake. (Luka 1:46-55) Manera akasana Josefa kuteveja ndhungamiro ja Jehovha zvakakhombija kamare kuti iyena waida Mwari zve waida kumudakajisa.—Mateu 1:24.

5-6. Jehovha wakatendera kuti mwanake asongane nenyi?

⁵ Vonanyi kuti Jehovha aazivi kusana vabari vakakhupuka kuitira Jesu. Zvipo zvakapa Josefa na Mariya, Jesu paakapera kubahwa zvakakhombija kamare kuti ivona vainga varombo. (Luka 2:24) Kangaije, kuti Josefa aite basa rake ro kuveza, wainga no cinyumba cidokowane phedo no muzi wake ku Nazareta. Ivona avaicaengepi no mare yakawanda maningi kana zviro zvakawanda, maningi-ningi ngokuti mbhuri yavo padoko ngo padoko yakaguma pakuva no vana vanomwe kana kupindirja.—Mateu 13:55, 56.

⁶ Jehovha wakajivirira Jesu pa zvineso zvakati kuti, asi aazivi kumujivirira pa zvineso zvese. (Mateu 2:13-15) Inga muezaniso, Jesu wakatodikanavo kucungirira ukama hwake ucaimutenda. Vonanyi basi kusuruvara kwaakava nako ngo kuvona kuti pikija vamweni vo pa mbhuri yake avacaitenda kuti iyena wainga Mesiya. (Marco 3:21; Johani 7:5) Cimwenizve, zvingaita kuti Josefa paakatamika, Jesu wainga aciri mujaha. Kufa ka Josefa kwakaita kuti Jesu inga mwana wo dangwe ashande ngo simba pa kungwarira nyagoso jo mbhuri. (Marco 6:3) Paainga ecikura, Jesu wakajijira kubatikana pa kukorondha zvinodiwa zvo mbhuri yake. Kangaije wakatodikana kushanda ngo simba kuti awane mare no zviro zvavaida. Ngokudaro, iyena anoziva kuti zvinorevenyi kujizwa wakaremba pasure po kupeja njiku yese wecibata basa.

7. (a) Muvhunjo japi jinobesera varovorani vari kuda kuva no vana? (b) Mukuzwirana na Mazwi Akangwara 2:1-6, vabari vanodikana kujijisa vana vavo kuti vaitenyi?

⁷ Kudari muri varovorani zvokuti maidakarira kuva no vana, jivhunjisenyi kudari: ‘Tiri vandhu vanojidodokesa vanoda Jehovha no Soko rake here? Kureva kuti taizosaniwa ndi Jehovha kuti tikorondhe mwana here?’ (Nduyo 127:3, 4) Kudari muri mubari jivhunjisenyi kudari: ‘Kureva kuti ndiri kujijisa vana vangu kuti kushanda ngo simba kunosisira here?’ (Mucumaeri 3:12, 13) ‘Kureva kuti ndiri kuita zvandinokwanisa kuti ndijivirire vana vangu ku zviro zvinowanika mu nyika ino ya Sathana here?’ (Mazwi Akangwara 22:3) Imwimwi  amungakwanisi kujivirira vana venyu ku zvineso zvese zvavangasongana nazvo. Izvo azvikwanisiki. Asi, imwimwi munganasirira vana venyu kuitira zvineso zvavangasongana nazvo mu upenyu, ngo kwenderera mberi mecivajijisa manera ovangabatisisa mbhangiro jinowanikwa mu Soko ra Mwari. (Verenganyi Mazwi Akangwara 2:1-6.) Inga muezaniso, kudari ukama hwenyu wasana kutamazve kushandira Jehovha, beseranyi vana venyu kuti vajijire kuvhira mu Soko ra Mwari ngenyi zvinosisira kuramba vakagondeka kuna Jehovha. (Nduyo 31:24) Kana kuti, kudari mafihwa ngo mundhu wamunoda khombijanyi vana venyu vhesi jo Bhaibheri jingabesera vana venyu kuti vahwisane no mugariro no kuva no runyararo.—2 VaKorinto 1:3, 4; 2 Timoti 3:16.

8. Mukuzwirana na Deuteronòmio 6:6, 7, Josefa na Mariya vaidikana kuitenyi?

⁸ Josefa na Mariya vaizobesera Jesu kuti akure ecitendehwa ndi Mwari; ngokuti ivona vaitevejera ndhungamiro ja Jehovha jaibhuya ngo zvinodikana kuitwa ngo vabari. (Verenganyi Deuteronòmio 6:6, 7.) Josefa na Mariya vaida maningi Jehovha zvokuti cido cavo cainga co kubesera vana vavo kuti vavevo no mugariro wondhowo wo rudo.

9. Josefa na Mariya vakasana ciro capi cinosisira?

⁹ Josefa na Mariya vakasana kunamata Jehovha nguva jese no vana vavo. Pacina kukana-kana, ivona vaienda kumusongano sumana jese ku sinagoga yo Nazareta, vaiendazve gore ngo gore ku Phasika yaiitwa gore ngo gore ku Jerusarema. (Luka 2:41; 4:16) Ivona kangaije vaiita hwendo uhu ku Jerusarema kuti vajijise Jesu no hama jake ngo pamusoro po zvakaitikira vandhu va Jehovha kareko. Kangaije povaiita hwendo uhu vaivhakacira ndau jinonangwa mu Matahwa. Mbhuri yavo poyainga yecikura, azvicainga zvakareruka kuna Josefa na Mariya kuti varambe vecinamata Jehovha nguva jese. Asi ivona vakakomborehwa ngo kuita zvondhozvo. Zvecivoneka kuti ivona vakadira Jehovha pakutanga, mbhuri yavo yakaenderera mberi ku divi ro kumujimu.

10. Ngozvapi zvinojija vabari vo Cikristu kuvhira ku muezaniso wa Josefa na Mariya?

¹⁰ Vabari vanoda Jehovha vanojijenyi ngo muezaniso wa Josefa na Mariya? Cinosisira maningi, ngo co kujijisa vana ngo magama no zviito kuti imwimwi munoda Jehovha kamare. Vonanyi  kuti cipo cikuru camungapa vana venyu, ngo kuvabesera kuti vade Jehovha. Ciro cikuru camungajijisa vana venyu, ngo co kuvabesera kuti vajije Bhaibheri nguva jese, vaite mukumbiro, kwenda kumusongano no kwenda mu basa ro kucumaera. (1 Timoti 6:6) Zvokadi kamare, mungatopavo vana venyu zviro zvokunyama zvavanoda. (1 Timoti 5:8) Asi, ceujanyi kuti zvinozobesera vana venyu kuti vave no ushamwari hwo phedo na Jehovha, asipi zviro zvokunyama. Zve zviro zvokunyama izvi, azvizovaponesi pa kuparajwa ko nyika ino no kunghwina mu nyika imbza. *—Ezekieli 7:19; 1 Timoti 4:8.

11. (a) Ngwajo yatinowana pana 1 Timoti 6:17-19, inobeseresa kudini vabari kuti vateme zvivaringo zvakanaka pavanonga vacirera vana vavo? (b) Ngozvapi zviro zviri kuitwa ngo mbhuri jimweni zve vari kuwana makomborero api? (Vonanyi bhokiso rinoti: “ Ngozvapi Zvido Zvamunoda Kuva Nazvo?”)

¹¹ Zvinodakajisa maningi kuvona kuti vabari vazinji vo Cikristu vari kukwanisa kubesera vana vavo kuti vave phedo na Jehovha. Ivona vanonamata pamwepo Jehovha. Vanoenda vese kumusongano no ku magungano. Vanoshanda vese mu basa ro kucumaera. Mbhuri jimweni jinotokwanisa kwenda koshanda ku ndima jicizivi kushandwa maningi. Vamweni vanoenda kovhakacira Bheteri kana kobesera kuvaka ndau jinoshandiswa ngo sangano ra Jehovha. Mbhuri jinosana kuita zvondhozvo, jinopeja mare yakawanda ngo kuzviita. Zve kangaije zvingatovanesera. Asi Jehovha anovakomborera ngo kuita kwavo zvondhozvo. (Verenganyi 1 Timoti 6:17-19.) Vana vakarehwa mu mbhuri jakadari kazinji vanoenderera mberi vecibatisisa zvovakajijiswa zve avazvisii! *—Mazwi Akangwara 10:22.

12. Jesu wakadikana kuitenyi paainga acikura?

¹² Nguva jese Baba va Jesu vo mugore vaitema zvivaringo zvaushoni zve majibaba ake o pasi pano aitemavo zvivaringo zvaushoni. Asi, Jesu paaikura waidikana kujitemera ega zvivaringo zvake. (VaGalàsia 6:5) Inga itusu tese, iyena waingavo no rusujunuko wo kujikhetera. Iyena waizokwanisavo kuita zviro zvaanoda basi, wotama kuita kuda ka Jehovha. Kusiyapo kuita zvondhozvo, wakakheta kuva no ushamwari hwakanaka na Jehovha. (Johani 8:29) Muezaniso wake ungabeseresa kudini majaha no vasikane nyamasi uno?

13. Ngocapi civaringo cinosisira cakaitwa ndi Jesu pikija paainga mujaha?

¹³ Paainga pasi pano, Jesu wakakheta kuzwira vabari vake. Iyena narini aazivi kuphurusa zvaaivhunjwa ngo vabari vake, ecirangarira kuti iyena anoziva maningi kupinda ivona. Kusiyapo zvondhozvo, “waivazwira.” (Luka 2:51) Pacina kukana-kana Jesu wainga mwana wo  dangwe, ngokudaro, iyena kangaije wainga no mabasa aaidikana kuita. Zvokadi kamare, iyena wakatodikana kushanda ngo simba pa basa raakajijiswa ndi baba wake Josefa kuti akwanise kusapota mbhuri yake.

14. Tinozvizivisa kudini kuti Jesu wainga mujiji waushoni wo Soko ra Mwari?

¹⁴ Vabari va Jesu kangaije vakamuvhunja ngo pamusoro po kubahwa kwaakaitwa ngo mushamaiso no zvovakavhunjwa ngo ndhumwa ja Mwari ngo pamusoro pake. (Luka 2:8-19, 25-38) Jesu aazivi kudakara basi ngo zvaakavhunjwaro; asi iyena wakajija Matahwa kuitira iyena kamare. Tinozvizivisa kudini kuti Jesu wainga mujiji waushoni wo Soko ra Mwari? Tinozviziva ngokuti pikija paainga mujaha, vajijisi ku Jerusarema “vaikahamara ngo uzivi hwake no mipinguro yake.” (Luka 2:46, 47) Zve paainga no gumi na maviri o makore basi, Jesu wakavonesa pacake kuti Jehovha wainga Baba wake.—Luka 2:42, 43, 49.

15. Jesu wakakhombijisa kudini kuti wakakheta kuita kuda ka Jehovha?

¹⁵ Jesu paainga ecijijira kuti ngozvapi zvaida Jehovha kuti iyena aite, iyena wakakheta kuita kuda ka Jehovha. (Johani 6:38) Waizviziva kuti waizonyenyiwa ngo vazinji, pikija acaidepi zvondhozvo wakakheta kuzwira basi. Hina, iyena wakakheta kuzwira Jehovha. Paakabhabhatijwa mu gore ra 29 N.V.Y., cido cake cikuru cainga co kuita kuda ka Jehovha. (Vaheberi 10:5-7) Pikija paainga ecifa pa danda ro kutambujikira, iyena wakaenderera mberi no cido cake co kuda kuita kuda ka Baba wake.—Johani 19:30.

16. Vana vangajijenyi ngo muezaniso wa Jesu?

¹⁶ Zwiranyi vabari venyu. Inga ndi Josefa na Mariya, vabari venyu avazivi kukwana. Asi vabari venyu vakagajwa ndi Jehovha kuti vamujivirire, vamujijise no kumutungamirira. Kudari mukapurukira mbhangiro javo no kuvareremeja, imwimwi ‘munozogarika.’—VaEfeso 6:1-4.

17. Mukuzwirana na Joxwa 24:15, majaha anodikana kutema civaringo capi?

¹⁷ Khetanyi wamunoda kushandira. Munodikana kujikhohwesa kuti Jehovha ndiyani kamare, cidisiso cake cinobatanijenyi zve mungaitisa kudini kuda kwake mu upenyu hwenyu. (VaRoma 12:2) Mukaita kudaro, munozokwanisa kutema civaringo cinosisira maningi mu upenyu hwenyu, civaringo co kushandira Jehovha. (Verenganyi Joxwa 24:15; Mucumaeri 12:1) Kudari mukaramba meciverenga Bhaibheri no kurijija njiku jese, rudo hwenyu hunozoenderera  mberi wecikura zve rutendo hwenyu kwaari unozovanga maningi.

18. Majaha anodikana kusana kuitenyi zve ngowapi unozova muviyo?

¹⁸ Diranyi Jehovha pakutanga mu upenyu hwenyu. Nyika ya Sathana inonanga kuti kudari mundhu akashandisa zvaanazvo kuitira iyena pacake, anozodakara. Asi itusu tinoziva kuti, vaya vanopsaka zviro zvokunyama “vanocamwa vecijitambuja kamare.” (1 Timoti 6:9, 10) Ngo divi rimweni, kudari mukakheta kuzwira Jehovha no kuita kuda kwake, munozobudirira zve ‘munozoita uxoni bzese bzo munoda kuita.’—Joxwa 1:8.

19. Vabari vanodikana kuceujenyi?

¹⁹ Vabari itanyi zvese zvamunokwanisa kuti mubesere mbhuri yenyu kuti ishandire Jehovha. Muthembenyi zve iyena anozomubesera kutema zvivaringo zvaushoni. (Mazwi Akangwara 3:5, 6) Ceujanyi kuti vana venyu vanozobesereka maningi ngo zvamunoita kuciripi zvamunonanga. Ngokudaro, temanyi zvivaringo zvinovabesera kuti vave vecitendehwa ndi Jehovha.

20. Makomborero api anozova no majaha kudari akakheta kushandira Jehovha?

²⁰ Majaha no vasikane, vabari venyu vangamubesera kuti muteme zvivaringo zvaushoni mu upenyu. Asi imwimwi munodikana kutema zvivaringo zvondhozvo kuti mudakajise Jehovha. Ngokudaro, tevejeranyi muezaniso wa Jesu zve khetanyi kushandira Baba wenyu vano rudo vo mugore. Mukaita kudaro, munozova no makomborero akawanda maningi zve anodakajisa. (1 Timoti 4:16) Zve kumbejiyo, munozova no upenyu unodakajisa maningi!