1. Hadia gangetula fondrege zi sökhi si tola tahalö?

SI TOʼÖLÖNIA, tola molua-lua ba ndraono gangetula nihalö ndra satuara irugi waʼebua-buara. Na lahalö gangetula si lö tefaudu ira satua, tola tobali abula dödö daʼö ba ndraonora. Hizaʼi, na lahalö gangetula si tefaudu, tola larasoi waʼomuso dödö iraonora. Moguna göi lahalö gangetula si tefaudu iraono. Angetula fondrege zi sökhi si tola tahalö yaʼia daʼö ba wamosumange Namada sebua faʼomasi sotöi Yehowa.​—Zin. 73:28.

2. Hadia gangetula si tefaudu nihalö Yesu hegöi ira satuania?

² Omasi ndra satua Yesu sotöi Yosefo hegöi Maria, ba wanolo iraonora enaʼö tobali samosumange Yehowa. Moroi ba gangetula nihalöra, tola oroma wa famosumange Yehowa zabölö tohude ba waʼaurira. (Luk. 2:40, 41, 52) Ihalö göi gangetula si tefaudu Yesu, irege tola ifalua gohitö dödö Yehowa. (Mat. 4:1-10) Tobali Yesu ira matua si sökhi tödö, si lö faröi, ba sangokhögö faʼabarani. Tatu omuso dödö ndra satua sangomasiʼö Yehowa na laʼokhögö ndraono simane Yesu.

3. Hadia manö wanofu-nofu nitutunöda ba artikel daʼa?

³ Ba artikel daʼa, tatutunö wanofu-nofu andre: Hadia manö gangetula si tefaudu si no ihalö Yehowa soguna khö Yesu? Hadia wamahaʼö si tola lahalö ira satua si no tobali niha Keriso, moroi ba gangetula nihalö Yosefo hegöi Maria? Ba hadia wamahaʼö si tola lahalö ira si bohou ebua si no tobali niha Keriso, moroi ba gangetula nihalö Yesu?

4. Hadia gangetula si tohude nihalö Yehowa soguna khö Yesu?

⁴ No ifili Yehowa zatua si sökhi sibai khö Yesu. (Mat. 1:18-23;  Luk. 1:26-38) Ebua sibai waʼomasi Maria khö Yehowa hegöi Taromalinia. Tola oroma daʼö, moroi ba wehede nifaʼemania soroi ba dödö, si no tesura ba Zura Niʼamoniʼö. (Luk. 1:46-55) Hewisa göi sanandrösa khö Yosefo? Me irongo wanuturu lala moroi khö Yehowa, iʼanemaiʼö ifalua daʼö. Daʼa zangoromaʼö wa iʼomasiʼö Yehowa ba omasi ia ba wangomusoiʼö tödö Lowalangi.​—Mat. 1:24.

5-6. Hadia manö gabula dödö si lö itimbagö Yehowa ba waʼauri Yesu?

⁵ Tenga niha si kayo nifili Yehowa si tobali satua Yesu. Me no aefa tumbu Yesu, ha fofo nibeʼe Yosefo hegöi Maria si tobali sumange. Daʼa zangoromaʼö wa yaʼira andrö ösi nomo si numana. (Luk. 2:24) Yosefo andrö samösa tuka geu, ba tola manö no ifazökhi nahiania wohalöwö side-ide ba zi tambai nomora si so ba Nazareta. Tatu no öna-öna sibai waʼaurira, mendrua manö me so mato dafitu ndraonora.​—Mat. 13:55, 56.

⁶ Sindruhu sa, ibeʼe Yehowa wolumöʼö khö Yesu me so ösa deʼala sedöna alua khönia. Hizaʼi, tenga daʼö geluahania wa itimbagö fefu gabula dödö salua khö Nononia andrö. (Mat. 2:13-15) Duma-dumania, so ösa nösi nomo Yesu si lö faduhu tödö ba wamobörö wa yaʼia andrö Mesia. Tatu afatö sibai dödö Yesu ba nifaluara andrö. (Mrk. 3:21; Yoh. 7:5) Baero daʼö, te mate namania sotöi Yosefo me awuyu-wuyu nasa Yesu. Tatu abu sibai dödönia me alua daʼö. Börö me ono siaʼa Yesu, tola manö yaʼia zanohugö halöwö namania. (Mrk. 6:3) Me itugu ebua-bua Yesu, yaʼia zangonorogö tödö soguna ba nösi nomonia. Tola manö moguna iforege wohalöwö ba wombönökhi soguna khöra. Börö daʼö, tatu no aboto ba dödö Yesu hewisa waʼamarase na no aefa mohalöwö ba zi maʼö-maʼökhö faʼara.

7. (a) Hadia manö wanofu sinangea laʼangeragö ira fongambatö sanandrösa ba wondrorogö iraono? (b) Simane nisura ba Gamaedola 2:1-6, hadia wamomaha sinangea labeʼe ira satua khö ndraonora?

⁷ Na no mongambatö ndraʼugö ba edöna öʼokhögö ndraono, sofu khöu samösa, ’Hadia so khöma wangide-ngideʼö, ba maʼomasiʼö Yehowa hegöi Taromalinia? Hadia no sinangea ndraʼaga föna Yehowa ba wondrorogö iraono, si tobali buala sebua böli moroi khönia?’ (Zin. 127:3, 4) Na no so ndraonomö, sofu khöu samösa, ’Hadia no ufahaʼö ndraonogu enaʼö laʼila hawaʼamoguna wamorege fohalöwö?’ (Zango. 3:12, 13) ’Hadia no uforege ba wamalua sabölö sökhi ba wolumöʼö yaʼira, moroi ba gulidanö nifatörö  Zatana andre?’ (Gamd. 22:3) Sindruhu sa, tebai ötimbagö fefu gabula dödö si tola alua khö ndraonou. Hizaʼi, tola lö öböhöli ba wamahaʼö yaʼira si fao faʼomasi irege aboto ba dödöra hewisa lala ba wangalui mene-mene ba Zura Niʼamoniʼö. Na öfalua daʼö, no öfaʼanö ira ba wanaögö abula dödö si tola alua khöra. (Baso Gamaedola 2:1-6.) Duma-dumania, na so nösi nomou si faröi khö Yehowa, ogunaʼö Daromali Lowalangi ba wanolo iraonomö enaʼö aboto ba dödöra hadia mbörö wa moguna lö faröi ita khö Yehowa. (Zin. 31:24) Mazui, na no mate niha niʼomasiʼömi, foromaʼö khö ndraonou ayati si tola möi fondrara dödöra ba sangabölöʼö yaʼira.​—2 Kor. 1:3, 4; 2 Tim. 3:16.

8. Simane nisura ba 5 Moze 6:6, 7, hadia zinangea lafalua ira Yosefo hegöi Maria?

⁸ No mofozu Yosefo hegöi Maria ba wangebuaʼö Yesu irege tola tobali ia niha sangomusoiʼö tödö Lowalangi. Tola lafalua daʼö börö me laʼoʼö wanuturu lala nibeʼe Yehowa khö ndra satua. (Baso 5 Moze 6:6, 7.) Laʼomasiʼö sibai Yehowa ira Yosefo hegöi Maria, ba no tobali ohitö dödöra fondrege zi tohude ba wanolo iraonora ba wangomasiʼö Yehowa.

9. Hadia manö gangetula si tohude nihalö Yosefo hegöi Maria?

⁹ Owölö-ölö Yosefo hegöi Maria ba wamalua famosumange khö Yehowa, ba lafaogö göi khöra ndraonora. Ero migu, laʼondrasi gangowuloa nifalua ba nahia waʼowulo si so ba Nazareta. Ba ero röfi, lafalua Gowasa Fasa nifalua ba Yeruzalema. (Luk. 2:41; 4:16) Sagötö wofanöra numalö ba Yeruzalema, tola manö lafahaʼö Yesu hegöi ira akhinia sanandrösa ba waö-waö ndraono mbanua Yehowa. Te möi ira laʼondrasi ngawalö nahia si no mutötöi bakha ba Zura Niʼamoniʼö. Börö me itugu monönö waʼato ndraonora, tola manö abua khö Yosefo hegöi Maria ba wondrorogö enaʼö lö aetu lafalua wamosumange khö Yehowa. Hizaʼi, oya mbua nitemara. Börö me laʼofönaiʼö wamosumange khö Lowalangi, lö aetu aro wahuwusa nösi nomora khö Yehowa.

10. Hadia wamahaʼö si tola lahalö ira satua si no tobali niha Keriso, moroi ba duma-duma Yosefo hegöi Maria?

¹⁰ Na satua si no tobali niha Keriso ndraʼugö, hadia wamahaʼö si tola öhalö moroi ba duma-duma Yosefo hegöi Maria? Fondrege zi sökhi si tola öfalua ba ndraonomö yaʼia daʼö ötolo ira ba wangomasiʼö Yehowa. Börö daʼö, moguna öforomaʼö moroi ba wehede hegöi amuatamö wa  öʼomasiʼö sibai Yehowa. Ba moguna göi öfahaʼö ira hewisa lala enaʼö owölö-ölö ira ba wamalua famahaʼö ba Zura Niʼamoniʼö, fangandrö, feʼamöi ba gangowuloa, hegöi fanuriaigö. No famahaʼö fondrege zebua böli daʼö si tola öbeʼe khöra. (1 Tim. 6:6) Tatu manö, moguna göi öbönökhi zoguna ba ndraonomö. (1 Tim. 5:8) Hizaʼi, böi olifuʼö wa tebai möi fanolo ndraonomö harato andrö, irege tola teʼorifi ira ba gamozua götö danö andre ba lakhamö gulidanö si bohou. Ha fahuwusa saro khö Yehowa zi tola mangorifi yaʼira. *—Hez. 7:19; 1 Tim. 4:8.

11. (a) Hewisa wa tola möi fanolo ndra satua mene-mene si so ba 1 Timoteo 6:17-19, irege tola lahalö gangetula si tefaudu ba wangebuaʼö iraonora? (b) Hadia manö gohitö dödö si tola laʼangeragö ira ösi nomomö, ba hadia manö howu-howu si tola mirasoi na mifalua daʼö? (Faigi kotak ” Hadia Manö Gohitö Dödömi ba Wamati?”)

¹¹ Tatu omuso dödöda me taʼila wa ato ndra satua si no tobali niha Keriso sangai angetula si tefaudu, irege tola fahuwu ndraonora khö Yehowa. Lö aetu fao ira ba wamosumange Yehowa, laʼondrasi gangowuloa hegöi angowuloa sebua, ba fao göi ira manuriaigö. So göi ösa nösi nomo si tola manuriaigö ba mbanua si lö asese muturiaigö. So göi zi möi tur ba Mbetieli, mazui si fao ba wolului halöwö famazökhi tomosa nifalua organisasi. Enaʼö tola lafalua daʼö, tola manö oya gefe si no latehegö ira ösi nomo andrö ba te göi so ösa daha-taha nitaögöra. Hizaʼi, hasambalö latema howu-howu soya sibai moroi khö Yehowa. (Baso 1 Timoteo 6:17-19.) Ato ndraono niʼebuaʼö ba nösi nomo simane daʼö, si lö mamöhöli ba wamalua ngawalö zi sökhi andrö irugi ba waʼebua-buara. Tatu laʼandrö sibai saohagölö börö me no latema wamahaʼö simane daʼö moroi khö ndra satuara! *—Gamd. 10:22.

12. Hadia manö zinangea ifalua Yesu me itugu ebua-bua ia?

¹² Lö aetu ihalö gangetula si tefaudu Ama Yesu si so ba zorugo, ba lahalö göi gangetula si sökhi ira satuania si so ba gulidanö. Hizaʼi, me itugu ebua-bua Yesu, moguna ihalö samösa gangetula. (Gal. 6:5) Simane yaʼita, no göi tebeʼe ginötö khö Yesu ba wangai angetula samösa. Sindruhunia, tola ifili ba wangofönaiʼö somasi-masi dödönia. Hizaʼi, lö ifalua daʼö Yesu. Ifili ba wondrorogö fahuwusania khö Yehowa. (Yoh. 8:29) Hadia wamahaʼö si tola lahalö ira si bohou ebua moroi ba duma-duma Yesu?

13. Hadia gangetula si tohude nihalö Yesu iʼotarai ba waʼide-idenia?

¹³ Iʼotarai ba waʼide-idenia, no ifili Yesu ba woloʼö niwaʼö ndra satuania. Lö irai iwaʼö tödönia wa abölö oya niʼilania moroi khöra. Börö daʼö, lö irai itimbagö mene-mene nibeʼera. Hizaʼi, ”iʼoʼö hadia niwaʼöra”. (Luk. 2:51) Tatu no ihaogö sibai Yesu ba wamalua noro dödönia tobali ono siaʼa. Iforege ba wamahaʼö  yaʼia moroi khö namania sotöi Yosefo, enaʼö iʼokhögö nekhe-nekhe danga tobali tuka eu ba tola ilului ba wombönökhi soguna ba nösi nomonia.

14. Hadia dandra sangoromaʼö wa owölö-ölö Yesu ba wamahaʼö yaʼia ba Daromali Lowalangi?

¹⁴ Tola manö no lafatunö khö Yesu ira satuania sanandrösa ba waʼatumbunia sahöli-höli dödö. Te göi no lafatunö khönia wehede ndra malaʼika sanandrösa khönia. (Luk. 2:8-19, 25-38) Hizaʼi, tenga ha ba wehede ndra satuania ifahaʼö ia Yesu. Ifahaʼö samösa göi ia ba nösi Zura Niʼamoniʼö. Hadia dandra sangoromaʼö wa owölö-ölö Yesu ba wamahaʼö yaʼia ba Daromali Lowalangi? Me fahuhuo ia khö ndra samahaʼö ba agama me ide-ide ia, ”ahöli-höli dödö zamondrongo börö me oya zaboto ba dödönia hegöi fanema li nibeʼenia”. (Luk. 2:46, 47) Hewaʼae na awena 12 fakhe ndröfinia, no iforege sibai Yesu ba wamahaʼö yaʼia ba Zura Niʼamoniʼö irege tola faduhu dödönia wa Amania Yehowa andrö.​—Luk. 2:42, 43, 49.

15. Hewisa wangoromaʼö Yesu wa no ihalö gangetula ba wamalua ohitö dödö Namania?

¹⁵ Me iʼila Yesu hadia noro dödö nibeʼe Yehowa khönia, ihalö gangetula ba wamalua daʼö. (Yoh. 6:38) Tola manö abu dödönia börö me iʼila wa hasambalö fatuwu khönia niha sato. Hewaʼae simanö, lö tebulö gangetulania ba wamosumange Yehowa. Me no aefa tebayagö ia idanö me döfi 29 M, famalua ohitö dödö Yehowa zabölö iʼofönaiʼö ba waʼaurinia. (Heb. 10:5-7) Me so ia ba döla geu famakao, lö tebulö ihalö gangetula ba wamalua ohitö dödö Namania.​—Yoh. 19:30.

16. Hadia wamahaʼö si tola lahalö iraono moroi ba duma-duma Yesu?

¹⁶ Oʼö li ndra satuamö. Simane Yosefo hegöi Maria, lö moʼahonoa ndra satuamö. Hizaʼi, no ibeʼe khöra noro dödö Yehowa ba wondrorogö hegöi ba woʼamenesi yaʼugö. Na öfondrondrongo mene-mene nibeʼera ba öfosumange ira, hasambalö ”ohahau dödöu” ba waʼauri.​—Ef. 6:1-4.

17. Moloʼö Yosua 24:15, hadia gangetula sinangea lahalö ira si bohou ebua?

¹⁷ Fili haniha nifosumangeu. Moguna sindruhu-ndruhu aboto ba dödöu hewisa mbua-bua Yehowa, hadia gohitö dödönia, ba hewisa lala enaʼö tola öfalua gohitö dödönia andrö. (Rom. 12:2) Tola möi fanolou fefu daʼö ba wangai angetula fondrege zi tohude ba waʼauriu, yaʼia daʼö ba wamosumange Yehowa. (Baso Yosua 24:15; Zango. 12:1) Andrö, böi böhöli ba wombaso hegöi ba wamahaʼö yaʼugö ba Zura  Niʼamoniʼö si fao faʼowölö-ölö. Na öfalua daʼö, tola itugu öʼomasiʼö Yehowa ba itugu mamati ndraʼugö khönia.

18. Hadia gangetula sinangea lahalö ira si bohou ebua, ba hadia mbuania?

¹⁸ Ofönaiʼö wamalua ohitö dödö Yehowa ba waʼauriu. No ifabuʼu ulidanö Zatana andre wa hasambalö örasoi waʼowua-wua dödö na öʼogunaʼö waʼatua-tuamö ba zoguna khöu samösa. Hizaʼi sindruhunia, niha solohi faʼakayo andrö, ”oya nifoböröra khöra faʼafökhö”. (1 Tim. 6:9, 10) Hizaʼi, na öfondrondrongo niwaʼö Yehowa ba öʼofönaiʼö wamalua ohitö dödönia, hasambalö ”sökhi lua-lua wolaumö ba falukhaʼö zalöfö”.​—Yos. 1:8.

19. Hadia zi tebai laʼolifugö ira satua?

¹⁹ Yaʼami ira satua, miforege ba wanolo iraonomi enaʼö tola tobali ira samosumange Yehowa. Böi miböhöli ba wangodaligö Yehowa, ba hasambalö itolo ami ba wangai angetula si tefaudu. (Gamd. 3:5, 6) Böi miʼolifugö wa abölö molua-lua ba ndraono gamuatami moroi ba wehedemi. Börö daʼö, mihalö gangetula si tola manolo yaʼira ba wangomusoiʼö tödö Yehowa.

20. Hadia manö howu-howu nirasoi ndra si bohou ebua na lafili ba wamosumange Yehowa?

²⁰ Yaʼami si bohou ebua, tola labeʼe khömi wanolo ira satuami ba wangai angetula si tefaudu. Hizaʼi, yaʼami samösa zinangea mangai angetula andrö enaʼö tola miʼomusoiʼö dödö Yehowa. Börö daʼö, moguna miʼoʼö duma-duma Yesu ba mihalö gangetula ba wamosumange Namami sebua faʼomasi. Na mifalua daʼö, tola mofozu waʼaurimi, mirasoi waʼowua-wua dödö, ba tola mifalua ngawalö halöwö si sökhi. (1 Tim. 4:16) Baero daʼö, tola mirasoi waʼomuso dödö sindruhu ba zi so miföna!