1. Ke phetho efe e botse yeo yo mongwe le yo mongwe wa rena a ka e dirago?

GANTŠI diphetho tšeo batswadi ba di dirago di kgoma bana ba bona ka nako e telele. Ge batswadi ba ka se dire diphetho tše dibotse, seo se ka bakela bana ba bona mathata. Eupša ge ba ka dira diphetho tše dibotse seo se tla dira gore bana ba bona ba thabele bophelo. Ke nnete gore bana le bona ba swanetše go dira diphetho tše dibotse. Phetho e botse yeo yo mongwe le yo mongwe wa rena a ka e dirago ke ya go hlankela Tatago rena yo a re ratago e lego Jehofa.—Ps. 73:28.

2. Ke diphetho dife tše dibotse tšeo Jesu le batswadi ba gagwe ba ilego ba di dira?

² Josefa le Maria ba be ba nyaka go thuša bana ba bona gore ba hlankele Jehofa, le gona ba ile ba bontšha ka diphetho tšeo ba bego ba di dira gore go hlankela Jehofa go bohlokwa kudu maphelong a bona. (Luka 2:40, 41, 52) Jesu le yena o ile a dira diphetho tše dibotse. Seo se ile sa mo thuša gore a kgone go dira dilo tšeo Jehofa a bego a nyaka gore a di dire. (Mat. 4:1-10) Jesu o ile a ba le botho, a botega e bile a ba le sebete. Batswadi ka moka bao ba ratago Jehofa ba be ba tla thabela go ba le ngwana yo a swanago le yena.

3. Re tlo araba dipotšišo dife sehlogong se?

³ Mo sehlogong se, re tlo araba dipotšišo tše di latelago: Ke diphetho dife tše dibotse tšeo Jehofa a ilego a di dira ka Morwa wa gagwe Jesu? Batswadi ba Bakriste ba ka ithuta’ng diphethong tšeo Josefa le Maria ba ilego ba di dira? Gona bafsa ba Bakriste ba ka ithuta’ng diphethong tšeo Jesu a ilego a di dira?

4. Ke phetho efe e bohlokwa yeo Jehofa a ilego a e dira ka Morwa wa gagwe?

⁴ Ge Jehofa a be a kgetha batswadi ba Morwa wa gagwe, o ile a ba kgetha gabotse. (Mat. 1:18-23; Luka 1:26-38) Mantšu a Maria a tšwago pelong ao a ngwadilwego ka Beibeleng a hlalosa kamoo a bego a rata Modimo le Lentšu la gagwe ka gona. (Luka 1:46-55) Tsela yeo Josefa a bego a ekwa Jehofa ka yona e be e bontšha gore o be a mo rata e bile a nyaka go mo thabiša.—Mat. 1:24.

5-6. Jehofa o ile a dumelela gore Morwa wa gagwe a lebeletšane le mathata afe?

⁵ Jehofa ga se a kgethela Jesu batswadi bao ba humilego. Sehlabelo seo Josefa le Maria ba ilego ba se dira ka morago ga gore Jesu a belegwe se be se bontšha gore e be e se bahumi. (Luka 2:24) Go bonagala Josefa a be a na le lefelo le lenyenyane leo a bego a šomela go lona e le mmetli ka ntlenyana ga Natsaretha. Ba be ba se na dilo tše dintši goba tšhelete e ntši, kudukudu ka ge ka morago ba ile ba ba le bana ba šupa goba go feta moo.—Mat. 13:55, 56.

⁶ Jehofa o ile a šireletša Jesu dikotsing tše itšego, eupša ga se ka mehla moo a ilego a dula a mo šireletša. (Mat. 2:13-15) Ka mohlala, batho ba bangwe ba gabo ba be ba sa dumele go yena. Nagana gore o ile a kwa bohloko bjang ge ba bangwe ba gabo mathomong ba be ba sa dumele gore ke yena Mesia. (Mar. 3:21; Joh. 7:5) Se sengwe gape seo se ilego sa mo kweša bohloko ke gore go bonagala Josefa a ile a hlokofala e sa le yo monyenyane. Ka ge Jesu e be e le yena wa mathomo ka gabo, go ka direga gore ka morago ga lehu la Josefa ke yena a ilego a swanelwa ke go hlokomela kgwebo ya ka lapeng la gabo. (Mar. 6:3) Ge Jesu a be a gola, o ile a ithuta go hlokomela ba lapa la gabo. Go bonagala a ile a swanelwa ke go šoma ka thata gore ba hwetše tšhelete le dilo tšeo ba di hlokago. Ka gona o be a tseba gore go bjang go lapišwa ke go šoma ka thata letšatši ka moka.

7. (a) Ke dipotšišo dife tšeo di ka thušago banyalani go godiša bana? (b) Go ya ka Diema 2:1-6, batswadi ba ka ruta bjang bana ba bona?

⁷ Ge e ba le le banyalani gomme le ka rata go ba le bana, ipotšišeng gore: ‘Na re batho ba ikokobeditšego bao ba ratago Jehofa le lentšu la gagwe? Na Jehofa a ka re kgetha gore re hlokomele leseanyana?’ (Ps. 127:3, 4) Ge e ba o šetše o le motswadi ipotšiše gore: ‘Na ke ruta bana ba ka bohlokwa bja go šoma ka thata?’  (Mmo. 3:12, 13) ‘Na ke dira sohle seo nka se kgonago go šireletša bana ba ka dikotsing tšeo di ka ba welago lefaseng le la Sathane?’ (Die. 22:3) O ka se kgone go šireletša bana ba gago kotsing e nngwe le e nngwe yeo e ka ba welago. Seo ruri se ka se kgonege. Eupša o ka ba thuša ka gore o dule o ba ruta go nyaka dikeletšo tšeo di lego ka Beibeleng. (Bala Diema 2:1-6.) Ka mohlala, ge e ba yo mongwe wa ka lapeng a ka kgetha go tlogela go hlankela Jehofa, thuša bana ba gago gore ba ithute ba diriša Beibele go bona gore ke ka baka la eng go le bohlokwa gore re dule re botegela Jehofa. (Ps. 31:23) Goba ge e ba wa leloko goba mogwera a ka hlokofala, bontšha bana ba gago ditemana tša ka Beibeleng tšeo di ka ba homotšago goba tšeo di ka ba thušago go hwetša khutšo.—2 Bakor. 1:3, 4; 2 Tim. 3:16.

8. Go ya ka Doiteronomio 6:6, 7, ke’ng seo Josefa le Maria ba bego ba swanetše go se dira?

⁸ Josefa le Maria ba ile ba thuša Jesu gore a gole a amogelwa ke Jehofa, ka gobane ba ile ba latela tlhahlo yeo Jehofa a bego a e file batswadi. (Bala Doiteronomio 6:6, 7.) Ka ge Josefa le Maria ba be ba rata Jehofa, selo se bohlokwa go bona e be le go thuša bana ba bona gore le bona ba mo rate ka tsela e swanago.

9. Ke diphetho dife tše bohlokwa tšeo Josefa le Maria ba ilego ba di dira?

⁹ Josefa le Maria ba ile ba kgetha go dula ba hlankela Jehofa gotee le bana ba bona. Ga go pelaelo gore beke le beke ba be ba eya sinagogeng e bile ngwaga le ngwaga ba eya Jerusalema go yo keteka Paseka. (Luka 2:41; 4:16) Go ka direga gore ge ba be ba eya Jerusalema ba be ba tšama ba ruta Jesu le bana babo ka seo se ilego sa diragalela batho ba Modimo. Le gona go ka direga gore ge ba be ba le tseleng ba be ba etela mafelo a mangwe ao go bolelwago ka ona ka Mangwalong. Ge lapa la bona le be le gola, go ile gwa se sa ba bonolo gore Josefa le Maria ba hlankele Jehofa ka tsela yeo ba bego ba e tlwaetše. Eupša Jehofa o ile a ba šegofatša. Ka ge ba be ba etiša go hlankela Jehofa pele, lapa la bona le ile la dula le na le segwera se sebotse le Jehofa.

10. Ke dilo dife tšeo batswadi ba Bakriste ba ka ithutago tšona go Josefa le Maria?

¹⁰ Batswadi bao ba ratago Jehofa ba ka ithuta’ng go Josefa le Maria? Selo sa bohlokwa kudu ke gore o bontšhe bana ba gago gore o rata Jehofa kudu ka seo o se dirago le seo o se  bolelago. Mpho e kgolo yeo o ka e fago bana ba bago bophelong ke go ba ruta go rata Jehofa. Dilo tše bohlokwa tšeo o ka ba rutago tšona ke gore ba bale Beibele ka mehla, ba rapele, ba ye dibokeng le go ya tšhemong. (1 Tim. 6:6) Ke nnete gore o swanetše go hlokomela bana ba gago ka dilo tše dingwe gape tšeo ba di hlokago. (1 Tim. 5:8) Eupša dula o gopola gore seo se tlago go thuša bana ba gago go phologa ge lefase le la Sathane le fedišwa, ke segwera sa bona le Jehofa, e sego tšhelete goba dilo tšeo ba nago le tšona. *—Hesek. 7:19; 1 Tim. 4:8.

11. (a) Keletšo yeo e lego go Timotheo wa Pele 6:17-19 e ka thuša bjang batswadi go dira diphetho tše dibotse ge ba godiša bana ba bona? (b) Ke dilo dife tšeo lapa la gago le ka di dirago, gona le ka hwetša ditšhegofatšo dife? (Bona lepokisi leo le rego, “ Ke Dilo Dife Tšeo Lapa le ka di Dirago?”)

¹¹ Ruri go a kgothatša go bona batswadi ba bantši ba dira diphetho tše dibotse tša go thuša bana ba bona gore ba be le segwera se sebotse le Jehofa! Ba dula ba hlankela Jehofa ba le gotee. Ba ya ka moka dibokeng le dikopanong. E bile gape ba ya tšhemong ka moka. Malapa a mangwe a kgona le go ya tšhemong yeo re sa e šomego gantši. A mangwe a etela magaeng a Bethele mola a mangwe a thuša moo go agwago mafelo a mokgatlo. Malapa ao a kgethago go dira dilo tše ka moka a diriša tšhelete ya ona, gomme ka dinako tše dingwe go ka no se be bonolo. Eupša Jehofa o tla a šegofatša kudu. (Bala 1 Timotheo 6:17-19.) Bana bao ba godišitšwego ka malapeng a bjalo gantši ba tšwela pele ba dira dilo tšeo tše dibotse le ge ba godile, e bile ba leboga gore batswadi ba bona ba ba godišitše gabotse! *—Die. 10:22.

12. Jesu o ile a swanelwa ke go dira’ng ge a dutše a gola?

¹² Tatago Jesu wa legodimong e lego Jehofa ka mehla o dira diphetho tše dibotse, le batswadi ba Jesu e lego Josefa le Maria le bona ba ile ba dira diphetho tše dibotse. Eupša ge Jesu a be a gola o ile a swanelwa ke go itirela diphetho. (Bagal. 6:5) Go no swana le rena, le yena o be a kgona go kgetha seo a nyakago go se dira. O be a ka no kgetha go itirela seo a se ratago. Eupša o ile a kgetha go dula a na le segwera se sebotse le Jehofa. (Joh. 8:29) Mohlala wa gagwe o ka thuša bjang bafsa lehono?

13. Ke diphetho dife tše bohlokwa tšeo Jesu a ilego a di dira ge e sa le yo monyenyane?

¹³ Ge Jesu e be e sa le yo monyenyane, o ile a kgetha go kwa batswadi ba gagwe. Ga se a ka a ba nyatša ka gobane a nagana gore o tseba dilo tše dintši kudu go ba feta. Go e na le moo o ile a “tšwela pele a ikokobeleditše bona.” (Luka 2:51) Ka ge Jesu e be e le yena wa mathomo ka gabo, o ile a dira sohle seo a ka se kgonago go  phetha maikarabelo ao a bego a na le wona. O ile a šoma ka thata go ithuta go Josefa go ba mmetli gore a tle a kgone go hlokomela lapa la gabo.

14. Re tseba bjang gore Jesu o be a rata go ithuta Lentšu la Modimo?

¹⁴ Batswadi ba Jesu ba ile ba mmotša ka mohlolo wo o diregilego gore a tle a belegwe, le ka seo barongwa ba ilego ba se bolela ka yena. (Luka 2:8-19, 25-38) Eupša ga se gwa felela moo, Jesu o ile a ithuta Mangwalo ka boyena. Re tseba bjang gore Jesu o be a rata go ithuta Lentšu la Modimo? Re tseba seo ka gobane ge e be e sa le mošemanyana, barutiši kua Jerusalema ba ile “ba makatšwa ke kwešišo ya gagwe le dikarabo tša gagwe.” (Luka 2:46, 47) Le gona ge a be a na le mengwaga e 12 feela, o be a šetše a ithutile Lentšu la Modimo gabotse moo a bego a kgodišegile gore Jehofa ke Tatagwe.—Luka 2:42, 43, 49.

15. Jesu o ile a bontšha bjang gore o kgethile go dira thato ya Jehofa?

¹⁵ Ka morago ga gore Jesu a tsebe gore Jehofa o nyaka a dira eng, o ile a kgetha go dira seo. (Joh. 6:38) O be a tseba gore batho ba bantši ba be ba tlo mo hloya. Le ge a be a sa nyake go hloiwa, o ile a no kgetha go kwa Jehofa. Ge Jesu a be a kolobetšwa ka 29 C.E., selo se bohlokwa go yena e be e le go dira seo Jehofa a se nyakago. (Baheb. 10:5-7) Le nakong ya ge a be a ehwa koteng ya tlhokofatšo, o be a sa ikemišeditše go dira thato ya Tatagwe.—Joh. 19:30.

16. Bana ba ka ithuta’ng go Jesu?

¹⁶ Ekwa batswadi ba gago. Go swana le Josefa le Maria, batswadi ba gago le bona ga se ba phethagala. Lega go le bjalo, ba kgethilwe ke Jehofa gore ba go šireletše, ba go rute le go go hlahla. Ge e ba o ekwa dikeletšo tša bona le go ba hlompha, dilo di tla ‘go sepelela gabotse.’—Baef. 6:1-4.

17. Go ya ka Joshua 24:15, ke phetho efe yeo bafsa ba swanetšego go itirela yona?

¹⁷ Kgetha gore o tlo hlankela mang. O swanetše go kwešiša gabotse gore Jehofa ke mang, thato ya gagwe ke eng le gore o ka e dira bjang bophelong bja gago. (Baroma 12:2) Seo se tla go thuša go dira phetho ya bohlokwa bophelong, e lego ya go hlankela Jehofa. (Bala Joshua 24:15; Mmo. 12:1) Ge e ba o na le lenaneo le lebotse la go bala Beibele le go ithuta e bile o le diriša, gona o tlo rata Jehofa kutšwanyana e bile le tumelo ya gago ya tia.

18. Ke kgetho efe yeo bafsa ba swanetšego go e dira, gona mafelo a seo e tla ba afe?

 ¹⁸ Kgetha go etiša thato ya Jehofa pele bophelong bja gago. Lefase le la Sathane le tshepiša bafsa gore ge e ba ba ka diriša bokgoni bja bona go ikhola, ba tla thaba kudu. Nnete ke gore bao ba nyakago go ba le dilo tše dintši lefaseng le, ba itlhaba “gohle ka mahloko a mantši.” (1 Tim. 6:9, 10) Eupša ge o ka theetša Jehofa, wa kgetha go etiša thato ya gagwe pele bophelong bja gago, o tla ‘dira dilo ka bohlale’ ke moka wa thabela bophelo.—Josh. 1:8.

19. Batswadi ba swanetše go gopola’ng?

¹⁹ Batswadi, dirang sohle se le ka se kgonago go thuša bana ba lena go hlankela Jehofa. Ithekgeng ka yena gomme o tla le thuša go dira diphetho tše dibotse. (Die. 3:5, 6) Le se ke la lebala gore bana ba lena ba kgoma kudu ke seo le se dirago go feta seo le se bolelago. Ka gona dirang diphetho tšeo di tlago go thuša bana ba lena gore ba dule ba amogelwa ke Jehofa.

20. Bafsa ba tlo hwetša ditšhegofatšo dife ge ba ka kgetha go hlankela Jehofa?

²⁰ Bafsa, batswadi ba lena ba ka le thuša go dira diphetho tše dibotse bophelong. Eupša mafelelong ke wena o swanetšego go dira phetho ya ge e ba o nyaka go kgahliša Jehofa. Ekiša mohlala wa Jesu gomme o kgethe go hlankela Tatago rena yo a re ratago. Ge o ka dira bjalo, bophelo bja gago bo tlo ba le morero wa ba wa bo thabela gona bjale. (1 Tim. 4:16) Ke moka nakong e tlago o tlo ipshina ka bophelo le go feta!