Bai na kontenido

Bai na kontenido

ARTÍKULO DI ESTUDIO 44

Nan Lo Sirbi Yehova ora Nan Bira Grandi?

Nan Lo Sirbi Yehova ora Nan Bira Grandi?

“Hesus a sigui krese físikamente i oumentá den sabiduria, i mas i mas e tabata haña aprobashon di Dios i di hende.”—LUK. 2:52.

KANTIKA 134 Yu Ta un Herensia di Dios

UN BISTA ADELANTÁ *

1. Kiko ta e mihó desishon ku un hende por tuma?

MAYORIA di biaha, desishon ku mayor ta tuma tin efekto riba nan yunan pa hopi tempu. Si nan tuma mal desishon, nan por kousa problema pa nan yunan. Pero si nan tuma bon desishon, nan lo yuda nan yunan tin un bida felis. Ma, ta klaru ku e yunan tambe mester tuma bon desishon. E mihó desishon ku un hende por tuma ta di sirbi nos Tata selestial Yehova, kende ta stima nos mashá.—Sal. 73:28.

2. Ki bon desishon Hesus i su mayornan a tuma?

2 Hose ku Maria, Hesus su mayornan, tabata determiná pa yuda nan yunan sirbi Yehova. I e desishonnan ku nan a tuma a demostrá esei bon kla. (Luk. 2:40, 41, 52) Hesus tambe a tuma bon desishon ku a yud’é kumpli ku su papel den Yehova su propósito. (Mat. 4:1-10) Hesus a krese bira un hòmber amabel, leal i ku kurashi. Tur mayor ku ta stima Yehova lo ta orguyoso i felis di tin un yu asina.

3. Ki pregunta lo ser kontestá den e artíkulo akí?

3 Den e artíkulo akí nos lo haña kontesta pa e siguiente preguntanan: Ki bon desishon Yehova a tuma relashoná ku Hesus? Kiko tur mayor kristian por siña for di e desishonnan ku Hose ku Maria a tuma? I kiko hóben kristian por siña for di e desishonnan ku Hesus a tuma?

IMITÁ YEHOVA

4. Ki desishon importante Yehova a tuma relashoná ku su Yu?

4 Yehova a skohe dos ekselente mayor pa Hesus. (Mat. 1:18-23; Luk. 1:26-38) Maria su ekspreshonnan sinsero skirbí den Beibel ta mustra kuantu e tabata stima Yehova su Palabra. (Luk. 1:46-55) E manera ku Hose a sigui Yehova su instrukshon a demostrá ku e tabata stima Dios i kier a agrad’é.—Mat. 1:24.

5-6. Kiko Yehova a permití su Yu pasa aden?

5 Ripará ku Yehova no a skohe mayor riku pa Hesus. E sakrifisio ku Hose ku Maria a ofresé despues ku Hesus a nase a demostrá ku nan tabata pober. (Luk. 2:24) Kisas Hose tabatin un lugá chikitu pega ku su kas na Názarèt kaminda e tabata hasi su trabou di karpinté. Probablemente nan a hiba un bida simpel, foral ora nan famia a krese ku por lo ménos shete yu.—Mat. 13:55, 56.

6 Yehova a protehá Hesus kontra sierto peliger, pero no kontra delaster un difikultat. (Mat. 2:13-15) Por ehèmpel, Hesus tabatin famia ku no tabata kere den dje. Imaginá kon desepshoná Hesus lo tabata ku algun di su mes famia no a asept’é komo Mesías. (Mar. 3:21; Huan 7:5) Es mas, Hose, Hesus su tata di kriansa, probablemente a fayesé ora Hesus tabata hóben. I esei lo tabata algu hopi doloroso p’e. Hose su morto kisas lo a nifiká ku Hesus, komo e yu mayó, mester a sigui ku e negoshi di famia. (Mar. 6:3) Miéntras e tabata krese, el a siña kuida su famia. Probablemente e mester a traha duru pa perkurá tur loke su famia tabatin mester. Pues, e tabata sa kiko ke men keda morto kansá na final di dia.

Mayornan, prepará boso yunan pa e realidatnan di bida. Siña nan buska konseho den e Palabra di Dios (Wak paragraf 7) *

7. (a) Ki pregunta lo yuda pareha kasá lanta nan yunan? (b) Di akuerdo ku Proverbionan 2:1-6, kiko mayornan mester siña nan yunan?

7 Pareha kasá ku tin gana di haña yu mester puntra nan mes: ‘Meskos ku Hose ku Maria, nos ta humilde i ta stima Yehova i su Palabra? Yehova lo skohe nos pa kuida un bebi resien nasí?’ (Sal. 127:3, 4) Si ya kaba bo ta un mayor, puntra bo mes: ‘Mi ta siña mi yunan ku ta importante pa nan traha duru?’ (Ekl. 3:12, 13) ‘Mi ta hasi tur loke mi por pa protehá mi yunan kontra peliger ku tin den Satanas su mundu?’ (Pro. 22:3) Ta imposibel pa protehá bo yunan kontra delaster un difikultat ku nan por haña nan kuné. Pero, bo por prepará nan tiki tiki i ku amor pa e realidatnan di bida. Siña nan buska konseho den e Palabra di Dios. (Lesa Proverbionan 2:1-6.) Por ehèmpel, si un miembro di famia stòp di sirbi Yehova, usa Beibel pa yuda bo yunan komprondé dikon ta asina importante pa keda leal na Yehova. (Sal. 31:23) Òf si un ser kerí fayesé, mustra bo yunan kon Beibel por yuda nan trata ku e tristesa i doló.—2 Kor. 1:3, 4; 2 Tim. 3:16.

IMITÁ HOSE KU MARIA

8. Di akuerdo ku Deuteronomio 6:6 i 7, kiko Hose ku Maria mester a hasi?

8 Hesus a krese bira un hende ku tabatin aprobashon di Dios debí na e konsehonan ku Dios a duna mayor i ku Hose ku Maria a sigui. (Lesa Deuteronomio 6:6, 7.) Hose ku Maria tabatin un amor profundo pa Yehova, i nan meta di mas importante tabata pa yuda nan yunan haña e mesun tipo di amor ei.

9. Ki desishon importante Hose ku Maria a tuma?

9 Hose ku Maria a hasi sigur ku nan famia tabatin un bon rutina spiritual. Tur siman nan tabata bai reunion na e snoa di Názarèt, i tur aña nan tabata bai Herúsalèm pa Pasku Hudiu. (Luk. 2:41; 4:16) Kisas nan a probechá di e biahenan ei pa siña Hesus i su rumannan e historia di e pueblo di Yehova. Podisé, na kaminda nan a bishitá algun lugá menshoná den e Skritura. Segun ku Hose ku Maria su famia tabata krese, lo no tabata fásil pa nan mantené un bon rutina spiritual. Pero, e rekompensanan tabata bale la pena! Debí ku nan a pone adorashon di Yehova na promé lugá, nan famia a keda spiritualmente fuerte.

10. Si bo ta un mayor, kon bo por imitá e ehèmpel di Hose ku Maria?

10 Si bo ta un mayor, kon bo por imitá e ehèmpel di Hose ku Maria? E kos di mas importante ta di siña bo yunan pa medio di loke bo ta bisa i hasi ku bo ta stima Yehova di kurason. E mihó regalo ku bo por duna nan ta di yuda nan stima Yehova. I un di e lèsnan di mas importante ku bo por siña nan ta kon nan por desaroyá e kustumber di studia, hasi orashon, bai reunion i bai sirbishi. (1 Tim. 6:6) Ta bèrdat ku bo mester duna bo yunan loke nan mester den sentido material. (1 Tim. 5:8) Pero, kòrda kiko lo yuda nan sobrebibí fin di e mundu malbado akí i drenta Dios su mundu nobo—no nan kosnan material sino nan amistat será ku Yehova. *Eze. 7:19; 1 Tim. 4:8.

Ta masha animante pa mira ku hopi mayor kristian ta tuma bon desishon pa nan famia! (Wak paragraf 11) *

11. (a) Kon e konseho na 1 Timoteo 6:17-19 por yuda mayor tuma bon desishon ora di lanta yu? (b) Ki meta famia por pone, i kiko por ta e resultado? (Wak e kuadro “Ki Meta Boso Lo Pone?”)

11 Ta masha animante pa mira ku hopi mayor kristian ta tuma bon desishon pa nan famia! E mayor- i yunan ei ta sirbi Yehova huntu regularmente. Nan ta bai reunion i asamblea. Nan ta prediká regularmente. Algun famia asta ta bai prediká den teritorio ku masha poko ta ser trahá. Otro famia ta bishitá Bètel òf ta traha riba proyekto di konstrukshon teokrátiko. Tipo di aktividat asina ta kosta plaka i por tin algun desafio. Pero, Yehova lo bendishoná nan generosamente pa esei. (Lesa 1 Timoteo 6:17-19.) E yunan ku lanta den un famia asina mayoria di biaha ta sigui ku e bon kustumbernan ku nan a siña, i nan no ta lamentá. *Pro. 10:22.

IMITÁ HESUS

12. Kiko Hesus mes mester a hasi segun ku e tabata bira grandi?

12 Hesus su Tata selestial semper a tuma bon desishon, i su mayornan terenal tambe a tuma bon desishon. Pero ora Hesus a bira grandi, e mes mester a tuma su desishonnan. (Gal. 6:5) Meskos ku nos, e tabata liber pa disidí kiko e tabata kier a hasi ku su bida. E por a skohe pa hasi loke e tabata interesá den dje. Na lugá di esei, el a skohe pa mantené un bon amistat ku Yehova. (Huan 8:29) Kiko hóben por siña for di su ehèmpel?

Hóbennan, nunka rechasá konseho di boso mayornan (Wak paragraf 13) *

13. Ki desishon importante Hesus a tuma for di mucha?

13 For di mucha, Hesus a skohe pa obedesé su mayornan. Nunka el a rechasá nan konseho, i nunka el a pensa ku e sa mas ku nan. Mas bien, “el a keda sumiso na nan.” (Luk. 2:51) Hesus a tuma su responsabilidat komo yu mayó masha na serio. Lo e mester a hasi esfuerso pa siña e fishi di su tata di kriansa i asina yuda perkurá pa su famia.

14. Kon nos por sa ku Hesus tabata un bon studiante di e Palabra di Dios?

14 Muy probablemente, Hesus su mayornan a kont’é tokante su nasementu milagroso i loke e mensaheronan di Dios a bisa tokante dje. (Luk. 2:8-19, 25-38) Pero, Hesus no a djis keda satisfecho ku loke nan a siñ’é; e tambe a studia e Skritura pa su mes. Kon nos por sa ku e tabata un bon studiante di e Palabra di Dios? Pasobra apesar ku e tabata un mucha, e maestronan na Herúsalèm a “keda asombrá di e kontestanan ku e tabata duna i di kuantu kos e tabata komprondé.” (Luk. 2:46, 47) I ku apénas 12 aña, Hesus ya tabata konvensí ku Yehova tabata su Tata.—Luk. 2:42, 43, 49.

15. Kon Hesus a mustra ku el a skohe pa hasi Yehova su boluntat?

15 Ora Hesus a komprondé kiko Yehova tabata ke p’e hasi, el a skohe pa hasi Yehova su boluntat. (Huan 6:38) E tabata sa ku hopi hende lo a odi’é. Aunke ku e no tabata ke esei, tòg el a skohe pa obedesé Yehova. Ora Hesus a batisá na aña 29 di promé siglo, Yehova su boluntat tabata e kos di mas importante p’e den su bida. (Heb. 10:5-7) Asta ora e tabata muriendo riba staka di tormento, e tabata determiná pa hasi e boluntat di su Tata.—Huan 19:30.

16. Ki lès tur yu por siña for di Hesus?

16 Obedesé bo mayornan. Meskos ku Hose ku Maria, bo mayornan no ta perfekto. Sinembargo, Yehova a asigná nan pa protehá, entrená i guia bo. Si bo skucha nan konseho i respetá nan outoridat meskos ku Hesus a hasi, kos lo bai bon ku bo.—Efe. 6:1-4.

17. Di akuerdo ku Hosue 24:15, ki desishon tur hóben tin ku tuma pa nan mes?

17 Disidí ken lo bo sirbi. Bo mes mester buska pa sa ken Yehova ta, ki su boluntat ta i kon abo por hasi su boluntat. (Rom. 12:2) Esei lo yuda bo tuma e desishon di mas importante di bo bida: sirbi Yehova. (Lesa Hosue 24:15; Ekl. 12:1) Si bo ta lesa i studia Beibel regularmente, bo amor pa Yehova lo krese i bo fe den dje lo bira mas fuerte.

18. Ki desishon tur hóben mester tuma, i kiko lo ta e resultado?

18 Skohe pa pone Yehova su boluntat na promé lugá den bo bida. Mundu di Satanas ta primintí ku lo bo ta felis si bo usa bo kapasidat i abilidat pa benefisiá bo mes. Pero, e bèrdat ta ku hende ku tin meta materialista lo “kousa nan mes hopi doló.” (1 Tim. 6:9, 10) Sinembargo, si bo obedesé Yehova i skohe pa pone su boluntat na promé lugá den bo bida, lo bo prosperá i “lo bo tin éksito.”—Hos. 1:8.

KIKO BOSO LO SKOHE?

19. Kiko tur mayor mester kòrda?

19 Mayornan, hasi boso máksimo esfuerso pa yuda boso yunan sirbi Yehova. Konfia den dje, i lo e yuda boso tuma bon desishon. (Pro. 3:5, 6) Kòrda ku loke boso ta hasi tin mas influensia riba boso yunan ku loke boso ta bisa. Pues, tuma desishon ku lo yuda nan haña Yehova su aprobashon.

20. Ki bendishon tur hóben lo risibí si nan skohe pa sirbi Yehova?

20 Hóben, bo mayornan por yuda bo tuma bon desishon den bida. Pero, ta abo tin ku hasi loke ta nesesario pa haña Yehova su aprobashon. Pues, imitá Hesus i skohe pa sirbi bo Tata selestial ku ta stima bo masha hopi mes. Si bo hasi esei, lo bo tin un bida ku sentido i yen di aktividat. (1 Tim. 4:16) Anto den futuro, lo bo disfrutá di e mihó bida ku por tin!

KANTIKA 133 Adorá Yehova den Bo Hubentut

^ par. 5 Tur mayor kristian ke pa ora nan yunan bira grandi, nan ta felis i ta sirbi Yehova. Kiko e mayornan ei por hasi pa yuda nan yunan sirbi Yehova? Kiko kada hóben kristian mester hasi pa nan tin berdadero éksito den bida? Den e artíkulo akí, nos lo haña kontesta pa e preguntanan ei.

^ par. 10 Wak La adoración pura de Jehová: ¡por fin restaurada!, pág. 69-70, par. 17-18.

^ par. 11 Wak e kuadro “No hubiera podido pedir mejores padres” den ¡Despertad! di òktober 2011, pág. 20 i e artíkulo “Un Karta Spesial pa Nan Mayornan” den Spièrta! di 8 di mart 1999, pág. 23.

^ par. 66 DESKRIPSHON DI PLACHI: Maria a yuda Hesus haña amor profundo pa Yehova. Awe, tur mama tambe por yuda nan yunan haña amor profundo pa Yehova.

^ par. 68 DESKRIPSHON DI PLACHI: Hose a mira e importansia di bai snoa huntu ku su famia. Awe, tur tata mester mira e importansia di bai reunion huntu ku nan famia.

^ par. 70 DESKRIPSHON DI PLACHI: Hesus a siña e fishi di karpinté for di su tata. Awe, tur hóben por siña abilidat serka nan tata.