1. Desizio ditshi muthu wagasue adi naye guzula

BADESIZIO mvuaji jiana guzula ana sala mu mito ya an’awo matangua avula. Gula azula badezio abola, ajiya gubatela an’awo milonga. Uvi gula azula badesizio abonga, ajiya guhana an’awo luendu lua gukhala nu gusuanguluga mu monyo wawo. Ana nji adi naye guzula badesizio abonga. Desizio dia ndando muthu wagasue adi naye guzula mu monyo wenji didi dia gukombelela Yehowa, Sh’etu wa mu dilu.—Ngi. 73:28.

2. Badesizio atshi abonga Yesu nu mvuaji jienji azudile?

² Yozefe nu Madiya akuatesele an’awo ha gukombelela Yehowa. Desizio diene diamonesele gamba gukombelela Yehowa guakhalele nu ndando yavula mu monyo wawo. (Luka 2:40, 41, 52) Yesu nji wazudile badesizio abonga amukuatesele ha gutagenesa ndaga jiagasue jiamutogele Yehowa ha gukalagala. (Mat. 4:1-10) Hakudile muene, wakhalele nu khadilo dia gisemo, gikhesa nu gujinginyina. Mvuaji jiagasue jiana guzumba Yehowa, jiana gusuanguluga gukhala nu mona gifua muene.

3. Longo edi diza muhana kueteya gu mihu itshi?

³ Longo edi diza muhana kueteya gu mihu eyi yalandula: Badesizio atshi awaha Yehowa azudile mukunda nu Yesu? Longo ditshi mvuaji jidi Aklisto ajiya guzula mu badesizio azudile Yozefe nu Madiya? Longo ditshi mavuala adi Aklisto ajiya guzula mu luholo Yesu akhalele muzula badesizio?

4. Desizio ditshi diabonga Yehowa azudile mukunda nu Mun’enji?

⁴ Yehowa watombele mvuaji jiabonga mukunda nu Yesu. (Mat. 1:18-23; Luka 1:26-38) Mbimbi jia giamatshidia  jiazuelele Madiya jidi mu Biblia jiamonesele guzumba guenji mukunda nu Yehowa nu Mbimbi yenji. (Luka 1:46-55) Luholo Yozefe atumagele mikhuala ya Yehowa, wamonesele egi wakhalele muvuila Nzambi woma nu wakhalele mutshigina gumusuanguluisa.—Mat. 1:24.

5-6. Malamba atshi Yehowa abembele egi Mun’enji atagane nawo?

⁵ Yehowa atombelego enya umonyi ha gukhala mvuaji jia Yesu. Mulambu Yozefe nu Madiya ahanele gungima dia guvualewa gua Yesu wamonesele diago egi akhalele phutu. (Luka 2:24) Yajiya gukhala egi Yozefe wakhalele nu gafundo gazonda akhalele mukalegela mudimo wa mabaya gumbodi’enji gu Nazaleta. Yajiya nji gukhala egi akhalelego nu makuta avula nga ima yavula ya gujingila, handaga akhalele nu ana 7 nga gubalega.—Mat. 13:55, 56.

⁶ Yehowa wabambele Yesu gu ingoza iko, uvi akangelego njila gu malamba agasue akhalele mubuila Mun’enji. (Mat. 2:13-15) Ha gufezegesa, Yesu wakhalele mujinga nu athu anyi akhalelego gumutshigina. Tangiza luholo Yesu adivuile tangua aphangi’enji atunyile thomo gutshigina egi udi Masiya. (Mako 3:21; Yone 7:5) Luko, Yesu wataganele nu lamba,tangua Yozefe sh’enji wa gusansa afuile. Yajiya nji gukhala egi luholo Yesu wakhalele mona wa thomo, tangua Yozefe afuile muene wakhalele naye guzula ginemo gia fami. (Mako 6:3) Tangua Yesu wakudile, wakhalele mujiya luholo lua gubata ginemo gia enya fami yenji. Wakhalele naye gukalagala mudimo wakola ha guakuatesa. Wakhalele mujiya luholo athu ana guhuila mu ngueze gula akalagala mudimo wakola.

7. (a) Mihu itshi yajiya gukuatesa yala nu mukhetu ha gusansa an’awo? (b) Luholo lutshi Ishima 2:1-6 yajiya gukuatesa mvuaji ha gulongesa an’awo?

⁷ Gula muadizudile gale mu ulo nu mudi nu funu ya guvuala ana muajiya gudihula egi: ‘Tuana khala athu agudibulumuisa ana zumba Yehowa nu Mbimbi yenji ba? Yehowa mbawututomba ha gubamba mona mbatuvuala ba?’ (Ngi. 127:3, 4) Gula udi mvuaji dihule egi: ‘Ngana gulongesa an’ami egi idi ndaga yabonga ha gukalagala mudimo?’ (Mulo. 3:12, 13) ‘Ngana gukalagala yagasue ha gubamba an’ami mu ndaga jiabola ajiya gutagana najio mu mavu awa abola a Satana ba?’ (Ish. 22:3) Idi yadiago egi, wajiyilego  gubamba an’aye gu malamba agasue ajiya gutagana nawo. Handaga yajiyilego gukalegewa. Uvi nu guzumba guagasue, wajiya gualongesa luholo lua gukamba ukuateshi mu mbimbi ya Nzambi tangua adi mutagana nu malamba mu monyo wawo. (Tanga Ishima 2:1-6.) Ha gufezegesa, gula muenya fami yaye mumoshi watuna giamatshidia, kalegela Biblia ha gukuatesa an’aye ha gujiya mukunda natshi gusala agujinginyina gudi Yehowa gudi nu ndando. (Ngi. 31:23) Nga ndo, gula muthu wana guzumba muavula wafua wambela an’aye verse jia Biblia jiajiya guakuatesa ha gubinga lamba diene nu ha guheta guhuima.—2 Kol. 1:3, 4; 2 Tim. 3:16.

8. Ha gutadila Mikhuala 6:6, 7, ndaga itshi Yozefe nu Madiya akalegele?

⁸ Yozefe nu Madiya alanduile malongo a Yehowa, hene akuatesele Yesu ha gukula muabonga nu ha gutshiginyiwa gudi Nzambi. (Tanga Mikhuala 6:6, 7.) Akhalele muzumba Yehowa muavula. Felela diawo diakhalele dia gukuatesa nji an’awo ha gukudisa guzumba guawo gudi Yehowa.

9. Badesizio atshi awaha Yozefe nu Madiya azudile?

⁹ Yozefe nu Madiya akhalele mukombelela Yehowa matangua agasue nu an’awo. Akhalele nji muya givo nu givo gu wano wa Pake wakhalele mukalegewa gu Yelusalema. (Luka 2:41; 4:16) Yajiya gukhala egi, akhalele mukalagala ba vuayaje ene ha gulongesa Yesu nu aphangi’enji ndaga jiabuidile akombeledi a Yehowa mu ginono nu ha gutala mafundo ako anyi ana guzuelewa mu Mbimbi ya Nzambi. Luholo fami yawo yakhalele gudivudisa idi naye gukhala egi yakhalele lamba gudi Yozefe nu madiya ha gulandula gukalagala ndaga jia mu nyuma. Uvi, ahetele ishimbigo yavula luholo akalegele ngenyi! Fami yawo yasalele ya gujinginyina gudi Yehowa, handaga akhalele muhaga ndaga jia mu nyuma ha fundo dia thomo.

10. Malongo atshi mvuaji jidi Aklisto jiajiya guzula mu gifezegeselo gia Yozefe nu Madiya?

¹⁰ Longo ditshi mvuaji jiana guvuila Nzambi woma jiajiya guzula mu gifezegeselo gia Yozefe nu Madiya? Ndaga ya gubalega ndando idi egi, monesa an’aye mu mbimbi nu mu makalegelo egi wana guzumba Yehowa muavula. Jiya egi, kado gabalega ndando wajiya guahana gadi guakuatesa ha guzumba Yehowa.  Mukatshi dia ndaga jia ndando wajiya gulongesa an’aye tuajiya gutanga: Gulonguga Biblia tangua diagasue, gusamba, guya mu gudibungisa nu guya mu mudimo wa gulongesa. (1 Tim. 6:6) Yadiago, mudi naye gutagenesa nzala jia an’enu. (1 Tim. 5:8) Jiya egi, ishigo ima ya gujingila mbayikuatesa an’aye ha guhuluishiwa gu gisugishilo gia mavu awa, uvi ufuta wawo wakola nu Yehowa mbawakuatesa ha gungina mu mavu ahe-ahe a Nzambi. *—Ezek. 7:19; 1 Tim. 4:8.

11. (a) Luholo lutshi longo didi mu 1 Timote 6:17-19 diana gukuatesa mvuaji ha guzula badesizio awaha tangua adi musansa an’awo? (b) Ndaga jitshi fami yaye yajiya gukalagala nu ishimbigo itshi mbamuheta? (Tala galuanda, “ Mafelela Atshi Mbawutaganesa?”)

¹¹ Tudi diago nu gusuanguluga ha gumona luholo mvuaji jiavula jidi Aklisto jiana guzula badesizio ha gukuatesa an’awo ha gusala agujinyina gudi Yehowa! Tangua diagasue, ana gukombelela Yehowa hamoshi. Ana guya mu gudibungisa gua mu hungu nu gu ba asamble. Ana guya nji mu mudimo wa gulongesa lukuma luabonga. Fami jiko nji jiana guya mu ba terituare ako ha gulongesa. Fami jiko jiana guya mutala jinzo jia Betele nga guhana mago ha gutunga jinzo jia ulondegi wa Yehowa. Yana gutoga makuta avula gudi fami jiana guzula badesizio awa nu yajiya gukhala lamba gudi ene. Uvi Yehowa mbawashimbiga gu ndaga jiagasue ana gukalagala. (Tanga 1 Timote 6:17-19.) Ana agasue ana gukula mu fami jia luholo elu ana gulandula gukhala nu makalegelo abonga anyi alongugile nu anago gudisagesa mukunda nu desizio azudile! *—Ish. 10:22.

12. Itshi Yesu akhalele naye gukalagala tangua diakudile muene?

¹² Yehowa Tata wa Yesu wana guzula badesizio awaha. Yozefe nu Madiya, mvuaji jia Yesu, azudile nji badesizio abonga. Uvi tangua Yesu wakudile, wakhalele naye nji guzula badesizio enji hakhenji. (Gal. 6:5) Yesu wakhalele nu luendu lua guditombela ndaga gifua esue mangino. Wakhalele nu luendu lua gutomba guhaga ndaga jienji ha fundo dia thomo. Uvi muene watombele ha gubamba ufuta wenji nu Yehowa. (Yone 8:29) Luholo lutshi gifezegeselo gienji giajiya gukuatesa mavuala mangino?

13. Ndaga itshi ya ndando Yesu atombele ha gukalagala tangua diakhalele muene galenge?

¹³ Tangua Yesu wakhalele galenge, wakhalele mutumagela mvuaji jienji. Gatunyilego utuameji wa mvuaji jienji nga gutangiza egi udi nu ndunge jia guabalega. Uvi, ‘walanduile guatumagela.’ (Luka 2:51) Yesu wataganesele  ginemo gienji gia mona wa thomo muabonga. Wakhalele mukalagala mudimo wakola wa mabaya nu shenji Yozefe ha gukuatesa enya fami yawo.

14. Luholo lutshi tudi mujiya egi Yesu wakhalele mulonguga Mbimbi ya Nzambi muabonga?

¹⁴ Yajiya gukhala egi Yozefe nu Madiya awambelele Yesu ndaga jia gushimana jiatadila guvualewa guenji nu ndaga atumiwi a Nzambi azuelele mukunda nu muene. (Luka 2:8-19, 25-38) Uvi gasugilego hananyi. Yesu walandudile nji gulonguga Mbimbi ya Nzambi muene hakhenji. Luholo lutshi tudi mujiya egi Yesu wakhalele mulonguga Mbimbi ya Nzambi muabonga? Handaga tangua diakhalele muene galenge, alongeshi a gu Yelusalema ‘ashimanele ndunge jienji nu mvutu jienji gu mihu.’ (Luka 2:46, 47) Tangua ataganesele ivo 12, wakhalele mujiya egi Yehowa udi Sh’enji.—Luka 2:42, 43, 49.

15. Luholo lutshi Yesu wamonesele egi watombele gukalagala gutshigina gua Sh’enji?

¹⁵ Tangua Yesu walongugile ndaga jiagasue Yehowa wamutogele ha gukalagala, muene watombele ha gutagenesa felela dia Yehowa. (Yone 6:38) Wakhalele mujiya egi mbawutunyiwa gudi athu avula, ndaga yene yamutumine ha gutangigiza. Uvi watombele ha gutumagela Yehowa. Tangua abatijiwe mu givo 29 gia Tangua Dietu, ndaga yakhalele nu ndando yavula gu meso enji yakhalele gutagenesa ndaga jiagasue jiamutogele Yehowa ha gukalagala. (Heb. 10:5-7) Ikhale tangua akhalele naye gufua ha mutshi wa lamba, Yesu walanduile ukalagala gutshigina gua Sh’enji.—Yone 19:30.

16. Longo ditshi ana ajiya guzula mu gifezegeselo gia Yesu?

¹⁶ Khala mutumagela mvuaji jiaye. Mvuaji jiaye jishigo athu atagana gifua muakhalele nji Yozefe nu Madiya. Uvi, mvuaji jiaye jiatombewe gudi Yehowa ha gugubamba, guguhana formasio nu gugutuameza. Gula udi guatumagele nu guanemesa, ndaga jiagasue ‘mbajiyila muabonga mukunda nu aye.’—Ef. 6:1-4.

17. Ha gutadila Yoshua 24:15, desizio ditshi diawaha mavuala adi naye guzula?

¹⁷ Tomba muthu mbawukombelela. Udi naye gukamba gujiya gula Yehowa udi nanyi, udi naye gujiya mafelela nu gutshigina guenji nu luholo wajiya gutshita gutshigina guenji mu monyo waye. (Lomo 12:2) Gutshita ngenyi mbagugukuatesa ha guzula desizio diabalega  ndando mu monyo waye. Desizio diene didi: Gukombelela Yehowa. (Tanga Yoshua 24:15; Mulo. 12:1) Gula udi nu programe ya gutanga nu gulonguga Biblia lusugu nu lusugu, guzumba guaye gudi Yehowa mbagukola nu mbawukolesa nji gutshigina guaye gudi muene.

18. Desizio ditshi mavuala adi naye guzula? Gubonga gutshi mbaaheta?

¹⁸ Zula desizio dia gukalagala thomo gutshigina gua Yehowa. Mavu awa abola a Satana ana gutshiginyisa athu egi gula udi mukalegela ndunge jiaye mukunda nu gubonga guaye, mbawukhala nu gusuanguluga. Uvi ndaga ya giamatshidia idi egi, athu agasue anyi ana kamba gukhala nu ima yavula-vula ya gujingila ‘ana gudikambela malamba.’ (1 Tim. 6:9, 10) Uvi gula udi mutumagela Yehowa nu udi mukalagala thomo gutshigina guenji, mbawubinga mu monyo waye nu ‘mbawukalagala ndaga nu gutema.’—Yosh. 1:8.

19. Ndaga itshi mvuaji jishigo naye gubuita mutshima?

¹⁹ Mvuaji, kuatesenu an’enu ha gukombelela Yehowa. Mushilenu mutshima, muene mbawumikuatesa ha guzula badesizio abonga. (Ish. 3:5, 6) Jiyenu egi, an’enu mbaalandula muavula ndaga muana gukalagala gubalega jinyi muana guzuela. Hene, zulenu badesizio awaha mbakuatesa an’enu hagula Yehowa a atshigine.

20. Ishimbigo itshi mavuala mbaaheta gula azula desizio dia gukombelela Yehowa?

²⁰ Mavuala, mvuaji jienu jiajiya gumikuatesa ha guzula badesizio awaha mu monyo wenu. Uvi enue hakhenu mudi naye guzula desizio dia gusuanguluisa Nzambi. Landulenu gifezegeselo gia Yesu, zulenu desizio dia gukombelela Sh’etu wa guzumba wa mu dilu. Gula muakalagala ngenyi, mbamukhala nu ndaga jiavula jia gutshita, mbamuheta ishimbigo, mbamukhala nu gusuanguluga guavula mu monyo wenu mangino. (1 Tim. 4:16) Mu masugu adi muza, mbamukhala diago nu gusuanguluga mu monyo wenu!