1. Eaa te ikianga meitaki ka iki ua atu tetai?

MAATA anga o te taime, ka ō mai te tamariki ki roto i te au ikianga ka iki te nga metua. Me kino ta raua ikianga, ka tupu rai te manamanata ki ta raua tamariki. Me meitaki ta raua ikianga, ka tauturu raua e kia mataora e kia puapinga te oraanga o ta raua tamariki. Inara, ka anoanoia te tamariki kia iki i te ikianga meitaki. Te ikianga meitaki ka iki tetai koia oki kia tavini i to tatou Metua akaperepere i te rangi, ko Iehova.—Sala. 73:28.

2. Eaa te au ikianga meitaki ta Iesu e tona nga metua i iki?

² Inangaro te nga metua o Iesu i te tauturu i ta raua tamariki kia tavini ia Iehova, e ta raua i iki kua akaari mai e ko teia rai to raua akakoroanga. (Luka 2:40, 41, 52) Kua iki katoa a Iesu i te ikianga meitaki tei tauturu iaia kia rave i tana tuanga i roto i ta Iehova akakoroanga. (Mata. 4:1-10) Maata mai a Iesu ei tangata takinga meitaki, tiratiratu e te ngakau toa—te tamaiti ïa ka ngakau parau e ka rekareka tetai nga metua akaperepere i te Atua.

3. Eaa te au uianga ka pau tatou i teia atikara?

³ I roto i teia atikara, ka pau tatou i teia au uianga: Eaa te au ikianga meitaki ta Iehova i iki no Iesu? Eaa te au ikianga ka apii mai te au metua Kerititiano mei te nga metua o Iesu? Eaa ta te au mapu Kerititiano ka apii mai mei ta Iesu i iki?

4. Eaa te ikianga puapinga ta Iehova i iki no tana Tamaiti?

⁴ Kua iki a Iehova i te nga metua meitaki no Iesu. (Mata. 1:18-23; Luka 1:26-38) Akaari maira ta Maria tuatua ma te ngakau katoa i roto i te Pipiria i tona inangaro ia Iehova e  tana Tuatua. (Luka 1:46-55) Kua akaari mai to Iosepha akarongo ki ta Iehova akauenga i tona inangaro i te Atua e kua akamareka iaia.—Mata. 1:24.

5-6. Eaa ta Iehova i tuku kia kite tana Tamaiti?

⁵ Akara ana kare a Iehova i iki ana i te nga metua apinganui no Iesu. Te akaari maira ta Iosepha e Maria atinga i oronga i muri ua ake i te anauia anga a Iesu e e nga tokorua putaua raua. (Luka 2:24) Penei kua rave a Iosepha i tana kamuta i roto i tetai are toa meangiti i te pae mai i tona kainga i Nazareta. E oraanga māmā ua to ratou, e kua maata mai te numero o te tamariki ki te itu.—Mata. 13:55, 56.

⁶ Kua paruru a Iehova ia Iesu mei te au kino, inara kare Aia i paruru ana i Tana Tamaiti mei te oraanga taitaia. (Mata. 2:13-15) Ei akaraanga, kua akakoromaki a Iesu e kare tona kopu tangata i irinaki iaia. Akamanako ana i to Iesu maromaroa e kare tona uaorai kopu i irinaki ana e i āriki ana iaia e ko te Mesia. (Mare. 3:21; Ioa. 7:5) Pera katoa, kua akakoromaki a Iesu i te mate anga tona papa angai ko Iosepha. Penei kua akariro te reira turanga ia Iesu ei tama mua, kia akono i te au angaanga pitiniti a te kopu tangata. (Mare. 6:3) Iaia e tupu atura, kua apii a Iesu i te akono i te oraanga o tona ngutuare. Kua angaanga pakari aia no te akono ia ratou. No reira, kua kite aia i te oraanga roiroi i te openga o te rā.

7. (a) Eaa te au uianga ka tauturu i te au tokorua akaipoipo me utuutu i ta raua tamariki? (e) Akapeea a Maseli 2:1-6 me tauturu i te tereni i ta raua tamariki?

⁷ Me e nga tokorua akaipoipo korua e te inangaro ra i te tamariki, e ui kia koe uaorai: ‘E nga tangata akaaka e te inangaro i te au mea pae vaerua ainei maua ka iki mai a Iehova kia akono i teia oraanga ou e te akaperepereia?’ (Sala. 127:3, 4) Me e metua koe, e ui kia koe uaorai: ‘Te apii ra ainei au i taku tamariki kia kite i te puapinga o te angaanga pakari?’ (Kohe. 3:12, 13) ‘Te tauta ra ainei au i te paruru i taku tamariki mei te au kino i te pae kopapa e te oraanga ka kite ratou i roto i to Satani ao?’ (Mase. 22:3) Kare e rauka ia koe i te paruru i taau tamariki mei te au mea kino ka tupu i te oraanga. E ākā  angaanga te reira. Inara ka rauka ia koe i te akapapa marie e te akaperepere ia ratou kia kite e eaa te ka tupu, na te apiianga ia ratou kia irinaki i te Tuatua a te Atua. (E tatau ia Maseli 2:1-6.) Ei akaraanga, me iki tetai kopu tangata kare e tavini akaou ia Iehova, tauturu i taau tamariki kia apii mei ta te Atua Tuatua i te tumu maata kia vai tiratiratu kia Iehova. (Sala. 31:23) Me kare me mate tetai tei akaperepereia, e akaari ki taau tamariki akapeea me akara ki ta te Atua Tuatua no te akapumaana e te akakoromaki anga i te au turanga mamae.—2 Kori. 1:3, 4; 2 Timo. 3:16.

8. Kia tau kia Deuteronomi 6:6, 7, eaa ta Iosepha e Maria i rave?

⁸ Kua tauturu to Iesu nga metua iaia kia akaperepere i te Atua; kua akono raua i ta Iehova akauenga ki te au metua. (E tatau ia Deuteronomi 6:6, 7.) Kua akaperepere tamou a Iosepha e Maria ia Iehova, e kua akakoro raua i te utuutu mai i ta raua tamariki kia akaperepere katoa iaia.

9. Eaa te au ikianga puapinga ta Iosepha e Maria i iki?

⁹ Kua iki a Iosepha e Maria i te akamori putuputu ia Iehova ei ngutuare tangata. Kare e ekoko anga kua aere ratou ki te au uipaanga i te epetoma i ko i te sunago i Nazareta, e te Pasa i te au mataiti ravarai i Ierusalema. (Luka 2:41; 4:16) Penei kua akapou raua i te reira taime teretereanga ki Ierusalema i te apii ia Iesu e tona ai teina no runga i te oraanga o te iti tangata o Iehova, i te tapaeanga ki te au ngai tei taikuia i roto i te au Tuatua Tapu. I te maata anga mai to raua ngutuare, penei kua ngata ia Iosepha e Maria i te akamori putuputu ia Iehova. Inara kua akameitakiia raua no ta raua i rave! No te mea kua tuku raua i te akamorianga a Iehova na mua, kua akonoia to raua ngutuare i te pae vaerua.

10. Eaa te au apiianga ka apii mai te au metua Kerititiano mei ia Iosepha e Maria?

¹⁰ Eaa ta te au metua akaperepere i te Atua ka apii mei ia Iosepha e Maria? Te mea puapinga, e apii i taau tamariki na roto i taau e tuatua ra e rave ra te akaperepere  ra koe ia Iehova. Ko taau apinga aroa meitaki roa atu ka oronga kia ratou ko te inangaro ia Iehova. E tetai atu apiianga maata ka apii koe kia ratou e akapeea me aru i tetai akapapaanga meitaki i te pae vaerua no te apii, pure, uipaanga, e te angaanga tutu aere. (1 Timo. 6:6) E pera katoa ka oronga koe i te au mea o te kopapa ki taau tamariki. (1 Timo. 5:8) E akamaara ka tauturu te pirianga vaitata o taau tamariki kia Iehova, kare to te kopapa, ia ratou kia ora atu i te openga o teia akatereanga taito e kia tae atu ki roto i te ao ou o te Atua. *—Eze. 7:19; 1 Timo. 4:8.

11. (a) Akapeea te akoanga ia 1 Timoteo 6:17-19 me tauturu i te au metua kia iki i te au ikianga meitaki me utuutu i ta ratou tamariki? (e) Eaa te au akakoroanga ka aruaru toou ngutuare i te akatupu, eaa te au akameitakianga ka rauka mai? (Akara i te pia “ Eaa Taau Akakoroanga ka Aruaru?”)

¹¹ E mea pumaana i te kiteanga i te au metua Kerititiano e manganui e tauturu ra i to ratou ngutuare tangata kia iki i te au mea pae vaerua! Te akamori kapiti ra ratou. Ka aere putuputu ki te au uipaanga a te putuputuanga e te au uruoaanga. Ka rave ratou i te angaanga tutu aere. Tetai pae ngutuare kua aere ki te au ngai kare e tutu aereia ana. Ka atoro tetai pae i te opati Betela me kore ka tauturu i te angaanga pātu are. Ka pou te moni a te kopu tangata tei iki i te rave i teia angaanga, e penei ka tupu te turanga ngata kia ratou. Inara ka maata atu ta ratou akameitakianga i te pae vaerua. (E tatau ia 1 Timoteo 6:17-19.) Ko te au tamariki tei utuutuia na roto i teia turanga, ka maata mai ratou i te rave putuputu i teia angaanga ma te oraanga mataora! *—Mase. 10:22.

12. Eaa ta Iesu ka iki i te maata mai anga aia?

¹² Kua iki te Metua o Iesu i te rangi i te au ikianga meitaki, kua iki katoa tona nga metua i te enua nei i te au ikianga meitaki. Inara, kua maata mai a Iesu, ka anoanoia aia kia iki i tana ikianga. (Gala. 6:5) Mei ia tatou katoatoa, tei iaia te tikaanga kia iki. Ka iki aia i te rave i tona uaorai anoano. Inara, kua iki aia i tona pirianga meitaki kia Iehova. (Ioa. 8:29) Akapeea tona akaraanga me tauturu i te au mapu ou i teia tuatau?

13. Eaa ta Iesu ikianga puapinga ka iki i tona ouanga ra?

¹³ Akamataanga o tona oraanga tangata,  kua iki a Iesu i te kauraro ki tona nga metua. Kare roa aia i akavaavaa ana i te akauenga a tona nga metua, te manakoanga e e maata atu tona kite. Mari ra, kua “akarongo atura [aia] ia raua.” (Luka 2:51) Kua akono marie a Iesu i tana apainga ei tama mua. Kua apii aia kia kite i te kamuta mei tona metua tane angai no te akono i tona ngutuare.

14. Akapeea tatou e kite ei e tangata apii meitaki a Iesu i te Tuatua a te Atua?

¹⁴ Papu kua akakite te nga metua o Iesu kiaia no tona anau temeio anga e ta te kave karere o te Atua i tuatua no runga iaia. (Luka 2:8-19, 25-38) Kare ra a Iesu i āriki ua i ta raua i tuatua mai kiaia; kua apii katoa aia i te reira i roto i te au Tuatua Tapu. Akapeea tatou e kite ei e tangata apii meitaki aia i te Tuatua a te Atua? E tamaiti ua ra aia, tona tuatua anga e kua “umere anake iora te aronga [puapii o Ierusalema] katoa i akarongo iaia ra i tona kite e tana tuatua.” (Luka 2:46, 47) Tae akera aia ki te 12 mataiti, kua akapapu a Iesu kiaia uaorai ko Iehova tona Metua.—Luka 2:42, 43, 49.

15. Akapeea a Iesu i te akaari anga e kua iki aia i te rave i to Iehova anoano?

¹⁵ Ia Iesu e kite maira i tana tuanga i roto i ta Iehova akakoroanga, kua iki aia i te rave i te reira. (Ioa. 6:38) Mārama aia e ka makitakitaia aia e te manganui, e kua akamanako marie aia i te reira. Inara, kua iki aia kia kauraro kia Iehova. I tona papetito anga i te 29 T.N., kua akamou aia i tona oraanga i te rave anga i to Iehova anoano. (Ebe. 10:5-7) E iaia e mate atura ki runga i te rakau, kua vai tiratiratu a Iesu i te rave i te anoano o tona Metua.—Ioa. 19:30.

16. Eaa tetai apiianga ka apii te tamariki mei ia Iesu?

¹⁶ E akarongo ki toou nga metua. Mei ia Iosepha e Maria, e nga tangata apa ua toou nga metua. Inara, kua ikiia toou nga metua e Iehova kia paruru, tereni e te apii ia koe. Me akaperepere koe i ta raua akoanga e te akangateitei i to raua tikaanga, ka “meitaki koe.”—Ephe. 6:1-4.

17. Ia Iosua 24:15, eaa te ikianga ka iki te au mapu no ratou uaorai?

¹⁷ E iki koai taau ka tavini. Ka anoanoia koe kia kite e koai a Iehova, e eaa tana  akakoroanga, e akapeea koe me rave i te reira. (Roma 12:2) I reira, koe e kite ei i taau ikianga puapinga maata ka iki i roto i toou oraanga, tavini ia Iehova. (E tatau ia Iosua 24:15; Kohe. 12:1) Me aru putuputu koe i taau akapapaanga no te tatauanga i te Pipiria e te apii i te reira, ka maata mai toou inangaro ia Iehova e ka ketaketa toou akarongo iaia.

18. Eaa te ikianga ka iki te au mapu, e eaa te ka tupu mai?

¹⁸ E iki i te rave i to Iehova anoano na mua ake i toou. Taputou mai to Satani ao me akapou koe i toou tareni noou uaorai, ka mataora koe. Inara ko te tika, ko te aronga tei aruaru i te au mea o te kopapa kua ko ia ratou uaorai ki “te iriea e manganui.” (1 Timo. 6:9, 10) I tetai tua, me akarongo koe kia Iehova e te tuku i tona anoano na mua ake i toou, ka puapinga koe e ka “meitaki ei toou aerenga.”—Iosu. 1:8.

19. Eaa ta te au metua ka akamaara?

¹⁹ E te au metua, e aruaru i te tauturu i toou ngutuare i te tavini ia Iehova. E irinaki kiaia, e ka tauturu aia ia kotou kia iki i te ikianga meitaki. (Mase. 3:5, 6) Akamaara ka akakeuia taau tamariki e taau e rave ra e taau e tuatua ra. No reira, e iki i te ikianga te ka tauturu i taau tamariki kia akamareka ia Iehova.

20. Eaa te au akameitakianga ka kite te au mapu me iki ratou i te tavini ia Iehova?

²⁰ E te au mapu, ka rauka i toou nga metua i te tauturu ia kotou kia iki i te au ikianga meitaki. Inara naau rai e iki i te au ikianga te ka akamareka i te Atua. No reira, e aru ia Iesu e te iki i te tavini i toou Metua akaperepere i te rangi. Me rave koe i te reira, tei ia koe te oraanga maroiroi, puapinga e te mataora i teianei. (1 Timo. 4:16) A te tuatau ki mua, ka kite koe i te oraanga puapinga maata e te mataora!