1. Koja tani i najšukar odluka koja svako amendar šaj te anel?

BUT putija, o odluke kola o roditeljija anena šaj but vreme te utičinen upro olenge ćhave. Ako o roditeljija anena nemudra odluke, ađahar ćerena problemija hem pe ćhavenđe. Ama ako on anena mudra odluke, on dena pe ćhavenđe i prilika te ovel len najšukar đivdipe. Ki aver strana, hem o ćhave valjani te anen šukar odluke. I najšukar odluka koja svako amendar šaj te anel tani te služini amare nebesko Dadese, e Jehovase, kova but mangela amen (Ps. 73:28).

2. Kola šukar odluke anđe o Isus hem olese roditeljija?

² O Josif hem i Marija hine odlučna te pomožinen pe ćhavenđe te služinen e Jehovase. O odluke kola on sar roditeljija anđe, mothovđe so odova hine lenđe najvažno ko đivdipe (Luka 2:40, 41, 52). Isto ađahar, hem o Isus anđa šukar odluke kola pomožinđe lese te ispunini pi uloga ki e Jehovasi namera (Mat. 4:1-10). O Isus barilo ko jekh šukar, verno hem hrabro manuš. Sa o roditeljija kola služinena e Jehovase bi ovena ponosna hem bahtale te ovel len ćhavo sar oleste.

3. Kola pućiba ka razmotrina ko akava članko?

³ Ko akava članko, ka razmotrina akala pućiba: „Kola šukar odluke o Jehova anđa, a kola hine povezime e Isuseja? So avdije o roditeljija šaj te sikljon ando odluke kola o Josif hem i Marija anđe? Hem so šaj o terne te sikljon ando odluke kola o Isus anđa?“

4. Koja važno odluka o Jehova anđa, a koja hine povezimi olese Ćhaveja?

⁴ O Jehova birinđa najšukar roditeljen e Isusese (Mat. 1:18-23; Luka 1:26-38). O lafija kola i Marija kotar vilo vaćerđa,  a kola tane zapisime ki Biblija, mothovena kobor but manglja e Jehova hem oleso Lafi (Luka 1:46-55). O način ko kova o Josif reagujinđa ko e Jehovaso vođstvo mothovi so ov manglja e Devle hem so manglja te ugodini lese (Mat. 1:24).

5-6. So o Jehova dozvolinđa oleso Ćhavo te nakhel?

⁵ Zapazin so o Jehova na birinđa e Isusese barvale roditeljen. I žrtva koja o Josif hem i Marija anđe palo odova so bijandilo o Isus, mothovi so on hine ćorore manuša (Luka 2:24). O Josif šaj hine le tikni radionica, uzo po ćher ko Nazaret, kuri ćerđa buti sar tesari. On skromno živinđe, posebno sebepi so hine len najhari efta ćhave (Mat. 13:55, 56).

⁶ Iako o Jehova zaštitinđa e Isuse ando disave opasnostija, ov na štitinđa pe Ćhave kotar sa o izazovija (Mat. 2:13-15). Na primer, o Isus hine le rođakija kola na verujinđe upro leste. Šaj li te zamisline kobor o Isus hine razočarimo ked ko početko disave kotar olesi porodica na verujinđe so ov tano Mesija? (Mar. 3:21; Jov. 7:5). Isto ađahar, o Josif verovatno mulo đi o Isus pana hine terno hem sebepi odova e Isusese hine but pharo. Palo e Josifeso meribe, o Isus sar najphureder ćhavo, verovatno ljelja ko pe vasta i buti koja o Josif ćerđa (Mar. 6:3). Ði o Isus barjola hine, ov sikljilo te brinini pe kotar pi porodica. Verovatno morandilo but te trudini pe te šaj te ovel len sa so valjani lenđe. Odolese, ov đanđa sar tano ked hijan ćhindo sebepi so celo dive ćerđan buti.

7. (a) So valjani te pućen pe okola soj tane ko brako đi barjaćerena pe ćhaven? (b) Sar šaj o lafija kotar o Poslovice 2:1-6 te pomožinen e roditeljenđe te sikaven pe ćhaven?

⁷ Ako hijen ko brako hem mangena te ovel tumen ćhave, pućen tumen: „Da li hijam ponizna, duhovna manuša kas bi o Jehova birini te brininen pe aso odova tikoro?“ (Ps. 127:3, 4). Ako već hijan roditelj, puć tut: „Da li sikavava me ćhaven kobor tano važno te ćeren buti?“ (Prop. 3:12, 13). „Da li dava sa mandar te zaštitinav me ćhaven ando lošna buća kola isi ko e Bengeso sveto?“ (Posl. 22:3). Tu našti te zaštitine te ćhaven kotar sa opasnostija ko kola šaj te arakhen pe. Odova tano nemoguće. Ama, hari po hari, tu šaj mangipaja te pripremine len ko sa so ađićeri len ko đivdipe, ađahar so ka sikave len te roden savet ko e Devleso Lafi. (Čitin  Poslovice 2:1-6.) Na primer, ako neko kotar ti porodica odlučini više te na služini e Jehovase, koristin e Devleso Lafi te pomožine te ćhavenđe te haljon sose tano važno te aćhon verna e Jehovase (Ps. 31:23). Ja ked merela neko kas mangena, mothov te ćhavenđe disave stihija kotar i Biblija kola ka pomožinen lenđe te savladinen odija dukh hem te ovel len mir ko vilo (2. Kor. 1:3, 4; 2. Tim. 3:16).

8. Premalo Ponovljeni zakoni 6:6, 7, kova savet o Josif hem i Marija šunđe?

⁸ O Josif hem i Marija šajinđe te pomožinen e Isusese hem sar baro te ovel paše e Devleja, sose on šunđe o savetija kola o Jehova dinđa e roditeljenđe. (Čitin Ponovljeni zakoni 6:6, 7.) O Josif hem i Marija but manglje e Jehova hem olenđe hine najvažno te pomožinen pe ćhavenđe hem on but te mangen e Jehova.

9. Kola važna odluke o Josif hem i Marija anđe?

⁹ O Josif hem i Marija odlučinđe sar porodica te ovel len šukar duhovna navike. Svako kurko on đelje ko sastankija ki sinagoga ko Nazaret, a svako berš đelje ko Jerusalim te slavinen i Pasha (Luka 2:41; 4:16). Ði putujinđe ko Jerusalim, on šaj sikavđe e Isuse hem olese phraljen hem phenjen ando odova so ulo e Jehovase narodoja angleder. Ði putujinđe šaj posetinđe o thana kola spominena pe ko spisija. Sar olengi porodica ulji sa pobari, e Josifese hem e Marijaće sigurno na hine lokho hem ponodri te ovel len šukar duhovna navike. Ama, on hine len but blagoslovija. Odolese so e Jehova ćhivđe ko prvo than ko po đivdipe, olengi porodica aćhilji paše e Jehovaja.

10. So o roditeljija šaj te sikljon ando Josif hem andi Marija?

¹⁰ So šaj o roditeljija kola služinena e Jehovase te sikljon ando Josif hem andi Marija? Najvažno tano te mothove te ćhavenđe hem te lafencar hem te delijencar so but mangeja e Jehova. Pomožin te ćhavenđe te mangen e Jehova. Odova tano najbaro poklon so šaj te de te ćhavenđe. Najvažno so šaj te sikave te ćhaven tano redovno te proučinen i Biblija, te molinen pe, te đan ko sastankija hem ki služba (1. Tim. 6:6). Ki aver strana, tu mora te obezbedine sa so valjani te ćhavenđe  (1. Tim. 5:8). Ama, jekh buti ma te bistre. Da li te ćhave ka preživinen o krajo ando akava sveto hem da li ka khuven ko e Devleso nevo sveto, na ka zavisini ando materijalna buća kola isi len, već ando odova da li ka oven paše e Jehovaja * (Jezek. 7:19; 1. Tim. 4:8).

11. (a) Sar o savet kova tano pisimo ki 1. Timoteju 6:17-19, šaj te pomožini e roditeljenđe te anen šukar odluke đi barjaćerena pe ćhaven? (b) Kola ciljija sar porodica šaj te ovel tumen hem sar odova ka koristini tumenđe? (Dikh o okvir „ Kola ciljija sar porodica šaj te ovel tumen?“)

¹¹ Kobor tano šukar ked dikhaja so but roditeljija anena odluke kola pomožinena olenge ćhavenđe te oven paše e Jehovaja. On zajedno pe ćhavencar obožavinena e Jehova. On redovno đana ko sastankija, ko kongresija hem učestvujinena ki služba. Disave porodice čak propovedinena ko područja kola na ćerena pe često. Avera posetinena o Betel ja ćerena ki gradnja ko amare objektija. On spremno trošinena pe materijalna buća hem verovatno isi len disave izazovija. Ama, o Jehova but ka nagradini len sebepi odova. (Čitin 1. Timoteju 6:17-19.) O ćhave kola barjona ko asavke porodice, but putija nastavinena te ćeren odola šukar buća hem sar bare on tane bahtale so olenge roditeljija barjaćerđe len ko asavko način * (Posl. 10:22).

12. So o Isus valjanđa te ćerel đi barilo?

¹² E Isuseso nebesko Dad uvek anela šukar odluke. Isto ađahar, hem e Isusese roditeljija ki phuv anđe mudra odluke. Ama, đi barilo, ov morandilo kokri te anel o odluke (Gal. 6:5). Sar svako amendar, hem ov hine le slobodno volja. Ov šajinđa te odlučini te ovel sebično hem te na ćerel e Devlesi volja. Umesto odova, ov odlučinđa te ovel paše e Jehovaja (Jov. 8:29). Sar šaj oleso primer te pomožini e ternenđe?

13. Kova važno izbor o Isus ćerđa ked hine terno?

¹³ Pana ked o Isus hine terno ćhavo, ov birinđa te šunel pe roditeljen. Ov niked na hine lenđe neposlušno sebepi so mislinđa so đanela pobuter olendar. Umesto odova, ov „hine lenđe poslušno“ (Luka 2:51). O Isus hine najphureder ćhavo so značinđa so hine le disave odgovornostija. Ov dinđa sa pestar te ispunini len. Sigurno but trudinđa pe te sikljol ando Josif te ovel tesari te šaj te pomožini pe porodicaće te ovel len sa so valjani lenđe.

14. Sar đanaja so o Isus temeljno proučinđa e Devleso Lafi?

¹⁴ E Isusese roditeljija verovatno vaćerđe lese so ov bijandilo ko jekh čudesno način  hem odova so o anđelija phenđe olestar (Luka 2:8-19, 25-38). O Isus na hine zadovoljno samo odoleja so on vaćerđe lese, već hem ov kokri proučinđa o spisija. Sar đanaja so o Isus temeljno proučinđa e Devleso Lafi? Sose đi pana hine terno ćhavo, o učiteljija ko Jerusalim „hine oduševime odoleja sar odgovorini hem kobor buća haljola“ (Luka 2:46, 47). Ked hine le samo 12 berš, o Isus već hine uverimo so o Jehova tano oleso Dad (Luka 2:42, 43, 49).

15. Sar o Isus mothovđa so birinđa te ćerel e Jehovasi volja?

¹⁵ Ked o Isus haljilo koja tani olesi uloga ki e Jehovasi namera, ov birinđa te prihvatini la (Jov. 6:38). Ov đanđa so but manuša ka mrzinen le. Iako na hine lese sajekh, ov ipak birinđa te šunel e Jehova. Ked o Isus krstinđa pe ko 29. berš, ki nevi era, najvažno buti hine lese te ćerel odova so o Jehova manglja (Jevr. 10:5-7). Čak hem đi merela hine ko mučeničko stubo, o Isus hem ponodri hine odlučno te ćerel pekle Dadesi volja (Jov. 19:30).

16. So šaj o ćhave te sikljon ando Isus?

¹⁶ Šun te roditeljen. Te roditeljija nane savršena, sar so na hine ni o Josif hem i Marija. Ama, o Jehova te roditeljenđe dinđa odgovornost te zaštitinen tut hem te sikaven tut. Ako šuneja olenge savetija hem poštujineja olengo autoritet, ka „ovel tuće šukar“ (Ef. 6:1-4).

17. Premalo Isus Navin 24:15, koja odluka o terne valjani kokri pese te anen?

¹⁷ Odlučin kase ka služine. Kokri tu valjani te đane koj tano o Jehova, koja tani olesi namera hem sar odova odnosini pe ko to đivdipe (Rimlj. 12:2). Tek tegani tu šaj te ane i najvažno odluka ko to đivdipe, a odova tano te služine e Jehovase (Čitin Isus Navin 24:15; Prop. 12:1). Ako redovno čitineja i Biblija hem proučineja la, to mangipe premalo Jehova ka ovel sa pobaro hem ti vera upro leste ka ovel sa pozorali.

18. So o terne mora te birinen hem sose?

¹⁸ Birin te ćhive e Jehovasi volja ko prvo than ko to đivdipe. E Satanaso sveto sikavi tut so ka ove bahtalo samo ako te sposobnostija koristineja aso to šukaripe. Ama, okola kola o materijalna buća ćhivena ko prvo than, „ćerđe pese but dukha“ (1. Tim. 6:9, 10). Ki aver strana, ako šuneja e Jehova hem ćhiveja olesi volja ko prvo than ko  to đivdipe, ka ovel tut bahtalo đivdipe „hem ka postupine mudro“ (Is. Nav. 1:8).

19. So o roditeljija na valjani te bistren?

¹⁹ Roditeljija, den sa tumendar te pomožinen tumare ćhavenđe te služinen e Jehovase. Osloninen tumen upro leste hem ov ka pomožini tumen te anen mudra odluke (Posl. 3:5, 6). Ma te bistren so upro tumare ćhave pobuter ka utičini odova so ćerena nego odova so phenena. Odolese, anen o odluke kola ka pomožinen tumare ćhavenđe te aćhon paše e Jehovaja.

20. Kola blagoslovija o terne ka ovel len ako odlučinena te služinen e Jehovase?

²⁰ Ternaljen, tumare roditeljija šaj te pomožinen tumenđe te anen mudra odluke ko đivdipe. Ama, tumendar zavisini da li ka ćeren odova so o Devel mangela. Odolese, oponašinen e Isuse hem odlučinen te služinen tumare nebesko Dadese, kova but mangela tumen. Ako ćerena ađahar, već avdije ka oven zadovoljna hem ka ovel tumen bahtalo đivdipe (1. Tim. 4:16). A ki budućnost, ka uživinen ko najšukar đivdipe kova šaj te ovel tumen!