1. Ino ty fanapahan-kevitsy farani-ze soa azoni-kiraidraiky atao?

MISY vokany maharitsy amy ty anakiny matetiky ty safidy ataoni-baba noho reny. Laha raty ty safidy ataon-drozy, le mety hiteraky raha manahira amy anakin-drozy iny. Fa laha mahay mifily rozy, le hanampy ani-anakin-drozy iny ho sambatsy noho ho afa-po amy fiaina. Fe tokony hahay hifily koa ty ajà. Ty manompo ani-Jehovah, azy Babantsika be fitiava an-danitsy any iny ro fanapahan-kevitsy farani-ze soa azo atao.​—Sal. 73:28.

2. Ino ty fanapahan-kevitsy soa nataoni-Jesosy noho babany amy reniny?

² Tapa-kevitsy Josefa noho Maria fa hanampy ani-anakin-drozy rey hanompo ani-Jehovah. Hita baka amy zay hoe tena vatan-draha amin-drozy ty fanompoa ani-Jehovah. (Lioka 2:40, 41, 52) Nahay nanapa-kevitsy koa Jesosy, ka nanampy azy raha zay mba hanatanteraky ty raha teani-Jehovah hataony. (Mat. 4:1-10) Nanjary soa fanahy, tsy nivaliky noho be herim-po Jesosy lafa be. Ho falifaly iaby ty baba noho reny matahotsy ani-Jehovah laha manan’anaky manahaky azy.

3. Ino iaby ty fanontanea hovaleantsika amy lahatsoratsy toy ato?

³ Handiniky ani-fanontanea retoa tsika amy lahatsoratsy toy ato: Ino ty safidy soa nataoni-Jehovah mikasiky ani-Jesosy? Ino ty azoni-baba noho reny kristiana ianara baka amy ty safidy nataoni-Josefa noho Maria? Le ino ty azoni-tanora kristiana ianara baka amy ty safidy nataoni-Jesosy?

4. Ino ty fanapahan-kevitsy bevata nataoni-Jehovah mikasiky ani-Anakilahiny iny?

⁴ Olo tena soa toetsy ro nifilini-Jehovah ho baba noho renini-Jesosy. (Mat. 1:18-23; Lioka 1:26-38) Hita baka amy ty raha  nivolanini-Maria amy Baiboly ao hoe tena tea ani-Jehovah noho ty Safàny ie. (Lioka 1:46-55) Natahotsy a Ndranahary koa Josefa sady naniry hampifalifaly azy, lafa hentea ty fanorihany ty tari-dalani-Jehovah.​—Mat. 1:24.

5-6. Ino iaby ty raha nengani-Jehovah handalovani-Anakilahiny iny?

⁵ Henteo fa tsy olo mpanarivo ro nifilini-Jehovah hiteza ani-Jesosy. Hita hoe nahantra Josefa noho Maria lafa hentea ty fanatitsy nataon-drozy tafarani-nahaterahani-Jesosy. (Lioka 2:24) Mety ho nana trano kelikely fiasà Josefa tanilani-tranony ta Nazareta ao. Azo antoky fa tsotra ty fomba fiainan-drozy, satria niteza ajà fito rozy farafahakeliny.​—Mat. 13:55, 56.

⁶ Nisy fotoa Jehovah niaro ani-Jesosy mba tsy ho azon-doza, fe tsy hoe nanao ani-zay tamy Anakilahiny iny avao ie saky nisy raha sarotsy. (Mat. 2:13-15) Tsy nino ani-Jesosy, ohatsy, ty longony. Mba eritsereto hoe nanao akory ty hadisoam-panantenani-Jesosy lafa tsy naneky azy ho Mesia ty fianakaviany. (Mar. 3:21; Jaona 7:5) Mbo tanora vasa Jesosy lafa nimaty Josefa. Azo antoky fa tsy nimora raha zay. Mety ho niasa nisolo ani-babany ie satria anaky talanolo. (Mar. 6:3) Lafa nihabe ie le nianatsy nikarakara ty fianakaviany. Tsy maintsy ho niasa mafy ie mba hahazoa drala noho ze raha nilan-drozy. Dikani-zay, nihainy soa hoe manao akory vozaky baka niasa zao.

7. a) Ino iaby ty fanontanea hanampy ty mpivaly hiteza soa ty anakin-drozy? b) Laha hentea ty Ohabolana 2:1-6, ino ty tokony hampianarini-baba noho reny ty anakiny?

⁷ Laha mpivaly nareo ka maniry hanan’anaky, le eritsereto hoe: ‘Miambany manahaky ani-Maria noho Josefa va tsika, sady tea ani-Jehovah noho ty Safàny? Hifily antsika va Jehovah mba hanankina ain’ajà lafovily aminy?’ (Sal. 127:3, 4) Laha fa manan’anaky iha, le eritsereto zao: ‘Ampianariko va ty anako hoe soa ty miasa mafy?’ (Mpito. 3:12, 13) ‘Manao ze azoko atao va aho mba ho voaaro amy raha raty amy tontoloni-Satana toy eto ty anako?’ (Ohab. 22:3) Tsy ho afaky hiaro ty anakinao amy ze kila raha sarotsy mety hahazo azy iha. Tsy ho vitanao mihintsy zay. Fe azonao ampianary hila torohevitsy amy Safà-Ndranahary ao ie.  Hanampy azy tsikelikely iha amy zay mba ho parè hiatriky fiaina. (Vakio Ohabolana 2:1-6.) Laha tsy manompo ani-Jehovah sasy, ohatsy, ty raiky amy fianakavianareo, le atorò azy baka amy Baiboly ao hoe manino ro tena ilà ty tsy mivaliky amy Jehovah avao. (Sal. 31:23) Na laha misy longonareo maty, le atorò azy ty fomba ampiasà ty Safà-Ndranahary mba hiatreha alahelo noho hampilamin-tsay ndraiky.​—2 Kor. 1:3, 4; 2 Tim. 3:16.

8. Laha hentea ty Deoteronomia 6:6, 7, ino ty nataoni-Josefa noho Maria?

⁸ Nataoni-Josefa noho Maria ze hahavy ani-Jesosy hanjary olobe mahazo hatò amy Ndranahary. Norihin-drozy ty tari-dala nameani-Jehovah ho ahi-ty baba noho reny. (Vakio Deoteronomia 6:6, 7.) Tena nitea ani-Jehovah rozy, ka tsy nataon-drozy ambanin-draha ty hanampy ani-anakin-drozy rey mba hana fitiava manahaky ani-zay.

9. Ino ty fanapahan-kevitsy bevata nataoni-Josefa noho Maria?

⁹ Nataoni-Josefa noho Maria ze hahavy ty fianakavian-drozy hana fahazara soa ara-panahy avao. Azo antoky hoe nanatriky ty fivoria sankerinandro tamy synagona ta Nazareta ao rozy, sady namonjy Paska fatao santao ta Jerosalema any. (Lioka 2:41; 4:16) Mety ho nanararaotsy nampianatsy ani-Jesosy noho zainy rey mikasiky ty tantarani-vahoakini-Jehovah rozy tan-dala ho a Jerosalema any. Mety ho nanao ani-zay rozy lafa nandalo ani-pilasy voaresaky amy Baiboly ao rey. Nimaro anaky Josefa noho Maria ka tsy nimora tamin-drozy ty hana fahazara soa ara-panahy avao. Fe mba henteo moa ty raha soa niazon-drozy! Nifandramby marìny amy Jehovah ty fianakavian-drozy satria nataon-drozy voaloha lista ty raha ara-panahy.

10. Ino iaby ty azoni-baba noho reny kristiana ianara baka amy Josefa noho Maria?

¹⁰ Ino ty azoni-baba noho reny manompo a Ndranahary ianara baka amy Josefa noho Maria? Toy ty vatan-draha marè, asehò amy anakinareo reo amy ty raha volaninareo noho ataonareo hoe tena tea ani-Jehovah nareo. Ampeo ho tea ani-Jehovah rozy, zay ty raha farani-ze soa azonareo amea an-drozy. Ampianaro an-drozy hoe akory ty atao mba  tsy ho tapatapaky ty fianara Baiboly, vavaky, fivoria noho fanompoa. (1 Tim. 6:6) Mazava ho azy fa tsy maintsy ameanao ze raha ilàny mba hahavelo azy ty anakinao. (1 Tim. 5:8) Fe tiarovo fa lafa horavà tontolo toy, le ty fifandrambesany marìny amy Jehovah ro hanampy azy ho tafaboaky velo, fa tsy hanana. Mbo zay avao koa ro hahafahany militsy amy tontolo vaovao amea-Ndranahary iny ao.​—Ezek. 7:19; 1 Tim. 4:8.

11. a) Manino torohevitsy amy 1 Timoty 6:17-19 io ro hanampy ty baba noho reny hahay hifily ty fomba hitezan-drozy ty anakin-drozy? b) Ino iaby ty raha kendrè azonareo trano raiky eritserety, le ino ty fitahia ho azonareo? (Henteo ty efajoro hoe “ Ino Iaby ty Raha Kendrè Teanareo Hanana?”)

¹¹ Mampahery ty mahita hoe maro ty Kristiana nahay nifily ka manampy ty fianakaviany hifandramby marìny amy Jehovah! Miaraky manao fotoam-pivavaha tsy tampaky rozy. Manatriky fivoriani-fiangona noho fivoriambe, sady mitory ty vaovao soa. Mitory amy faritany tsy voaasa matetiky mihintsy aza ty fianakavia sisany. Ty ilany mitsidiky Betela na manampy amy fanorena ty tranoni-fandamina. Tsy maintsy manoka drala ze fianakavia mifily hanao ani-raha rey, sady mety hisy raha sarotsy hatrehin-drozy. Fe maro ty fitahia ameani-Jehovah an-drozy. (Vakio 1 Timoty 6:17-19.) Mbo manohy ty fahazara soa nianarany avao matetiky ty ajà nitezà tamy fianakavia manahaky ani-reo sady tsy maneny mihintsy! *​—Ohab. 10:22.

12. Ino ty nila nataoni-Jesosy lafa nihabe?

¹² Soa iaby ze fanapahan-kevitsy nataoni-Babani-Jesosy an-danitsy any iny. Nahay nanapa-kevitsy koa baba noho reny niteza azy tan-tany etoy rey. Fe ndre zay lafa nihabe Jesosy, le nila nanapa-kevitsy ho azy am-batany. (Gal. 6:5) Nana fahafaha hifily ie, manahaky antsika iaby. Azony natao ty nifily hanao ze raha teany avao tse. Fe tsy zay ty nataony fa niezaky hifandramby soa amy Jehovah avao ie. (Jaona 8:29) Manino ty modely nameany ro afaky manampy ani-tanora reo?

13. Ino ty nifilini-Jesosy hatao tamin’ie mbo nimpamaraky?

¹³ Tamy Jesosy mbo nimpamaraky, le nifily hanoriky ty safàni-babany noho reniny ie. Tsy nandà ty torohevitsy namean-drozy mihintsy ie ka nieritseritsy hoe mahay raha maro mandilatsy an-drozy. “Nanoriky ty safàn-drozy avao” ie. (Lioka 2:51) Azo antoky fa nataoni-Jesosy soa ty andraikitsiny amy maha talanolo azy. Niezaky marè ie mba hahay ty asani-Josefa babany, amy zay afaky manampy ty fianakaviany.

14. Akory ty ahaizantsika hoe nazoto nianatsy ty Safà-Ndranahary Jesosy?

 ¹⁴ Mety nitantaranini-baba noho renini-Jesosy taminy hoe fahagagà ty fomba nahaterahany. Nivolanin-drozy taminy koa vasa ty raha niresahini-iraki-Ndranahary iny mikasiky azy. (Lioka 2:8-19, 25-38) Fe tsy nijano amy zao avao Jesosy. Nianarany soa koa ty Soratsy Masy. Akory ty ahaizantsika hoe nazoto nianatsy ty Safà-Ndranahary Jesosy? Satria tamin’ie mbo nimpamaraky, le ‘nitseriky’ mpampianatsy ta Jerosalema ao reo “nijanjy azy amy ty fahihirany noho ty valin-teniny.” (Lioka 2:46, 47) Vo 12 tao Jesosy, le fa nieky hoe Babany Jehovah.​—Lioka 2:42, 43, 49.

15. Akory ty nampisehoani-Jesosy hoe nifily hanao ty sitraponi-Jehovah ie?

¹⁵ Lafa nihaini-Jesosy hoe ino ty teani-Jehovah hataony, le nifily hanao ty sitraponi-Jehovah ie. (Jaona 6:38) Hainy hoe ho halan’olo maro ie, le tsy maintsy ho nampieritseritsy azy raha zay. Fe nifily hanoriky ty safàni-Jehovah avao ie. Lafa natao batisa Jesosy tamy tao 29, le nifantoky tanteraky tamy fanaova ty raha teani-Jehovah. (Heb. 10:5-7) Ndre fa ho maty tamy hazo fijalea teo aza ie, le tsy nivaliky mihintsy fa nanao ty sitraponi-Babany avao.​—Jaona 19:30.

16. Ino ty raha raiky azoni-ajà ianara baka amy Jesosy?

¹⁶ Oriho ty safàni-baba noho reninao. Tsy lavorary manahaky ani-Josefa noho Maria koa ty babanao noho mamanao. Fe rozy ro nifilini-Jehovah hiaro anao, sady hampiofana anao noho hitari-dala anao. Laha mijanjy ty torohevitsy amean-drozy noho manaja ty fahefàn-drozy iha, le “hahita soa.”​—Efes. 6:1-4.

17. Laha hentea ty Josoa 24:15, ino ty fanapahan-kevitsy tsy maintsy rambesini-tanora?

¹⁷ Filio ze hotompoenao. Anovo hay soa hoe ia Jehovah zao, ino ty raha teany hatao, le akory ty azonao anaova ani-zay amy fiainanao. (Rom. 12:2) Ho afaky handramby fanapahan-kevitsy farani-ze soa amy fiainanao iha amy zay, ka hanapa-kevitsy hanompo ani-Jehovah. (Vakio Josoa 24:15; Mpito. 12:1) Laha miezaky mamaky noho mianatsy Baiboly tsy tampaky iha, le hihamitombo ty fitiavanao ani-Jehovah sady hihamatanjaky ty finoanao azy.

18. Ino ty raha hafa tokony hofilini-tanora, le ino ty ho vokany?

 ¹⁸ Ty sitraponi-Jehovah ro anovo voaloha lista amy fiainanao. Mampitamà tontoloni-Satana toy fa ho sambatsy iha laha mampiasa ty talentanao mba hahazoa raha ho ahi-ty vatanao. Kanefa haintsika hoe ze olo mifantoky amy filan-drala noho hanana, le mitsiboky ty ainy amy “raha maro mampararirary.” (1 Tim. 6:9, 10) Mifanohitsy amy zay fa laha mijanjy ani-Jehovah iha, ataonao voaloha lista amy fiainanao ty sitrapony, le “hanao raha amy fahendrea” iha sady ho sambatsy.​—Jos. 1:8.

19. Ino ty tokony hotiarovini-ze manan’anaky?

¹⁹ Nareo baba noho reny, anovo ze azonareo atao mba hanampea ty fianakavianareo hanompo ani-Jehovah. Miantehera aminy, le hanampy anao hahay hanapa-kevitsy ie. (Ohab. 3:5, 6) Tiarovo hoe misy vokany bevata amy ty anakinao mandilatsy ty raha volaninao ty raha ataonao. Ka mba manaova fanapahan-kevitsy hanampy an-drozy hahazo hatò amy Jehovah.

20. Ino iaby ty fitahia ho azoni-tanora laha mifily hanompo ani-Jehovah rozy?

²⁰ Ho anareo tanora, manampy anao handramby fanapahan-kevitsy soa amy fiaina ty babanao noho mamanao. Fe mianky aminao avao ro hahafahanao mahazo hatò amy Ndranahary. Manahafa ani-Jesosy ka manompoa ani-Babanao an-danitsy any iny. Laha manao ani-zay iha, le ho sambatsy noho falifaly sady hanjary hisy dikany ty fiainanao. (1 Tim. 4:16) Hana fiaina mahafa-po mihintsy aza iha amy hoavy!