1. San na a moro bun bosroiti di wan sma kan teki?

NOFO TRON den bosroiti di papa nanga mama e teki abi krakti tapu a libi fu den pikin fu wan heri pisi ten. Efu papa nanga mama no e teki bun bosroiti, dan dati kan tyari problema gi den pikin fu den. Ma efu den e teki koni bosroiti, dan den e yepi den pikin fu abi wan koloku libi. A no de fu taki dati den pikin srefi musu teki bun bosroiti tu. A moro bun bosroiti di wan sma kan teki, na fu dini wi lobi hemel Tata, Yehovah.​—Ps. 73:28.

2. Sortu bun bosroiti Yesus nanga en papa nanga mama teki?

² Yesus en papa nanga mama ben wani yepi den pikin fu den fu dini Yehovah èn den bosroiti di den teki sori taki dati ben de a moro prenspari sani na ini den libi (Luk. 2:40, 41, 52). Neleki en papa nanga mama, Yesus ben teki bun bosroiti tu di yepi en fu du san Yehovah ben wani en fu du (Mat. 4:1-10). Yesus gro kon tron wan man di ben abi switifasi, a ben e tai hori na Gado èn a ben abi deki-ati. Ala papa nanga mama di lobi Yehovah ben o breiti fu abi wan pikin leki en.

3. Sortu aksi wi o luku na ini na artikel disi?

³ Na ini na artikel disi wi o luku den aksi disi: Sortu bun bosroiti Yehovah teki te a abi fu du nanga Yesus? San Kresten papa nanga mama kan leri fu den bosroiti di Yosef nanga Maria teki? Èn san Kresten yonguwan kan leri fu den bosroiti di Yesus teki?

4. Sortu prenspari bosroiti Yehovah teki te a abi fu du nanga en Manpikin?

⁴ Yehovah suku wan bun papa nanga wan bun mama gi Yesus (Mat. 1:18-23; Luk. 1:26-38). Den moi sani di Maria  taki, soleki fa a skrifi na ini Bijbel, e sori taki a ben lobi Yehovah nanga a Wortu fu en trutru (Luk. 1:46-55). Boiti dati, a fasi fa Yosef gi yesi na Yehovah e sori taki a ben abi bigi lespeki gi Gado èn taki a ben wani du san Gado taki.​—Mat. 1:24.

5-6. Gi sortu sani Yehovah no kibri a Manpikin fu en?

⁵ Luku taki Yehovah no suku wan gudu papa nanga mama gi Yesus. Na ofrandi di Yosef nanga Maria tyari baka di Yesus gebore, e sori taki den ben pôti (Luk. 2:24). Kande Yosef ben abi wan pikin wrokope na sei en oso na Nasaret pe a ben e wroko leki temreman. A musu de taki den no ben abi furu moni noso gudu, spesrutu te wi e luku taki den ben kon abi seibi noso moro pikin.​—Mat. 13:55, 56.

⁶ Yehovah ben kibri en Manpikin Yesus gi son sani, ma a no kibri en gi ala tesi di ben o miti en (Mat. 2:13-15). Fu eksempre, Yesus ben abi famiriman di no ben e poti bribi na ini en. Prakseri fa Yesus ben e firi di son sma fu en eigi osofamiri no ben wani bribi biginbigin taki en na a Mesias (Mark. 3:21; Yoh. 7:5). A kan tu taki Yesus en kwekipapa Yosef dede di Yesus ben yongu ete. A musu de taki disi ben hebi gi en. Kande a sani disi meki taki Yesus, di ben de a moro bigi manpikin, ben musu drai a pikin bisnis fu a famiri (Mark. 6:3). Di Yesus ben e gro kon, a leri fa fu sorgu gi en osofamiri. A no de fu taki dati a ben musu wroko tranga fu sorgu gi den èn taki na a kaba fu a dei a ben weri.

7. (a) San trowpaar musu aksi densrefi te den abi pikin? (b) San papa nanga mama musu leri den pikin, soleki fa Odo 2:1-6 e sori?

⁷ Efu yu trow èn yu nanga yu patna wani meki pikin, dan unu musu aksi unsrefi: ’Wi abi sakafasi èn wi lobi Yehovah nanga a Wortu fu en? Yehovah ben o teki wi fu sorgu wan pikin di de wan warti gudu?’ (Ps. 127:3, 4) Efu yu abi pikin kaba, dan aksi yusrefi: ’Mi e leri mi pikin taki a bun fu wroko tranga?’ (Preik. 3:12, 13) ’Mi e du ala san mi man fu kibri den pikin fu mi gi den ogri di kan miti den na ini a grontapu fu Satan?’ (Odo 22:3) No denki taki yu o man kibri yu pikin gi ala problema di kan miti den. A sani dati no kan. Ma yu kan leri den nanga pasensi  fa fu suku rai na ini Bijbel. Na so yu o man sreka den gi problema di kan miti den. (Leisi Odo 2:1-6.) Fu eksempre, efu wan famiriman fu yu drai baka gi a tru bribi, dan gebroiki Bijbel fu sori yu pikin fu san ede a prenspari fu tan gi yesi na Yehovah (Ps. 31:23). Noso efu wan lobiwan fu yu lasi libi, dan sori yu pikin fa Bijbel kan trowstu den te den e sari.​—2 Kor. 1:3, 4; 2 Tim. 3:16.

8. San Yosef nanga Maria ben musu du, soleki fa Deuteronomium 6:6, 7 e sori?

⁸ Yosef nanga Maria ben man yepi Yesus fu gro kon tron wan man di Gado ben feni bun, fu di den ben kweki en na a fasi fa Yehovah wani. (Leisi Deuteronomium 6:6, 7.) Yosef nanga Maria ben lobi Yehovah trutru èn a moro prenspari sani gi den ben de fu yepi den pikin fu lobi Yehovah tu.

9. Sortu prenspari sani Yosef nanga Maria du makandra nanga na osofamiri fu den?

⁹ Yosef nanga Maria ben sorgu taki a heri osofamiri ben abi a gwenti fu anbegi Yehovah makandra. A no de fu taki dati ibri wiki den ben e go na a snoga na ini Nasaret èn ibri yari den ben e go na Yerusalem fu hori a Paskafesa (Luk. 2:41; 4:16). A kan taki te den ben e go na Yerusalem leki osofamiri, den ben e leri Yesus nanga den brada nanga sisa fu en san ben pasa nanga a pipel fu Yehovah na ini owruten. Kande den ben e go luku den presi di kari na ini Gado Wortu. A no de fu taki dati di Yosef nanga Maria kon abi moro pikin, a no ben makriki gi den fu tan anbegi Yehovah leki osofamiri. Ma den kisi blesi fu a muiti di den meki. Fu di den poti na anbegi fu Yehovah na a fosi presi na ini den libi, meki na osofamiri fu den ben man tan krosibei na Yehovah.

10. San Kresten papa nanga mama kan leri fu Yosef nanga Maria?

¹⁰ San papa nanga mama di lobi Yehovah kan leri fu Yosef nanga Maria? A moro prenspari sani, na taki yu musu sori yu pikin taki yu lobi Yehovah nanga yu heri ati. Den musu man si dati na den sani di yu e taki èn du. Hori na prakseri taki a moro bigi kado di yu kan gi den, na fu leri  den fu lobi Yehovah. Wan tu prenspari sani di yu kan leri den, na fu abi a gwenti fu studeri Bijbel, fu begi, fu go na den konmakandra èn fu teki prati na a preikiwroko (1 Tim. 6:6). A no de fu taki dati yu musu gi den pikin fu yu sani di den abi fanowdu (1 Tim. 5:8). Ma no frigiti taki a no moni noso gudu o meki den pikin fu yu pasa a kaba fu na owru grontapu disi libilibi. A wan-enkri sani di kan yepi den fu go na ini a nyun grontapu, na te den de mati fu Gado. *​—Esek. 7:19; 1 Tim. 4:8.

11. (a) Fa a rai na 1 Timoteyus 6:17-19 e yepi papa nanga mama fu teki bun bosroiti te den e kweki den pikin? (b) Sortu sani yu osofamiri kan du èn sortu blesi dati o tyari kon? (Luku a faki „ San yu wani du?”)

¹¹ A e gi prisiri fu si fa so furu Kresten papa nanga mama e teki bun bosroiti fu yepi den pikin fu kon moro krosibei na Gado! Den abi a gwenti fu anbegi Gado leki osofamiri. Den e go na den gemeente konmakandra nanga den kongres èn den e teki prati na a preikiwroko. Son osofamiri man preiki srefi na ini kontren pe Kotoigi no e preiki so furu. Trawan e go luku Betel noso den e yepi nanga a bow-wroko fu Yehovah en organisâsi. Den osofamiri disi e pai moni fu man du den sortu sani disi èn son leisi a no makriki gi den. Ma Yehovah e blesi den gi a muiti di den e du. (Leisi 1 Timoteyus 6:17-19.) Nofo tron, pikin di kweki na ini den osofamiri disi e tan du den bun sani disi te den kon bigi èn den breiti taki den papa nanga mama kweki den so! *​—Odo 10:22.

12. San Yesus srefi ben musu du di a ben e gro kon bigi?

¹² Yesus en Papa na hemel e teki bun bosroiti ala ten èn Yesus en papa nanga mama na grontapu ben e teki bun bosroiti tu. Ma di Yesus ben e gro kon, a ben musu teki en eigi bosroiti (Gal. 6:5). Neleki fa a de nanga wi alamala, Yesus ben kan bosroiti fu du san en srefi wani. Sobun, a ben kan bosroiti fu suku en eigi bun na presi fu du a wani fu Gado. Ma a bosroiti fu tan du san Yehovah ben e aksi fu en (Yoh. 8:29). Fa na eksempre fu Yesus kan yepi yonguwan na ini a ten disi?

13. Sortu prenspari bosroiti Yesus teki yonguyongu kaba?

¹³ Yonguyongu kaba Yesus bosroiti fu gi yesi na en papa nanga mama. Noiti a ben denki taki a sabi sani moro den. Na presi fu dati „a tan saka ensrefi na den ondro” (Luk. 2:51). Fu di Yesus ben de a moro owru manpikin, meki a no de fu taki dati  a ben e si en leki wan seryusu sani fu tyari en frantwortu na ini na osofamiri. A wroko tranga fu leri a temrewroko di Yosef ben e du, so taki a ben kan yepi meki moni fu sorgu na osofamiri.

14. Fa wi du sabi taki Yesus ben e studeri Gado Wortu bun?

¹⁴ A musu de taki Yesus en papa nanga mama ben fruteri en fa a gebore èn san den boskopuman fu Gado ben taki fu en (Luk. 2:8-19, 25-38). Ma boiti den sani di en papa nanga mama ben fruteri en, a ben abi a gwenti fu studeri Gado Wortu tu. Fa wi du sabi taki Yesus ben e studeri Gado Wortu bun? Fu di Bijbel e taki dati di Yesus ben de wan yongu boi ete, den leriman na ini Yerusalem „ben e fruwondru taki a ben abi someni koni èn taki a ben man piki den na so wan bun fasi” (Luk. 2:46, 47). Di Yesus ben abi 12 yari nomo, a ben e frustan kaba taki Yehovah na en Papa.​—Luk. 2:42, 43, 49.

15. Fa Yesus sori taki a ben wani du a wani fu Yehovah?

¹⁵ Di Yesus kon frustan san Yehovah ben wani taki a du, a bosroiti fu du san Yehovah ben aksi fu en (Yoh. 6:38). A ben sabi taki furu sma no ben o lobi en. Aladi a ben sabi taki a no ben o makriki gi en, toku a bosroiti fu gi yesi na Yehovah. Di Yesus dopu na ini a yari 29, a moro prenspari sani gi en ben de fu du san Yehovah ben aksi fu en (Hebr. 10:5-7). Srefi di Yesus ben e anga na a pinapostu, a no meki a sani dati tapu en fu du a wani fu en Papa.​—Yoh. 19:30.

16. San pikin kan leri fu Yesus?

¹⁶ Gi yesi na yu papa nanga mama. Neleki Yosef nanga Maria, yu papa nanga mama e meki fowtu. Ma Yehovah gi yu papa nanga mama a frantwortu fu kibri yu èn fu gi yu leri. Efu yu e gi yesi na den èn efu yu e lespeki den, dan „sani sa go bun nanga yu”.​—Ef. 6:1-4.

17. Sortu bosroiti yonguwan srefi musu teki, soleki fa Yosua 24:15 e sori?

¹⁷ Bosroiti suma yu o dini. Yu srefi musu meki muiti fu kon frustan suma na Yehovah, san na a wani fu en èn fa yu kan du san a e aksi fu yu (Rom. 12:2). Te yu du dati, dan yu o man teki a moro prenspari bosroiti na ini yu libi, a bosroiti fu  dini Yehovah (leisi Yosua 24:15; Preik. 12:1). Efu yu abi a gwenti fu leisi Bijbel èn fu studeri, dan yu o kisi moro lobi gi Yehovah èn a bribi fu yu o kon moro tranga.

18. Sortu bosroiti yonguwan musu teki èn san o de a bakapisi?

¹⁸ Bosroiti fu poti a wani fu Yehovah na a fosi presi na ini yu libi. A grontapu fu Satan e pramisi taki yu o de koloku te yu e gebroiki den koni di yu abi fu yu eigi bun. Ma wi sabi taki te sma e feti baka gudu, dan den e „gi densrefi furu pen, neleki na dyuku den dyuku densrefi” (1 Tim. 6:9, 10). Ma efu yu gi yesi na Yehovah èn yu bosroiti fu poti a wani fu en na a fosi presi na ini yu libi, dan yu libi o waka bun èn „yu o handri nanga koni”.​—Yos. 1:8.

19. San papa nanga mama musu hori na prakseri?

¹⁹ Papa nanga mama, du ala san yu man fu yepi yu pikin fu dini Yehovah. Frutrow na en tapu èn a o yepi yu fu teki koni bosroiti (Odo 3:5, 6). Hori na prakseri taki den sani di yu e du abi moro krakti tapu yu pikin leki den sani di yu e taki. Sobun, teki bosroiti di o yepi den fu kon moro krosibei na Yehovah.

20. Sortu blesi yonguwan o kisi te den bosroiti fu dini Yehovah?

²⁰ Yonguwan, un papa nanga mama kan yepi unu fu teki koni bosroiti na ini un libi. Ma ibriwan fu unu musu teki bun bosroiti efu unu wani taki Gado breiti nanga unu. Sobun, leri fu Yesus èn teki a bosroiti fu dini yu hemel Tata di lobi yu. Te yu du dati, dan nownow kaba yu o abi furu moi sani fu du èn yu o de koloku (1 Tim. 4:16). Èn na ini a ten di e kon, yu o abi a moro bun libi di yu kan abi!