1. Hi xihi xiboho lexinene lexi un’wana ni un’wana a nga xi endlaka?

 HAKANYINGI swiboho leswi vatswari va swi endlaka swi khumba vutomi bya vana va vona niloko se va kurile. Loko vatswari va endla swiboho leswi hoxeke, swi nga vangela vana va vona swiphiqo. Kambe loko va endla swiboho leswinene, vana va vona swi ta va fambela kahle evuton’wini. Kambe vana na vona va fanele va tiendlela swiboho leswinene. Xiboho lexinene lexi un’wana ni un’wana a nga xi endlaka, i ku tirhela Yehovha, Tata wa hina wa le tilweni.—Ps. 73:28.

2. Hi swihi swiboho leswinene leswi Yesu ni vatswari vakwe va swi endleke?

² Vatswari va Yesu a va tiyimisele ku pfuna vana va vona leswaku va tirhela Yehovha, swiboho leswi va swi endleke swi kombisa leswaku a va swi teka swi ri swa nkoka ku endla tano. (Luka 2:40, 41, 52) Yesu na yena u endle swiboho leswinene leswi n’wi pfuneke leswaku a kota ku endla ku rhandza ka Yehovha. (Mat. 4:1-10) Loko Yesu a ri karhi a kula a a ri ni musa, a tshembekile a tlhela a va ni xivindzi naswona a ri n’wana loyi mutswari un’wana ni un’wana loyi a gandzelaka Yehovha a ta ti ba xifuva hi yena.

3. Hi swihi swivutiso leswi hi nga ta swi hlamula eka nhlokomhaka leyi?

³ Eka nhlokomhaka leyi, hi ta hlamula swivutiso leswi landzelaka: Hi swihi swiboho leswinene leswi Yehovha a swi endleke mayelana na Yesu? Vatswari lava nga Vakreste, va nga dyondza yini eka swiboho leswi endliweke hi vatswari va Yesu? Vantshwa  lava nga Vakreste va nga dyondza yini eka swiboho leswi Yesu a swi endleke?

4. Hi xihi xiboho lexi Yehovha a xi endleke mayelana ni N’wana wakwe?

⁴ Yehovha u hlawulele Yesu vatswari lavanene ngopfu. (Mat. 1:18-23; Luka 1:26-38) Marito lawa Mariya a ma vuleke lama tsariweke eBibeleni ma kombisa leswaku a a rhandza Yehovha ni Rito rakwe hi mbilu hinkwayo. (Luka 1:46-55) Ndlela leyi Yosefa a yingiseke Yehovha hayona yi kombisa leswaku a a n’wi xixima naswona a lava ku n’wi tsakisa.—Mat. 1:24.

5-6. Yehovha u pfumelele N’wana wakwe leswaku a langutana na yini?

⁵ Yehovha a nga hlawulelanga Yesu vatswari lava nga swigwili. Magandzelo lawa Yosefa na Mariya va ma endleke endzhaku ka ku velekiwa ka Yesu ma kombisa leswaku a va ri swisiwana. (Luka 2:24) Swi nga endleka leswaku Yosefa a a ri ni xibindzwana xo vatla eNazareta laha a tshama kona. Leswi ndyangu a wu ya wu kula hikwalaho ka leswi a wu ri ni vana va kwalomu ka nkombo, vusiwana a byi ya byi nyanya.—Mat. 13:55, 56.

⁶ Hambileswi Yehovha a a sirhelela N’wana wakwe, kambe a nga n’wi sirhelelanga eka makhombo hinkwawo. (Mat. 2:13-15) Hi xikombiso, Yesu u boheke ku tiyisela maxaka lawa a ma nga n’wi gandzeli Yehovha. A swi kanakanisi leswaku Yesu a hele matimba loko swirho swin’wana swa ndyangu wa ka vona swi nga pfumeli leswaku i Mesiya. (Mar. 3:21; Yoh. 7:5) U tlhele a boheka ku langutana ni gome ro feriwa hi tata wakwe Yosefa. Leswi a a ri mativula, swi nga endleka leswaku se a boheka ku ya emahlweni ni bindzu ra tata wakwe ro vatla. (Mar. 6:3) Loko a ri karhi a kula, u dyondze ndlela yo khathalela ndyangu wa ka vona. Swi le rivaleni leswaku a boheka ku tirha hi matimba. Hikwalaho, a a swi tiva leswaku swi njhani ku karhala.

7. (a) Hi swihi swivutiso leswi nga ta pfuna vatekani leswaku va va kurisa kahle vana va vona? (b) Swivuriso 2:1-6 yi nga va pfuna njhani vatswari eku leteleni ka vana?

⁷ Loko mi catile naswona mi lava ku va ni vana tivutiseni leswi: ‘Xana hi vanhu lava rhandzaka Yehovha lerova a nga hi hlawula leswaku hi kurisa n’wana?’ (Ps. 127:3, 4) Loko u ri mutswari, tivutise: ‘Xana ndza va dyondzisa vana va mina mitirho?’ (Ekl. 3:12, 13) ‘Xana  ndza va letela vana va mina ku tisirhelela eka mahanyelo yo biha lawa va nga ha langutanaka na wona?’ (Swiv. 22:3) A wu nge swi koti ku sirhelela vana va wena eka mitlhontlho hinkwayo. Sweswo a swi koteki. Kambe u nga swi kota ku va letela ni ku va hlomisa leswaku va titshega hi Rito ra Xikwembu loko va langutana ni mitlhontlho. (Hlaya Swivuriso 2:1-6.) Hi xikombiso, loko xaka ri tshika ku tirhela Yehovha, pfuna vana va wena hi ku tirhisa Rito ra Xikwembu va tiva leswaku hikwalahokayini swi ri swa nkoka ku tshama va tshembekile eka Yehovha. (Ps. 31:23) Loko mi loveriwa, komba vana va wena ndlela leyi Rito ra Xikwembu ri nga va chavelelaka hayona.—2 Kor. 1:3, 4; 2 Tim. 3:16.

8. Hi ku ya hi Deteronoma 6:6, 7, i yini leswi Yosefa na Mariya a va fanele va swi endla?

⁸ Vatswari va Yesu va n’wi pfunile leswaku a kula a ri ni vuxaka lebyinene ni Xikwembu; va yingise nkongomiso lowu Yehovha a wu nyikeke vatswari. (Hlaya Deteronoma 6:6, 7.) Yosefa na Mariya a va rhandza Yehovha hi mbilu hinkwayo naswona xikongomelo xa vona a ku ri ku pfuna vana va vona leswaku na vona va endla tano.

9. Hi swihi swiboho swa nkoka leswi Yosefa na Mariya va swi endleke?

⁹ Yosefa na Mariya va endle xiboho xo gandzela Yehovha tanihi ndyangu. Vhiki ni vhiki a va ya etinhlengeletanweni eNazareta naswona a va ya enkhubyeni wa Paseka eYerusalema lembe ni lembe. (Luka 2:41; 4:16) Kumbexana loko va ya eYerusalema a va tirhisa nkarhi wolowo ku dyondzisa Yesu ni vamakwavo hi ta matimu ya vanhu va Yehovha kumbe loko va ri karhi va famba a va pfa va endzela etindhawini tin’wana leti ku vulavuriwaka ha tona eMatsalweni. Hambileswi ndyangu a wu ya wu kula, Yosefa na Mariya a va wa va pfuka leswaku va gandzela Yehovha tanihi ndyangu. Va kume mikateko yo tala hikwalaho ko endla tano! Leswi a va rhangisa ku gandzela Yehovha, ndyangu wa vona wu ve ni vuxaka lebyinene na Yehovha.

10. Vatswari lava nga Vakreste va nga dyondza yini eka Yosefa na Mariya?

¹⁰ Vatswari lava nga Vakreste va nga dyondza yini eka Yosefa na Mariya? Komba vana va wena hi marito ni hi swiendlo leswaku u rhandza Yehovha hi mbilu hinkwayo. Tsundzuka  leswaku nyiko ya risima leyi u nga va nyikaka yona i ku va dyondzisa ku rhandza Yehovha. Yin’wana ya tidyondzo ta nkoka leti u nga va dyondzisaka tona i ku va dyondzisa ku hlaya Bibele, ku khongela, ku va kona etinhlengeletanweni ta vandlha ni ku va kona ensin’wini nkarhi ni nkarhi. (1 Tim. 6:6) U fanele u tlhela u va wundla. (1 Tim. 5:8) Tsundzuka leswaku vuxaka lebyi vana va wena va nga na byona na Yehovha hi byona lebyi nga ta endla leswaku va pona loko ku lovisiwa misava leyi, rifuwo a ri nge va pfuni hi nchumu. *—Ezek. 7:19; 1 Tim. 4:8.

11. (a) Xitsundzuxo lexi nga eka 1 Timotiya 6:17-19, xi nga va pfuna njhani vatswari leswaku va endla swiboho leswinene loko va ri karhi va kurisa vana va vona? (b) Hi swihi swin’wana leswi mi nga bulaka hi swona tanihi ndyangu naswona vuyelo byi ta va byihi? (Vona bokisi leri nge “ Mi Tiyimisele Ku Endla Yini?”)

¹¹ Hakunene swa tsakisa ku vona vatswari vo tala lava nga Vakreste va pfuna vana va vona leswaku va va ni vuxaka ni Xikwembu. Nkarhi ni nkarhi va gandzela swin’we tanihi ndyangu. Va ya swin’we etinhlengeletanweni ta vandlha ni ta swifundzha. Nakambe va chumayela swin’we tanihi ndyangu. Mindyangu yin’wana yi chumayela ensin’wini leyi nga tirhiwiki nkarhi na nkarhi. Yin’wana yi endzela eBethele kumbe yi hoxa xandla eku pfuneteni ka ku aka. Mindyangu leyi endlaka leswi yi tirhisa mali ya yona naswona mikarhi yin’wana yi langutana ni mitlhontlho. Kambe Yehovha wa yi katekisa swinene. (Hlaya 1 Timotiya 6:17-19.) Vana lava kuleleke emindyangwini yo tano va ya emahlweni va tirhisa leswi va swi dyondzeke niloko se va kurile naswona a va tisoli nikatsongo! *—Swiv. 10:22.

12. I yini leswi Yesu a a fanele a swi endla loko a ri karhi a kula?

¹² Mikarhi hinkwayo Tata wa Yesu wa le tilweni u endla swiboho leswinene, na Yosefa na Mariya vatswari vakwe na vona va endle swiboho leswinene. Kambe Yesu loko a ri karhi a kula na yena a fanele a tiendlela swiboho. (Gal. 6:5) Ku fana na hina, na yena a a ri ni tshunxeko wo tihlawulela. A a ta va a hlawule ku titsakisa. Kurinasweswo, u hlawule ku endla swilo leswi tsakisaka Yehovha. (Yoh. 8:29) Vantshwa va nga dyondza yini eka yena namuntlha?

13. Hi xihi xiboho xa nkoka lexi Yesu a xi endleke loko a ha ri ntsongo?

¹³ Loko Yesu a ha ri ntsongo, u endle xiboho xo yingisa vatswari vakwe. A nga tshikanga ku va yingisa hi ku tibyela leswaku u tiva swo tala ku va tlula. Kurinasweswo, u ye “emahlweni a va yingisa.” (Luka 2:51) Leswi a ri mativula  u byi hetisise kahle vutihlamuleri byakwe. U dyondze ntirho eka tata wakwe leswaku a ta kota ku khathalela ndyangu wa ka vona.

14. Hi swi tiva njhani leswaku Yesu a a rhandza ku hlaya Rito ra Xikwembu?

¹⁴ Swi nga endleka vatswari vakwe va n’wi byele hi ta ndlela ya singita leyi a velekiweke hayona ni leswi tintsumi ti va byeleke swona. (Luka 2:8-19, 25-38) Yesu a nga yingisanga leswi a byeriweke swona ntsena; u tlhele a tihlayela ni Matsalwa. Hi swi tiva njhani leswaku Yesu a a rhandza ku hlaya Rito ra Xikwembu? Loko a ha ri xifanyetana, vadyondzisi va le Yerusalema a va tshamela ku hlamala “hikwalaho ka ku twisisa kakwe ni tinhlamulo takwe.” (Luka 2:46, 47) Loko a ri ni malembe ya 12, se a swi tiva leswaku Yehovha i Tata wakwe.—Luka 2:42, 43, 49.

15. Yesu u swi kombise njhani leswaku u endle xiboho xo endla ku rhandza ka Yehovha?

¹⁵ Loko Yesu a tiva leswi Yehovha a lavaka a swi endla u endle xiboho xo amukela ntirho lowu a nyikiweke wona. (Yoh. 6:38) A a swi tiva leswaku vanhu vo tala va ta n’wi venga naswona a yi nga n’wi dyisi byi rhelela mhaka yoleyo. Kambe u endle xiboho xo yingisa Yehovha. Loko Yesu a khuvuriwa hi 29 C.E., a a lava ku endla ku rhandza ka Yehovha. (Hev. 10:5-7) Hambiloko a ri ekusuhi ni ku fa emhandzini ya nxaniso, Yesu a a nga tshikanga ku endla ku rhandza ka Tata wakwe.—Yoh. 19:30.

16. Vana va nga dyondza yini eka Yesu?

¹⁶ Yingisani vatswari va n’wina. Ku fana na Yosefa na Mariya, vatswari va n’wina a va hetisekanga. Kambe Yehovha u nyike vona vutihlamuleri bya ku mi sirhelela, ku mi letela ni ku mi kongomisa. Loko mi va yingisa ni ku va xixima, ‘swi ta mi fambela kahle.’—Efe. 6:1-4.

17. Hi ku ya hi Yoxuwa 24:15, hi xihi xiboho lexi vana va faneleke va tiendlela xona?

¹⁷ Hlawulani loyi mi nga ta n’wi tirhela. U fanele u n’wi tiva kahle Yehovha, u tiva xikongomelo xakwe ni ndlela leyi u nga ku endlaka hayona ku rhandza kakwe. (Rhom. 12:2) Kutani u ta kota ku endla xiboho xa nkoka swinene evuton’wini bya wena, ku nga ku tirhela Yehovha. (Hlaya Yoxuwa 24:15; Ekl. 12:1) Loko u hlaya Bibele nkarhi ni nkarhi ni ku tinyika nkarhi wo dyondza, u ta ya u n’wi rhandza swinene Yehovha naswona ripfumelo ra wena ri ta tiya.

18. Hi xihi xiboho lexi vana va faneleke va xi endla naswona vuyelo byi ta va byihi?

 ¹⁸ Rhangisani ku endla ku rhandza ka Yehovha. Namuntlha vanhu va vula leswaku loko u tirhisa vuswikoti bya wena leswaku u tiendlela ndhuma, u ta tsaka. Ku vula ntiyiso, vanhu lava tilavelaka ndhuma ni ku hlongorisa rifuwo va titlhava “hinkwako hi switlhavi swo tala.” (1 Tim. 6:9, 10) Kambe loko u yingisa Yehovha u tlhela u rhangisa ku endla ku rhandza kakwe, swi ta ku fambela kahle evuton’wini naswona “u ta tlhariha.”—Yox. 1:8.

19. I yini leswi vatswari va faneleke va swi tsundzuka?

¹⁹ Vatswari tikarhateleni ku pfuna vana va n’wina leswaku va tirhela Yehovha. Titshegeni hi yena kutani u ta mi pfuna leswaku mi endla swiboho leswinene. (Swiv. 3:5, 6) Tsundzukani, vana va n’wina va ta dyondza swo tala eka swiendlo swa n’wina ku tlula leswi mi swi vulaka. Hikwalaho, endlani swiboho leswi nga ta endla leswaku vana va n’wina va va ni vuxaka lebyinene na Yehovha.

20. Hi yihi mikateko leyi vana va nga ta yi kuma loko va endla xiboho xo tirhela Yehovha?

²⁰ Vana, vatswari va n’wina va ta mi pfuna leswaku mi endla swiboho leswinene evuton’wini. Kambe leswaku mi va ni vuxaka lebyinene ni Xikwembu swi titshege hi n’wina. Hikwalaho, tekelelani Yesu mi endla xiboho xo tirhela Tata wa n’wina wa le tilweni. Loko mi endla tano, mi ta tiphina hi vutomi sweswi. (1 Tim. 4:16) Nakambe enkarhini lowu taka, mi ta tiphina hi vutomi!