1. Hi xini xiboho xa lisima lexi hi faneleke hi xi yentxa?

LESWI vapsali va swi yentxaka swi khumba vana va vona. Loko vapsali va yentxa swilo swa ku kala swi nga li kahle, va nga ha kokela swikarhatu vana va vona ka nkama lowu taka. Kambe loko va yentxa swiboho swa kahle vana va vona va ta kula kahle va tlhela va tsaka awuton’wini. I ntiyiso swaku loko vana se va kulile va fanele va tilangelela leswi va lavaka ku swi yentxa. Kambe xiboho xa lisima lexi va nga xi yentxaka i ku tirhela Yehovha Papayi wa hina wa le matilweni. — Pis. 73:28.

2. Hi swini swiboho swa lisima leswi Yesu ni vapsali va yena va nga swi yentxa?

² Vapsali va Yesu a va lava ku pfuna vana va vona swaku va tirhela Yehovha naswona leswi a va langa ku swi yentxa a swi kombisa swaku ku tirhela Yehovha hi swona swi nga swa lisima awuton’wini la vona. (Luk. 2:40, 41, 52) Yesu na yena a yentxi swiboho leswi nga mu pfuna ku yentxa ku rhandza ka Xikwembu. (Mat. 4:1-10) Hi swona swi nga yentxa swaku a nkama a nga kula a va munhu lweyi a rhandzekaka, a tshembekaka a tlhela a nga chavi nchumu. Ku nga leswi vapsali hinkwavu va tsakaka loko vana va vona va swi yentxa.

3. Hi ta kambisisa swivutiso swini ka djondzo leyi?

³ Ka djondzo leyi, hi ta bula hi swivutiso leswi: Hi swini swiboho swa kahle leswi Yehovha a nga swi yentxa hi ku tirhisa Yesu? I mpsini leswi vapsali va nga swi djondzaka ka Yosefa na Mariya? Naswona majovhem ma nga djondza yini ka xikombiso xa Yesu?

4. Hi xini xiboho xa lisima lexi Yehovha a nga xi yentxa hi Yesu?

⁴ Yehovha a lange vapsali va kahle swaku va kulisa Yesu. (Mat. 1:18-23; Luk. 1:26-38) Phela marito ya Mariya lama nga tsaliwa ka Bibele ma kombisa swaku a a mu rhandza hintamu Yehovha naswona a a swi rhandza ku djondza Bibele. (Luk. 1:46-55) Naswona leswi Yosefa a a tinyimiselise xiswona ku yingisa Yehovha, a swi kombisa swaku a a mu rhandza funtshi a a lava ku mu tsakisa. — Mat. 1:24.

5-6. I mpsini leswi Yehovha a nga swi pfumelela swaku swi yentxekela Yesu?

⁵ Yehovha a nga langanga vanhu va ku ganya swaku va va vapsali va Yesu. Leswo swi tikomba hi leswi Mariya na Yosefa va nga swi nyikela nkama Yesu a nga psaliwa. (Luk. 2:24) Swi nga yentxeka Yosefa a a ni karpintariya a kusuhi ni kaya ka yena Nazareta. Naswona swi tikomba i nga ku a va nga ganyanga funtshi a va ni 7 wa vana. — Mat. 13:55, 56.

⁶ Yehovha a a mu vhikela Yesu kambe a a nga mu vhikeli ka swilo hinkwaswu. (Mat. 2:13-15) Hi xikombiso, Yesu a a ni maxaka lawa a ma nga kholwi swaku yena i N’wana wa Xikwembu. Pimisa hi ku karhateka loku Yesu a nga va na kona loko a vona swaku hambi hi maxaka ya yena a ma kholwi swaku hi yena Mesiya. (Marka 3:21; Yoh. 7:5) Xin’wana, swi nga yentxeka Yosefa a file na Yesu a ha li mutsongo naswona leswi a a li yena wa mukulu, swi nga yentxeka a a fanele a tirha hi matimba swaku a pfuna ndjangu hinkwawu ka ntirho lowu a wu yentxiwa hi Yosefa. (Marka 6:3) Ni nkama a nga kula a swi lava a tirha hintamu swaku a hlayisa mamana wa yena ni vamakwavu. Hi mhaka leyo, Yesu a a swi tiva swaku i yini ku karhala hi mhaka ku tirha.

7. a) Hi swini swivutiso leswi nga pfunaka vapsali swaku va kulisa vana va vona? b) Hi ku ya hi Swivuriso 2:1-6, i mpsini swi nga pfunaka vapsali swaku va djondzisa vana va vona?

⁷ Loko u chadile funtshi u navela ku va ni vana, tivutisi leswi: ‘Ni munhu wa ku tiveka hansi, ni rhandza Yehovha ni tlhela ni rhandza ku djondza Bibele? Leswi ni nga tshamisa xiswona Yehovha a nga ni langa swaku ni hlayisa a n’wana?’ (Pis. 127:3, 4) Loko se u li mupsali, tivutisi leswi: ‘Na va djondzisa vana va mina lisima la ku tirha hintamu?’ (Ekl. 3:12, 13) ‘Na yentxa hinkwaswu swaku ni vhikela vana va mina ka swilo swa ku biha leswi  nga kona ka misava ya Sathana?’ (Swi. 22:3) A swi nge koteki ku vhikela vana va wena ka swilo hinkwaswu leswi va nga ha kumanaka na swona. Kambe u nga va pfuna va tiva leswi va nga swi yentxaka loko va kumana ni swikarhatu awuton’wini, hi ku tama u va djondzisa hi lirhandzu hi ku tirhisa Rito la Xikwembu. (Lerha Swivuriso 2:1-6.) Hi xikombiso, loko xaka li tshika ku tirhela Yehovha, pfuna n’wana wa wena a vona lisima la ku tama a tshembeka ka Yehovha. (Pis. 31:23) Kumbe loko mi feliwa hi lweyi mi mu rhandzaka, pfuna vana va wena ku vona swaku Bibele li nga mi pfunisa ku yini ku tiyisela ka leswi nga yentxeka. — 2 Kor. 1:3, 4; 2 Tim. 3:16.

8. Hi ku ya hi Deteronoma 6:6, 7, i mpsini leswi Yosefa na Mariya a va swi yentxa?

⁸ Yosefa na Mariya va mu pfune ngopfu Yesu swaku a rhandziwa hi Yehovha. A va landzela hinkwaswu leswi Yehovha a nga va byela swona. (Lerha Deteronoma 6:6, 7.) Yosefa na Mariya a va mu rhandza hintamu Yehovha naswona nchumu xa lisima lexi a va lava ku xi yentxa i ku pfuna vana va vona swaku na vona va mu rhandza.

9. Hi swini swiboho swa lisima leswi Yosefa na Mariya va nga swi yentxa?

⁹ Yosefa na Mariya a va gandzela Yehovha nkama ni nkama ni vana va vona. A hi kanakani swaku vhiki ni vhiki a va ya mintlhaganwini ka sinagoga leli a li li aNazareta. Naswona lembe ni lembe a va ya ka Paxkwa aYerusalema. (Luk. 2:41; 4:16) Swi nga yentxeka a nkama na va ya aYerusalema a va djondzisa Yesu ni vamakwavu hi leswi nga humelela vanhu va Yehovha ka nkama lowu nga hundza. Naswona a va va komba tindhawu leti a ku vulavuliwa hi tona ka Bibele. A nkama Yosefa na Mariya va nga va ni vana va vanyingi, swi nga yentxeka se a swi va karhatela ku gandzela Yehovha nkama ni nkama kambe leswi va nga zama, Yehovha a va katekisile. Phela leswi a va rhangisa ku gandzela Yehovha, va pfune vana va vona swaku va mu rhandza.

10. I mpsini leswi vapsali va nga swi djondzaka ka Yosefa na Mariya?

¹⁰ I mpsini leswi vapsali va nga swi djondzaka ka Yosefa na Mariya? Xa lisima ngopfu lexi u faneleke u xi yentxa, i ku komba vana va wena swaku wa mu rhandza hintamu Yehovha, hi marito ni hi leswi u swi yentxaka. Tiyiseka swaku nchumu xa lisima lexi u nga yentxelaka  vana va wena i ku va pfuna swaku va rhandza Yehovha. Xa lisima hintamu, va pfuni swaku va tama va gandzela Yehovha hi ku djondza Bibele nkama ni nkama, va khongela va tlhela va ya mintlhanganwini. (1 Tim. 6:6) I ntiyiso swaku u fanele u xavela vana va wena leswi va swi lavaka. (1 Tim. 5:8) Kambe khumbuka leswaku leswi nga ta va pfuna ku nghena aparadesi a hi swilo leswi u nga ta va xavela swona. Kambe i wunghanu leli va nga na lona na Yehovha. * — Ezek. 7:19; 1 Tim. 4:8.

11. a) 1 Timotiya 6:17-19, yi va pfunisa ku yini vapsali swaku va yentxa swiboho swa swinene loko va kulisa vana va vona? b) I mpsini leswi mi nga swi yentxaka hi ndjangu, funtshi hi yini minkateko leyi mi nga ta yi kuma? (Vona kwadru leli nge: “ U Tinyimisele Ku Yentxa Yini?”)

¹¹ Swa tsakisa ku vona swaku vapsali va vanyingi lava nga Vakreste va langa ku yentxa swilo swa kahle swaku va pfuna vana va vona va tama va tirhela Yehovha. Va gandzela Yehovha na va ni vana va vona. Va ya mintlhanganwini ni makongresu naswona va famba xikan’we ansin’wini. Mindjangu yin’wana yi ya tirha ka materitoriyu lawa swi kalaka ku va ma chumayeliwa. Yin’wanyana yi pfuxela Betele kumbe yi ya pfunisa ka maprojetu ya nhlengeletanu la ku yaka. Phela mintirho leyi hinkwayu yi lava male. Funtshi swi nga yentxeka van’wana va kumana ni swikarhatu loko va yi yentxa. Kambe Yehovha wa va katekisa hinkwavu lava yentxaka minzamu leyi. (Lerha 1 Timotiya 6:17-19.) Vana lava kulisiwaka ka mindjangu ya ku fana ni leyi, va ni mahanyelo ya kahle funtshi a va tisoli hi ku famba ka nkama! * — Swi. 10:22.

12. I mpsini leswi Yesu a a fanele a swi yentxa nkama a nga kula?

¹² Minkama hinkwayu Yehovha a yentxa swiboho swa kahle. Naswona Yosefa na Mariya na vona a va yentxa swiboho swa kahle. Hambileswo, a nkama Yesu a nga kula a a fanele a tiyentxela swiboho swa yena. (Gal. 6:5) Ku fana ni vanhu hinkwavu, Yesu na yena a a ni chunseko wa ku tilangela leswi a swi lavaka. Loko a a swi lava a a ta langa ku kala a nga tirheli Yehovha kambe a nga yentxanga leswo, a lange ku tama a tirhela Yehovha a tlhela a va munghanu wa yena. (Yoh. 8:29) Leswi Yesu a nga swi yentxa swi nga ma pfunisa ku yini majovhem namuntlha?

13. Hi xini xiboho xa lisima lexi Yesu a nga xi yentxa a nkama lowu na a ha li mutsongo?

¹³ A nkama na a li mutsongo Yesu a a hlonipha vapsali va yena. A nga zanga a yala ku va yingisa kumbe a pimisa swaku wa tiva ku va tlula. Ku hambana ni leswo a tame “avayingisa.” (Luk. 2:51) Leswi Yesu a a li mukulu ka  vamakwavu va yena a ku ni mintirho leyi a a fanele a yi yentxa. Ha tiyiseka swaku a a tirha hi matimba ka ntirho lowu papayi wa yena a a wu yentxa swaku a kuma male ya ku pfuna ndjangu hinkwawu.

14. Hi swi tivisa ku yini swaku Yesu a a li djondza kahle a Rito la Xikwembu?

¹⁴ Swi nga yentxeka vapsali va Yesu va mu byelile hi singita leli nga yentxeka swaku a psaliwa. Va tlhela va mu byela leswi nga vuliwa hi tintsumi. (Luk. 2:8-19, 25-38) Kambe Yesu a nga tibyelanga swaku leswi va nga mu byela swi yenelile kambe a tame a kambisisa Rito la Xikwembu hi yexe. Hi swi tivisa ku yini swaku Yesu a a li djondza kahle Rito la Xikwembu hi yexe? Hi swi tiva hikusa a nkama na a ha li mutsongo, vadjondzisi va le Yerusalema a ‘vahlamala wutivi la yena ni tinhlamulu ta yena.’ (Luk. 2:46, 47) Naswona loko se a ni 12 wa malembe, a a swi tiva swaku Yehovha i Papayi wa yena. — Luk. 2:42, 43, 49.

15. Yesu a swi kombisise ku yini swaku a a lava ku yentxa ku rhandza ka Xikwembu?

¹⁵ Nkama lowu Yesu a nga tiva leswi Yehovha a a lava swaku a swi yentxa, a lange ku yentxa ku rhandza ka yena. (Yoh. 6:38) Yesu a a swi tiva swaku a a ta nyenyiwa hi vanhu va vanyingi naswona leswo a swi nga mu tsakisi. Kambe a lange ku yingisa Yehovha. A nkama a nga tsakamisiwa hi 29 E.C., nchumu xa lisima hintamu ka wutomi la yena a ku li ku yentxa ku rhandza ka Papayi wa yena. (Hev. 10:5-7) Hambi nkama lowu va nga mu dlaya ka mhandzi, Yesu a a tinyimiselile ku yentxa ku rhandza ka Papayi wa yena. — Yoh. 19:30.

16. I mpsini leswi vana va nga swi djondzaka ka Yesu?

¹⁶ Yingisa vapsali va wena. Ku fana na Yosefa na Mariya, vapsali va wena na vona va yentxa swihoxo. Hambileswo Yehovha a va nyike ntirho wa ku ku vhikela, va ku djondzisa va tlhela va ku komba ndlela. Loko u yingisa leswi va ku byelaka swona u tlhela u va hlonipha, swi ta ku fambela kahle naswona u ta ‘kateka’. — Efe. 6:1-4.

17. Hi ku ya hi Yoxuwa 24:15, hi xini xiboho lexi majovhem ma faneleke ma xi yentxa?

¹⁷ Langa lweyi u nga ta mu tirhela. U fanele u tiva swaku Yehovha hi mani, i mpsini leswi a swi lavaka naswona u nga swi yentxisa ku yini leswi a swi lavaka ka wutomi la wena. (Rhom. 12:2) Loko u yentxa leswo, u ta yentxa xiboho xa lisima ku tlula hinkwaswu ka wutomi la  wena, ku nga ku tirhela Yehovha. (Lerha Yoxuwa 24:15; Ekl. 12:1) Loko u tama u djondza Bibele siku ni siku, u ta ya u mu rhandza Yehovha naswona lipfumelo la wena li ta tiya.

18. Hi xini xiboho lexi majovhem ma faneleke ma xi yentxa naswona leswo swi ta ma pfuna hi yini?

¹⁸ Rhangisa leswi Yehovha a swi lavaka. Misava ya Sathana yi vula swaku loko u tirhisa wutivi la wena swaku u yentxa leswi u swi lavaka u ta tsaka. Kambe ku vula ntiyiso, lava lwekaka ku ganya va gama ‘timbilu ta vona tingheniwa hi swivilelo leswotala.’ (1 Tim. 6:9, 10) Kambe loko u yingisa Yehovha u tlhela u rhangisa leswi a swi lavaka swi ta ku fambela kahle ka wutomi la wena, funtshi “u ta yentxa swilo hi wutlharhi.” — Yoxu. 1:8.

19. I mpsini leswi vapsali va faneleke va swi khumbuka?

¹⁹ Vapsali, yentxani hinkwaswu leswi mi nga swi kotaka swaku mi pfuna vana va n’wina va tirhela Yehovha, va mu tshemba va tlhela va yentxa swiboho hi wutlhari. (Swi. 3:5, 6) Khumbukani swaku leswi nga ta pfuna vana va n’wina hintamu, a hi leswi mi swi vulaka kambe hi leswi mi swi yentxaka. Hi mhaka leyo, yentxani swiboho leswi nga ta pfuna vana va n’wina swaku va rhandziwa hi Yehovha.

20. Hi yini minkateko leyi majovhem ma nga yi kumaka loko ma langa ku tirhela Yehovha?

²⁰ Majovhem, vapsali va n’wina va nga mi pfuna swaku mi yentxa swiboho swa kahle ka wutomi la n’wina. Kambe mi fanele mi yentxa swiboho swa kahle swa ku tsakisa Yehovha. Hi mhaka leyo, tekelelani Yesu hi ku tirhela Yehovha. Loko mi yentxa leswo, mi ta va ni wutomi la ku tsakisa swoswi. (1 Tim. 4:16) Naswona ka nkama lowu taka mi ta tsaka hi ku kuma minkateko ya yinyingi ya Yehovha.