1. Кыӵе тужгес но умой ужпум адями кутыны быгатэ?

 ӴЕМ дыръя анай-атайёслэн кутэм ужпумъёссы нылпиоссылы умойзэ яке уродзэ вайыны быгато. Куке анай-атайёс шонертэм ужпумъёс куто, нылпиоссы шуг-секытъёсын пумиськыны быгато. Нош шонер ужпумъёс куто ке, нылпиоссы шудо улозы. Со сяна, нылпиослы асьсэлы но визьмо ужпумъёс кутоно. Нош тужгес но умой ужпум, кудзэ адями кутыны быгатэ,— со инмысь Атаймылы, Иеговалы, ужан-тыршон (Пс. 72:28).

2. Кыӵе ужпумъёс кутӥз Иисус но солэн анай-атаез?

² Иосиф но Мария вань кужымзэс понӥзы, Иисуслы но мукет нылпиоссылы Иеговалы ужаны-тыршыны юрттон понна. Та атайлэн но анайлэн кутэм ужпумъёссы возьматӥзы, Иеговалы ужан-тыршон улоназы нырысетӥ интыын вал шуыса (Лука 2:40, 41, 52). Иисус но визьмо ужпумъёс кутӥз. Талы луыса со быдэстӥз ужез, кудзэ солы Иегова сётӥз (Матф. 4:1—10). Иисус ӟеч, оскымон но кышкасьтэм адями луыса будӥз. Иеговаез яратӥсь вань анай-атайёс шумпотысалзы, соослэн сыӵе пизы луысал ке, но данъяськысалзы соин.

3. Кыӵе юанъёсты ми эскеромы та статьяын?

³ Та статьяез эскерыкумы, ми малпаськомы таӵе юанъёс вылын: кыӵе ужпумъёс Иегова кутӥз Иисус пумысен? Малы дышетскыны быгато христиан луись анай-атайёс Иосифлэсь но Мариялэсь? Кыӵе адӟем карон Иисус возьматӥз егит христианъёслы?

4. Кыӵе кулэ луись ужпум кутӥз Иегова, кудӥз солэн Пиеныз герӟаськемын вал?

⁴ Иегова Иисуслы туж умой атай но анай бырйиз (Матф. 1:18—23; Лука 1:26—38). Мариялэн сюлмысьтыз верам кылъёсыз, кудъёсыз Библиын гожтэмын, возьмато, со Иеговаез но солэсь Кылзэ юн яратӥз шуыса (Лука 1:46—55). Нош Иосифлэн Иеговалэн курон-косонъёсызлэсь кылзӥськемез возьматӥз, со Инмарез яратӥз но солы ярамон луыны тыршиз шуыса (Матф. 1:24).

5, 6. Кыӵе шуг-секытъёслэсь Иегова аслэсьтыз Пизэ ӧз утьы?

⁵ Тунсыко, Иегова Иисуслы узыр анай-атай ӧз бырйы. Лыдэ басьтоно ке, кыӵе курбон вайизы Иосиф но Мария Иисуслэн вордӥськемез бере, валаны луэ, соос куанересь вал шуыса (Лука 2:24). Иосифлэн Назаретын, коркаез вӧзын, тӥрен ужан понна пичи гинэ интыез вал, дыр. Та семья туж огшоры улӥз, вылды, малы ке шуоно соос сизьым яке солэсь но тросгес нылпи будэтӥзы (Матф. 13:55, 56).

⁶ Иегова аслэсьтыз Пизэ куд-ог кышкытлыкъёслэсь утиз, озьы ке но вань шуг-секытъёслэсь ӧз утьы (Матф. 2:13—15). Кылсярысь, Иисуслэн куд-ог ӵыжы-выжыосыз нырысь ӧз оске, со Мессия луэ шуыса. Соин сэрен солэн кӧтыз ӝож луэ вал, дыр (Марк 3:21; Иоанн 7:5). Со сяна, Иисуслы туж вӧсь луиз, вылды, куке кулӥз музъем вылысь атаез, Иосиф. Нош Иисус семьяын бадӟымез пи вал бере, со Иосифлэсь ужзэ азьланьтоно луиз, дыр (Марк 6:3). Будэмъяз со семьяез сярысь сюлмаськыны кутскиз. Иисус трос ужано луиз, вылды, матысь адямиосызлэн ваньмыз кулэез мед луоз шуыса. Соин ик со умой тодӥз, макем зол жадёно, лумбыт нунал секыт ужам бере.

7. а) Кыӵе юанъёс вылын малпаськон юрттоз анай-атайёслы нылпиоссэс будэтыны? б) Мар карыны анай-атайёс нылпиоссэс дышетыны кулэ, Мадёнъёсты 2:1—6 лыдэ басьтыса?

⁷ Тӥ кузпалъяськемын ке но малпаськоды ке, нылпи вордоно-а, ӧвӧл-а шуыса, юалэ асьтэлэсь: «Зӥбыт-востэмесь-а ми адямиос? Яратӥськомы-а ми Иеговаез но солэсь Кылзэ? Оскоз-а Иегова милемлы сюлмаськыны нылпи сярысь, солэн дуно кузьымез сярысь?» (Пс. 126:3, 4). Нош семьяын нылпиос вань ке ини, малпаськыны луоз таӵе юанъёс вылын: «Дышетӥсько-а мон соосты  ужез яратыны? Лэсьтӥсько-а мон ваньзэ, мае быгатӥсько, нылпиосме утён понна кышкытлыкъёслэсь, кудъёсыныз соос Шайтанлэн дуннеяз пумиськыны быгато?» (Екк. 3:12, 13; Мад. 22:3). Тӥ уд быгатэ нылпиостэс утьыны вань шуг-секытъёслэсь, кудъёсыныз соос улоназы пумиськозы, вылды. Ваньмызлэсь утьыны уг луы. Озьы ке но тӥ быгатӥськоды яратыса дышетыны соосты, шуг-секытъёсын пумиськыкузы, Инмарлэн Кылысьтыз визь-кенеш утчаны. (Лыдӟе Мадёнъёсты 2:1—6.) Кылсярысь, ӵыжы-выжыды Иеговалы ужамысь-тыршемысь дугдӥз ке, Библия вылэ пыкиськыса, нылпидылы валэктэ, малы кулэ азьланяз но Иеговалы оскымон кыльыны (Пс. 30:24). Яке матысь адямиды кулӥз ке, нылпидылы возьматэ, кызьы Инмарлэн Кылыз куректон дыръя буйгатыны быгатэ (2 Кор. 1:3, 4; 2 Тим. 3:16).

8. Мар кароно вал Иосифлы но Мариялы, Кыкетӥ Законэз 6:6, 7 лыдэ басьтыса?

⁸ Иисус Инмарлы ярамон адями луыса будӥз, малы ке шуоно Иосиф но Мария будэтӥзы сое Иеговалэн курон-косонъёсызъя, кудъёссэ со анай-атайёслы пуктэ. (Лыдӟе Кыкетӥ Законэз 6:6, 7.) Соос асьсэос Иеговаез юн яратӥзы но, соослэн туж потэ вал, нылпиоссы но инмысь Атайзэс мед яратозы шуыса.

9. Мар каризы Иосиф но Мария, семьязы Иеговаен матысь кусыпъёс возьыны мед быгатоз шуыса?

⁹ Иосиф но Мария нылпиосынызы ӵош ялан пыриськизы Иеговалы йыбыртъянэн герӟаськем ужъёсы. Соос котькуд арняе Назаретысь сӥнагогае ветлӥзы но арлы быдэ Пасхаез пусйыны Иерусалиме вуылӥзы (Лука 2:41; 4:16). Иерусалиме мыныкузы, соос ортчылӥзы, вылды, интыостӥ, кудъёсыз сярысь Священной Гожтэмъёсын вераське. Озьы ик Иисуслы но мукет нылпиоссылы веразы, луоз, со сярысь, маин азьвыл пумиськылӥз Инмарлэн калыкез. Семьязы будэмъя Иосифлы но Мариялы капчи ӧй вал, дыр, ялан пыриськыны Иеговалы йыбыртъянэн герӟаськем ужъёсы. Но соос юнме ӧз тырше! Инмарлы йыбыртъян соослэн улоназы валтӥсь инты басьтӥз, соин ик семьязы Иеговаен матысь кусыпъёс возьыны быгатӥз.

10. Малы дышетскыны быгато Иосифлэсь но Мариялэсь анай-атайёс, кудъёсыз Иеговаез ярато?

 ¹⁰ Малы дышетскыны быгато Иосифлэсь но Мариялэсь анай-атайёс, кудъёсыз Иеговаез ярато? Нырысь ик, кылъёсыныды но ужъёсыныды нылпиостылы возьматэ, макем юн тӥ яратӥськоды Иеговаез. Тужгес но бадӟым кузьым, кудзэ тӥ нылпиостылы лэсьтыны быгатӥськоды,— юрттыны соослы Иеговаез яратыны. Озьы тӥ нылпиостэс кулэ луисезлы дышетоды: ялан Библиез эскерыны, вӧсяськыны, кенешлэн пумиськонъёсаз ветлыны но ужан-тыршонэ пыриськыны (1 Тим. 6:6). Зэм, тӥледлы сюлмаськоно, нылпиостылэн улон понна ваньмыз кулэез мед луоз шуыса (1 Тим. 5:8). Но тодады возе: та лек дуннеез быдтыку, улэп кыльыны но Инмарлэн выль дуннеяз пырыны коньдон но ваньбур нылпиостылы уз юрттэ, нош Иеговаен матысь кусыпъёс гинэ юрттозы (Иез. 7:19; 1 Тим. 4:8).

11. а) Кызьы 1 Тимофейлы 6:17—19 кылъёс анай-атайёслы визьмо ужпумъёс кутыны юртто? б) Кыӵе ужпумъёс тӥляд семьяды пуктыны быгатэ но кызьы тӥ бакель каремын луоды? (Учке « Кыӵе ужпумъёс пуктыны быгато семьяос?» рамкаез.)

¹¹ Туж шумпотоно адӟыны христиан кенешысь сокем трос анай-атайёсты, кудъёсыз визьмо ужпумъёс куто но нылпиоссылы юртто Иеговаен матысь кусыпъёс будэтыны! Та семьяос котьку ӵош Иеговалы ужало-тыршо. Соос кенешлэн пумиськонъёсаз но конгрессъёсы ветло, тодытон уже пырисько, нош куд-огъёсыз Эксэйлык сярысь ӟеч иворез верало отын, кытын туж шер тодыто. Со сяна, соос куддыръя Вефиле ветло но Инмарлы йыбыртъянэн герӟаськем пуктӥськон ужъёсы пырисько. Зэм но, солы коньдон кулэ, озьы ик со шуг-секытъёсын герӟаськемын луыны быгатэ. Нош Иегова соосты жалятэк бакель каре. (Лыдӟе 1 Тимофейлы 6:17—19.) Сыӵе семьяосысь нылпиос будэмзы бере но Иеговалы йыбыртъянэн герӟаськем ужъёсы пырисько но шумпото, соосты ӵапак озьы будэтӥзы шуыса! (Мад. 10:22) b.

12. Мар кароно вал Иисуслы будэмез бере?

¹² Иисуслэн инмысь Атаез котьку шонер ужпумъёс кутэ. Озьы ик Иосиф но Мария визьмо ужпумъёс кутӥзы. Иисуслы со пайда вайиз. Нош будэмез бере солы аслыз ужпумъёс кутоно вал (Гал. 6:5). Милемлы сямен, Иегова Иисуслы но бырйыны эрик сётӥз. Иисус ас мылпотэмезъя улыны быгатысал. Но со озьы ӧз лэсьты. Со ужпум кутӥз Иеговаен матысь кусыпъёс возьыны (Иоанн 8:29). Кызьы егит христианъёс Иисуслэсь адӟем карыны быгато?

13. Кыӵе ужпумъёс кутӥз Иисус егит дыръяз?

 ¹³ Иисус анай-атаезлэсь кылзӥськиз. Соослэсь дышетэмзэс со ноку ӧз палэнты но ӧз малпа, анай-атаезлэсь тросгес тодэ шуыса. Со интые, Иисус «соослэсь кылзӥськыса улӥз» (Лука 2:51). Иисус семьяысьтызы бадӟымез пи вал. Соин ик со тыршыса быдэсъяз ужъёсты, кудъёссэ бадӟым пилы быдэсъяно вал. Иисус Иосифлэсь тӥрен ужаны дышетскиз, луоз, семьязэс сюдон-вордон понна.

14. Кытысь ми тодӥськомы, Иисус Гожтэмъёсты сак эскериз шуыса?

¹⁴ Иосиф но Мария Иисуслы веразы, дыр, со паймымон амалэн вордӥськиз шуыса, но сое, мар веразы со сярысь Инмарлэн ивортӥсьёсыз (Лука 2:8—19, 25—38). Озьы ик Иисус ачиз но Гожтэмъёсты сак эскериз. Кытысь ми сое тодӥськомы? Куке солы 12 арес вал, Иерусалимысь дышетӥсьёс солэн «визьмызлы но, ответ сётэмъёсызлы но паймизы» (Лука 2:46, 47). Сыӵе пичи дыръяз ик Иисус, Гожтэмъёсты эскерыса, валаз ини, Иегова солэн Атаез луэ шуыса (Лука 2:42, 43, 49).

15. Кызьы Иисус возьматӥз, Иеговалэсь эриксэ быдэсъяны котьку дась шуыса?

¹⁵ Куке Иисус тодӥз, кыӵе уж сётӥз солы Иегова, со дась луыса ужпум кутӥз сое быдэстыны (Иоанн 6:38). Со тодӥз, тросэз сое адӟемпотостэм карозы шуыса. Соин сэрен солы капчи ӧй вал, дыр. Озьы ке но Иисус Атаезлэсь котьку кылзӥськиз. Асьме вакытысь 29-тӥ арын, пылатӥськемез бере, Иисус вань саклыксэ висъяз Инмарлэсь эриксэ быдэсъянлы (Евр. 10:5—7). Юбо борды кортӵогам Иисус кулон азяз но дась вал Атаезлэсь эриксэ быдэсъяны (Иоанн 19:30).

16. Малы дышетскыны быгато Иисуслэсь егит христианъёс?

¹⁶ Кылзӥське анай-атайдылэсь. Иосиф но Мария сямен, тӥляд атайды но, анайды но тырбыдэстэмесь. Озьы ке но Иегова соослы уж сётӥз тӥледыз утьыны но дышетыны. Тӥ, Иисус кадь ик, соослэсь визь-кенешъёссэс дунъяды ке но соосты гажады ке, соку шудо луоды (Еф. 6:1—4).

17. Кыӵе ужпум кутоно егитъёслы, Иисус Навинлэсь 24:15 лыдэ басьтыса?

¹⁷ Ужпум кутэ, кинлы ужалоды-тыршоды. Тӥледлы умой валано, кин со сыӵе Иегова, мар со азьланяз кароз но кызьы солэн эрикез тӥледын герӟаськемын (Рим. 12:2). Соку тӥ быгатоды улонады самой кулэ луись  ужпум кутыны — Иеговалы ужаны-тыршыны ужпум. (Лыдӟе Иисус Навинлэсь 24:15; Екк. 12:1.) Библиез ялан лыдӟыса но эскерыса, Иеговаез яратонды но осконды юнгес но юнгес луоз.

18. Кыӵе ужпум кутоно егитъёслы но кыӵе емышъёс со ваёз?

¹⁸ Иеговалы ужан-тыршон улонады валтӥсь инты мед басьтоз. Шайтанлэн дуннеез оскытэ, тӥ шудо луоды шуыса соку, куке быгатонлыкъёстэс асьтэлы пайда утчан понна кутоды. Нош зэмзэ вераса, «узырмыны мылкыд карисьёс» трос шуг-секытъёсын пумиськоно луо (1 Тим. 6:9, 10). Куке тӥ Иеговалэсь кылзӥськоды но солы ужалоды-тыршоды, тӥ визьмо ужпумъёс кутоды но шудо луоды (Иис. Н. 1:8).

19. Мае тодазы возёно анай-атайёслы?

¹⁹ Анай-атайёс, лэсьтэ ваньзэ, мае быгатӥськоды, нылпиостылы Иеговалэн ужась-тыршисьёсыз луыны юрттон понна. Инмарлы оскиське — соку тӥ визьмо ужпумъёс кутыны быгатоды (Мад. 3:5, 6). Тодады возе: нылпиосты, кылъёстылы сярысь, ужъёстылы тросгес саклыксэс висъяло. Соин ик кутэ сыӵе ужпумъёс, кудъёсыз нылпиостылы юрттозы Иеговалы ярамон луыны.

20. Кызьы бакель каремын луозы егитъёс, Иеговалы ужаны-тыршыны ужпум кутӥзы ке?

²⁰ Егитъёс, анай-атайёсты тӥледлы юрттыны быгато улонады визьмо ужпумъёс кутыны. Но тӥ асьтэос гинэ быгатӥськоды кутыны сыӵе ужпум, кудӥз Инмарез шумпоттоз. Соин ик Иисуслэсь адӟем каре но ужпум кутэ яратӥсь инмысь Атайдылы ужаны-тыршыны. Соку тӥ шудо луоды но трос бакель каронъёс басьтоды али но, азьланяз но! (1 Тим. 4:16).