1. ¿Xii nga decisión ni jma galán naquiiñeʼ guicaanu?

NUU biaje pur ca decisión ni guicaa ca padre zanda gacanecaʼ o guninacaʼ ca xiiñicaʼ. Pa cadi jneza ca decisión ca la? zapa ca xiiñicabe guendanagana. Peru pa jneza ca decisión ni guicaacabe la? zabani ca xiiñicabe nayecheʼ. Laaca naquiiñeʼ guicaa ca xiiñicabe decisión jneza. Ne decisión jma galán naquiiñeʼ guicaanu nga gúninu ni ná Jehová, Bixhózenu ni nuu guibáʼ (Sal. 73:28).

2. Casi ná Biblia, ¿xi decisión galán gucuaa José, María ne Jesús?

² Racalaʼdxiʼ bixhoze ne jñaa Jesús gacanecaʼ ca xiiñicaʼ gúnicaʼ ni ná Jehová, ne pur ca decisión ni gucuaacabe bisihuínnicabe laani nga ni jma risaca para laacabe (Luc. 2:40, 41, 52). Laaca gucuaa Jesús decisión ni gucané laa guni cumplir né dxiiñaʼ ni bidii Jehová laa (Mat. 4:1-10). Guca Jesús ti hombre nachaʼhui, nadxibalú ne qué nixeleʼ de Dios, gúcabe casi racalaʼdxiʼ ca xpinni Cristu gaca ca xiiñicaʼ.

3. ¿Xi chonna pregunta zacábinu lu artículo riʼ?

³ Lu artículo riʼ zacábinu ca pregunta riʼ: ¿Xi biʼniʼ Jehová pur Jesús? ¿Xi zanda guiziidiʼ ca ni napa xiiñiʼ de ca decisión galán ni gucuaa José ne María? ¿Ne xi zanda guiziidiʼ ca joven xpinni Cristu de ca decisión ni gucuaa Jesús?

4. ¿Xi biʼniʼ Jehová pur Jesús?

⁴ Gulí Jehová José ne María para gácacaʼ bixhozeʼ ne jñaa Jesús purtiʼ nacháʼhuicaʼ (Mat. 1:18-23; Luc. 1: 26-38). Ca diidxaʼ ni guníʼ María ni zeeda lu Biblia rusihuínnicani pabiáʼ nadxiibe Jehová ne Stiidxaʼ (Luc. 1:46-55). Laaca bisihuinni José nadxii Jehová ne racalaʼdxiʼ guni ni nabe ora bizuubaʼ stiidxabe (Mat. 1:24).

5, 6. ¿Gunáʼ nga caadxi guendanagana ra bidii Jehová lugar tidiʼ Xiiñiʼ?

⁵ Casi ridúʼyanu, qué nibí Jehová binni ricu para gaca bixhoze ne jñaa Jesús. Sacrificiu ni biʼniʼ José ne María despué de gule Jesús rusihuínnini pobre laacaʼ (Luc. 2:24). Zándaca gupa José ti taller huiiniʼ ra runi dxiiñaʼ de carpinteru ra lidxi ndaaniʼ guidxi Nazaret. Zándaca huaxiéʼ cosa gúpacabe para guibaninécabe purtiʼ gúpacabe biaʼ gadxé xiiñicabe (Mat. 13:55, 56).

⁶ Gupa Jehová xiiñiʼ de caadxi peligru, peru bidii lugar tiidibe lu caadxi guendanagana (Mat. 2:13-15). Tobi de laani nga qué ñuni cré caadxi de ca familia stiʼ Jesús laa. Guiníʼ íquenu pabiáʼ triste biʼniʼ sentirbe purtiʼ qué ñuni cré ga caadxi de ca familia stibe pa laabe nga Mesías (Mar. 3:21; Juan 7:5). Laaca zándaca gucaná Jesús dxi gutiʼ José. Ne cumu laabe nga ni huaniisi lade ca xiiñiʼ José ne María la? biaananebe dxiiñaʼ stiʼ bixhózebe (Mar. 6:3). Ra gudiʼdiʼ iza, biziidibe gápabe familia stibe. Zándaca bíʼnibe stale dxiiñaʼ para gudiibe ni gó familia stibe. Ne gúnnabe pabiáʼ ridxaga binni despué de ti dxi dxiiñaʼ.

7. a) ¿Xi pregunta zanda gacané ca guendaxheelaʼ ni napa xiiñiʼ? b) Casi ná Proverbios 2:1-6, ¿xi naquiiñeʼ gusiidiʼ ca padre ca xiiñicaʼ?

⁷ Pa lii ne xheelaluʼ racaláʼdxitu gápatu xiiñitu, laguiníʼ ique ca pregunta riʼ: «¿Ñee humilde laadu ne nadxiidu Jehová né Stiidxaʼ la? ¿Ñee nibí Jehová laadu para nusiniisidu ti baʼduhuiiniʼ la?» (Sal. 127:3, 4). Peru pa maʼ nápatu xiiñitu, laguiníʼ ique ca pregunta riʼ: «¿Ñee cusíʼdidu ca xiiñidu pabiáʼ risaca gúnicaʼ dxiiñaʼ nadipaʼ la?» (Ecl. 3:12, 13). «¿Ñee rúnidu stipa para cadi gacanácabe ne guxheleʼ guidxilayú stiʼ Binidxabaʼ laacabe la?» (Prov. 22:3). Laaca naquiiñeʼ gánnatu qué zanda gápatu laacabe para cadi guizaacacabe gastiʼ. Peru zanda gacanetu laacabe né stale cariñu para gudxiilúcabe  intiica guendanagana. ¿Ximodo yaʼ? Ora gusiiditu laacabe chinándacabe ni rusiidiʼ Biblia (biindaʼ Proverbios 2:1-6). Guzéʼtenu ti ejemplu, pa tobi de ca familia stitu guixeleʼ de Jehová, zanda iquiiñetu Stiidxaʼ Dios para guluiʼtu ca xiiñitu pabiáʼ risaca cadi guixélenu de Jehová (Sal. 31:23). Ne pa gatiʼ ti familia stitu, zanda gúʼndanetu laacabe caadxi textu ni zeeda lu Biblia para guni huantarbe yuubaʼ ca ne gatadxí ladxidóʼcabe (2 Cor. 1:3, 4; 2 Tim. 3:16).

8. ¿Xi biʼniʼ José ne María para yenándacaʼ mandatu ni zeeda lu Deuteronomio 6:6, 7?

⁸ Gunda gucané José ne María Jesús para chuulaʼdxiʼ Dios ni runi purtiʼ yenándacabe ca conseju ni rudii Jehová ca padre (biindaʼ Deuteronomio 6:6, 7). Guirópacabe gunnaxhiicabe Jehová ne ni jma risaca para laacabe nga gacanécabe ca xiiñicabe gannaxhiicaʼ Jehová.

9. ¿Xi gudixhe ique José ne María gúnicaʼ?

⁹ Gudixhe ique José ne María guni adorarcaʼ Jehová né familia sticaʼ. Guiráʼ semana riécabe ra sinagoga ni nuu ndaaniʼ guidxi Nazaret ne guiráʼ iza riécabe Jerusalén para guni celebrárcabe Pascua (Luc. 2:41; 4:16). Zándaca lu ca viaje que rusiidicabe Jesús, ca biʼchiʼ ne ca bizaʼnaʼ guiráʼ ni gudiʼdiʼ xquidxi Jehová. Ne zándaca neza zécabe ruluíʼcabe laacaʼ ca lugar ni riete lu Stiidxaʼ Dios. Zándaca ra gúpacabe xcaadxi xiiñicabe, jma nagana guca para laacabe guni adorárcabe Dios né familia stícabe. Peru cumu gudixhe íquecabe guni adorar familia stícabe Jehová primé lu xquendanabani la? guyuucabe jma gaxha de Jehová.

10. ¿Xi zanda guiziidiʼ ca hermanu ni napa xiiñiʼ de José ne María?

¹⁰ ¿Xi zanda guiziidiʼ ca hermanu ni napa xiiñiʼ de José ne María? Lu guiráʼ cosa ni gúnitu, laguluíʼ ca xiiñitu nadxiitu Jehová de guidubi ladxidoʼto pur ni riniʼtu ne ni rúnitu. Ne regalu jma galán zanda gudiitu laacabe nga gacanetu laacabe gannaxhiicabe Jehová. Ti cosa risaca ni zanda gusiiditu laacabe nga gápacabe ti programa ra gúʼndacabe  Biblia, guni orárcabe, chécabe reunión ne guni predicárcabe (1 Tim. 6:6). Laaca naquiiñeʼ gudiitu laacabe ca cosa material ni caquiiñecabe (1 Tim. 5:8). Peru cadi guiaandaʼ laatu, cadi ca cosa material nga ni jma zacané ca xiiñitu para guilacaʼ ne chuʼcaʼ ndaaniʼ guidxilayú cubi stiʼ Dios, sínuque gaca xhamígucabe Jehová (Ezeq. 7:19; 1 Tim. 4:8). *

11. a) ¿Ximodo zanda gacané 1 Timoteo 6:17-19 ca padre guicaacaʼ decisión galán? b) ¿Xi meta zanda quixhe ique ca familia ca, ne xi ndaayaʼ zacaacaʼ? (Biiyaʼ cuadru ni láʼ « ¿Xi meta zanda quixhe íquetu ugaandatu?»).

¹¹ Guizáʼ riéchenu ora ridúʼyanu pabiáʼ naroʼbaʼ stipa runi ca padre ora ricaacaʼ decisión ni gacané ca xiiñicaʼ chuʼcaʼ jma gaxha de Jehová. Runi adorárcabe Jehová juntu né familia stícabe, rúnicabe stipa cadi guiaadxacabe reunión, asamblea ne predicación. Nuu familia rigacanecaʼ ca lugar ra huaxiéʼ raca predicar. Ne xcaadxi rigunibiaʼcaʼ Betel o rúnicaʼ dxiiñaʼ ra cabí yoo para gaca adorar Jehová. Para gúnicabe ca ni bizéʼtenu riʼ, naquiiñeʼ gúnicabe gastu ne zándaca tídicabe ra nagana. Peru guizáʼ riguu Jehová ndaayaʼ laacabe pur stipa ni rúnicabe (biindaʼ 1 Timoteo 6:17-19). Ca hermanu ni biniisi ndaaniʼ ti familia ni runi ca ni bizéʼtenu riʼ, qué rusiaandacaʼ ca costumbre galán ni biziidicaʼ dxi nahuiinicaʼ ne rudiicaʼ xquixe peʼ bixhózecaʼ ne jñaacaʼ pur ni bisiidicabe laacaʼ (Prov. 10:22). *

12. ¿Xi biʼniʼ Jesús ra ziniisi?

¹² Bixhoze Jesús ni nuu guibáʼ siempre ricaa decisión galán, ne bixhózebe ne jñaabe ni gúpabe lu Guidxilayú riʼ laaca zaqueca bíʼnicaʼ. Peru ra ziniisi Jesús, gucuaa ca decisión stiʼ (Gál. 6:5). ¿Xiñee yaʼ? Purtiʼ cásica laanu, gúcabe libre para guicaabe ca decisión stibe. Ñanda ñúnibe ni ñápabe gana, peru gulibe gaca xhamígube Jehová (Juan 8:29). Ejemplu stibe zanda gacané ni ca joven tiempu riʼ.

13. ¿Xi decisión risaca gucuaa Jesús neca nahuiiniruʼ?

¹³ Neca nahuiiniruʼ Jesús, gulibe guzuubabe stiidxaʼ bixhózebe ne jñaabe. Qué ñuu dxi nucaalube José ne María ne qué niníʼ íquebe jma listu laabe que laacaʼ. Lugar de nga la? «bizuubarube stiidxacaʼ» (Luc. 2:51). Nanna dxíchinu  gúcabe responsable purtiʼ laabe nga xiiñicabe ni jma huaniisi, ne bíʼnibe stipa guiziidibe dxiiñaʼ ni gupa José para gacanebe familia stibe gápacaʼ ni caquiiñecaʼ.

14. ¿Ximodo nánnanu guizáʼ biʼniʼ estudiar Jesús Stiidxaʼ Dios?

¹⁴ Zándaca byuiʼné José ne María laabe biʼniʼ Dios ti milagru para gúlebe ne ni guníʼ ca ángel de laabe (Luc. 2:8-19, 25-38). Neca galán ni gúdxicabe laabe, bíʼnibe xcaadxi cosa, tobi de laani nga biʼniʼ estudiarbe Biblia stúbibe. ¿Ximodo nánnanu guizáʼ biʼniʼ estudiarbe Stiidxaʼ Dios? Purtiʼ neca nahuiinirube, nabé bidxagayaa ca maestru de Jerusalén «pabiáʼ riénebe ne modo ricábibe» laacaʼ (Luc. 2:46, 47). Neca 12 iza napa Jesús, guyuu seguru Jehová nga Bixhoze (Luc. 2:42, 43, 49).

15. ¿Ximodo bisihuinni Jesús gudixhe ique guni ni ná Jehová?

¹⁵ Ora biene Jesús xi racalaʼdxiʼ Jehová gúnibe la? bíʼnibe ni (Juan 6:38). Gúnnabe zaca nanalaʼdxiʼ binni laabe ne zuninacaʼ laabe. Peru gudixhe íquebe gúnibe ni ná Jehová. Dxi guyuunísabe lu iza 29, bicaa íquebe gúnibe ni ná Jehová lu xquendanabánibe (Heb. 10:5-7). Ne neca cayátibe lu yaga que gudixhe íquebe cadi gucheenebe Jehová (Juan 19:30).

16. ¿Xi zanda guiziidiʼ xiiñiʼ binni de ejemplu stiʼ Jesús?

¹⁶ Bizuubaʼ stiidxaʼ bixhózeluʼ ne jñaaluʼ. Cásica José ne María, laaca imperfectu bixhózeluʼ ne jñaaluʼ. Peru maʼ gulí Jehová laacabe para gápacabe, gusiidicabe ne gacanécabe lii. Naquiiñeʼ gucaadiágaluʼ ca conseju gudiicabe lii ne guni respetarluʼ autoridad stícabe «ti guibániluʼ galán» (Efes. 6:1-4).

17. Casi ná Josué 24:15, ¿xi decisión naquiiñeʼ guicaa ca joven?

¹⁷ Gulí tu gúniluʼ ni ná. Naquiiñeʼ gánnaluʼ tuu nga Jehová, xi racaláʼdxibe gúniluʼ ne ximodo zanda gúniluʼ ni (Rom. 12:2). Zacatiʼ nga zanda guicaaluʼ decisión ni jma risaca lu xquendanabániluʼ: gúniluʼ ni ná Jehová (biindaʼ Josué 24:15; Ecl. 12:1). Pa gúʼndaluʼ ne guni estudiarluʼ Biblia guiráʼ dxi, jma zannaxhiiluʼ Jehová ne zaca fe stiluʼ jma naguidxi.

18. ¿Xi decisión naquiiñeʼ guicaa ca joven, ne xi zabeenducaʼ?

 ¹⁸ Gudixhe ique gúniluʼ ni ná Jehová lu xquendanabániluʼ. Guidxilayú stiʼ Binidxabaʼ ná zabániluʼ nayecheʼ pa iquiiñeluʼ ca habilidad stiluʼ para gúniluʼ ni racaláʼdxiluʼ. Peru ni dxandíʼ la? ca binni ni riguixhe ique gapa stale cosa material nabé racanacaʼ (1 Tim. 6:9, 10). Peru pa gucaadiágaluʼ Jehová ne quixhe íqueluʼ gúniluʼ ni ná primé lu xquendanabániluʼ, zabániluʼ galán ne guiráʼ ni gúniluʼ, zúniluʼ ni «né guendabiaaniʼ» (Jos. 1:8).

19. ¿Xi cadi naquiiñeʼ guiaandaʼ ca padre?

¹⁹ Padre caʼ, laguni biaʼ gándatiʼ para gacanetu ca xiiñitu gúnicaʼ ni ná Jehová. Lagapa confianza Jehová ne zacanebe laatu guicaatu decisión jneza (Prov. 3:5, 6). Cadi guiaandaʼ laatu, jma zacané ca ni gúnitu ca xiiñitu que ni gábitu laacaʼ. Nga runi, laguicaa decisión ni gacané ca xiiñitu chuulaʼdxiʼ Jehová ni rúnicaʼ.

20. ¿Xi ndaayaʼ zacaa ca joven pa quixhe íquecaʼ gúnicaʼ ni ná Jehová?

²⁰ Joven caʼ, zanda gacané bixhózetu ne jñaatu laatu guicaatu decisión jneza. Peru laatu nga naquiiñeʼ gúnitu stipa chuulaʼdxiʼ Dios ni rúnitu. Nga runi, lachinanda ejemplu stiʼ Jesús ne laquixhe ique gúnitu ni ná Jehová, Bixhózetu ni nuu guibáʼ. Pa gúnitu ni la? zabánitu nayecheʼ ne galán yanna (1 Tim. 4:16). Ne lu ca dxi ni zeeda ca zabánitu jma galán.