EMHUOGHAẠPH ITUUGHẠ PHỌ 42
Idị Nạ Katue Aaneghị Itughemhị ABaibul Dị Ketorori Engọ Oḍiiny Amuụm—Ekpịgh Phọ Iyạl
“Maạr agona loor phọ anạ r’ipẹ nạ ratughemị bọ.” —1 TIM. 4:16.
AḌUỌR PHỌ 77 Light in a Darkened World
OGHAẠPH OOKARAGH *
1. Ika kụ idị yira olhegheri bọ mọ arukumuan oḍighi awe bumatuạn phọ aḍighi oḍighi dị rapẹl ghan sighuḍum?
ARUKUMUAN oḍighi awe bumatuạn phọ, eḍighi oḍighi dị rapẹl ghan sighuḍum! Yira ulhegheri ika? Mem mọ aZizọs angọ bọ itọ phọ edi bọ siphẹ Matiu 28:19, 20, odị aḅẹm mọ: ‘Ikị, . . . eḍighi we bumatuạn . . . , eḍiinye bidị muụm.’ Oḍiiny amuụm amạn maạr asi k’iḍighen? Oomo abulọ rowạ omhoọgh aghuḍum k’agee-pọ, omoọgh oḍiiny amuụm. Kụ oye dị rawạ oḍiiny amuụm kameeraam ni mọ aḍuugh phọ r’oḅetenhu esi aḍuugh phọ aZizọs bịn kụ ketue engọ nyodị pelieẹny. Pọ kụ iyaạr phọ otelhedom mọ aPita aḅenhị bọ Kristẹn phọ mọ: “[Oḍiiny] amuụm mọ ratuạn ghan idiphọ aJizọs Kraist aḅetenu bọ siphẹ aḍuugh phọ kụ kiphẹl inyina.” (1 Pit. 3:21) Kụ iḍighi kụ mem dị omhoom onyọ amatuạn aḍiiny muụm, pọ odị maḍuom aani olhoghi omhoọgh aani apelieẹny phọ ophọn phọ.
2. Eeghe odọ abutughemhiạ kụ edị 2 Timoti 4:1, 2 awạ mọ yira oḍighi?
2 Orue oḍighi awe bumatuạn, pọ ewạ mọ yira omhaạr ‘itughemị.’ (Bạl 2 Timoti 4:1, 2.) Eeghe kụ iḍighi? Loor esi idị aZizọs atọ uḅenhị iyira mọ: ‘Ikị, . . . eḍighi we bumatuạn . . . , etughemị bidị.’ Otelhedom mọ aPọl aḅẹm aani mọ “nạ aḍighi ghan ni iphẹn phọ, pọ nạ kapẹl Ii Ioor phọ anạ r’abuphẹ ronaghanạn ghan bọ nyinạ.” Esi iduọn phọ, iphẹn aPọl aḅẹm bọ mọ: “Maạr agona loor . . . r’ipẹ nạ ratughemị bọ,” ekạr kụ emạn maạr. (1 Tim. 4:16) Eḍighi bọ edị itughemhị kụ kilhoghonhaạn bọ iyira ḍighaạgh oḍighi awe bumatuạn phọ, pọ ewạ mọ itughemhị phọ ayira emhaạr ghan ekuạ.
3. Siẹn emhuoghaạph phọ ephẹn phọ, yira kooḅeghiọn eeghe dị egbolhomaam otughemhị oye Baibul?
3 Yira rotughemhị ni irubal awe igey phọ edi bọ siphẹ aBaibul phọ. Kuolọ emhuoghaạph phọ epẹ eten bọ, iḅenhị iyira mọ olhoghonhaạn ḍighaạgh buẹn yira rotughemhị ghan bọ oḍighi aani abumatuạn aKraist dị moḍiiny muụm. Esi iduọn phọ, siẹn emhuoghaạph phọ ephẹn phọ, yira kooḅeghiọn oogh inhọn araraạr dị torobọ otughemhiạ kaḍighi, orue olhoghonhaạn aḍighaạgh opọ odị ratughemhị bọ, ophoph oghị aghisigh oḍiiny amuụm.
MEERA ABAIBUL PHỌ KỤ AGHAẠPH GHAN
Teẹny okaaphọm dị asilor dị kalhoghonhaạn nyinhạ ḍighaạgh orophomhi asighalhanyạ phọ anạ ilọ eten phọ epẹ nạ kangọ ghan bọ Baibul phọ eepoogh oghaạph aani ghan siphẹ itughemhị phọ anạ (Miịn siikpịgh phọ 4-6) *
4. Eeghe kụ iḍighi kụ ekpẹ bọ ni dị otughemhiạ phọ kapamaghạ loor mem dị ratughemhị oye Baibul phọ? (Miịn igẹ dị edi ude.)
4 Loor esi iduọn yira ophomhoghiạn bọ Ekpo Onhụ phọ Enhaạn, yira kotue ni osoman odẹgh ophogh oghaạph ghan iboom ilọ ipẹ yira molhegheri bọ mem dị yira rotughemhị bunhọn. Toroboiperolbọ, mughumọ nạ apạm Ituughạ Otu Okoriom mọ, Ituughạ ABaibul Ookpomhoghan Phọ, obobọ nạ akị otughemhị aBaibul oye, meera ghan aBaibul phọ kụ aghaạph ghan. Orue ongọ eepoogh dị aBaibul phọ kụ kakaaphạn ghan oye phọ, pọ ewạ ni dị otughemhiạ phọ kamoọgh ophamhaghạn aloor, ku/kparaghạ ghan ogbạ oomo idị odị alhegheri ilọ esi aBaibul phọ obobọ emhuoghaạph phọ. * (Jọn 16:12) Tuutughiạn olhegheri iyaạr aBaibul phọ nạ amhoọgh ghan bọ mem mọ purukụ nạ aḍiiny bọ muụm mọ ḅilhẹ r’anyiidiphọ. Eeni mem mọ opọ phọ nạ ulhegheri ghan ikpanhạ itughemhị aBaibul phọ bịn. (Hib. 6:1) Isighẹ ni siạ kụ nạ agbi bọ onhaghanhạn iphẹn nạ alhegheri bọ nyiidiphọ, kụ iḍighi kụ ka/kparaghạ ghan otughemhị oomo araraạr dị nạ alhegheri mem.
5. (a) Odaphạn 1 Tesalonikạ 2:13, eeghe kụ edị ewạ mọ opọ nạ ratughemhị bọ anhaghanhạn siphẹ ituughạ phọ? (b) Ika kụ idị nạ katue aloghonhaạn ḍighaạgh opọ nạ ratughemhị bọ, oghaạph aani iyaạr dị odị atuughạ?
5 Ewạ ni mọ ḍighi idị opọ nạ ratughemhị bọ kalegheri mọ ipẹ odị ratuughạ bọ eḍighi Ekpo Onhụ Enhaạn. (Bạl 1 Tesalonikạ 2:13.) Ika kụ idị nạ katue aḍighi iphẹn phọ? Ngọ ni eepoogh dị opọ nạ ratughemhị bọ kakaạph aani ghan iyaạr dị odị atuughạ. Kparipẹ dị nạ bịn kụ kagbạ ghan ipẹ nạ anhaghanhạn bọ esi aBaibul phọ aḅenhị nyodị, ḅenhị ghan mọ odị aghaạph idị odị anhaghanhạn esi aBaibul phọ. Loghonhaạn ḍighaạgh opọ nạ ratughemhị ghan bọ omhiịn idị Ekpo Onhụ phọ Enhaạn egbolhomaam aani nyodị r’aloor. Puru nyodị sipuru dị keloghonhaạn nyodị ḍighaạgh oghaạph—idị odị aatughiạn aani ḅilhẹ alhoghoma ilọ esi phọ nyinha aạl bọ. (Luk 10:25-28) Esi omaạm, puru mọ: “Eghẹn eegharạ aZihova kụ edị nạ amhiịn siẹn esi aBaibul phọ ephẹn phọ?” “Ika kụ idị iphẹn phọ kelhoghonhaạn nyinhạ ḍighaạgh?” “Nạ aloghoma ika ilọ iphẹn nạ atuughạ bọ nyiidiphọ?” (Prov. 20:5) Ipẹ opọ nạ ratughemhị ghan bọ alhegheri bọ kụ ki/yaạr phọ, kuolọ ipẹ odị asighẹ bọ raḍighinhom ipẹ odị malhegheri bọ aḅilhẹ aphomhoghiạn, kụ ekạr iyaạr phọ.
6. Eeghe kụ iḍighi kụ enhighẹ bọ ophạm aani okaaphọm dị asilor mem dị nạ rakị otughemhị oye Baibul phọ?
6 Nạ rapạm aani ghan ni bunhọn abukaaphọm dị osilor, mem lọ nạ rakị otughemhị oye Baibul phọ ḍughụm? Nạ atue ni aḅenhị opọ adạph bọ nyinhạ mọ odị amhaạr aphogh ipẹ nạ ratughemhị bọ, ḅilhẹ mughumọ nạ rangọ ghan ni eepoogh dị aBaibul phọ kụ kakaaphạn ghan uwotu phọ. Ewạ ni osooromhi aloor orue oḍighi aani otughemhiạ dị asilor. (Poghom Iiḍighi 18:24-26.) Mem lọ ituughạ phọ emhinheen, puru ni opọ r’anạ eghị bọ mughumọ opọ nạ atughemhị bọ anaghanhạn ni itughemhị phọ anạ. Kụ eḍighi maạr dị nạ ka/tọl esi oniin awiki obobọ idị epel siphẹ, nạ atue ni aḅenhị oye phọ r’anạ eghị bọ mọ alhoghonhaạn nyinhạ ḍighaạgh atughemhị ghan. Iphẹn phọ keloghonhaạn ḍighaạgh dị ituughạ phọ kekị ghisigh, eḅilhẹ eḍeenhaan opọ nạ ratughemhị bọ mọ ituughạ phọ emạn ni maạr. R’amem r’amem ka/loghoma mọ ophọn oye dị “mị” kụ ratughemhị ghan bịn awilhẹ oḅọgh ongọ onhọn oye, pidị odị aghiọm ghisigh ituughạ phọ.
TUGHEMHIỌM GHAN R’OOPHUGH ḄILHẸ R’OMHEERAAM
Mạ ghan igey areḍeenhaan abumor r’abumarani dị odi siẹn ookpomhoghan phọ aḍeenhaan opọ nạ ratughemhị ghan bọ, pidị enyu nyodị osighẹ oḍighinhom aani asinhị iilhogh aBaibul phọ (Miịn siikpịgh phọ 7-9) *
7. Eeghe kụ ketue eloghonhaạn ḍighaạgh opọ nạ ratughemhị bọ oghelhọm ipẹ odị ratuughạ bọ?
7 Ewạ ni dị opọ nạ ratughemhị bọ kamiịn oophugh phọ r’omheeraam mọ nạ amhoọgh bọ aghị esi igey aBaibul phọ nạ ratughemhị bọ. (1 Tẹs. 1:5) Ipẹ phọ etue ni eḍighi idị odị kakelhọm aani ipẹ odị ratuughạ bọ. Eḍighi maạr lọ ewạ, pọ ḅenhị ni nyodị idị asinhị iilhogh aBaibul phọ melhoghonhaạn nyinhạ ḍighaạgh. Bịn odị kamiịn ni mọ aBaibul phọ apạm ni iiḅakiọm dị keloghonhaạn aani nyodị ḍighaạgh.
8. Eeghe kụ edị nạ kaḅilhẹ atue aḍighi olhoghonhaạn aḍighaạgh opọ nạ ratughemhị bọ, kụ eeghe kụ iḍighi?
8 Mem dị nạ ratughemhị oye Baibul, mạ ni aḍeenhaan nyodị bumor dị osoman ghan odọ phọ ipaanhaạn phọ odị asoman bọ kụ okpạr ri opu. Nạ atue kẹn ni apạm oye siphẹ ookpomhoghan phọ, dị amhoọgh imạ eḍeenhaan dị ketue ni engọ suọ opọ nạ ratughemhị ghan bọ. Nạ katue kẹn ni amiịn eḍeenhaan okparamhị dị edi siphẹ jw.org, eeḍiạn agạ phọ oghol bọ mọ “ABaibul Phọ Ranme Ghan Ni Sighuḍum Awe.” * Arumhuoghaạph r’asividio phọ edi bọ siphẹ phọ keloghonhaạn ni ḍighaạgh opọ nạ ratughemhị ghan bọ omhiịn osụ olhoghi phọ odi bọ osighẹ ghan oḍighinhom asinhị iilhogh aBaibul phọ siphẹ adọl aghuḍum mọ odị.
9. Ika kụ idị nạ katue aloghonhaạn ḍighaạgh opọ nạ ratughemhị ghan bọ, omhiigh osighẹ ipẹ odị ratuughạ bọ oḅenhị aani abunhọn?
9 Eḍighi maạr dị opọ nạ ratughemhị bọ m’aạl ilhom obobọ aphin anhịr, olom mọ odị obobọ anhịr phọ ratuughạ aani ghan ni ḍughụm? Eḍighi maạr dị ra/tuughạ aani, pọ ḍighi idị odị kaḍighom aani ituughạ phọ. Ḍighi idị opọ nạ ratughemhị bọ kakaạph aani ghan ipẹ odị matuughạ bọ aḅenhị buọ eghunotu odị r’arighirị odị. (Jọn 1:40-45) Ika kụ idị nạ katue aḍighi iduọn phọ? Nạ atue ni apuru nyodị mọ: “Ika kụ idị nạ katue amạ ephigh phọ ephẹn phọ aḍeenhaan aani buọ eghunotu anạ?” obobọ “Eghẹn esi aBaibul kụ edị nạ katue asighẹ amaạm ephigh phọ ephẹn phọ aḍeenhaan oyaghirị anạ?” Nạ aḍighi iduọn phọ, pọ nạ ratughemhị ghan nyodị oḍighi aani otughemhiạ, ḅilhẹ kẹn nạ raloghonhaạn ghan nyodị ḍighaạgh onhuụn osianhaan oḍighi aani okaaphọm dị muụm ko/ḍiiny. Nạ atue ni apuru opọ nạ ratughemhị ghan bọ mughumọ odị alegheri ni onhọn oye dị amhoọgh ḍiḅeraạn otuughạ aani aBaibul phọ. Eḍighi maạr dị alhegheri ni, pọ mem mem mọ kiạ ateẹny oye phọ, okori ophighi ituughạ aBaibul r’odị. Nạ atue ni aḍeenhaan vidio phọ, Eeghe Kụ Remite Ghan Mem Ituughạ aBaibul? *
LOGHONHAẠN ḌIGHAẠGH OPỌ NẠ RATUGHEMHỊ GHAN BỌ OMHOỌGH ARIGHIRỊ SIẸN OOKPOMHOGHAN PHỌ
Loghonhaạn ḍighaạgh opọ nạ ratughemhị ghan bọ omhoọgh arighirị siẹn ookpomhoghan phọ (Miịn siikpịgh phọ 10-11) *
10. Odaphạn 1 Tesalonikạ 2:7, 8, ika kụ idị abutughemhiạ aBaibul phọ kotuughaạny eḍeenhaan phọ aPọl?
10 Ewạ ni dị abutughemhiạ phọ komoọgh ogey ogbolhomaam okị esi abuphẹ bidị rotughemhị ghan bọ. Miịn bidị idiphọ awe dị koḍighi aani ni bumor r’abumarani ghisigh. (Bạl 1 Tesalonikạ 2:7, 8.) Ke/kạr edughanhaan bidị owilhẹ yogh abueriphọ arighirị phọ abidị, ḅilhẹ ronmeeghi araraạr siphẹ adọl aghuḍum mọ abidị kụ okumu aZihova. Kụ iḍighi kụ ewạ dị nạ kaloghonhaạn bidị ḍighaạgh omhoọgh abugey arighirị siẹn ookpomhoghan phọ. Ḍighi oyaghirị abuphẹ nạ ratughemhị ghan bọ, aghị ghan amhoore r’abidị oopho amem dị nạ u/kị otughemhị aBaibul. Aḍimhạgh afon, adom afon obobọ oghị oḅiila odị oopho amem, keḍeenhaan mọ nạ amoọgh ni ogbolhomaam odị.
11. Eeghe kụ iyaạr dị yira rowạ mọ abuẹn yira rotughemhị ghan bọ Baibul phọ omhiịn siẹn ookpomhoghan phọ, kụ eeghe kụ iḍighi?
11 Oḅẹm odi ni dị aḅẹm mọ: “Oniin oye bịn kụ raa/konhom ghan obumoọny.” Esi iduọn phọ yira kotue ni oḅẹm mọ: “Oomo ookpomhoghan phọ kụ rologhonhaạn ghan ḍighaạgh oye oḍighi onyọ amatuạn aKraist.” Pọ kụ iyaạr phọ abutughemhiạ dị osilor roḍighi ghan bọ idị opọ bidị rotughemhị bọ kalegheri aani buọ ookpomhoghan phọ, dị kotue ni omoọgh egey etirom okị esi odị. Bịn medughanhaan opọ nạ ratughemhị ghan bọ ooḍikuan awe phọ Enhaạn, kotue bọ ni ologhonhaạn nyodị ḍighaạgh mem lọ ewạ. Yira rowạ dị torobọ oye dị ratuughạ ghan Baibul phọ kaloghoma mọ odị aḍighi aani ni pakirị eghunotu aKristẹn phọ. Yira rowạ dị ephomhoghiạn abumor r’abumarani phọ kụ keḍạ ḍiḅeraạn opọ yira rotughemhị ghan bọ. Bịn medughanhaan nyodị osoph oḍigh awe dị ko/loghonhaạn nyodị ḍighaạgh ooḅereghị aZihova. (Prov. 13:20) Kụ eḍighi maạr dị abugbaany arighirị phọ odị kụ otokaany nyodị, odị kalegheri ni mọ onọ amoọgh ni bugey arighirị dị odi siẹn oḍighom mọ aZihova.—Mạk 10:29, 30; 1 Pit. 4:4.
KAẠPH GHAN ALHỌGH IIPHAGHAMHIỌM ILỌ OḄỌGH ALOOR ONGỌ R’OḌIINY AMUỤM
Oye dị ratuughạ ghan Baibul phọ kagbariọn ni radạ kirokirọ orue oteẹny aḍiigbu oḍiiny amuụm! (Miịn siikpịgh phọ 12-13)
12. Eeghe kụ iḍighi kụ yira kokaạph bọ ni ilọ oḅọgh aloor ongọ r’oḍiiny amuụm aKristẹn oḅenhị opọ yira rotughemhị ghan bọ?
12 Gbor ghan aghaạph ilọ oḅọgh aloor ongọ r’oḍiiny amuụm onyọ aKristẹn phọ. Idị eḍighi bọ iyaạr phọ yira otụ bọ kụ rotughemhị ghan bọ we Baibul phọ pọ olhoghonhaạn abidị ḍighaạgh oḍighi aani abumatuạn aKraist dị moḍiiny muụm. Kụ iḍighi kụ, nyinha retuughạ Baibul phọ esi iphurukpu arunwanyụ, ekạr ekpaariọm mem dị odị mamhiigh oru aani ituughạ, ḍighi ni idị odị kanaghanhạn mọ iyaạr phọ odị atụ bọ kụ ratuughạ Baibul phọ pọ okumu aani aZihova idiphọ oniin onyọ Ogbaanhaạn AZihova.
13. Ighẹn kụ aradạ dị opọ ratuughạ bọ Baibul phọ kagbariọn, orue ophoph oghị aghisigh oḍiiny aani amuụm?
13 Aradạ dị opọ ratuughạ bọ Baibul phọ kagbariọn oteẹny aḍiigbu oḍiiny amuụm mọ pọ, eḅẹl phọ, odị kalegheri aḅilhẹ apomhoghiạn aZihova, amoọgh omheeraam akị esi Odị. (Jọn 3:16; 17:3) Odị kamoọgh ni siya dị egbatanhaạn r’aZihova, ḅilhẹ kẹn amiigh ooḍikuan abumor r’abumarani ookpomhoghan phọ. (Hib. 10:24, 25; Jems. 4:8) Odị kakel li iḍighinhom araraạr dị i/kpeanhaạn, kụ akiton esi ikarạph phọ odị. (Iiḍighi 3:19) Mem mọ amuphẹ phọ, omheeraam mọ odị manyu nyodị oghaạph aani ghan igey phọ oḅenhị abunhọn. (2 Kọr. 4:13) Bịn odị aḅọgh loor odị angọ aZihova, kụ aḍighi aḍeenhaan esi oḍiiny amuụm. (1 Pit. 3:21; 4:2) Kụ aḍio phọ aḍiphẹ phọ keḍighi ni ḍio ibo esi atorobọ oye! Mem dị opọ nạ ratughemhị ghan bọ Baibul bọ agbatạn eniin edạ oghị oteẹny aḍiigbu phọ odị, sẹph ghan ni aḅilhẹ akparamhị nyodị pidị aghiọm ghisigh ateẹny ḍiigbu phọ odị.
MEM EMHẠN MEM ḄEEḄEGHIỌN NI APHOGH OGHỊ AGHISIGH OPỌ NẠ RATUGHEMHỊ GHAN BỌ
14. Ika kụ idị otughemhiạ katue aaḅeghiọn apọgh oghị aghisigh opọ odị ratughemhị ghan bọ?
14 Ewạ ni okparạm, mem dị yira rologhonhaạn ḍighaạgh opọ yira rotughemhị ghan bọ Baibul phọ, ophoph oghị aghisigh oḅọgh aloor ongọ oḍiiny amuụm. Kuolọ emoọgh ni esi dị esi kewạ mọ waaghị alhegheri mughumọ odị amoọgh ni eephuạ okumu aZihova Enhaạn phọ. Esi iduọn phọ, nạ amiịn ni reeghe dị eḍeenhaan mọ opọ nạ ratughemhị ghan bọ Baibul phọ rakparaghạ ni odạph itọ phọ aZizọs? Obobọ eḅeraạn nyodị olhegheri iniin araraạr siphẹ aBaibul phọ bịn ḍughụm?
15. Ighẹn ku areḍeenhaan dị nạ kasighẹ alegheriom mọ opọ nạ ratughemhị ghan bọ rakị ni ghisigh?
15 Gbor ghan ni aaḅeghiọn aphogh oghị aghisigh opọ nạ ratughemhị ghan bọ. Esi omaạm, odị rakaạph ghan ni ipẹ odị alhoghoma bọ kaḅenhị aZihova? Odị raaḅereghị ghan ni? (Ps. 116:1, 2) Rakelhọm ghan ni aạl aBaibul phọ? (Ps. 119:97) Odị ragbor ghan ni karu ituughạ? (Ps. 22:22) Manmeeghi ni riisi lọ ewạ siphẹ adọl aghuḍum mọ odị? (Ps. 119:112) Odị mamhiigh ni oghaạph aani ipẹ odị ratuughạ ghan bọ oḅenhị aani abuọ eghunotu r’arighirị odị? (Ps. 9:1) Edị ekạr emhạn maạr, odị rawạ ni oḍighi aani oniin onyọ Ogbaanhaạn AZihova ḍughụm? (Ps. 40:8) Eḍighi maạr dị opọ nạ ratughemhị ghan bọ ra/poph k’aghị ghisigh esi areten phọ iphẹn phọ, pọ r’amegheel kparaghạ owạ omhiịn iyaạr phọ eḍighi bọ, kụ aghaaphạn nyodị ipẹ nạ alhoghoma bọ. *
16. Pụr amem kụ ikpẹ dị nạ kabilhẹ otughemhị oye Baibul phọ?
16 Mem emhạn mem ewạ ni dị nạ kaaḅeghiọn ghan apogh mughumọ nạ kakiọm ni ghisigh atughemhị ghan oye phọ Baibul phọ. Orue oḍighi iduọn phọ pọ puruan loor mọ: ‘Odị raa/kolhobian ghan mun kụ nyinha egbi otuughạ ḍughụm? Odị o/mhoọgh ḍiḅeraạn oru aani ituughạ ḍughụm? Odị odimom niiniin ikarạph araagharạ phọ odị ḍughụm? Odị odi niiniin ekụ ikarạph iiḅereghị ḍughụm?’ Eḍighi maạr dị ophagharanhaạn phọ aḍighi ii, pọ otughemhị ghan oye dị arọl iduọn phọ, ekighimaạm oye dị rowạ otughemhị amughị kụ ra/wạ mọ amuụm atir nyodị! Eḍighi maạr dị opọ nạ ratughemhị ghan bọ u/sereghiạn ipẹ odị ratuughạ bọ ḅilhẹ ra/wạ onmia, pọ i/moghi mun oghiọm aghisigh otughemhị.
17. Odaphạn 1 Timoti 4:16, eeghe kụ edị oomo abutughemhiạ aBaibul phọ koḍighi?
17 Yira omaghamhị maạr rukumuan oḍighi awe bumatuạn phọ, pọ kụ iyaạr phọ yira rowạ ghan bọ olhoghonhaạn aḍighaạgh buphẹ yira rotughemhị ghan bọ dị kopoph okị ghisigh oḍiiny muụm. Esi iduọn phọ, omheera aBaibul phọ kụ aghaạph ghan, otughemhiọm ghan r’oophugh ḅilhẹ r’omheeraam. Oroma ghan buphẹ yira rotughemhị ghan bọ omhoọgh arighirị siẹn ookpomhoghan phọ. Ḅilhẹ kẹn oghaạph ghan ni olhọgh iiphaghamhiọm ilọ aḍiigbu oḅọgh aloor ongọ r’oḍiiny amuụm, kụ mem emhạn mem ooḅeghiọn ghan ni ophogh oghị aghisigh opọ yira rotughemhị bọ. (Miịn igbe phọ eḅẹm bọ mọ, “ Idị Otughemhiạ Kaḍighi Kụ Aaneghị Itughemhị ABaibul Dị Ketorori Engọ Oḍiiny Amuụm.”) Yira romoọgh ghan ni ibo mem dị yira ophinhom aani bin oḍighi apelieẹny phọ ophọn phọ! Eḍighi idị yira kokururụ otughemhị ghan awe Baibul phọ dị ketorori engọ oḍiiny amuụm.
AḌUỌR PHỌ 79 Teach Them to Stand Firm
^ par. 5 Otughemhị awe Baibul eḍighi eepoogh dị yira omhoọgh olhoghonhaạn abunhọn ḍighaạgh olhegheri ipẹ aZihova rawạ bọ mọ bidị ootughiạn ghan, olhoghoma ghan, oḅilhẹ ozọ ghan. Esi iduọn phọ, emhuoghaạph phọ ephẹn phọ kilhoghonhaạn iyira ḍighaạgh olhegheri ipẹ yira kotue bọ otophomhi sighalhanyạ itughemhị phọ ayira.
^ par. 4 Miịn emhuoghaạph phọ “Avoid These Pitfalls When Conducting a Bible Study” siphẹ Life and Ministry Meeting Workbook aSeptember 2016.
^ par. 8 Kiạ siphẹ ILỌ AYOOR > IDỊ EMITEGHU.
^ par. 9 Siphẹ JW Library®, kiạ siphẹ MEDIA > OUR MEETINGS AND MINISTRY > TOOLS FOR THE MINISTRY.
^ par. 15 Miịn rumhuoghaạph phọ “Ephomhoghiạn R’osereghiạn AZihova Kụ Renyu Ghan Oye Oḍiiny Amuụm” ḅilhẹ “Nạ Maakolhobian Ni Oḍiiny Amuụm Ḍughụm?” siphẹ Otu Okoriom mọ aMarch 2020.
^ par. 77 ILỌ AFOTO: Mem dị bidị motughemhị Baibul phọ oye omhadạn, onyọ umarani dị asilor raloghonhaạn ḍighaạgh otughemhiạ phọ omhiịn idị odị ka/kaạph ghan oomo araghaạph phọ mem ituughạ aBaibul.
^ par. 79 ILỌ AFOTO: Mem dị bidị ophạm ituughạ aBaibul phọ, anhịr phọ atuughạ ni alhegheri ilọ ipẹ odị kaḍighi bọ ogey anhịr. Onyebel roten, odị akị rakaạph ghan kaḅenhị aani olom mọ odị ipẹ odị atuughạ bọ.
^ par. 81 ILỌ AFOTO: Opọ rotughemhị ghan bọ r’olom odị okị k’oniin onyọ umor dị bidị oozuanhaan epẹ aKindọm Họl phọ.
