1. Zaˬ lahˇ pyeuꞈ laˇ ni mˇ˗eu gaˇ heu naˇ, dehꞈ ziˇ˗ahˇ caw ba˗eu gaˇ pyeuꞈ meh lehˇ aˬ dui aˬ joˆ˗ehˇ siˬ nya˗eu nga?

 Zaˬ lahˇ pyeuꞈ laˇ ni mˇ˗eu gaˇ heu naˇ, dehꞈ ziˇ˗ahˇ caw ba˗eu gaˇ pyeuꞈ meh. Aˬ dui aˬ joˆ˗ehˇ siˬ nya˗eu nga? Yeˬsuˇ gaˇ kawˆ heu Maꞈtehˬ 28:19, 20-ahˇ ehˇ taˬ˗euˬ meh. Aˬ yawꞈ ‘zaˬ lahˇ pyeuꞈ laˇ ni mˇ˗iˇ˗awˬ, aˬ yawꞈ maꞈ˗ahˇ iˇ cuꞈ shawˇ nehˬ˗awˬ’ lehˇ ehˇ taˬ˗euˬ meh. Iˇ cuꞈ shawˇ˗eu heu naˇ aˇ yeˇ huiˬ dui dui˗eu meh. Aˬ jeˬ miˇ neh ehˇ naˇ, aˬ dui kaˬ kʼoꞈ˗eu jeˬ za mawꞈ naˇ iˇ cuꞈ ya shawˇ˗eu meh. Iˇ cuꞈ shawˇ mawꞈ˗eu deuˬ naˇ, Yeˬsuˇ aˬ dui˗euˬ gʼaˇ duˬ kamˇ shiˇ le˗awˇ, gʼoꞈ dehꞈ laˇ˗euˬ gaˇ kawˆ˗ahˇ jah˗awˇ neh tehꞈ˗ehˇ ka kʼoꞈ˗eu jeˬ za meh lehˇ ya jah˗eu meh. Teu baˬ da neh Beˬtuˆluˆ Ka li zaˬ cawˬ cawˬ deuˬ˗ahˇ “Iˇ cuꞈ shawˇ˗eu koeˇ˗aˬ, Yeˬsuˇ Ka li˗ahˇ Miˬyehˇ neh bi gʼoꞈ dehꞈ laˇ˗euˬ gaˇ gʼoe˗awˇ naw maꞈ˗ahˇ ka kʼoꞈ˗eu jeˬ pyeuꞈ˗eu meh” lehˇ ehˇ nehˬ˗euˬ meh. (1 Beˬtuˆluˆ 3:21) Teu miˇ neh, iˇ cuꞈ shawˇ˗awˇ zaˬ lahˇ pyeuꞈ laˇ˗euˬ deuˬ kaˬ kʼoꞈ˗eu jeˬ za gaˇ noeˬ tmˬ nya meh.

2. 2 Tiˆmoˇseˬ 4:1, 2-ahˇ aˬ dui aˬ joˆ˗ehˇ gʼeh˗eu mehˬ˗eu gʼaˬ ya pyeuꞈ nga lehˇ ehˇ˗eu nga?

² Aˬ dui zaˬ lahˇ pyeuꞈ laˇ˗eu gaˇ heu˗ahˇ mˇ nya˗eu gʼaˇ duˬ, “mehˬ nehˬ tsoˆ nehˬ”˗eu paw ya bi huiˬ ya bi mahˇ laˇ˗eu meh. (2 Tiˆmoˇseˬ 4:1, 2-ahˇ gui.) Aˬ jeˬ miˇ neh ehˇ naˇ, Yeˬsuˇ aˬ dui˗ahˇ “zaˬ lahˇ pyeuꞈ laˇ ni mˇ˗iˇ” lehˇ dawˬ biꞈ˗awˇ, gʼaˬ kʼehˇ Pawˇluˆ jiˇ aˬ dui˗ahˇ “nawˇ kʼoeˇ loꞈ˗ehˇ mˇ˗eu kʼoeˇ˗aˬ, nawˬ˗euˬ gʼawˇ mawˇ˗ahˇ maˬ ehˇ, nawˬ neh mehˬ nehˬ tsoˆ nehˬ˗euˬ tsawˇ haˬ deuˬ˗ahˇ maˬ ehˇ, ka kʼoꞈ˗eu jeˬ pyeuꞈ˗eu” miˇ neh “gaˇ heu deuˬ˗ahˇ maˬ byehˇ ni mˇ” lehˇ ehˇ˗eu miˇ neh meh. Teu baˬ da neh Pawˇluˆ aˬ dui˗ahˇ ‘yawˬ ha mehˬ˗eu tsoˆ˗eu jeˬ gaˇ kawˆ˗ahˇ, yaw muiˬ˗ehˇ yahˇ’ lehˇ ehˇ˗eu meh. (1 Tiˆmoˇseˬ 4:16) Zaˬ lahˇ pyeuꞈ laˇ ni mˇ˗eu gaˇ heu naˇ, mehˬ˗eu jeˬ nehˬ˗ehˇ taꞈ˗eu miˇ neh, aˬ dui mehˬ˗eu jeˬ huiˬ laˇ mahˇ laˇ ni leh jeh mawꞈ˗eu ma.

3. Heu kawˆ˗ahˇ aˬ dui Jaˇliꞈ dzaw nehˬ˗eu gaˇ kawˆ nehˬ˗ehˇ taꞈ leˇ˗awˇ, aˬ jeˬ ja sawˇ˗eu nga?

 ³ Nymˬ˗mˇ aˬ dui tsawˇ haˬ aˇ lam aˇ lam gʼaˬ˗ahˇ Jaˇliꞈ gaˇ kawˆ mehˬ nehˬ luꞈ˗eu ma. Ehˇ kʼawꞈ, dzeuˇ yaꞈ˗euˬ kawˆ˗ahˇ ehˇ taˬ˗euˬ loꞈ˗ehˇ aˬ dui dzaw zaˬ deuˬ˗ahˇ iˇ cuꞈ shawˇ˗eu aˇ tiˆ˗ahˇ le keuˆ nya ni aˬ joˆ˗ehˇ caw ba nehˬ nya˗eu nga lehˇ siˬ nya mawꞈ˗eu ma. Heu kawˆ˗ahˇ naˇ aˬ dui dzaw zaˬ deuˬ˗ahˇ iˇ cuꞈ shawˇ˗eu aˇ tiˆ˗ahˇ le keuˆ nya ni caw ba nehˬ˗eu gʼaˇ duˬ, Jaˇliꞈ mehˬ˗eu yawˬ gʼaˬ na luꞈ ya jahˇ˗eu 5 jeˬ˗ahˇ ja sawˇ taˬ˗euˬ meh.

4. Mehˬ˗eu gʼaˬ aˬ jeˬ miˇ neh yawˬ ha˗euˬ nui ma˗ahˇ ya gʼaˬ leˇ˗eu nga? (Ehˇ lahˬ˗ahˇ jiˇ haw.)

⁴ Aˬ dui yawˬ ha mehˬ˗eu Jaˇliꞈ laꞈ kʼoeˇ˗euˬ gaˇ kawˆ˗ahˇ gaˬ˗eu miˇ neh, gaˇ kawˆ teu˗ahˇ yaw kʼaˆ˗ehˇ ngehˬ mawꞈ˗eu ma. Ehˇ kʼawꞈ, aˬ dui Jaˇliꞈ mehˬ ngeh maˬ ehˇ, Loꞈ˗eu nymˇgoˇ sheuˬ gʼeh ngeh maˬ ehˇ, aˇ muˇ Jaˇliꞈ dzaw gaˇ sheuˬ gʼeh ngeh maˬ ehˇ, aˇ dzehˬ˗ehˇ ngehˬ dzeuˇ paˬ˗ehˇ maˬ gʼeh˗a. Aˬ dui aˬ geu ngeh mehˬ˗eu maˬ kaˬ Jaˇliꞈ˗ahˇ yaw muiˬ˗ehˇ zmˬ˗awˇ mehˬ mawꞈ˗eu ma. Ehˇ kʼawꞈ aˬ dui yawˬ ha neh ya siˬ˗euˬ Jaˇliꞈ laꞈ kʼoeˇ˗euˬ gaˇ kawˆ yawˬ jeˬ na luꞈ˗ahˇ maˬ dzawˇ nehˬ˗eu gʼaˇ duˬ, yawˬ ha˗euˬ nui ma˗ahˇ ya gʼaˬ leˇ˗eu meh. b (Yoˇhaˬ 16:12) Aˬ dui iˇ cuꞈ shawˇ˗eu yaw shuiꞈ pyeuꞈ ngeh shaˇ noeˬ haw sheˇ. Teu ngeh aˬ dui Jaˇliꞈ ya dzaw dahˬ beh˗eu gaˇ kawˆ˗ahˇ tehꞈ˗ehˇ siˬ nya˗awˇ, nymˬ˗mˇ loꞈ˗ehˇ siˬ nya laˇ˗eu gʼaˇ duˬ aˇ yamˬ yaw myaˬ kʼoꞈ ya zmˬ˗eu meh. Teu miˇ neh, aˬ dui neh ya siˬ˗euˬ jeˬ dzaw zaˬ deuˬ˗ahˇ tiˬ poˆ tehꞈ˗ehˇ maˬ ya mehˬ jiˇ˗a.—Heˬbyehˇ 6:1.

5. (a) 1 Teˇsaˬloˇni 2:13-ahˇ haw ngeh, aˬ dui dzaw zaˬ deuˬ˗ahˇ aˬ jeˬ˗euˬ gaˇ kawˆ˗ahˇ bi gʼoˆ shaw mawꞈ˗eu nga? (b) Aˬ dui dzaw zaˬ deuˬ˗ahˇ aˬ yawꞈ maꞈ neh ya siˬ˗euˬ jeˬ˗ahˇ ngehˬ doˆ ni aˬ joˆ˗ehˇ ya caw ba˗eu nga?

⁵ Aˬ dui dzaw zaˬ deuˬ˗ahˇ aˬ yawꞈ maꞈ neh ya dzaw˗euˬ jeˬ teu naˇ, Miˬyehˇ˗euˬ dawˬ pyeuꞈ meh lehˇ bi gʼoˆ shaw mawꞈ˗eu ma. (1 Teˇsaˬloˇni 2:13-ahˇ gui.) Aˬ dui aˬ joˆ˗ehˇ jahˇ nya˗eu nga? Aˬ dui dzaw zaˬ deuˬ˗ahˇ aˬ yawꞈ maꞈ neh ya dzaw˗euˬ jeˬ˗ahˇ ngehˬ ni gʼaˬ ya biꞈ˗eu meh. Aˬ dui yawˬ ha tiˬ gʼaˬ tehꞈ˗ehˇ Jaˇliꞈ aˇ deuˆ˗ahˇ dzawˇ nehˬ ngehˬ toˬ˗aˬ, dzaw zaˬ deuˬ aˬ yawꞈ maꞈ neh ya siˬ˗euˬ jeˬ aˬ dui˗ahˇ bi dzawˇ nehˬ paˬ˗ehˇ gʼeh˗eu meh. Aˬ dui dzaw zaˬ deuˬ˗ahˇ Jaˇliꞈ gaˇ kawˆ aˬ yawꞈ maꞈ nehˬ˗ehˇ aˬ joˆ˗ehˇ taꞈ˗awˇ, aˬ joˆ˗ehˇ zmˬ iˇ nya˗eu lehˇ mawˇ leˇ ni ya caw ba nehˬ˗eu meh. Aˬ yawꞈ maꞈ neh ya gui˗euˬ Jaˇliꞈ aˇ deuˆ˗ahˇ aˬ joˆ˗ehˇ noeˬ˗eu lehˇ bi ngehˬ doˆ leꞈ˗eu gʼaˇ duˬ, naˇ haˬ˗eu jeˬ ya zmˬ˗eu meh. (Luˇkaꞈ 10:25-28) Aˬ dui aˬ yawꞈ maꞈ˗ahˇ heu loꞈ˗ehˇ naˇ haˬ nya˗eu meh. “Jaˇliꞈ heu deuˆ nawˬ˗ahˇ Yeˬhawˇbaˬ˗euˬ seuˆ dzeuꞈ˗ahˇ mawˇ nya ni aˬ joˆ˗ehˇ caw ba nya?” “Nymˬ˗mˇ dzaw luꞈ˗eu gaˇ kawˆ heu nawˬ˗ahˇ gaˇ dahˇ aˬ joˆ˗ehˇ tsoeˬ nya?” “Nawˬ neh ya dzaw˗euˬ gaˇ kawˆ˗ahˇ nawˬ˗ahˇ aˬ joˆ˗ehˇ noeˬ nya?” (Dawˬdaˬ 20:5) Aˇ yeˇ kʼaˇ huiˬ˗eu jeˬ naˇ, dzaw zaˬ deuˬ aˇ naˆ ni siˬ nya˗eu lehˇ maˬ ngeuˇ˗eu, aˬ yawꞈ maꞈ neh ya siˬ˗euˬ jeˬ˗ahˇ gaˬ˗awˇ maˇ diˇ zmˬ˗iˇ˗eu heu meh.

6. Aˬ dui Jaˇliꞈ mehˬ˗iˇ ngeh, mehˬ˗eu paw noeˬ dahˇ doe laˇ˗euˬ mehˇ nmˇ sheuˬ˗awˇ neh iˇ˗eu aˬ jeˬ miˇ neh muiˬ˗eu nga?

 ⁶ Nawˇ Jaˇliꞈ mehˬ˗eu paw noeˬ dahˇ doe laˇ˗euˬ mehˇ nmˇ tiˬ gʼaˬ na sheuˬ˗awˇ mehˬ˗iˇ haw maˬ loˇ? Nawˇ aˬ yawꞈ˗ahˇ nawˬ˗euˬ Jaˇliꞈ dzaw˗eu jeˬ hawˇ˗eu Jaˇliꞈ zmˬ˗eu jeˬ aˬ joˆ˗ehˇ nga lehˇ naˇ haˬ haw˗awˬ tawˇ. Aˬ dui Jaˇliꞈ yaw muiˬ˗ehˇ dzaw nehˬ nya mawꞈ naˇ, ya taˬ aw˗eu meh. (Gʼaˬkʼehˇ 18:24-26 nehˬ˗ehˇ sheu cehˆ.) Nawˇ aˬ yawꞈ˗ahˇ nawˬ˗euˬ dzaw zaˬ ya dzaw˗euˬ jeˬ˗ahˇ maˇ diˇ gʼoˆ shaw gaˇ duˇ ngaˇ laˬ lehˇ naˇ haˬ haw. Nawˇ maˬ jawˇ naˇ, aˬ yawꞈ˗ahˇ Jaˇliꞈ mehˬ dah nehˬ laꞈ lehˇ shaˇ nya meh. Toˆ˗ehˇ jahˇ naˇ, nawˬ˗euˬ dzaw zaˬ Jaˇliꞈ dzaw tawꞈ leꞈ nya˗awˇ, Jaˇliꞈ dzaw˗eu heu naˇ aˇ yeˇ huiˬ˗eu jeˬ pyeuꞈ nga lehˇ siˬ leˇ˗eu meh. Dzaw zaˬ teu gʼaˬ “nawˬ˗euˬ” dzaw zaˬ pyeuꞈ˗eu lehˇ tehꞈ˗ehˇ maˬ ya noeˬ˗eu uˬ taꞈ, mehˇ nmˇ nui deuˬ maˬ caw ba nehˬ nya˗a lehˇ jiˇ maˬ ya noeˬ˗a. Aˬ dui dzaw zaˬ deuˬ˗ahˇ Jaˇliꞈ bi dzaw daˆ leꞈ˗awˇ bi huiˬ bi mahˇ laˇ mawꞈ˗eu miˇ neh, muiˬ dui dui˗eu jeˬ bi za mawꞈ˗eu yaw duˬ baw meh.

7. Dzaw zaˬ deuˬ˗ahˇ bi dzaw mawꞈ dzehˬ laˇ ni caw ba nehˬ˗eu aˬ jeˬ nga?

⁷ Dzaw zaˬ deuˬ aˬ dui˗euˬ nui gaˬ hawˇ˗eu aˬ dui Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ jah ziꞈ˗eu laꞈ kʼoeˇ yaw zoˇ zoˇ lehˇ mehˬ gaˇ ya mawˇ˗eu loˬ meh. (1 Teˇsaˬloˇni 1:5) Aˬ yawꞈ maꞈ toˆ˗ehˇ ya mawˇ ngeh, yawˬ ha neh ya siˬ˗euˬ jeˬ˗ahˇ gaˬ˗awˇ ya leˇ˗eu meh. Aˬ dui Jaˇliꞈ˗ahˇ neh ya dzaw˗euˬ jeˬ aˬ dui˗ahˇ aˬ joˇ joˆ˗ehˇ gaˇ dahˇ tsoeˬ˗eu lehˇ dzaw zaˬ deuˬ˗ahˇ ja nehˬ haw. Toˆ˗ehˇ naˇ, aˬ yawꞈ Jaˇliꞈ laꞈ kʼoeˇ ya dzaw˗euˬ jeˬ aˬ yawꞈ˗ahˇ jiˇ gaˇ dahˇ tsoeˬ nya lehˇ mawˇ leˇ˗eu meh.

8. Aˬ dui dzaw zaˬ deuˬ˗ahˇ aˬ joˆ˗ehˇ paˇ caw ba nya nga siˬ, aˬ dui aˬ jeˬ miˇ neh toˆ˗ehˇ jahˇ paˬ˗ehˇ gʼeh˗eu nga?

⁸ Jaˇliꞈ dzaw ngeh, dzaw zaˬ deuˬ loꞈ˗ehˇ duˇ leˇ˗eu shaˬ zahˬ tiˬ jeˬ na˗ahˇ tahˬ puˬ haw˗euˬ mehˇ nmˇ tiˬ gʼaˬ na˗euˬ gaˇ kawˆ˗ahˇ ja nehˬ˗awˇ, mehˇ nmˇ deuˬ gaˇ kawˆ teu˗ahˇ aˬ joˆ˗ehˇ laˆ piˇ ngaˬ lehˇ jiˇ ja nehˬ haw. Maˬ ngeuˇ naˇ, aˬ dui dzaw zaˬ deuˬ mehˇ nmˇ˗euˬ puˬ haw mawˇ haw laꞈ˗euˬ jeˬ˗ahˇ neh gaˇ dahˇ tsoeˬ˗eu jeˬ za˗eu gʼaˇ duˬ, mehˇ nmˇ tiˬ gʼaˬ na˗ahˇ sheuˬ˗awˇ Jaˇliꞈ mehˬ˗iˇ nya˗eu uˬ taꞈ, aˬ dui dzaw zaˬ deuˬ˗ahˇ Jaˇliꞈ aˬ yawꞈ maꞈ˗euˬ dehꞈ ziˇ muiˬ daˆ laˇ ni caw ba nehˬ nya˗eu lehˇ bi siˬ˗eu gʼaˇ duˬ, jw.org gʼoeˇsaiˇ laꞈ kʼoeˇ “Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” c lehˇ boꞈ taˬ˗euˬ gaˇ leˇ˗awˇ, biˬdiˬoˬ maˬ ngeuˇ naˇ gaˇ kawˆ deuˬ˗ahˇ poˆ˗awˇ, aˬ yawꞈ maꞈ˗ahˇ bi haw nya meh.

9. Aˬ dui dzaw zaˬ deuˬ˗ahˇ aˬ yawꞈ maꞈ neh ya dzaw˗euˬ jeˬ nymˇ jiˇ laꞈ kʼoeˇ˗euˬ deuˬ hawˇ˗eu cawˬ deuˬ˗ahˇ ja nehˬ ni gʼaˬ aˬ joˆ˗ehˇ bi nya˗eu nga?

⁹ Dzaw zaˬ deuˬ sheuˬ dahˬ dzaˬ dzeuˇ˗euˬ naˇ, aˬ yawꞈ˗euˬ nymˇ dahˬ jiˇ Jaˇliꞈ dzaw luꞈ meh loˇ? Aˬ yawꞈ maˬ dzaw luꞈ naˇ tiˬ kawˆ loꞈ˗ehˇ dzaw laˇ˗awˬ lehˇ cawˬ haw. Dzaw zaˬ deuˬ aˬ yawꞈ maꞈ neh ya dzaw˗euˬ jeˬ yuiꞈ nyiˇ hawˇ˗eu cawˬ deuˬ˗ahˇ maˬ ehˇ, nymˇ jiˇ laꞈ kʼoeˇ˗euˬ deuˬ˗ahˇ maˬ ehˇ, ja nehˬ  ni gʼaˬ biꞈ. (Yoˇhaˬ 1:40-45) Aˬ dui toˆ˗ehˇ aˬ joˆ˗ehˇ jahˇ nya˗eu nga? Dzaw zaˬ deuˬ˗ahˇ nawˇ “Gaˇ kawˆ heu yuiꞈ nyiˇ deuˬ maˬ ngeuˇ naˇ nymˇ jiˇ laꞈ kʼoeˇ˗euˬ deuˬ˗ahˇ aˬ joˆ˗ehˇ dzawˇ nehˬ de?” lehˇ naˇ haˬ nya˗eu uˬ taꞈ, “Nawˇ cawˬ deuˬ˗ahˇ gaˇ kawˆ heu dzawˇ nehˬ˗eu gʼaˇ duˬ, Jaˇliꞈ aˬ geu deuˆ zmˬ de?” lehˇ jiˇ naˇ haˬ haw nya meh. Aˬ dui toˆ˗ehˇ jahˇ naˇ dzaw zaˬ deuˬ˗ahˇ mehˬ˗eu gʼaˬ pyeuꞈ laˇ nya ni lehˬ hmˬ nehˬ˗eu jeˬ pyeuꞈ meh. Toˆ˗ehˇ naˇ, aˬ yawꞈ maꞈ iˇ cuꞈ maˬ shawˇ˗euˬ tsaꞈ gaˬ˗eu gʼaˬ pyeuꞈ laˇ nya˗eu meh. Kʼoeˇ naˇ, dzaw zaˬ deuˬ˗ahˇ Jaˇliꞈ dzaw mawꞈ˗eu tiˬ gʼaˬ na jawˇ meh siˬ laˬ lehˇ naˇ haˬ haw. Jawˇ naˇ, aˬ yawꞈ˗ahˇ kawˇ ma˗ehˇ ngehˬ cawˬ˗awˇ Jaˇliꞈ dzaw mawꞈ miˇ˗a laˬ lehˇ cawˬ. Kʼoeˇ naˇ, aˬ yawꞈ˗ahˇ Jaˇliꞈ aˬ joˆ˗ehˇ dzaw˗eu nga? d lehˇ ehˇ˗eu biˬdiˬoˬ bi haw.

10. Mehˬ˗eu deuˬ Pawˇluˆ neh 1 Teˇsaˬloˇni 2:7, 8-ahˇ ehˇ taˬ˗euˬ loꞈ˗ehˇ aˬ joˆ˗ehˇ dzaw geuꞈ nya˗eu nga?

¹⁰ Mehˬ˗eu deuˬ, dzaw zaˬ deuˬ˗ahˇ maˇ diˇ kʼahˬ lahˇ˗awˇ nui ma ahˇ˗eu lehˇ bi siˬ. Aˬ yawꞈ maꞈ˗ahˇ mehˬ hu paw aˬ dui˗euˬ mehˇ nmˇ tiˬ gʼaˬ pyeuꞈ laˇ nya meh lehˇ haw. (1 Teˇsaˬloˇni 2:7, 8-ahˇ gui.) Aˬ yawꞈ maꞈ Yeˬhawˇbaˬ˗euˬ gaˇ mˇ laˇ˗eu gʼaˇ duˬ, dehꞈ poˆ dehꞈ paˇ˗awˇ, cawˬ yaw oeˇ deuˬ byehˇ dzehˬ˗eu heu naˇ yaw awˬ maˬ ngeuˇ˗a. Teu miˇ neh aˬ dui aˬ yawꞈ maꞈ˗ahˇ aˇ muˇ laꞈ kʼoeˇ cawˬ yaw muiˬ jawˇ ni ya caw ba nehˬ˗eu meh. Kʼoeˇ naˇ, aˬ dui jiˇ aˬ yawꞈ maꞈ˗ahˇ Jaˇliꞈ dzaw ngeh tehꞈ˗ehˇ maˬ ngeuˇ˗eu yawˬ yamˬ yawˬ˗ahˇ jiˇ cawˬ ya cawˬ nehˬ˗eu meh. Yaw jeˬ ma jeˬ, aˬ dui aˬ yawꞈ maꞈ jawˇ gaˇ naˬ gaˬ ngehˬ gʼeh˗eu, sahˬ boꞈ sha gʼeh˗eu, aˬ yawꞈ maꞈ jawˇ gaˇ iˇ˗eu, heu deuˬ jahˇ nya meh. Aˬ dui toˆ˗ehˇ jahˇ naˇ, aˬ dui dzaw zaˬ deuˬ˗ahˇ maˇ diˇ kʼahˬ lahˇ˗awˇ nui ma ahˇ˗eu lehˇ bi siˬ˗eu jeˬ pyeuꞈ meh.

11. Aˬ dui dzaw zaˬ deuˬ˗ahˇ aˇ muˇ laꞈ kʼoeˇ aˬ jeˬ bi mawˇ mawꞈ˗eu nga, aˬ jeˬ miˇ neh?

¹¹ Ehˇpa˗li kaˆ miˇ kʼahˬ˗ahˇ “Zaˬ tiˬ gʼaˬ huiˬ laˇ nya˗eu gʼaˇ duˬ, pu lah siˬ ya caw ba˗eu meh” lehˇ ehˇ˗eu dawˬ daˬ tiˬ hmˬ jaˆ˗eu meh. Teu gaˇ duˇ ni aˬ dui jiˇ “Tsawˇ haˬ tiˬ gʼaˬ zaˬ lahˇ pyeuꞈ laˇ nya˗eu gʼaˇ duˬ, aˇ muˇ muˇ lah ni ya caw ba meh” lehˇ ehˇ nya meh. Muiˬ˗eu Jaˇliꞈ dzaw nehˬ˗eu deuˬ, dzaw zaˬ deuˬ˗ahˇ aˬ yawꞈ maꞈ dzaw geuꞈ nya paˬ˗ehˇ gʼeh˗eu mehˇ nmˇ deuˬ nehˬ˗ehˇ siˬ nya laˇ ni caw ba nehˬ˗eu meh. Dzaw zaˬ deuˬ mehˇ nmˇ heu deuˬ nehˬ˗ehˇ ya siˬ nya˗awˇ cawˬ ya cawˬ taꞈ ngeh, aˬ yawꞈ maꞈ˗ahˇ Yeˬhawˇbaˬ nehˬ˗ehˇ gʼoeˇ dzehˬ leˇ ni caw ba nehˬ˗awˇ, shaˬ zahˬ˗ahˇ ya tahˬ puˬ ngeh gʼaˬ biꞈ ni caw ba nehˬ˗eu meh. Aˬ dui dzaw zaˬ deuˬ˗ahˇ aˇ muˇ laꞈ kʼoeˇ˗euˬ tiˬ gʼaˬ pyeuꞈ˗eu lehˇ bi noeˬ mawꞈ˗awˇ, mehˇ nmˇ˗euˬ nui gaˬ˗ahˇ mawˇ ni caw ba nehˬ mawꞈ˗eu uˬ taꞈ, Ka li zaˬ nymˇ jiˇ laꞈ kʼoeˇ tiˬ gʼaˬ pyeuꞈ laˇ ni caw ba nehˬ mawꞈ˗eu ma. Dzaw zaˬ deuˬ toˆ˗ehˇ ya mawˇ ngeh, aˬ yawꞈ˗ahˇ Yeˬhawˇbaˬ˗ahˇ maˬ gaˬ˗eu cawˬ deuˬ˗ahˇ byehˇ dzehˬ˗eu awˬ dzehˬ laˇ˗eu meh. (Dawˬdaˬ 13:20) Aˬ yawꞈ maꞈ cawˬ yaw oeˇ deuˬ nehˬ˗ehˇ maˬ paˇ ya cawˬ taꞈ˗euˬ kʼawꞈ, Yeˬhawˇbaˬ˗euˬ aˇ maꞈ aˇ muˇ laꞈ kʼoeˇ cawˬ yaw muiˬ  jawˇ meh lehˇ siˬ nya˗eu meh.—Maˬkuˆ 10:29, 30; 1 Beˬtuˆluˆ 4:4.

12. Aˬ dui aˬ jeˬ miˇ neh dzaw zaˬ deuˬ nehˬ˗ehˇ a nehˬ˗eu jeˬ hawˇ˗eu iˇ cuꞈ shawˇ˗eu gaˇ kawˆ˗ahˇ ngehˬ keuˆ paˬ˗ehˇ gʼeh˗eu nga?

¹² Dzaw zaˬ deuˬ nehˬ˗ehˇ a nehˬ˗eu jeˬ hawˇ˗eu iˇ cuꞈ shawˇ˗eu gaˇ kawˆ˗ahˇ tiˬ kʼehˬ maˬ taˬ ngehˬ keuˆ˗awˇ, gaˇ kawˆ heu naˇ aˇ yeˇ huiˬ dui dui˗eu jeˬ pyeuꞈ meh lehˇ ja nehˬ. Aˬ dui neh aˇ pyaˇ daˬ taˬ˗euˬ jeˬ naˇ, dzaw zaˬ deuˬ˗ahˇ mehˬ ngeh, aˬ yawꞈ maꞈ˗ahˇ iˇ cuꞈ shawˇ˗awˇ zaˬ lahˇ pyeuꞈ laˇ ni caw ba˗eu heu meh lehˇ ya noeˬ taˬ˗eu meh. Teu miˇ neh, yawˬ jawˇ na luꞈ Jaˇliꞈ heu myaˆ siˬ dzaw laꞈ˗awˇ, mehˬ bawˬ˗ahˇ oe dahˬ beh laˇ ngeh ngehˬ˗ehˇ dzehˬ, aˬ yawꞈ maꞈ Jaˇliꞈ dzaw˗eu heu naˇ Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ laˇ˗eu gʼaˇ duˬ dzaw˗eu jeˬ pyeuꞈ meh lehˇ ya gʼoˆ shaw˗eu meh.

13. Dzaw zaˬ deuˬ iˇ cuꞈ shawˇ˗eu aˇ tiˆ˗ahˇ le keuˆ nya˗eu gʼaˇ duˬ, aˬ jeˬ jeˇ ya jahˇ˗eu nga?

¹³ Muiˬ˗eu dzaw zaˬ deuˬ tiˬ tiˆ shaˇ˗iˬ tiˬ tiˆ huiˬ lahˇ mahˇ laˇ˗awˇ iˇ cuꞈ shawˇ nya laˇ˗eu meh. Dahˬ beh ngeh, dzaw zaˬ deuˬ Yeˬhawˇbaˬ˗ahˇ siˬ nya˗awˇ aˬ yawꞈ˗ahˇ gaˬ laˇ˗eu uˬ taꞈ, aˬ yawꞈ˗ahˇ jah laˇ˗eu meh. (Yoˇhaˬ 3:16; 17:3) Teu gaˇ neh naˇ aˬ yawꞈ maꞈ Yeˬhawˇbaˬ nehˬ˗ehˇ cawˬ cawˬ laˇ˗awˇ, mehˇ nmˇ deuˬ nehˬ˗ehˇ jiˇ gʼoeˇ laˇ˗eu meh. (Heˬbyehˇ 10:24, 25; Yaˬkoˆ 4:8) Kʼoeˇ naˇ, aˬ yawꞈ maꞈ noeˬ poˆ noeˬ paˇ˗awˇ, maˬ muiˬ˗eu jeˬ˗ahˇ maˬ paˇ mˇ˗eu meh. (Gʼaˬkʼehˇ 3:19) Aˬ yawꞈ˗euˬ jah˗eu jeˬ aˬ cawˬ˗ahˇ ja nehˬ˗eu meh. (2 Gawˇliˬtu 4:13) Uˬ duˬ duˬ leˇ ngeh aˬ yawꞈ maꞈ Yeˬhawˇbaˬ˗ahˇ a nehˬ˗awˇ, iˇ cuꞈ shawˇ˗eu meh. (1 Beˬtuˆluˆ 3:21; 4:2) Dzaw zaˬ deuˬ iˇ cuꞈ shawˇ˗eu aˇ nah˗ahˇ aˬ dui yawˬ gʼaˬ na luꞈ laˬ kʼaˬ cehˇ dui dui˗eu aˇ nah pyeuꞈ meh. Aˬ dui dzaw zaˬ deuˬ iˇ cuꞈ shawˇ˗eu aˇ tiˆ˗ahˇ le keuˆ nya˗eu gʼaˇ duˬ, tiˬ tiˆ shaˇ˗iˬ tiˬ tiˆ leh jeh˗awˇ mˇ caw gaˇ ya mawˇ ngeh, aˬ yawꞈ maꞈ˗ahˇ gʼaˬ biꞈ˗awˇ ja ceuˬ nehˬ nya meh.

14. Jaˇ liꞈ dzaw nehˬ˗eu gʼaˬ, dzaw zaˬ deuˬ aˇ naˆ ni huiˬ laˇ mahˇ laˇ ngaˬ lehˇ aˬ joˆ˗ehˇ haw nya˗eu nga?

¹⁴ Aˬ dui dzaw zaˬ deuˬ˗ahˇ Yeˬhawˇbaˬ˗ahˇ a nehˬ˗awˇ iˇ cuꞈ shawˇ˗eu aˇ tiˆ˗ahˇ le keuˆ nya ni mehˬ nehˬ ngeh, nui ma gʼawˬ mahˇ ni ya taˬ˗eu meh. Aˇ tiˆ tiˬ tiˆ˗ahˇ le keuˆ ngeh, aˬ dui dzaw zaˬ deuˬ Yeˬhawˇbaˬ˗euˬ gaˇ mˇ mawꞈ ngaˇ laˬ lehˇ ya siˬ nya˗eu meh. Nawˬ˗ahˇ dzaw zaˬ deuˬ Yeˬsuˇ˗euˬ ehˇ dawˬ˗ahˇ leh jeh˗awˇ mˇ caw˗eu lehˇ mawˇ laˇ˗eu aˬ jeˬ jeˇ jaˆ˗eu nga? Aˬ yawꞈ Jaˇliꞈ dzaw˗eu heu naˇ, Jaˇliꞈ laꞈ kʼoeˇ ahˇ˗eu gaˇ kawˆ deuˬ˗ahˇ ya leˇ˗eu miˇ neh tehꞈ nga laˬ?

15. Jaˇliꞈ mehˬ˗eu gʼaˬ dzaw zaˬ deuˬ huiˬ laˇ mahˇ laˇ ngaˇ laˬ lehˇ aˬ joˆ˗ehˇ siˬ nya˗eu nga?

¹⁵ Aˬ dui dzaw zaˬ deuˬ aˇ naˆ ni huiˬ laˇ mahˇ laˇ ngaˬ lehˇ tiˬ kʼehˬ maˬ taˬ ya haw˗eu meh. Yaw jeˬ ma jeˬ, aˬ yawꞈ Yeˬhawˇbaˬ nehˬ˗ehˇ taꞈ leˇ˗awˇ aˬ joˆ˗ehˇ  noeˬ nya lehˇ ngehˬ meh laˬ? Aˬ yawꞈ Yeˬhawˇbaˬ˗ahˇ guiˬ lahˬ shaˇ meh laˬ? (Ja ceuˬ 116:1, 2) Aˬ yawꞈ Jaˇliꞈ gui gaˇ ya leˇ meh laˬ? (Ja ceuˬ 119:97) Aˬ yawꞈ aˬ myah luꞈ mehˬ bawˬ˗ahˇ oe meh laˬ? (Ja ceuˬ 22:22) Aˬ yawꞈ yawˬ ha neh ya dzaw˗euˬ loꞈ˗ehˇ dehꞈ jeˬ dehꞈ kawˆ beˬ paˇ ngaˇ laˬ? (Ja ceuˬ 119:112) Aˬ yawꞈ yawˬ ha neh ya dzaw˗euˬ jeˬ nymˇ jiˇ laꞈ kʼoeˇ˗euˬ deuˬ hawˇ˗eu cawˬ deuˬ˗ahˇ ja nehˬ ngaˇ laˬ? (Ja ceuˬ 9:1) Aˇ yeˇ huiˬ dzehˬ˗eu jeˬ naˇ, aˬ yawꞈ Yeˬhawˇbaˬ˗euˬ Saˇ kiˇ pyeuꞈ mawꞈ ngaˇ laˬ? (Ja ceuˬ 40:8) Dzaw zaˬ deuˬ heu loꞈ˗ehˇ maˬ mˇ caw luꞈ naˇ, aˬ yawꞈ maꞈ aˬ jeˬ miˇ neh teu loꞈ˗ehˇ maˬ mˇ caw luꞈ nga lehˇ haw˗awˇ, gaˇ kawˆ teu nehˬ˗ehˇ taꞈ leˇ˗awˇ aˬ yawꞈ nehˬ˗ehˇ dawˇ coe ni ya ja sawˇ˗eu meh. e

16. Aˬ dui tiˬ gʼaˬ na˗ahˇ Jaˇliꞈ mehˬ˗eu, aˬ geu ngeh naˬ paˬ˗ehˇ gʼeh˗eu nga?

¹⁶ Aˬ dui tiˬ gʼaˬ na˗ahˇ Jaˇliꞈ mehˬ tawꞈ leꞈ˗eu gaˇ kawˆ˗ahˇ tiˬ kʼehˬ maˬ taˬ ya haw˗eu meh. Aˬ dui yawˬ ha˗ahˇ heu loꞈ˗ehˇ haˇ naˬ. ‘Aˬ yawꞈ Jaˇliꞈ maˬ dzaw mi naˆ˗ehˇ jeˬ hu lehˬ hmˬ taˬ ngaˇ laˬ? Aˬ yawꞈ mehˬ bawˬ˗ahˇ maˬ oe mawꞈ˗eu ngeuˇ meh laˬ? Aˬ yawꞈ dehꞈ poˆ dehꞈ paˇ˗euˬ ngaˇ laˬ? Aˬ yawꞈ zahˇ kʼawꞈ deuˬ˗euˬ zaˬ lahˇ tiˬ gʼaˬ pyeuꞈ luꞈ nga siˬ laˬ?’ Aˬ yawꞈ teu loꞈ˗ehˇ pyeuꞈ luꞈ naˇ, heu loꞈ˗ehˇ gʼeh˗eu dzaw zaˬ deuˬ˗ahˇ mehˬ daˆ leꞈ˗eu heu naˇ, iˇ diˬ diˬ nya mawꞈ gaˇ neh iˇ cuꞈ maˬ laˆ aˬ mawꞈ˗eu deuˬ˗ahˇ mehˬ gaˇ duˇ˗eu meh. Aˬ yawꞈ maꞈ yawˬ ha neh dzaw˗euˬ jeˬ˗ahˇ aˇ poeˬ maˬ taˬ baw˗eu uˬ taꞈ, maˬ dehꞈ poˆ maˬ dehꞈ paˇ naˇ aˬ dui aˬ jeˬ˗euˬ gʼaˇ duˬ mehˬ daˆ leꞈ˗eu?

17. 1 Tiˆmoˇseˬ 4:16-ahˇ haw ngeh, Jaˇliꞈ dzaw nehˬ˗eu yawˬ gʼaˬ na luꞈ aˬ jeˬ ya jahˇ˗eu nga?

¹⁷ Zaˬ lahˇ pyeuꞈ laˇ ni ni mˇ˗eu gaˇ heu naˇ, aˇ yeˇ huiˬ dui dui˗eu meh. Aˬ dui dzaw zaˬ deuˬ˗ahˇ iˇ cuꞈ shawˇ˗eu aˇ tiˆ˗ahˇ le keuˆ nya ni caw ba nehˬ mawꞈ˗eu ma. Teu baˬ da neh aˬ dui Jaˇliꞈ zmˬ˗awˇ mehˬ˗eu uˬ taꞈ, aˬ yawꞈ maꞈ˗ahˇ jah ziꞈ˗eu laꞈ kʼoeˇ yaw zoˇ zoˇ lehˇ mehˬ nehˬ mawꞈ˗eu ma. Aˬ dui dzaw zaˬ deuˬ˗ahˇ aˇ muˇ laꞈ kʼoeˇ cawˬ bi jawˇ mawꞈ˗eu ma. Aˬ dui a nehˬ˗eu jeˬ hawˇ˗eu iˇ cuꞈ shawˇ˗eu gaˇ kawˆ˗ahˇ yaw kʼaˆ˗ehˇ ngehˬ keuˆ mawꞈ˗eu uˬ taꞈ, dzaw zaˬ deuˬ aˇ naˆ ni huiˬ laˇ mahˇ laˇ ngaˬ lehˇ tiˬ kʼehˬ maˬ taˬ haw mawꞈ˗eu ma. (“ Iˇ cuꞈ shawˇ˗eu aˇ tiˆ˗ahˇ le keuˆ nya ni mehˬ˗eu gʼaˬ ya jahˇ˗eu jeˬ” lehˇ ehˇ˗eu oeˬ coeˇ oeˬ bawˬ˗ahˇ haw.) Aˬ dui dehꞈ ziˇ za˗eu gaˇ heu˗ahˇ ya caw ba˗eu miˇ neh laˬ kʼaˬ cehˇ dui dui miˇ˗a. Aˬ dui dzaw zaˬ deuˬ iˇ cuꞈ shawˇ˗eu aˇ tiˆ˗ahˇ le keuˆ nya ni kʼaˇ gʼeh nya gaˇ neh leh jeh˗awˇ mehˬ luꞈ˗uˇ.