1. Pirang’o wacopo yero nia niketho dhanu udok julub utie tic ma bodho kwo?

NIKETHO dhanu udok julub utie tic ma bodho kwo! Nenedi? I Matayo 28:19, 20, Yesu ung’olo kumae: ‘Wucidhi, . . . wuketh dhanu dok julub . . . wumii igi batizo.’ Pirang’o pire tie tek nilimo batizo? Ka wabemito wabothi, wacikara nilimo batizo. Ng’atu m’ubemito limo ucikere niyio nia nikum tho man cer pa Yesu kende re m’eromo nwang’u kwo ma rondo ku rondo. Pi thelembe maeno re ma jakwenda Petro uyero ni Jukristu wadi kumae: ‘M’ubodho wun kawono . . . en e batizo . . . ni kum cer pa Yesu Kristu.’ (1 Pet. 3:21) Pieno, ka ng’atu moko ulimo batizo, ecopo bedo ku genogen mi kwo rondo ku rondo.

2. Nimakere ku 2 Timoteo 4:1, 2, wacikara nibedo kit juponji ma nenedi?

² Pi niketho dhanu udok julub, wacikara nimedo bodho mwa mi “ponji.” (Som 2 Timoteo 4:1, 2.) Pirang’o? Pilembe Yesu ung’olo iwa kumae: “Wucidhi, . . . wuketh dhanu dok julub . . . , wuponjgi.” Jakwenda Paulo uyero nia ‘bed asu’ i tic maeno, kum ‘tek itimo kumeno, ibibodhri giri ku dhanu m’ubeduwinji bende.” Thelembe maeno re m’uketho emedo nia, ‘bed ku weng’i . . . i kum ponji peri.’ (1 Tim. 4:16) Pi niketho dhanu udok julub, ukwayu waponjgi; pieno wacikara nimedo bodho mwa mi ponji.

3. I thiwiwec maeni wabiweco iwi lembang’o?

³ I ng’om zoo, wabeponjo Biblia ku dhanu milioni dupa. Ento calu ma waneno i thiwiwec m’ukadhu, wacikara ning’eyo  ayi m’ukwayu wakony ko ju ma pol m’i kindgi nitundo gilim batizo man gidok julub pa Yesu Kristu. I thiwiwec maeni, wabiweco iwi lembe mange abic ma japonjoman ucikere nitimo pi nikonyo ju m’eponjo kugi Biblia kara gimediri nitundo i batizo.

4. Pirang’o ukwayu ngo iwec akeca kinde m’ibetelo wi ponji mi Biblia? (Nen korolembe m’i there.)

⁴ Wamaru gin ma waponjo i Biblia. Pieno, wacopo mito wawec lee iwi lembene. Re kadok ibetelo wi ponji mi Otkur ma Wiw, wi Ponji mi Biblia mi cokiri kunoke ibeponjo Biblia ku ng’atini de, ukwayu ngo iwec akeca. Dong’ kara iwek Biblia re m’uweci saa m’ibetelo wi ponji pa ng’atini, ukwayu itim kero kud iwec hai, man kud ikor gin ceke m’ing’eyo iwi verse moko mi Biblia kunoke iwi lembe mange. * (Yoh. 16:12) Kepar pi ng’eyong’ec mi Biblia m’ibino ko kinde m’ilimo batizo, ku m’itie ko kawoni. Copere nia ilimo batizo nwang’u fodi inyang’ kende kende i ponji mir ukungu mi Biblia. (Ebr. 6:1) Ng’eyong’ec mi Biblia m’itie ko kawoni uting’o iri oro ma dupa. Pieno, kud iponj lembe zoo wang’ acel ni ng’atu ma fodi ucaku ponjo Biblia acaka.

5. (a) Nimakere ku 1 Jutesaloniki 2:13, wacikara nikonyo ng’atu ma waponjo kude Biblia ung’ei lembang’o? (b) Wacopo mio amora i kum japonj Biblia nenedi kara ekor nen pare iwi lembe m’ebeponjo?

⁵ Wacikara nikonyo ju ma waponjo kugi Biblia ning’eyo nia lembe ma gibeponjo uai i Biblia. (Som 1 Jutesaloniki 2:13.) Wacopo timo nenedi? Mii amora i kume ekor nen pare iwi lembe m’ebeponjone. Kakare nikoro ire i giragora mi Biblia kwa in, kwaye ekor i giragora moko en gire. Konye enen nia Lembe pa Mungu ubeweco i bang’e en. Ka wusomo giragora moko, kepenje ku penji ma copo cwale nikoro paru pare, man kite ma giragorane umulo ko kume. (Lk. 10:25-28) Ku lapor, penje kumae: “Giragora maeni ukonyi nenedi nineno kite pa Yehova?” “Lemandha maeni mi Biblia copo konyi nenedi?” “Paru peri tie ang’o iwi lembe ma waai waponjo eni?” (Rie. 20:5) Gin ma pire tek akeca utie ngo kadhiri mi lembe ma japonj Biblia ung’eyo, ento utie mer m’emaru ko lembene, man kite m’ebeii nitio ko ku lembene i kwo pare.

6. Pirang’o etie ber nicidho ku jurwei mange ma gitie ku bodho mi ponji kinde ma wabecitelo wi ponji mi Biblia?

⁶ Kan ibecitelo wi ponji mi Biblia, nyo ibed  icidho ku jurwei mange ma gitie ku bodho mi ponji de? Kan ibed icidho kugi, iromo penjogi gikegimii paru migi iwi ayi m’itelo ko wi ponji, man giyer ka nyo itio cuu ku Biblia. Kinde ma wubeweco, ukwayu ibed mol man iwinjgi kara bodho peri mi ponji umedere. (Nen Tic. 18:24-26.) I ng’eye, penj jarwei maeno ka nyo eneno nia japonj Biblia ubenyang’ i ponji kunoke ngo. Kan ibibedo mbe pi yenga acel kunoke nikadhu, kwaye nia edong’ etel wi ponjine. Eno biketho ponji bimedere asu, man japonj Biblia de bineno nia pi ponjine tie tek. Kud igen nia eno tie ponji “peri” ma ng’atu mange mbe ma copo telo wie. M’umbe jiji, ibemito ng’atu m’ibeponjo kude Biblia umedere asu ninwang’u ng’eyong’ec mi lemandha.

7. Lembang’o ma bikonyo japonj Biblia nimaru gin m’ebeponjo?

⁷ Ukwayu japonj Biblia unen nia ibeponjo ku yaw yaw, man nia in de iyio lemandha mi Biblia. (1 Tes. 1:5) Eno bicwale bende nimaru gin m’ebeponjo. Kan ukwayere, iromo koro ire kite ma cik mir ukungu mi Biblia ukonyi ko i kwo peri. E ebinwang’u nia karaman Biblia copo konyo en bende.

8. Iromo timo ang’o mange pi nikonyo japonj Biblia, man pirang’o?

⁸ I saa mi ponji, mii lapor mir umego ku nyimego moko ma gigam ginwang’iri ku kit peko m’urombo ku pare, man gituc niciro pekone. Icopo cidho kud umego kunoke nyamego moko mi cokiri ma lapor pare romo konyo japonj Biblia. Kunoke iromo mio ire lapor mir umego ku nyimego moko ma juweco pigi i jw.org. Lembe ma gikoro iwi kwo migi nwang’ere i the thiwiwec m’uyero “Biblia loko kwo.” * Thiwiwec ma kumeno bikonyo ng’atu m’iponjo kude nineno nia Biblia copo konye nitimo alokaloka i kwo pare.

9. Icopo ketho cwiny japonj Biblia nenedi kara ebed enyuth lembe m’ebeponjo ni wedi pare man ni jurimbe?

⁹ Ka ng’atu m’iponjo kude utie ku dhaku kunoke ku nico, nyo jadhogene de ubeponjo Biblia? Kan ungo, kwaye edikere i ponjine. Keth cwiny japonj Biblia nia ebed enyuth lembe m’ebeponjo ni juruot pare kunoke ni wedi pare man ni jurimbe. (Yoh. 1:40-45)  Icopo timo nenedi? Penje ku penji ma yot calu ve: “Icopo koro lemandha maeni nenedi ni wedi peri?” kunoke “Iromo tio ku giragora ma kani pi nikoro lembe maeni ni jarimbi moko?” Kan ibetimo kumeno, ibikonyo ng’atu m’ibeponjo kude nidoko japonjo. I ng’eye kinde m’ebiromo, ebidoko jarwei ma fodi ulimo ngo. Bende, penje ka nyo eng’eyo ng’atu moko ma romo maru niponjo Biblia. Kan ewacu nia utie, wec ku ng’atune man penje tek ecopo maru wuponj kude Biblia. Nyuth ire video ma thiwie tie Jutimo ponji mi Biblia nenedi? *

10. Nimakere ku 1 Jutesaloniki 2:7, 8, japonjo copo lubo lapor pa jakwenda Paulo nenedi?

¹⁰ Wa juponji, wacikara nidieng’ lee pi ju ma waponjo kugi Biblia. Ukwayu wanen gi ni dhanu ma bidoko umego kunoke nyimego mwa. (Som 1 Jutesaloniki 2:7, 8.) Etie yot ungo ni japonj Biblia niweko jurimo pare mi ng’om man nitimo alokaloka m’ukwayere kara etim ni Yehova. Pieno, konye kara enwang’ jurimo ma beco i cokiri. In giri de ibed jarimbe. Bed karacelo kude i saa mi ponji kende ngo, ento namb kude i saa mange de. Bed ilwong’e i telefon, kiew ire mesaj kunoke cidh iliewe i nindo mange m’uweko nindo mwu mi ponji; eno binyutho nia andha ibedieng’ kude.

11. Wabemito ng’atu ma waponjo kude Biblia unwang’ lembang’o i cokiri, man pirang’o?

¹¹ Lembabola moko uyero nia, “Nyathin peri utie peri kendi ngo.” Wan wacopo yero nia, “kara ng’atini udok jalub, dhanu ceke mi cokiri nyoko ponji pare anyoka.” Pieno, japonjo ma cuu nyutho ng’atu m’ebeponjo kude Biblia ni jumange mi cokiri, ma gicopo konye nikadhu kud i lapor migi, kara ecor ceng’ini ku Yehova. Japonj Biblia copo winjere ma ber kinde m’ebedikere kud umego ku nyimego ma giromo konye i thenge mi tipo, man ma gicopo tielo cwinye saa m’ebenwang’ere i peko. Wabemito ng’atuman ma waponjo kude Biblia unwang’ nia etie acel m’i kind dhanu mi cokiri, man etie wat mwa i thenge mi tipo. Wabemito bende nia ebed acel m’i kind umego ku nyimego mwa mi ng’om zoo ma gimariri lee. I ng’eye, ebibedo ire yot nijigo mer ku dhanu ma gicopo konye ngo nimaru Yehova. (Rie. 13:20) Ka jurimbe m’i wang’e giwenje, ebing’eyo nia ecopo nwang’u jurimo mandha i dilo pa Yehova.​—Mk. 10:29, 30; 1 Pet. 4:4.

12. Pirang’o wacikara ninyutho pi thieriri man batizo ni ng’atu ma wabeponjo kude Biblia?

¹² Nyuth kamaleng’ ni ng’atu m’iponjo kude Biblia nia nithieriri ni Yehova man nilimo batizo utie gin ma pire tek lee. Kinde ma wabetelo wi ponji mi Biblia, lembakeca mwa utie nikonyo ng’atini kara elim batizo man edok jalub pa Kristu. I ng’ei ma wadaru ponjo ku ng’atini pi dwi moko, man asagane kan ecaku becidho i coko, ecikere ninyang’ nia thelembe m’uketho wabeponjo kude utie nikonye kara edok Jamulembe pa Yehova.

13. Japonj Biblia ucikere nitimo lembe ma kani kara emedere nitundo i batizo?

¹³ Kara japonj Biblia umedere nitundo i batizo, lembe moko nuti m’ecikere nitimo. Ku kwong’a, ukwayu eng’ei Yehova, emare man ebed ku yioyic i ie. (Yoh. 3:16; 17:3) I ng’eye, kwayu edok jarimb Yehova, man ecak dikere kud umego ku nyimego mi cokiri. (Ebr. 10:24, 25; Yak. 4:8) Bende, ecikere niweko timo pare ma reco man niyewo dubo pare. (Tic. 3:19) M’umedo maeno, yioyic pare bicwale ninyutho lemandha m’eng’eyone ni jumange. (2 Kor. 4:13) Tokcen ne, ebithierere ni Yehova, man ebilimo batizo pi ninyutho thieririne kamaleng’. (1 Pet. 3:21; 4:2) Nindo mi batizo pare utie nindo mi mutoro ma lee ni dhanu ceke! Kinde ma japonj Biblia ubetimo lembe m’ukwayere kara emedere nitundo i batizo, bed ifoye wang’ ma pol, man mii amora i kume nia emedere asu nitimo kumeno.

14. Japonjo copo ng’eyo nenedi nia ng’atu m’ebeponjo kude Biblia ubemedere?

¹⁴ Wacikara nibedo ku cirocir kinde ma wabekonyo japonj Biblia kara emedere nitundo i batizo. Re ka wadaru ponjo kude nitundo i kadhiri moko, ukwayu wang’ei ka nyo andha etie kud ava mi timo ni Yehova Mungu. Nyo ineno lembe moko m’ubenyutho nia ebeii niworo lembang’ola pa Yesu? Kunoke nyo ebemito kende kende eng’ei lembe mi Biblia?

15. Japonjo bing’eyo nenedi nia ng’atu m’eponjo kude Biblia ubetimo mediri kara ebed ayika pi nilimo batizo?

¹⁵ Ukwayu wang’ ma pol wawoth neno mediri ma japonj Biblia ubetimo. Ku lapor, nyo ebed ekoro paru pare m’upondo ni Yehova? Nyo ebed erwo i bang’ Yehova? (Zab. 116:1, 2) Nyo emaru somo Biblia? (Zab. 119:97)  Nyo ebed ecidho i coko ceke? (Zab. 22:22) Nyo edaru timo alokaloka moko de i kwo pare m’ubenyutho nia etio ku lembe m’ebeponjo? (Zab. 119:112) Nyo ecaku bekoro lembe m’ebeponjone ni wedi pare kunoke ni juode man ni jurimbe? (Zab. 9:1) M’usagu zoo, nyo etie kud ava mi doko Jamulembe pa Yehova? (Zab. 40:8) Tekene japonj Biblia ubetimo ngo lembe acel de m’i kind ma jukwanu no, ku riekowang’, kepim ninyang’ nia ejai kani, man i ng’eye wec kude thwolo thwolo, ento ku kwinyo ngo. *

16. Saa ma kani m’ukwayu ijig niponjo Biblia ku ng’atini?

¹⁶ Saa moko kebed ipenjiri ka nyo ukwayu imediri niponjo ku ng’atini. Kepenjiri kumae: ‘Nyo japonj Biblia beyiko ponji pare de? Nyo emaru nicidho i coko? Nyo fodi asu ebemedere ku timo pare ma reco? Nyo fodi asu edikere ku dini moko mi ndra?’ Tekene dwokowang’ penji maeno zoo tie eyo, nimediri asu niponjo kude utie ve nikonjo pii i ng’ei batha! Ka japonj Biblia umaru ngo lembe m’ebeponjo man etie ngo ayika nitimo alokaloka i kwo pare, etie ber nia ijig niponjo kude.

17. Nimakere ku 1 Timoteo 4:16, umego ku nyimego ceke ma gitelo wi ponji mi Biblia gicikiri nitimo ang’o?

¹⁷ Niketho dhanu udok julub utie tic ma pire tek nisagu zoo iwa, man wabed wamito wakony ju ma wabeponjo kugi Biblia gitim mediri nitundo i batizo. Pieno, wawek Biblia re m’uponj ponji, waponj ku yaw yaw man i kite ma nyutho nia wan de wayio lembe wabeponjone. Wakony japonj Biblia kara enwang’ jurimo i cokiri. Wanyuth ire kamaleng’ pi thieriri man batizo, man wang’ ma pol wabed wanen ka nyo japonj Biblia ubetimo mediri. (Nen sanduku ma thiwie tie “ Lembe ma japonjo ucikere nitimo”.) Watie kud anyong’a nidikara i tic maeni ma bodho kwo! Dong’ wabed ku lembakeca mi timo lembe ceke ma wacopo pi nikonyo ju ma waponjo kugi Biblia kara gimediri nitundo i batizo.