Cacekiwen Lalakaw 42
Misikay Pacekiw to Fangcalay Cudad, Padama to Pacekiwan Micada to Paputisem—Saka 2
Ka pinaˈon to niyah ato pipasifanaˈ no niyah.—1 TIMOTI 4:16.
RADIW 143 Citediay ko Toˈman
KALIMLAAN NO LALAKAW *
1. Padama to tamdaw malo Krisciyang hano ngaˈay milidong to ˈorip no tamdaw hani?
PADAMA to tamdaw malo Krisciyang wa ngaˈay milidong to ˈorip no tamdaw. Hano mafanaˈ kita hani? Itini Matay 28:19, 20 sanay palimoˈot ci Yis: “Kalingad kamo palo nisawawaan ako ko polong a finawlan . . . paputisemen cangra.” Padama to tamdaw micada to paputisem o masakalimlaan, samanen micada ko tamdaw to paputisem ngaˈ ngaˈay malidong. Makalimay micada to paputisem a tamdaw wa pakasoˈlin, ira ko toki ningra malidong pakayniay kinafalah ni Yis to ˈorip hanaca patikol maˈorip. Mihaenay sanay ko tarokos ci Pitiro a somowal: “O paputisem . . . pakayniay patikol ni Yis Kristoan a maˈorip milidong tamowanan.” (1 Pitiro 3:21) Tiya micada ko tamdaw to paputisem malo nisawawaan ni Yis i, wa irato ko toki ningra milifok to tahadaˈocay a ˈorip.
2. Mikitini 2 Timoti 4:1, 2, sasamaan ko demak no singsi no Fangcalay Cudad hani?
2 Pakayni sapadamaaw to tamdaw malo Krisciyang, misaaliay kita palahad to ‘inaneng a pasifanaˈ.’ (ˈOsien ko 2 Timoti 4:1, 2.) Misamanay hani? Sanay ci Yis: ‘Kalingad kamo, palo nisawawaan ako ko polong finawlan . . . pasifanaˈen cangra.’ Mihaenay ko sowal no tarokos ci Pawlo, Ka ‘padotoc aka pisawad’ midemak toniya demak, ‘mihaen to demak wa ngaˈay milidong to niyah, ngaˈayho milidong to mitengilay tisowanan a tamdaw.’ Mansa mihaen ko sowal ningra: ‘Ka pinaˈon to niyah ato pipasifanaˈ no niyah.’ (1 Timoti 4:16) Ano sapadamaaw kita to tao malo Krisciyang, o papadotoc misalof to inaneng no niyah a pasifanaˈ.
3. Oniya lalakaw wa milengo to manan?
3 Itini cowacowa pala 1000 efan ko pacekiwan ita. Malecad milengoan i fafekang, makalimay kita padama to ˈalomanay tamdaw micada to paputisem malo nisawawaan ni Yis. Oniya lalakaw wa milengo, sapadamaaw to pacekiwan micada to paputisem, wa midemak ko singsi no Fangcalay Cudad to lima a demak.
ANO PASIFANAˈ I SAKA DADEMAKEN KO FANGCALAY CUDAD
Tahidangen ko adihayay ko nalifetan a mitosilay padama tisowanan pacakat to inaneng pasifanaˈ, minanam misaka dademak to Fangcalay Cudad (Nengnengen ko 4-6 fatac) *
4. Ano misikay to pacekiwan i, hano hamamiˈimer ko singsi no Fangcalay Cudad hani? (Nengnengen ko ilaenoay safanaˈ)
4 Tada maolahay kita to soˈlinay kimad no Fangcalay Cudad, mansa ano milengo to soˈlinay kimad i, awaay ko tolas a somowal. Kawra, ano misikay to Mikecolay anca kasakopang a picekiw, anca pacekiw to Fangcalay Cudad, cowa ka ngaˈay adihay ko sowal no misikayay. O hamamiˈimer ko singsi no Fangcalay Cudad, ano mitadtad to sinael anca cecay kalimlaan i, aka haemin han pasowal ko pacekiwan to kafanaˈan noniyah, mihaen ngaˈ ira ko toki misaka dademak to Fangcalay Cudad a pasifanaˈ to pacekiwan. * (Yohani 16:12) Itini picada ita to paputisem i, o taˈeneran aca no soˈlinay kimad ko kafanaˈan, kawra ikakaayto salakatay ko adihay no kafanaˈan ita a sifanaˈ no hatini. (Hipray 6:1) Adihayay ko mihadakan ita a toki mansa iraay ko hatiniay a sifanaˈ, mihaenay cowa ko haemin han ko kafanaˈan no niyah a pasowal to pacekiwan.
5. (1) Mikitini 1 Tisalonika 2:13, mitokelay kita cipinang ko pacekiwan to maanan hani? (2) Sasamaan kita pakalalok to pacekiwan mihadak to harateng no niyah hani?
5 Mitokelay kita cipinang ko pacekiwan, o mananamay ningra a kimad o mikitiniay i Fangcalay Cudad. (ˈOsien ko 1 Tisalonika 2:13.) Sasamaan ko hademak ita hani? Pakalaloken ko pacekiwan mihadak to harateng no niyah. Hamaan oniyah saan ko mitadtad to sinael, latekay papitadtaden ko pacekiwan. Padamaen ita ko pacekiwan mihapinang, samaan cingra misaka dademak to sinael. Saka dademaken ko salicay, papisowalen ko pacekiwan to kacipinang ato nafalocoˈan ningra pakayni i sinael. (Luka 10:25-28) Tinakoen, licayen ko pacekiwan: “Mikitini sinael mahapinangay iso ko maanan a capeling ni Yihofa?” “Oniya sinael samaan padama tisowanan?” “Pakayni mananamay iso a lalakaw samanay ko harateng iso?” (Taneng 20:5) Sakakaay i, cowa ko hakowaay ko sifanaˈ no pacekiwan, ao hakowaay ko kaolah ningra toniya sifanaˈ, ato ngangaˈay saka dademaken ko mananamay no niyah hokira.
6. Mitahidang to adihayay ko nalifetan a mitosilay malacafay kitanan misikay to pacekiwan wa ira ko maanan a epoc?
6 Ngaˈayay tahidangen iso ko iraay ko nalifetan a mitosilay mirienang to kalalengo, dotoc papisowalen samanay ko pisikay iso, ato misaka dademakay to Fangcalay Cudad a pasifanaˈ hokira. Makalim kiso malo ngaˈayay a singsi, kalimlaan ko misapoeneray. (Nengnengen ko Dmak 18:24-26.) Roma i, ngaˈayay licayen ko adihayay ko nalifetan a mitosilay, o pihapinang ningra, cipinangay ko pacekiwan to mananamay a lalakaw hokira. Ano awa kiso to cecay anca tosa lipay, ngaˈayay tahidangen koniya matenesay a salikaka patado kisowanan a pacekiw. Mihaen, caka lawa no pacekiwan ko pinanam, mafanaˈ to kalimlaan ko pinanam. O “mako” a pacekiwan konini, cowa ka ngaˈay ko tao a misikay aka mahaen ko harateng. Patado kiso to pacekiwan miharateng, wa padotoc cingra a macakat, minanam to adihayay a kimad no Fangcalay Cudad.
TANEKTEK KO PAKASOˈLIN, FANEKFEK KO HARATENG
Paladaˈen ko pacekiwan to nalifetan no tao, padama to pacekiwan minanam misaka dademak to safalod no Fangcalay Cudad (Nengnengen ko 7-9 fatac) *
7. Sasamaan padama to pacekiwan mihapinang to ciepocay ko minanaman ningra?
7 Mahapinang no pacekiwan to pakasoˈlinay ato maolahay kiso to soˈlinay kimad, wa matemer ko falocoˈ, miharateng to ciepocay ko minanam no niyah. (1 Tisalonika 1:5) Alatek ngaˈayay pasowalen iso ko pacekiwan, misaka daemak to safalod no Fangcalay Cudad samanay misalof to kaˈorip iso, mihaen o mamahapinang ningra wa ira ko sapadama no Fangcalay Cudad cingranan.
8. Wa ngaˈayho kiso midemak to maanan padama to pacekiwan? Mihaen to demak wa ira ko maanan a epoc?
8 Ano misikay pacekiw i, ngaˈayay pasowalen iso o roma salikaka samanay miremo to malecaday a pasangaray. O pacekiwan iso ano mikitini taˈarawan no salikaka micada to sapakalalok, ngaˈayay tahidangen iso cingra mirienang to kalalengo namo. Ngaˈayho kiso itini jw.org a wangcan “Minanam to Fangcalay Cudad a Mafalic ko Nokaˈorip” a lalakaw mikilim to nalifetan no tamdaw. * O mahaenay a lalakaw ato ika ngaˈayay padama to pacekiwan mihapinang, misaka dademak to safalod no Fangcalay Cudad wa ngaˈay misalof to kaˈorip no niyah.
9. Sasamaan pakalalok to pacekiwana paladaˈ to mananamay a sifanaˈ i paro no lomaˈ ato widang hani?
9 Ano ciramodayto ko pacekiwan iso, minanamay ko ramod ningra to Fangcalay Cudad hokira? Ano cowaho, ngaˈayay tahidangen iso ko ramod ningra mirienang to kalalengo namo. Pakalaloken ko pacekiwan paladaˈ to mananamay a sifanaˈ i paro no lomaˈ ato widang. (Yohani 1:40-45) Ngaˈayay licayen iso cingra: “Wa samaan kiso pasayra i paro no lomaˈ mitadtad tonini hani?” Anca licayen cingra: “Wa saka dademaken iso ko maanan a sinael pasayra i widang mitadtad toniya kimad hani?” Mihaen, wa ngaˈay padama to pacekiwan misaday a pasifanaˈ to kimad no Fangcalay Cudad i tao. Ano irato ko tatodong ningra, wa ngaˈayto malo cowaho picada to paputisen a mitosilay, malacafay to salikaka i kasakopang a mitosil. Ngaˈayay licayen ko pacekiwan, itini kafanaˈan ningra a tamdaw, iraay ko makalimay minanam to Fangcalay Cudad hokira. Ano iraay i, ngaˈayay milimasmas masasoˈaraw tora tamdaw, mihaen ngaˈayay paˈarawen iso ko kamotoˈay ika Misamaan Kiso Minanam to Fangcalay Cudad? *
PAKALALOK TO PACEKIWAN MALAWIDANG TO SALIKAKA
Pakalaloken ko pacekiwan malawidang to salikaka (Nengnengen ko 10-11 fatac) *
10. Pakayni 1 Tisalonika 2:7, 8, o pacekiway a tamdaw wa pasayra ci Pawloan minanam to maanan hani?
10 Mikifalocoˈ a ciharateng ko singsi to pacekiwan, o salikaka noikor hanko pinengneng cangranan. (ˈOsien ko 1 Tisalonika 2:7, 8.) Sapidokoaw ko pacekiwan ci Yihofaan, wa misawad micawmaˈ to cowa ka olah ci Yihofaan a tamdaw, adihayho ko fafalicen i nokaˈorip, cowa ko madoloay konini, mihaenay padamaen ita cangra mikilim to soˈlinay widang i kasakopang. Cowa ko pasifanaˈ aca no singsi minanam to Fangcalay Cudad, kilimenho ko toki macacawmaˈ cingranan, malo widang ningra. Patingwaen, pasadaken ko lihaf, anca itini cowa ko kalalengoan a toki minengneng to pacekiwan, o mamatinako ningra ko kaciharateng ita.
11. Mitokelay kita padama to pacekiwan misamaan ko demak? Misamanay?
11 Iraay ko cecay sowal: “Palahad to wawa misaaliay to sadama no polong a niyaroˈ.” Malecaday, ngaˈayay mihaen ko sowal ita: “Padama to cecay tamdaw malo Krisciyang misaaliay to pisaˈicel no kasakopang.” Mihaenay, o ngaˈayay singsi no Fangcalay Cudad wa misiwkay to pacekiwan mafanaˈ to salikaka i kasakopang, ira ko toki no pacekiwan micawmaˈ to salikaka. Wa ngaˈay padama ko salikaka to pacekiwan matongal ko piingid ci Yihofaan, ano tahalifa ko pacekiwan to pasangaray i mihinom cingranan. Tokel ita nanay o masalalomaˈay no kasakopang saan ko harateng no pacekiwan, malecad o masalalomaˈay no paro no lomaˈ no Krisciyang ko niyah. Ano matinako no pacekiwan ko olah no salikaka ita, o makelecay ko kalalaˈed to kasakopang, wa madoloto misawad micawmaˈ to cowa ka olah ci Yihofaan a tamdaw. (Taneng 13:20) Mafanaˈ ko pacekiwan to ngangaˈay mahela ko soˈlinay widang i likakawa ni Yihofa, cowato ko mamatalaw misawad to salakatay a widang.—Marko 10:29, 30; 1 Pitiro 4:4.
SAˈICELEN KO PATOSOKAN PATAFANG TO TIRENG MICADA TO PAPUTISEM
Ngaˈayay palidlid saan ko pacekiwan malaˈosi ko patosokan micada to paputisem (Nengnengen ko 12-13 fatac)
12. Hano ceriden milengo ko pacekiwan kalimlaan ko patafang to tireng micada to paputisem hani?
12 Ceriden ita milengo ko pacekiwan kalimlaan ko patafang to tireng micada to paputisem, samanen o araaw ita pacekiw, o papadama to tamdaw micada to paputisem malo Krisciyang. Ano pinaayto a folad minanam ko pacekiwan, mangalef ano misatapangayto cingra mirienang to saˈopo, maedeng cipinangayto araaw no pilengo to Fangcalay Cudad o papadama cingranan micada to paputisem malo Misawacayay Tamdaw ni Yihofa.
13. Ano madangar no pacekiwan ko maanan a demakan, wa matoorto ko patosokan micada to paputisem?
13 Ano madangar no pacekiwan ko laenoay pina demak, matoorto ko patosokan micada to paputisem. Salakat, mafanaˈ cingra ci Yihofaan, palahad to olah ato pakasoˈlin ci Yihofaan. (Yohani 3:16; 17:3) Ikor, wa padotoc cingra miingid ci Yihofaan, hanaca malawidang to salikaka i kasakopang. (Hipray 10:24, 25; Yakop 4:8) Dotoc, papasasiyor cingra to raraw no niyah, ecato pidemak to tatiihay demak. (Dmak 3:19) O mamifanaˈho cingra to pakasoˈlinan noniyah a kimad i roma tamdaw. (2 Korinto 4:13) Saikor, patafang cingta to tireng ci Yihofaan, hanaca micada to paputisem. (1 Pitiro 3:21; 4:2) Palidlid sa macakat ko pacekiwan, malaˈosi ningra ko cecay patosokan, mikifalocoˈ ko singsi a pakahemek cingranan, pakalalok cingranan. Tiya micada cingra to paputisem i, wa lipahak ko polong a kasakopang!
MICERID MIHAPINANG TO PAKAYRAAN NO PACEKIWAN
14. O mamihapinang ko singsi to maanan hani?
14 Sapadamaaw to pacekiwan patafang to tireng ato micada to paputisem, misaaliay kita to mihadidiay falocoˈ, kawra mamihapinang kita, soˈlinay makalim ko pacekiwan midoko ci Yihofaan hokira. Misaˈicelay ko pacekiwan midofdof to limoˈot ni Yis han? Anca o sapinanamaw aca to sifanaˈ no Fangcalay Cudad han?
15. Sapilomalaw to kacakat no pacekiwan, ngaˈayay miharateng ko singsi to maanan a salicay?
15 Ngaˈayay haratengen no singsi ko laenoay salicay, micerid a milomal to kacakat no pacekiwan. Paihkalay ko pacekiwan to olah ci Yihofaan han? Pasayraay cingra ci Yihofaan a mitolon han? (ˈOlic 116:1, 2) Maolahay cingra miasip to Fangcalay Cudad han? (ˈOlic 119:97) Miceriday cingra mirienang to saˈopo han? (ˈOlic 22:22) Mitooran ningra ko mananamay sifanaˈ no Fangcalay Cudad a mifalic to kaˈorip han? (ˈOlic 119:112) Paladaˈan ningra i widang ko mananamay no niyah a soˈlinay kimad han? (ˈOlic 9:1) Sakakaay i, makalimay cingra malo Misawacayay Tamdaw ni Yihofa han? (ˈOlic 40:8) Itini toniya pina pakayraan ano cowa kacakat ko pacekiwan, kilimen no singsi ko lalangian, ikor damsay mikifalocoˈ a masasowal cingranan. *
16. Hacowa misaˈosi to papaselaˈen ko cecay pacekiwan hani?
16 Wa micerid milomal ko singsi miharateng to laenoay salicay, misaˈosi to papaselaˈen ko cecay pacekiwan. ‘Marariday eca pisaday to lalakaw ko pacekiwan han? Cowa ka ciharateng cingra mirienang to saˈopo han? Iraayho ko tatiihay a nanaman ningra han? Kamayanho mirienang cingra to mararaway pihakelongan han?’ O pacekiwan ano iraay ko pasangaray toniya pina salicay, padotoc kita pasifanaˈ cingranan to Fangcalay Cudad, malecaday o pasifanaˈay to cowa kakahi tayra i nanom a tamdaw minanam a midangoy. Ano eca pisaareteng ko pacekiwan to minanaman ningra a kimad, eca kakahi a mifalic, hano padotocenho a pasifanaˈ cingra to Fangcalay Cudad hani?
17. Ano mitoor kita to limoˈot i 1 Timoti 4:16 i, ka pinaˈon to niyah ato pipasifanaˈ no niyah, wa sasamaan ko demak hani?
17 Pasifanaˈ to tamdaw malo Krisciyang o taˈangayay a ˈinorong, makalimay kita padama to pacekiwan malaˈosi ko patosokan micada to paputisem, mihaenay ano pasifanaˈ to pacekiwan i micerid misaka dademak to Fangcalay Cudad, paihkalho to fanekfekay ato pakasoˈlin, pakalaloken ko pacekiwan mikilim to ngaˈayay widang i kasakopang. Wa miceridho misaˈicel to patosokan micada to paputisem, hanaca micerid milomal to pakayraan no pacekiwan. (Nengnengen ko sapatongal lalakaw “ Pakayni Sapadamaaw to Pacekiwan Micada to Paputisem, Sasamaan ko Demak no Singsi?”) Ira ko toki mirienang to milidongay to tamdaw a mitosilay tayal, tada mahemekay kita! Nanay misetek kita to falocoˈ, misarocod a padama to pacekiwan macakat, malaˈosi ko patosokan micada to paputisem.
RADIW 139 Padamaen Cangra Tanektek i Kimad
^ 5段 Malo singsi no Fangcalay Cudad, iraay ko tatodong ita padama to tao tano kahemekan ni Yihofa a pakayraan misimsim, mitinako ato dademak. Oniya lalakaw wa pakalingad a milengo sasamaan kita misalof to inaneng no niyah a pasifanaˈ.
^ 4段 Nengnengen ko 2016 miheca 9 folad Rayray no Saˈopo a lalakaw “Misikay to Pacekiwan Aka Pidemak to Maanan?”
^ 8段 Keniˈen ko PAKAYNIYAY TAMIYANAN > NALIFETAN NO MISAWACAYAY TAMDAW NI YIHOFA.
^ 9段 Itini JW Library® (app) keniˈen LALAKAW NO IKA > SAˈOPO NO KRISCIYANG ATO MITOSILAY > MILINGATAY TO MITOSILAY A IKA
^ 15段 Nengnengen ko Mikecolay 2020 miheca 3 folad “O Kaolah ci Yihofaan Micolohay to Tamdaw Micada to Paputisem” ato “Maharekayto Kiso Misaday Micada to Paputisem Han?” tosa lalakaw.
^ 77段 TATODONG NO COKA: Maharek ko pipacekiw, iraay ko nalifetan a salikaka pasowalay to misikayay a salikaka samaan ngaˈ caka adihay ko sowal.
^ 79段 TATODONG NO COKA: O pacekiwan itini picekiw mananamay sasamaan malo ngaˈayay a fafahi, ikor paladaˈan ningra ko faˈinay to mananamay no niyah a lalakaw.
^ 81段 TATODONG NO COKA: Itini kasaˈopoan mafanaˈay ko pacekiwan to cecay salikaka, ikor malacafayay cingra to faˈinay tayra i lomaˈ no salikaka a micawmaˈ.
