LIKE SUANLƐ 42
?Wafa sɛ yɛ e kwla uka Biblu’n nun like suanfuɛ mun naan b’a yo be batɛmun-ɔn?: I bue nɲɔn su’n
“Nian ɔ bɔbɔ ɔ wun su kpa, yɛ fa ɔ ɲin sie like nga a kle’n su kpa.”—1 TIM. 4:16.
JUE 77 Kannin kun kpaja mɛn’n nun
I SU FITILƐ *
1. ?Ngue ti yɛ e se kɛ sran’m be like klelɛ naan be kaci Zezi i sɔnnzɔnfuɛ’n ti junman kun m’ɔ man nguan-ɔn?
SRAN’M be like klelɛ naan be kaci Zezi i sɔnnzɔnfuɛ’n ti junman kun m’ɔ man nguan-ɔn. ?Ngue ti yɛ e se sɔ-ɔ? Kɛ Zezi kán ndɛ ng’ɔ o Matie 28:19, 20 nun’n, ɔ seli kɛ: “Amun wɔ, amun yo maan [...] be kaci min sɔnnzɔnfuɛ. Amun yo be batɛmun.” ?Ngue ti yɛ batɛmun yolɛ’n ti cinnjin-ɔn? Ɔ ti cinnjin afin sɛ e kunndɛ kɛ é ɲán nguan m’ɔ leman awieliɛ’n ɔ fata kɛ be yo e batɛmun. Sɛ sran kun waan be yo i batɛmun’n ɔ fata kɛ ɔ lafi su kɛ Zezi i wie’n nin i cɛnlɛ’n be ti yɛ ɔ kwla ɲan nguan m’ɔ leman awieliɛ’n niɔn. I sɔ’n ti’n, akoto Piɛli seli i niaan Klisifuɛ’m be kɛ: ‘Batɛmun yolɛ’n [...] ɔ de amun wie andɛ Zezi Klisi m’ɔ cɛnnin nguan’n ti.’ (1 Piɛ. 3:21) Ɔ maan kɛ be yo sran kun i batɛmun’n ɔ kwla lafi su kɛ ɔ́ ɲán nguan m’ɔ leman awieliɛ’n.
2. ?Ngue yɛ 2 Timote 4:1, 2 wla e fanngan kɛ e yo naan y’a yo like klefuɛ kpa-ɔ?
2 Sɛ e waan é klé sran’m be like naan be kaci Zezi i sɔnnzɔnfuɛ’n ɔ fata kɛ e yo sran ‘m’ɔ si like kle-ɔ.’ (An kanngan 2 Timote 4:1, 2 nun.) ?Ngue ti yɛ e se sɔ-ɔ? Afin Zezi seli kɛ: “Amun yo maan [...] be kaci min sɔnnzɔnfuɛ. Like kwlaa nga n seli amun kɛ amun yo’n, amun kle be naan be kusu be nian su be yo wie.” Akoto Pɔlu kusu seli kɛ e “fa ninnge sɔ’m be yolɛ’n” e cici e ti. Afin sɛ e yo sɔ’n ‘é dé e bɔbɔ e wun, yɛ é dé be nga be ti e ndɛ’n.’ Kɛ mɔ i sɔ’n ti cinnjin dan’n ti’n, ɔ kan guali su kɛ e ‘nian [...] like nga e kle’n su kpa.’ (1 Tim. 4:16) Sɛ e kunndɛ kɛ é klé sran’m be like naan be kaci Zezi i sɔnnzɔnfuɛ’n, ɔ fata kɛ e kle be like kpa.
3. ?Ngue yɛ é wá kɛ́n i ndɛ like suanlɛ nga nun-ɔn?
3 Mɛn wunmuan’n nun’n, e kle sran miliɔn kpanngban be Biblu’n nun like. Like suanlɛ ng’ɔ sinnin lɛ’n nun’n, e kannin wafa nga e kwla uka be nun kaka kpa naan b’a yo be batɛmun naan b’a kaci Zezi Klisi i sɔnnzɔnfuɛ’n, i ndɛ. Like suanlɛ nga nun’n, é wá kán ninnge nnun mɔ be kwla uka like klefuɛ kun naan w’a uka like suanfuɛ kun naan w’a wɔ i ɲrun naan b’a yo i batɛmun’n, be ndɛ.
KƐ É KLÉ SRAN’M BE LIKE’N MAAN E FA BIBLU’N E DI JUNMAN
Maan e se aniaan kun m’ɔ si sran’m be like kle kpa’n kɛ ɔ kle e wafa nga e kwla fa Biblu’n e di junman kpa tra laa’n. (An nian ndɛ kpɔlɛ 4-6 be nun.) *
4. ?Kɛ like klefuɛ kun klé sran kun i like’n ngue ti yɛ ɔ fata kɛ ɔ niɛn i wun su naan w’a ijɔman dan-ɔn? (An nian ja ngua lɔ ndɛ’n.)
4 Kɛ e kan Ɲanmiɛn ndɛ’n e kle sran mun’n, i sɔ’n yo e fɛ dan. Ɔ maan sɛ y’a nianman e wun su blɛ sɔ’n nun’n, e kwla ijɔ kaka. I sɔ’n ti’n, sɛ e su tinngɛ Sasafuɛ Tranwlɛ’n i nun like suanlɛ’n annzɛ Asɔnun’n i Biblu’n nun like suanlɛ’n, annzɛ sɛ e su kle sran kun i like’n, ɔ fataman kɛ e ijɔ kaka. Kɛ ɔ ko yo naan like klefuɛ’n w’a fa Biblu’n w’a di junman kpa blɛ sɔ’n nun’n, ɔ fata kɛ ɔ trɛ i awlɛn naan w’a kanman ndɛ’n i ngbɛsungbɛsu’n kwlaa. * (Zan 16:12) Kɛ ɔ ko yo naan y’a kwla tra e awlɛn blɛ sɔ’n nun’n, maan e fa Biblu’n nun ndɛ nga i nun mɔ bé yó e batɛmun’n e si be’n, e sunnzun ninnge nga e si be dɔ nga su’n e nian. I bo bolɛ nun’n e siman ninnge kpanngban. (Ebr. 6:1) Kusu e dili afuɛ kaka kwla naan y’a si ninnge nga e si be andɛ’n. Ɔ maan kɛ é klé sran kun i like’n, ɔ fataman kɛ e kan ndɛ kwlaa nga e si i’n e kle i.
5. (1) ?Kɛ nga 1 Tesalonikifuɛ Mun 2:13 fa kan’n sa’n, ngue yɛ e kunndɛ kɛ like suanfuɛ’n wun i wlɛ-ɔ? (2) ?Wafa sɛ yɛ e kwla wla like suanfuɛ’n i fanngan kɛ ɔ kan like ng’ɔ suan’n i ndɛ kle sran mun-ɔn?
5 E kunndɛ kɛ sran nga e kle i like’n, ɔ wun i wlɛ kɛ like nga e kle i’n ɔ fin Biblu’n nun. (An kanngan 1 Tesalonikifuɛ Mun 2:13 nun.) ?Wafa sɛ yɛ e kwla yo sɔ-ɔ? Maan e wla like suanfuɛ’n i fanngan naan ɔ kan ninnge ng’ɔ suan be’n be ndɛ kle sran mun. Ɔ fataman kɛ e yiyi Biblu’n nun ndɛ mma’m be nun e kle i titi. Sanngɛ wie liɛ’n e se i kɛ i bɔbɔ yiyi nun naan e nian. Maan e uka like suanfuɛ’n naan ɔ wun wafa ng’ɔ kwla nanti Ɲanmiɛn Ndɛ’n su’n i wlɛ. Maan e usɛ i kosan wie mɔ be kwla ukɛ i naan w’a kan wafa ng’ɔ bu Biblu’n nun ndɛ mma wie m’ɔ kanngannin be nun’n, ɔ nin wafa nga i sɔ liɛ’n yoli i’n, be ndɛ. (Lik. 10:25-28) I wie yɛle kɛ e kwla usɛ i kɛ: “?Zoova i nzuɛn benin yɛ ndɛ mma nga ukali wɔ naan w’a si i-ɔ?” “?Wafa sɛ yɛ like nga w’a suɛn i Biblu’n nun yɛ’n kwla uka wɔ-ɔ?” “?A bu like nga a fin i suanlɛ yɛ’n sɛ?” (Nya. 20:5) Nán ninnge kpanngban nga like suanfuɛ’n si i’n yɛ ɔ ti cinnjin-ɔn. Sanngɛ like ng’ɔ si i’n, i klolɛ’n nin i su nantilɛ’n yɛ be ti cinnjin-ɔn.
6. ?Ngue ti yɛ kɛ é kɔ́ sran kun i like klelɛ’n, sɛ e nin aniaan kun m’ɔ si sran’m be like kle kpa yɛ e kɔ’n ɔ ti kpa-ɔ?
6 Wie liɛ’n, kɛ é kɔ́ sran kun i like klelɛ’n maan e nin aniaan kun m’ɔ si sran like kle kpa’n e wɔ. Kɛ e ko wie sran’n i like kle’n, maan e usa aniaan’n naan ɔ kan wafa nga e kleli sran’n i like’n nin wafa nga e fali Biblu’n e dili junman’n i su ndɛ kle e. Sɛ e waan é sí sran’m be like kle’n ɔ fata kɛ e yo wun ase kanfuɛ. (An nian Sa Nga Be Yoli’n 18:24-26 nun.) Asa ekun’n, e kwla usa aniaan sɔ’n sɛ Biblu’n nun like suanfuɛ’n wun like nga e kle i’n i wlɛ-o. Asa’n e kwla se aniaan sɔ’n kɛ sɛ e nunman lɛ’n, ɔ kle sran’n i like. I sɔ’n yó maan like suanfuɛ’n súan like titi, yɛ ɔ́ wún i wlɛ kɛ like suanlɛ’n ti cinnjin. Nán e se e wun le kɛ sran nga e kle i like’n, ɔ ti “e sran” naan ɔ fataman kɛ sran uflɛ kle i like wie. Afin like nga e kunndɛ’n yɛle kɛ like suanfuɛ’n wɔ i ɲrun titi.
MAAN E KLE KƐ E KLO LIKE NGA E KLE’N YƐ E LAFI SU
Kɛ ɔ ko yo naan Biblu’n nun like suanfuɛ’n w’a wun i wlɛ kɛ Biblu’n nun mmla’m be su nantilɛ’n ti kpa’n, maan e kan aniaan wie’m be su ndɛ’n e kle i. (An nian ndɛ kpɔlɛ 7-9 be nun.) *
7. ?Ngue yɛ ɔ kwla uka like suanfuɛ kun naan w’a klo like ng’ɔ suan’n niɔn?
7 Ɔ fata kɛ like suanfuɛ’n wun i wlɛ kɛ e lafi ndɛ nanwlɛ m’ɔ o Biblu’n nun’n i su naan e klo ndɛ sɔ’n. (1 Tes. 1:5) Sɛ e yo sɔ’n, i kusu kwla klo like ng’ɔ suan’n wie. I wie yɛle kɛ e kwla kan wafa nga Biblu’n ukali e sa wie’m be nun’n i ndɛ e kle i. Sɛ e yo sɔ’n like suanfuɛ’n wún i wlɛ kɛ Biblu’n kwla ukɛ i wie.
8. (1) ?Ngue ekun yɛ e kwla yo fa uka like suanfuɛ kun-ɔn? (2) ?Yɛ ngue ti yɛ ɔ fata kɛ e yo sɔ-ɔ?
8 Sɛ e kle sran kun i like naan sa wie o i su’n, naan sa sɔ’n i wunsu w’a tɔ aniaan wie’m be su le’n, maan e kan wafa nga be jrannin sa sɔ’m be ɲrun kekle’n i ndɛ e kle i. Kɛ é kɔ́ sran’n i like klelɛ’n, maan e nin aniaan kun mɔ i ajalɛ’n kwla uka like suanfuɛ’n e wɔ. Annzɛ e kwla kan aniaan wie mɔ Biblu’n maan be kacili be nzuɛn mɔ be kannin be ndɛ jw.org su’n, be nun wie’m be ndɛ e kle like suanfuɛ’n. * Ndɛ sɔ mun nin video wie’m be kwla ukɛ i naan w’a wun i wlɛ kɛ Biblu’n nun mmla’m be su nantilɛ’n ti kpa dan.
9. ?Wafa sɛ yɛ e kwla wla like suanfuɛ kun i fanngan kɛ ɔ kan like ng’ɔ suan’n i ndɛ kle i osufuɛ mun nin i janvuɛ mun-ɔn?
9 Sɛ sran nga e kle i like’n ɔ le bla annzɛ bian’n naan ɔ suanman like’n wie’n, maan e yiɛ i Biblu’n nun like suanlɛ’n i bo. Maan e wla like suanfuɛ’n i fanngan naan ɔ kan like ng’ɔ suan’n, i ndɛ kle i osufuɛ mun nin i janvuɛ mun. (Zan 1:40-45) I lɛ nun’n, e kwla usɛ i kɛ: “?Wafa sɛ yɛ a kwla yiyi ndɛ nga nun kle ɔ awlobofuɛ mun-ɔn?” annzɛ “?Wafa sɛ yɛ a kwla fa Biblu’n nun ndɛ mma nga yiyi ndɛ nga nun kle ɔ janvuɛ kun-ɔn?” Sɛ e yo sɔ’n, é úka like suanfuɛ’n naan i kusu w’a si sran’m be like kle wie. I sɔ’n úkɛ i naan w’a kaci jasin bofuɛ nga be nin-a yomɛn i batɛmun’n. E kwla usa like suanfuɛ’n sɛ ɔ si sran kun m’ɔ kunndɛ kɛ ɔ́ súan Biblu’n nun like wie-o. Sɛ ɔ se kɛ ɛɛn’n, maan e wun sran sɔ’n i wun naan e se i kɛ e kunndɛ kɛ é klé i like. Kpɛkun e bo video nga be flɛ i kɛ ?Wafa sɛ yɛ e kle sran’m be biblu’n nun like ɔ? * e kle i.
MAAN E WLA LIKE SUANFUƐ’N I FANNGAN KƐ Ɔ TRA JANVUƐ ASƆNUN’N NUN
Maan e wla like suanfuɛ’n i fanngan kɛ ɔ tra janvuɛ asɔnun’n nun. (An nian ndɛ kpɔlɛ 10-11 be nun.) *
10. ?Kɛ nga 1 Tesalonikifuɛ Mun 2:7, 8 fa kan’n sa’n, wafa sɛ yɛ like klefuɛ kun kwla nian Pɔlu i ajalɛ’n su-ɔ?
10 Maan like klefuɛ’m be kle be nga be kle be like’n kɛ be ndɛ lo be. Yɛ be se be wun kɛ sran sɔ’m be kwla kaci e niaan Klisifuɛ cɛn kun. (An kanngan 1 Tesalonikifuɛ Mun 2:7, 8 nun.) Kɛ ɔ ko yo naan b’a kwla su Zoova kpa’n be kpɔcili be janvuɛ nga be trali be mɛn’n nun lɔ’n kpɛkun be miannin be ɲin be kacili be sa ninnge wie’m be yolɛ nun. I sɔ yolɛ’n kusu w’a yoman pɔpɔ. I sɔ’n ti’n maan e uka be naan be ɲan janvuɛ asɔnun’n nun. Kpɛkun maan e nin like suanfuɛ’n e tra janvuɛ. Yɛle kɛ nán e ka Biblu’n nun like suanlɛ’n su ngunmin. Sanngɛ e nin i e yo ninnge wie mun likawlɛ. I sɔ yolɛ nun’n, e kwla flɛ i annzɛ e klɛ ndɛ e ko mɛn i annzɛ e ko niɛn i osu. I liɛ’n, ɔ́ wún i wlɛ kɛ i ndɛ lo e sakpa.
11. (1) ?Ngue yɛ e kunndɛ kɛ like suanfuɛ’m be ɲɛn i asɔnun’n nun-ɔn? (2) ?Ngue ti-ɔ?
11 Be bu be ɲanndra kun kɛ: “Kɛ be wu ba kun’n, klɔ wunmuan’n yɛ ɔ tɛ i-ɔ.” E liɛ’n, é sé kɛ “aniaan’m be kwlaa be dunman nun ti yɛ sran kun kwla kaci Zezi i sɔnnzɔnfuɛ-ɔ.” Ɔ maan aniaan nga be si sran’m be like kle kpa’n, be yo maan like suanfuɛ’m be si aniaan onga’m be kpa. Afin aniaan sɔ’m be kwla uka be naan b’a fa be wun b’a mantan Zoova naan b’a kaci i janvuɛ wie. Asa ekun’n, sɛ sa wie o be su’n aniaan sɔ’m be kwla uka be. I kwlaa sɔ’n ti’n, e kunndɛ kɛ like suanfuɛ’m be wun kpaja be asɔnun’n nun naan be wun i wlɛ kɛ e ti awlobo kunngba nunfuɛ. Asa’n e kunndɛ kɛ be fa be wun be mantan aniaan’m be kpa. I sɔ’n yó maan ɔ nin be nga be kwlá ukaman be naan b’a klo Zoova’n b’a sanman nun kun. (Nya. 13:20) Asa ekun’n, sɛ i janvuɛ laa’m be kpɔci i’n, ɔ kwla lafi su kɛ ɔ́ ɲán janvuɛ kpanngban Zoova i anuannzɛ’n nun.—Mar. 10:29, 30; 1 Piɛ. 4:4.
MAAN E KAN BE WUN ƝANMIƐN FA MANLƐ’N Ɔ NIN BATƐMUN’N YOLƐ’N BE NDƐ E KLE LIKE SUANFUƐ’N
Blɛblɛblɛ like suanfuɛ nga i awlɛn ti kpa’n ɔ́ kɔ́ i ɲrun lele bé yó i batɛmun. (An nian ndɛ kpɔlɛ 12-13 be nun.)
12. ?Ngue ti yɛ ɔ fata kɛ e kan be wun Ɲanmiɛn fa manlɛ’n nin batɛmun yolɛ’n be ndɛ e kle like suanfuɛ’n niɔn?
12 Maan e kan like nga ti yɛ ɔ ti cinnjin kɛ sran kun fɛ i wun man Ɲanmiɛn naan be yo i batɛmun’n i ndɛ e kle like suanfuɛ’n. Afin like nga ti yɛ e kle sran’m be Biblu’n nun like’n, yɛle kɛ e kunndɛ kɛ é úka be naan be yo be batɛmun naan be su Zoova wie. Kɛ like suanfuɛ’n wá súan like kɔ́ i ɲrun’n m’ɔ́ wá bó aɲia’m be kɔlɛ bo’n, ɔ́ wún i wlɛ kɛ like nga ti yɛ e kle i like’n yɛle kɛ e kunndɛ kɛ ɔ kaci Zoova i Lalofuɛ.
13. ?Ngue yɛ ɔ fata kɛ like suanfuɛ kun yo ka naan b’a yo i batɛmun-ɔn?
13 Ninnge sunman o lɛ m’ɔ fata kɛ like suanfuɛ kun yo ka naan b’a yo i batɛmun-ɔn. I bo bolɛ nun’n, ɔ fata kɛ like suanfuɛ’n si Zoova, ɔ klo i yɛ ɔ lafi i su. (Zan 3:16; 17:3) I sin’n, ɔ kaci Zoova nin aniaan’m be janvuɛ. (Ebr. 10:24, 25; Zak. 4:8) Kpɛkun i ayeliɛ tɛtɛ’m be yo i nsisɔ yɛ ɔ wla be ase. (Yol. 3:19) Asa ekun’n, ɔ kan like ng’ɔ lafi su siɛn’n i ndɛ kle sran mun. (2 Kor. 4:13) Kpɛkun i agualiɛ su’n, ɔ fɛ i wun man Zoova naan be yo i batɛmun. (1 Piɛ. 3:21; 4:2) Nanwlɛ, cɛn sɔ’n nun’n aniaan’m be kwlaa be di aklunjuɛ. Ɔ maan kɛ like suanfuɛ’n yó ninnge kwlaa ng’ɔ fata kɛ ɔ yo naan b’a kwla yo i batɛmun’n, maan e yo i mo yɛ e wlɛ i fanngan titi kɛ ɔ wɔ i ɲrun.
MAAN E NIAN SƐ LIKE SUANFUƐ KƆ I ƝRUN-O
14. ?Ngue su yɛ like klefuɛ’n kwla fɛ i ɲin sie naan w’a wun i wlɛ kɛ like suanfuɛ’n kɔ i ɲrun-ɔn?
14 Kɛ é úka sran kun naan ɔ fɛ i wun man Ɲanmiɛn naan be yo i batɛmun’n, ɔ fata kɛ e tra e awlɛn. Sanngɛ blɛ wie nun’n, ɔ fata kɛ e wun i wlɛ sɛ like suanfuɛ’n kunndɛ kɛ ɔ́ sú Zoova sakpa-o. I sɔ yolɛ nun’n, e kwla usa e wun kɛ: ?Ngue yɛ ɔ kle kɛ like suanfuɛ’n kunndɛ kɛ ɔ́ nánti like nga Zezi kleli’n su-ɔ? ?Annzɛ ɔ kunndɛ kɛ ɔ́ súan Biblu’n nun like ngbɛn?
15. ?Ngue yɛ ɔ kwla uka like klefuɛ’n naan w’a wun i wlɛ kɛ like suanfuɛ’n kɔ i ɲrun-ɔn?
15 Maan e bu like ng’ɔ kle kɛ like suanfuɛ’n kɔ i ɲrun’n i akunndan tikatika. I sɔ yolɛ nun’n e kwla usa e wun kɛ: ?Kɛ ɔ suan Zoova i su like’n wafa nga i wun yo i’n ɔ kɛn i ndɛ? ?Ɔ srɛ Zoova? (Jue. 116:1, 2) ?Ɔ klo Biblu’n nun kannganlɛ? (Jue. 119:97) ?Ɔ tran aɲia’m be kwlaa be bo? (Jue. 22:22) ?Ɔ nanti like ng’ɔ suan’n su? (Jue. 119:112) ?Ɔ kan like ng’ɔ suan’n i ndɛ kle i awlobofuɛ mun nin i janvuɛ mun? (Jue. 9:1) Sanngɛ kosan’m be nun cinnjin kpafuɛ’n yɛle kɛ: ?Ɔ kunndɛ kɛ ɔ́ káci Zoova i Lalofuɛ? (Jue. 40:8) Sɛ e sie i nzɔliɛ kɛ like suanfuɛ’n kɔmɛn i ɲrun’n, maan e mian e ɲin e si like ng’ɔ kle i yalɛ’n. I sin’n, maan e nin i e koko i sɔ’n su yalɛ amanniɛn yɛ e uka i. *
16. ?Blɛ benin nun yɛ ɔ fata kɛ e yaci sran kun i like klelɛ-ɔ?
16 Sɛ e kle sran kun i like’n ɔ fata kɛ blɛ wie nun’n e usa e wun sɛ é klé i like titi-o annzɛ é yáci i like klelɛ-o. I sɔ yolɛ nun’n, maan e usa e wun kɛ: ?Like suanfuɛ’n siesie i wun ka naan y’a kle i like? ?Ɔ klo aɲia’m be bo kɔlɛ? ?Ɔ wlɛli i nzuɛn tɛtɛ’m be ase? ?Ɔ te kɔ i asɔnun laa’n nun? Sɛ e tɛ kosan sɔ’m be su kɛ ɛɛn’n naan e te kle sran sɔ’n i like’n nn ɔ ti kɛ e waan e su kle sran kun i nzue wuɛlɛ sanngɛ ɔ kunndɛman kɛ ɔ luɛluɛ i wun’n sa. Sɛ sran nga e kle i like’n ɔ kloman like nga e kle i’n naan ɔ kunndɛman kɛ ɔ́ nánti like ng’ɔ suan’n su’n maan e yaci i like klelɛ.
17. ?Kɛ nga 1 Timote 4:16 fa kan’n sa’n, ngue yɛ ɔ fata kɛ Biblu’n nun like klefuɛ’m be kwlaa be yo-ɔ?
17 Sran’m be like klelɛ naan be kaci Zezi i sɔnnzɔnfuɛ’n ti junman cinnjin kpa kun. Ɔ maan e kunndɛ kɛ é úka be nga e kle be like’n naan be yo be batɛmun. I sɔ’n ti’n maan like kwlaa nga e kle be’n ɔ taka Biblu’n su. Yɛ e yi i nglo kɛ e klo like nga e kle be’n naan e lafi su. Asa ekun’n, e wla be fanngan kɛ be tra janvuɛ asɔnun’n nun. Kpɛkun e kan like nga ti yɛ ɔ ti cinnjin kɛ be fa be wun be man Zoova naan be yo be batɛmun’n i ndɛ e kle be. Asa’n, e nian sɛ like suanfuɛ’n kɔ i ɲrun-o. (An nian kuku nga be flɛ i kɛ, “ ?Ngue yɛ ɔ fata kɛ like klefuɛ kun yo naan w’a uka like suanfuɛ kun naan w’a ɔ i ɲrun-ɔn?” m’ɔ o fluwa’n i bue 13 su’n, i nun.) Nanwlɛ, kɛ e sa o junman m’ɔ man nguan’n i nun wie’n, i sɔ’n yo e fɛ dan. I sɔ’n ti’n, e kunndɛ kɛ é yó like kwlaa nga e kwla yo naan y’a uka Biblu’n nun like suanfuɛ mun naan b’a yo be batɛmun.
JUE 79 Uka be maan be jran kekle
^ ndɛ kpɔlɛ 5 Zoova mannin e junman cinnjin kpa kun. Yɛle kɛ e uka sran mun naan be bu akunndan yɛ be yo ninnge mun kɛ nga i bɔbɔ Zoova fa klo’n sa. Like suanlɛ nga nun’n, é wá kán wafa nga e kwla kle sran’m be like kpa tra laa’n i ndɛ.
^ ndɛ kpɔlɛ 4 An nian ndɛ akpasua nga be flɛ i kɛ “Kɛ á klé sran kun i Biblu’n nun like’n ninnge ng’ɔ fataman kɛ a yo’n” m’ɔ o afuɛ 2016 Sɛptanblu Klisifuɛ mun nin be junman’n Aɲia fluwa nun’n, i nun.
^ ndɛ kpɔlɛ 8 An wɔ jw.org su naan an tin E SU NDƐ > SRAN WIE’M BE WUN NDƐ su.
^ ndɛ kpɔlɛ 9 An wɔ JW Library®, su naan an tin MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION su.
^ ndɛ kpɔlɛ 15 An nian like suanlɛ nga be flɛ be kɛ “Sɛ a klo Zoova’n á kúnndɛ kɛ be yo ɔ batɛmun” ɔ nin “?W’a ju batɛmun yolɛ?” mɔ be fiteli afuɛ 2020 Marsi Sasafuɛ Tranwlɛ’n nun’n, i nun.
^ ndɛ kpɔlɛ 77 FOTO’M BE SU NDƐ’N: Aniaan bla kun w’a wie bla kun i like kle. I sin’n, aniaan bla kun m’ɔ si sran’m be like kle kpa’n, ɔ su kle aniaan bla’n like ng’ɔ kwla yo naan kɛ ɔ́ klé sran kun i like’n w’a ijɔman dan’n.
^ ndɛ kpɔlɛ 79 FOTO’M BE SU NDƐ’N: Kɛ aniaan bla’n klé bla’n i like’n, ɔ kannin wafa ng’ɔ kwla yo awlo bla kpa’n i ndɛ kleli i. I sin’n, like suanfuɛ’n su kan like ng’ɔ suannin’n i ndɛ klé i wun’n.
^ ndɛ kpɔlɛ 81 FOTO’M BE SU NDƐ’N: Bla’n nin i wun’n b’a wɔ aniaan kun m’ɔ wunnin i aɲia bo lɔ’n i awlo lɔ. Blɛ sɔ’n nun’n be di aklunjuɛ.
