ICIPANDE CA KUSAMBILILAMO 42
Ifyo Twingafwa Abasambi ba Baibolo pa kuti Balunduluke no Kubatishiwa—Ulubali 2
“Lyonse uleisakamana we mwine, ulesakamana ne fyo ulesambilisha.”—1 TIM. 4:16.
ULWIMBO 77 Ulubuuto mu Calo ca Mfifi
IFYO TWALASAMBILILA *
1. Twaishiba shani ukuti umulimo wa kulenga abantu baba abasambi mulimo wa kupususha abantu?
UMULIMO wa kulenga abantu baba abasambi mulimo wa kupususha abantu! Twaishiba shani? Ilyo Yesu apeele abasambi bakwe ifunde ilyalembwa pali Mateo 28:19, 20, atile: ‘Kabiyeni, kalengeni abasambi, mulebabatisha.’ Cinshi ukubatishiwa kwacindamina? Pa kuti umuntu akesepusuka alingile ukubatishiwa. Umuntu nga alefwaya ukubatishiwa alingile ukusumina ukuti icikalenga fye akabe no mweo wa muyayaya ni co Yesu alitufwilile kabili alibuushiwe. E mulandu wine umutumwa Petro aebele Abena Kristu banankwe ukuti: ‘Ulubatisho e lulemupususha nomba ukupitila mu kubuuka kwa kwa Yesu Kristu.’ (1 Pet. 3:21) Kanshi umusambi nga abatishiwa, kuti aba ne subilo lya kwisaikala umuyayaya.
2. Ukulingana ne lembo lya kwa 2 Timote 4:1, 2, bushe tulingile ukulasambilisha shani?
2 Pa kuti tulenge abantu ukuba abasambi, tulingile ukwishiba ifya “kusambilisha bwino.” (Belengeni 2 Timote 4:1, 2.) Cinshi twalandila ifi? Pantu Yesu atwebele ukuti: “Kabiyeni, kalengeni . . . abasambi, . . . mulebasambilisha.” Umutumwa Paulo alandile ukuti tufwile ‘ukwikalilila’ muli uyu mulimo, ‘pantu nga twacita ifi tukaipususha fwe bene na baletumfwa.’ Ici e calengele Paulo alande ukuti tulingile ‘ukulasakamana ifyo tulesambilisha.’ (1 Tim. 4:16) Apo ukusambilisha kwalyampana no kulenga abantu baba abasambi, tulafwaya ukulasambilisha bwino.
3. Finshi twalasambilila muli cino cipande?
3 Lyonse tulasambilisha abantu abengi nga nshi mwi sonde lyonse icine icaba mu Baibolo. Lelo nga fintu twasambilile mu cipande cafumineko, tulafwaya ukwishiba ifyo twingafwa abasambi abengi ukubatishiwa. Muli cino cipande twalasambilila pa fintu na fimbi 5 ifyo kasambilisha umo na umo alingile ukucita ifingalenga umusambi abatishiwa.
MULEBOMFYA BAIBOLO PA KUSAMBILISHA
Mule-ebako bakasabankanya abaishiba bwino ukusambilisha ukuti bamwafwe ukulabomfya sana Baibolo pa kusambilisha (Moneni paragrafu 4 ukushinta ku 6) *
4. Cinshi kasambilisha afwile ukulailamina ilyo aletungulula isambililo lya Baibolo? (Moneni na futunoti.)
4 Twalitemwa icine icaba mu Cebo ca kwa Lesa ico tusambilisha abantu. Kanshi nalimo kuti twalafwaya ukulanda ifingi ifyo twaishiba ifyaba mu Cebo ca kwa Lesa. E ico nampo nga tuletungulula Isambililo lya Ulupungu lwa kwa Kalinda, tuletungulula Isambililo lya Baibolo Ilya pa Cilonganino, nelyo nga tuletungulula isambililo lya Baibolo ku muntu, tatulingile ukulalandapo sana. Pa kuti kasambilisha alebomfya Icebo ca kwa Lesa pa kusambilisha alingile ukulailama. Kabili talingile ukulalondolola fyonse ifyo aishiba pe lembo nelyo pe lyashi limo ilya mu Baibolo. * (Yoh. 16:12) Tontonkanyeni pa fyo mwaishibe ilyo mwabatishiwe fye, e lyo ne fyo mwaishiba ukufika pali ino nshita. Ilyo mwabatishiwe nalimo mwaishibe fye amasambililo ya mu Baibolo aya kutendekelako. (Heb. 6:1) Palipita imyaka iingi pa kuti mwishibe fyonse ifyo mwaishiba ukufika pali ino nshita. Kanshi tamulingile ukulafwaya ukusambilisha umusambi ifintu ifingi pa muku umo.
5. (a) Nga fintu Baibolo ilanda pali 1 Abena Tesalonika 2:13, finshi tufwaya umusambi wa Baibolo aishiba ilyo tulemusambilisha? (b) Kuti twakoselesha shani umusambi wa Baibolo ukulalanda pa fyo alesambilila?
5 Tufwaya abasambi ba Baibolo baishiba ukuti ifyo tubasambilisha fifuma mu Cebo ca kwa Lesa icapuutwamo. (Belengeni 1 Abena Tesalonika 2:13.) Kuti twacita shani ifi? Tulingile ukulakoselesha umusambi wa Baibolo ukulalanda pa fyo alesambilila. Mu cifulo ca kuti lyonse mulelondolwela umusambi amalembo, inshita shimo kuti mwamweba ukuti amulondolwele. Muleafwa umusambi ukumona ukuti ifyo mulesambilila mu Baibolo nafimukuma. Muleipusha umusambi amepusho ayengalenga alondolola ifyo aleumfwa ne fyo aletontonkanya pa malembo abelenga. (Luka 10:25-28) Ku ca kumwenako, kuti mwamwipusha ukuti: “Mibele nshi imo pa mibele ya kwa Yehova iyo wamona pali ili ilembo?” “Bushe ifi wasambilila mu Baibolo kuti fyakwafwa shani?” “Bushe uleumfwa shani pali ifi wasambilila?” (Amapi. 20:5) Icacindama sana te bwingi bwa fyebo umusambi aishiba, lelo fintu atemwa ifyo alesambilila ne fyo engafibomfya.
6. Cinshi cingawamina ukuya na kasabankanya uwaishiba bwino ukusambilisha mu kutungulula isambililo lya Baibolo?
6 Bushe ilyo muleya mu kutungulula isambililo lya Baibolo mulasendako bakasabankanya abaishiba bwino ukusambilisha? Nga mulacita ifyo kuti mwabepusha ukumweba pa fyo bamona ifyo mutungulula isambililo na pa fyo mubomfya Baibolo pa kusambilisha. Mufwile ukuba abaicefya nga mulefwaya ukwishiba bwino ukusambilisha. (Linganyeniko Imilimo 18:24-26.) Pa numa mufwile ukweba kasabankanya uwaishiba sana ukusambilisha uo muya nankwe mu kutungulula isambililo lya Baibolo, ukuti amwebe ifyo alemona nga ca kuti umusambi alomfwa ifyo alesambilila. Kabili kuti mwaeba uyu wine kasabankanya ukuti akatungulule isambililo pa mulungu nelyo pa milungu iyo mushakabepo. Ici cikalenga umusambi akalesambilila lyonse kabili akeshibe ukuti ukusambilila Baibolo kwalicindama. Mwilamona kwati uo musambilisha Baibolo musambi fye wenu mweka kabili takuli bambi abafwile ukumusambilisha. Na kuba ico mufwaisha kulenga umusambi aishiba icine kabili alunduluka.
MULEBA ABASHININKISHA KABILI ABACINCIMUKA ILYO MULESAMBILISHA
Mule-ebako umusambi wa Baibolo pa fyo abantu bamo bacimfishe amafya pa kuti alemona ukutila amashinte ya mafunde ya mu Baibolo kuti yamwafwa (Moneni paragrafu 7 ukushinta ku 9) *
7. Finshi fingalenga umusambi atemwa ifyo alesambilila?
7 Umusambi afwile ukumona ukuti mwalitemwa ifyaba mu Baibolo kabili mwalishininkisha ukuti fya cine. (1 Tes. 1:5) Ukucita ifi kukalenga na o akatemwe ifyo alesambilila. Nalimo kuti mwamwebako ifyo amashinte ya mafunde ya mu Baibolo yamwafwa. Lyena na o wine akamona ukuti ifyaba mu Baibolo kuti fyamwafwa.
8. Ukulunda pa kusambilisha umusambi Baibolo finshi fimbi mwingacita, kabili cinshi mulingile ukucitila ifyo?
8 Ilyo mulesambilisha umusambi mulemwebako pa ba bwananyina bamo abakwete amafya ayapalana na yo akwete, na pa fyo bayacimfishe. Nalimo kuti mwaya no wa bwananyina umo mu cilonganino kwi sambililo uwacimfishe amafya ayapalana na ayo umusambi akwete. Nelyo kuti mwamulanga amalyashi yamo ayengamukoselesha ayaba pa cipande caba pa jw.org icitila “Baibolo Ilaalula Abantu.” * Amavidio e lyo ne fipande fya musango uyu kuti fyalenga umusambi aishiba ukuti ukulakonka amashinte ya mafunde ya mu Baibolo kuti kwamwafwa.
9. Finshi mwingacita pa kukoselesha umusambi ukulaebako balupwa lwakwe ne fibusa pa fyo alesambilila?
9 Nga ca kuti abo musambilisha Baibolo balyupa nelyo balyupwa, bushe abena mwabo nabo balasambilila Baibolo? Nga tabasambilila, kuti mwabeba ukuti besebasangwepo ilyo mulesambilila. Mulekoselesha umusambi wenu ukulaebako balupwa ne fibusa ifyo alesambilila mu Baibolo. (Yoh. 1:40-45) Finshi mwingacita pa kumukoselesha? Nalimo kuti mwamwipusha ukuti: “Kuti walondolwela shani balupwa ici cishinka?” nelyo kuti mwamwipusha ukuti: “Lilembo nshi wingabomfya pa kulenga umuntu ashininkisha ukuti ifi ulesambilila fya cine?” Nga mulecita ifi mukafwa umusambi wenu ukuba kasambilisha. Nga afikapo, kuti aba kasabankanya uushabatishiwa kabili kuti atendeka ukubila imbila nsuma pamo ne cilonganino. Kuti mwaipusha umusambi nga alishibako uuli onse uwingatemwa ukusambilila Baibolo. Nga alishibako umo kuti mwalanshanya nankwe ilyo line no kumwipusha nga kuti atemwa ukutendeka ukusambilila Baibolo. Kuti mwamutambishako vidio itila Bushe Isambililo lya Baibolo Liba Shani? *
MULEKOSELESHA ABASAMBI UKUPANGA IFIBUSA MU CILONGANINO
Mulekoselesha umusambi ukukwata ifibusa mu cilonganino (Moneni paragrafu 10 na 11) *
10. Nga fintu Baibolo ilanda pali 1 Abena Tesalonika 2:7, 8, finshi kasabankanya engacita pa kuti alepashanya Paulo?
10 Bakasabankanya balingile ukulalanga ukuti balibika sana amano ku basambi. Mufwile ukulabamona ukuti nomba line fye bali no kuba bamunyinefwe nelyo bankashi. (Belengeni 1 Abena Tesalonika 2:7, 8.) Kuti cabakosela ukusha ifibusa fyabo abashipepa Yehova no kwaluka pa kuti balebombela Yehova. Tulingile ukubafwa ukusanga ifibusa ifisuma mu cilonganino. Mulekwatako inshita ya kuba pamo na basambi benu no kubapanga ifibusa, ukucila ukulaba fye nabo pa nshita mulebasambilisha. Nga mwabatuminako foni, meseji, nelyo mwabatandalilako, bakamona ukuti mwalibabikako amano.
11. Finshi tufwaya abasambi ba Baibolo bakwata mu cilonganino, kabili mulandu nshi?
11 Nga filya fine balanda ukuti: “Umwana wa mu mushi mwana wa bonse,” kuti twatila “umusambi wa Baibolo musambi wa bonse mu cilonganino.” Ici e cilenga bakasabankanya ababomba bwino balelenga abasambi babo baishibanako na bambi mu cilonganino abengalenga baba ne mibele iisuma. Ukucita ifi kuti kwalenga abasambi balaipakisha ukuba pamo na bantu ba kwa Lesa, abengabafwa ukuba ifibusa ifisuma ifya kwa Yehova kabili abengalabakoselesha nga baba na mafya. Tufwaya abasambi bonse baleumfwa ukuti balicindama mu cilonganino, kabili baba mu lupwa lwesu ulwa ku mupashi. Na kabili tufwaya batemwana na bamunyinefwe na bankashi. Umusambi nga atemwana na ba bwananyina, cikamwangukila ukuleka ukubishanya na bantu abashingalenga atemwa Yehova. (Amapi. 13:20) Nga ca kuti ifibusa akwete fyatendeka ukumutaluka, cikamwangukila ukusanga ifibusa fya cine mu cilonganino ca kwa Yehova.—Marko 10:29, 30; 1 Pet. 4:4.
LYONSE MULELANDA NO MUSAMBI PA KUIPEELA NO KUBATISHIWA
Kwaliba ifyo umusambi wa Baibolo alingile ukucita pa kuti afikepo ukubatishiwa (Moneni paragrafu 12 na 13)
12. Cinshi tulingile ukulalandila pa kuipeela no kubatishiwa ku musambi wesu?
12 Mulelandapo sana pa fyo cacindamina umuntu ukuipeela kuli Yehova no kubatishiwa. Na kuba icilenga tuletungulula isambililo lya Baibolo ku muntu, kufwaya ukumwafwa ukuti alebombela Yehova kabili akabatishiwe. Pa numa ya kusambilila no musambi pa myeshi iinono, maka maka umusambi nga alitendeka no kusangwa mu kulongana, alingile ukwishiba ukuti tulafwaisha ukumwafwa ukuba Inte ya kwa Yehova.
13. Finshi umusambi afwile ukucita pa kuti alunduluke no kubatishiwa?
13 Kwaliba ifintu fimo ifyo umusambi wa Baibolo alingile ukucita pa kuti abatishiwe. Ica kubalilapo umusambi wa Baibolo afwile ukwishiba bwino Yehova no kumutemwa, kabili afwile ukumucetekela. (Yoh. 3:16; 17:3) Lyena afwile ukuba cibusa wa kwa Yehova e lyo na ba bwananyina mu cilonganino. (Heb. 10:24, 25; Yako. 4:8) Na mu kupita kwa nshita, afwile ukuleka ukucita ifyabipa no kulapila ku membu shakwe. (Imil. 3:19) Icitetekelo cikalenga akale-ebako abantu bambi icine ico alesambilila. (2 Kor. 4:13) Lyena akaipeela kuli Yehova no kubatishiwa pa kulangilila ukuipeela kwakwe. (1 Pet. 3:21; 4:2) Ala aba bwananyina bonse balasekelela nga nshi ubushiku umusambi alebatishiwa! Muletasha umusambi nga alecita ifyo alingile ukucita pa kuti abatishiwe, kabili mulemukoselesha ukutwalilila ukulunduluka.
MU NSHITA MU NSHITA MULEMONA IFYO UMUSAMBI ALELUNDULUKA
14. Bushe kasambilisha kuti aishiba shani ifyo umusambi alelunduluka?
14 Tulingile ukutekanya ilyo tuleafwa umusambi wa Baibolo ukulunduluka pa kuti aipeele no kubatishiwa. Nomba tulingile no kwishiba nga ca kuti alafwaya ukubombela Yehova Lesa. Bushe mulamona ifilanga ukuti umusambi alesha ukulakonka ifyo Yesu atweba ukulakonka? Nelyo bushe afwaya fye ukulasambilila ifyaba mu Baibolo?
15. Finshi kasabankanya engeshibilako nga ca kuti umusambi alelunduluka nelyo iyo?
15 Libili libili mulemona ifyo umusambi alelunduluka. Ku ca kumwenako, bushe alacita ifilanga ifyo omfwa pali Yehova? Bushe alapepa kuli Yehova? (Amalu. 116:1, 2) Bushe alitemwa ukubelenga Baibolo? (Amalu. 119:97) Bushe alasangwa mu kulongana lyonse? (Amalu. 22:22) Bushe alyalukako muli fimo pa kulanga ukuti alakonka ifyo alesambilila? (Amalu. 119:112) Bushe alitendeka ukwebako balupwa ne fibusa pa fyo alesambilila? (Amalu. 9:1) Ne cacindamisha ca kuti, bushe alafwaya ukuba Inte ya kwa Yehova? (Amalu. 40:8) Nga ca kuti umusambi tacitapo nangu cimo pali ifi twalandapo, mufwile ukwishiba icilelenga. Lyena mufwile ukulanshanya nankwe cikuuku cikuuku, lelo ukwabula ukumupita mu mbali. *
16. Finshi nalimo fingalenga mwapingulapo ukuleka ukusambilisha umuntu Baibolo?
16 Mu nshita mu nshita mulemona nga ca kuti mulingile ukutwalilila ukusambilila no muntu nelyo iyo. Mufwile ukuyipusha amuti: ‘Bushe umusambi tapekanishisha libela isambililo? Bushe tafwaya ukusangwa mu kulongana? Bushe alitwalilila ukuba ne mibele yabipa? Bushe acili alaya ku mipepele ya bufi?’ Nga ca kuti mwa-asuka ukuti ee kuli aya amepusho, ninshi ukutwalilila ukusambilila no muntu wa musango uyu cimo no kusambilisha umuntu ukowa uushifwaya ukwingila mu menshi! Mulandu nshi twingatwalililila ukusambilila no musambi nga ca kuti tatemwa ifyo alesambilila kabili tafwaya ukwaluka?
17. Ukulingana na 1 Timote 4:16, finshi bakasambilisha bonse bafwile ukucita?
17 Tumona umulimo wa kulenga abantu baba abasambi ukutila walicindama, kabili tulafwaya ukwafwa abasambi ba Baibolo ukulunduluka no kubatishiwa. E mulandu wine tufwile ukulabomfesha Baibolo pa kusambilisha, no kulaba abashininkisha kabili abacincimuka ilyo tulesambilisha. Tufwile ukukoselesha umusambi ukupanga ifibusa mu cilonganino. Kabili tulingile ukulalanda sana pa kuipeela no kubatishiwa, e lyo no kulamona mu nshita mu nshita ifyo umusambi alelunduluka. (Moneni akabokoshi akali pe bula 13 akaleti “ Ifyo Bakasambilisha Balingile Ukucita pa Kuti Bafwe Abasambi ba Baibolo Ukulunduluka no Kubatishiwa.”) Ala tulasekelela nga nshi ifi tubombako umulimo wa kupususha abantu! Natule-esha apo twingapesha ukwafwa abasambi ba Baibolo ukulunduluka no kubatishiwa?
ULWIMBO 79 Basambilisheni Ukwiminina Ndi
^ para. 5 Ilyo tuletungulula amasambililo ya Baibolo, tulaba ne shuko lyakulenga abantu baishiba ifyo Yehova afwaya baletontonkanya, ifyo afwaya baleumfwa, ne fyo afwaya balecita. Cino cipande calalanda na fimbi ifyo twingacita pa kuti tulewamyako imisambilishishe yesu.
^ para. 4 Moneni icipande citila “Ifyo Mushilingile Ukucita Ilyo Muletungulula Isambililo lya Baibolo” icaba mu Akatabo ka Mikalile no Mulimo Tubomba aka September 2016.
^ para. 8 Kabiyeni apatila PA NTE SHA KWA YEHOVA > IFYO BAIBOLO YAFWA BA NTE NE FYO BAMBI BASHIMIKA.
^ para. 9 Mu JW Library®, kabiyeni apatila MEDIA > OUR MEETINGS AND MINISTRY > TOOLS FOR THE MINISTRY.
^ para. 15 Moneni icipande citila “Ukutemwa Yehova no Kumutasha Kuti Fyalenga Umuntu Abatishiwa” ne citila “Bushe Namufikapo Ukubatishiwa?” mu Ulupungu lwa kwa Kalinda ulwa March 2020.
^ para. 77 UBULONDOLOSHI BWA CIKOPE: Pa numa ya kutungulula isambililo, nkashi uwaishiba sana ukusambilisha aleafwa kasabankanya uwacilatungulula isambililo ifyo afwile ukucita pa kuti elalandapo sana ilyo alesambilisha.
^ para. 79 UBULONDOLOSHI BWA CIKOPE: Ilyo bali pe sambililo lya Baibolo, umusambi asambilila ifyo engaba umukashi umusuma. Pa numa ale-ebako umwina mwakwe ifyo acilasambilila.
^ para. 81 UBULONDOLOSHI BWA CIKOPE: Umusambi no mwina mwakwe bali ku ng’anda ya wa bwananyina uo bakumene nankwe ku Ng’anda ya Bufumu.
