1. Rariso kofawi kofarkor snonggaku sya fa sḇe manfamyan ima fararur ḇeyun ḇe kankenem?

KOFARKOR snonggaku sya fa sḇe manfamyan inema fararur ḇeyun kankenem dirya! Kofawi na ro Yesus parenta ḇyena ḇero Matius 28:19, 20, (NW). Doḇe, ”Mgora mura . . . mgofrur snonggaku ro er nakam fa sḇe manfamyan . . . . Mgoḇebaptis si.” Ḇaḇebaptis ima roi ḇefandun kaku ke? Komarisen kosmai kankenem fyoro ido, fandun fa koḇebaptis. Snonggaku ḇebaptis sya fandun fa sikyar na sismai kankenem fyoro kukro Yesus imarwarek ko kwar ma Allah ḇyawes i kwar. Iso ḇefnai fa Manwawan Petrus ikofen ḇe snonggaku Kristen sya radine, ”Baḇebaptis, ro kirine ḇeyun ḇaḇye faro mgo roro Yesus Kristus kaḇakḇok ḇyedi.” (1 Ptr. 3:21, Terjemahan Dunia Baru) Inja ḇefarkor Refo oso dakḇebaptis ido, ikyar nari ismai kankenem fyoro ya.

2. Ro 2 Timotius 4:1, 2, rosai fandun fa ḇebuk farkarkor Refo sifrur ya?

² Imbe kofnoḇek snonggaku sya fa sḇe manfamyan ido, fandun fa kokir syadi ro kobuk farkarkor. (Wasya 2 Timotius 4:1, 2.) Kukro? Yesus iwan ko, ”Mgora mura . . . mgofrur snonggaku ro er nakam fa sḇe manfamyan . . . . Mgofarkor si.” Manwawan Paulus doḇe komku fa kofrur na ido, nari nun ḇaḇye faro manggunko ma kawasa ḇerower konsya. Iso ḇefnai fa Paulus doḇe, ”Wepen farkarkor bena.” (1 Tim. 4:16) Imbe kofnoḇek snonggaku sya fa sḇe manfamyan ido, fandun fa kofarkor si. Inja, kosewar fa kobuk farkarkor kuker nyan ḇepyum syadi.

3. Rosai nari kawos ro farkarkor ineni?

³ Ro supswan ine ḇesiper, koisya kobuk farkarkor Refo faro snonggaku ḇebor. Imbape raris kofarkor kwar, komarisen kofawi nyan fa kofnoḇek snonggaku ḇebor  syadi isof sakḇebaptis. Ro farkarkor ine, nari kawos nyan ririm wer fandun fa ḇebuk farkarkor Refo ifrur kaku insama ḇefarkor Refo kuker i isur pdef isof dakḇebaptis.

4. Rosai ḇefnai fa ḇebuk farkarkor Refo ipok dawos nabor awer faro ḇefarkor ya? (Mam fasfas kasun.)

⁴ Komarisen kona roi ḇefasos ko fa kobuk farkarkor Refo. Naiso ḇefrur fa imbe kawos nabor roi komarisen na. Imbape ḇefarkin Farkarkor Baryas, Farkarkor Refo ro Sidang, ḇaido ḇebuk farkarkor Refo ro rum, na siswarepen insama sipok sawos nabor awer. Insama farkarkor ya neknam kaku ro Refo, ḇebuk farkarkor isasor i fa dawos nabor awer ma ikofenḇair awer roi nakam ifawi kwar ro mnuk oso ḇaido farkarkor anya. * (Yoh. 16:12) Kokara mura faro roi kofawi ro fafisu koḇebaptis anya ma roi kofawi ro kirine. Fyor anya imbude kofawi monda farkarkor ḇefandun kaku ro Refo na. (Ibr. 6:1) Kofandun oras kawan kaku insape kofawi roi nabor ro kirine na. Inja, kosasor ko insama kokofen ḇeri awer roi nakam kofawi kwar na faro ḇefarkor Refo kuker ko.

5. (a) Imnis wos ḇero 1 Tesalonika 2:13, rosaiso komarisen ḇefarkor Refo kuker ko ifawi na? (b) Rariso kofnoḇek i fa ikofenḇair roi ifawi kwar na?

⁵ Komarisen ḇefarkor kuker ko ifawi rosai fyarkor na neknam ro Refo. (Wasya 1 Tesalonika 2:13.) Moḇsa kofnoḇek i rai? Kor i fa ikofenḇair roi ifawi kwar na. Komewer ko iso ḇefasnai ker knam ro mnuk ro Refo, mboi ipyum ya kor i fa fyasnaiḇair pyan mnuk anya ḇe ko. Kofnoḇek i fa myam ro manggundi rariso Allah Wos Ḇyena nafnoḇek kenem ḇyedi rai. Kofuken i wer fa ikofenḇair rosai kyara ma ḇyaḇir na kuker mnuk iwasya kwar na. (Luk. 10:25-28) Rupa ra kofuken i radine, ”Ro mnuk ine, rari rosai wafarkor ro Yahwe I?” ”Payamyum rosai nari wasmai rofyor waso pyum wos anun ro mnuk ine?” ”Wafawi kwar na ido, moḇsa ḇaḇir rai?” (Ams. 20:5) Kofnoḇek si fa sna fawawi ro Refo nabor monda ḇa, mboi ḇefandun syadi ya iso kofnoḇek si fa simyof roi sfarkor kwar na ma sifrur na ro kenem sena.

6. Kor manbaryas ḇekir syadi fa daksowarpu ko fa kobuk farkarkor Refo ido, payamyum rosai na kosmai ya?

⁶ Wor manbaryas ḇekir syadi oso kwar fa isowarpu Au fa mubuk farkarkor Refo  ke? Wor i fa myampan Ausya buk farkarkor kuker nyan ḇepyum ma farkarkor Bena neknam ro Refo ke roḇa. Wamarisen wakir syadi ro buk farkarkor ido, nwa sne ḇerun kada. (Mam kako Farfyar 18:24-26.) Buk farkarkor raposa, wafuken i, myam ido ḇefarkor Refo ya ifawi mnis rosai fyarkor kwar na ke roḇa. Imbe wambran farma ḇe moḇ ḇese ro swaf minggu oser ḇaido syadi ido, wor manbaryas ḇese fa sfadwer Au. Rarirya, farkarkor Refo ya na nambran pdef, ma nari myam inema roi ḇefandun kaku. Kwara awer ḇefarkor Refo ani ima ”Bediri”, inja werer monda na ḇefarkor i. Fyor kwara roi ḇepyum faro ḇefarkor ani ido, nari wamarisen fyarkor Refo pdef kuker Au ḇaido ḇesesya kukro ḇefandun syadi ya iso ifawi mnis kakaku ḇero Refo ya.

7. Rosai nari ḇefnoḇek snonggaku ḇefarkor Refo kuker Au fa ḇyesyowi roi fyarkor na?

⁷ Ḇefarkor Refo kuker Au fandun fa myam raryaḇ ma kakyar Bena faro kakaku ro Refo na. (1 Tes. 1:5) Rarirya, nari imarisen ma ḇyesyowi rosai fyarkor kwar na. Fawar ḇe i payamyum wasmai kukro wasouser anun ro Refo na. Rarirya nari ifawi daksouser wos ro Refo ido, nari daksmai payamyum.

8. Moḇsa kofnoḇek ḇefarkor Refo kuker ko, ma rosai ḇefnai fandun fa kofrur na?

⁸ Ras oso imbude ḇefarkor Refo ani ismai samswen. Inja fafisu mufarkor, fawar ḇe i farfyar ḇepyum ro naek srar ḇeyaksmai samswen ḇemnis ra i ma moḇsa simbran samswen sena rai. Rofyor buk farkarkor, wun naek ḇaido srar oso ro sidang fa iwarpu Au insama ḇefarkor ani dakfarkor roi ḇepyum ro i. Bisa swewar fawar ḇeyun samarawraw ḇaido vidio ro jw.org bar ”Refo Fyadwer Kankenem”. * Fawar ḇeradirya nari nafnoḇek i fa ifawi soasuser faro wos anun ro Refo na nafrur fa ikenem pyum syadi.

9. Rariso wanun ḇefarkor Refo kuker Au fa fyawar roi fyarkor kwar na ḇe kina ma bati ḇyesya rai?

⁹ Ḇefarkor Refo kuker Au fyarḇuk kwar ido, swari dakso farkarkor ya kako ke? Oroḇaim ido, bisa wor swari fa dakso kako. Wanun ḇe i fa fyawar roi fyarkor kwar na ḇe kina ma bati ḇyesi. (Yoh. 1:40-45) Bisa wafuken i radine, ”Moḇsa na fawar ḇe kina bansi kakaku ro Refo wafarkor  kwar ine?” ḇaido ”Mnuk risai nari bukifasnai kakaku ine ḇe bati bedi?” Rarirya ido, Ausya farkor i fa dakḇe guru kako. Mura fyor isyus kwar fa dakḇe manbaryas ḇebaptis ḇaim ido, bisa dakso ro ḇaḇebaryas. Bisa wafuken i ifawi karyer ḇyesi imbude sia simarisen sakfarkor Refo. Isya ido, swewar i ma wafuken i imbude imarisen dakfarkor Refo kako. Fasnai ḇe i vidio Imnis Rariso Farkarkor Refo Nkoḇena? *

10. Imnis wos ro 1 Tesalonika 2:7, 8, rariso ḇebuk farkarkor Refo iso pyum Paulus nyan ḇyena rai?

¹⁰ Fandun fa fasnai saswar ma frur pyum faro ḇefarkor Refo kuker Au. Mam nari ras iyama dakḇe naek ḇaido srar koḇedi kako. (Wasya 1 Tesalonika 2:7, 8.) Ibur bati ḇekwar ḇyesya ma fyadwer kenem ḇyena fa fyarmyan ḇe Yahwe I, ima roi ḇepyan risya ḇa. Inja wafnoḇek i fa nya bati ḇepyum ro sidang kako. Imnis raris, swewar fa nwa swaf fa bebati fanam kuker i, ro ras mufarkor Refo monda ḇa. Fasnaiḇair waswar kaku i kuker rwa mamfar i, mufarfyare, betelfon i ḇaido farem sms ḇe i.

11. Rosai komarisen ḇefarkor Refo kuker ko ḇyaḇir na, ma rosai ḇefnai ya?

¹¹ Wos peper oso doḇe, ”Kawasa ḇero mnu oso sikam na sekayamyam ḇo sfaduru romawa oso isof iba.” Bisa kokofen kako, ”Naek srar ro sidang syakam na sifnoḇek ko fa kofarkor snonggaku oso fa dakḇe manfamyan.” Inja, ḇebuk farkarkor nari fyasnai naek srar ro sidang ḇe ḇefarkor Refo ani insama sakfnoḇek i fa fyanam faro Yahwe I ma saksaramper i rofyor ismai samswen. Komarisen myam ro manggundi naek srar ro sidang siswar i ma ḇyaḇir dakro kina ine. Komarisen insama dakmarisen kaku dakro mambekanaek koḇedi ḇefo saswar ine. Ḇyaḇir rarirya ido, nari napyan fa pyampum bati ḇyesi ḇeyaksyom Yahwe ḇa sya. (Ams. 13:20) Bati ḇyesi sibur i kwar, mboi ifawi ismai bati ḇekaku ro fandu Yahwe kawasa Ḇyesi.​—Mrk. 10:29, 30; 1 Ptr. 4:4.

12. Rosai ḇefnai fa kokofen snai ḇe ḇefarkor Refo insama byuk kenem ḇyedi faro Yahwe ma dakḇebaptis?

¹² Wakofen snai ḇe ḇefarkor Refo ani snar fandun kaku fa snonggaku oso byuk  kenem ḇyedi faro Yahwe ma ḇyebaptis. Roi ḇefnai fa kobuk farkarkor ḇe snonggaku oso iso imbe kofnoḇek i fa fyarmyan ḇe Yahwe ma dakḇebaptis. Farkarkor Refo imbran ro swaf paik riḇeso kwar ma iso ker fananjur ya kwar ido, fandun fa ifawi komarisen kofnoḇek i fa dakḇe Saksi Yahwe.

13. Rosai na ḇefarkor Refo oso ifrur kaku insama dakḇebaptis?

¹³ Fandun fa ḇefarkor Refo ya iso nyan ḇeḇeso insama dakḇebaptis. Ḇepon ya, fandun fa myambir Yahwe I, iswar I ma ikyar faro I. (Yoh. 3:16; 17:3) Ono wer ido, imarisen ḇyebati kuker Yahwe I ma naek srar ro sidang. (Ibr. 10:24, 25; Yak. 4:8) Mura, ibur kenem ḇekwar ḇyena ma imbror ro nyan kenem ḇesasar na. (Kis. 3:19) Ma fandun fa ikofenḇair roi ikyar kwar ḇe snonggaku ḇesesya. (2 Kor. 4:13) Ramnai, ikofen ḇe Yahwe imarisen byuk kenem ḇyedi faro I ma fyasnai na kuker ḇyebaptis. (1 Ptr. 3:21; 4:2) Fyor ḇyebaptis ido, na kokame komarisen! Ḇefarkor Refo ya ifrur roi anna kwar ido, fandun fa kawos roi ḇepyum ifrur kwar anna yoḇ i ma kosambraḇser i pdef.

14. Rariso ḇebuk farkarkor Refo ifawi ḇefarkor ya isur ro rur ya kwar?

¹⁴ Kosawsaw awer fa kofnoḇek ḇefarkor ya isof dun snemuk fa byuk kenem ḇyeja ḇe Yahwe ma dakḇebaptis. Mboi, koswarepen insama dakfarmyan ḇe Yahwe I snar marisen ḇyenairi. Mam mboi syewar kaku fa isouser Yesus parenta ḇyena ke? Ḇaido imarisen monda faro roi ḇepyum fyarkor ro Refo na.

15. Rosai ḇebuk farkarkor Refo na myam ro snonggaku ḇefarkor ya insama fyawi fyasos kwar fa dakḇebaptis?

¹⁵ Mam pyum pdef ḇefarkor Refo ani moḇ isur raya. Mam moḇsa fyasnai saswar ḇyeja faro Yahwe I rai? Ḇyenadi faro Yahwe I pdef ke? (Mz. 116:1, 2) Imarisen iwasya Refo ke? (Mz. 119:97) Iso ker fananjur ya ke? (Mz. 22:22) Fyadwer kenem ḇekwar ḇyena kwar ke? (Mz. 119:112) Isya fyawar roi fyarkor kwar na faro karyer ma bati ḇyesi ke? (Mz. 9:1) Ḇefandun syadi ya, imarisen kwar fa dakḇe Saksi Yahwe ke? (Mz. 40:8) Mam mboi ifrur roi ḇero boyasne ḇa ido,  swewar fa wafawi rosai ḇedwarek i ma wawos asuser na yoḇ i ḇeri. *

16. Fafisu risai komnai kobuk farkarkor Refo faro snonggaku oso?

¹⁶ Kwara pyum na buk farkarkor Refo ḇe snonggaku oso pdef ke wamnai. Kwarapan, ’Fyor nufarkor ḇaim, ifrur fasasos ḇepon ke? Imewer dakso fananjur ya ke? Fyadwer kenem ḇeḇye ḇa ḇyena ḇa ke? Ryo agama ḇekaku ḇa kaker ke?’ Rarirya ido, farkor i pdef kukro ine imnis ra swewar kaku fa farkor snonggaku oso insama ifawi daron, mboi imewer idokri! Ḇefarkor Refo ani ḇyesyowi roi fyarkor anna ḇa ma fyadwer kenem ḇyena ḇa ido, wamnai fa buk farkarkor ḇe i.

17. Imnis wos ro 1 Timotius 4:16 ya, rosai na ḇebuk farkarkor Refo sya sifrur kaku ya?

¹⁷ Kofnoḇek snonggaku sya fa sḇe manfamyan nama fararur ḇefandun kaku nairi, inja komarisen kofnoḇek si fa sisur pdef ro rur ya isof sebaptis. Iso ḇefnai fa ipyum ya, roi kofarkor faro si na neknam ro Refo ma koryaḇ kofarkor si kuker kakyar kako. Na kanun si insama sḇebati fanam kuker naek srar ro sidang. Kokofen snai roi ḇefnai kaku fa sbuk kenem sena ḇe Yahwe I ma sebaptis, ma komam pyum sisur pdef ro rur ya ke roḇa. (Mam ro ram 13, ” Roi Ḇebuk Farkarkor Sifrur fa Sikfnoḇek Ḇefarkor Sya fa Sebaptis”.) Komarisen kukro kaksowarpu ro fararur ḇeyun ḇe kankenem ine! Inja iḇye kada, kosewar kaku fa kofnoḇek ḇefarkor Refo kuker konsya isof sisyus fa sakḇebaptis ḇe Saksi Yahwe.