1. ?Olsem wanem yumi save se wok blong mekem disaepol, i wan wok blong sevem laef?

!WOK blong mekem disaepol, i wan wok blong sevem laef! ?Olsem wanem yumi save? Taem Jisas i givim komanmen long Matiu 28:19, 20, hem i se: ‘Go long ol man, . . . pulum olgeta oli kam disaepol . . . , mo baptaesem olgeta.’ ?Baptaes i impoten olsem wanem? Olgeta we oli wantem kasem laef, oli mas baptaes. Man we i wantem baptaes, hem i mas bilif se Jisas, we i ded olsem wan sakrefaes mo i laef bakegen, i mekem se i posibol blong man i kasem laef. Hemia nao from wanem aposol Pita i talem long ol narafala Kristin se: ‘Baptaes naoia i stap sevem yufala tu from we Jisas Kraes i laef bakegen.’ (1 Pita 3:21) Taswe taem wan niufala disaepol i baptaes, hem i stap long rod blong kasem laef.

2. ?Ol tok blong 2 Timoti 4:1, 2 i mas pulum yumi blong kam wanem kaen tija?

² Blong mekem disaepol, yumi mas kam gud long wok ya blong “tijim gud ol man.” (Ridim 2 Timoti 4:1, 2.) ?From wanem? From we Jisas i givim komanmen long yumi se: “Go long ol man, . . . pulum olgeta oli kam disaepol . . . , tijim olgeta.” Aposol Pol i talem se “oltaem yu mas mekem” wok ya, from we “sipos yu mekem olsem, bambae yu sevem yu, wetem olgeta we oli lesin long yu.” Taswe, Pol i gat gud risen blong talem se: “Yu mas lukaot gud . . . long ol tok we yu stap tijim ol man long hem.” (1 Tim. 4:16) Yumi wantem se tijing blong yumi i beswan, from we wok blong tij i joen wetem wok blong mekem disaepol.

3. ?Long stadi ya, bambae yumi tokbaot wanem long saed blong ol Baebol stadi?

 ³ Yumi stap tijim plante milian man oltaem long ol trutok we i stap long Baebol. Be olsem yumi tokbaot finis long laswan stadi, yumi wantem save olsem wanem blong halpem plante moa long olgeta, blong oli kam ol disaepol blong Jisas Kraes we oli baptaes. Long stadi ya, bambae yumi tokbaot faef narafala samting bakegen, we evri tija oli mas mekem, blong halpem wan studen i gohed gud kasem baptaes.

4. ?From wanem wan tija i mas bos long hem wan taem i lidim wan Baebol stadi? (Mo luk futnot.)

⁴ Yumi laekem tumas ol save blong Baebol we yumi tijim long ol narafala. Taswe samtaem yumi foldaon long trap ya blong toktok tumas. Be, nomata se yu stap lidim Wajtaoa Stadi, Baebol Stadi Blong Kongregesen, o wan Baebol stadi, yu no mas toktok tumas. Blong letem Baebol i tijim man, tija i mas bos long hem wan, mo i no mas traem blong eksplenem evri samting we hem i save long wan vas o wan topik. * (Jon 16:12) Skelem save blong Baebol we yu gat long taem we yu baptaes wetem save we yu gat naoia. Ating long taem ya, yu lanem ol stamba trutok nomo. (Hib. 6:1) I tekem plante yia blong yu kasemsave ol samting we yu save tede, taswe yu no mas traem blong tijim evri samting wantaem long wan niufala studen.

5. (1) Folem 1 Tesalonaeka 2:13, ?yumi wantem se studen i kasemsave wanem long stadi blong hem? (2) ?Olsem wanem yumi save enkarejem wan studen blong i tokbaot ol save we hem i lanem?

⁵ Yumi wantem se studen blong yumi i kasemsave se samting we hem i stap lanem, i kamaot long Tok blong God. (Ridim 1 Tesalonaeka 2:13.) ?Olsem wanem yumi mekem? Enkarejem studen blong i tokbaot ol save we hem i stap lanem. Bitim we yu eksplenem oltaem ol vas blong Baebol long studen, askem hem blong i eksplenem sam vas long yu. Halpem studen blong i luk olsem wanem Baebol i save givhan long hem. Askem ol kwestin we i pulum hem blong i talemaot tingting blong hem, olsem: ?Wanem tingting o filing blong hem long wan vas we hem i ridim? (Luk 10:25-28) Eksampol, askem se: “?Yu yu luk wanem gudfala fasin blong Jehova long vas ya?” “?Trutok ya blong Baebol i save givhan long yu olsem wanem?” “?Yu yu glad long samting we yu jes lanem?” (Prov. 20:5) Samting we i impoten,  i no hamas save we studen i kasem, be bigfala lav we hem i gat long ol save ya mo samting we hem i mekem blong folem.

6. ?From wanem i gud blong wan pablisa we i gat ekspiriens i go wetem yu long wan Baebol stadi?

⁶ ?Taem yu mekem wan Baebol stadi, yu stap go wetem ol pablisa we oli gat ekspiriens? Sipos yes, yu save askem tingting blong olgeta long fasin blong yu blong mekem stadi, mo blong talem sipos yu stap letem Baebol i tijim studen. Yu mas gat tingting daon sipos yu wantem kam gud moa long fasin blong tij. (Skelem Ol Wok 18:24-26.) Biaen, askem long pablisa ya blong i talem sipos studen ya i kasemsave long trutok. Yu save askem pablisa ya tu blong i mekem stadi ya, sipos yu gowe blong wan o moa wik. Olsem nao stadi ya i gohed oltaem, mo studen bambae i save se stadi i impoten tumas. Yu neva mas tingting se hemia stadi blong “yu” mo narafala i no mas mekem. Be tingbaot, yu yu wantem mekem i gud long hem, blong i gohed gud oltaem blong lanem trutok.

7. ?Wanem bambae i halpem wan studen blong i glad long samting we hem i stap lanem?

⁷ Wan studen i mas luk se yu glad long ol trutok blong Baebol, mo se yu bilif long olgeta. (1 Tes. 1:5) Nao bambae hem i glad long samting we hem i stap lanem. Sipos i stret, tokbaot olsem wanem ol rul blong Baebol oli givhan long yu. Nao bambae hem i kasemsave se i gat ol gudfala advaes long Baebol we oli save givhan long hem tu.

8. ?Yu save mekem wanem moa blong halpem studen, mo from wanem?

⁸ Long taem blong stadi, tokbaot ol tru stori blong olgeta we oli kasem sam traem we i sem mak long hemia blong hem, mo oli winim. Taem yu go mekem stadi, tekem wan long kongregesen we eksampol blong hem maet i save givhan long studen. O yu save faenem sam gudfala ekspiriens long jw.org, long haf ya we i stap kamaot oltaem “Baebol i Jenisim Laef Blong Man.” * Ol atikol mo video olsem bambae i givhan long studen, blong i luk olsem wanem i waes blong folem ol rul blong Baebol long laef blong hem.

9. ?Olsem wanem blong enkarejem studen blong i serem save we hem i lanem long ol famle mo fren?

⁹ Sipos studen i mared finis, ?patna  blong hem i stap stadi tu? Sipos nogat, invaetem hem blong i joen long stadi. Enkarejem studen blong i serem save we hem i lanem long ol famle mo fren. (Jon 1:40-45) ?Olsem wanem blong mekem? Maet yu askem se: “?Olsem wanem yu save eksplenem trutok ya long famle blong yu?” o “?Bambae yu yusum wanem vas blong pruvum samting ya long wan fren?” Long rod ya, bambae yu trenem studen blong i kam wan tija. Biaen taem hem i kasem ol mak, hem i save kam wan pablisa we i no baptaes yet, ale i save stat blong joen long wok blong prij. Yu save askem long studen sipos hem i save eniwan we i laekem blong stadi. Sipos yes, kontaktem man ya kwiktaem, mo askem Baebol stadi long hem. Soem long hem video ya ?Oli Mekem Baebol Stadi Olsem Wanem? *

10. Folem 1 Tesalonaeka 2:7, 8, ?olsem wanem wan tija i save folem eksampol blong Pol?

¹⁰ Ol tija oli mas intres bigwan long ol studen blong olgeta. Luk olgeta olsem ol fiuja brata mo sista blong yu. (Ridim 1 Tesalonaeka 2:7, 8.) I no isi blong oli lego ol fren blong wol mo blong mekem ol bigfala jenis long laef blong olgeta, blong oli wosipim Jehova. Taswe yumi mas halpem olgeta blong oli faenem ol tru fren long kongregesen. Kam fren blong studen blong yu, i no long taem blong stadi nomo, be long ol narafala taem tu. Yu save ring long hem, teksem hem, o visitim hem smoltaem long ol narafala dei, blong soem se yu rili kea long hem.

11. ?Yumi wantem se ol studen oli faenem wanem insaed long kongregesen, mo from wanem?

¹¹ I gat wan waestok we i talem se: “I nidim wan vilej blong tijim wan pikinini.” Yumi save talem se: “I nidim wan kongregesen blong mekem wan disaepol.” Taswe ol Baebol tija we oli gat gudhan, oli soem studen blong olgeta long ol narafala long kongregesen, we oli save givhan long olgeta. Nao ol studen ya oli save haremgud blong joen wetem ol man blong God, we oli save sapotem olgeta long spirit mo long filing. Yumi wantem se evri studen oli harem se oli joen long kongregesen, mo oli pat blong famle blong trutok. Yumi wantem se evri studen oli glad tumas blong joen long bigfala famle blong ol gudfala brata sista, we i gat lav long hem. Olsem nao bambae i moa isi blong oli no moa joen wetem ol man we oli no halpem olgeta blong lavem Jehova. (Prov. 13:20)  Sipos ol fren blong olgeta blong bifo oli no moa wantem olgeta, bambae oli save se oli gat ol tru fren insaed long oganaesesen blong Jehova.—Mak 10:29, 30; 1 Pita 4:4.

12. ?From wanem yumi mas tokbaot long studen, mak ya blong givim laef mo baptaes?

¹² Eksplenem klia mak ya blong givim laef long God mo baptaes. Hemia from we mak blong Baebol stadi, i blong halpem man blong i kam wan pablisa we i baptaes. Afta we yu stadi wetem hem blong sam manis, mo speseli afta we hem i joen long ol miting, hem i sud kasemsave se risen blong stadi Baebol, hemia blong halpem hem blong i mekem wok blong Jehova olsem wan Witnes blong Hem.

13. ?Wanem ol defdefren step we studen i mas kasem blong i baptaes?

¹³ !Wan gudfala studen i save kasem ol defdefren step go kasem we i baptaes! Faswan, studen i kasemsave long Jehova, i lavem hem, mo i bilif long Hem. (Jon 3:16; 17:3) Biaen hem i frengud wetem Jehova, mo i stat blong fren wetem ol brata sista long kongregesen. (Hib. 10:24, 25; Jem. 4:8) Sloslo, hem i sakemaot ol rabis fasin, mo i tanem tingting blong hem from ol sin blong hem. (Wok 3:19) Long semtaem, bilif blong hem i pusum hem blong i serem trutok long ol narafala. (2 Kor. 4:13) Biaen hem i givim laef blong hem long Jehova mo i soemaot taem i baptaes. (1 Pita 3:21; 4:2) !Mo hemia i wan hapi taem blong evriwan! Taem studen i stap kasem ol defdefren step ya blong kasem mak blong hem, i gud yu talem ol gudfala toktok long hem mo yu enkarejem hem blong i gohed.

14. ?Olsem wanem wan tija i save jekem progres blong studen?

¹⁴ Yumi mas gat longfala tingting taem yumi halpem wan studen blong i gohed gud kasem baptaes. Be i no hemia nomo, yumi mas faenemaot tu sipos hem i wantem mekem wok blong Jehova God o nogat. ?Yu luk sam saen we i soemaot se studen i stap traem blong obei long ol komanmen blong Jisas? ?O hem i wantem kasemsave nomo long Baebol?

15. ?Wanem ol saen we wan tija i mas faenemaot long wan studen?

¹⁵ Gohed blong jekem progres we studen  i stap mekem. Eksampol, ?hem i talemaot filing blong hem long saed blong Jehova? ?Hem i stap prea long Jehova? (Sam 116:1, 2) ?Hem i glad blong ridim Baebol? (Sam 119:97) ?Hem i stap go oltaem long ol miting? (Sam 22:22) ?Hem i jenisim fasin blong laef blong hem? (Sam 119:112) ?Hem i stat finis blong serem ol save we hem i lanem long ol famle mo fren? (Sam 9:1) Impoten moa se, ?hem i wantem kam wan Witnes Blong Jehova? (Sam 40:8) Sipos studen i no mekem eni progres long wan long ol eria ya, long waes fasin, traem faenemaot se from wanem, biaen toktok stret wetem hem be long kaen fasin. *

16. ?Wanem sam saen we i soem se yumi mas stopem wan stadi?

¹⁶ Wanwan taem, i gud blong jekem sipos yu mas gohed blong stadi wetem wan studen. Askem yu wan se: ‘?Studen ya i no stap rerem stadi blong hem? ?Hem i no intres blong kam long ol miting? ?Hem i holemtaet yet ol rabis fasin? ?Hem i wan memba blong ol giaman jos yet?’ Sipos ansa i yes, mo yu gohed blong stadi wetem hem, !hemia i olsem we yu stap traem tijim wan man blong swim be hem i no wantem wetwet! Sipos studen i no tinghae long ol save we hem i stap lanem, mo hem i no wantem jenis, ?from wanem yu stap gohed blong stadi wetem hem?

17. Folem stamba vas ya 1 Timoti 4:16, ?ol Baebol tija oli mas mekem wanem?

¹⁷ Yumi tinghae long wok ya blong mekem disaepol, mo yumi wantem halpem ol Baebol studen blong oli gohed gud kasem baptaes. Hemia nao from wanem yumi letem Baebol i tijim man, mo bambae yumi tijim olgeta wetem glad mo bilif. Bambae yumi enkarejem studen blong i gat ol fren long kongregesen. Mo bambae yumi tokbaot oltaem mak ya blong givim laef mo baptaes, mo wanwan taem, yumi jekem progres blong studen. (Luk bokis long pej 13, “ ?Tija i Mas Mekem Wanem Blong Lidim Studen i Go Kasem Baptaes?”) !Yumi glad tumas se yumi save joen long wok ya blong sevem laef blong man! I gud yumi gat strong tingting blong mekem bes blong yumi, blong lidim ol Baebol studen oli gohed gud kasem baptaes.