1. Hunja ibotoh hita ponting tumang do mangurupi halak ase gabe susian ni Jesus?

PONTING tumang do mangurupi halak gabe susian ni Jesus halani parohkon hagoluhan do ai. Hunja ibotoh hita ai? Pardiateihon ma parentah ni Jesus na isurat bani Mateus 28:19, 20. Ia mangkatahon, “Laho ma hanima podahi hanima ma sagala bangsa ase gabe susianku sidea, anjaha didi hanima ma sidea.” Mase sasahalak maningon ididi? Anggo sihol ia mandapot haluahon, maningon ididi do ia. Tapi paima ai maningon porsaya ia anggo haluahon ai boi dapotsi halani domma ma matei Jesus mangkopkop hita janah ipapuho. Halani ai ihatahon apostel Petrus ma sonon, “Pandidion in [ma] na paluahkon nasiam nuan . . . marhitei parpuho ni Jesus Kristus.” (1 Ptr. 3:21) Jadi sanggah ididi sasahalak, on patuduhkon marpangarapan do ia anggo ia boi mandapot hagoluhan sadokah ni dokahni.

2. Domu bani 2 Timoteus 4:1, 2, maningon sonaha ma hita sanggah mangajari halak?

² Ase boi mambahen sasahalak gabe susian ni Jesus, maningon pandei do hita mangajari sidea. (Basa 2 Timoteus 4:1, 2.) Mase? Halani Jesus mamarentahkon, “Laho ma hanima [ajari] hanima ma sagala bangsa.” Apostel Paulus pe mangkatahon anggo totap ihorjahon hita ai, ‘na paluahkon dirinta do hita ijin sonai age na manangihon hita’. Sosok ma iojur si Paulus hita, “Jaga ma ham bani dirimu ampa bani pangajaran in.” (1 Tim. 4:16) Halani ai, marusaha ma hita mambahen na sidearan sanggah mangajari halak.

3. Aha ma na laho iulas hita bani artikel on?

 ³ Dong marjuta halak na marlajar Bibel pakon hita i sab dunia on. Bani artikel na salpu domma iulas hita dong lima na porlu ibahen parlajar Bibel ase boi sidea gabe susian ni Jesus. Bani artikel on dong lima na porlu ibahen parbarita ase boi sidea mangurupi parlajar Bibelni.

4. Sanggah mangajari halak marlajar Bibel, mase ulang bahattu hita mambere hatorangan? (Tonggor ma surat partoruh.)

⁴ Tontu marosuh tumang do hita bani hasintongan na iparlajari hita. Halani ai sihol ma uhurta lalab mansaritahon ai. Tapi ulang ma bahen sonai sanggah ham mambobahon parlajaran Ambilan na Madear atap Parlajaran Bibel Kuria, ampa sanggah ham mangajari halak pasal Bibel. Ulang ma ipatorang ham ganup na ibotoh ham sanggah mangajari sidea. * (Joh. 16:12) Tapi gunahon ma ayat-ayat ni Bibel. Dingat ma sadiha bahat do na ibotoh ham pasal Bibel sanggah ham ididi. Ra do pitah ajaran dasar dassa na ibotoh ham. (Heb. 6:1) Tapi dobkonsi martahun-tahun, baru ma bahat na iarusi ham pasal Bibel. Halani ai, ulang ma bahattu ham mambere hatorangan sanggah mangajari.

5. (a) Domu bani 1 Tessalonika 2:13, aha do na porlu ibahen hita sanggah mangajari parlajar Bibelta? (b) Sonaha ibahen ham ase parlajar Bibelmu ra patugahkon pandapotni?

⁵ Tontu sihol do hita mangurupi parlajar Bibelta ase porsaya ia Hata ni Naibata do na iparlajarisi. (Basa 1 Tessalonika 2:13.) Sonaha ibahen hita? Ase ibotoh ham iarusi ia do atap lang parlajaran ai, ojur ma ase ipatugah ia bamu aha do na iarusi ia humbani topik ai. Janah urupi ma ia sonaha mandalankon ai ibagas goluhni. Bahen ma sungkun-sungkun ase ibotoh ham sonaha pangahapni bani parlajaran ai. (Luk. 10:25-28) Umpamani, sungkun ma ia: “Aha ma na ibotoh ham pasal Jahowa humbani ayat on?” “Aha do gunani parlajaran on bamu?” “Sonaha pangahapmu dobkonsi mambotoh on?” (Pod. 20:5) Dingat ma na sipontingan sedo sadiha bahat na ibotoh ia. Tapi sonaha pangahapni bani parlajaran ai. Ai marosuh do ia mandalankon ai atap lang.

6. Aha do gunani anggo iboan hita parbarita na marpangalaman sanggah mangajari?

⁶ Ai ongga do iboan ham parbarita na  marpangalaman sanggah ham mangajari parlajar Bibelmu? Sanggah ibahen ham sonai, pindo ma ase ipardiateihon ia sonaha caramu mangajari. Holi boi ma ipatugah ia aha do na porlu ipadear. Sanggah ipatugah ia hahuranganmu janah iajari ia ham, toruh maruhur ma manjalo ai. (Bandingkon Lahoan 18:24-26.) Sungkun ma homa ia iarusi parlajar Bibelmu ai do parlajaran ai atap lang. Porini laho ham saminggu lobih, pindo ma ase ia na manggantihon ham. Holi gabe ibotoh parlajar Bibelmu ai ma ponting tumang do taratur marlajar Bibel. Ulang ma iagan ham pitah “ham” dassa na boi mangajarisi. Tapi pingkirhon ma aha do na sidearan na boi ibahen ham ase ra parlajar Bibelmu mambahen hamajuon.

7. Sonaha ase parlajar Bibelmu marosuh bani aha na iparlajarisi?

⁷ Maningon taridah ma anggo ham marosuh tumang bani isi ni Bibel janah porsaya hasintongan do ai. (1 Tes. 1:5) Dob ai, gabe marosuh ma homa ia laho mamparlajari ai. Anggo sosok situasini, boi do ipatugah ham prinsip na ija do na domma idalankon ham, janah aha do gunani ai. Holi gabe porsaya ma ia marguna do prinsip ni Bibel ai bani goluhni.

8. Aha ope na boi ibahen ham laho mangurupi parlajar Bibelmu, janah aha do gunani ai?

⁸ Ra do adong tantangan na roh bani parlajar Bibelmu. Anggo sonai, saritahon ma pangalaman ni sanina botou na boi mangurupisi. Boi do homa iarahkon ham sanina botou na sarupa tantanganni pakonsi ase boi sidea mangurupisi. Atap pindahi ma artikel ampa video hun jw.org seri “Alkitab Mengubah Kehidupan”. * Artikel atap video sisonai boi mangurupi parlajar Bibelmu ase porsaya anggo ra ia mandalankon prinsip ni Bibel lambin dear ma holi goluhni.

9. Sonaha ibahen ham ase ra parlajar Bibelmu mansaritahon aha na iparlajarisi hubani hasoman ampa kaluargani?

⁹ Anggo dong parlajar Bibelmu na domma marhajabuan, ai dihut do homa pasanganni marlajar? Anggo lape, arahkon ma ia ase dihut marlajar pakon nasiam. Ojur ma parlajar Bibelmu ase ra patorangkon aha na iparlajarisi hubani hasoman ampa kaluargani. (Joh. 1:40- 45) Sonaha carani? Sungkun ham ma ia: “Naha ibahen ham laho patorangkon ajaran on?” atap “Ayat na ija do na laho ipilih ham?” Anggo ilatih ham ia sonai, holi boi ma homa ia mangajari na legan. Anggo domma sosok panorangni, boi ma ia gabe parbarita na lape ididi. Sungkun ham ma homa ia atap na dong do hasoman ampa kaluargani na rosuh marlajar Bibel. Anggo adong, jumpahi ma halak ai janah arahkon ma ia marlajar Bibel. Patuduh ma video Sonaha do Tongon Ranggian Parlajaran Bibel Nami? hu bani. *

10. Domu bani 1 Tessalonika 2:7, 8, sonaha hita boi mangusihi si Paulus?

¹⁰ Maningon parduli do hita hubani parlajar Bibelta halani ra do gabe hasoman sahaporsayaonta sidea holi. (Basa 1 Tessalonika 2:7, 8.) Ra do lang urah bani laho mandalankon harosuh ni Jahowa ampa manadingkon hasomanni hinan. Halani ai, urupi ma ase boi dapotsi hasoman i kuria. Patuduh ma anggo ham pe boi gabe hasomanni. Jadi, sobali marlajar Bibel gati ma telepon atap SMS ham ia ase iahapkon ia parduli do ham hu bani.

11. Sonaha ase parlajar Bibelta boi lambin toguh janah orot hubani Jahowa, janah mase?

¹¹ Dong na mangkatahon, “Porlu do hasoman-hasoman i huta mangurupi ase boi dakdanak dear marparlahou ronsi magodang ia.” Sonai ma homa parlajar Bibelta. Porlu do homa sanina botou i kuria mangurupisi ase boi ia lambin orot hubani Jahowa. Halani ai, tontu sihol ma uhurta patandahon ia hubani sidea. Jadi sanggah dong parsoalanni, boi ma sanina botou i kuria patoguhkonsi. Sihol do homa hita mangurupi parlajar Bibelta ase iahapkon ia holong do ganup sanina botou hu bani. Anggo iahapkon ia ai, gabe urah ma ia manadingkon hasoman-hasomanni na lang sisombah Jahowa. (Pod. 13:20) Porini dong hasomanni na masogam hu bani, lang borit uhurni halani domma bahat hasomanni i kuria.​—Mrk. 10:29, 30; 1 Ptr. 4:4.

12. Mase maningon gati ipatugah hita ponting tumang do mangondoskon diri bani Jahowa janah ididi?

¹² Gati ma patugah hubani parlajar Bibelmu ponting tumang do mangondoskon diri hubani Jahowa janah ididi.  Sasintongni sanggah hita mangurupi halak marlajar Bibel, tujuanta ai ma ase ididi do sidea. Jadi anggo domma piga-piga bulan ia marlajar, janah domma roh hu partumpuan maningon ibotoh ia ma anggo hita sihol mangurupisi gabe Saksi Jahowa.

13. Aha do na maningon ibahen parlajar Bibel na sihol ididi?

¹³ Anggo dong parlajar Bibel na sihol ididi, dong piga-piga na maningon ibahen ia! Na parlobei, maningon itanda ia do Jahowa, porsaya Bani, janah mangkaholongi-Si. (Joh. 3:16; 17:3) Sihol do ia lambin orot hubani Jahowa ampa sanina botou i kuria. (Heb. 10:24, 25; Jak. 4:8) Maningon ra do homa ia manadingkon hasomalanni na sambor janah mambahen hamubahon. (Lah. 3:19) Anjaha ra do ia mansaritahon hasintongan na iparlajarisi hubani na legan. (2 Kor. 4:13) Anggo domma ibahen ia ganupan ai, puji anjaha ojur ma ia ase totap mandalankon ai. Dob ai, boi ma ia mangondoskon diri hubani Jahowa janah ididi. (1 Ptr. 3:21; 4:2) Tontu malas tumang do uhur ni ganup sanina botou anggo dong parlajar Bibel na ididi.

14. Sonaha hita mambotoh anggo parlajar Bibelta domma mambahen hamajuon?

¹⁴ Maningon sabar do hita sanggah mangurupi parlajar Bibelta ase ra mangondoskon diri hubani Jahowa janah ididi. Tapi sanggah mangurupisi pardiateihon ma, ai dong do harosuhni laho mangidangi Jahowa ampa mandalankon titah ni Kristus? Atap pitah marlajar Bibel dassa ia marosuh?

15. Hunja ibotoh hita anggo parlajar Bibelta domma mambahen hamajuon?

¹⁵ Maningon pangkei ma ipardiateihon hita hamajuon ni parlajar Bibelta. Umpamani, ai ra do ia patugahkon sonaha pangahapni hubani Jahowa marhitei tonggo? (Ps. 116:1, 2) Ai marosuh do ia marlajar Bibel? (Ps. 119:97) Ai taratur do ia roh hu partumpuan? (Ps. 22:23) Ai idalankon ia do podah ni Bibel na dob iparlajarisi? (Ps. 119:112) Ai ra do ia mansaritahon aha na iparlajari hubani kaluarga ampa hasomanni? (Ps. 9:2) Na sipontingan, ai ra do ia gabe Saksi Jahowa? (Ps. 40:9) Porini lape adong age sada na ibahen ia, pindahi ma mase sonai. Dob ai  lamlam ma ham mangulas pakonsi aha na porlu ibahen ia ase mambahen hamajuon. *

16. Hunja ibotoh hita lang porlu itoruskon hita parlajaran Bibel pakon sasahalak?

¹⁶ Dearan do lang itoruskon ham parlajaran Bibel pakon sasahalak na lang ra mambahen persiapan paima marlajar. Dob ai, lang homa ra ia martumpu. Dong ope hasomalanni na sambor anjaha dihut ope hubani ugama na legan. Porini itoruskon ham marlajar pakon halak sisonai, doskon mangajari halak marlangei do ham ai, hape lang ra halakni mosap. Anggo lang ra ia mambahen hamajuon, mase ma pala itoruskon ham marlajar pakonsi?

17. Domu bani 1 Timoteus 4:16, aha do na maningon ibahen ganup parbarita?

¹⁷ Jadi, sanggah mangajari halak marlajar Bibel, marusaha ma hita mangurupi sidea ase mambahen hamajuon. Gunahon ma Bibel sanggah mangajari sidea. Patuduh ma anggo hita marosuh janah porsaya bani ajaran ni Bibel. Sihol do homa hita mangurupi sidea ase marsaor pakon sanina botou i kuria. Dob ai, gati ma patugah bani sidea ponting tumang do mangondoskon diri hubani Jahowa janah ididi. Anjaha pardiateihon ma hamajuon na ibahen ia. (Tonggor ma kotak “ Na Porlu Ibahen Parbarita Ase Parlajar Bibelni Mambahen Hamajuon janah Ididi”.) Tontu malas tumang do uhurta mangurupi sidea mandapot haluahon. Halani ai, marusaha ma hita mambahen na sidearan laho mangurupi sidea mambahen hamajuon janah ididi.