1. Engkai maka banci ikataken maka pendahin erban murid eme pendahin si nelamatken kegeluhen?

PENDAHIN erban murid eme pendahin si nelamatken kegeluhen! Engkai? I bas Matius 28:19, 20, ibereken Jesus perentah, nina, “Laweslah, banlah kalak . . . jadi murid-muridku, . . . peridikenlah kalak e.” Arus kita iperidiken gelah banci selamat janah ndatken kegeluhen si rasa lalap. Kalak si atena iperidiken arus tek maka kegeluhen si rasa lalap banci idatna perban Jesus enggo mate janah ipekeke. Perban si e, ipebetehken Rasul Petrus man kalak Kristen, nina, “Peridin [eme] si nelamatken kena gundari erkelangken kekeken Jesus Kristus.” (1 Pet. 3:21) Emaka sanga sekalak jelma iperidiken, idatna kesempaten guna nggeluh si rasa lalap.

2. Menurut 2 Timotius 4:1, 2, jadi guru si uga nge kita arusna?

² Gelah banci erban murid perlu siusahaken gelah ‘reh beluhna ngajar.’ (Baca 2 Timotius 4:1, 2.) Engkai? Perban iperentahken Jesus kita, “Laweslah, banlah kalak . . . jadi murid-muridku, . . . ajarlah kalak e.” Ikataken Rasul Paulus maka arus ‘tetap’ ilakoken pendahin e, “alu bage iselamatkenndu dirindu bage pe kalak si megiken kam.” Erkiteken si e ikataken Paulus, “Teruslah perdiateken . . . pengajarenndu.” (1 Tim. 4:16) Erkiteken pendahin erban murid lit hubungenna ras pengajaren, emaka siusahakenlah jadi guru si mehuli.

3. Kai si man bahasenta bas artikel enda?

³ Sisampati jutan kalak erlajar Pustaka i belang-belang  doni. Tapi, bagi si ikataken bas artikel sebelumna, siteh ateta uga carana nampati kalak si erlajar Pustaka gelah iperidiken. Bas artikel enda, sibahas kari kai deba nari si perlu ilakoken kalak si ngajari Pustaka gelah banci isampatina kalak si erlajar gelah maju secara rohani janah iperidiken.

4. Engkai maka kalak si ngajarken Pustaka la banci melalasa ngerana? (Nen ka cataten i teruh.)

⁴ Perban meriah siakap ncakapken kerna Pustaka, banci saja situriken kerina si enggo siteh. Tapi la soal kita maba Sora Ermomo, Pelajaren Pustaka si Badia Runggun ntah pe sanga ngajari kalak, ula min melalasa kita ngerana. Adi bage, kai nge si arus silakoken? Arus sikuasai dirita gelah ula sijelasken kerina si enggo siteh kerna sada topik ntah pe ayat Pustaka. * (Joh. 16:12) Cuba ukurindu sanga tangtangna kam iperidiken. Pasti pemetehndu kerna Pustaka la bagi gundari buena. Banci saja paksa si e ajaren-ajaren dasar Pustaka ngenca si itehndu. (Heb. 6:1) Pasti perlu waktu ertahun-tahun guna mpelajari kerina si enggo itehndu gundari. Emaka, sanga kam ngajari kalak ula melalasa si ijelaskenndu.

5. (a) Bas 1 Tesalonika 2:13, kai si ateta iangkai kalak si erlajar? (b) Uga carana gelah banci siiahken kalak si erlajar ncakapken kai si ipelajarina?

⁵ Ateta min gelah kalak si erlajar iangkaina maka kerina si ipelajarina e rehna arah Pustaka. (Baca 1 Tesalonika 2:13.) Uga carata nampati ia? Iahken ia ncakapken kai si enggo ipelajarina. Asangken kam si njelasken ayat, sekali-sekali banci ka ipindondu ia si njelaskenca. Sampati ia ngangkai kai gunana nasehat Pustaka man bana. Banlah penungkunen si banci nampati ia nuriken kai si igejapkenna ras si iukurina kerna ayat-ayat si ibacana. (Luk. 10:25-28) Misalna, banci sungkunindu bagenda, “Arah ayat e, sipat Jahwe si apai si banci ipelajarindu?” “Adi menurutndu, kai nge manpaatna adi terus siikutken nasehat i bas ayat e?” “Kenca enggo tehndu kerna si e, uga nge perasanndu?” (Kua. 20:5) Ingetlah, tujunta labo nampati ia gelah mbue kel pemetehna kerna Pustaka. Tapi si pentingna, sisampati kalak si erlajar gelah tuhu-tuhu keleng atena kai si ipelajarina janah idalankenna.

6. Kai gunana adi sibaba perberita si erpengalamen sanga kita ngajari kalak kerna Pustaka?

⁶ Sanga isampatindu kalak si erlajar Pustaka, pernah nge ibabandu sekalak  perberita si erpengalamen bas ngajar Pustaka? Banci sungkunndu ia enggo nge cocok carandu ngajar Pustaka janah enggo nge igunakenndu Pustaka alu mehuli ntah lang. Adi reh beluhna atendu ngajari kalak, arus kam meteruk ukur. (Bandingken Perbahanen Rasul-Rasul 18:24-26.) Kenca dung erlajar, sungkuni perberita e, adi menurutna enggo nge iangkai kalak si erlajar Pustaka e kai si ipelajarina. Adi la banci iajarindu kalak si erlajar Pustaka e sedekah sada minggu ntah lebih, banci ipindondu perberita e nggantiken kam. Alu bage banci ratur iban pelajaren Pustaka. Ula pernah iakapndu kalak si erlajar e “jangndu” janah kam ngenca si banci ngajarisa. Perban keleng atendu kalak si erlajar e, pasti la masalah iakapndu ise pe si ngajari ia, si pentingna banci ia terus erlajar Pustaka.

7. Kai si banci nampati kalak si erlajar gelah ngergai kai si ipelajarina?

⁷ Perlu iidah kalak si erlajar maka semangat kel kam ngajarken kebenaren janah tuhu-tuhu tek kam man kebenaren e. (1 Tes. 1:5) Alu bage, mbelin kemungkinenna iergaina kai si ipelajarina. Adi cocok, ceritaken man bana kai manpaat si igejapkenndu perban enggo ndalanken pedah Pustaka. E banci erban ia sadar maka nasehat bas Pustaka pe banci erguna man bana.

8. Kai nari si banci silakoken guna nampati kalak si erlajar Pustaka, janah engkai maka perlu silakoken?

⁸ Kalak si erlajar Pustaka ras kam, banci saja ngadapi piga-piga tentangen. Sanga kena erlajar Pustaka, banci ceritakenndu pengalamen turang senina si berhasil ngadapi tentangen si seri. Banci iajakndu turang senina si banci jadi usihen si mehuli man bana. Ntah, banci idaramindu artikel ras video bas seri “Alkitab Mengubah Kehidupan” * bas jw.org si isina pengalamen si mpegegehi. Pengalamen si bage banci erban ia sadar maka Pustaka pe banci ngubah kegeluhenna.

9. Uga carana ngiahken kalak si erlajar Pustaka gelah nceritaken kai si ipelajarina man kalak si deban?

⁹ Adi enggo erjabu kalak si isampatindu erlajar Pustaka, ikut nge teman geluhna erlajar? Adi lang, banci undangndu ia erlajar. Selain si e, iahken kalak si erlajar  nceritaken kai si ipelajarina man keluargana bage pe man temanna. (Joh. 1:40-45) Uga carana? Banci sungkunndu, “Adi menurutndu uga carana njelasken pelajaren enda man keluargandu?” ntah “Ayat si apai si icidahkenndu man temanndu guna mbuktiken pelajaren e?” Adi bage banndu, sangana ilatihndu ia guna jadi guru. Janah, adi enggo ncukupi syarat ia pagi, banci ia jadi perberita si lenga iperidiken janah mulai erberita. Banci ka isungkunindu ia lit nge kalak si itandaina si atena erlajar Pustaka? Adi lit, banci mis hubungindu kalak e janah sungkuni nggit nge ia erlajar Pustaka ntah lang. Cidahken man bana video Uga kin Situhuna Program Pelajaren Pustaka si Badia Kami? *

10. Menurut 1 Tesalonika 2:7, 8, uga carana kalak si ngajar Pustaka banci ngusih Rasul Paulus?

¹⁰ Kalak si ngajar arus tuhu-tuhu ermediate man kalak si iajarina. Perlu ianggapna kalak si erlajar e calon turang seninana. (Baca 1 Tesalonika 2:7, 8.) Pasti la menukah iakapna nadingken teman-temanna si mbarenda janah erban perubahen gelah banci ngelayani Jahwe. Emaka, perlu sampatindu ia ndarami teman-teman si mehuli bas runggun. Kam pe arus jadi teman si mehuli man bana. Contohna, selain erlajar Pustaka banci ibanndu waktundu ras ia. Banci tuhu-tuhu ibuktikenndu maka kam ermediate adi itelponndu ia, ikirimndu SMS, ntah pe reh kam ku rumahna.

11. Kai ateta si ilakoken kalak si erlajar, janah engkai?

¹¹ Sada kuan-kuanen bas Afrika ngataken, “Perlu sada kuta guna mpebelin sekalak anak.” Kita pe banci ka sikataken, “Iperluken sada runggun guna nampati kalak si erlajar Pustaka gelah jadi murid.” Emaka, perlu sipetandaken kalak si erlajar ras kita man turang senina bas runggun. Alu bage, banci itandaina umat Jahwe janah banci isampati kalak e ia gelah reh rembakna ras Jahwe janah mpegegehi ia sanga lit masalah. Ateta meriah min iakapna bas runggun, janah rembak ras turang senina. Tertarik min ia jadi bagin arah umat Jahwe si perkeleng. Alu bage, reh nukahna iakapna lanai erteman ras kalak si la nampati ia engkelengi Jahwe. (Kua. 13:20) Adi teman-temanna si mbarenda lanai nggit erteman ras ia, itehna maka banci idatna teman-teman si  mehuli bas organisasi Jahwe.​—Mrk. 10:29, 30; 1 Pet. 4:4.

12. Engkai maka arus rusur siceritaken kerna pembaktin ras peridin?

¹² Perlu rusur siceritaken man kalak si erlajar maka penting kel pembaktin ras peridin. Ingetlah, tujunta ngajari kalak kerna Jahwe eme nampati ia ngelayani Jahwe janah iperidiken. Kenca kalak si erlajar enggo erlajar Pustaka piga-piga bulan janah enggo mulai reh ku perpulungen, arus iangkaina maka tujunta erlajar Pustaka ras ia eme nampati ia jadi sekalak Saksi Jahwe.

13. Kai si perlu ilakoken kalak si erlajar Pustaka gelah banci iperidiken?

¹³ Lit piga-piga si arus ilakoken kalak si erlajar Pustaka gelah banci iperidiken. Tangtangna, arus itandaina Jahwe, ikelengina Ia janah tek man baNa. (Joh. 3:16; 17:3) Perlu ka ia rembak ras Jahwe bage pe turang senina bas runggun. (Heb. 10:24, 25; Jak. 4:8) Lanai ilakokenna perbahanen si la mehuli janah ertobat ia arah dosa-dosana. (Perb. 3:19) Perlu iturikenna kinitekenna man kerina kalak. (2 Kor. 4:13) Selain si e, perlu ibaktikenna dirina man Jahwe janah ibuktikenna alu iperidiken. (1 Pet. 3:21; 4:2) Pasti meriah ukurta sanga ia iperidiken! Adi enggo ilakokenna si e kerina gelah banci iperidiken, perlu rusur sipuji ia janah sibereken ka semangat.

14. Uga nge carandu mperdiateken kemajun rohani kalak si erlajar?

¹⁴ Perlu kita sabar nampati kalak si erlajar gelah mbaktiken diri janah iperidiken. Tapi, perlu kang siteh tuhu-tuhu nge atena ngelayani Jahwe ntah lang. Ipatuhina nge perentah-perentah Jesus? Ntah nambahi pemeteh kerna Pustaka saja ngenca atena?

15. Kai buktina maka kalak si erlajar e enggo banci iperidiken?

¹⁵ Teruslah perdiateken kemajun si iban kalak si erlajar Pustaka. Misalna, iturikenna nge perasanna man Jahwe? Ertoto nge ia man Jahwe? (Msm. 116:1, 2) Meriah nge iakapna mbaca Pustaka? (Msm. 119:97) Ratur nge ia reh ku perpulungen?  (Msm. 22:23) Ibanna nge perubahen i bas geluhna? (Msm. 119:112) Enggo nge iceritakenna kai si ipelajarina man keluarga bage pe temanna? (Msm. 9:2) Si pentingna kel, nggit nge ia jadi sekalak Saksi Jahwe? (Msm. 40:9) Adi kai pe lenga lit ilakokenna, sungkunilah engkai maka banci bage. Kenca si e, bahas ras ia alu cara si mehuli tapi terus terang. *

16. Kai saja nge si erbanca maka kalak si erlajar arus ipengadi?

¹⁶ Gelah banci siteh perlu nge siterusken ntah lang ngajari kalak, perlu rusur si sungkuni banta, ‘La nge ibanna persikapen sope lenga erlajar? La nge ia reh ku perpulungen? La nge iperubahina perbahanenna si la mehuli? La nge ia ndarat arah agamana si mbarenda?’ Adi jawapenna lang, sia-sia nge adi iterusken erlajar ras ia. Enda bali bagi ngajari kalak erlangi tapi la ia nggit bernak. Adi la tuhu-tuhu iergaina kai si ipelajarina janah adi la ia nggit erban perubahen, engkai maka iteruskenndu erlajar ras ia?

17. Menurut 1 Timotius 4:16, kai si arus ilakoken kerina kalak si ngajar Pustaka?

¹⁷ Serius kel siakap tanggung jawap erban murid, emaka sisampati ateta kalak si erlajar gelah iperidiken. Sigunakenlah Pustaka sanga ngajar janah semangatlah i bas ngajar. Siiahken kalak si erlajar gelah ndarami teman bas runggun janah rusurlah siceritaken kerna pembaktin ras peridin. Teruslah perdiateken kemajun rohanina. (Nen kotak, “ Si Perlu Ilakoken Kalak si Ngajar Pustaka gelah Kalak si Iajarina Banci Dungna Iperidiken.”) Meriah ukurta banci ikut bas pendahin nelamatken kegeluhen enda! Mbera-mbera terus silakoken asa ngasupta nampati kalak si erlajar gelah iperidiken.