1. How wi noa dat di werk weh wi du fi mek disaiplz ku sayv peepl laif?

DI WERK weh wi du fi mek disaiplz ku sayv peepl laif! How wi noa dat? Da Machyu 28:19, 20, Jeezas mi gi dis koman: ‘Goh ahn teech peepl fi bee mai disaipl, ahn baptaiz dehn.ʼ Yu tink ih impoatant fi geh baptaiz? Weh di Baibl tel wi bowt baptizm? If wi waahn get evalastin laif, wi haftu geh baptaiz. Sombadi weh waahn geh baptaiz haftu bileev dat ih onli ku get evalastin laif bikaaz Jeezas mi ded fi wi. Dat da wai di apasl Peeta mi tel di bradaz bak den: “Baptizm . . . di sayv unu now, . . . bikaaz a fayt eena Jeezas Krais hoo don kohn bak tu laif.” (1 Peet. 3:21) Soh wen wahn nyoo disaipl geh baptaiz, ih ga di hoap fi liv fareva.

2. Akaadn tu 2 Timoti 4:1, 2, weh kaina teecha wi fi bee?

² Fi mek disaipl, wi need fi laan fi “teech peepl gud.” (Reed 2 Timoti 4:1, 2.) Wai? Bikaaz Jeezas mi gi wi dis koman: ‘Goh ahn teech peepl fi bee mai disaipl. Teech dehn fi obay aal di tingz weh Ai mi koman unu.ʼ Di apasl Paal mi tel wi fi “kip aan di werk haad” fi mek disaipl, ahn den ih seh dat if wi du dis, wi wahn sayv wiself ahn di peepl weh lisn tu wi. Soh wi ku si wai Paal mi seh: ‘Du yu bes fi bee wahn gud teecha.ʼ (1 Tim. 4:16) If wi waahn mek disaipl, wi need fi teech peepl. Sayka dat, wi haftu mek shoar dat wi teech dehn eena di bes way.

3. Weh wi wahn diskos eena dis aatikl bowt how fi kandok Baibl stodiz?

³ Wi di stodi di Baibl wid milyanz a peepl aal oava di werl. Bot laik weh wi diskos eena di laas aatikl, wi waahn si how  wi ku help moa a dehn fi kwalifai fi geh baptaiz ahn serv Krais. Eena dis aatikl, wi wahn diskos faiv moa tingz weh wi need fi du fi help wahn Baibl styoodent kwalifai fi geh baptaiz.

4. Wai wahn teecha noh fi taak tu moch pahn wahn Baibl stodi? (Koment pahn di futnoat.)

⁴ Wi lov weh wi teech fahn di Werd a Gaad. Soh sohntaim wi mait waahn taak tu moch bowt it. An ih noh mata if wi di kandok di Wachtowa Stodi, di Kangrigayshan Baibl Stodi, er if wi di stodi di Baibl wid sohnbadi, wi noh fi taak tu moch. Wi waahn mek shoar dat wi yooz di Baibl fi teech di styoodent, soh wi noh fi taak tu moch. Wi haftu shoa self-kanchroal ahn noh chrai eksplayn evriting weh wi noa bowt wahn sertn Baibl vers er tapik. * (Jan 16:12) Tink bowt humoch yu mi noa bowt di Baibl wen yu mi geh baptaiz ahn humoch moa yu noa now. Bak den, yu praabli onli mi andastan di baysik Baibl teechinz. (Heeb. 6:1) Ih mi tek yaaz fi mek yu noa weh yu noa tudeh, soh noh chrai teech yu styoodent aal weh yu noa eena wan sidong.

5. (a) How 1 Tesaloanyanz 2:13 help wi fi si weh wi need wi styoodent fi andastan fan ih Baibl stodi? (b) How wi ku inkorij wi Baibl styoodent fi taak bowt weh ih di laan?

⁵ Wi waahn wi styoodent andastan dat weh ih di laan da fahn di Werd a Gaad. (Reed 1 Tesaloanyanz 2:13.) How wi ku du dat? Inkorij yu styoodent fi taak bowt weh ih di laan. Insteda eksplayn evri Baibl vers tu yu styoodent, aks ahn fi eksplayn som a dehn tu yoo. Help di styoodent fi si how ih ku yooz weh ih di laan fahn di Baibl eena ih oan laif. Aks ahn kweschanz weh wahn help ahn fi eksplayn weh ih tink ahn feel bowt di skripchaz weh ih reed. (Look 10:25-28) Fi egzampl, yu ku aks ahn: “How dis skripcha help yu fi si wan a Jehoava kwaliti dehn?” “How di tingz weh yu jos laan fahn di Baibl help yoo?” “How yoo feel bowt weh yu jos laan?” (Prov. 20:5) Soh di impoatant ting, den, da noh humoch wahn Baibl styoodent noa, bot da humoch ih lov weh ih laan ahn how ih yooz it eena ih laif.

6. Wen yu goh pahn yu Baibl stodi, wai ih gud fi kehr sombadi wid yu weh ga lata ekspeeryens di teech adaz?

⁶ Wen yu goh pahn yu Baibl stodi, yu eva kehr sombadi wid yu weh ga lata ekspeeryens di teech adaz? If yu du dat, yu ku aks dehn fi tel yu weh dehn tink bowt  how yu kandok di Baibl stodi an if yu di yooz di Baibl fi teech gud. Yu haftu bee hombl if yu waahn laan fi teech peepl beta. (Kompyaa Aks 18:24-26.) Yu ku aks di ada poblisha if ih tink di styoodent di andastan weh ih di laan. Yu ku aks da saym poblisha fi kandok di stodi fi yu if yu noh wahn deh rong fi wan er too weeks. Dis wahn help di styoodent fi si dat di stodi veri impoatant. Neva feel dat dis da “fi yoo” stodi ahn dat nobadi els ku kandok it. Aftaraal, yu waahn di bes fi di styoodent soh dat ih kip aan di laan di chroot.

7. How yu ku teech yu styoodent fi lov weh ih di laan?

⁷ Yu styoodent need fi si dat yu lov an bileev weh di Baibl teech. (1 Tes. 1:5) Den, moa dan laikli, ih wahn lov weh ih di laan fahn di Baibl. Ahn maybi yu ku tel ahn how di Baibl help yu eena yu oan laif. Den ih wahn si dat di Baibl ku help ahn tu.

8. Wat els yu ku du fi help yu Baibl styoodent, ahn wai yu wuda waahn du dat?

⁸ Joorin di Baibl stodi, tel yu styoodent bowt ada bradaz ahn sistaz weh mi ga prablemz simila tu fi dehn wan, ahn how dehn mi deel wid it. Yu ku kehr wahn nada poblisha fahn di kangrigayshan weh gaahn chroo wahn simila prablem tu weh yu Baibl styoodent di goh chroo, ahn laik dat, yu styoodent ku benifit fahn di poblisha ekspeeryens. Er yu ku fain sohn inkorijin ekspeeryens pahn jw.org eena di seeriz “Di Baibl Chaynj Peepl Laif.” * Dehndeh aatikl ahn veedyo wahn help yu Baibl styoodent fi si dat ih wuda bee waiz fi yooz Baibl prinsiplz eena ih laif.

9. How yu ku inkorij yu Baibl styoodent fi taak tu ih famili ahn frenz bowt weh ih di laan?

⁹ If di styoodent marid, maybi yu ku invait ih hozban er waif fi jain een pahn di stodi. Inkorij yu styoodent fi taak tu ih famili ahn frenz bowt weh ih di laan. (Jan 1:40-45) How yu ku du dat? Yu ku aks di styoodent: “How yoo wuda eksplayn dis tu yu famili?” er “Wich skripcha yu wuda yooz fi eksplayn dis tu yu fren?” Wen yu du dat, yu di chrayn yu styoodent fi bee wahn teecha. Den wen ih kwalifai, ih ku jain di kangrigayshan eena di minischri az wahn poblisha, eevn doa ih noh baptaiz yet. Yu ku aks di styoodent if ih noa enibadi els weh wuda waahn stodi di Baibl. If  ih noa sombadi weh waahn stodi di Baibl, yu ku chek wid dehn ahn chrai staat wahn stodi rait away. Shoa di persn di veedyo Weh Aal Hapm Pahn Wahn Baibl Stodi? *

10. How wi ku kapi di egzampl weh Paal set fi wi eena 1 Tesaloanyanz 2:7, 8?

¹⁰ Wahn teecha haftu shoa dat ih kay bowt ih styoodent. Ih need fi si ahn az ih fyoocha brada er sista. (Reed 1 Tesaloanyanz 2:7, 8.) Ih noh eezi fi mek ih giv op di frenz weh ih gat eena di werl ahn mek aala di chaynjiz weh ih need fi mek fi serv Jehoava. Wi haftu help ahn fain frenz eena di kangrigayshan. Bee wahn gud fren tu yu Baibl styoodent, ahn noh onli spen taim wid ahn pahn di Baibl stodi, bot spen taim wid ahn di du ada tingz tu. Wi ku kaal er teks ahn pahn wahn day wen da noh di taim fi stodi, ahn dis wahn shoa dat wi kay bowt ahn.

11. Weh wi waahn wi styoodent dehn fain eena di kangrigayshan, ahn wai?

¹¹ Som peepl seh: “Ih tek wahn vilij fi rayz wahn pikni.” Wee ku seh: “Ih tek wahn kangrigayshan fi mek wahn disaipl.” Dat da wai wahn gud teecha wahn inchrojoos ih styoodent tu ada bradaz eena di kangrigayshan soh dat dehn ku help ahn jraa kloasa tu Jehoava. Den di styoodent wahn ku injai frenship wid Gaad peepl. Ahn dehndeh bradaz wahn help ahn an inkorij ahn wen ih di goh chroo prablemz. Wi waahn eech styoodent fi feel laik ih bilangz eena di kangrigayshan ahn dat ih da paat a wi spirichwal famili. Dis da wahn waam ahn lovin famili a bradaz ahn sistaz, an if dehn da paat a it, ih wahn eeziya fi mek dehn stap spen taim wid peepl hoo noh lov Jehoava. (Prov. 13:20) If di fren dehn weh ih mi gat bifoa staat tu avoid ahn, ih wahn noa dat ih ku fain chroo frenz eena Jehoava aaganaizayshan.—Maak 10:29, 30; 1 Peet. 4:4.

12. Wai wi shuda taak tu wi Baibl styoodent bowt dedikayshan ahn baptizm?

¹² Evri chaans weh yu get, yu shuda taak tu yu Baibl styoodent bowt dedikayshan ahn baptizm. Help ahn fi si wai dis da wahn impoatant disizhan fi mek. Aftaraal, di reezn wai wi stodi wid wahn persn da fi teech ahn fi serv Jehoava ahn help ahn kwalifai fi geh baptaiz. Afta di styoodent di stodi fi wahn fyoo monts, an espeshali if ih staat goh da di meetin dehn, ih  shuda andastan dat di perpos a ih stodi da fi help ahn fi bee wan a Jehoava Witnisiz.

13. Weh wahn styoodent need fi du fi kwalifai fi geh baptaiz?

¹³ Wahn Baibl styoodent weh sinsyaa ku du sevral tingz fi mek proagres ahn kwalifai fi geh baptaiz! Fers, di styoodent need fi get fi noa an lov Jehoava ahn put fayt eena Hihn. (Jan 3:16; 17:3) Aalso, ih need fi jraa kloasa tu Jehoava ahn tu di bradaz ahn sistaz eena di kangrigayshan. (Heeb. 10:24, 25; Jay. 4:8) Eena di langa ron, ih wahn feel sari bowt weh ih yoostu du ahn stap du it. (Aks 3:19) An ih wahn taak tu adaz bowt weh ih di laan. (2 Kor. 4:13) Den ih wahn dedikayt ih laif tu Jehoava ahn geh baptaiz. (1 Peet. 3:21; 4:2) Dat wahn bee wahn hapi day fi evribadi! Komen di styoodent wen ih du aal weh ih haftu du fi kwalifai fi geh baptaiz an inkorij ahn fi kantinyu du dehnya tingz.

14. How wi ku si humoch proagres wi styoodent di mek?

¹⁴ Wi haftu bee payshent wen wi di help wi styoodent fi mek spirichwal proagres soh dat dehn ku kwalifai fi geh baptaiz. Bot wi aalso need fi fain owt if ih reeli waahn serv Jehoava Gaad. Tink bowt dehnya kweschanz: Di styoodent di chrai obay Jeezas komanment dehn? Er ih onli waahn laan inchrestin tingz fahn di Baibl?

15. How wi ku noa if wi styoodent soon kwalifai fi geh baptaiz?

¹⁵ Now an agen, tek di taim fi chek if yu styoodent di mek spirichwal proagres. Fi egzampl, ih eva tel yu how ih feel bowt Jehoava? Ih pray tu Jehoava? (Ps. 116:1, 2) Ih laik reed di Baibl? (Ps. 119:97) Ih chrai kohn da aala di meetin dehn? (Ps. 22:22) Ih mek eni chaynjiz eena ih laif weh shoa dat ih di yooz weh ih di laan? (Ps. 119:112) Ih di taak tu ih famili ahn frenz bowt di tingz weh ih di laan? (Ps. 9:1) Bot di moas impoatant kweschan da dis: Ih waahn bee wan a Jehoava Witnisiz? (Ps. 40:8) If di styoodent noh di mek proagres eena eni wan a dehnya wayz, chrai fi fain owt di reezn wai. Den taak tu ahn bowt it eena wahn kain way, bot noh beet rong di bush. *

16. Wen wi shuda stap stodi wid sombadi?

 ¹⁶ Fahn taim tu taim, aks yuself if yu shuda stap stodi wid sombadi. Aks yuself: ‘Di styoodent pripyaa fi ih stodi? Ih laik goh da di meetin dehn? Ih di mek chaynjiz eena ih laif fi get oava eni bad habit weh ih gat? Ih don lef di cherch weh ih mi bilangz tu?ʼ If di ansa tu dehnya kweschan da no, ahn wi kantinyu fi stodi wid ahn, den da laik wi di teech sombadi how fi swim, bot ih noh waahn geh wet. If di styoodent noh reeli apreeshiayt weh ih di laan an ih noh di mek no chaynjiz eena ih laif, den wai wi shuda kantinyu stodi wid ahn?

17. Akaadn tu 1 Timoti 4:16, weh wi haftu du fi teech wi Baibl styoodent fi bee Krais disaipl?

¹⁷ Jeezas gi wi di koman fi mek disaipl. Tu wee, dis da wahn seeryos rispansabiliti, soh wi waahn help wi styoodent fi mek spirichwal proagres ahn kwalifai fi geh baptaiz. Dat da wai wi haftu mek gud yoos a di Baibl ahn shoa dehn dat wi lov an bileev weh wi teech. Wi haftu inkorij wi styoodent fi mek frenz eena di kangrigayshan. Wi aalwayz haftu taak tu ahn bowt dedikayshan ahn baptizm. Ahn fahn taim tu taim, wi haftu chek humoch proagres wi styoodent di mek. (Si di baks “ Weh Wahn Baibl Teecha Need fi Du fi Help Ih Styoodent Kwalifai fi Geh Baptaiz.”) Wi soh hapi fi tek paat eena dis werk weh ku sayv peepl laif! Wi waahn du evriting weh wi kud fi help wi Baibl styoodent dehn kwalifai fi geh baptaiz.