1. Ka uagu wariñaga aban lan dasi lánina asalbaruni hadügǘn disipulugu?

ABAN dasi lánina asalbaruni hadügǘn disipulugu. Ka uagu wariñagei le? Haritagua waméi ruti lan Hesusu gumadi lidan Matéu 28: 19, 20 dan le lariñagunbei “heiba”, “adüga humaña nánime disipulugu” ani “badisei humaña”. Ani subudi wamuti súdini lan badisei ladüga mosu wabadiseirun anhein busén wabéi lun wasalbarun. Gürigia ha busenbaña habadiseirun mosu hafiñerun ladüga lan lounwen Hesusu wawagu ani águyugua ligía gayara lubéi wasalbarun. Ligía lariñagubei apostolu Féduru houn kristiánugu: “Dúnati ligía, ítara liña hamuga kei lidunarina badisei guentó, le ídangiñebei wanügǘwa lun wasalbarun, [...] lau lásaarun Kristu lídangiñe óunweni” (1 Fe. 3:21). Ligíati, lúmagiñe habadiseirun gürigia gayaraahalime hemenigidun hawinwandun lun súnwandan.

2. Según le lariñagubei 2 Timotéu 4:1, 2, ka agurabahóubei wámagiñe wagía le íchugubei aturiahani?

² Lun wadügün disipulugu, mosu ‘warufudahan’ (aliiha huméi 2 Timotéu 4:1, 2). Ka uagu? Ladüga ruti Hesusu gumadi woun: “Heiba”, “adüga humaña nánime disipulugu” ani “badisei humaña”. Ariñagati apostolu Pábulu lun Timotéu lun deregüdagu lan lidan dasi le, ani ariñagati giñe Pábulu: “Anhein badüga ítara, basalbaruba, salba hagíame giñe ha aganbubalibu”. Ligía maweirin tubéi wanigi dan le líchugunbalin Pábulu adundehani le lun Timotéu: “Góunigiguaba [...] lau le barufudahabei” (1 Tim. 4:16). Lun wadügün disipulugu mosu warufudahan houn gürigia, ligíati mosu lubéi wáfaagun lun garufudahadi wamá.

3. Kaba wariha lidan arütíkulu le?

³ Sagü dimaasu, arufudaha wamuti inarüni tídangiñeti Bíbülia houn míñunu gürigia. Gama lumoun, kei warihini lidan arütíkulu le lubaragiñebei le, busentiwa wasigirun íderaguaña gürigia lun hawanserun lun habadiseirun. Lidan arütíkulu le, warihiba  seingü katei le lunbei hadügüni íchugutiña aturiahani lun híderaguniña aturiahatiña Bíbülia lun hawanserun lun habadiseirun.

4. Ka uagu mosu lubéi háfaagun íchugutiña aturiahani lun harufudun ragügua unguaü dan le híchugun aturiahani? (Ariha huméi giñe abürüdǘni).

⁴ Sun wagía, hínsiñeti woun lun warufudaha tuagu Lererun Bungiu. Ligíati, másiñati busenbadiwa lan wayanuha tuagu súnwandan. Ligíati, anhein wadundehañoun lubéi taturiahoun Garüdia Awisahatu, taturiahoun Bíbülia lidan damuriguaü o dan le wíchuguña lan aturiahani tídangiñeti Bíbülia, mayanuha wamá lóugiñe le lubeibei. Ígira wamá lun Bíbülia lan ayanuha. Lun lira, áfaagua wamá lun warufudun ragügua ungua lun mafuranguagüdün wamani sun katei le wasubudirubei luagu tema o bérusu le wakutihabei (Huan 16:12). * Góubaguagüda waméi le wasubudirubei guentó luma le meha wasubudirubei dan le wabadiseirunbei. Másiñati subudirügü wamuti meha ariñahani le súdinitimabei tídangiñeti Bíbülia (Ebü. 6:1). Anhein barǘ wabéi saragu irumu lun wasubudiruni le subudi wamaalibei guentó, máfaagua wamá lun warufudahani sun katei le wasubudirubei houn aturiahatiña lidan aban weyu.

5. a) Según 1 Tesalónikana 2:13, ka wabusenrubei lun gunfuranda hamani aturiahatiña? b) Ka gayaraabei wadügün lun hafuranguagüdüni aturiahatiña le hafurendeirubei?

⁵ Busentiwa lun gunfuranda hamani aturiahatiña tídangiñe lan Lererun Bungiu liabin le hafurendeirubei (aliiha huméi 1 Tesalónikana 2:13). Lun wibihini, ínchaha wamaña lun hayanuha luagu le hafurendeirubei. Lubaragiñe wafuranguagüdün somu bérusu houn, álügüda wamaña lun hafuranguagüdüni woun. Íderagua wamaña lun harihini ida luba lan hawinwanduni le hafurendeirubei. Adüga wamá álügüdahani houn le gayaraabei líderaguniña afuranguagüdei le hasaminarubei luma le hasandirubei luagu bérusu burí le haliihabei (Luk. 10:25-28). Kei hénpulu, álügüda wamaña: “Gayaraati san harihin aban lídangiñe ligaburi Heowá lidan bérusu le?”, “Ka buiti gayaraabei lanügüni inarüni tídangiñeti Bíbülia le hun lidan hibagari?”, “Ka hasandirubei luagu le hafurendeirubei guentó?” (Ari. 20:5). Mama hasubudirun saragu katei súdinitimabei, le súdinitimabei, lun línsiñedun le hafurendeirubei aturiahatiña houn luma lun hawinwanduni.

6. Ka uagu buidu lubéi lun wagunbirahaniña íbirigu ha subudihabúbaña luáguti lichugún aturiahani lun houdin wamá íchiga aturiahani?

⁶ Agunbiraha wamutiña san íbirigu ha subudihabúbaña luáguti lichugún aturiahani lun houdin wamá íchiga aturiahani? Ánhawa agunbirahaña íbirigu ha lun houdin wama, gayaraati  wamuriaha hama lun hariñaguni woun ka lan hasaminarubei luagu ligaburi wíchuguni aturiahani ani anhein ígira wabéi lun Bíbülia lan arufudaha. Lun garufudahadi wamá, mosu ǘnabugu wamá (ariha huméi giñe Adügaü 18:24-26). Gayaraati giñe wálügüdüniña íbirigu ha ñǘdünbaña wama íchiga aturiahani, anhein samina habéi gunfuranda hamani aturiahatiña le haturiahabei. Ánhawa áfayaha, amuriaha wamá hama somu íbirigu lun híchuguni aturiahani wabá. Ítara luba mararamun lan aturiahani ani harihubei aturiahatiña súdini lan. Masaminara wamá siñá lan híchugun amu íbirigu aturiahani houn ha aturiahabaña wama. Busentiwa buiti houn ha aturiahabaña wama luma lun mararamun lani ni kata hawanserun.

7. Kaba adüga lun hagundaarun aturiahatiña lau le hafurendeirubei?

⁷ Súdiniti lun harihini aturiahatiña wayanuha luagu inarüni le tídanbei Bíbülia lau ubebeni luma ichouruni (1 Tesa. 1:5). Másiñati ítara luba lan hagundaarun lau le hafurendeirubei. Háfuga gayara lan wariñaguni houn ida liña lan tíderaguniwa Bíbülia lidan wabagari. Ítara luba harihini gayara lan giñe tíderaguniña Bíbülia lidan habagari.

8. Ka amu katei gayaraabei wadügün lun wíderaguniña ha aturiahabaña wama, ani ka uagu?

⁸ Dan le wíchuguña lan aturiahani, abahüdaha wamá houn ha aturiahabaña wama hawagu íbirigu ha agagibudagubaña luma lénrengunga libe le úmabei hagagibudagua. Gayaraabei funa san hibihin aturiahatiña buiti lídangiñe sügǘ le hani íbirigu ha lídanbaña damuriguaü le ñein wabéi? Agunbiraha wamaña íbirigu hagía lun houdin wama íchiga aturiahani. Gayaraati giñe wayusurun lídangiñe sügǘ le íchugubei gurasu, le gayaraabei wadarirun lidan jw.org, kei burí arütíkulu “La Biblia les cambió la vida”. * Líderagubaña arütíkulu luma bidéu burí le ha aturiahabaña wama lun harihini gayara lan tíderaguniña Bíbülia lun hadügün asansiruni lidan habagari.

9. Ka gayaraabei wadügüni lun wíderaguniña aturiahatiña lun hayanuhan hama haduheñu luma hama hamadagu luagu le hafurendeirubei?

⁹ Anhein maríei habéi aturiahatiña ka uagu mamuriaha wabéi hama hámari, lun hóundarun lidoun aturiahani? Ínchaha wamaaña aturiahatiña lun hayanuha hama haduheñu luma hama hamadagu luagu le furendei hamaalibei (Huan 1:40-45). Gayaraati wálügüdüniña: “Ida luba hamuga hafuranguagüdüni saminaü  le houn hiduheñu” o “kaba hamuga bérusu hayusura lun hafuranguagüdüni saminaü le lun aban humada?”. Anihán aban igaburi lun wíderaguniña aturiahatiña lun aban hamá máisturugu. Ligíati danme le aranseeña aturiahatiña lun aban hamá apurichihatiña mabadiseirungiña, gayaraabei hagumeserun apurichiha úara luma damuriguaü. Gayaraabei wálügüdüniña anhein subudi habéi somu gürigia houn ha busenbaña hafurendeirun tuagu Bíbülia. Ánhaña ariñaga woun anha lan, áluaha wamaña gürigia hagía lau lóufudagun ru wamá aturiahani houn. Arufuda waméi bidéu Ida liña wíchugun külase tídangiñeti Bíbülia? houn. *

10. Según 1 Tesalónikana 2:7, 8, ida luba háyeihani íchugutiña aturiahani lubuidun lani Pábulu hénpulu?

¹⁰ Mosu hebereserun íchugutiña aturiahani tídangiñe sun hanigi hau ha aturiahabaña hama. Lunti harihiniña kei gürigia ha lúnbaña hábirigu hamá ámuñegü (aliiha huméi 1 Tesalónikana 2:7, 8). Hénrenguti houn aturiahatiña hígiruni hamadagua hama ubouaguna luma hadügüni sánsiguaü le emegeirúbei lun heseriwidun lun Heowá. Ligíati, íderagua wamaaña adarira umadagu inarünitiña lidan damuriguaü. Mámarügü dan le woudin íchiga aturiahani lunti lan wásügüra dan hama ha únbaña wíchiga aturiahani, warufuduba giñe gamadagua wamá hama dan le wásügürün dan hama lidan amu weyu. Warufudubei giñe ánhawa agúara houn abürüha wagía houn luéigiñe gágamuru o wásügürün arihaña murusunraü oura.

11. Ka wabusenrubei lun hadariruni aturiahatiña Bíbülia lidan damuriguaü ani ka uagu?

¹¹ Ariñagati aban abürüdǘni áfürikana: “Mégeiwatiña saragu gürigia lun lagüriarún aban irahü”. Ítarameme gayaraati wariñagun: “Mégeiwati damuriguaü lun hadügǘn disipulugu”. Ligía harufudubaliña íchugutiña aturiahani aturiahatiña, houn íbirigu ha gayaraabei híderaguniña aturiahatiña lun hayarafadun lun Heowá. Ligíati, gayaraabei hásügürün aturiahatiña dan hama lumutuniña Bungiu, lun habuiduragüdüni hamadagua luma Heowá luma lun hibihin gurasu hámagiñe íbirigu dan le gaturobulin hamá. Busentiwa lun hasandiragun aturiahatiña houngua kei aban hádangiñe lílana damuriguaü. Ánhawa adüga lun buidu lan hasandiragun houngua tidan lóundarun Heowá ménrengunbei lun hígiruniña umadagu ha míderagubaliña lun hínsiñe lan Heowá houn (Ari. 13:20). Ánhaña hígira hamadagu, hasubudirubei luagu gayara lan hadügün umadagu buítiña tidan lóundarun Heowá (Mar. 10:29, 30; 1 Fe. 4:4).

12. Ka uagu mosu lubéi wayanuhan luagu ederegeraguni unguaü luma badisei hama aturiahatiña Bíbülia?

¹² Ayanuha wamá manufudeuga luagu ederegeraguni ungua luma badisei. Lugundun létima wabusenrubei dan le wíchugun aturiahani tídangiñeti Bíbülia houn gürigia lun habadiseirun luma lun heseriwidun lun Heowá. Anhein barühali lubéi aban gürigia fiu hati aturiaha ani abasihali adamuridagua lunti gunfuranda lani le lan wabusenrubei lun aban lan hádangiñe gefentiña luagu Heowá ligía.

13. Ka lunbei hadügüni aturiahatiña lun habadiseirun?

¹³ Gürigia ha aturiahatiña Bíbülia ha busenbaña hawanserun adügatiña saragu asansiruni lun gayara lan habadiseirun. Furumiñe, aba hasubudiruni Heowá ani aba híchuguni hafiñen luagu. (Huan 3:16; 17:3). Lárigiñe aba gamadagua hama luma Heowá, luma hama íbirigu (Ebu. 10:24, 25; Sant. 4:8). Lau lásügürün dan, aba hígiruni hadügüni le wuribabei ani aba hasaküriha (Adü. 3:19). Lanwoun lira aba línchahaniña hafiñen lun hayanuhan houn amu gürigia (2 Ko. 4:13). Lagumuhóun, aba hederegeruni habagari lun Heowá badisei hagía lun harufuduni deregeguaaña lan houngua lun Heowá (1 Fe. 3:21; 4:2). Inarüni aban lan weyu espechaliti lira houn súngubei. Eibu hawanserun aturiahatiña, ariñaga wamá houn tídangiñe sun wanigi buidu lan hadüga ani ínchaha wamaña lun hasigirun awansera.

14. Ida luba hasubudiruni íchugutiña aturiahani anhein hawanseruña lubéi aturiahatiña?

¹⁴ Mégeiwati gaguraasuni lun híderawagun gürigia lun hederegeragun houngua lun Heowá luma lun habadiseirun. Gama lumoun, mama uguñe mama haruga mosu wálügüdüniña anhein busén habéi heseriwidun lun Heowá o mabusenrun hamá. Arihúati san áfaagua hamá lun gaganbadi hamá lun lugumadin Hesusu? Odi aturiaharügütiña ladüga hínsiñe lan houn hafurendeirun tuagu Bíbülia?

15. Ka katei arufudubalin hawanseruña lan aturiahatiña?

¹⁵ Akutiha waméi burí kada átiri dan lun wasubudiruni anhein hawanseruña lubéi aturiahatiña. Kei hénpulu, abahüdagua hamuti san houn amu le hasandirubei luagu Heowá? Furíeitiña san lun Heowá? (Sal. 116:1, 2). Hínsiñeti san houn haliihanu Bíbülia (Sal. 119:97). Ñǘdüntiña san adamuridagua súnwandan? (Sal. 22:22). Adüga hamaali san asansiruni le mégeiwabei lidan habagari? (Sal. 119:112).  Ayanuhaaña san hama haduheñu luma hama hamadagu luagu le hafurendeirubei? (Sal. 9:1). Ani lóugiñe sun katei, busentiña san lun gefentiña hamá luagu Heowá? (Sal. 40:8). Anhein mama lubéi hawanseruña lidan ni aban lídangiñe katei le, akutiha waméi lau lichú au ka lan uagu mawanserun habéi ani ayanuha wamá hama lau aban igaburi furanguti ani lau inebesei. *

16. Ka dan buídubei lun wígiruni warufudaha lun somu gürigia?

¹⁶ Akutiha waméi giñe kada átiri dan anhein lunti lubéi wasigirun íchiga aturiahani tídangiñeti Bíbülia lun somu gürigia. Álügüdagua wamá woungua: “Aranseti san luba aturiahani? Arufudati san busén lan ladamuridagun? Ígira laali san luriban échuni? Furihali san tídangiñe relihión mama inarünitu?”. Anhein ua lubéi óunabagüleibei lun álügüdahani burí le, ítara liña hamuga kamá le larufudahóuña áfulihani lun aban gürigia le mabusenrunti ladüdürün. Anhein marufudun lubéi gürigia ínsiñehabuni luagu le lafurendeirubei ani máfaagunti lun ladügün asansiruni, moun lumuti wasigirun lau aturiahani.

17. Lun wóunigiruni warufudaha kei lariñawagún lidan 1 Timotéu 4:16, ka lunbei ladügüni aban íchuguti aturiahani?

¹⁷ Sériuti wanügüni dasi lánina hadügǘn disipulugu. Busentiwa wíderaguniña ha aturiahabarun Bíbülia wamá lun habadiseirun. Ligíati wígiruba lun Bíbülia lan arufudaha ani arufudaha wamá lau ubebeni luma ichouruni. Wínchahabaña aturiahatiña lun hadügün umadagu lidan damuriguaü ani wariñagubei houn lun hasaminarun luagu hederegeruni habagari luma lun habadiseirun, ani ságüme átiri dan ábame warihini ida liña lan hawanserun (Ariha huméi rekuáduru le lídanbei “ Le lunbei hadügüni ha íchugubaña aturiahani”). Ma lanarime ugundani lau wídehan lidan dasi le lánina lesefuhan ibagari! Ligíati, áfaagua wamá lun wíderaguniña aturiahatiña Bíbülia lun habadiseirun.