1. ¿Achkë rma nqaʼij chë ri yeqatoʼ ri winäq rchë yeʼok rutzeqelbʼëy Cristo nuʼän chë ye kʼïy nkïl kolotajïk?

RI YEQATOʼ ri winäq rchë yeʼok rutzeqelbʼëy Cristo nuʼän chë ye kʼïy nkïl kolotajïk. ¿Achkë rma nqaʼij riʼ? Tnatäj chqë chë chpan Mateo 28:19 chqä 20 Jesús xuʼij qa reʼ: «jäx kʼa», «keʼitjoj ri winäq rchë yeʼok nutzeqelbʼëy» chqä «keʼiqasaj kʼa pa yaʼ». Röj qataman chë kan kowan rejqalen chë jun winäq nqasäx pa yaʼ, rma ya riʼ kʼo chë nuʼän we nrajoʼ nkolotäj qa. Ri winäq ri nrajoʼ nqasäx pa yaʼ kʼo chë nunmaj chë xa xuʼ nrïl kolotajïk rma Jesús xyaʼ rukʼaslemal pa qawiʼ chqä xkʼasöx pä chkikojöl ri kamnaqiʼ. Rma riʼ, ri apóstol Pedro xuʼij reʼ chkë ri cristianos: «Ri bautismo [...] komä chqä najin yixurköl rïx [...] rma rukʼasojixik Jesucristo» (1 Ped. 3:21). Nqʼalajin kʼa chë taq jun winäq nqasäx pa yaʼ, ri winäq riʼ ütz nuyaʼ chwäch ran chë xtkowin xtrïl ri kʼaslemal ri majun bʼëy xtkʼis ta.

2. Achiʼel nuʼij 2 Timoteo 4:1 chqä 2, ¿achkë najowatäj nqaʼän röj ri tijonelaʼ?

² Rchë yeqatoʼ ri winäq rchë yeʼok rutzeqelbʼëy Jesús, nkʼatzin nqatamaj achkë rubʼanik kan pa rubʼeyal yeqatjoj (taskʼij ruwäch 2 Timoteo 4:1, 2). ¿Achkë rma? Rma Jesús xuʼij qa reʼ chqë: «jäx kʼa», «keʼitjoj ri winäq rchë yeʼok nutzeqelbʼëy» chqä «tikʼutuʼ chkiwäch». Ri apóstol Pablo xuʼij che rä Timoteo chë ttjaʼ ruqʼij chpan re samaj reʼ, chqä xuʼij: «We xtaʼän riʼ, xtaköl qa awiʼ rït chqä ri yekʼoxan awchë». Nqʼalajin kʼa chë kan kʼo rma ri xyaʼ qa re naʼoj reʼ che rä: «Chaq taqïl tatzʼetaʼ [...] ri yeʼakʼüt» (1 Tim. 4:16). Rma kan nkʼatzin yeqatjoj ri winäq rchë yeʼok rutzeqelbʼëy Jesús, nqajoʼ kan ütz kitjoxik nqayaʼ.

3. ¿Achkë xtqatzʼët chpan re tjonïk reʼ?

³ Ronojel semanas kan pa millón winäq nkikʼül kitjonik chrij  le Biblia. Ye kʼa, achiʼel xqatzʼët chpan qa ri jun tjonïk, nqajoʼ nqatamaj achkë rubʼanik yeqatoʼ más winäq rchë chanin yeʼok testigos de Jehová. Chpan re tjonïk reʼ xtqatzʼët woʼoʼ naʼoj ri kʼo chë nkiʼän ri tijonelaʼ rchë xkekitoʼ kitijoxelaʼ rchë xkebʼeʼok testigos de Jehová.

4. ¿Achkë rma jun tijonel kʼo chë nuqʼät riʼ rchë ma nuʼij ta jontir ri retaman taq nuyaʼ jun tjonïk? (Tatzʼetaʼ chqä ri nota).

⁴ Jontir nqä chqawäch nqatzjoj ri kantzij chrij ri Ruchʼaʼäl Dios. Ye kʼa we ma nqachajij ta qiʼ, rkʼë jbʼaʼ xa xuʼ röj ri más xtqtzjon. Rma riʼ, kʼo chë nqachajij qiʼ rchë ma nqaʼän ta riʼ taq nqaqʼaxaj ri Tjonïk chrij ri wuj Ri Chajinel, ri Tjonïk chrij le Biblia pa congregación o taq nqayaʼ jun tjonïk. Más ütz tqaksaj le Biblia taq nqakʼüt jun naʼoj. Rma riʼ, taq nuyaʼ jun tjonïk, ri tijonel kʼo chë nuqʼät riʼ rchë ma nuʼij ta jontir ri retaman chrij jun naʼoj o chrij jun versículo (Juan 16:12). * Taquʼ rij reʼ: ¿Junan komä awetamabʼal chrij le Biblia ri kʼo komä chwäch taq xaqasäx pa yaʼ? Rkʼë jbʼaʼ manä. Rkʼë jbʼaʼ xa xuʼ wä ataman ri naʼäy taq naʼoj ri xkʼut chawäch (Heb. 6:1). Rma riʼ, we ri atamabʼal kʼo komä kan kʼïy junaʼ xkʼwaj chawäch rchë xatamaj, ma taquʼ ta rït chë ri atijoxel kan xtkanaj jontir pa rujolon we naʼij jontir che rä chrij jun naʼoj.

5. a) Rkʼë ri nuʼij 1 Tesalonicenses 2:13, ¿achkë nqajoʼ chë nqʼax chwäch ri tijoxel? b) ¿Achkë ütz nqaʼän rchë chë ri winäq nuʼij achkë nunaʼ chrij ri najin nutamaj?

⁵ Nqajoʼ chë ri qatijoxel nqʼax chwäch chë ri najin nutamaj kan chpan Ruchʼaʼäl Dios ntel wä pä (taskʼij ruwäch 1 Tesalonicenses 2:13). Rchë nqkowin nqaʼän riʼ, tqakʼutuj che rä achkë nunaʼ chrij ri najin nutamaj. Pa rukʼexel röj nqqʼalajsan ri textos ronojel mul, más ütz tqaʼij che rä chë keruqʼalajsaj jojun textos chqawäch. Tqatoʼ rchë nkowin nutzʼët achkë rubʼanik nusmajij ri naʼoj ye kʼo chpan le Biblia. Keqabʼanaʼ kʼutunïk che rä ri xttoʼ rchë nuʼij achkë nuchʼöbʼ chqä achkë nunaʼ chkij ri nkiʼij ri versículos ri nuskʼij kiwäch (Luc. 10:25-28). Rkʼë jbʼaʼ, ütz nqakʼutuj reʼ che rä: «¿Yakowin natzʼët rït jun naʼoj ri kʼo rkʼë Jehová chpan re texto reʼ?», «¿Achkë rubʼanik yaturtoʼ rït re naʼoj reʼ?», «¿Achkë nanaʼ rït chrij ri naʼoj ri xqatamaj qa?» (Prov. 20:5). Tjeʼ pa qajolon chë ri más rejqalen ya riʼ chë ri tijoxel yeʼapon ri naʼoj pa ran chqä yerusmajij ri naʼoj riʼ, y ma yë ta ri kʼïy naʼoj yerutamaj.

6. ¿Achkë rma ütz nqaʼij chkë ri publicadores ri kʼo chik junaʼ kiyaʼon pä tjonïk chë kejeʼ qkʼë taq nqatjoj jun winäq?

⁶ Röj ütz nqaʼij chkë ri publicadores ri kʼo chik junaʼ kiyaʼon pä tjonïk chë kejeʼ qkʼë taq nqayaʼ rutjonik jun winäq. Taq nqaʼän riʼ,  tqakʼutuj che rä achkë xtzʼët chrij ri rubʼanik xqayaʼ ri tjonïk chqä we kan ütz ruksaxik xqaʼän che rä le Biblia. Rchë nq-ok utziläj taq tijonelaʼ kʼo chë ma nqanaʼ ta qiʼ (tajnamaj rkʼë Hechos 18:24-26). Chqä ütz nqakʼutuj che rä we ryä xtzʼët chë ri qatijoxel xqʼax pa rujolon ri naʼoj xqatzʼët rkʼë. We röj ma nqjeʼ ta jun o más semanas, tqaʼij che rä ri qachʼalal riʼ chë tqʼaxaj ri tjonïk rkʼë ri winäq. Ke riʼ ri winäq ronojel mul xtkʼül rutjonik chqä xtzʼët chë kan kʼo rejqalen. Majun bʼëy tqaquʼ ta chë kan xa xuʼ röj ütz nqyaʼö rutjonik ri qatijoxel, rma ri nqajoʼ röj ya riʼ chë ri qatijoxel nutamaj chqä nusmajij ri naʼoj ye kʼo pa Ruchʼaʼäl Dios.

7. ¿Achkë xttoʼö rchë ri qatijoxel rchë kan xtloqʼoqʼej ri najin nutamaj?

⁷ Janina ruqʼij chë ri qatijoxel nutzʼët chë kan nqanmaj chqä chë kan jaʼäl nqanaʼ nqatzjoj ri naʼoj ye kʼo chpan le Biblia (1 Tes 1:5). Riʼ rkʼë jbʼaʼ xtuʼän chë kan más xtloqʼoqʼej ri najin nutamaj. Rkʼë jbʼaʼ ütz nqaʼij che rä achkë utzil qlon rma yeqasmajin ri naʼoj ye kʼo chpan le Biblia. Riʼ xttoʼ rchë ryä chqä xtzʼët chë kan kʼo utzil xtyaʼ qa pa rukʼaslemal we ryä xtuʼän riʼ.

8. ¿Achkë chik jun ütz nqaʼän rchë nqatoʼ qatijoxel, y achkë rma?

⁸ Taq nqayaʼ jun tjonïk, tqatzjoj experiencias che rä ri qatijoxel chkij ri qachʼalal ri xekowin xkipabʼaʼ kiʼ chwäch ri kʼayewal achiʼel ri kʼayewal najin nuqʼaxaj ryä. We pa qa-congregación kʼo jun chkë ri qachʼalal riʼ, tqaʼij che rä chë tjeʼ qkʼë taq nqayaʼ rutjonik ri qatijoxel. Chqä ütz nqaksaj ri experiencias ri kʼo chpan ri peraj «La Biblia les cambió la vida» ri kʼo pa jw.org. * Ri experiencias riʼ xttoʼ rchë xttzʼët chë kʼo utzil xtrïl we yerusmajij ri naʼoj ye kʼo chpan le Biblia.

9. ¿Achkë rubʼanik ütz nqaʼij che rä ri qatijoxel chë ttzjon rkʼë ru-familia chqä kikʼë rachiʼil chrij ri najin nutamaj?

⁹ We kʼlan ri winäq ri najin nqayaʼ rutjonik ye kʼa ri rukʼlaj ma najin ta nukʼül jun tjonïk, ¿achkë rma ma nqaʼij ta che rä chë tjeʼ qkʼë taq nqayaʼ rutjonik ri rukʼlaj? Chqä tqaʼij che rä ri qatijoxel chë ttzjon rkʼë ru-familia chqä kikʼë rachiʼil chrij ri achkë najin nutamaj (Juan 1:40-45). Rkʼë jbʼaʼ ütz nqaʼij reʼ che rä: «¿Achkë ta rubʼanik naqʼalajsaj re naʼoj reʼ chwäch ri a-familia?» o «¿Achkë ta texto naksaj rchë naqʼalajsaj re naʼoj reʼ chwäch jun awachiʼil?». Ya riʼ jun rubʼanik rchë nqatjoj apü ri  qatijoxel rchë xtbʼeʼok jun tijonel. Ke riʼ, taq ryä xtbʼeʼok publicador, ma kan ta kʼayewal chik xtuʼän chwäch xttel chutzjoxik le Biblia rkʼë ri congregación. Röj ütz nqakʼutuj che rä we retaman ruwäch jun winäq ri nrajoʼ nutamaj ri naʼoj ye kʼo chpan le Biblia. We kʼo jun retaman ruwäch, qtzjon yän rkʼë ri winäq riʼ chqä tqatzjuʼ jun rutjonik chrij le Biblia. Tqakʼutuʼ ri video chwäch ¿Cómo son nuestros cursos bíblicos? *

10. Achiʼel nuʼij 1 Tesalonicenses 2:7 chqä 8, ¿achkë rubʼanik nukʼän runaʼoj jun tijonel chrij ri tzʼetbʼäl xyaʼ qa ri apóstol Pablo?

¹⁰ Ri tijonelaʼ kʼo chë nkitzʼët achkë nkʼatzin chkë ri kitijoxelaʼ. Ryeʼ kʼo chë nqʼax chkiwäch chë ri winäq riʼ rkʼë jbʼaʼ xkeʼok qachʼalal pa congregación (taskʼij ruwäch 1 Tesalonicenses 2:7, 8). Tqʼax chqawäch chë ryeʼ kʼayewal xtuʼän chkiwäch xkekiyaʼ qa kichiʼil chqä xtkijäl kinaʼoj rchë nkiyaʼ ruqʼij Jehová. Rma riʼ, keqatoʼ rchë yekïl utziläj kichiʼil pa congregación. We röj nqajäm qawäch rchë nqjeʼ kikʼë tapeʼ ma najin ta nqayaʼ kitjonik, xtqakʼüt chkiwäch chë yoj kichiʼil. We yeqaskʼij äl, nqatäq äl jun ki-mensaje o nqqʼax kikʼë xa xuʼ rchë nqatzʼët we ütz kiwäch, xtqakʼüt chë kantzij yeqajoʼ.

11. ¿Achkë nqajoʼ chë nkïl ri qatijoxelaʼ pa congregación, y achkë rma?

¹¹ Jun naʼoj ri nkiʼij ri winäq aj África nuʼij reʼ: «Nkʼatzin rutoʼik jun tinamït rchë nkʼiytisäx jun akʼal». Achiʼel nuʼij ri naʼoj riʼ, röj chqä ütz nqaʼij: «Nkʼatzin rutoʼik jun congregación rchë jun winäq ntok rutzeqelbʼëy Cristo». Rma riʼ, taq ri utziläj taq tijonelaʼ yekitoʼ ri kitijoxelaʼ rchë nkitamaj kiwäch ri qachʼalal pa congregación, ri qachʼalal xkekowin xkekitoʼ ri tijoxelaʼ rchë más yejelun rkʼë Jehová. Riʼ xtuʼän chë ri tijoxelaʼ xtkïl kitoʼik taq kʼo kʼayewal xkekïl chqä rchë más kuw xtuʼän ri kachbʼilanïk rkʼë Jehová. Nqajoʼ chë ri tijoxelaʼ nkinaʼ chë kan kʼo kejqalen pa congregación chqä chë kan achiʼel ta ye qachʼalal. We yeqatoʼ rchë más junan nuʼän kiwäch kikʼë ri qachʼalal pa congregación, ma kan ta kʼayewal chik xtuʼän chkiwäch xkekiyaʼ qa ri kichiʼil ri xa ma yekitoʼ ta rchë junan nuʼän kiwäch rkʼë Jehová (Proverbios 13:20). Taq ri winäq riʼ xkekiyaʼ qa kiyonïl, ryeʼ kitaman chë chpan rutinamit Jehová xkekïl utziläj kichiʼil (Mar. 10:29, 30; 1 Ped. 4:4).

12. ¿Achkë rma kʼo chë nqaʼij che rä qatijoxel chë kan kʼo rejqalen chë jun winäq nujäch riʼ pa ruqʼaʼ Jehová chqä nqasäx pa yaʼ?

¹² Röj kʼo chë chaq taqïl nqaʼij che rä qatijoxel chë kan kʼo rejqalen chë jun winäq nujäch  riʼ pa ruqʼaʼ Jehová chqä nqasäx pa yaʼ. Ma tqamestaj ta chë röj nqayaʼ tjonïk chrij le Biblia rma nqajoʼ yeqatoʼ ri winäq rchë yeqasäx pa yaʼ chqä rchë nkiyaʼ ruqʼij Jehová. We ri winäq ya kʼïy chik ikʼ najin nukʼül rutjonik chqä najin chik nbʼä pa moloj, kʼo chë nqʼax chwäch chë najin nyaʼöx rutjonik rma najowatäj chë ryä nbʼeʼok jun testigo de Jehová.

13. ¿Achkë nkʼatzin nuʼän jun tijoxel rchë ütz nqasäx pa yaʼ?

¹³ Ri tijoxel ri kantzij nrajoʼ nusmajij ri naʼoj ye kʼo chpan le Biblia kan nuʼän ri najowatäj rchë nbʼeʼok testigo de Jehová. Pa naʼäy, ryä nutamaj ruwäch Jehová, nunaʼ ajowabʼäl chrij chqä nukʼuqbʼaʼ rukʼuʼx chrij (Juan 3:16; 17:3). Chrij riʼ, ryä ntok rachiʼil Dios chqä kichiʼil ri qachʼalal pa congregación (Heb. 10:24, 25; Sant. 4:8). Eqal eqal nuyaʼ qa kibʼanik itzel taq bʼanobʼäl chqä nutzolij riʼ chkë ri mak yerubʼanon (Hech. 3:19). Chqä ri rukʼuqbʼäl kʼuʼx nuʼän chë ma nuxiʼij ta riʼ nutzjoj ri kantzij chkë ri nkʼaj chik (2 Cor. 4:13). Y pa rukʼisbʼäl, nujäch riʼ pa ruqʼaʼ Jehová chqä nqasäx pa yaʼ (1 Ped. 3:21; 4:2). Kantzij na wä chë taq nbʼanatäj riʼ, jontir kiʼ qakʼuʼx nqaʼän. Taq nqatzʼët chë ri qatijoxel eqal eqal najin yeruʼän ronojel riʼ, kan rkʼë ronojel qan tqaʼij che rä chë ütz ri najin nuʼän, chqä tqakʼuqbʼaʼ rukʼuʼx rchë ma nuyaʼ ta qa rubʼanik ri najin nuʼän.

14. ¿Achkë nkʼatzin nuʼän jun tijonel rchë nutzʼët we ri rutijoxel kantzij nrajoʼ nuyaʼ ruqʼij Jehová o manä?

¹⁴ Nkʼatzin ma nikʼo ta qakʼuʼx taq nqatoʼ jun tijoxel rchë nujäch riʼ pa ruqʼaʼ Jehová chqä nqasäx pa yaʼ. Ye kʼa röj chqä kʼo chë nqatzʼët we ryä kan nrajoʼ nuyaʼ ruqʼij Jehová o manä. Tqakʼutuj qa reʼ chqawäch: ¿Nqʼalajin chë kan nutäj ruqʼij rchë nusmajij ri naʼoj xeruyaʼ qa Jesús? ¿O nukʼül rutjonik xa xuʼ rma nqä chwäch nutamaj ri kʼo chpan le Biblia?

15. ¿Achkë nkʼutü chë jun tijoxel najin nusmajij ri najin nutamaj?

¹⁵ Chaq taqïl tqatzʼetaʼ we ri qatijoxel najin nusmajij ri najin nutamaj. Jojun tzʼetbʼäl. ¿Nuʼij achkë nunaʼ chrij Jehová? ¿Nujäm ruwäch rchë nchʼö qʼanäj rkʼë? (Sal. 116:1, 2). ¿Nqä chwäch nuskʼij ruwäch le Biblia? (Sal. 119:97). ¿Nbʼä chkipan ronojel ri qamoloj? (Sal. 22:22). ¿Rujalon rubʼanik ri kʼaslemal rukʼwan? (Sal. 119:112). ¿Najin chik nutzjoj che rä ru-familia chqä chkë ri rachiʼil ri najin nutamaj? (Sal. 9:1). Y ri más rejqalen, ¿nrajoʼ ntok testigo de Jehová? (Sal. 40:8). We majun  ta jun chkë ri naʼoj riʼ najin nusmajij, tqakanuj rubʼanik rchë nqatamaj achkë rma ma najin ta yerusmajij. Taq ya xqatamaj yän achkë rma, qtzjon rkʼë chrij ri najin nbʼanatäj, ye kʼa kan pa rubʼeyal tqabʼanaʼ che rä. *

16. ¿Ajän riʼ taq ütz nqachʼöbʼ we nqayaʼ na rutjonik jun winäq o manä chik?

¹⁶ Chqä chaq taqïl tqatzʼetaʼ we nqayaʼ na rutjonik jun winäq o manä chik. Rchë nqatzʼët riʼ, tqakʼutuj qa reʼ chqawäch: «¿Nutjoj apü riʼ taq nqabʼeyaʼ rutjonik? ¿Nuʼij riʼ ran nbʼä pa qamoloj? ¿Yeruyaʼon qa chik itzel taq bʼanobʼäl? ¿Ruyaʼon qa chik ru-religión?». We manä, ntel chë tzij chë ri winäq riʼ ma nuloqʼoqʼej ta ri najin nutamaj chqä ma nrajoʼ ta nujäl runaʼoj. We röj kʼa nqayaʼ na rutjonik, riʼ achiʼel xa ta nqajoʼ nqatjoj jun winäq rchë nutamaj nmuxan ye kʼa ma nrajoʼ ta nuxqʼebʼaʼ riʼ. We ya riʼ najin nbʼanatäj, majun xtkʼatzin wä ri tjonïk najin nqayaʼ.

17. ¿Achkë kʼo chë nuʼän jun tijonel rchë chaq taqïl nutzʼët ri naʼoj najin yerukʼüt, achiʼel nuʼij 1 Timoteo 4:16?

¹⁷ Chqawäch röj kan kowan rejqalen yeqatoʼ ri winäq rchë yeʼok rutzeqelbʼëy Jesús. Röj nqajoʼ yeqatoʼ ri qatijoxelaʼ rchë yeʼok testigos de Jehová. Rma riʼ, kan pa rubʼeyal tqaksaj le Biblia, tqakʼutuʼ chë kan nqanmaj chqä chë kan jaʼäl nqanaʼ nqatzjoj ri naʼoj najin nqakʼüt, tqatoʼ ri qatijoxel rchë yerïl rachiʼil pa congregación, chaq taqïl tqaʼij che rä achkë rma kan kowan rejqalen chë jun winäq nujäch riʼ pa ruqʼaʼ Jehová chqä nqasäx pa yaʼ, y chaq taqïl tqatzʼetaʼ we ri tijoxel najin nusmajij ri naʼoj najin nutamaj. (Tatzʼetaʼ ri recuadro ri kʼo pa ruxaq 13 ri rubʼiniʼan « Ri tijonel kʼo chë...»). Röj kan nqanaʼ kiʼkʼuxlal rma nqtoʼon chpan re jun nimaläj samaj reʼ, ri yerutoʼ ri winäq rchë nkïl kolotajïk. Rma riʼ, tqatjaʼ qaqʼij rchë yeqatoʼ ri qatijoxelaʼ chrij le Biblia rchë yebʼeʼok testigos de Jehová.