1. Porque kita puede habla que el trabajo de hacida de dicipulo amo un trabajo que ta salva con el vida del maga gente?

EL TRABAJO de hacida de maga dicipulo amo un trabajo que ta salva con el vida del maga gente. Porque kita se puede habla? Cuando ya dale si Jesus con el mandato na Mateo 28:19, 20, ele ya habla: “Anda . . . hace maga dicipulo . . . bautiza canila.” Paquemodo de importante que bautiza el un persona? Bien necesita este para con aquellos quien quierre salva. El un candidato de bautismo debe tiene fe que ya queda lang posible el salvacion cay ya muri si Jesus y ya resucita. Amo se el razon si porque si apostol Pedro ya habla con el maga Cristiano: ‘El bautismo amo ta salva con ustedes ahora por medio del resureccion de Jesucristo.’ (1 Ped. 3:21) Poreso si bautiza con el un nuevo dicipulo, puede le esperanza que hay vivi le hasta para cuando.

2. Base na 2 Timoteo 4:1, 2, cosa kita debe hace como maga quien ta enseña?

² Para puede kita hace maga dicipulo, necesita kita tiene buen manera de enseñada. (Le con el 2 Timoteo 4:1, 2.) Porque? Cay ya manda kanaton si Jesus: “Anda . . . hace maga dicipulo . . . y insiña canila.” Si apostol Pablo ya habla que “hace firmi” con ese trabajo cay si hace tu se, “ay salva tu mismo y aquellos quien ta oi contigo.” Amo se el razon si porque ya habla si apostol Pablo: “Bicia embuenamente si cosa tu . . . ta insiña.” (1 Tim. 4:16) Ciendo necesita kita enseña para puede hace maga dicipulo, quierre kita que bien enbuenamente el diaton manera de enseñada.

3. Cosa kita considera na este articulo?

³ Ta enseña kita con el millones de maga gente acerca na verdad que puede incuntra na Biblia. Pero como cosa kita ya discuti  del ya pasa articulo, quierre kita sabe si paquemodo kita puede ayuda con el manada kanila para queda maga bautizao dicipulo de Jesucristo. Na este articulo, hay considera kita con el cinco cosas que necesita hace el maga publisher para puede ayuda con el Bible study que progresa para na bautismo.

4. Porque debe tiene control na cuerpo el un publisher si ta conduci un Bible study? (Mira tambien con el footnote.)

⁴ Bien quierre-quierre kita enseña con el maga verdad estaba na Palabra del Dios. Poreso, baka tiene kita el tendencia que manada cosa habla acerca con ese. Pero, ta conduci man kita con el Estudiada del El Torre de Guardia, el Estudiada del Congregacion na Biblia o un Bible study, gendeh kita debe bien manada cosa habla. Para puede efectivo usa con el Biblia na enseñada, el un publisher necesita tiene control na cuerpo y gendeh pricura explica con el todo cosa le sabe acerca na un topico na Biblia. * (Juan 16:12) Compara con el de tuyu saber na Biblia na tiempo que ya bautiza tu pati na saber que tiene tu ahora. Posible que del antes, el maga importante verdad na Biblia lang el cosa tu sabe. (Heb. 6:1) Ya alcanza contigo cuanto año para aprende con el cosa tu sabe ahora. Poreso, no pricura enseña con ese todo na de tuyu Bible study na un tiempo lang.

5. (a) Harmonia na 1 Tesalonica 2:13, cosa kita quierre que entende el diaton Bible study na de suyu estudiada? (b) Cosa kita hace para anima con el diaton Bible study que man comento acerca na cosa le ta aprende?

⁵ Quierre kita que entende el diaton Bible study que estaba na inspirao Palabra del Dios el cosa le ta aprende. (Le con el 1 Tesalonica 2:13.) Paquemodo kita hace con ese? Anima con el diaton Bible study que man comento acerca na cosa le ta aprende. En vez que etu el pirmi ta explica con el de tuyu Bible study con el maga texto na Biblia, pidi con ele que explica contigo con el cuanto de ese. Ayuda con ele mira si paquemodo le puede aplica con el Palabra del Dios. Hace maga pregunta que puede ayuda con ele para habla si cosa le ta pensa y ta sinti acerca na texto que ya le ele. (Luc. 10:25-28) Por ejemplo, pregunta con ele: “Paquemodo este texto ya ayuda contigo para mira con el un calidad de Jehova?” “Paquemodo tu ya puede beneficia na este verdad na Biblia?” (Prov. 20:5) El mas importante amo que ta aprecia y ta aplica el Bible study con el cosa le sabe y gendeh si paquemodo le de manada cosa sabe.

6. Porque bueno que manda sigui experienciao publisher na diaton Bible study?

⁶ Si ta conduci Bible study, ta manda ba tu  sigui maga experienciao publisher? Si hace tu se, puede tu pregunta kanila si cosa sila ya puede observa si paquemodo tu ta conduci con el Bible study y si ta usa ba tu enbuenamente con el Biblia na enseñada. Debe tu queda humilde para puede tu progresa pa mas na de tuyu enseñada. (Compara na Maga Actividad 18:24-26.) Despues, pregunta con el publisher si ta entende ba el Bible study con el cosa le ta aprende. Puede tambien tu pidi con ese mismo publisher que conduci con el Bible study para contigo si nuay tu por un semana o mas pa. Puede se ayuda para esta regular el estudiada y hace claro con el Bible study que importante el de suyu estudiada. No pensa que “de tuyu” se Bible study y nuay quien otro puede conduci con ese. Quierre tu si cosa el bueno para na de tuyu Bible study para puede le continua aprende mas acerca na verdad.

7. Cosa puede ayuda con el Bible study para queda le mas interesao na cosa le ta aprende?

⁷ Importante que puede mira el de tuyu Bible study que con gana tu y tiene conviccion si ta enseña con el maga verdad estaba na Biblia. (1 Tes. 1:5) Si hace tu se, grande el posibilidad que queda le mas interesao na cosa le ta aprende. Puede tu habla con ele si paquemodo tu ya beneficia cuando ya aplica tu con el maga principio na Biblia. Como resulta, puede le realiza que puede tambien le beneficia na maga practical consejo na Biblia.

8. Cosa pa tu puede hace para ayuda con el de tuyu Bible study y porque tu hace con ese?

⁸ Na de ustedes estudiada, menciona con el de tuyu Bible study acerca na maga hermano y hermana quien ya experiencia maga problema que semejante na cosa le ya experiencia y ya puede enfrenta con ese. Puede tambien tu lleva un hermano o hermana na congregacion de quien ejemplo puede beneficia el Bible study. O puede tu busca maga experiencia na jw.org na serie “The Bible Changes Lives.” * Ese maga articulo y video puede ayuda con el de tuyu Bible study para realiza que queda mas enbuenamente el de suyu vida si aplica le con el maga principio na Biblia.

9. Paquemodo tu anima con el de tuyu Bible study que habla con el cosa le ta aprende na de suyu familia y maga amigo?

⁹ Si casao el de tuyu Bible study, tan Bible study ba tambien el de suyu marido o mujer? Si gendeh, invita con ele que man junto na de ustedes estudiada. Anima con el de tuyu Bible  study que habla si cosa le ta aprende con el suyu familia y maga amigo. (Juan 1:40-45) Paquemodo? Puede tu pregunta con ele: “Paquemodo tu explica con este verdad na de tuyu familia?” o “Cosa texto tu dale mira na de tuyu amigo para dale prueba que deverasan este?” Na este manera, tan train tu con el de tuyu Bible study para enseña tambien con otro. Despues, si cualificao ya le, puede ya le participa na ministerio como un unbaptized publisher. Puede tu pregunta con el de tuyu Bible study si tiene ba le conoce quien quierre tambien estudia con el Biblia. Si tiene, man contact dayun con ese persona y ofrece con ele un Bible study. Dale con ele mira el video Paquemodo Ta Hace el Bible Study? *

10. Como cosa ta habla na 1 Tesalonica 2:7, 8, paquemodo puede imita el un publisher con el ejemplo de Pablo?

¹⁰ El maga publisher debe dale mira sincero personal interes na diila maga Bible study. Mira kanila como el de tuyu espiritual hermano y hermana na futuro. (Le con el 1 Tesalonica 2:7, 8.) Gendeh facil para kanila que deja con el diila maga amigo del antes y hace el todo necesita cambio para sirvi con Jehova. Necesita kita ayuda kanila busca maga deverasan amigo y amiga na congregacion. Queda un buen amigo na de tuyu Bible study. Puede tu se hace si dale tu tiempo con ele gendeh lang durante el de ustedes Bible study sino pati na otro ocasion. Sinti le que deverasan tu interesao con ele si llama tu, man text o visita con ele maskin gendeh tiempo del de ustedes Bible study.

11. Cosa kita quierre que incuntra el diaton maga Bible study na congregacion y porque?

¹¹ Asegun con otro, necesita el ayuda del un barrio para hace engranda con el un bata. Puede tambien kita habla: “Necesita el ayuda del congregacion para hace un dicipulo.” Amo se el razon si porque el maga efectivo publisher ta introduci con el diila maga Bible study con otro na congregacion quien puede tiene buen influencia kanila. Como resulta, el maga Bible study hay queda alegre man junto con el maga siervo del Dios quien puede dale kanila espiritual y emocional suporta. Quierre kita que sinti el cada Bible study que parte ele del congregacion y del diaton espiritual familia. Quierre kita que queda le cerca con el diaton amable familia de maga hermano y hermana. Como resulta, mas facil para con ele que gendeh mas man junto con el maga gente que gendeh ta ayuda con ele para ama con Jehova. (Prov. 13:20) Si deja con ele el de suyu maga uban de antes, sabe le que puede  le incuntra maga deverasan amigo y amiga na organizacion de Jehova.​—Mar. 10:29, 30; 1 Ped. 4:4.

12. Porque kita debe man cuento con el diaton Bible study acerca na dedicacion y bautismo?

¹² Pirmi man cuento con el de tuyu Bible study acerca na dedicacion y bautismo. El razon si porque kita ta conduci Bible study amo para ayuda con el persona queda un bautizao dicipulo. Despues estudia por cuanto mes el Bible study y especialmente despues del primer vez que ya atende le na miting, debe le entende que el proposito del Bible study amo para ayuda con ele principia sirvi con Jehova como uno del De Suyu Testigo.

13. Cosa necesita hace el un Bible study para progresa para na bautismo?

¹³ Hinay-hinay, el un sincero Bible study puede alcanza con el de suyu goal que bautiza. Una, ya conoce le y ya ama con Jehova y ya demonstra fe con Ele. (Juan 3:16; 17:3) Despues, ya principia le tiene un personal relacion con Jehova y ya principia man junto na congregacion. (Heb. 10:24, 25; Sant. 4:8) Nuay tarda, ya descanza ya le hace maga mal practica y ya arripinti na de suyu maga pecado. (Act. 3:19) Ya habla tambien le na otro acerca na verdad que ya aprende le. (2 Cor. 4:13) Despues, ya dedica le con el de suyu mismo vida con Jehova y ya dale le mira con ese dedicacion por medio na bautismo. (1 Ped. 3:21; 4:2) Un bien alegre dia se para con todo! Poreso, mientras hinay-hinay ta hace con este el Bible study, continua dale con ele sincero comendacion y anima con ele continua na cosa le ta hace.

14. Paquemodo puede sabe el un publisher si ta progresa el de suyu Bible study?

¹⁴ Necesita kita queda paciencioso si ta ayuda con el Bible study. Pero, necesita tambien kita sabe si tiene ba le deseo sirvi con Dios Jehova. Ta puede ba tu mira maga señal que ta pricura le obedece con el maga mandamiento de Jesus? O quierre lang le sabe maga informacion estaba na Biblia?

15. Cosa el maga señal que debe mira el un publisher que ta progresa el de suyu Bible study?

¹⁵ Regular analiza con el progreso del de tuyu Bible study. Por ejemplo, ta habla ba le si cosa le ta sinti para con Jehova? Ta reza ba le con Jehova? (Sal. 116:1, 2) Quierre-quierre  ba ele le con el Biblia? (Sal. 119:97) Ta atende ba le regular na maga miting? (Sal. 22:22) Ya hace ba le maga necesita cambio na de suyu vida? (Sal. 119:112) Ya principia ya ba le habla con el de suyu familia y maga amigo si cosa le ta aprende? (Sal. 9:1) Y el mas importante, quierre ba le queda uno del maga Testigo de Jehova? (Sal. 40:8) Si gendeh ta progresa el Bible study na maskin uno de este maga aspeto, pregunta con ele si porque y discuti se con ele na enbuenamente y franca manera. *

16. Cuando tu debe descanza man Bible study con el un persona?

¹⁶ Mientras ta pasa el tiempo, determina si debe ba tu continua con el estudiada. Pregunta na de tuyu mismo cuerpo: ‘El de mio Bible study ba gendeh ta prepara para na diamon estudiada? Nuay ba le interes atende na maga miting? Tiene pa ba le maga mal vicio? Miembro pa ba le de un falso religion? Si oo el de tuyu contestacion y despues continua pa tu siempre man Bible study con ele, igual lang se dol ta enseña tu nada con el un persona quien no quierre muha! Si el un persona gendeh deverasan ta aprecia con el cosa le ta aprende y no quierre hace maga cambio, porque pa man tu man Bible study con ele?

17. Asegun na 1 Timoteo 4:16, cosa debe hace el todo publisher?

¹⁷ Bien importante para kanaton que cumpli con el diaton responsibilidad que hace maga dicipulo y quierre kita ayuda con el diaton maga Bible study que progresa para na bautismo. Poreso, usa kita con el Biblia na diaton enseñada, y con ganá y tiene conviccion si ta enseña. Anima kita con el diaton Bible study que busca maga amigo na congregacion. Hace kita claro si cosa el goal del dedicacion y bautismo y determina si ta progresa ba el diaton Bible study. (Mira con el cajon “ Si Cosa Hace el Publisher Para Progresa el De Suyu Bible Study Para na Bautismo.”) Bien alegre kita participa na este trabajo que ta salva con el vida del maga gente! Ojala, queda kita determinao que hace el todo para conduci maga progresivo Bible study que ta resulta na bautismo.