1. Hi tizivisa kutxani ti to mthumo wo maha vagondiswa wa hulukisa vathu?

MTHUMO wo maha vagondiswa wa hulukisa vathu! Hi tizivisa kutxani? Mbimo yi Jesu a nga ningela txirumo txi txi ku ka Matewu 28:19, 20, a ti khene: “Tsulani mi ya maha vagondiswa mi va bhabhatisa.” Ngu tihi ti hi ti zivako mayelano ni lisima la bhabhatiso? Ngu ti to bhabhatiso ya laveka ti to m’thu e huluka. Awu a yako ku bhabhatiswani a fanete ku va ni likholo la ti to ku poniswa ti koteka ngu kona ha ka digandelo da lifo la Jesu ni ku wuswa kwakwe. Ngu toneto Mpostoli Pedro a nga bhalela Makristu a txi khene: ‘Bhabhatiso ayi konku ya mi hanyisa ngu kuwuka ka Jesu Kristu.’ (1 Pedro 3:21) Se ngako m’thu a txi bhabhatiswa a nzilani ya kuya ku hanyiswani.

2. Ngu kuya ngu 2 Timoti 4:1, 2 ti lava hi maha txani ti to hiva vagondisi?

² Ti to hi maha vagondiswa ti lava hi sakulela kuva vagondisi va vanene. (Lera 2 Timoti 4:1, 2.) Ngu kutxani? Nguko Jesu a hi ningile txirumo txiya: “Tsulani mi ya maha vagondiswa, mi va gondisa.” Mpostoli Paulo ati khene: “Tsana” ka mthumo wuwa, “ngako u txi maha toneto, u na ti hanyisa awe ni va va ku engisako” a ku ati ti hanyisako Paulo, a gwitile a txi khene: “Ti wonele upune, u txi xola ni gondo yi u gondisako.” (1 Tim. 4:16) Ngu toneto, ti to hi maha vagondiswa ti lava hi va vagondisi vanene.

3. Hi na bhula ngu txani ka msungo wuwa mayelano ni ku tsimbitisa sigondo?

³ Mbimo yotshe hi gondisa timiliyoni ta vathu ditshuri da Bhiblia. Nga ha hi nga ti wona ngu kona ka gondo yi yi nga pinda ti lava hi ziva ti to hi nga mahisa kutxani kasiku ku  vhuna vathu vonevo to ve hokela ha ko bhabhatiswa ve va vagondiswa va Kristu. Ka gondo yiya hi na gonda 5 wa tinzila ati muhuweleli mmwani ni mmwani a fanelako kumaha ti to e vhuna txigondo txi hokelela ko bhabhatiswa.

4. Ngu kutxani muhuweleli a di fanete ku tiñola mbimo yi a lavako kutshimbitisa txigondo? (Wona txhamuselo ya hahatshi.)

⁴ Aku hi ti dhundako nguto tigondo ta mu ka Bhiblia, hi nga thuka hi wela txidukoni ko lava kuwomba-wombela totshe ti hi ti zivako hi txi gondisa. Phela ku si nga ni mhaka ni ti to wo tsimbitisa gondo ya Muwoneleli, gondo ya Bhiblia ya dibanza, mwendo ku tshimbisa txigondo kha ti lavi u tatela titxhamuselo. Ti to u leka Bhiblia yi gondisa mgondisi a fanete e ti ñola, i si nga kuduketa kutxhamusela totshe ti u ti zivako ngu didungula do kari da mu ka Bhiblia. * (Joh. 16:12) Alakanya ngu wuzivi wu u nga ti nawo mbimo yi u nga bhabhatiswa ni wu u ku nawo konkuwa. Ka mbimo yoneyo u si zivi to tala ngu Bhiblia. (Vaheb. 6:1) Ti tekile mbimo yo lapha ti to u ziva totshe ti u ti zivako nyamsi, se u nga zame kutxhamusela totshe ti u ti zivako txigondo ngu mbimo ya yimweyo.

5. a) Ngu kuya ngu 1 Vatesalonika 2:13, ngu tihi ti hi lavako ti to txigondo txi ti pfisisa mbimo yi txi gondako? b) Hi nga txi kuzetisa kutxani ti to txi womba mawonelo a txona ngu ti txi ti gondako?

⁵ Hi lava ku sigondo sathu si pfisisa ti to ati si ti gondako ti ta ngu ka Dipswi da Txizimu. (Lera 1 Vatesalonika 2:13.) Hi nga mahisa kutxani toneto? Kuzeta txigondo to txi txhamusela a ti txi ti gondako. Hahanze ko awe u txi txhamusela tigondo ta Bhiblia, kombela txona txi txhamusela awe, vhuna txigondo txi kota ku thumisa ati txi ti gondako a mu ka Bhiblia. Muwotise siwotiso asi si no txi vhuna ku txi womba mawonelo ni matipfelo a txona, so fana ni si si ku u ti pfisa kutxani, mwendo u ti wonisa kutxani ati u ti gondako mu ka Bhiblia. (Luka 10:25-28) Ngu txikombiso mu wotisi tiya: “M’bhalo wuwa wu ku vhunisa kutxani u wona tifanelo ta Jehovha?” “M’bhalo wonewo wu ku vhunisa kutxani?” “U tipfisa kutxani ngu ti u ngadi ku tigonda?” (Mav. 20:5) Atxi i ku txa lisima hi nga ku ziva to tala kambe ngu randa ni ku thumisa ati txi ti gondako.

6. Ngu kutxani i di ta lisima kutsula ni muhuweleli wu aku ni wusikoti u txi ya tsimbitisa txigondo?

⁶ Ina u txiya tsimbitisa gondo wa tshuka u ramba muhuweleli wu a ku ni wusikoti  wo gondisa u tsula nayo? Ngako u txi maha toneto mkombele e womba mawonelo akwe mayelano ni nzila yi u tsimbitisako ngu yona gondo, ni ku ina wa leka Bhiblia yi gondisa kani? Ngako u txi lava kutshukwatisa magondiselelo aku, ti lava u ti veka hahatshi. (Fananisa ni Mithumo 18:24-26.) Ngu magwito u nga muwotisa ti to ina txigondo txa tipfisisa ati hi ti gondako kani. U nga tshumela u kombela muhuweleli eneyo e ku tsimbitisela txigondo masiku ya u ku walo. Ngako u txi maha toneto u na vhuna txigondo txi pfisisa lisima lo gonda. U nga tigele to txigondo njako se kha ngaho mmwani a ngo txi tsimbitisa. Phela awe u lava ti to txigondo txako txi vhuneka kasiku txikula ngu didhawa da moya.

7. U nga maha txani to u vhuna txigondo txi tsakela a ti txi ti gondako?

⁷ Txigondo txi fanete txi wona ti to wa tidhunda ni ku wa ti kholwa a ti Bhiblia yi ti gondisako. (1 Vat. 1:5) Eto ti nga mvhuna e tsakela ati a ti gondako. Ngako ti txi koteka m’bhulele ati matshina a milayo ma nga ku vhunisa tona awe. Se ti na mvhuna e wona ti to Bhiblia yi ni matshina a milayo aya ma nga mvhunako ka wutomi wakwe.

8. Ngu tihi timwani ati u nga mahako u txi tsimbitisa gondo? Eto ti nga mvhunisa kutxani?

⁸ Mbimo yi u tsimbitisako gondo m’bhulele sikombiso sa vanathu a va va nga xula sikarato so fana ni si a mananako naso. U nga tshumela u tsula ni mwanathu wu a nga manana ni sikarato soneso. U nga tshumela u mana sikombiso so tsanisa ka jw.org ka txienge txi txi ku: “Ditshuri da txitxa mahanyelo.” * Sikombiso soneso si na vhuna txigondo txi wona lisima lo thumisa matshina a milayo ka wutomi wa txona.

9. U nga txi kuzetisa kutxani txigondo to txi bhulela vangana ni maxaka ati txi ti gondako?

⁹ Ngaku u txi gonda ni m’thu wu a nga txhadha, na a si gondi ni mkatakwe mkombele to nene e pateka ka gondo. Mkuzete ti to e bhulela vangana ni maxaka ati a ti gondako. (Joh. 1:40-45) U nga ti mahisa kutxani? U nga muwotisa tiya: “ Ati u nga ti gonda u nga ti txhamuselisa kutxani ka maxaka ako?” “Ngu wuhi m’bhalo awu u nga wu thumisako kasi ku kholwisa vamwani ka ti u ti  wombako?” Ngako u txi maha tiya u nava u txi lulamisela txigondo txako ku txi va mgondisi. Ngako se a txi faneleka a nga khata kutxhumayela kota muhuweleli wo mbi bhabhatiswa. U nga tshumela u muwotisa to ina ku ni m’thu wu a mzivako a navelako ku gonda Bhiblia. Ngako a diho ngu txikuluveta lava tinzila to khata kugonda nayo Bhiblia. U nga mkomba vhidhiyo yi yi ku: Ku maheka txani ka gondo ya Bhiblia? *

10. Nga ha ti nga kombiswa ngu kona ka 1 Vatesalonika 2:7, 8 mgondisi a nga txi tekelelisa kutxani txikombiso txa Paulo?

¹⁰ Muhuweleli a fanete ku kombisa ku khatala ngu sigondo sakwe. A fanete ku va wona kota vanathu va mbimo yi yi tako. (Lera 1 Vatesalonika 2:7, 8.) Kha ti si hehukeli sigondo ku si leka vangana va mafu, ni ku ve maha kutxitxa ti to ve tsakisa Jehovha. Ti lava hi va vhuna ti to ve va ni vangana dibanzani. Ti he mbimo yo pfuxela txigondo txako i si nga ngu mbimo yo ya gonda basi. Txi fonele u txi bhalela mesaji, eto ti na kombisa to wa wa khatala ngu txona.

11. Ngu kutxani hi txi lava to sigondo sathu si va ni vangana dibanzani?

¹¹ Ti to txigondo txi kula ngu didhawa da moya ti lava txivhuno txa dotshe dibanza, i si nga txako dwe. Ngu toneto vagondisi va vanene va vhuna sigondo ti to si ziva vanathu dibanzani ava va no si vhuna si kula ngu didhawa da moya. Sigondo si na tidila ngu kuva kumweko ni vathu va Txizimu a va va no va vhuna ngako va txi manana ni sikarato. Hi lava ti to sigondo si tipfa i di sa lisima dibanzani, ni kuva ni maxaka a moya. Hi lava ti to sigondo sipfa lirando ni kuwona vumwewo wa vanathu va ha mafuni kotshe, se eto ti na si vhuna si wila wuxaka ni vathu va va si thumeliko Jehovha. (Mav. 13:20) Ngako vangana vakwe va kale va txi mu nyekula, ene a na ti ziva to a na mana vangana va ditshuri ka sengeletano ya Jehovha.—Marku 10:29, 30; 1 Pedro 4:4.

12. Ngu kutxani hi di fanete kuvhuna sigondo si wona lisima la kutiningetela ni ku bhabhatiswa?

¹² Ka gondo yanu m’vhune e wona lisima la kutiningetela ni ku bhabhatiswa. Phela txikongomelo txathu hi txi tsimbitisa gondo ya Bhiblia ngu vhuna m’thu e va mgondiswa wu a nga bhabhatiswa. Ngako mi di ni mitxima  mi di khatile kugonda mi si lovhi, txigondo txi txita mitshanganoni txi si lovhi, txi fanete txi pfisisa ti to txikongomelo txo gonda Bhiblia ngu txivhuna txi thumela Jehovha kota mmweyo wa Tifakazi ta Jehovha.

13. Ngu tihi ti txigondo txi fanelako kumaha kasiku txi kula txi hokela ha ko bhabhatiswa?

¹³ He wone timhaka ti ti nga vhunako txigondo ti to txi kula txi hokela ha ko bhabhatiswa! Txo khata, txigondo txi na ziva ni ku randa Jehovha ni ku va ni likholo Kwakwe. (Joh. 3:16; 17:3) Txa wumbidi txigondo txi na va ni wuxaka ni Jehovha ni ku aka wungana ni vanathu dibanzani. (Vaheb. 10:24, 25; Jak 4:8) Ngu kutsimbila ka mbimo txigondo txi na vayilela mahanyelo o biha ni ku tisola ka sionho sa txona. (Mith. 3:19) Ngu mbimo yoneyo likholo la txona li na txi susumetela ku bhulela vamwani a ti txi ti gondako. (2 Vak. 4:13) Ngu magwito a na tiningetela ka Jehovha ni ku kombisa ku tiningetela kwakwe ngu ku bhabhatiswa. (1 Pedro 3:21; 4:2) Edo di nava ditshiku do tsakisa ngutu ka votshe dibanzani! Mbimo yi txigondo txi mahako timweto ta ti ti nga txi vhunako kukula txi hokela ha ko bhabhatiswa, u fanete ku txi ndunduzela ni ku txi kuzeta ti to txi simama txi kula txiya masoni.

14. Muhuweleli a nga ti zivisa kutxani ti to txigondo txa kula mwendo ahim-him?

¹⁴ Ti lava hiva ni kutimisela mbimo yi hi vhunako m’thu ti to e kula e hokela ha ko bhabhatiswa. Hambiketo ti lava hi wonisisa ti to ina wa ti lava ku thumela Jehovha kani. Ti lava hi wona ti to ina wa zama kuengisa sirumo sa Jesu mwendo ahim-him. Mwendo o lava ku va ni wuzivi wa Bhiblia basi.

15. Ngu tihi ti muhuweleli a fanelako ku ti xolisisa kasi ku wona to ina txigondo txa kula ngu didhawa moya mwendo ahim-him?

¹⁵ Mbimo yotshe wonisisa to txigondo txako txa kula mwendo ahim-him. Ina wa womba to wa tsaka ngu ku va a txi ziva Jehovha? Ina wa khongela ka Jehovha? (Mas. 116:1, 2) Ina mbimo yotshe wa lera Bhiblia? (Mas. 119:97) Ina wa ya mitshanganoni mbimo yotshe? (Mas. 22:22) Ina a mahile kutxitxa ko kari ka wutomi wakwe? (Mas. 119:112) Ina a khatile ku bhulela vangana ni maxaka ati a ti gondako? (Mas. 9:1) Txa lisima,  ina wa ti lava kuva mmweyo wa Tifakazi ta Jehovha? (Mas. 40:8) Ngaku a si se maha txilo ka totshe ti ti nga kombiswa hawa, zama kuziva to ngu kutxani, u tshumela u bhula nayo ngu nzila ya yinene ngu mhaka yiya, kambe u nga jika-jike. *

16. Nji txani txi nga ku vhunako kuwona to u nga simama u gonda ni m’thu wo kari mwendo ahim-him?

¹⁶ Ti lava u ta u wona ti to ina u nga simama u gonda ni m’thu wo kari kani. Ti wotisi tiya: ‘Ina wa lulamisela gondo? Ina wa tsakela kuya mitshanganoni? Ina wa txitxa mahanyelo akwe? Ina a lekile wukhongeli wa makuhu?’ Ngako xamulo i di ahim-him, u txi simama u gonda nayo to fana ni kuzama gondisa ku sambela m’mthu wa ku a si lavi ni kunakana! Ngako m’thu asi na mhaka ni ti a ti gondako, nem asi lavi kumaha kutxitxa, kha tivhuni txilo kusimama u gonda nayo.

17. Ngu kuya ngu 1 Timoti 4:16, ngu tihi ti muhuweleli mmwani ni mmwani a fanelako ku ti maha?

¹⁷ Hi wu tekela ha msungo mthumo wathu wo maha vagondiswa, ni wo vhuna sigondo si kula si hokela ko bhabhatiswa. Ngu toneto hi na leka Bhiblia yi gondisa ni ku va vhuna ve wona lisima la ti va ti gondako. Hi na tshumela hi va vhuna ve va ni vangana dibanzani. Ngu magwito hi na va vhuna ve wona lisima la kutiningetela ni ku bhabhatiswa, ni ku ti lava hi wona to ina va kula ngu didhawa da moya mwendo ahim-him. (Wona dibhokiso di di ku: “ Ngu tihi ti vahuweleli va fanelako ku ti maha kasi ku sigondo si hokelela bhabhatiso?”) Ta tsakisa kupateka ka mthumo wu wo hulukisa vathu! A hi tiemiseleni kumaha totshe ti hi nga ti kotako ti to hi vhuna sigondo si kula si hokela ko bhabhatiswa.